ބޭވަފާތެރިޔަކީމޭ 38

“އެކޮއެ.. ދައްތަ ކިހިނެތް ނުރޮއެ އިންނާނީ؟؟ އެންމެ ހަގު ދަރިފުޅު.. އެލާ މިހާތަނަށް އުޅުނީ ހާދަ އުފަލުގައޭ.. އެކަމަކު.. ދުވަހަކުވެސް ހިޔެއް ނުކުރަން އެލާއަށް މިކަހަލަ ކަމެއްވެދާނެކަމަކަށް… މާޔަންގެ ދުނިޔޭގަ ޔޫހާން އޭނައަށް ދެއްކީ ހާދަ ނަލަ ދަޅައެކޭ. ހަމަ ރަނގަޅަށް އަހަރެމެންގެ ލޮލުގަ އަނދުން އަޅުވާފަ އެޔޫހާން އެދިޔައީ.. ފުރަތަމަ އެކަންވީ ފަހަރުވެސް ދައްތަ ބުނިން ވަރިވާން.. އެކަމަކުވެސް މިކުއްޖާ ހަމަ ބޯހަރު ކަމުން… ދައްތައަށް މާވަރަށް އެހެން ކިޔަން ނުކެރުނީވެސް އެލާ ބަނޑުބޮޑު ކަން އެނގުނީމަ. ޔަލީން ވިހާ އެކުއްޖާއަށްވެސް އަދި އަހަރު ކިރިޔާ އެވަނީ.. ހެޔޮވާނީ ކިހިނެއް؟…” އަނާޝާގެ ހިތުގެ ޝަކުވާތަށް މައުނާގެ ކުރިމައްޗައް އޮއްސާލިއެވެ. މައުނާގެ ލޮލުން ވެސް ކަރުނަ ހިލުނެވެ. މިމައިމީހާގެ ހިތުގައި މިއަދު ހާދަހާވޭނެއް އަޅާނެތާއެވެ…

މާލޭގެ ބާރުބޮޑު މަގުމަތީގައި ކަޅުކުލައިގެ ސޫޓްއަކާއި އެކު އަންގި ލައްވާފައި އަދި ކަޅު ކުލައިގެ މޫނު ނުފެއްނަ ހެލްމެޓެއް އަޅައިގެން ސައިކަލުގައި ދިޔަ ޒުވާން ފިރިހެން ކުއްޖާއަށް ހުރިހާ އެންމެންގެ ލޯތައް ހުއްޓެން ފެށިއެވެ. އެޒުވާނާގެ ރީތި ހަށިގަނޑު ފެނި ޒުވާން އަންހެން ކުދިންތައް އޭނާގެ މޫނު ދުށުމައް ބޭގަރާރު ވާން ފެށިއެވެ.

ޓްރީޓޮޕް ހޮސްޕިޓަލް ކުރިމަތީގައި ސައިކަލު ހުއްޓާފައި ޔޫހާން ހެލްމެޓު ނެގިއެވެ. އިސްތަށިގަނޑުގައި އަތްހާކާލާފައި ފުންނޭވާއެއް ދޫކޮއްލީ ކުރަން އެއުޅޭ ކަންތަކަށް ތައްޔާރުވެލި ފަދައިންނެވެ.

“އައިޝަތް ޝިފާއާއި ބައްދަލު ކޮއްލެވިދާނެތޯ؟” ކައުންޓަރު ކައިރީ އިން ކުއްޖާ ގާތުގައި ޔޫހާން އެއްސެވެ. “ތިއީ ޝިފާގެ ކޮން ބޭފުޅެއްތޯ؟” އެކުއްޖާ އަހާލިއެވެ. “މިއީ ޝިފާގެ ދަރިފުޅު..” ޔޫހާން ބުނެލިއެވެ.

ދުވަސްތައް ފާއިތުވަމުން ގޮސް ހަފްތާއެއް ފާއިތުވެގެން ދިޔައެވެ. ގެޔައް ގެނެވުނު ފަހުންވެސް އެލީޝާ އިންނަނީ ގަބުވެފައެވެ. ކުޑަކުޑަ ޔަލީން މަންމަ ދެރަވެފައި އިންނާތީ ރޯއިރު، ބައްޕަ ފެންނަން ނެތުމުން އެކުއްޖާގެ ލޮލުން ކަރުނަ ނުހިކެއެވެ. މި މަންޒަރުފެނި އަނާޝާވަނީ ގޮތް ހުސްވެފައެވެ. ދަރިފުޅުގެ އެވޭނީ ރުއިމުގެ އަޑު އިވި އެލީޝާގެ ހިތްވެސް ދިޔައީ ފިސްފިސް ވަމުންނެވެ. ނަމަވެސް ދުލުން ބަހެއްނުބުނެ އެހެން އިންނަތާ މިހާރު ހަފްތާއެއްމިވީއެވެ. އަނާޝާމެންނަށް ނޭނގުނު ނަމަވެސް އެއީ އެލީޝާގެ ރޭވުމެކެވެ. ގަދަހަދައިގެން ދާން އުޅެފި ނަމަ އެލީޝާއަށް ނުދެވޭނެ ކަން މިހާރު އެލީޝާއަށް ޔަގީން ވެއްޖެއެވެ. އެހެން ކަމުން އެލީޝާ ކެއްކުރަމުން ދިޔައީ މިވަގުތަށެވެ.

