ހިތުގެ ޝަކުވާ… 35

އެވަގުތު އެ ހިތް ޝަކުވާއިން ފުރި، ބަންޑުން ވަމުން ދިޔައީ އަމިއްލަ ޢާއިލާއާ ދޭތެރޭގައެވެ. ދެންމެވެސް ނުހާގެ ކައިރީގައި އަހާ ހިތްވިއެވެ. މަންމަގެ އުނގުގައި ބޯ އަޅައިގެން އޮވެ، ހިތުގައިވީ ހުރިހާ ޝަކުވާއެއް ބޭރުކޮށްލަން އެދެވުނެވެ. ނަމަވެސް، އެކަން އެގޮތަށް ނުކުރީ، ރައިޝާ ރާވާފައިވަނީ އެހެން ގޮތަކަށް ކަމަށް ވީތީއެވެ. އޭނާއަށް ލިބުނު އަނިޔާތަކުގެ ބަދލުގައި ޢާއިލާއަށް އަނިޔާއެއް ނުދޭނެއެވެ. އަމިއްލަ ޢާއިލާގެ ކިބައިން ބަދަލު ހިފުމަކީ އޭނާ ދުވަހަކުވެސް ކުރާނޭ ކަމެއް ނޫނެވެ. ނަމަވެސް، ދެން އޭނާގެ ދިރިއުޅުން ހަލާކުގެ ތެރެއަށް ވައްޓާލާކަށް އެކަކަށްވެސް ފުރުޞަތެއް ނުދޭނެއެވެ. އެއީ ޔަޤީން ކަމެކެވެ. ދެން އޭނާ ކަންތައް ކުރާނީ އޭނާ ބޭނުންވާ ގޮތަކަށެވެ. މި ވާހަކައިގެ ނިމުން ލިޔާނީ އޭނާ އަމިއްލައަށެވެ. ދެން އެހެން މީހަކަށް އެ ފުރުޞަތެއް އޭނާ ނުދޭނެއެވެ.

***

“ރައީ..” ނިދިފައި އޮތް ރައިޝާ ތެދުވެލީ ނައިރާ އޭނާއަށް ގޮވާލުމުންނެވެ. އެތައް ދުވަހަކަށްފަހު ހަމަޖެހިގެން އޭނާއަށް ރަނގަޅަށް ނިދާލެވުނު މީ ފުރަތަމަ ފަހަރު ކަމުން ތެދުވާހިތް ނުވެފައި ރައިޝާ އޮތީ ނައިރާއަށް ޖަވާބެއްވެސް ނުދީއެވެ. “ރައީ..” އަނެއްކާވެސް ނައިރާ ގޮވާލުމުން ރައިޝާއަށް ތެދުވަން މަޖުބޫރު ވިއެވެ. ތެދުވި ވަގުތު އެންމެ ގާތް އެކުވެރިޔާ ފެނުމުން ރައިޝާގެ މޫނުމަތި އުޖާލާވީ މާއިޝްއާ ދިމާވި ވާހަކަ ނައިރާއަށް ކިޔައިދޭން ހިތަށް އެރުމުންނެވެ. ކުޑައިރުއްސުރެވެސް އެއްވެސް ފަސްޖެހުމަކާއި ނުލާ ހުރިހާ ވާހަކަތަކެއް ނައިރާއާ ހިއްސާ ކުރާތީ މި ވާހަކަވެސް ހިއްސާ ކުރަން ބޭނުންވީ ނުހަނު ބޮޑަށެވެ.

