ބޭވަފާތެރިޔަކީމޭ 39

“ދަރިފުޅާ.. ޔޫހާންގެ ބައްޕައަކީ ވަރަށް ވިޔާނުދާމީހެއް.. މަންމައާއި ޔޫހާންގެ ބައްޕައާއި ކައިވެނި ކުރިއިރުވެސް ބައްޕައަކީ މަސްތުވާތަކެތި ބޭނުން ކުރާ މީހެއް. ނަމަވެސް މަންމަ ބޭނުންވެގެން އެކައިވެނި ކުރީ މަންމަ މެންނާއި ދެކޮޅަށް. ޔޫހާންގެ ބައްޕަ ޔައީޝް ގަބޫލު ކުރާ ގޮތުގަ ދިރިއުޅުމެއް ލިބޭނީ އަންހެން ކުއްޖެއް ލިބުމުން. އޭނާ ގަބޫލު ކުރީ އަންހެން ކުއްޖަކު މުއްސަނދި މީހަކާ ކައިވެނި ކުރެވުމުން ހަޔާތުގެ ހުރިހާ ބޭނުމެއް ފުދުނީކަމަށް. ނަމަވެސް އަހަރެމެންނަށް ﷲ ދެއްވީ ފިރިހެން ކުއްޖެއް.. މަންމަ ސީ ސެކްޝަން ހަދަން ޖެހުނީމަ އެހާ އަވަހަށް އަލުން ބަނޑުބޮޑު ވާކަށް ނުކެރުނު. ދެން މަންމަ ބަލިވެ އިނީ ޔޫހާންއަށް 11 އަހަރުގަ.. ނަމަވެސް ދިމާވި އެކްސިޑެންޓްއެއްގެ ސަބަބުން އެތުއްތު ފުރާނަ ބައިގެން ދިޔައީ. އެފަހަރު ލިބެން އުޅުނީ ވެސް އަންހެން ކުއްޖެއް. ނަމަވެސް.. ދުނިޔޭގެ އަލިކަން އެފުރާނައަށް ފެނުމުގެ ނަސީބެއް ނުލިބުނު. ޔައީޝް ދެން ފެށީ އަނިޔާކުރަން. ޔޫހާންގެ ޅަސިކުނޑިއަށް އަސަރުކޮއް ނަފްސާނީ ބަލީގެ ޝިކާރައަށްވެ މަގޭ ދަރިފުޅު މުޅިން ހަލާކުވީ.. ޔޫހާން އާއި ނީޝަލް ގުޅުނީ އެދުވަސްތެރޭގަ. ނީޝަލްގެ ބޭވަފާތެރިކަމުން ޔޫހާންއަށް ވިސްނުނީ ޔައީޝް މަންމައަށް އެހެން އެހަދަނީ އަންހެނުންނަކީ މިކަހަލަ ބަޔަކަށްވީމައޭ.. ޔޫހާންއަށް ދަސްވެފައި އެހުރީ ޔައީޝްގެ އުޅުން.. މިއީ މަންމަގެ ކުއް.. ޔޫހާން ހަލާކު ކުރިމީހަކީ މިއީ… މި މަންމަ.. ނަސީބެއް ކަންނޭނގެ އެދަރިފުޅު ބައިގެން ދިޔަކަން.. އެހެން ނޫނަމަ ހަމަ އެހާލުގައި ކަންނޭނގެ އެކުއްޖާވެސް އުޅޭނީ..  މިހާރު އިރާދަކުރެއްވިއްޔާ ޔައީޝްގެ ވަކިތަކުން ވަނީ ސަލާމަތްވެފަ.. ޔޫހާން ދަރިފުޅާ ކައިވެނީގެ ކަންކަން ހަމަ ޖައްސަން ފެށުނު ހިސާބަކީ އެއީ.. ޔައީޝް މިހާރުވަނީ އެނބުރި ހެއްދެވި ފަރާތަށް އެނބުރި ގޮސްފަ.. ދަރިފުޅާ.. ޔޫހާން ދަރިފުޅު ދެކެ ލޯބިވޭ. ވަރަށް ވަރަށް ލޯބިވޭ.. މަންމަ ކައިރިއަށް އަހިސް އަބަދު ރޮއޭ.. ދަރިފުޅުވެސް އެހެން ހަދާފާނެތީވެ ބިރުގަންނަވާހަކަ… ނަފްސާނީ ގޮތުން އޭނާ އެހުރީ ހަލާކުވެފަ. ދަރިފުޅު ތިއީ ނަފްސާނީ ޑަކްޓަރެއްނުން؟ ހެޔޮނުވާނެ ދަރިފުޅާ މަގޭ ޔޫހާން އެބަލިން ސަލާމަތްކޮއްދީ…”

