ހިތުގެ ޝަކުވާ… 33

މިއާ ޚިލާފަށް އަރޫންގެ ހިތް ދިޔައީ އުފަލުން ނަށަމުންނެވެ. ރިޔާޒް މި ކަން މި ގޮތަށް އެ ކުރަނީ ކިއްވެކަން އެންމެ ރަނގަޅަށް އެނގޭ އެކަކީވެސް އަރޫންއެވެ. މިވީ ކުޑަ ދުވަސްކޮޅުގެ ތެރޭގައިވެސް ރައިޝާ ކިތަންމެ ފަހަރަކުވެސް ނުގޮތަކަށް އޭނާ ކުރެން މާއިޝްގެ ޚަބަރެއް ހޯދަން އުޅޭކަން އޭނާއަށް ވަރަށް ރަނގަޅަށް އެނގެއެވެ. ނޭނގޭ ކަމަށް ހަދާލައިގެން ހުންނަނީއެވެ. އެހެންނޫނީ ރައިޝާއާއި ކައިވެނި ކުރުމަށް މި ލިބޭ ފުރުޞަތު ދާނީ ވަޔަށްކަން އޭނާއަށް އެނގއެވެ. ނަމަވެސް އޭނާއަށް ނޭނގޭ ކަމަކީ ތަޤުދީރުގައި މާ ކުރިން ލިޔެވިފައިވާ ގޮތް އެކަކަށްވެސް ބަދަލު ނުކުރެވޭނެ ކަމެވެ. އެންމެ ބާރުގަދަ، މުއްސަނދި މީހާވެސް ﷲގެ ޙަޟްރަތުގައި ވާނީ ނިކަމެތި ފަޤީރަކަށް ކަމެވެ. އެކަން އޭނާއަށް އިޙްސާސް ވާކަށް ދެން މާ ގިނަ ދުވަހެއް ނެތެވެ.

**********

ދުވަހަކަށް ފަހު ދުވަހެއް ފާއިތުވަމުން ދިޔައީ އެސްފިޔައެއް ޖަހާލާހާ ހަލުވި މިނުގައެވެ. ރައިޝާއާއި އަރޫންގެ ކައިވެނި ފަސް ދުވަހަށް އަވަސްކުރި ވާހަކަ ރައިޝާގެ ކަންފަތަށް އިވުނީ ހޮނު ގުގުރިއެއްގެ ސިފައިގައެވެ. ފަސް ދުވަހުގެ ތެރޭގައި އޭނާ ވާނީ އަރޫންގެ އަނބިމީހާއަށްކަން ހަނދާންވާ ކޮންމެ ފަހަރު ދެރައަށްވުރެ ބޮޑަށް އާދެވެނީ ރުޅިއެވެ. މާއިޝް ނޫން މީހެއްގެ ޙައްޤަކަށް ވުމަކީ އޭނާ ދުވަހަކުވެސް ވާން އެދޭ ކަމެއް ނޫނެވެ. ވެއަތު ވަމުންދާ ކޮންމެ ދުވަހަކު އަރޫންއަށް ކުރެވޭ ނަފްރަތުގެ ހުޅުކޮޅު ބޮޑުވަމުން ދަނީ އެހެންވެއެވެ.

***

“ދަރިފުޅާ.. ރައިޝާ..” އެނދުމަތީގައި ބަނޑުވަތަށް އޮށޯވެގެން އޮތް ރައިޝާއަށް ނުހާ ގޮވާ އަޑު އިވުމުން ތެދުވެގެން ގޮސް ދޮރު ހުޅުވާލިއެވެ. “ކީކޭ މަންމާ..؟” ދޮރުމަތީގައި ނުހާ ހުރުމުން ރައިޝާ އަހާލިއެވެ. “ދަރިފުޅާ.. ރަން ކިޔުމުގެ ހަފްލާއަށް ކުޑަ ކެއުމެއް ތައްޔާރުކޮށްލަން ވެގެން މި އުޅެނީ.. ދޭބަލަ ކާރުގަ ގޮސް ފިހާރައިގަ ހުންނާނެ މަންމަ ނަގާފަ ހުރި ސާމާނުކޮޅެއް.. ގޮސް އެ ހިފައިގެން އާދެބަލަ.. ބައްޕަ ކުޑަކޮށް ބުރަކޮށް އުޅޭތީ ނުދެވޭނެ ވާހަކަ ބުނީމަ ދަރިފުޅު ގާތު މި ބުނީ..” ހޭވިފައިވާ ރައިޝާގެ އިސްތަށިތައް އެއްފަރާތް ކޮށްލަމުން ނުހާ ބުނެލިއެވެ. ތެދެކެވެ. މިއަދަކީ އޭނާގެ ރަން ކިޔުމުގެ ޙަފްލާ އޮންނަ ދުވަހެވެ. އެކަން ހަނދާންވުމާއެކު ބޮލުގައި ރިއްސައިގަތީ އެޔެއް މިޔެއް ބަލައިފަކައި ނޫނެވެ.

