ހާދަ ލޯބިންނޭ….

މިރެއަކީ ގޯލްޑެން ކޮމްޕެނީގެ ކޮންމެ މުވައްޒިފަކަށް ވެސް ވަރަށް މުހިންމު ރެއެކެވެ. ރެއަކީ އެ ކޮމްޕެނީއަށް 10 އަހަރު ފުރޭތީ ބާއްވާ ހާއްސަ ޕާޓީ އޮތް ރެއެވެ. ކޮންމެ މުވައްޒިފެއްވެސް ޕާޓީ އޮތް ހޯލަށް އައީ ވެވޭނެ އެންމެ ފުރިހަމައަކަށް ވެގެންނެވެ. ކޮންމެ މީހެއްވެސް ލައިގެން ހުރީ އެ ޕާޓީގެ ތީމްކުލަކަމަށް ވާ ނޫކުލަ އަދި ހުދު ކުލައިން ޖަރީކުރެވިފައިވާ ހެދުމެވެ. ނުވަތަ ގަމިހާއި ފަޓްލޫނާއި ކޯޓެވެ. މިރޭ ހާއްސަ ރެއަކަށް ވެގެން ވަނީ މުވައްޒިފުންގެ ބައެއް ހަރަކާތްތަށް ދައްކާތީއެވެ. އެންމެންވެސް އެކި ގުރޫޕް ގުރޫޕަށް ބެހިގެން ގޮސް އެކި މޭޒް ތަކުގެ ވަށައިގެން ހުރި ގޮނޑިތަކުގައި އިށީނެވެ. އެންމެން ހަމަވުމާއި އެކުހެން ހޯލް ތެރެ ނޫކުލައިގެ ފަނޑު އައްޔަކަށް ބަދަލުވެގެން ދިޔައެވެ. އަދި ވަރަށް ހިތްގައިމު ރާގެއް ޖަހާލެވުނެވެ. ގިނަ މީހުން ލޯ މަރާލައިގެން ތިބީ އެރާގައި އެއްވަރަށް ހުމް ހުމް އަޅުވާލަ އަޅުވާލައެވެ. ހަމަ ހިމޭން އެ ހޯލްތެރޭ ހަމައެކަނި އިވޭ އަޑަކީ އެ ރާގުގެ އަޑެވެ. އަދި އެއްބައި މީހުން އެމީހުންގެ އިނގިލިތަކުން މޭޒުގައި ރާގާ ހަމަ ކުރުމަށް ޖަހާލާ ޖެހުމުގެ އަޑެވެ. ހީވާގޮތުން ނަމަ އެންމެންވެސް އެ ރާގަށް މަސްތުވެފައި ތިބީއެވެ.
ހަމަހިމޭކަން ފޫ އަޅުވާލީ ސްޓޭޖަށް އެރި އަކްރަމްއެވެ. އަކްރަމު އަކީ ގޯލްޑެން ކޮމްޕެނީގެ ވެރިއާއެވެ. “އައްސަލާމް އަލައިކުމް.. ހުރިހާ މުވައްޒަފުންނަށްވެސް މި ހަފްލާއަށް މަރުހަބާ ކިޔަން… އަޅުގަނޑު މާ ގިނަ ވާހަކަތަކެއް ދެއްކުމެއް ނެތިން.. ހެހެ.. ބުނެލަން އޮތް ވާހަކައަކީވެސް އަޅުގަނޑު ތިއިން ކޮންމެ މުވައްޒަފަކަށްވެސް ފަށް ފަށުން ޝުކުރު ދަންނަވަމޭ.. މިއަދު އަޅުގަނޑުމެންގެ ކޮމްޕެނީ ރާއްޖޭގެ ނަން ވިދާ އެއް ކޮމްޕެނީއަށް ވި ހަމަ އެކަނި ސަބަބަކީވެސް ތިޔަ ބޭފުޅުން ކުރި މިންނަތް މަސައްކަތުން… ތިޔަބޭފުޅުން ނެތް ނަމަ އަޅުގަނޑެއްވެސް މި ކޮމްޕެނީއެއްވެސް ނުހުންނާނެ… ތިޔަ ކުރައްވާ ބުރަ މަސައްކަތްތަކަށް އަޅުގަނޑު ޝުކުރު ދަންނަވަން.. ތިއިން ކޮންމެ ބޭފުޅަކީވެސް މި ކޮމްޕެނީގެ ދިރުން… ކުރި އެރި މަގްސަދު.. ފާއިތުވެ ދިޔަ އަހަރުތަކުގައި ނުވާ ވަރަށް މި އަހަރު އަޅުގަނޑުމެންގެ ކޮމްޕެނީ ކުރިއެރިކަން ފާހަގަ ކޮށްލަން.. އިންޝާﷲ މިއަށްވުރެވެސް ކުރި އަރާނެ ދެން އޮތް އަހަރުތަކުގައި… އަޅުގަނޑުގެ ވާހަކަ ދެން ކުރުކޮށްލަނީ މި ހަފްލާ ތިޔަބޭފުޅުންނަށް ވަރަށް ހިތްގައިމު ވާނެ ކަމައް އުއްމީދު ކުރަމުން.. ޝުކުރިއްޔާ..” އަކްރަމް އަކީ އެ ކޮމްޕެނީގެ ވެރިޔާ ކަމުގައިވިޔަސް ދުވަހަކުވެސް އެކަމާ ބޮޑާވެގެން އެއްވެސް މީހަކަށް އަމުރުކޮށެއް ނުހަދައެވެ. އޭނާ ދެކޭގޮތުގައި މިއަދު އޭނާ އެ މަޤާމުގައި ހުރީވެސް އަދި އޭނާގެ ކޮމްޕެނީ އެހާ މަޝްހޫރުވީވެސް މުވައްޒަފުންގެ ސަބަބުންނެވެ. އެކުވެރިކަމަކީ ގަދަފަދަ ބާރެކޭ ބުނާ އަޑު އޭނާ ވަނީ އަހާފައެވެ. އެހެންކަމުން އަބަދުވެސް މަސައްކަތް ކުރަނީ އެންމެންނާއި ވެސް އެކުވެރިކަން ބާއްވާށެވެ. އޭނާއަށްވުރެ ކިތަންމެ ދަށުގައި މަސައްކަތް ކުރާ މީހަކަށްވިޔަސް ހެވެވެ. އޭނާ ދެންމެ ދެއްކި ވާހަކަތަކުންވެސް އެކަން ވަރަށް ރަނގަޅަށް ފާހަގަވެގެން ދިޔައެވެ. އެހެންކަމުން އޭނާ ވަނީ އެންމެންގެ ލޯބި އަދި އިހްތިރާމް ލިބޭ ގަދަރުވެރި ވެރިއަކަށްވެފައެވެ.
އަކުރަމްގެ ވާހަކަ ނިމުމާއި އެކު އެންމެންވެސް އަތް ޖަހަން ފެށިއެވެ. އަކުރަމް އައިސް އިށީންނަންދެން އެންމެން ކޮޅަށް ތެދުވެ އަތްޖަހަން ތިބީ އޭނާއަށް އިހްތިރާމް ކުރުމުގެ ގޮތުންނެވެ. އަކްރަމް ގޮސް އިށީނުމާއި އެކު އޭނާގެ އަންހެނުން އާޝިޔާ އޭނާގެ އަތުގައި ހިފައި ބާރުކޮށްލީ “ޕްރައުޑް އޮފް ޔޫ” އޭ ބުނަމުންނެވެ.
