ޙަޤީޤަތް ހޯދުމޭ 46

ވިލިނގިލީގެ ސްކައި ލިފްޓަށް އެރުމާއި އެކު ދަބަހުގައި އޮތް ޓެބްލެޓަށް މެސެޖެއް އައި އަޑު އިވުނެވެ. އޭގައި ކޯޑު ބަހުރުވައިން ލިޔެފައިވާ މެސެޖު ފެނުމުން އަހަރެންގެ ނިތަށް ރޫ އަރައިގެން ދިޔައެވެ. ޑަބްލިޔު ސާރ އެމީހުންނާއި ދެކޮޅަށް ޙަރަކާތް ކުރާ ވަގުތު އަވަސް ކުރީއެވެ. އަހަރެންނަށް ވަކިން ވެސް މެސެޖެއް ފޮނުވައިފައި އޮތެވެ. އެ ކިޔާލައިފައި އަހަރެންނަށް ދެލޯ ބޮޑުކޮށްލެވުނެވެ. ހިންދިރުވާލެވުނެވެ. މުޅި ހަށިގަނޑުން ތުރުތުރު އަޅައިގަތެވެ. ދެން އަހަރެންނަށް ވާނީ ކޮން ގޮތެއް ހެއްޔެވެ؟

ވިސްނާ ވިސްނާ ވެސް އަހަރެންނަކަށް ނޭނގުނެވެ. ގައިމު އަހަރެން އެ ވާހަކައެއް ބޭރުން އެއްވެސް މީހެއްގެ ގާތަކު ނުބުނަމެވެ. އެހެންވިއްޔާ ޑަބްލިޔު ސާރ އަށް އަހަރެން ހެކު ކުރާކަން އެނގުނީ ކިހިނެއް ހެއްޔެވެ؟ އަހަރެން އެ ޓެބަށް ބަލަން ހުއްޓުން އަރާފައި އިންދާ ހުޅުމާލެ އާދެވިއްޖެއެވެ. އަލުން އަނެއް ކޮޅަށް ދާ ސްކައި ލިފްޓު ރޫޓަކަށް އެރީމެވެ. އެއީ ޑަބްލިޔު ސާރ އެދިފައިވަނީ ނުވައެއް ޖެހުމުގެ ކުރިން ސީކްރެޓް ފްލޯ އަށް ދިއުމަށެވެ. މިހާރު ނުވައެއް ޖަހަން ތިން މިނެޓަށް ވީއެވެ. ސާރގެ އަމުރަށް ނުކިޔަމަންތެރި ވާން ބޭނުން ނުވާތީ އަހަރެން ދިޔައީމެވެ. 

ސީކްރެޓް ފްލޯގައި އޭރު ގިނަ އެޖެންޓުން ތިއްބެވެ. އެހެންޏާ އެހެން ފެންނަ އިރަށް އަހަރެންނަށް ގޮތަކަށް އުފާވެރިކަމެއް ލިބެއެވެ. އެކުވެރިކަން އެ އޭޖެންސީގައި ބަދަހިވެފައިވަނީ ހަމަ އެހާ ފުރިހަމަ އަށެވެ. މި ފަހަރު ޑަބްލިޔު ސާރ ފެނުމުން ވެސް ހާސްވީއެވެ. ދެ އަތް މޮޑެމުން ހާސްކަން ފިލުވާލަން ކުރި މަސައްކަތް ބޭކާރެވެ. އެ އެޖެންޓުންނާއި ވާހަކަ ދައްކަން ހުރެފައި އަހަރެން ފެނުމުން ވާހަކަ ހުއްޓާލުމުން ހިތް އަވަސް ވެލިއެވެ. އެމީހުން ޑަބްލިޔު ސާރގެ އެސިސްޓެންޓް އިކުރާމް އާއި ޙަވާލުކޮށްފައި އަހަރެން ގޮވައިގެން ގޮސް ވަނީ ސާރގެ ޙާއްސަ ކެބިންއަށެވެ. އެތެރޭގައި އޭސީގެ ފިނިކަން ހުރި ނަމަ ވެސް ދާހިއްލާން ފަށައިފިއެވެ. ދޮރު ތަޅުލައިފައި ސާރ އަހަރެންގެ ގާތަށް އައެވެ. އަހަރެން ހާސްވެ ތުރުތުރު އަޅަމުން ދިޔަ ގޮތް ޑަބްލިޔު ސާރ އަށް ފެނުމުން ހަމަޖެހިލުމަށް ބުންޏެވެ.