ނަމަވެސް ދެވަނަ ސިކުންތުގައި އެ ޚިޔާލު ދޫކޮށްލީ ނައިރާއަށް ހުރިހާ ކަމެއް އެނގި ހުރެ އޭނާ ރައިޝާއަށް އޮޅުވާލި ހަނދާން ވުމުންނެވެ. ނައިރާ އެވަރުގެ ބޮޑު ކަމެއް އޭނާއަށް ސިއްރު ކޮށްފާނެކަމަކަށް ރައިޝާ ދުވަހަކުވެސް ހިޔެއް ނުކުރެއެވެ. ނައިރާގެ މަޖުބޫރީ ޙާލަތު ނޭނގި ނަމަވެސް، ރައިޝާ ދެކުނީ ނައިރާ އޭނައަށް ދޯކާ ދިނީ ކަމަށެވެ. ނަމަޗވެސް، ނައިރާއާއި ރިއާޝްމެންގެ މަޖުބޫރީ ޙާލަތު އެނގޭނެ ނަމަ، ރައިޝާ އެމީހުން ކުށްވެރި ނުކުރާނެކަން ގައިމެވެ. ވެފައިވީ ފޫހިން ރައިޝާ ނައިރާއާ ވާހަކަވެސް ދެއްކީ ނިކަން ފަރުވާކުޑަ ގޮތަކަށެވެ.

“ކީކޭ..؟” އެނދުން ތެދުވެ އިސްތަށިގަނޑުގައި އަތް ފުނާއަޅައިލަމުން ރައިޝާ އަހާލިއެވެ. “އެއޮށް ހަވީރު ވަނީ.. ރަން ކިޔުމުގެ ޙަފްލާ އޮންނަ ކަން ހަނދާން ނެތުނީތަ..؟” ލޯތްބާއި އޯގާތެރިކަމާއެކު ރައިޝާގެ ބޮލުގައި ފިރުމައިލަމުން ނައިރާ އަހާލީ ހިނިތުންވެ ހުރެއެވެ. އަރޫންއާއި ކައިވެނި ކުރަން ޖެހޭ ދުވަސް ކައިރިވަމުން އަންނަ އިރު ރައިޝާގެ ހިތަށް ވެރިވެފައިވާ ނުތަނަވަސްވެރިކަން ނައިރާ އެނގެއެވެ. ރައިޝާ ހަމަޔަކަށް އެޅުވުމުގެ ގޮތުން އެހާ ލޯބިން ވާހަކަ ދެއްކީ އެހެންވެއެވެ. ނަމަވެސް، ރައިޝާގެ ފަރުވާކުޑަ ޖަވާބުންނާއި، ދުރުކަން އިޙުސާސްވި ޢަމަލުގެ ސަބަބުން ނައިރާ ހިސާބަކަށް ޙައިރާންވިއެވެ.

“އިނގޭ އޮތް ކަން.. ތައްޔާރު ވާށޭ މި އުޅެނީ..” ނައިރާގެ އަތް ފޮޅާލަމުން ރައިޝާއަށް ބުނެވުނީ ނުހަނު ބާރަށެވެ. ރައިޝާގެ މި ޢަމަލާއެކު ނައިރާއަށް ސިހން ލިބި، ދެރަވި ކަމުގައި ވިޔަސް، އެ ޚިޔާލު ދޫކޮށްލީ އެއީ ރައިޝާ މާ ބޮޑަށް ނުތަނަވަސްވެފައި ހުރުމުން ވީ ގޮތެއް ކަމުގައި ނިންމާފައެވެ.