ދާހިތް ނުވެފައި ހުރެވެސް މަންމަ ބުނީތީ މި ދަނީ ކަމަށް ބުނެފައި ކުޑަ ގޮތަކަށް ތައްޔާރު ވެލައިގެން ރައިޝާ ފިހާރައަށް ދާން ނުކުތެވެ. ގަރާޖުން ކާރު ނަގައިގެން އޭނާ މިސްރާބު ޖެހީ ރިޔާޒްގެ ފިހާރައާއި ދިމާއަށެވެ.

ފިހާރައާ ހަމައަށް ދެވުމުން ރައިޝާ ކާރު ހުއްޓިއެވެ. ކާރު ބާއްވާނެ ތަންކޮޅެއް ކައިރީގައި ނެތުމުން ބާއްވަން ޖެހުނީ ތަންކޮޅެއް ދުރުގައެވެ. ފިހާރައަށް ވަދެފައި ކައުންޓަރުގައި އިން ބިދޭސީ މީހާ ކައިރި ސާމާނުތައް ދޭށޭ ބުންޏެވެ. އެ މީހާ ސާމާނުތައް ދިނުމުން ރައިޝާ ޝުކުރު އަދާކޮށްފައި އެތަނުން ނުކުތެވެ. ކާރު ޕާކު ކޮށްފައި އޮތް ހިސާބަށް ރައިޝާ ދިޔައީ މާ ބޮޑު ވިސްނުމެއް ނެތިއެވެ. އެއް އަތުގައި ކޮތަޅުތައް ހުރި އިރު، އަނެއް އަތުގައި އޮތް ފޯނަށް ބަލަމުން ކުރިޔަށް ދިޔަ ރައިޝާ ސިހިގެން ދިޔައީ އޭނާގެ ގައިގައި ޖެހިފައި މީހަކު ވެއްޓުމުންނެވެ. އެއާއެކު ރައިޝާގެ ފޯނުވެސް ވެއްޓި، ތަޅައިގެން ދިޔައެވެ. އަވަސްއަވަހަށް އަތުގައި ހުރި ކޮތަޅުތައް ދޫކޮށްލުމަށް ފަހު، ރައިޝާ އެ މީހާއަށް ތެދުވަން އެހީތެރި ވެދިނެވެ. ރައިޝާ ދިއްކޮށްލި އަތުގައި ހިފަމުން އެމީހާ ތެދުވިއެވެ. ޝުކުރިއްޔާއޭ ބުނުމަށް އެމީހާ ރައިޝާއާ ދިމާއަށް ބަލައިލި ވަގުތަކީ ރައިޝާވެސް މަޢާފަށް އެދުމަށް އެމީހާގެ މޫނަށް ބަލައިލި ވަގުތެވެ. ދެމީހުންނަށް އެކަކު އަނެކަކުގެ މޫނު ފެނުނު ވަގުތު ދެމީހުންނަށްވެސް ލިބުނީ ސިހުމެކެވެ. ލިބުނު ސިހުމުގައި ކުޑަ ވަގުތުކޮޅަކު ދެމީހުން ހުއްޓުން އަރާފައި ތިއްބެވެ. ކުރިމަތީގައި ހުރީ ރައިޝާ ފެންނާނެކަމަށް އުންމީދުވެސް ކޮށްގެން ހުރި މީހެއް ނޫނެވެ. ނަމަވެސް އޭނާ ފެނުމާއި އެކު ރައިޝާގެ ލޮލުން އުފަލާއި ހިތާމަ އެކުލެވިގެންވާ ކަރުގައިގެ ރޮނގެއް ދެމިލިއެވެ.

“މަންމާ..” ކުރިމަތީގައި ހުރި މާހީން ފެނުމާއިއެކު ރައިޝާއަށް ވީ ގޮތްވެސް ނޭނގުނެވެ. ހިފެހެއްޓިފައިވީ މާހީންގެ އަތަށް ބާރުކޮށްލާފައި، ހިނިތުންވެވުނީ ލިބުނު އުފަލެއްގެ ބޮޑު ކަމުންނެވެ. އެއިރު މާހީންގެ ދެލޯވެސް ވަނީ ފެންކަޅިވެފައެވެ. “މަންމާ..” މާހީންގެ ފަރާތުން އެއްވެސް ޖަވާބެއް ނައުމުން ރައިޝާއަށް އަނެއްކާވެސް ގޮވައިލެވުނެވެ. އެއާއެކު ހޭވެރިކަންވީ މީހެއް ފަދައިން މާހީން ރައިޝާއާއި ދިމާއަށް ބަލައިލިއެވެ. އެހެން ހުރުމަށްފަހު ކުއްލިއަކަށް ރައިޝާގެ އަތުތެރޭގައި އޮތް އޭނާގެ އަތް ދަމައިގަތެވެ. ހައިރާންވެފައި ރައިޝާ މާހީންގެ އަތަށް އެއްފަހަރު، އަދި މޫނަށް އަނެއް ފަހަރު ބަލައިލިއެވެ. މީގެ އިރުކޮޅެއް ކުރިން ކަރުނަވީ އެ ދެލޮލުގައި މިހާރު ވިދަމުން ދިޔައީ ރުޅިވެރިކަމެވެ. ނަފްރަތެވެ. “މަންމާ.. ކިހިނެއްވީ..؟” މާހީންގެ ދެލޮލުގައިވީ ނަފްރަތު ފެނި ރައިޝާއަށް އަހައިލެވުނީ މިއީ މާހީން މިހާ ރުޅިއައިސް ހުއްޓާ ފެނުނު ފުރަތަމަ ފަހަރު ކަމަށް ވީތީއެވެ.