ދަންވަރުގެ ވަގުތެވެ. ގަޑިން 30 1 ބައިވި އިރު އެލީޝާ ހުރީ އެއާރޕޯޓުގައެވެ. ދަންވަރު ފްލައިޓުން އެލީޝާ މާލެ ފުރީ ޔޫހާން އަދި މައިދައިތަވެސް ފެންނާނެ ކަމުގެ އުންމީދުގައެވެ. ފުރަތަމަ ފަހަރަށް ޔަލީން ނުލައި އެހާ ދުރަށް ދާން ޖެހުމުން އެލީޝާއަށް ދިޔައީ ކެއްކުރަން އުނދަގޫ ވޭނެއް އިހުސާސް ވަމުންނެވެ.

ޖެހިގެން އައިދުވަހުގެ ހެނދުނެވެ. އެލީޝާ ހުރީ ޓްރީޓޮޕް ހޮސްޕިޓަލް ކުރިމަތީގައެވެ. އަތްފައިފިނިވެފައިވީ ނަމަވެސް އެލީޝާ ކުރިއަށް ހިނގައިގަތެވެ. “އައިޝަތް ޝިފާއަށް ބައްދަލު ކޮއްލެވިދާނެތޯ؟” އެލީޝާއެއްސެވެ.

ނަރުސްކުއްޖާ އެލީޝާ ވެއްދީ ކުޑަ ކޮޓަރިއަކަށެވެ. ކޮޓަރީގައި މޭޒެއް އިން އިރު ޝިފާ އިނީ ބަލިމީހުން ލާ ހެދުމެއްގައެވެ. މޫނުމަތީގައި ވަރުބަލި ކަން ހުރި އިރު އެމޫނު މަތިން އެލީޝާއަށް ސިފަވީ ހަމަ ޔޫހާންއެވެ. އެހާވެސް ވައްތަރެވެ. “ކޮންކުއްޖެއް؟” އެލީޝާ އިށީނުމުން ޝިފާއެހީ ސުވާލުން ފުރިގެންވާ ނަޒަރެއް އެލީޝާއަށް ދެމުންނެވެ. އެލީޝާގެ ޖަވާބަކަށްވީ އެލީޝާގެ ފޯނެވެ. ޖުމްލަ ދުލާހަމަޔަށް ނައީއެވެ. ފޯނު ލޮކްސްކްރީންގައި އިން ޔޫހާންއާއި އެލީޝާގެ ކައިވެނީގެ ފޮޓޯ ފެނި ޝިފާގެ މޫނަށް ވެރިވީ ބަޔާން ކުރަން ދަތި އިހުސާސްތަކެކެވެ. “ތިއީ.. ޔޫހާންގެ އަންހެނުންތަ؟” ޝިފާ އެއްސެވެ. އޭރު އެދެލޮލުގައި ކަރުނަވިދަމުން ދިޔައެވެ. “ލައްބަ” އެލީޝާ ބޯޖަހާލަމުން ބުނެލިއެވެ. ޝިފާތެދުވެ ގޮސް އެލީޝާގެ ހަށިގަނޑުގައި ބައްދާލިއެވެ. އެލީޝާއަށް ކަރުނަތައް ހިފެހެއްޓުނީ އެހާ ހިސާބަށެވެ.

“ދަރިފުޅާ.. ހެޔޮނުވާނެ. މަންމަ އާދޭސް ކޮއްފަ މިބުނީ ޔޫހާންއަށް މާފު ކޮއްދީ.. އެއީ ޔޫހާންގެ ކުށެއްނޫން.. އެއީ މަންމަގެ ކުއް..” ޝިފާ ބުނެލީ ރޮމުންނެވެ. “ނޫން މަންމާ.. ތިހެން ނުބުނޭ…” އެލީޝާ ޝިފާގެ ކޮނޑުގައި ފިރުމާލިއެވެ.

