ޝެރިން (9 ވަނަ ބައި) (ކެރެކްޓަރސް ތަކާއެކު)

“ޔާލް… މަވާހަކަ މިދައްކަނީ ޔާލަށޭ…! ކީއްވެ އަނގައިން ނުބުނެ ތިއިނީ…؟” ކައިލް ގޮސް އެނދުމަތީ އިސްޖަހާލައިގެން އިން މިކްޔާލްގެ ކޮނޑުގައިހިފައި ތަޅުވައިގަތެވެ.

“އަހަރެން މާދަން މިއުޅެނީ ޖަރމަނީ އަށް ފުރަން…” މިކްޔާލްގެ މިޖުމްލައިން ކައިލަށް ދެލޯ ބޮޑުކޮށްލެވުނެވެ.

“ކީކޭ؟” ޤަބޫލު ނުކުރެވިފައި ހުރެ ކައިލް އަހާލި އެވެ. މިކްޔާލް ކައިލަށް ހަތަރުކަޅި ހަމަކޮށްލި އެވެ. އެވަގުތު ކައިލްގެ މޫނުމަތިން ފައުޅުވާންފެށި ޝަކުވާގެ އަސަރުތަކާއި، ހިތާމަ ފެނިފައި އަނެއްކާވެސް މިކްޔާލަށް އިސްޖަހާލެވުނެވެ.

“ޔާލް…” ޝަކުވާގެ ރާގަކަށް ކައިލަށް ބުނެވުނީ އެހިސާބަށެވެ. ބުނާނެ އެއްޗެއް ނޭނގިފައި ހުރެވުނީ އެވެ. މިކްޔާލް މިއީ އަޖައިބެއްގެ މީހެކެވެ. އެއޮއްފަދަ ހިތާމައެއް ކުރިމަތި ވެފައިވާ ދަނޑިވަޅެއްގައި އެންމެން ދޫކޮށްފައި އެއުޅެނީ އަނެއްކާވެސް ދާންވެގެންނެވެ. އަނެއްކާ އެމަޑުކޮށްލީ އެންމެ ދެތިން ހަފްތާއަކަށްވެސް ނޫނެވެ. އެންމެ ދުވަހަކަށެވެ. އައުމެކޭ ނައުމެކޭ ތަފާތެއް އެބަ ހުރި ހެއްޔެވެ؟ އެވަގުތު އެދެމީހުންގެ ދެމެދަށް ވެރިވީ ފުން ހަމަހިމޭން ކަމެވެ. ކައިލްގެ ކޮޓަރީގައި ޖައްސާފައި ހުރި އޭސީގެ އަޑާއި، މިގަޑީ ދޭތެރެދޭތެރެއިން މަގުމަތިން ދާ ކާރުތަކުގެ އަޑު ފުދޭވަރަކަށް އެހިމޭން ކަމުގެ ތެރެއިން އިވެ އެވެ.

“ކައިލް…” މިކްޔާލް ކުއްލިއަކަށް ވާހަކަ ދެއްކި އެވެ. “ސޮރީ އިނގޭ… އެކަމަކު މިއީ ވަރަށް މުހިއްމު ކަމަކު. އިރާދަ ކުރެއްވިއްޔާ ވަރަށް އަވަހަށް އަންނާނަން. ކައިލް ހިތްބަރު ނުކުރައްޗޭ.”

ކައިލް އިރުކޮޅަކު ހިމޭނުން ހުއްޓެވެ. ކައިލްގެ ފަރާތުން ބަހެއް ނީވި ގިނައިރުވާން ފެށުމުން މިކްޔާލަށް ކައިލާއި ދިމާއަށް ބަލާލެވުނެވެ. ކައިލް ހުރީ ހަމަ އާޝޯޚު ވެފައެވެ.

“ޔާލް…” ކައިލް އެއްޗެކޭ ބުނަން އުޅުނެވެ. ނަމަވެސް އެއައްވުރެ ކުރީން މިކްޔާލް ވާހަކަ ދައްކަން ފެއްޓި އެވެ.

“ކައިލް… ދޮނާމެން ގާތު މަ ޖަރމަނީ އަށް ފުރި ވާހަކަ ނުބުނައްޗޭ. ބުނެފިއްޔާ އެކުދިން މަށަށް ހިތް ގޯސް ކޮށްފާނެ. ހިތަށް އަރާނެ ދޯ، އެކުދިން ހިތާމަކުރަން ދޫކޮށްފަ މަ ދިޔައީއޭ ބޭރުގެ ރީތި ތަންތަނުން އުފާތައް ހޯދަން… ނަމަވެސް މިއީ ހަމަ ކޮންމެހެންވެސް ދާން ޖެހޭ ދަތުރެއް.. އެމީހުންގެ ހިތުގަ ނަފްރަތުކަމެއް އުފެދޭކަށް މަ ނޭދެން.”