“ކިހިނެއްހޭވީ..؟ އަމިއްލައަށް ހުރިހާ ކަމެއް ކޮށްފައި އަދި އެބަ އަހައެއްނު ކިހިނެއްހޭވީ..” ދެލޯ ހަނި ކޮށްލަމުން މާހީން ބުނެލި އިރު ރުޅިއައިސްގެން ގޮސް ތުރުތުރު އަޅައެވެ. އެއާއެކު ރައިޝާއަށް ލިބުނީ ޝޮކެކެވެ. އޭނާގެ ބޮލުގައި ސުވާލުމާކެއް އެޅުނު ފަދައެވެ. “މަންމާ..” ވައި އަޑުން ރައިޝާއަށް ކިޔައިލެވުނެވެ. “ކޮން މަންމައެއް ކިޔާކަށް.. މަށާ ދިމާލަށް މަންމައޭ ކިޔައިގެން ނުވާނެ.. ތީ މިހާރު މަގޭ ޅީދަރިފުޅުގެ މަޤާމު ޙައްޤުވާ ވަރުގެ އަންހެނެއް ނޫން.. މަގެ ހިތަށް އަރާ ތިހެން މަގޭ ކުރިމައްޗަށް އަރަން ކަލޭ ލަދު ނުގަންނަ ކަންވެސް..” މާހީންގެ ކޮންމެ ޖުމްލައަކާއި އެކު ރައިޝާގެ ލޮލުން ދިޔައީ ހިފެހެއްޓުމެއް ނެތި ކަރުނަތައް ފައިބަމުންނެވެ. މާހީން އޭނާ ދެކެ މިހާ ރުޅި އަންނަން ޖެހޭ ސަބަބަކީ ކޮބައިބާވައޭ ހިތަށް އެރިއެވެ.

“މަންމާ.. ކީއްވެތަ ތިހާ ރުޅީ އައިސް ތިހިރީ.. އަޅުގަނޑަށް ގޯސްކޮށް ކަމެއް ކުރެވުނީތަ..؟” ހިތްވަރުކޮށްފައި ރައިޝާ އެހީ މާހީންގެ ފަރާތުބް އެދެވޭ ޖަވާބެއް ލިބޭނެ ކަމުގެ އުންމީދުގައެވެ. “ގޯސްކޮށް ކަމެއް ކުރެވުނީހޭ..؟ ކަލޭ ލަދެއް ނުގަނޭތަ ތިހެން އަހާކަށްވެސް..؟؟ އޭނ..؟” އަނެއްކާވެސް މާހީން ހަޅޭލަވައިގަތީއެވެ. “މަންމާ.. ޕްލީޒް.. އިހަށް ވީ ގޮތް ބުނެބަ..” ބޯ ފަޅައިގެންދާހެން ހީވުމުން ރައިޝާ އަނެއްކާވެސް އަހާލިއެވެ. “އަދިވެސް އެއްޗެކޭ ހިތަކަށް ނާރައޭ ދޯ.. މަގޭ ދަރިފުޅަށް އެ ޙާލު ޖައްސާފަ ލަދެއްވެސް ނުގަނޭ އައިއްސަ މަގޭ ކުރިމަތީގަ ހުއްޓި ހުރެ ސުވާލު ކުރާކަށް..” މާހީންގެ އެ ޖުމްލައިން ރައިޝާގެ ކަންފަތުގައި ހީވީ ހޮނު ގުގުރިއެއް ޖެހި ހެންނެވެ.

މާއިޝްއަށް އޭނާ ޙާލު ޖެއްސީ ކޮން އިރަކު ހެއްޔެވެ؟ މާއިޝް ވީތަނެއް އުޅޭ ޙާލެއްވެސް އޭނާއަށް އެނގެނީކީ ނޫނެވެ. މާއިޝް ހޯދަން އޭނާ ކިހާ މަސައްކަތެއް ކުރި ހެއްޔެވެ؟ މާއިޝްއާ ނުލާ އުޅެން ޖެހުނު ދުވަސްތައް އޭނާ ހޭދަ ކުރީ ކިހާ ހިތާމައަކާ އެކުގައި ހެއްޔެވެ؟ ވީނުވީއެއް ނޭނގި ކުއްލިއަކަށް ގެއްލުނީ މާއިޝްއެއް ނޫން ހެއްޔެވެ؟ ދެން މާހީން އޭނާގެ ބޮލުގައި އެ އިލްޒާމް އެ އެޅުވީ ކީއްވެ ހެއްޔެވެ؟