އަކްރަމް އަކީ 40 އަހަރުތަށް ގުނަމުން ދާ ފިރިހެނެކެވެ. ދިގު އިސްކޮޅެއް ލިބި ފައި އަދި ބާމަތި ފުޅާ ކަސްރަތީ ހަށިގަނޑެއް ލިބިފައިވާ ރީތި މީހެކެވެ. އެ ފަން އިސްތަށިގަނޑުގެ ބޮޑުބައެއް ކަޅުކުލައިގެ އިސްތަށިތަށް ވެރިކަން ކުރަމުން ދިޔަކަމުގައިވިޔަސް ބައެއް ހުދު އިސްތަށިވެސް ހުއްޓެވެ. ނަމަވެސް އޭނާގެ ރީތި ކަމަކަށް ބަދަލެއް ނާދެއެވެ. ފަޅާފައި ހުރި ތުނބުޅިންނާއި ބޯ ބުމައިން އޭނާގެ މޫނުމަތިން ޝާހީ ކަމެއް ދައްކައެވެ. އަދި ލައިގެން ހުރި ކޯޓް ފަޓްލޫން ވަނީ އެ ކަސްރަތީ ހަށިގަނޑުގައި ހިފައިފާ ކަމުން ވަރަށް ރީތި ގޮތެއް ހުރެއެވެ.
އާޝިޔާއަކީވެސް ހަޑި މީހެއް ނޫނެވެ. އޭނާގެ ކުރު އަދި ކުޑަކޮށް ފަލަ ހަށިގަނޑުންވެސް އޭނާގެ ރީތިކަން ފާހަގަވެއެވެ. ލާފައި ހުރި ނޫ ދިގުހެދުން އަދި މޭމަތި ފޮރުވޭވަރަށް އަޅާލެވިފައި އިން ބޮޑު ނޫ އަދި ހުދު ބުރުގަލުން އޭނާއަކީ ދީންވެރި އަންހެނެއްކަން ދޭހަވެއެވެ. ދެމީހުން އެއްކޮށް ގޮނޑީގައި ތިބިއިރު ވަރަށްވެސް ގުޅެއެވެ.
ކުރިމަތީ ގައި ހުރި ހުދުކުލައިގެ ބޯޑަކަށް ސްކްރީން އެޅުމުން ކުޑަކޮށް އަލިވެގެން ދިޔައެވެ. ފެންނަމުން ދިޔައީ އެކި އަހަރުތަކުގައި އެކި ދުވަސް ދުވަހު މުވައްޒިފުންނަގާފައި ހުރި ފޮޓޯތަކެވެ. އެކި ދުވަސް ދުވަހުގެ ހަނދާންތަށް ތާޒާވަމުން ދިޔައެވެ. ބައެއްމީހުން ހޭ އަޑު އިވެންފެށުނެވެ. ފޮޓޯ ބަދަލުވާއިރު ނިވި ދިއްލެމުން ދިޔަ ހޯލް ފެންނަލެއް ވަރަށްވެސް ހިތްގައިމެވެ.
*************************************************
ބެކް ސްޓޭޖްގައި އެމީހެއްގެ ހަރަކާތަށް ތައްޔާރުވަމުން ދިޔަ ބައެއް މުވައްޒިފުންތަކަށް ބަލާލަމާތޯއެވެ.
އެންމެންގެ މޫނުމަތިން ނުތަނަވަސްކަން ފެންނަމުން ދިޔައެވެ. ކޮންމެމީހެއްވެސް ރިހާސް ކުރީ އެމީހަކަށް ވެވޭނެ އެންމެ ރަނގަޅަކަށެވެ. ވަގުތުތަކެއް ހުސްކޮށްގެންނެވެ. އެހެންކަމުން އެންމެންވެސް ދުޢާ ކުރީ އެމީހެއްގެ ހަރަކާތް ވީހާވެސް ރަނގަޅަށް އެއްވެސް ކުށެއް ނެތި ނިމިގެން ދިޔުމަށެވެ. ބައެއް މީހުން އަނެއްކާވެސް ރިހާސްކުރަންފެށީ އެމީހުންގެ ހިތް ހަމަ ޖައްސާލުމަށް ކަންނޭނގެއެވެ. އެއްބައި މީހުން ނެށުމެއް ދޭއިރު އަނެއްބައި މީހުން ޑްރާމާއެއް ކުޅެން ރެޑީވެގެން ތިއްބެވެ. އެ ކޮމްޕެނީއާއި ގުޅޭ ޑްރާމާއެއްކަން އިނގެނީ އެތާ ރިހާސް ކުރަން ހުރި އެކަކު އަކްރަމް ގޮތަށް ގަމިހެއް ލައި ވާހަކަދައްކަމުން ދިޔުމުންނެވެ. ގައުމީ ރީތި ނެށުމެއްކަން އިނގެނީ ދެތިން އަންހެންކުދިން ލިބާހެއްލައިގެން ބަނޑިޔާ ޖަހަން ތިބުމުންނެވެ. މިއެންމެންގެ ޖޯޝާއި ފޯރި ހުރިގޮތުން މި ޕާޓީ އެކަކުގެވެސް ހަނދާނުން ފިލާ ދާނެ ހެނެއް ހިއެއްނުވެއެވެ.