“އެންމެ ރަނގަޅު.. އަލަމާރީގައ ހުންނާނެ މަންމަ ދިން ހެދުން އަޅުވާފަ.. އަވަހަށް ތައްޔާރުވޭ.. ދެން ނެތް މާކަ ގިނަ އިރެއް.. އެހީއެއް ބޭނުމިއްޔާ ގޮވައްޗެ އިނގޭ..” ހިނިތުންވެލަމުން ނައިރާ ރައިޝާގެ ކޮޓަރިން ނުކުތެވެ. ނައިރާ ނުކުތުމާއެކު ރައިޝާ މިއޮށް ހުރިހާ އިރަކު ހިފަހައްޓައިގެން ކުރި ކަރުނަތައް، އޭގެ މަޤާމު ދޫކޮށް ފައިބައިގަތެވެ. ދައްތައެއްގެ ގތގައި ދެކެމުން އައި ނައިރާއާ އެފަދަ ގޮތަކަށް ވާހަކަ ދެއްކުމުން ދެރަވި ނަމަވެސް، ދެވަނަ ސިކުންތުގައި އަމިއްލަ ނަފްސު ހަމަޔަކަށް އަޅުވައިލީ، އެއީ ނައިރާއަށް ޙައްޤު އަދަބެއް ކަމުގައި އަމިއްލަ ޟަމީރަށް ވިސްނައިދެމުންނެވެ. މަޑުމަޑުން އެނދުން ތެދުވެ، އެނދުމަތި ރީތިކޮށްލުމަށްފަހު، ރައިޝާ ގޮސް ލޯގަނޑުގެ ކުރިމަތީގައި ހުއްޓިފައި، އޭނާގެ ސޫރައަށް ވަރަށް ފުން ނަޒަރެއް ހިންގައިލިއެވެ. މިއަދަކީ އޭނާއާއި މާއިޝްގެ ގުޅުމުގައިވާ ހުރިހާ ހުރަސްތަކެއް ނެތިގެން ދާނޭ ދުވަހެވެ. ދޮޅު އަހަރު ވަންދެން އޭނާ ކުރަމުން ދިޔަ ހިތާމަތަކާއި ޝަކުވާތައް ނެތިގެން ދާނޭ ދުވަހެވެ. ލޮލުން ފޭބި ކަރުނަތައް ފުހެލަމުން ރައިޝާ ފާރުގައި ހަރުކޮށްފައި ހުރި ގަޑިއަށް ނަޒަރު ހިންގައިލިއެވެ.

“ދެ ގަޑި އިރު.. ބާކީ އެންމެ ދެ ގަޑި އިރު…” ރައިޝާގެ ދެތުންފަތް ދޭތެރެއިން އެ ލަފްޒުތައް ނުކުތުމާއި އެކު އަމިއްލަ ނަފްސަށް ހީލެވުނެވެ. ތުވާލި ހިފައިގެން ފާޚާނާއަށް ވަނީ އަވަހަށް ތައްޔާރު ވުމުުގެ ގޮތުންނެވެ.

***

“މާޝާﷲ ރައީ.. ހާދަ ލޯތްބޭ..” ތައްޔާރުވެ ނިމިގެން ލޯގަނޑު ކުރިމަތީގައި ގަޔަށް ސެންޓު ޖަހަން ހުރި ރައިޝާ ފެނިފައި ނައިރާއަށް ބުނެވުނީ ހީލަމުންނެވެ. ރައިޝާވެސް ލޯގަނޑުން އޭނާގެ ސޫރައަށް ބަލައިފައި ހިނިތުންވެލިއެވެ.

ޙަޤީގަތުގައިވެސް އޭނާ މިއަދު ވަރަށް ރީއްޗެވެ. ލައިގެން ހުރި ހުދުކުލައިގެ އަބާޔާ ހެދުން ހުރީ ގަޔަށް ދޫކޮށެވެ. އުނަގަނޑާ ދިމާލުން ބަންދެއް އައްސާފައި އިނުމުން އެ ހަށިގަނޑުގެ ބައްޓަން ކޮންމެވެސް ވަރަކަށް ހާމަވާން ހުއްޓެވެ. ބަންދުން ފެށިގެން ތިރިޔަށް ވަށްތިރީގެ ފަސްބަޔެއް ލެވިފައިވާ ގޮތް ނުހަނު ފުރިހަމައެވެ. އެއާއިއެކު ޒަމާނީ ގޮތަކަށް އަޅާފައިވާ މެރޫން ކުލައިގެ ޝޯލްއާއި، އަރައިގެން ހުރި މެރޫން ކުލައިގެ ހައި ހީލްސްއިން ރައިޝާ އިތުރަށް ފުރިހަމަ ކަމަށް ދައްކައެވެ. މޫނުގައި ކޮށްލެވިފައިވީ ފަނޑު މޭކަޕުން ރައިޝާ އިތުރަށް ސާދާ ކަމަށް ދައްކައެވެ.