“މާއިޝްއަށް ހާލު ޖެއްސީއޭ..؟ އަޅުގަނޑު ނުދެނަހުރިން މާއިޝްއަށް އެއްވެސް ގޮތެއް ހެދުނު ކަމެއް..” ރައިޝާ އޭނާގެ ދިފާޢުގައި ވާހަކަ ދެއްކިއެވެ. “ވަރަށް ތާހިރެއްނު.. ދޮގު ހަދަންވެސް މޮޅޭ ދޯ.. އެންމެ ރަނގަޅޭ.. ހަނދާން ނެތިއްޔާ މަ ހަނދާންވެސް ކޮށްދީފާނަން.. ބަލަ ކަލޭ ބައްޕަގެ ޕިކަޕުގަ ޖެހިފަ މާއިޝް އެކްސިޑެންޓު ވެގެން އޭނާއަށް ނުހިނގޭކަންް އެނގުނީމަ އޭނަ ދޫކޮށްލާފަ ގޮސް އެހެން މީހަކާ އިންނަން އުޅުނީ ކަލެއެއް ނޫންތަ..” މާހީންގެ މި ވާހަކަތަކުން ރައިޝާގެ ބޮލަށް އެނބުރުންވެސް އެރިއެވެ. ލިބުނު ޙައިރާންކަން އެތައް ގުނައަކަށް އިތުރުވެގެން ދިޔައެވެ. އިވިގެން މި ދިޔައީ އޭނާ ދުވަހަކުވެސް އަޑު އިވޭނެކަމަށް އުންމީދު ކުރި ވާހަކަތަކެއް ނޫނެވެ. ހާމަވެގެން މި ދިޔަ ޙަޤީޤަތްތަކަކީ އޭނާގެ މުޅި ދުނިޔެ ހިނދުކޮޅަކަށް ހުއްޓިގެން ދިޔަ ފަދަ އިޙުސާސްތަކެއް ކުރުވި ވާހަކަ ތަކެކެވެ. އޭނާގެ ބައްޕަ މިހާ ބޮޑު ދޮގެއް އޭނާއަށް ހަދާފާނެ ބާވައެވެ؟ ޤަބޫލު ކުރަން ކިތަންމެހާވެސް ދައްޗެވެ.

“ނޫން.. ހަމަ ހުވާ ކޮށްފަ މި ބުނަނީ އަޅުގަނޑަކަށް ތިއިން އެއްވެސް ކަމެއް ނޭނގެ.. މާއިޝްގެ ޚަބަރެއް އެއްގޮތަކަށްވެސް ނުވާތާ މިހާރު ދޮޅު އަހަރު ވެއްޖެ.. އެރޭ.. އެރޭ.. އެރޭ.. އެރޭ މާއިޝް ކާރުގަ…” ރައިޝާގެ ހަނދާނަށް އަންނަން ފެށިއެވެ. އެންމެ ފަހުން މާއިޝްއާ ވާހަކަ ދެއްކި ރޭގެ ހަނދާން ވާން ފެށިއެވެ. އެރޭ މެސެޖް ކުރަން އިނދެފައި މާއިޝްގެ ޚަބަރު ކެނޑުނީ ކުއްލިއަކަށެވެ. އޭގެ ކުރިން މާއިޝް މީނީ ކާރު ދުއްވަން ކަމަށް އޭނާ ބުންޏެވެ. އަނެއްކާ މާހީން އެބުނީ މާއިޝް އޭނާގެ ބައްޕަގެ ޕިކަޕުގައި ޖެހި އެކްސިޑެންޓް ވީ ވާހަކައެވެ. ވީއިރު، މާއިޝް އެކްސިޑެންޓްވީ އޭނާގެ ބައްޕަގެ ޕިކަޕުގައި ޖެހިފައިކަމަށް ވެދާނެ ހެއްޔެވެ؟ އެކަމަކު، އޭނާގެ ބައްޕަ އެފަދަ ކަމެއް ކޮށްފައި، އޭނާއަށް ސިއްރު ކުރާނެ ބާވައެވެ؟

