އިންތިޒާރު 10

ދާއިން ލަވަކިޔަމުން ދިޔައިރު އެންމެ ހިނދުކޮޅަކަށްވެސް އޭނާގެ ނަޒަރު އަހަންނާ ވަކި ނުވެއެވެ. އެކުގައި ތިން އަހަރު ހޭދަވީ ނަމަވެސް އަދިވެސް އެ ކަތި ނަޒަރުން އަހަރެން ލަދުގަނެއެވެ. ދާއިން ބެލުން ހުއްޓާނުލާނެކަން އެނގޭތީވެ އަހަރެން އަވަހަށް އިސްޖެހީމެވެ.
“އޯނ މައިރް ލަދުގަތީތަ؟ އަހަރެން މީ ދެން ހިލޭ މީހެއްތަ މައިރް ލަދުގަންނަން. ބޭބް އައި އޭމް ޔުއާރ ހަސްބަންޑް ، ލަވް އޮފް ޔުއާރ ލައިފް ،ފާދާރ އޮފް ޔުއާރ ބޭބީ ދެން މިހެން ގޮސް ކިޔާ ހުސްނުވާނެ” ދާއިންގެ ބޭނުމަކަަށްވީ އިތުރަށް އަހަރެން ލަދުގައްވާލުމެވެ.

މީގެ ތިން އަހަރު ކުރިން ދާއިންއާއެކު ޙަޔާތްއެކީ ހޭދަ ކުރަން ނިންމި ނިންމުން އެއީ ޙަޔާތުގައި އަހަންނަން ކުރެވުނު އެންމެ ރަނގަޅު ކަންތަކެވެ. ޔުއާންގެ ސޮފްހާ އެކީހެން އެ ދުވަހު އަހަރެން ނިންމާލީމެވެ. ކޮންމެ ޙާލަތެއްގައި ނަމަހީވެސް ޔުއާން އަހަރެން ދޫކޮށްލާފައި ނުދާކަމަކަށް ނުވާނެއެވެ. އަހަރެންގެ މަޑުމޮޅިވެފައިވި ހަޔާތަށް އަލުން އުފާވެރިކަން އަންނަން މެދުވެރިވި ސަބަބަކީ ދާއިންއެވެ. ހަލާކުވެފައިވާ ދެ ހިތް ގުޅި އެއް ހިތަށް ވެގެން ދިޔައިރު ދެމީހުންނަށް ވެސް ރޭކާނުލިއެވެެ. އަހަންނާ ބައްދަލު ކުރަން އަންނަން ޔުއާން ދާއިންއަށް ބާރު އެޅީތީވެ އެކަމާ އަބަދުގެ އަބަދަށް އަހަރެން ޔުއާންއަށް ޝުކުރުވެރިވާނަމެވެ.

ގިޓާ ބަހައްޓާފައި ދާއިން އައިސް ފަހަތުން އަހަރެން ގައިގައި ބައްދާލިއެވެ. އަދި ކަންފަތް ދޮށުގައި ސިއްރު ސިއްރުން ލޯބިވާ ވާހަކަ ބުނެފައި ކޮލަށް ބޮސްދިނެވެ. އަހަރެން ވެސް ލޯބިވާ ވަާހަކަ ބުނެފައި އިތުރަށް ދާއިން ގައިގައި ބޮނޑިވެލީމެވެ.

“ޑާޑާ” އަހަރުމެން ދެ މީހުންނަށް ވެސް އެހެން ތިބެވުނީ އިރު ކޮޅަކަށެވެ. ގޯތިތެރެއަށް ނިކުމެވެން ހުރި ދޮރު ކައިރިއަށް ދަރިފުޅު ދާރާ ހޭލައިގެން އައެވެ. އާދައިގެ މަތިންހެން އެކުއްޖާ ހޭލުމަށްފަހު ފުރަތަމަ ވެސް ހޯދާލީ ބައްޕައެވެ. ދާއިން އަހަރެން ގައިން ދޫކޮށްލުމަށްފަހު ގޮސް ދާރާ އުރާލިއެވެ. އެއީ ކޮންމެ ދުވަހަކު އަހަންނަށް ފެންނަ މަންޒަރަކަށް ވިއަސް ކޮންމެ ދުވަހަކު ވެސް އަހަރެން ހިތް ފުރިގެން ދެއެވެ. ކުޑަ ނަމަވެސް އަހަންނެކޭ އެއްފަދައިން ދާރާ ވާރެއަށް ވަރަށް ފޯރި ހުރެއެވެ. އެހެންވެ މަދުން ނަމަވެސް އެކުއްޖާ ވާރެ ތެރެއަށް ލަމެވެ. ދާއިން ދާރާ ގޮވައިގެން ވާރޭ ތެރެއަށް އައުމުން އެކުއްޖާ ހުރީ އުފަލުން ފޮޅިފައެވެ.

ދާރާ އާއި ދާއިންއަކީ އަހަރެންގެ މުޅި ދިރިއުޅުމެވެ. ދާއިންއާއެކު ހޭދަވާ ކޮންމެ ދުވަހަކީ އުފާވެރިކަމާއެކު ނިމޭ ދުވަސްތަކެވެ. އިންސާނުންނަށް ވީތީވެ ހިތްހަމަ ނުޖެހޭ ކަންކަމާއި ދެބަސްވާން ޖެހޭ ފަހަރު ވެސް އަންނާނެއެވެ. އެހެނަސް ކޮންމެ ރެއަކު ނިދުމުގެ ކުރިން ދެމީހުން ވެސް އެ ދުވަހަކު ޖެހޭ މައްސަލައެއް ހައްލު ކުރެވޭތޯ ބަލަމެވެ. ދާއިންގެ ސަބަބުން އަހަރެން ހިތްހަމަނުޖެހިއްޖެ ނަމަ އޮފީސް ނިންމާފައި ގެއަށް އަންނަމުން މާބޮނޑިއެއް ގެނެސްދޭނެއެވެ. އަހަރެންގެ ފަރާތުން ކަމެއް ދިމާވެގެން ދާއިން ހިތްހަމަ ނުޖެހިއްޖެނަމަ ދާއިން އޮފީހުން އަންނަން ވާއިރަށް އަހަރެން ޚާއްސަ ކެއުމެއް ތައްޔާރު ކުރަމެވެ.
އާއިލާއެއް ބިނާ ކުރުމުގެ ބިންގާ ރަނގަޅަށް އެޅޭތޯ އަހަރުމެން ދެމީހުން ވެސް މަސައްކަތް ކުރީމެވެ. ދެމީހުންގެ ވެސް އެންމެ ބޮޑު އުއްމީދަކީ އަހަރުމެންގެ ދަރިންނަކީ ލޯބިލިބި މައިންބަފައިން އެކަކު އަނެކަކު ދެކެ ވާ ލޯބި ފެނިގެން ބޮޑުވާ ކުދިންނަށް ވުމެވެ. ލޮތްބަށްޓަކައި އަހަރެން ކުރި އިންތިޒާރުގެ ފޮނި މީރުކަން މިއަދު އަހަަންނަށް ލިބިއްޖެއެވެ.

ނިމުނީ