ނަމަވެސް އޭނާ މިއަދު އެހާ ރީތިވީ މިއަދަކީ އޭނާގެ ރަން ކިޔުމުގެ ޙަފްލާއަށް ވީމަކައި ނޫނެވެ. އަދި އަރޫންއަށް ޓަކައެއްވެސް ނޫނެވެ. ނަމަވެސް، މިއަދަކީ އޭނާއަށް ވަރަށް ޚާއްސަ ދުވަހަކަށް ވީތީއެވެ. ޚާއްސަ ވަނީ ކޮން ގޮތަކުންކަން ވަނީ އޭނާގެ ހިތުތެރޭގައެވެ.

ތުންފަތުގައި މަޑު މެރޫން ކުލައެއްގެ ލިޕްގްލޮސްއެއް ޖައްސާލަމުން ރައިޝާ އެންމެ ފަހު ފަހަރަށް އޭނާގެ ސޫރައަށް ބަލައިލިއެވެ. މިވަރުން ރީއްޗެވެ. ފުރިހަމައެވެ. އިތުރު ކަމެއް ނެތުމުންނާއި އެކު، ގަޑި ޖެހެން ކައިރިވެފައިވާތީ އަތުުރީ ގަޑި އަޅައިލުމަށްފަހު، ފޯނު ހިފައިގެން ރައިޝާ ނައިރާއާއި އެކު ނުކުތީ ސިޓިން ރޫމަށެވެ. އޭރު އެބޮޑު ސިޓިންރޫމް ވަނީ ހިތުގެ ބަށްޓަމަށްވާ ހުދާއި، މެރޫން ކުލައިގެ ފުއްޕާހަން ތަކުންނާއި، ފެއަރީ ލައިޓްތަކުން ޒީނަތްތެރި ކުރެވިފައެވެ.

ސޯފާގައި ފުއްޕާހަމެއް ހިފައިގެން އިން އިޔާޝާ އިނީ ހުދާއި މެރޫން ކުލައިން ޒީނަތްތެރި ކޮށްފައިވާ ވަށްތިރި ހެދުމެއް ލައިގެންނެވެ. އަތާއި ކަރުގައި ގަހަނާ އަޅާފާ ވާ އިރު، ބޮލުގައި އިނީ މެރޫންކުލައިގެ ލޯބި ބޭންޑެއް އަޅައިލާފައެވެ. މިއީ އިޔާޝާ އެކަހަލަ ހަވީރީ ހެދުމެއް ލައިގެން އިންދާ ހަމަލޮލަށް ރައިޝާއަށް ފެނުނު ފުރަތަމަ ފަހަރު ކަންނޭނގެއެވެ. އަބަދުވެސް އިންނާނީ ޓީޝާޓަކާއި ސޯޓެއް ލައިގެންނެވެ. އިޔާޝާ ކިތަންމެ ކުޑައަކަސް، އޭނާ ބޭނުންނުވާ ކަމެއް އޭނާ ލައްވާ ގަދަކަމުން ކުރުވުމަކީ ސަހަލު ކަމެއް ނޫނެވެ. ވިޔަރި އަރުވާލާނީ އެހާ ގަދަޔަށެވެ. މިއަދުވެސް އެ ހެދުން ލައިގެން އެ އިނީ ނުލާން ވެގެން ވަރަކަށް ބޮޑާހާކާލާފައިކަން ޔަޤީނެވެ. އިޔާޝާ އިންލެއް ލޯބިކަމުން ރައިޝާއަށް ހިނިތުންވެވުނެވެ. އެއިރު ނައިރާއާއި ރީޝާ އުޅުނީ ނުހާއާއި އެކު މޭޒުމަތީގައި ބުއިންތައް އެތުރުމަށެވެ. ރިޔާޝްއާއި އާޝްވެސް ހުރިހާ ކަމެއް ރަނގަޅުތޯ ބަލަމުން ދިޔައެވެ. މެހެމާނުންވެސް އައިސް ވަންނަން ފެށީ އެވަގުތުއެވެ.

