ޝިރާތް 5

“އައްސަލާމު އަލައިކުމް” މިއަދުވެސް ޝިރާތު ވަނީ ސަލާމް ގޮވާލާފައެވެ. “ވާލައިކުމް ސަލާމް” ސަލާމް ބަލައިގަތީ ހުޝާލެވެ. ހުޝާލް އެކަނި އިނުމުން ޝިރާތުގެ ހިތް ތެޅިގަތެވެ. ދެފަރާތް ބަލައިލެވުނީ އަރޫމާ ފެންނަން ހުރިތޯއެވެ. “ކޮބާ އަރޫމާއްތަ؟ ލީން؟” ޝިރާތު ކަރުކެހިލާފައި ވާޙަކަ ދެއްކިއެވެ.

(5 ވަނަ ބައި)

“އަރޫ ލީން ރީތި ކުރަނީ. އިށީންދެލާ” ހުޝާލް ހީލިއެވެ. ފަސްޖެހިފައި ހުރެ، ޝިރާތު ގޮސް ސޯފާގައި އިށީނެވެ. ޝިރާތު ގޮސް އިށީނުމުން ހުޝާލް ގޮސް އިށީނީ ޝިރާތު ގައިގައި ޖެހި ފިތިގެންނެވެ. ޝީރާތަށް އިނދެވުނީ ސޯފާގެ އެންމެ އެކޮޅުގައި ކަމުން ފަރާތަކަށް ހިރި ނުލެވިފައި ޝިރާތު އިނީ ވަރަށް އުނދަގޫ ވެފައެވެ. ނަމަވެސް އެއްޗެކޭ ބުނާކަށް ނުކެރުނެވެ. ބިރުން ހިތް ތެޅި ތެޅި އިން ޝިރާތު ސިހުނީ ހުޝާލް މަޑުން އިނދެފައި ކޮއްލި ކަމަކުންނެވެ.

“ރޭގަ އަރޫ ކިޔައިދިން ޝިރާތް މަންމަމެން ވާޙަކަ. ވަރަށް ދެރަވި އެވާޙަކަ އިވިފައި. ހިތްވަރު ކުރައްޗޭ. އިންޝާ ﷲ ޝިރާތް މަންމައާއި ބައްޕައަށް މާތް ﷲ ސުވަރުގެ މިންވަރު ކުރައްވާނެ” ހުޝާލް ވާހަކަ ދެއްކީ ޝިރާތްގެ ކޮނޑުގައި ހިފާ ގަޔާލާ ތަތްކޮއްގެން އިނދެގެންނެވެ.

“އިންޝާ ﷲ” ހުޝާލްއާއި ދުރުވެލަމުން ޝިރާތް ބުނެލިއެވެ. އެވަގުތު އަރޫމާ ހެލީން ގޮވައިގެން ނިކުތެވެ. ދޮރު ހުޅުވުނު އަޑަށް ހުޝާލް ތެދުވިއެވެ. “ބައްޕި ދޫނި. އަވަހަށް ދޭ ޝިރާ ދައްތި ކައިރިއަށް. ބައްޕިމެން މިދަނީ” ޝިރާތް އުނގުގައި ހެލީން ބައިންދަމުން ހުޝާލް ބުންޏެވެ. “ހެހެ މިދަނީ އިނގޭ. ބާއި”

އަރޫމާއާއި ހުޝާލް ނިކުމެގެން ދިޔުމުން ޝިރާތަށް ފުންނޭވާއެއް ދޫކޮށްލެވުނެވެ. “ތައްތި ސައިބުއީތަ؟” ހެލީން އަހާލީ މައުސޫމް ގޮތަކަށެވެ. ހެލީންގެ ސުވާލާއި އެކު ޝިރާތަށް ހަމަ ބިމަށް އާދެވުނެވެ. ތެދެކެވެ. ހައުޒާން ކަމާއި ބޯގޮވާފައި ހުރުމުން ޝިރާތް މިއަދު އެހުރީ ސައިވެސް ނުބޮއެއެވެ.