“ރިފް އަށް އެކަން ކޮށްދެވޭނެތަ؟ މި މުޅި އެޖެންސީ ކީއްކުރަން، ދިވެހިރާއްޖޭގައި ވެސް ނެތް އެ ސެކިޔުރިޓީ ސިސްޓަމަށް ކުޅެލެވޭނެ އެހެން މީހަކު. މިކަން ކޮށްދީފިނަމަ ރިފް ބުނި ކޮންމެ ކަމެއް ކޮށްދީފާނަން. އެނގޭ ރިފް ފީލްޑުގައި މިފަހަރު މިގޮތަށް މަސައްކަތް ކުރުމަކީ ހަށި ނުރައްކަލަށް މަގުފަހިވާނެ ކަމެއް ކަން. އެކަމަކު ރިފްގެ ބައިވެރިވުމާއި ނުލައި ކޭސް އެއް ނުނިންމޭނެ.” ސާރ ބުނެލިއެވެ. 

“ކި…ކިހިނެއް އެނ…ގުނީ އަޅު…ގަނޑު ހެކު ކުރާކަން؟” އަޅަ އަޅައިގަންނަމުން އަހަރެން ބުނެލީމެވެ. “އޯހް. ސާރ އަށް އެނގުނީ ސާރ އަކީ ވެސް ކުރީގައި އެކަހަލަ ކަންކަން ކުރި މީހަކަށް ވާތީ. އެކަމަކު ސާރ ދުވަހަކު ހިތަށް ނާރުވާ ވަރުގެ އެޑްވާންސްޑް ކަންކަން ރިފް ހުރި އެ ދާއިރާގައި ކޮށްފައި. ހާސް ނުވޭ. އަހަރެންނަށް އެނގޭ ރިފް ކުރަނީ އިލީގަލް ކަމެއްކަން. އެހެނަސް އެއީ ރަނގަޅު ނިޔަތެއްގައެއްނު. ރިފް ހެކު ކުރާކަން އެހެން މީހަކަށް އެނގުނުކަ ނުދީ ސާރ އެ ސިއްރު ހިފަހައްޓާނަން.” ޑަބްލިޔު ސާރގެ ވާހަކަ ތަކުން އަހަރެންގެ ހިތަށް ހިތްހަމަ ޖެހުން ލިބުނެވެ. 

“އޯކޭ. އެކަން ކުރެވިދާނެ. އެކަމަކު މިރޭ ބާރަ ޖަހާއިރު ޙަރަކާތް ކުރަންޏާ މިހާރު އެތަނަށް ގޮސް މަސައްކަތް ފަށައިގެން ވާނީ. އެއީ ވަރަށް އުނދަގޫ ކަމެއް. އެ ތަނުގައި ބޭނުން ކުރަނީ އާދައިގެ ސެކިޔުރިޓީ ސިސްޓަމެއް ނޫން.” އަހަރެން ބުނެލީމެވެ. “އެހެން ވިއްޔާ ހިނގާ ދާން. ސާރ ވެސް ދާނަން ރިފް އާއި އެކު އެހެން މީހުން އަންނާނެ ފަހުން. އާދޭ އެޖެންޓު ސޫޓުލައިގެން.” ސާރ ބުނެލިއެވެ. 

އަހަރެން ދިޔައީ އެތަނުގައި ހުންނަ ޗޭންޖިން ރޫމަށެވެ. އެ ތަނުން އަހަރެންނަށް ހެޔޮވަރު ވާނެހެން ހީވާ ސޫޓެއް ނަގައި ލީމެވެ. ލައިގެން އައި ޖެކެޓާއި ލެގިންސް އެތަނުން ލޮކަރަކަށް ލައިފައި ދަބަސް އަޅުވާލައިގެން ނުކުތީމެވެ. އޭރު އިންތިޒާރުގައި ޑަބްލިޔު ސާރ ހުއްޓެވެ. 

“އިހަށް ޖެހޭނީ ގެއަށް ދާން. އަޅުގަނޑުގެ ލެޕްޓޮޕް ބޭނުން ވާނެ. އަންނާނަން އެ ހިފައިގެން.” އަހަރެން ބުނެލީމެވެ. ދެން އަވަސްވެގަތީ ޓްރައިނިން ސެންޓަރުން ނުކުންނާށެވެ. ސްކައި ލިފްޓަށް އެރީ ވެސް ދުވެފައެވެ. އަވަހަށް އަސްރަފީވިލާގެއަށް ދިއުމަށެވެ. 