ވަށައިގެންވާ މާޙައުލަން ނަޒަރު ހިންގާލަމުން ފޯނު ނަގައި، މީހަކަށް މެސެޖެއް ކޮށްލިއެވެ. އޭނާގެ ޖަވާބު ވަގުތުން ލިބުމުން ރައިޝާގެ ތުންފަތަށް ވެރިވީ އުފާވެރި ހިނިތުންވުމެކެވެ. ނަމަވެސް، އެ ހިިތުންވުން ދިގުދެމިގެން ނުދިޔައީ ކައިރީގައި ހުއްޓުނު މީހެއްގެ ސަބަބުންނެވެ. އަވަހަށް ފޯނު ނިވާލަމުން ރައިޝާ ފަހަތަށް އެނބުރި ބަލައިލީ އެއީ ކާކުކަން އެނގުމުންނެވެ.

ފަހަތުގައި މެރޫން ކުލައިގެ ގަމީހަކާއި އެކު ހުދު ކުލައިގެ ކޯޓު ފަޓުލޫނުގައި ހުރި އަރޫން ފެނިފައި ރައިޝާގެ މޫނުމަތި ބަނަވެގެން ދިޔައީ ފޫހިކަމުގެ އިޙްސާސް ތަކުންނެވެ. އަރޫންވެސް ރީއްޗެވެ. ވަރަށް ރީއްޗެވެ. ނަމަވެސް، އެ ރީތި ކަމަކަުން ރައިޝާގެ ހިތާއި ކުޅެވޭނެ އެއްވެސް ގޮތެއް އަރޫންއަކަށް ނެތެވެ. އެ ރީތި މޫނުގެ ފަހަތުގައި ފޮރުވިފައިވާ މަކަރުވެރިކަމާއި، އަމިއްލައެދުން ބޮޑު ކަމަކީ ރައިޝާއަށް އޮޅިފައިވާ ކަންތައްތަކެއް ނޫނެވެ.

“ފައިނަލީ.. ދެން ނެތެންނު މާ ގިނަ ދުވަސްތަކެއް. އާފްޓަރ އަ ވީކް ވީ އާރ ގޮނަ ބީ މެރިޑް..” ޖީބަށް އަތްޖަހާލައިގެން ހުރެ، އަރޫން ބުނެލީ އެއް މިޔަކަށް ހީލަމުންނެވެ. އެ މަކަރުވެރި ހިނިތުންވުން ފެނި ރައިޝާގެ ދެ އަތް މުނިކެވި، ދަތްކުނޑި ވިކައިލެވުނީ ވީ ފޫއްސަކާއި، އައި ރުޅިއެއްގެ ސަބަބުންނެވެ. ހަމަ މިވަގުތުވެސް ހުރެފައި އަރޫންގެ ކޯމަތީގައި ޖަހަން ހިތަށް އެރިއެވެ. ނަމަވެސް އަމިއްލަ ނަފްސުގެ މައްޗަށް ކުރި ހޯދަމުން ރައިޝާ ހަމަޔަކަށް އެޅިލީ ތަނާއި، ވަޤުތުގެ ގޮތުންނެވެ.

“ޔާހ..” ގަދަކަމުން މޫނުމައްޗަށް ހިނިތުންވުމެއް ވެރި ކުރުވަމުން ރައިޝާ އެހެން ބުނެލީ އަރޫންއަށް ފުރަގަސް ދެމުންނެވެ. ރައިޝާގެ އެ ޙަރަކާތުން އަރޫންގެ ގާތަށް އައީ ހިންޏެވެ. ނިކަމެތި އަންހެން ކުއްޖަކު ލައްވާ، ގަދަ ކަމުން ކަމެއް ކުރުވުމަކީ ކިހާ ވަރެއްގެ ކަމެއްކަން އޭނާއަށް އެނގޭނެ ނަމަ މިވަގުތު އެހާ ހިނި އައިސްފައި ނުހުންނާނޭކަން ގައިމެވެ.