“މަންމާ.. ޤަބޫލު ކުރޭ.. އެރޭގެ ފަހުން މާއިޝްގެ ޚަބަރެއް އެއްގޮތަކަށްވެސް ނުވެ.. މަންމަމެންނަށް ނުގުޅުނީވެސް ބައްޕަމެން އަޅުގަނޑު ލައްވާ މާއިޝްގެ އެއްވެސް ޚަބަރެއް ހޯދަން ނޫޅޭށޭ ކިޔައި، ވަޢުދު ކުރުވީމަ.. އޭގެ ފަހުން މާއިޝްގެ ހަނދާނުގަ އަޅުގަނޑު އުޅުނު ހިތާމަވެރި ދިރުއުޅުން ދެނެވޮޑިގެންވަނީ ހެއްދެވި ފަރާތް..” މާހީންގެ ދެއަތުގައި ހިފާލަމުން ރައިޝާ ގިސްލަގިސްލާފައި ރޯން ފެށިއެވެ. އެއާއެކު، މާހީންގެ ހިތްވެސް މަޑު ކަފަކޮޅަކަށްވީ ފަދައެވެ. ރައިޝާގެ ވާހަކަތަކާއި، އާދޭސްތައް ޤަބޫލު ކުރެވުނީ އެ ތެދުވެރި ކަރުނަތައް ފެނުމުންނެވެ. “އެހެންވިއްޔާ އަރޫން އަކީ ކާކު..؟” ދެން މާހީން ކުރިމަތި ކުރުވި ސުވާލުން ރައިޝާއަށް އިސްއުފުލާ މާހީންއާއި ދިމާަށް ބަލައިލެވުނެވެ. އެއިރު ރައިޝާގެ ރަތްވެ، ދުޅަވެފައިވާ ދެލޯ ފެނި މާހީންގެ ހިތުގައި ރިއްސާލިއެވެ. “އަރޫންއަކީ ބައްޕަމެން އަޅުގަނޑުގެ ކައިވެނި ހަމަޖެއްސި މީހާ.. އަޅުގަނޑު އަރޫން ދެކެ ކުޑަކޮށްވެސް ލޯތްބެއް ނުވޭ.. ފަސް ދުވަސް ތެރޭ ބައްޕަ ބޭނުންވަނީ އަޅުގަނޑު އަރޫންއާއި ކައިވެނި ކުރަން.. މިއަދު ރަން ކިޔަން.. މަންމާ.. އަޅުިގަނޑު މާއިޝް ކައިރިއަށް ގެންގޮސްދީ.. އަޅުގަނޑު އަރޫންއާ އިންނާކަށް ބޭނުމެއް ނޫން.. ޕްލީޒް މަންމާ.. ޕްލީޒް..” ގިސްލަގިސްލާފައި ރައިޝާ ރޮމުން މާހީން ކައިރި އާދޭސް ކުރަން ފެށިއެވެ. ރައިޝާއަށް އައިސްފައިވާ ބަދަލުތަކާއި، ނިކަމެތިކަން ފެނި މާހީންއަށް ރައިޝާގެ ވާހަކަތައް މުޅީން ޤަބޫލު ކުރެވުނެވެ. “ހުއްޓާލާ ދަރިފުޅާ.. ނުރޮއެ ހުއްޓާލާ.. ހިނގާ މަންމައާ އެކު ދާން.. އިރާދަކުރެއްވިއްޔާ ދަރިފުޅަށް މިއަދު މާއިޝްއާ ދިމާވާނެ.. ތި ކުރާ ހިތާމަތަކަށްވެސް ލުޔެއް ލިބޭނެ..” ލޯތްބާއެކު ރައިޝާގެ ދެލޯ ފުހެދެމުން މާހީން ރައިޝާގެ ގައިގައި ބައްދާލިއެވެ. ރައިޝާއށްވެސް މާހީންގެ ގައިގައި ބައްދާލެވުނީ ލިބުނު ހިތްހަމަ ޖެހުމެއްގެ ބޮޑުކަމުންނެވެ. މާއިޝް ފެންނާނެ ކަމުގެ ފޮނި އުންމީދާއެކު ރައިޝާ މާހީންއާއި އެކު ދިޔައީ ﷲއަށް ޙަމްދު ކުރާ ޙާލުގައެވެ.

***

“ރީޝް.. ރައި އަދިވެސް ގެއަށް ނާދޭތަ..؟” އިޔާޝާއަށް ކާންދޭން އިން ރީޝާ ކައިރި ނުހާ އަހާލީ ރައިޝާ އަދިވެސް ގެއަށް ނާންނާތީއެވެ. “ނުދެކެން އަންނަ ތަނެއް.. ކޮންތާކަށްތަ ދިޔައީ..؟” އިޔާޝާ ނުކާން ބޮޑާހާކާ ވަރުން ރީޝާ އޭނާގެ އަތަށް ކުޅޭ އެއްޗެއް ދީގެން މަސަލަސް ކުރެވޭތޯ ބަލަމުން ދިޔައެވެ. “މަންމަ ބުނީ ފިހާރައިގައި ހުންނާނެޔޭ މަންމަ ނަަގާފަ ހުރި ސާމާނުކޮޅެއް.. އެ ނަގައިގެން އައިސްދޭށޭ.. ބައްޕަމެން މާ ބުރަކޮށް އުޅޭތީ މަންމަ ރައި ފޮނުވީ.. ދެން ރައި ބޭރަށް ފޮނުވާލަންށާވެސް އެއްކޮށް.. އޭރުންވެސް ކުޑަކޮށް ހަމައަކަށް އެޅިދާނެއްނު.. އެކަމް އަދިވެސް ނާދޭ..” ނުހާ އައިސް އިޔާޝާގެ އިސްތަށިގަނޑު ހާވާލަމުން ވާހަކަ ދެއްކިއެވެ. “ގުޅާލަބަ.. އޭރުންވެސް ޚަބަރެއް ވެދާނެއްނު..” ރީޝާ ބުނެލިއެވެ. “ގުޅައިފީމޭ.. ފޯނު އޮތީ ނިވާލާފަޔޯ..” ނުހާ ހުރީ ހާސްވެފައެވެ. “މަންމަ ދެން އެހާ ހާސް ނުވެބަ.. ރައި އަކީވެސް ކުޑަ ކުއްޖެއް ނޫނެއްނު.. އޭނަ އަންނާނޭ..” އިޔާޝާގެ ތުން ދޮއްވާލަމުން ރީޝާ ބުނެލީ ނުހާ ހާސްވެފައި ހުރިކަން އެނގުމުންނެވެ. ރީޝާގެ ބަސްތަކުން ނުހާ ހަމައަކަށް އެޅުނު ނަމަވެސް މުޅިއަކުން ހިތްހަމައެއް ނުޖެހުނެވެ. ކޮންމެވެސް ކަމެއް ވާން އުޅޭހެން އޭނާއަށް ހީވަމުން ދިޔައެވެ. ޚިޔާލުތައް އެއްފަރާތް ކޮށްލުމަށްފަހު ނުހާ އޭނާގެ މަސައްކަތައިގެން ކުރިއަށް ދާން ފެށިއެވެ.