ޑަބްލިޔު ސާރ ޙަރަކާތް ކުރާ ދުވަސް އަވަސްކުރީ މިރޭ އެތަނަށް އޯރގަން ސެލާސްގެ ޓީމު މީޓިން އަކަށް އެއްވާނެ ކަމުގެ ޚަބަރު މެރިން ޓީމުން ދިނުމުންނެވެ. އެ މީހުންގެ ގިނަ ބަޔަކު ނެތް ވަގުތެއްގައި ފިޔަވަޅު އަޅައިފި ނަމަ ބާކީ ގުރޫޕް ހޯދަން ވެސް އުނދަގޫ ވާނެއެވެ. އެ އެންމެންގެ ވަނަވަރު އަހަރެމެންނަކަށް ނުހޯދުނު ވިއްޔާއެވެ. އެކަމާއި ގުޅޭ އެއްވެސް މަޢުލޫމާތެއް ނުލިބުނީއެވެ. އެމީހުން ރެޑް ހޭންޑެޑް ކޮށް އަތުލަން ކޯޓު އަމުރެއް ވެސް ބޭނުމެއް ނުވާނެއެވެ. އެ އަތުލައިގަނެވޭ މީހުން ވަގުތީ ބަންދަކަށް ވެސް ލެވޭނީ އެއްކަލަ ސެކިޔުރިޓީ މަތި ޖަލަށެވެ. އަހަރެންނަށް އެ ސެކިޔުރިޓީ ސިސްޓަމަށް ވެސް ކުޅެލެވިދާނެއެވެ. އެކަމަކު އެ ވަރުގެ ތަނަކާ އަހަރެން ނުބެހޭނަމެވެ. ޖަލަށް ވެސް ދާން ޖެހިދާނެ ވިއްޔާއެވެ. 

އަހަރެން ގެއަށް ވަދެ ލެޕު ނަގާ ދަބަހަށް ލީމެވެ. ދެން ފޯނުނަގާ ހިޔާނަށް މެސެޖެއް ފޮނުވާލީމެވެ. މިރޭ ޒިރާރުގެ ޙަރަކާތްތައް ހުރި ގޮތް ބެލުމަށެވެ. މިއަދު ހެނދުނު ހިޔާންގެ ފަރާތުން އެނގުނު ގޮތުގައި ޒިރާރު ހެނދުނުގެ ވަގުތެއްގައި އަނބުރާ ރާއްޖެއަށް އައެވެ. އަންނާން އަސްލު ކަނޑައެޅި ދުވަހަށް ވުރެ އަވަސް ވަމުން އެ ވަގުތު ހިތުގައި ޝައްކު ހިނގާލިއެވެ. އެ ޒިރާރު އައީ މިރޭގެ މީޓިން އަށް ކަން ރެއަކާލީ ޑަބްލިޔު ސާރ ބުނުމުންނެވެ. އެހެންކަމުން ޒިރާރުގެ ޙަރަކާތްތަކަށް ފަރުވާތެރިކަމާއެކު ބެލުން މުހިންމެވެ. 

ކޮޓަރިން ނުކުމެ އަހަރެން ސިޑީގެ ހަރުފަތްތަކުން ތިރިއަށް މިސްރާބު ޖެހީމެވެ. ގްރައުންޑް ފްލޯއަށް ދެވުމުން އަހަރެން ދިޔައީ މަންމަގެ ކޮޓަރި ހުންނަ ހިސާބަށެވެ. އެ ދޮރު ކުރިމަތީގައި ހުއްޓިލަމުން ދޮރުގައި ޓަކި ޖަހާލީމެވެ. ވަގުތުކޮޅަކަށް ފަހު ދޮރު ހުޅުވާލީ މަންމަ އެވެ. ނިދާ ހެދުމުގައި ހުރުމުން އެ އުޅެނީ ނިދަން އަރަން ކަން އަހަރެންނަށް އެނގުނެވެ. “މަންމާ. މިރޭ ޖެހޭ މަސައްކަތުގައި އުޅެން. އެހެންވީމަ އަވަހަކަށް ގެއަކަށް ނާދެވޭނެ.” އަހަރެން ދާ ވާހަކަ އަންގާލީމެވެ. “އެންމެ ރަނގަޅު. ދަރިފުޅު ބަލައިގެން އުޅޭތި.” މަންމަ އަހަރެންގެ އިސްތަށިގަނޑުގައި ފިރުމާލިއެވެ. މަންމަ އަތް ދުރުކޮށްލުމުން އަހަރެން ގެއިން ނުކުންނަން ހިނގައިގަތީމެވެ. 