“ޔާލް…” ކައިލަށް ތަންކޮޅެއް ބާރަށް ބުނެވުނެވެ. މިކްޔާލް އޭނާއާއި ދިމާއަށް ބަލާލި އެވެ.

“ކީއްވެ ތިހެން ތިހީކުރަނީ؟ އަހަރެމެން ޔާލާ ދޭތެރޭ އެއްވެސް ހިތް ނުބައިކަމެއް ނުބާއްވަން.” ކައިލް ކުރިއަށް ޖެހިލާ، މިކްޔާލްގެ ގައިގައި ކުޑަކޮށް ބައްދާލި އެވެ.

………………………………………….

ހުޅުލޭ އިންޓަރނޭޝަނަލް އެއަރޕޯޓް ތެރޭ ކައިލާއި ސުޖާޢު، މިކްޔާލް ފުރުވުމަށް އައިސް ތިއްބެވެ. މިކްޔާލްގެ އެދުމުގެ މަތިން މިކަން ވަނީ ދިނާޔާއާއި، ދާނިޔާއާއި، ނީމް އަދި އާއިލާގެ ގިނަ މީހުންނަށް ވަންޙަނާވެފަ އެވެ.

“ދަރިފުޅު ޖަރމަނީ އަށް ގޮސް ރާނީމެންނާ ބައްދަލުވޭތޯ ބަލާލައްޗޭ… މިހާރު އެއުޅެނީ ކޮންމެވެސް ތަނެއްގެ ބަރޓެންޑަރ އަކަށް ވާންވެގެންނޭ ކީ. ބައްޕަގެ ސަލާމް ރައްދުކޮއްދޭތި އިނގޭ!” ސުޖާޢު އޭނާގެ އެންމެ ދޮށީ ދަރިފުޅު މިކްޔާލްގެ ބުރަކަށީގައި ފިރުމާލި އެވެ.

“ހުރިހާ ފޮށްޓެއް ހަމަވީ ދޯ…” ކައިރީ ހުރި ބޮޑު ދަބަސް ކައިރިއަށް އަނެއްކާވެސް އެހެން ދަބަހެއް ބަހައްޓަމުން ކައިލް އެހި އެވެ.

“އާން… އަދި ހަނދާންނެތިފައޭ މިހުރީ… ދޮރުވާނު ހަވާލުކުރި ފޮށްޓެއްވެސް ވާނެ. އޭތި ފޮނުވާލައިފިން ފޮށިތައް ފޮނުވާ ބެލްޓުން. އޭނަގެ މީހެއް ހުރޭތަ ޖަރމަނީގަ؟” އެއްޗެއް ހަނދާންވާ ފަދަ ގޮތަކަށް މިކްޔާލް އަހާލި އެވެ.

“ނޭނގެ… ހިއެއްނުވޭ. އޭނަ އެއީ ތައިލޭންޑު މީހެއްނު… އެކަމަކު ހަމަ ހުރެދާނެ ދޯ…” ކައިލް ކޮނޑު އަރުވާލި އެވެ. “ޔާލް… ޗެކިން ފެށެން ކައިރިވަނީ…”

“ދަރިފުޅު ދެން ހިތްހެޔޮ ކުރާތި އިނގޭ! އަވަހަށް އަންނާތި…” ސުޖާޢު މިކްޔާލް ގައިގައި ބައްދާލި އެވެ. އެއަށްފަހު ކައިލްވެސް އޭނާގެ ބޭބެގެ ގައިގައި ބައްދާލި އެވެ.

މިކްޔާލް ބޯ ޖަހާލުމަށްފަހު ގަދަކަމުން ތުންފަތް މައްޗަށް ހިނިތުންވުމެއް ގެނައެވެ. އެއަށްފަހު އެއްދަބަސް އެއްކޮނޑުގައި އަޅުވާފައި، އަނެއް ދަބަސް އަތުން ހިފައިގެން މީހުންތައް ޗެކިން ކުރާތާ ހުރި ކިޔޫ އާއި ދިމާއަށް މިޝްރާބު ޖެހި އެވެ.