އެއެންމެންނާއި ދުރުގައި ގޮނޑިއެއްގައި އިށީންދެލައިގެން އިން ނީރާ އިނީ ލޯމަރާލައިގެން ގިޓައެއް ހިފައިގެންނެވެ. އޭނާ ކިޔަން ހަމަ ޖެހިފައި އިން ލަވަ ޕްރެކްޓިސް ކުރަނީއެވެ. ލަވައަކީ ނީރާގެ އެންމެ ގާތް އެކުވެރިޔާއެވެ. އެކަނިވާއިރު ލަވައިން ލިބޭ އެހީތެރިކަމުގެ ސަބަބުން އެކަނިވެރިކަން ފިލައިދެއެވެ. އޭނާ ގެ އިހްސާސްތައް ބައެއްފަހަރު ލަވައިގެ ސިފައިގައިވެސް ބަންޑުންކޮށްލެވެނީ އެހެންވެއެވެ. އޭނާއަކީ ޅެން ލިޔަންވެސް މޮޅު ކުއްޖެކެވެ.

އޭނާގެ ސިލްވަރ ކުލައިގެ އެ ގިޓާގައި ވަނީ ޑިސްކޯ ފާޑަކަށް ޑިޒައިންކޮށްފައެވެ. ގިޓާގައި ފިޔާތޮށި ކުލައިން ‘ނީ’ ޖަހާފައިވާއިރު އޭގެ ތިރީގައި ނޫ ކުލައިން ‘ޝައިން’ ޖަހާފާއިނެވެ. ބަލާލި ކޮންމެ މީހަކަށްވެސް އެ ލިޔުން ފާހަގަވާނެއެވެ. ނީރާގެ ވަނަން ކައިރި ޝައިން ޖަހާފައި އިނުމުން އޭނާގެ ދިރިއުޅުމުގައި ޝައިންގެ ނަން ނިސްބަތްވާ ކުއްޖާގެ މުހިންމު ކަން އިނގެއެވެ.
ނީރާ އިނީ އަތްދިގު ހުދު ކުލައިގެ މެކްސީއެއްލައިގެންނެވެ. ނޫކުލައިގެ މާތަކަކުން ޑިޒައިން ކޮށްފައި އިން އެ މެކްސީ ހީވަނީ ހަމަ ނީރާއަށް ހަދާފައި އިން ހެދުމެއް ހެންނެވެ. އޭނާއާއި އެހާވެސް ގުޅެއެވެ. ލޯމަރައިގެން އިން އިރު ކޮށްފައި އިން ކުލަ މަޑު މޭކަޕް ފާޅުވާން ހުއްޓެވެ. ލޯ ކައިރިއަށް ހިޔަނި އެޅޭހާވަރަށް އެސްފިޔަތަށް ދިގެވެ. އެ ފަން އިސްތަށިގަނޑުވަނީ ރީތިގޮތަކަށް އައްސާލެވިފައެވެ. އަދި ވައްޓާލެވިފައި ހުރި އިސްތަށިތަކުން އެ ރީތި އޮމާން އަދި ކުލަ މަޑުމޭކަޕަކުން ފުރިހަމަކޮށްލާފައިވާ މޫނު އިތުރަށް ފުރިހަމަ ކޮށްލައިދެއެވެ. ހިމަތޮޅި އަދި އެހާވެސް ކުރު އަދި އެހާވެސް ދިގު ނޫން އެ ހަށިގަނޑު ވަރަށް ވެސް ރީއްޗެވެ. ޒުވާނުންގެ ހިތްތަށް ކަތިލާނެކަން ޔަގީނެވެ. އޭނާ އިނީ ހިސާބަކަށް ނުތަނަވަސްވެފައި ކަން އިނގެނީ ލަވަކިޔަމުން ދިޔައިރުގައިވެސް ދެބުމަ ގޮށްޖަހާލެވިފައި އިނީމައެވެ.