***

“އާދޭ އެތެރެއަށް ދަރިފުޅާ..” މާހީން ރައިޝާއަށް އެތެރެއަށް ވަންނަން ދަޢުވަތު ދިނެވެ. ވަންނަން ނުވަންނަން ހުރެފައި ރައިޝާ އެތެރެއަށް ވަނީ މާހީންގެ ވާހަކަތަކުން މާނާމެންވެސް ހީކުރާނީ އެހެންނޭ ހިތަށް އެރުމުންނެވެ. އެމީހުން މިހާރު ރައިޝާއަށް ކުރާނެ ނަފްރަތު އޭނާއަށް އަންދާޒާ ކޮށްލެވުނެވެ. ރައިޝާ ބިރުގަނެފައި ހުރި ސަބަބު އެނގުމުން މާހީން ރައިޝާގެ އަތުގައި ހިފައި، ބާރުކޮށްލީ ބިރު ނުގަންނާށޭ ބުނާ ފަދައަކުންނެވެ. މާހީންއަށް ހިނިތުންވުމެއް ރައްދު ކޮށްލުމަށްފަހު ރައިޝާ އެތެރެއަށް ވަނެވެ. އޭރު އޭނާގެ ހިތް ބާރުބާރަށް ތެޅެމުން ދިޔައީ ދޮޅު އަހަރު ފަހުން އޭނާގެ ހިތުގެ ރާޖާ ފެންނަން އުޅޭކަން އެނގުމުންނެވެ. އެ ހިތް އެވަގުތު އުފަލުން ނަށާލީ އިންތިހާއަށެވެ.

ސިޓިންޜޫމަށް ވަދެވުމާއެކު ރައިޝާގެ ލޮލުގައި އެންމެ ފުރަތަމަވެސް އަޅައިގަތީ އިޒްމާންއަށް ކާންދޭން އިން މާނާއާއި، މާނިޝްއަށް ފިލާވަޅު ކިޔައިދޭން އިން އިޒްޔަންއެވެ. ރައިޝާމެން ވަތް އަޑަށް އެންމެން އެކޮޅު ބަލައިލިއެވެ. އެއާއެކު މާނާއަށާ އިޒްޔަންއަށް ކޮޅަށް ތެދުވެވުނީ ލިބުނު ހައިރާންކަމެއްގެ ބޮޑުކަމުންނެވެ. އިރުކޮޅަކު ގަބު އަރާފައި ހުރެފައި، މާނާ އައިސް، ރައިޝާގެ ކުރިމަތީގައި ހުއްޓުނެވެ. އެއާއެކު މާނާ ދަތްކުނޑިވިކާލާފައި އަތް މުއްކަވާލި ތަން ރައިޝާއަށް ފެނުމުން އެ ހިތުގައި ރިއްސާލިއެވެ. “މަންމާ.. މީ ކީއްކުރަން މިތަނަށް ގެނައި މީހެއް..؟” ރުޅިވެރިކަމާއެކު މާނާ އެހެން އެހުމުން ރައިޝާގެ ދެލޯ ފެންކަޅިވެގެން ދިޔައެވެ. “ދަރިފުޅާ މާނާ.. އެހެން ނުބުނޭ.. ރައިޝާ-” މާހީންގެ ޖުމްލަ ފުރިހަމަ ނުކުރެވެނީސް މާނާ ވާހަކަ ދައްކަން ފެށިއެވެ. “ކީއްވެ އެހެން ނުބުނަންވީ..؟ މީނަޔާ ހަދާ އަހަރެންގެ ކޮއްކޮ ހާދަ ހިތާމައެއް ކުރަން ޖެހިއްޖެޔޭ..” އެހެން ބުނެވުނުތަނާހެން މާނާއަށް ރޮވުނީ ރައިޝާ ‘ބޭވަފާތެރި’ ވި ވާހަކަ އަޑު އިވުމުން މާއިޝް އުޅުނު ޙާލު ހަނދާން ވުމުންނެވެ. އެއާއެކު ރައިޝާއަށްވެސް ގިސްލަގިސްލާފައި ރޮވެން ފެށުނީ މާއިޝް އޭނާއާއި ނުލާ އުޅޭނެ ޙާލު އަންދާޒާ ކޮށްލެވުމުންނެވެ.

“ދަރިފުޅާ.. ވެދިޔަ ކަންތަކުގައި ރައިޝާގެ އެއްވެސް ކުށެއް ނެތޭ.. އެއީ ހުސް ރިޔާޒްގެ ކަންތައް.. އޭނާ އަހަރެމެން ކައިރި ބުނީ މާއިޝްއަށް ނުހިނގޭކަން އިނގޭތީ ރައިޝާ ފޫހިވެގެން އެހްނ މީހަކާ ގުޅުނިއްޔޭ.. އެއީ އޭނަ ކުރި ކުށް ފޮރުވަންވެގެން ރިޔާޒް ކުރި ކަންތައް..” މާހީން އެހެން ބުނުމުން މާނާއަށް އަނގަމަތީގައި އަތް އަޅާލެވުނު އިރު ރައިޝާގެ ބޮލަސް އަނެއްކާވެސް ސުވާލުމާކެއް އިތުރުވިއެވެ. “ކުށް ފޮރުވާށޭ..؟ ތި ބުނީ..؟” ރައިޝާ އެހެން އެހުމުން މާނާ ރައިޝާ ސޯފާގައި ބައިންދާފައި އިޒްޔަންއާ ދިމާއަށް ބަލައިލިއެވެ. އިޒްޔަން ބޯޖަހާލަމުން އިޒްމާންއާއި މާނިޝް ގޮވައިގެން ހިނގައިގަތީ ބެލްކަންޏާ ދިމާއަށެވެ.