“ނުބޮދޮ؟ ހިގަ އަވަހަ ބަދިގެއަ” ހެލީން ވާހަކަ ދެއްކީ ކޮށިކޮށެވެ. ޝިރާތަށް ހިނިތުންވެވުނެވެ.

މެންދުރުގެ ވަގުތެވެ. ހެލީން ނިންދަވާލާފައި ޝިރާތް ނިކުތީ ސިޓިންގް ރޫމްއަށެވެ. ހެލީން ކުޅެން ގެންގުޅުނު އެއްޗެހި އެއްކައިރި ކޮއްލާށެވެ. އަނގައިން މަޑު ރާގެއް ލައްވަމުން ކުޅޭ އެއްޗެހިތައް ނަގަން އިން ޝިރާތް ސިހުނީ ކުއްލިއަކަށް މީހަކު ދޮރު ހުޅުވާލުމުންނެވެ.

“ހުޝާލްބެ؟” ޝީރާތަށް މަޑުމަޑުން ގޮވާލެވުނެވެ. ހުޝާލްގެ މޫނު މަތީގައިވީ ކަންބޮޑުވުން ފެނިފައެވެ.

“ކޮ… ކޮބާ… ލީން…؟” ހުޝާލް އަހާލިއެވެ. އެއަޑުގައި ވަރުބަލި ކަމާއި ކަންބޮޑުވުން ހުއްޓެވެ. މޫނު މަތީގައި އޮށްދާ ހިތްލަމުން ދިޔައިރު، ލައިގެން ހުރި ނޫކުލައިގެ ގަމީސްވެސް ވަނީ ދަލުން ފޯވެފައެވެ. ކަކޫ މަތީ އަތް އަޅައިގެން އޮވެ ހުޝާލް ދިޔައީ ފުންކޮށް ނޭވާތަކެއް ލަމުންނެވެ. “ހުޝާލްބޭ؟ ކިހިނެތްވީ؟” ޝިރާތް ކުރިއަށް ދެތިން ފިޔަވަޅު އަޅާލިއެވެ.

“ޝިރާ. އަރޫ… މަގޭ އަރޫ… އަރޫ ގަޔަށް މީހަކު ވަޅި ހަރާފައި އޮއްވާ ފެނިގެން މިއުޅެނީ… މާލެ ގެންދަން އެއުޅެނީ” ފުންނޭވާތަކެއް ލަމުން ހުޝާލް ބުންޏެވެ. ޝިރާތަށް އަނގަމަތީގައި އަތް އެޅުނެވެ.

“ކޮބާ ލީން.؟ ދޭބަ ލީން ގޮވައިގެން އަންނަން” ހުޝާލް ހެދުނެވެ. “އެކަމަކު.. ލީން ނިދިފަ-”

“ހެވޭ. ދޭބަލަ އެކޮއެ ގޮވައިގެން އަންނަން!” ޝިރާތްގެ ވާހަކަ ހުއްޓުވާފައި ހުޝާލް ތަންކޮޅެއް ބާރަށް ބުންޏެވެ. ހުޝާލްގެ އަޑަށް ހެލީން ހޭލާ ރޯން ފެށި އަޑު އިވުނެވެ.

“މި އަންނަނީ.. މިއަންނަނީ ތައްޔާރު ކޮއްލައިގެން. ޔާ ރައްބީ.. އަޅެ ކޮންކަހަލަ މީހަކުތަ މިކަހަލަ ކަމެއް ކުރާނީ. އަޅެ ކުޑަ ކުއްޖެއްގެ މަންމަ. މާތް ކަލާކޯ” ޝިރާތް ކޮޓަރިއަށް ވަންނަމުން ބުނި އަޑު ހުޝާލަށް އިވުނެވެ.