ސްކައި ލިފްޓުން އަނބުރާ ވިލިނގިއްޔަށް ދެވުނު އިރު ނުވަގަޑި ތިރީސް ހިނގައިފިއެވެ. ދިޔަ އިރު ޑަބްލިޔު ސާރ ހުރީ ދާން ތައްޔާރަށެވެ. އަހަރެން ފުން ނޭވާއެއް ލައިފައި އެ ވޯޓާރ ކެޕްސޫލް އަށް އެރީމެވެ. އެއީ ވެސް އެ އޯރގަން ސެލާސް ގެންގުޅުނު ކަހަލަ އެއްޗެކެވެ. އެ ފެނި އެ ދުވަހުގެ ހަނދާންތައް އައިސް ވަށާލިއެވެ. އާހިލާއި އެކު އަހަރެން އޭގެ ކެޕްސޫލަކަށް އެރި ދުވަހެވެ. އެ މަސައްކަތް ކުރާނެ ގޮތް ހޯދާ ރަހީނުކުރާ ގުރޫޕުގެ ފަހަތުން ދުއްވި ހަނދާނެވެ. އެ އިންވިޒިބްލް ކޮށްގެން ދުއްވާތީ ކަނޑުގެ ބައެއް މަސްމަހާމެއްސަށް ނޭނގިގެން އެއަށް އެރުމުން ހެވޭ ގޮތެވެ. އެޑްވެންޗާ ވޯރލްޑަކަށް ދާހެން ފުން ހޮހަޅައެއް ކަހަލަ ތަނުން އިތުރަށް އަޑިއަށް ދިޔައިރު ކުރެވުނު ތަފާތު އިހުސާސެވެ. ދަގަނޑު ދޮރަކުން އަމިއްލަ ‘ހަލާކު’ގެ ތެރެއަށް ވަދެވުނު ގޮތެވެ. 

އަހަރެން ވިސްނާނުލާ ހުއްޓާ ޑަބްލިޔު ސާރ އެ ދުއްވާލުމުން އަރި އަޅާލިއެވެ. އެހެނަސް ހަށިގަނޑު ބެލެންސް ކޮށްލައިފައި ސީޓެއްގައި އިށީނދެ ބެލްޓު އަޅުވާލީމެވެ. ޖީބުގައި އޮތް ފޯނު ނަގާ އާހިލަށް ކުރަން އުޅޭ ކަންތައް ތަކުގެ ޚަބަރު ދިނުމުގެ ނިޔަތުގައި މެސެޖް ކުރަން ފެށީމެވެ. ކޯޑު ބަހުރަވައިންނެވެ. އާދައިގެ މީހަކަށް ވިސްނޭނެ ގޮތަކަށް އެކަހަލަ މުހިންމު ވާހަކަތައް މިފަދަ ވަޞީލަތްތަކުން ފޮނުވާނީ ބުއްދި ހަމަނުޖެހޭ މީހުންނެވެ. 

ޑަބްލިޔު ސާރ އަހަރެންނަށް ގޮވާލައިފައި އާދެވިއްޖެ ކަމަށް ބުނުމުން ބެލްޓު ނައްޓާލައިފައި ތެދުވީމެވެ. އޭރު ވަނީ އަހަރެންގެ ސިކުނޑި ތެރޭ ވަރުގަދަ ހައިޖާނުގަނޑެއް އުފެދިފައެވެ. ދެ ގަޑިއިރުގެ ތެރޭ އެ ހުރިހާ އެއްޗެއް ނިވާލުމަކީ އަދި މިހާތަނަށް އަހަރެން ކުރި ހުރިހާ ކަމަކަށް ވުރެ ވެސް އުނދަގޫ ކަމެކެވެ. ކުޑަވެސް ގޯހެއް ހެދިއްޖެނަމަ ދެން އެ ނިމުނީއެވެ. ހުރިހާ ކަމެއް ފަޅާއަރާނެއެވެ. ޒިންދަޤީ ބަރުބާދު ވާނެއެވެ. އެމީހުން ފިލައިގެން ދާނެއެވެ. އަހަރެމެން ކުރަން އުޅުނު ކަމުގެ ބަދަލު ހިތި ގޮތަކަށް ދޭނެއެވެ. މި ހުރިހާ ކަމަކުން ވެސް އަންގައިދެނީ މި ކަމުގައި ހުރި ނުރައްކާތެރިކަން ބޮޑު ކަމެވެ. ވިސްނައިގެން ނޫނީ އެންމެ ފިޔަވަޅެއް ވެސް އަޅައިގެން ނުވާނެ ކަމެވެ. 