********************************************************
ސްކްރީންއިން ފެންނަމުން ދިޔަ ފޮޓޯ ތަކާއި ދިމާލަށް ހިނިތުންވުމަކާއި އެކު ބަލަން އިން އަކްރަމް ކުޑަ ސިހުމާއި އެކު ފަހަތް ބަލާލީ މީހަކު އޭނާގެ ކޮނޑުގައި އަތް އަޅާލުމުންނެވެ. ކައިރީގައި އިން އާޝިޔާވެސް ފަހަތް ބަލާލިއެވެ. އެއާއި އެކު އެ މޫނުމަތިން ފުޅާ ހިނިތުން ވުމެއް ފެނުނެވެ.
ހުދު ކުލައިގެ ގަމިހެއްގެ މަތިން ގަދަ ނޫކުލައިގެ ކޯޓެއް ލައި އަދި ތިރިން ހުދު ކުލައިގެ ފަޓްލޫނެއްލައިގެން ހުރި ޝާއިން ފެންނަލެއް ވަރަށްވެސް ހިތްގައިމެވެ. ބްލެކް އެކްސްއެސް ގެ މީރުވަސް އެތާ ހިފާލުމުން ކައިރި މޭޒް ގައި އިށީނދެ ތިބި ދެތިން ޒުވާން އަންހެން ކުދިން ނޭފަތް ދަމާލިއެވެ. އިސްތަށިގަނޑު ވަނީ ކުޑަކޮށް ހިއްލާލައިފައެވެ. އަދި ކުޑަކޮށް ދިގު ނުވެ ހުރި ތުނބުޅިން އޭނާގެ ފިރިހެންވަންތަކަން ހާމަވެއެވެ. ޝާއިން މިހާރު ހީވަނީ ރޯޔަލް އާއިލާއަކަށް ނިސްބަތްވާ ކުއްޖެއްހެންނެވެ. ވާނީވެސް އެހެންތާއެވެ. އާޝީޔާއާއި އަކްރަމްއަކީވެސް ހަމަ އެހާ ޝާހީ ގޮތް ގެންގުޅޭ ދެމީހުންނެވެ. އަކްރަމްގެ ދިގު އިސްކޮޅާއި ފަން އިސްތަށިގަނޑާއި ވަރުގަދަ އަދި ބާމަތި ފުޅާ ހަށިގަނޑެއް ލިބިފައި ހުރި ޝާއިން ވައްތަރީވެސް އަކްރަމް އާއި އޭ އެންމެންވެސް ބުނެއެވެ. ކަސްރަތުކޮށް ޖިމްއަށް ދާ ކަން އެ ކަސްރަތީ ހަށިގަނޑުން ރަނގަޅަށްވެސް އިނގެއެވެ. ބޭރު ގައުމުތަކުގައި މޮޑެލިން ކުރާ ފިރިހެނުންވެސް ފަހަތަށް ލާނެކަން ޔަޤީނެވެ. އޭނާއަށް އޮފީހުގެ ބައެއް އެކުވެރިން އެޑީ އޭ ވެސް ކިޔައެވެ. ސަބަބަކީ ޓްވައިލައިޓްގަ އުޅޭ އެޑްވާޑް އާއި އޭނަ އާއި ވައްތަރު ގޮތެއް ހުރުމުންނެވެ.