ރަން ކިޔުމުގެ ޙަފްލާއަށް މާ ގިނަ ބަޔަކަށް ރިޔާޒް ދަޢުވަތު ނުދިނީ ރައިޝާގެ އެދުމުގެ މަތިންނެވެ. ރަން ކިޔުުގެ ޙަފްލާ ކުޑަކޮށް ބާއްވަން ރިޔާޒް އެއްބަސްވީ ކައިވެނީގެ ޙަފްލާ ރިޔާޒް ބޭނުންވާ ގޮތަކަށް ހަމަޖެއްސާނޭ ފުރުސަތު ދިނުމަށް ރައިޝާ ލައްވާ ވަޢުދު ކުރުވާފައެވެ. ޙަފްލާޢަށް އައިސް ތިބީ ރިޔާޒްއާއި ޢަދީލްގެ ގާތް ރަޙުމަތްތެރިންނާއި، އަދީލްގެ އެއްބަނޑު އެއްބަފާ ދެ ބޭބެއިންނާއި އެމީހުންގެ އަނބިންނާއި ދަރީންނެވެ. އެ ތަނަވަސް ސިޓިންރޫމްގެ އެއްފަރާތުގައި ބަހައްޓާފައި ހުރި މޭޒުމަތީގައި ތަފާތު ވައްތަރުގެ ބުއިންތަކާއި ބައެއް ލުއި ކާނާތައް ހުއްޓެވެ. ރައިޝާއަށް ދެފަރާތަށް ބޯ ހޫރުވައިލެވުނީ އޭނާ ގާތު ބާއްވާނީ ކުޑަ ކުޑަ ޙަފްލާއެއްކަމަށް ވަޢުދުވެފައި، ރިޔާޒް މިހާ ބައިވަރު ތައްޔާރީތަކެއް ވީމައެވެ.

“ދަރިފުޅާ.. މިހާރު ދެން ފަށަންވީ.. އަވަހަށް އާދޭ މިތާ އިށީންނަން..” ހިނިތުންވުމާއިއެކު އާލިޔާ އައިސް ރައިޝާގެ ބޮލުގައި ފިރުމައިލިއެވެ. އަރޫން ދެކެ ކިތަންމެ ފޫހިވެ، ރުޅި އައި ކަމުގައި ވިޔަސް، މި ހޭދަވީ މަދު ދުވަސްކޮޅުގެ ތެރޭގައި އާލިޔާއާއި އަދީލްގެ ފަރާތުން ލިބުނު ލޯތްބާއި އަޅައިލުން ރައިޝާ ދުވަހަކުވެސް ހަނދާނެއް ނުނެތެއެވެ. އަރޫންގެ ޙަރާކަތްތައް ހުންނަ ގޮތުން އަރޫންއަކީ ހަމަ އަދީލްއާއި އާލިޔާގެ އުފަން ދަރިއެއް ބާވައޭ ރައިޝާގެ ހިތަށް އަރައެވެ. އެހާވެސް، އަރޫންއާއި އެމީހުން ތަފާތެވެ. އާލިޔާއާއި އަދީލް މިހާ ރަނގަޅު އިރު، އޭނާ މިއަދު ހާމަކުރަން މި އުޅޭ އަރޫންގެ ޙަޤީގަތް އެނގުމުން އެ ދެ ހިތަށް ކުރާނެ އަސަރުތަކާއި މެދު ރައިޝާއަށް ވިސްނައިލެވުނެވެ. އެކަމަށްޓަކައި، ކިތަންމެ ދެރަވި ނަމަވެސް މިއީ އަދީލްއާއި އާލިޔާއަށް އެނގެން ޖެހޭނެ ވާހަކަތަކެއްކަން ރައިޝާ ޤަބޫލު ކުރެއެވެ.