ބޯޓަށް އެރީއްސުރެން ފެށިގެން މިކްޔާޅް ވަނީ ނުތަނަވަސް ވެފައެވެ. ނޭނގޭ ބިރުވެރިކަމެއް އޭނާގެ ވަށައިގެން ވާކަހަލަ އެވެ. ބޯޓަށް މީހުން އަރަމުން ދާތީވެ، ވަގުތުގެ ބޭނުން ހިފުމުގެ ގޮތުން އަވަހަށް ފޯނު ނަގައި، ކައިލަށް މެސެޖެއް ފޮނުވާލި އެވެ. އެއަށްފަހު ސީޓުގައި ރަނގަޅަށް ހަމަޖެހިލުމަށްފަހު ކުރިމަތީ އިން ސީޓުގެ ފަހަތުގައި އިން ޕޮކެޓުން މެގަޒިން އެއް ނަގައިގެން ބަލަންފެށި އެވެ.

………….

ޓެކްސީ ތެރޭ އިން ކައިލް، އޭނާގެ ޖީބުން ފޯނު ނަގާ ބަލައިލީ މެސެޖެއް އައިސިކަމުގެ ސިގްނަލް ލިބުމުންނެވެ. މިކްޔާލްގެ މެސެޖެއް ކަމުން އަވަހަށް ހުޅުވާލި އެވެ. އޭރު އޭނާއާއި ޖެހިގެން އިން ސީޓުގައި އިންނެވި ސުޖާޢު ގެންދެވީ ފޯނުން ނޫސް ކިޔުއްވަމުންނެވެ.

ކައިލް އެމެސެޖު ކިޔަންފެށި އެވެ. އެއާއިއެކު އޭނާގެ ދެލޯ ބޮޑުވެގެން ދިޔަ އެވެ. މިކްޔާލް އެދިފައި އޮތީ އޭނާ ރާއްޖޭގައި ނެތްކަން އެކަކަށްވެސް ޝައްކުވިޔަ ނުދިނުމަށެވެ. ކައިލަށް ބޯކަހާލެވުނެވެ. މިކްޔާލް އެހެން ބުންޏަސް އެއީ ހަމަ އެހާ ފަޞޭޙަ ކަމެއް ހެއްޔެވެ؟ ނުފެނި ގިނަ ދުވަސް ވަންޏާ ހަމަ ގައިމުވެސް މަންމަމެން ޝައްކު ކުރާނެ އެވެ. ކަންތައްތައް ދިމާވަމުންދާ ގޮތުން ކައިލްގެ ސިކުނޑިވެސް ސުމަކަށް ދާން ތައްޔާރު ވެއްޖެ އެވެ. އޭނާ އެންމެ ކަންބޮޑުވަނީ މަންމަގެ ޙާލާއިމެދުގަ އެވެ. ޝެރިން ގެއްލުނުފަހުން އަދި އަރުން އެއްޗެއް އެތެރެއެއް ނުކުރެ އެވެ. މިހާރު އެއްދުވަސް ފަހަނައަޅައި ގޮސް، މިއީ ދެވަނަ ދުވަހެވެ.

ޓެކްސީ ހެންވޭރު ގަރޑަން ވޭލީ އަށް ހުއްޓުމާއިއެކު، ކައިލް އަވަސް އަވަހަށް ގެއަށް ވަނެވެ. ޓެކްސީއަށް ފަންސަވީސް ރުފިޔާ ދައްކަވާފައި، ސުޖާޢުވެސް އެތެރެއަށް ދުރުވި އެވެ.

“މަންމާ… މިފަނި ތަށި ބޯލަބަލަ. މިއީ އަހަރެން އަމިއްލައަށް ގިރި ފަންޏެއް. ހަމަ ފްރެޝް އޮރެންޖުގަ… އެކަތިކޮޅު ނަމަވެސް ބޯލަބަލަ…” ދާނިޔާ އޮރެންޖު ފަނިތައްޓެއް ހިފައިގެން އައިސް މަންމަ އޮތް އެނދުގެ މަގަތުގައި އިށީނއިނެވެ. އޭރު ދިޔާނާ އިނީ ބާލީސް އުނގަށްލައިގެން ފޮޓޯ އަލްބަމެއް ހިފައިގެންނެވެ. އެނދުގެ އަނެއް ފަރާތުގައި ނީމާއި، ސަޢުދިއްޔާ އިނެވެ.