“މަންމަ ނުކިޔައިދެންތަ..؟” މާހީން ކުރެން މާނާ އެހުމުން މާހީން ދެފަރާތަށް ބޯ ހޫރުވާލިއެވެ. “ހަމަ އެކަނި ކިޔައިދިނީ މާއިޝް އެކްސިޑެންޓްވީ ރިޔާޒްގެ ކާރުގަ ޖެހިފަކަން އެކަނި..” މާހީން އިސްދަށަށް ޖަހާލީ މިވާހަކަތަކަކީ ރައިޝާއަށް އަޑު އަހަން ފަސޭހަ ވާހަކަތަކަކަށް ނުވާނެކަން އެނގޭތީއެވެ. “ރައީ.. އަޑު އަހާ..” ފުން ނޭވާއެއް ދޫކޮށްލުމަށްފަހު މާނާ ކިޔައިދޭން ފެށިއެވެ.

***

އެއީ މާނާ އިޒްމާން ވިހެއި ރެޔެވެ. ރައިޝާ މެލޭޝިޔާއަށް ދާން ފުރި ރޭވެސް މެއެވެ. ހުޅުމާލޭ ހޮސްޕިޓަލުގައި ހުރެފައި މާއިޝް މާލެ ދިޔައީ ގޭގައި ހުރި އިޒްމާންގެ ބައެއް ތަކެތި ބަލައެވެ. މާ ބޮޑު ވިސްނުމަކާ ނުލާ މާއިޝް ކާރު ދުއްވަމުން ދިޔައީ ވީހާވެސް އަވަހަކަށް ހޮސްޕިޓަލަށް އައުމުގެ ބޭނުމުގައެވެ. އެއީ ދަން ވަގުތެއް ވުމުން މަގުމަތީގައި މާ ބައިވަރު އުޅަނދުތަކެއް ނެތެވެ. އެއްކޮޅަށް ދުއްވާ މަގަކަށް އެޅުމުން މާއިޝް ކާރުގެ ދުވެލި ތަންކޮޅެއް ބާރުކޮށްލީ ކުރިމަތިން އުޅަނދެއް ނާންނާނެތީއެވެ. ނަމަވެސް…

އެވަގުތު ބާރު ސްޕީޑެއްގައި ކުރިމަތިން އައީ މުދާ އުފުލާ ބޮޑު ޕިކަޕެކެވެ. ކޮންސްޓްރަކްޝަންގެ ބައިވަރު ތަކެތި އަރާ ބަރާކޮށްފައި އޮތް އެ ޕިކަޕު އައިލެއް ބާރުކަމުން މާއިޝްއަށް ލިބުނު ސިހުމާއެކު ކާރު ކޮންޓްރޯލް ކުރަން އުނދަގޫވިއެވެ. އެ ބޮޑު ޕިކަޕުގައި ޖެހިފައި މާއިޝްގެ ކާރު ވިއްސައިގެން ދިޔަ ނަމަވެސް އެ ޕިކަޕަށް މާ ބޮޑު ގެއްލުމެއް ނުލިބެއެވެ. އެތރޭގައި ރިޔާޒްއާއި އެކު ތިބި ދެމީހުންގެ ތެރެއިން އެކެއްގެ ބޯ ފަޅައިގެން ދިޔުމާއި، އަރުވާފައި ހުރި ބައެއް މުދާތައް ވެރުން ނޫން އިތުރު ކަމެއް ނުވެއެވެ. އެއީ ރައިޝާގެ ބައްޕަގެ ކޮމްޕެނީގެ މުދާ އުފުލާ ޕިކަޕެކެވެ. ދުއްވުމުގެ ޤަވާއިދުތަކަށް ތަބައުނުވުމާއި، އެކަށީގެންނުވާ ވަރަށް މުދާ އަރުވާފައިވާ ތަން އެތައް ބަޔަކަށް ފެނުނު ނަމަވެސް، ރިޔާޒްގެ ނުފޫޒު ގަދަ ކަމުން އެއްވެސް މީހަކަށް ހެކި ވާކަށް ނުކެރުނެވެ.