އަކްރަމް އޭނާގެ ހަމައެކަނި ދަރިފުޅުގެ އަތުގައި ހިފައި ކުރިޔަށް ގެނައެވެ. އަދި ކައިރި އިން ގޮނޑިއަށް އިޝާރާތް ކުރީ އިށީންނާށޭ ބުނުމުގެ ގޮތުންނެވެ. ޝާއިން ލުއި ހިނިތުން ވުމަކާއި އެކު އިށީނެވެ. މިއަދު އަކްރަމް އޭނާގެ އަމިއްލަ ނަފްސާއި މެދު ފަހުރުވެރިވެވުނެވެ. އޭނާ މި ހުރިހާ މަސައްކަތެއް ކުރީވެސް ހަމައެކަނި އެ ދަރިފުޅަށް ޓަކައެވެ. އޭނާއަށް ރަނގަޅު މުސްތަޤުބަލަށްޓަކައެވެ. އޭނާގެ މަސައްކަތް ބޭކާރު ނުވާކަން އިނގެނީ ޝާއިން އެ ދެމީހުންދެކެ ވަމުންދާ ލޯތްބާއި ކުރާ އިހްތިރާމްގެ ބޮޑުކަމުންނެވެ. އަދި ކިތަންމެ ފައިސާ ގިނަވިޔަސް އެއިން އެއްވެސް ނުބައި ކަމެއް ނުކޮށް ހެޔޮ ގޮތުގައި ހަރަދު ކުރަމުން ދާތީއެވެ. ހަމައެއާއި އެކު އޭނާއަށް ތަރުބިއްޔަތު ކުރެވިފައިވާ އޭނާގެ އަމިއްލަ ދަރިފުޅުގެ އަހްލާގް ރަނގަޅުކަމުންނާއި ދީނަށް ކުރާ ލޯބީގެ ބޮޑުކަމުންނެވެ. އެ ދެމީހުން މި ފަސްގަނޑަށް ދޫކޮށްފައި ދާނީ މުޖްތަމައުއަށް ބޭނުންތެރި އަދި އާއިލާގެ ނަން ރޯޝަންކުރާނެ ނިޝާނެކެވެ. ކޮންމެ މަޔަކާއި ބަފައެއްގެ ދުޢާ އަކީވެސް އަދި ދެކޭ ހުވަފެނަކީވެސް އެއީކަމާމެދު ޝައްކެއްވެސްނެތެވެ.
ޝާއިން އަކީވެސް އެ އޮފީހުގެ މުވައްޒިފެކެވެ. އޮފީހުގެ ވެރިޔާގެ ދަރިއަކަށް ވީތީއޭ ކިޔާ އޭނާ އަމިއްލަ އިމުން ބޭރެއް ނުވެއެވެ. އޭނާއަކީ ވެސް އޭނާގެ ބައްޕަ ފަދައިން އެހެންމީހުންގެ ނިންމުމަށް ޤަދަރު ކުރާ އެހެންމީހުންނާއި މެދުވެސް ވިސްނާ ޒުވާނެކެވެ.
“ދަރިފުޅާ! ކީއްވެ ލަސްވީ؟” އާޝިޔާ ޝާއިންގެ ގައިގާ ފިރުމާލީ ވަރަށްވެސް ލޯބިންނެވެ. އޭނާއާއި ދެބެންގެދެދަރި ކޮއްކޮމެންގެ ތެރޭ “މަމާސް ބޯއީ”ގެ ނަމުން އޭނާ މަސްހޫރުވެފައި ސަބަބެއްނެތިއެއް ނޫނެވެ. އެހާވެސް އޭނާގެ މަންމައާއި އޭނާ ގާތެވެ. “ކުޑަކަމެއް ކޮށްލަން ޖެހުނީމަ..!” ރީތި ހިނިތުން ވުމަކާއި އެކު އޭނާ އެހެން ބުނެލިއެވެ. އެއަށްފަހު އޭނާވެސް ނަޒަރު ހުއްޓާލީ ފެންނަމުން ދިޔަ ފޮޓޯތަކަށެވެ. ކުއްލިއަކަށް އޭނާގެ މޫނުމަތިން ހިނިތުންވުމެއް ފެނުނީ ނީރާއާއި އޭނާގެ ފޮޓޯގަނޑެއް ފެނިފައެވެ. އެޅުވިފައި ހުރި ސްކްރީން ނިމުމުން އެންމެންވެސް ހަމަޖެހިފައިވާކަން ދެއްކުމުގެ ގޮތުން އަތްޖަހާލިއެވެ.