އާލިޔާއާއި އެކު އައިސް ރައިޝާ އަރޫންގެ ކައިރީގައި ހުރި ގޮނޑީގައި އިށީނެވެ. އެއާއެކު އަރޫން ރައިޝާއަށް ވިހަ ހިނިތުންވުމެއް ހަދިޔާ ކޮށްލިއެވެ. ރައިޝާވެސް ގަދަކަމުން ކަހަލަ ގޮތަކަށް ހީލިއެވެ. ޙަފްލާ ފެށުން އިރު ރައިޝާއަށް އިނދެވުނީ އިރުއިރުކޮޅާ ގަޑިއަށް ބަލައިލަ ބަލައިލައެވެ. އޭނާ މީހަކަށް އިންތިޒާރު ކުރާ ކަހަލައެވެ. ކަމެއް ނުވެގެން ހާސްވެގެން އުޅޭ ކަހަލަ ކުލަވަރެއް ރައިޝާގެ މޫނުމަތިން ފެންނަން ފެށިއެވެ. އަތުގައި އޮތް ފޯނަށް އިރުއިރުކޮޅާ ބަލައިލެވެނީ ނޮޓިފިކޭޝަންއެއް އައިސްފައި އިންތޯ ބަލައިލުމަށެވެ. ނަމަވެސް، އެއިން ކޮންމެ ފަހަރަކުވެސް ކަރު އެލުވައިލަން ޖެހެނީ މާޔޫސްކަމާއި އެކުގައެވެ. ގަޑީގެ ސިކުންތު ކަށި ހިނގާ މަންޒަރު ބަލަން ރައިޝާ އިނީ ވަރަށް ހާސްވެފައެވެ. މީގެ އިރުކޮޅެއް ކުރިން އެ މޫނުމަތިން ފެންނަން ހުރި އުފާވެރިކަން މިހާރު ވަދެ، ފިލީ ކޮންތާކަށް ކަމެއް ނޭނގެއެވެ. ހިނގަމުންދާ ކޮންމެ ސިކުންތަކާއި އެކު ރައިޝާގެ ހާސްކަން ދިޔައީ އެތައް ގުނައަކަށް އިތުރު ވަމުންނެވެ. އެ ހިތުގެ ތެޅުންވެސް އިތުރުވަމުން ދިޔަ ވަމުން ހީވަނީ ހިތް އަތަށް އައިސްދާނެ ހެންނެވެ. ދެން މި މުޞީބާތުން ސަލާމަތް ނުވެވޭނެޔޭ ހިތަށް އެރިއެވެ. ހިތްވަރު އެލި، ރޮވޭ ގޮތް ވިއެވެ.

ކުއްލިއަކަށް މީހަކު ބެލް އެޅި އަޑު އިވުމުން އެންމެންނަށް އެއްފަހަރާ ކަހަލަ ގޮތަކަށް ދޮރާއި ދިމާއަށް ބަލައިލެވުނެވެ. ގޭގެ މައި ގޭޓުން އެތެރެއަށް ވަދެވޭނީ ކޯޑެއް ޖަހައިގެން ކަމަށް ވާތީ ރިޔާޒް އިތުރަށް ހައިރާން ވިއެވެ. ސަބަބަކީ އެ ކާޑަކީ އޭނާއާއި އޭނާގެ ޢާއިލާ މެމްބަރުންގެ އަތުގައި ނޫނީ އޮންނަ ކާޑަކަށް ނުވާތީއެވެ. އެހެންނޫނަސް، މިކަހަލަ ވަގުތެއްގައި މި ގެއަށް އަންނާނީ ކާކު ބާވައޭ ރިޔާޒްގެ އިތުރުން ދެން ތިބި މީހުންގެ ހިތަށްވެސް އެރިއެވެ. ދަޢުވަތު ދެވުނު މަދު މީހުންކޮޅު ތިބީ ހަމައަށެވެ.

އެވަގުތު އެތާ ތިބި އެންމެންގެ މޫނުމަތިން ހައިރާންކަން ފެނިގެން ދިޔަ ނަމަވެސް، ރައިޝާގެ މޫނުމަތިން ފެނުނީ އުފާވެރިކަމެވެ. އެއީ ކާކުކަން އޭނާއަށް ވަރަށް ރަނގަޅަށް އެނގެއެވެ. ދެންމެ ހާސްކަމާއި އެކު ބިރުން ތެޅެމުން ދިޔަ އެ ހިތް މިވަގުތު ފުރި ބަންޑުން ވަމުން ދިޔައީ އުފާވެރި ޝުޢޫރު ތަކުންނެވެ.