މެރިން ޓީމުން ތައްޔާރު ކުރި މަގުން އަހަރެމެންނަށް އެ އޯރގަން ސެލާސް ތަކުގެ ކިއްލާ އަށް ވަދެވުނެވެ. އެމީހުންގެ މަސައްކަތް ފުރިހަމަކަމުން ޝުކުރު ޙައްޤު ވާ ވަރު ވެއެވެ. މިތަނުގައި ތިބޭ އިރު އެ އޯރގަން ސެލާސްތަކަކަށް ހިލަމެއް ވެސް ނުވެއެވެ. ކުރީގެ ތަޖުރިބާ އަށް ބަލައިފައި އަހަރެންނަށް މި ތަނަކީ އެ މީހުން އެންމެ މަދުން ބޭނުންކުރާ ސްޓޯ ރޫމު ކަން އެނގުނެވެ. އެތަނުގައި ބައެއް ހަތިޔާރު ތައް ޝޯކޭސްކުރާ ކަހަލަ ގޮތަކަށް އަތުރައިފައި ހުއްޓެވެ. އަހަރެންގެ ގައިން ހީބިހި ނަގައިގެން ދިޔައީ އެ ތަނުން ޗާބޫކެއް ފެނުމުންނެވެ. އެއީ އަހަރެންގެ ދެލޯ ކުރިމަތީގައި އާހިލަށް ވޭންދެނިވި އަނިޔާ ދީ އެ ހަށިގަނޑު ޒަޚަމު ފުރާލި ވައްތަރުގެ ޗާބޫކެކެވެ. ވަޅި ލަޓިބުރި ބަޑި ފަދަ އެއްޗެހިނަށް ވުރެ އޭގެ ހަމަލާއެއްގެ އަސަރު ވަރުގަދަ ވާނެއެވެ. އެންމެ އެތިފަހަރަކުން ވެސް މުޅި ހަށިގަނޑު މުގުރާލަފާނެ ހެން ހީވާނެއެވެ. އެއިން ދޫކުރާ ކަރަންޓް ޝޮކާއި ވަރުގަދަ ވިހައިގެ ސަބަބުން އިންސާނާގެ ފުރާނަ ވަރަށް ބޮޑު ނުރައްކަލަކަށް ވެއްޓޭނެއެވެ. ދެން ނަގާ ޒަވި ދިލައިގެ ސަބަބުން މަރު ގާތް ވާން ވެސް އެދޭނެއެވެ. އެހާ ވެސް ވޭންދެނިވިއެވެ. އަހަރެން ތުންފަތުގައި ދައިގަނެފައި އަނެއް ފަރާތަށް އެނބުރުނީ އެ ހަތިޔާރު ލޮލަށް ފެނުމުން ވެސް އުނދަގޫވާތީއެވެ. 