ސްޓޭޖަށް އެރި ރާހިލް ފެނި އެންމެން ވެސް އިންތިޒާރުގެ ނިމުމަކަށް އައިކަން އިނގުނެވެ. ރާހިލް އައިސް އެންމެ ފުރަތަމަ ހަރަކާތެއްގެ ގޮތުން ބަނޑިޔާ ޖެހުމުގެ ހަރަކާތް އިއުލާން ކޮށްލިއެވެ. އެއާއި އެކު އަންހެން ކުދިން ކޮޅެއް އަރާ ރީތި ގައުމީ ލަވައަކާއި އެކު ބަނޑިޔާ ޖަހާލަން ފެށިއެވެ. ހަރަކާތަކަށް ފަހު ހަރަކާތެއް ނިމެމުން ދިޔައެވެ.
“ދެން އިން ހަރަކާތަކީ އަޅުގަނޑުމެންގެ ވަން އެން އޮންލީ ސިންގަރ ނީރާ  އަޅުގަނޑުމެންގެ ނަމުން ނަމަ ބެލީ ގެ ވަރަށް ރީތި ސޯންގްއެއް..” މައިކް ހިފަހައްޓައިގެން ހުރި ރާހިލް އެހެން ބުނެލުމަށްފަހު ކުރިމަތީ އިށީނދެ އިން ޒުވާނާއާއި ދިމާލަށް އެއްލޯމަރާލިއެވެ. އެއާއި އެކު ރާހިލް ފައިބައިގެން ދިޔައެވެ. އެންމެންވެސް އަތްޖަހަން ފެށިއެވެ. ހީވާގޮތުންނަމަ އެންމެންވެސް މި ހަރަކާތް ބަލަން ވަރަށް އިންތިޒާރު ކުރިއެވެ. ބެކް ސްޓޭޖަށް ރާހިލް އެޅި ފިޔަވަޅު ހުއްޓުނީ ދެލޯ ބޮޑުކޮށްލައިގެން ހުރި ނީރާ ފެނިފައެވެ. ގިޓާ ތިރީގައި ބަހައްޓާފައި ހުރިއިރު އޭގެ މަތީގައި އެއްއަތް އަޅާލައިގެން ނީރާ ހުއްޓެވެ. އެ ބޮޑު ދެލޮލުގައި ކަރުނައިގެ ފަށަލައެއްވެސް އެޅިފައިވެއެވެ. “ވަޓް ޑިޑް ޔޫ ޖަސް ސެއިޑް.. ނީރާގެ ސޯންގެއް؟؟.. އަހަރެންގެ؟؟؟؟؟” ނީރާ އެހެން ބުނެލުމުން ރާހިލް ކުޑަކޮށް ހިނިއައެވެ. ނަމަވެސް ހިނިގަނޑު އޮއްބާލިއެވެ. “ކޮބާ ޝައިން….ނާދޭތަ؟؟؟؟” ނީރާ އަހާލީ ކުރިއަށް ވުރެވެސް ބޮޑަށް ލޯ ބޮޑުކޮށްލައިގެންނެވެ. ރާހިލް އިސްޖަހާލިއެވެ. “ނެތް.. ހިއެއް ނުވެ އަންނާނެ ހެނެއް.. އެހެންވެ ޑުއެޓް އެކޭ ނުބުނީ.” ރާހިލް އޭނާގެ އިސްތަށިގަނޑުގައި އަތް ހިންގާލިއެވެ. އެއަށްފަހު ނީރާއާއި ދިމާލަށް ބަލާލިއެވެ.

-ނުނިމޭ (:-