“މިގަޑީގަ ކާކުބާ..؟” ނުހާ ތެދުވީ ދޮރު ހުޅުވަން ދިޔުމަށެވެ. އެއާއެކު ރައިޝާގެ ހިނިތުންވުން އިތުރަށް ފުޅާވިއެވެ. “ފައިނަލީ…” ވައި އަޑުން އެހެން ބުނެވުނު އިރު ހިތާހިތުން ﷲ އަށް ޝުކުރު ކޮށްލެވުނެވެ. ނުހާ ދޮރު ހުޅުވަން ދިޔުމާއި އެކު ރިޔާޒް އެދުނީ ޙަފްލާ ކުރިޔަށް ގެންދިޔުމަށެވެ. އެއްވެސް ސަބަބަކާއި ހުރެ، މި ކައިވެނީގެ އެއްވެސް ކަމެއް އުނިވެ، ނުވަތަ ލަސްވާކަށް ރިޔާޒް ބޭނުމެއް ނުވެއެވެ. އެ އައި މީހަކު އައި ބޭނުމެއް ފުދުމުން ހިނގައިދާނެ ނޫންހެއްޔެވެ. އެކަމާއި ވިސްނާނެ ކަމެއް ނެތެވެ.

މިވަގުތު ރައިޝާގެ މޫނުމަތީގައި ކުޅެލާފައިވާ އުފާވެރި ހިނިތުންވުން ފެނި، އަރޫންއަށް އަމިއްލަ ނަފްސާއި ސުވާލު ކޮށްލެވުނެވެ. މިއޮށް ހުރިހާ އިރަކު ބިރުން އިނދެ އިނދެފައި ކުއްލިއަކަށް ހިނިތުންވުމުން އަރޫން ނިންމީ ރައިޝާ އެންމެ ފަހުން އޭނާއާއި ގުޅެން ބޭނުންވަނީ ކަމުގައެވެ. ނަމަވެސް، އަރޫންއަށް ނޭނގުނު ކަމަކީ ރައިޝާގެ އެ ހިނިތުންވުމުގެ ފަހަތުގައި ވަނީ އޭނާ ނޫން ކަމެވެ. އެ ހިނިތުންވުމުގެ ފަހަތުގައިވަނީ އެހެން މީހެއް ކަމެވެ. އަދި އޭނާ އައިސް، ރައިޝާގެ އަތުގައި ހިފަންވީ ވަގުތު އައިސް ޖެހިއްޖެ ކަމެވެ.

މާ ބޮޑު ފިކުރަކާނުލާ ދޮރު ހުޅުވާލި ނުހާގެ ދެލޯ ބޮޑުވެގެން ދިޔައީ ލިބުނު ސިހުމަކުންނެވެ. ކުރިމަތީގައި ހުރި ސޫރަ އަކީ އޭނާ ދެން ދުވަހަކުވެސް ފެންނާނެ ކަމަށް އުންމީދު ކޮށްގެން ހުރި މީހެއް ނޫނެވެ. ލިބުނު ސިހުމާއި އެކު، އަނގަމަތީގައި އަތް އަޅައިލެވުނު އިރު، އެ ހިތް ދިޔައީ ނެގިނެގިފައި ޖެހެމުންނެވެ. ކުރިމަތިވާން މި އުޅެނީ ކޮންފަދަ މުޞީބާތެއް ބާވައޭ އޭނާގެ ހިތަށް އެރި ނަމަވެސް، ހިތުގެ ކަނެއްގައި ކުޑަކުޑަ އުފާވެރިކަމުގެ ހުޅުކޮޅެއް ރޮއެވެފައި ވިއެވެ. އޭނާގެ ދަރިފުޅަށް ލިބެންވާ ޙަޤީގީ ލޯތްބާއި އުފާ ލިބެން އުޅޭ ކަމުގެ އިޙުސާސްތަކެވެ. ނަމަވެސް، އެ އުފާވެރި ޝުޢޫރުތައް މިވަގުތު ހާމަ ނުކުރެވުނީ ލިބުނު ސިހުމުގެ ސަބަބުންނެވެ. ވައި އަޑުން އެ ނަން ކިޔައިލެވުނީ އިޚްތިޔާރަކާ ނުލައެވެ.

“މާއިޝް……”

ނުނިމޭ…

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.