އެލީޝާގެ އަތުގައި ހިފައިގެން އިނދެ ޝިފާގެ ދުލުން އެއިވުނީ ޔޫހާންގެ ހިތި މާޒީއެވެ. ވާހަކަ އަހަންއިން އެލީޝާގެ މޫނު ވަނީ އޭރު ރޮއެ ރޮއެ ރަތްވެފައެވެ. އަބަދުހެވިފައި ހުރި ޔޫހާންގެ ހިނިތުންވުމުގެ ފަހަތުގައިމިވަނީ ކޮންފަދަ ހިތާމައެއް ހެއްޔެވެ؟ ޔޫހާންގެ އަނބިމީހާއަށްވެ ހުރެ އެކަން ނޭނގުމުން އެލީޝާއަށް އަމިއްލަ ނަފްސު ކުއްވެރި ކުރެވުނެވެ.

“އިންޝާ ﷲ އަޅުގަނޑު ޔޫހާން ރަނގަޅުކުރާނަން.. ﷲ އިރާދަ ކުރެއްވިއްޔާ ޔޫހާން ރަނގަޅުވާނެ.. މަންމަ އަމިއްލަ ނަފްސު ކުއްވެރި ނުކުރޭ.. އަޅުގަނޑުގެ ހިތް އަބަދުމެ ޔޫހާންއައްޓަކާ ސާފު.. އެލޯއިތްބައްޓަކާ ޖާނާމާލުން ގުރުބާންވާން އުމުރައްވެސް ތައްޔާރު..” އެލީޝާ ބުންޏެވެ.

“އެކަމަކު ދަރިފުޅާ… ޔޫހާންއަށް އެޔައްވުރެ ރަނގަޅު ބައްޕަ އެއް މަންމައަށް ހޯދާދެވުނު ނަމަ……” ޝިފާގެ ލޮލުންކަރުނަ އޮހޮރެމުން ދިޔައެވެ. މަންމައެއްގެ ގޮތުގައި ހުރެ “ފެއިލް” ވެވުނު ކަމުގެ އިހުސާސް އޭގެ އިންތިހާއަށް ކުރެވޭތީއެވެ.

“ނޫން މަންމާ… ދެރަނުވޭ.. އަޅުގަނޑު މިހުރީ އަބަދުގެ އަބަދައް ޔޫހާންއަށް ޓަކައި ލޯބިދޭން..” އެލީޝާގެ ޖަވާބުން ޝިފާގެ މޫނު މައްޗައް ހިނިތުންވުމެއްވެރިވި އިރު ހިތާ ހިތުން “އަލްހަމްދުލިއްލާހް” އޭބުނެވުނެވެ. އެކަހަލަ ޅީދަރިއަކު ލިބުމުންނެވެ.

“ދަރިފުޅާ.. ޔޫހާން ކައިރިއަށް ޖައްސާލައްޗޭ..” ޔޫހާން އުޅޭ ފްލެޓްގެ ނަމާއި އެޕާރޓްމެންޓް ތަޅުދަނޑިއެއް ދެމުން ޝިފާބުނެލިއެވެ. ޝުކުރު އަދާކޮއްފައި އެލީޝާ ނުކުތީ ހަލުވި ފިޔަވަޅުތަކެއްގައެވެ. ޔޫހާން ދެކުމައްޓަކާއި އެހިތްދިޔައީ ބޭގަރާރު ވަމުންނެވެ.

އެލީޝާ ގޭގައި ނެތްކަން އެނގުމުން ފަހަރަކު މީހަކައް ގުޅާފައި އަނާޝާ ހިނގަމުން ދިޔައީ ބިރުން ރޫރޫ އަޅާ ހާލުގައެވެ. ކުޑަކުޑަ ޔަލީންވެސް މަންމަ ނެތުމުން ދިޔައީ ރޮމުންނެވެ. މަންޒަރު ބަލަން އިން ލީޝާ އިނީ މި މަންޒަރު ބަލަން ރުޅިއަހިސްފައެވެ.