އެ ރޫމުގެ އެއްފަރާތު ކަނެއްގައި ހުރި މޭޒެއްގެ މަތީ އަހަރެން ލެޕްޓޮޕް ބޭއްވީމެވެ. ދެން ގޮނޑިއެއްގައި އިށީނދެލަމުން އެ ލެޕު ހުޅުވާލީމެވެ. އަތުގެ އިނގިލިތަކަށް ދަމާލާ ކަށިގަޑު ގޮއްވާލުމަށް ފަހު ކީބޯޑާއި ކުޅެލީމެވެ. މިފަހަރު އަހަރެންނަށް ރޭންޖު ލިބޭ ގޮތް ވީ ބުރޯޑުކާސްޓު ޓީމުން ގެނެސްފައިވާ ޑިވައިސެއްގެ ސަބަބުންނެވެ. އަހަރެންގެ ވިސްނުން އެއްކޮށް މަސައްކަތަށް ވައްދާލައިފައި އެކަމައިގެން ކުރިއަށް ދިޔައީމެވެ. އެއަށް ގޮސް ގެއްލި ހުސްވެފައި ވީ ވަރުން ވަށައިގެންވާ މާޙައުލުގައި ހިނގަމުންދާ ކަންކަމެއް ވެސް ނޭނގެއެވެ. ރަނގަޅީ ވެސް އެހެން ވިއްޔާ އެވެ. އޭރުން ޑިސްޓްރެކްޓް ނުވެ މަސައްކަތް އަވަހަށް ނިންމާލެވޭނެއެވެ. ނުނިމިއްޖެ ނަމަ ދެން ވެދާނެ ގެއްލުމުގެ ބޮޑުކަން އަންދާޒާކޮށްލަން ވެސް ދައްޗެވެ. 

އެއްކޮށް އެ ސިސްޓަމް ނިވާލަން އުނދަގޫވާ މައިގަނޑު ސަބަބަކީ އެއަށް ބޭނުންކޮށްފައިވަނީ އެކި ވައްތަރުގެ ޓެކްނޮލޮޖިކަލް ލޮކު ތަކަކަށް ވާތީއެވެ. އެ ރަހީނުކުރާ މީހުން އަމިއްލަ އުފެއްދުމެއް ގޮތަށް އެ އޮޕަރޭޓު ކުރުމުގެ ބާރު ލިބިފައިވުމުން ކިރިޔާ ކަމެއް ވިޔަސް އެމީހުންނަށް މެސެޖު ދާނެއެވެ. އެއްވެސް ގޮތަކަށް އެމީހުންނަށް ނޭނގި މި ކަންތައް ކުރެވޭނީ ހެކިންގެ އެކީގައެވެ. އާދައިގެ މީހަކު ހެކު ކުރިޔަސް ފަޅާއަރާނެއެވެ. އަހަރެން ވެސް އެ ގޮތަށް ބަސްޓުވެދާނެއެވެ. އެހެނަސް އެކަހަލަ ޙާލަތެއް ދިމާނުވާނޭހެން ވެސް އަހަރެންނަށް ހެދި ދާނެއެވެ. ބޭނުންވާނީ ވަގުތެވެ. އެކަމަކު ގަޑިޔަކީ ވަކި މީހަކަށް ޓަކައި ހުއްޓޭނެ އެއްޗެއް ނޫނެވެ. 

“ޔެސް. އަލްޙަމްދު ލިއްﷲ. މިކަން ނިންމާލެވިއްޖެ.” ލެޕްޓޮޕް ލައްޕާލަމުން އަހަރެން ބުނެލީމެވެ. އެވަގުތު އެތަނުގެ ބައި ގިނަކަން އިހުސާސް ކުރެވި ގޮތަކަށް ސިހުނެވެ. ގައިމުވެސް ސާޅީހަކަށް ފުލުސް އޮފިސަރުންގެ ޓީމެއް އެތަނުގައި ހުއްޓެވެ. އަށެއްކަ މީހުން ބުރޯޑުކާސްޓު ކުރުމަށް އައިހެވެ. އަހަރެންގެ އިޝާރާތަށް އެމީހުން ތައްޔާރުވާން ފެށިއެވެ. އަހަރެން ހީކުރި ވަރަށްވުރެ އަވަހަށް ނިމުމުން ދެން މަޑުކޮށްލައިގެން ތިބީއެވެ. އަހަރެން ފޯނު ނަގާ ނެޓަށް ގުޅާލީ ފޫހިވާތީއެވެ. އެވަގުތު ފޯނަށް ހިޔާންގެ ފަރާތުން މެސެޖެއް އައިސްފައިވާކަން އެނގުނެވެ. މީގެ ތިން މިނެޓު ކުރިންނެވެ. 

“އޯހް ނޯ! ސާރ.” އަހަރެން އަޑަށް ބާރުލައިފައި ގޮވާލީމެވެ. އަދި މެއިން ގުރޫޕަށް އެ މެސެޖު ފޮނުވާލީމެވެ. ޑަބްލިޔު ސާރ ބާރަށް އެ ކިޔާލުމާއި އެކު މުޅި ތަން އެލާރޓަށް ގެނެވުނެވެ.

– ނުނިމޭ –