“ދަރިފުޅާ.. ޔޫހާންގެ ބައްޕައަކީ ވަރަށް ވިޔާނުދާމީހެއް.. މަންމައާއި ޔޫހާންގެ ބައްޕައާއި ކައިވެނި ކުރިއިރުވެސް ބައްޕައަކީ މަސްތުވާތަކެތި ބޭނުން ކުރާ މީހެއް. ނަމަވެސް މަންމަ ބޭނުންވެގެން އެކައިވެނި ކުރީ މަންމަ މެންނާއި ދެކޮޅަށް. ޔޫހާންގެ ބައްޕަ ޔައީޝް ގަބޫލު ކުރާ ގޮތުގަ ދިރިއުޅުމެއް ލިބޭނީ އަންހެން ކުއްޖެއް ލިބުމުން. އޭނާ ގަބޫލު ކުރީ އަންހެން ކުއްޖަކު މުއްސަނދި މީހަކާ ކައިވެނި ކުރެވުމުން ހަޔާތުގެ ހުރިހާ ބޭނުމެއް ފުދުނީކަމަށް. ނަމަވެސް އަހަރެމެންނަށް ﷲ ދެއްވީ ފިރިހެން ކުއްޖެއް.. މަންމަ ސީ ސެކްޝަން ހަދަން ޖެހުނީމަ އެހާ އަވަހަށް އަލުން ބަނޑުބޮޑު ވާކަށް ނުކެރުނު. ދެން މަންމަ ބަލިވެ އިނީ ޔޫހާންއަށް 11 އަހަރުގަ.. ނަމަވެސް ދިމާވި އެކްސިޑެންޓްއެއްގެ ސަބަބުން އެތުއްތު ފުރާނަ ބައިގެން ދިޔައީ. އެފަހަރު ލިބެން އުޅުނީ ވެސް އަންހެން ކުއްޖެއް. ނަމަވެސް.. ދުނިޔޭގެ އަލިކަން އެފުރާނައަށް ފެނުމުގެ ނަސީބެއް ނުލިބުނު. ޔައީޝް ދެން ފެށީ އަނިޔާކުރަން. ޔޫހާންގެ ޅަސިކުނޑިއަށް އަސަރުކޮއް ނަފްސާނީ ބަލީގެ ޝިކާރައަށްވެ މަގޭ ދަރިފުޅު މުޅިން ހަލާކުވީ.. ޔޫހާން އާއި ނީޝަލް ގުޅުނީ އެދުވަސްތެރޭގަ. ނީޝަލްގެ ބޭވަފާތެރިކަމުން ޔޫހާންއަށް ވިސްނުނީ ޔައީޝް މަންމައަށް އެހެން އެހަދަނީ އަންހެނުންނަކީ މިކަހަލަ ބަޔަކަށްވީމައޭ.. ޔޫހާންއަށް ދަސްވެފައި އެހުރީ ޔައީޝްގެ އުޅުން.. މިއީ މަންމަގެ ކުއް.. ޔޫހާން ހަލާކު ކުރިމީހަކީ މިއީ… މި މަންމަ.. ނަސީބެއް ކަންނޭނގެ އެދަރިފުޅު ބައިގެން ދިޔަކަން.. އެހެން ނޫނަމަ ހަމަ އެހާލުގައި ކަންނޭނގެ އެކުއްޖާވެސް އުޅޭނީ..  މިހާރު އިރާދަކުރެއްވިއްޔާ ޔައީޝްގެ ވަކިތަކުން ވަނީ ސަލާމަތްވެފަ.. ޔޫހާން ދަރިފުޅާ ކައިވެނީގެ ކަންކަން ހަމަ ޖައްސަން ފެށުނު ހިސާބަކީ އެއީ.. ޔައީޝް މިހާރުވަނީ އެނބުރި ހެއްދެވި ފަރާތަށް އެނބުރި ގޮސްފަ.. ދަރިފުޅާ.. ޔޫހާން ދަރިފުޅު ދެކެ ލޯބިވޭ. ވަރަށް ވަރަށް ލޯބިވޭ.. މަންމަ ކައިރިއަށް އަހިސް އަބަދު ރޮއޭ.. ދަރިފުޅުވެސް އެހެން ހަދާފާނެތީވެ ބިރުގަންނަވާހަކަ… ނަފްސާނީ ގޮތުން އޭނާ އެހުރީ ހަލާކުވެފަ. ދަރިފުޅު ތިއީ ނަފްސާނީ ޑަކްޓަރެއްނުން؟ ހެޔޮނުވާނެ ދަރިފުޅާ މަގޭ ޔޫހާން އެބަލިން ސަލާމަތްކޮއްދީ…”

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.