“ދިޔާނާ ތިއުޅެނީ އަދިވެސް އެއްވެސް އެއްޗެއް ނުކައި… މަށަށްވެސް ހަމަ ތިފަދަ މުސީބާތެއް މިއޮތީ އައިސްފަ. އަހަރެންގެ ފިރިހެން ދަރިފުޅުވެސް އެވަނީ ވީނުވީ އެއް ނޭނގި ގެއްލިފަ… އެކަމަކު އަހަރެންވާ އެބަ ކެތް ކުރަން… އަހަރެންގެ ހިތް ބުނަނީ އަދި އެކުދިން ފެންނާނެއޭ…!” ސަޢުދިއްޔާ ބުންޏެވެ.

“އެތެދެއް، މަންމާ! ތިހެން ނުކައި ނުބޮއި އިނަކަސް ވަކި ކޮން ފައިދާއެއް އޮންނާނީ…؟ ތަންކޮޅެއް ބަސް ގަބޫލު ކޮއްލައިގެން އަހަރެމެންނާއެކު ކުޑަކޮށް މަޖާ ކޮށްލިއްޔާވެސް ހިތަށް ކުޑަ ނަމަވެސް ހިތްހަމަޖެހުމެއް ލިބޭނެ… ޝެރީއްކޮ އަންނައިރު މަންމަ ވީރާނާ ކަށިކޮޅަކަށް ވެފައި ހުއްޓާ ފެނުނީމަ އޭނަ ވެސް ދެރަވާނެ އެއްނު.” ނީމް ދިޔާނާއަށް ހިތްވަރު ދިނެވެ.

ދެބެން ކިޔާވަރުން އެންމެފަހުން ދިޔާނާ ފަނިތަށިން އެތިފޮދެއް ބޮއިލައިފި އެވެ. އެއަށްފަހު ބަލަމުން ގެންދިޔަ ފޮޓޯ އަލްބަމުގައި އޮތް ފޮޓޮއެއް ދައްކާލި އެވެ.

“މަންމާ، މީ ކޮންކުއްޖެއް؟” ގާތްގަނޑަކަށް ދެތިން އަހަރުގެ ތުއްތު ފިރިހެން ކުއްޖެއް އިން އެފޮޓޯގަނޑާއި ދިމާއަށް ދާނިޔާ އިޝާރާތް ކޮށްލި އެވެ. އެއީ ފުށްގުޅަވަރެއްހެން އޮތް ވަރަށް ލޯބި ދޮންދޮން ކުއްޖެކެވެ. ނިދާފައި އޮތްލެއް ހާދަ މަޢުޞޫމެވެ. ކުޑަކޮށް ހިނިތުންވެލައިފައި ވާގޮތުން މީހެއްގެ ހިތްވެސް ލޯބިން ބަންޑުންވެދާނެ އެވެ.

…………………………….

ތިރީގައި މިވަނީ މިވާހަކައިގައި އުޅޭ ބައެއް ކެރެއްޓަރުންގެ ފޮޓޯ. ވާހަކައިގައިވާ ލިންކު ތަކުގެ އެހީގައި އެވާހަކައިގެ އެހެން ތަންތަނުގެ ފޮޓޯވެސް ލާފައި ހުންނާނެ… ? މިއީ ވާހަކައިގެ ކެރެކްޓަރސްތައް ތަންކޮޅެއް ގިނަވީމަ އާއެކު، ހުރިހާ ކުދިންނަށް ފަސޭހަ ވާނެތީ ފަޒޫ މިހެން ހެދީ……… and I hope u all LIKE it!!!!!!!!!!!!!

………………….

ކިޔުންތެރިންނަށް: ފަޒޫގެ ސެމިސްޓަރ އެގްޒާމް ކައިރި ވާތީ މިދުވަސްކޮޅު ފަޒޫއަކަށް ވާހަކައެއް ނުލިޔެވޭ… އެހެންވެ މިބައިވެސް ކުރުވެފަ، ލަސްވީ… މިހެންވީމަ ދެން ފަޒޫ މިވާހަކައިގެ ދެން އޮތް ބައި ގެނެސްދެވޭނީ ޓެސްޓު ނިމުނީމަ،، އިނގޭ.. އޭރުންނެއްނު ދޯ ކިޔެވުމަށް އިސްކަން ދެވޭނީ… ? އެނީވޭސް… ހުރިހާ ކުދިންވެސް ތިދޭ އެއްބާރު ލުމަށް ވަރަށް ވަރަށް ވަރަށް ވަރަށް (+100) ބޮޑަށް ޝުކުރިއްޔާ!!!!!!!!!!!