ޝިރާތު ކޮޓަރިއަށް ވަނުމާއި އެކު ހުޝާލް ހަށިގަނޑު ތެދު ކޮއްލިއެވެ. އަތުގެ ނުފުށުން ނިތުގައި ހުރި ދާތިކިތަށް ފުހެލިއެވެ. ކޮޓަރި ދޮރާ ދިމާލަށް ބަލައިލަމުން އެއްމިޔަކަނުން ހީލިއެވެ. “ވަރަށް ނުލަފާ މީހެއް. ހެހެހެ” ހުޝާލް ވިހަ ހިނިތުންވުމަކާއި އެކު ބުންޏެވެ.

އަރައިގެން ހުރި ބޫޓު ބާލާފައި ހުޝާލް ގޮސް ސޯފާގައި އިށީނެވެ. ކަރުގައި އިން ޓައީ ދޫކޮށްލާފައި ކުރިމަތީ އިން ބިއްލޫރި މޭޒުމަތީގައި އޮތް ރިމޯޓު ނަގާ ޓީވީ ހުޅުވާލިއެވެ.

“ދާދި ދެންމެ އަކު ށ.ކޮމަންޑޫގައި 29 އަހަރުގެ އަންހެނަކަށް މީހަކު ވަޅިން ހަމަލާ ދީފި. އަޅުގަނޑުމެނަށް ޙަބަރު ލިބޭ ގޮތުގައި އޭނާ ގަޔަށް ވަޅި ހަރާފައިވަނީ އޭނާ މަސައްކަތް ކުރާ އޮފީހުގެ ފާހާނާ ތެރޭގައި އުޅުއްވަނިކޮށް. ވަޅި ހެރިފައި ވަނީ އޭނާގެ ކޮނޑަށް ކަމަށާއި އެއަންހެން މީހާ މާލެ ގެންދިޔުމުގެ ތައްޔާރީތައްވެސް ވަމުން ދާކަން އަޅުގަނޑުމެނަށް ވަނީ ޙަބަރު ލިބިފައި. އިތުރު ތަފްސީލް އަންނަނީ. ދެން މިބަލާލަނީ…”

ޙަބަރު އަޑު އަހަން އިން ހުޝާލް އިނީ ހިތްހަމަ ޖެހިފައެވެ. އެހެނަސް އެހުރިހާ އިހުސާސެއް ކުޅަދާނަ ކަމާއި އެކު ވަންހަނާ ކޮއްލީ ހެލީން ގޮވައިގެން ކޮޓަރިން ނިކުން ޝިރާތް ފެނިފައެވެ.

ޝިރާތް ގޮވައިގެން ހުޝާލް ވައިން އިރު އަވަސް ފަރުވާދޭ ކޮޓަރި ކުރިމަތީގައި ދެކޮޅަށް ހިނގާލަ ހިނގާލަ އަރޫން ހުއްޓެވެ. އަރޫނަކީ އަރޫމާގެ ބޭބެއެވެ.

“ހުޝާލް. ދޮންބެއަށް ފެންނަނީ ހުޝާލް މިކޮޅުގައި މަޑުކުރަން. ދޮންބެ ދާނަން އަރޫއްކޮ ގޮވައިގެން މާލެއަށް” އަރޫން ބުނެލިއެވެ. އަރޫންގެ އެއެދުމާއި އެކު ހުޝާލްގެ ހިތް އުފަލުން ނަށައިގަތެވެ. ނަމަވެސް މޫނު މަތިން ދައްކަމުން ދިޔައީ އެހެން އިހުސާސެކެވެ.

(ނުނިމޭ)

ހަވަނަބައިގެ ތެރެއިން:

ޝިރާތު ދައްކަމުން ދިޔަ ވާހަކަ އިން ހުޝާލް ބޮލަށް އުނދަގޫ ވުމުން އަނެއްކާވެސް ގޮށް މުއްކަވާފައި ޝިރާތު މޫނު މަތީގައި ޖެހިއެވެ. ވަގުތުން ނޭފަތް ފަޅައިގެން ދިޔައެވެ. ހޯސް ލާފައި ލޭއަންނަން ފެށިއެވެ. ބޮލަށް އެރި އެނބުރުން ގަނޑާއި އެކު ޝިރާތު ހޭދެބައި ވެގެން ދިޔައެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.