“ކޮބާ މަންމާ މަބުނީމެއްނުން؟ އެލީޝާ ކިޔަވާ.. އެލީޝާ މާ ދީނީ.. އެލީޝާ މާނިވާވޭ.. އެލީޝާ މާހެޔޮ.. ބަލަ ލޯބީގެ އަވައިގަ ޖެހުނީމަ އޭނަ މިހާރުވީތަންވެސް މަންމައަކައް ނޭނގެ. ތިވީ ހަމަ ރަނގަޅައް. މަންމަ އަބަދުވެސް އަހަރުމެން ކޮންޕެއާރ ކުރީ.. ރަނގަޅު އެސްފީނާއެއް މިޖެހުނީ އެލީޝާއަށް” ލީޝާ އެއްވެސް ފޮރުވުމެއްނެތި އެލީޝާއަށް ޓަކައި ލީޝާގެ ހިތުގައިވީ ހަސަދަވެރިކަން ފައުޅުކޮއްލިއެވެ. އަނާޝާ ހުރީ އިވުނު ވާހަކައިވި ބުނަންވީ އެއްޗެއް ނޭނގިފައެވެ. ނަމަވެސް ހަގީގަތުގައި ލީޝާއާއި ޒުވާބު ކުރާނެހާވަރެއް އަނާޝާ ގައިގައި ނެތީއެވެ.

“ދައްތާ… އެލާ ފެނިއްޖެ..” އަނާޝާއަށް އެއްޗެއް ނުބުނެވެނީސް މައުނާއާއި ނާއިލް އަހިސް ބުނެލިއެވެ. ލީޝާއާއި ދިމާލައް ކަޅި އަޅާލާފައި އަނާޝާ ގޮސް އެދެމީހުން ގާތުގައި ހުއްޓުނެވެ. ހުއްޓާ ނުލާ ރޮމުން ދިޔަ ޔަލީން އުރައިގެން މައުނާ އެކުއްޖާ މަސަލަސް ކުރެވޭތޯ މަސައްކަތް ފެށިއެވެ.

“މަގޭދަރިފުޅު ކޮބާތަ؟” މައުނާ ޔަލީން އުރުމުން ނާއިލް ގާތުގައި އަނާޝާއެއްސެވެ.

“އެލީޝާވީ މާލޭގަ.. ދަންވަރު ފްލެޓްއިން އޭނަ ދިޔައީ..” ނާއިލް ބުނެލިއެވެ. “އަހަރެން މާލެ ގެންގޮސްދީ.. އެކަނި އެހެން އުޅެވޭހާލަކު ނޫން އޭނަ އެހުރީ.. ނޭނގެ ޔޫހާން މަގޭ ދަރިފުޅައް ހަދާނީ ކިހިނެތް ކަމެއްވެސް..” އަނާޝާގެ ހިތުގައި ދިޔައީ ބިރުވެރިކަން އޭގެ އެންމެ ފުންމިނުގައި ދުވަމުންނެވެ.

“އަޅުގަނޑު މެންދުރު ފްލައިޓް އިން ދަތުރު ހަމަ ޖައްސައިފިން..” ނާއިލް ބުންޏެވެ.

ހުޅުމާލޭ ފޭސް 2 ގައި ހުރި 5 ވަނަ ބިލްޑިންގ ކުރިމަތީގައި ހުރި އެލީޝާގެ ހިތުގައި ދިޔައީ ތަފާތު އިހުސާސްތަކެއް ކުރެވެމުންނެވެ. އަތުގައި އޮތް ތަޅުދަނޑިއަށް ބާރުކޮއްލަމުން އެލީޝާ ހިނގައިގަތެވެ. ލިފްޓައް އަރާ 19 ވަނަ ފްލޯރއައް ފިއްތާލަމުން އެލީޝާ ފުންނޭވާއެއް ދޫކޮއްލިއެވެ. އަމިއްލަ ނަފްސު ތައްޔާރު ކޮއްލިއެވެ.

އެޕާރޓްމެންޓްގެ ދޮރު ހުޅުވާލުމާއި އެކު އެލީޝާއަށް މަރްހަބާކިއީ ފަޅުކަމެވެ. ދެކޮޅު ބަލައިލަމުން އެލީޝާ ގޮސް ކޮޓަރި ދޮރުގައި ހިފާލިއެވެ. ލަސްލަހުން ދޮރު ހުޅުވާލި އެލީޝާގެ ހަށިގަނޑުގައި ބިރުވެރިކަމުގެ ރާޅެއް ދުވެލިއެވެ. ބިންމައްޗައް ޖެހިގަނެވުނު އިރު އަޑުހަރުކޮއް ރޮއެ ގަނެވުނެވެ. “ޔޫހާން!!!!!”

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.