އެކްސިޑެންޓް ހިނގުމުން އަވަހަށް މާއިޝް ހޮސްޕިޓަލަށް ގެނެސް، އަވަސް ފަރުވާ ދޭން ފެށިއެވެ. އޭރު މާއިޝްގެ ހާލު ވަރަށް ސީރިޔަސްއެވެ. ހިނދުކޮޅެއް ލަސްވި ނަމަވެސް މާއިޝްގެ ފުރާނަ މި ދުނިޔެއާ އަލްވަދާޢު ކީހެވެ. އެވަގުތުވެސް މާއިޝްގެ ޙާލަތަށްވުރެ އަމާންއަށް މުހިންމުވީ އެ ގެއްލުން ދިން ބަޔަކު ހޯދުމެވެ. އެއީ ރިޔާޒްގެ ކޮމްޕެނީގެ ޕިކަޕެއްކަން އެނގުމުން އަމާން ވަގުތުން ރިޔާޒްއާ ބައްދަލު ކުރިއެވެ. ރިޔާޒް އެތައް ފަހަރަކު މަޢާފަށް އެދުމުންވެސް އަމާން ޤަބޫލެއް ނުކުރިއެވެ. މާއިޝް ކޯމާއަށް ދިޔަކަން އެނގުމުން އަމާން ކޯޓަށްވެސް މައްސަލަ ހުށައެޅިއެވެ. ދެމީހުންނަކީވެސް ރާއްޖޭގައި ނަން ހިނގާ ދެ ވިޔަފާރި ވެރިންނަށް ވުމުން މައްސަލަ ނިންމަން ވަރަށް އުނދަގޫވިއެވެ. ފައިސާ ދީގެން މައްސަލަ ނިންމޭތޯ ދެމީހުންވެސް ބެލިއެވެ. އެއީ މިޒަމާނުގެ ޙާލަތުތާއެވެ. މައްސަލަ އެއްވެސް ކޮޅެއްގައި ނުޖެހި އުޅެނިކޮށް ދެން ފެންމަތިވީ އަމާން މަސްތުވާތަކެތީގެ ވިޔަފާރި ކުރާ ވާހަކައެވެ. ހެއްކާއެކު އަތުލެވުމުން ފުލުހުންނަށް ޖެހުނީ އޭނާ ޖަލަށް ލާށެވެ. އެއާއެކު، ރިޔާޒްގެ ނުފޫޒު ގަދަވިއެވެ. މައްސަލަ އޭނާގެ ކޮޅަށް ނިންމާލާކަށް ރިޔާޒްއަށް މާކަ އުނދަގުލެއް ނުވިއެވެ.

މާއިޝް ކޯމާއިން ހޭ އެރީ އަމާން ޖަލަށް ގޮސް، މައްސަލަވެސް ނިމުނު ފަހުންނެވެ. ކޯމާއެއްގައި އޮވެފައި ހޭ އެރުމުން އެންމެ ފުރަތަމަ އެއްވެސް ކަމެއް އޭނާގެ ހަނދާނަކު ނެތެވެ. ނަމަވެސް މަހެއްހާ ދުވަސް ފަހުން ހަނދާންތައް އައުމުންވެސް އޭނާ ރިޔާޒް ކުށްވެރި ކުރަން ބޭނުންނުވީ އެއީ ރައިޝާގެ ބައްޕައަށް ވީތީއެވެ. މާއިޝްގެ ބަސް ފުލުހުންނަށް ލިބުމުން މައްސަލަ އެކީ ނިމުނެވެ. އަމާން ޖަލަށް ދިޔަ ވާހަކަ އެނގުމުން މާއިޝްއަށް މާ ބޮޑު އަސަރެއް ނުކުރީ، އަމާންގެ ފަރާތުން ދުވަހަކުވެސް ބައްޕައެއްގެ ލޯބި ލިބިފައި ނުވާތީއެވެ. އަދި އެއީ އޭނާގެ ބައްޕަ ކުރި ކުށުގެ ސަޒާއަށް ވާތީއެވެ.

ދެން މާއިޝްއަށް ލިބުނީ ވަރަށް ހިތާމަވެރި ޚަބަރެކެވެ. އެކްސިޑެންޓުގައި އޭނާގެ ފައިގެ ކަށިގަނޑަށް ލިބުނު ގެއްލުމެއްގެ ސަބަބުން އޭނާއަށް ނުހިނގޭނެ ވާހަކައެވެ. އެއާއެކު އޭނާގެ މުޅި ފުޓުބޯޅަ ކެރިއަރވެސް ފުނޑުފުނޑުވެގެން ދިޔައެވެ.

ނަމަވެސް، ދެން މާއިޝްއަށް ލިބުނީ އަދި އެޔަށްވުރެ މާ ހިތާމަވެރި ޚަބަރެކެވެ. އޭނާއަށް ނުހިނގޭ ވާހަކަ އެނގުމުން ރައިޝާ އޭނާ ދެކެ ފޫހިވެ، ދޫކޮށްފައި ގޮސް، އެހެން މީހަކާއި ގުޅުނު ޚަބަރު ރިޔާޒް މާއިޝްއަށް ދިނުމުން މާއިޝްގެ ހިތް ހީވީ ފުނޑުފުނޑު ވިހެންނެވެ. ހިތާމައަކަށްފަހު ހިތާމައެއް އެފަކީރަށް ލިބެމުން ދިޔައެވެ. ނަމަވެސް، މިހާރު އޭނާއަކީ ނުކުޅެދޭ މީހަކަށް ވުމުން ރައިޝާއާ އެއްވެސް ގޮތަކަށް އެކަށީގެން ނުވާ ކަމަށް އޭނާގެ ޟަމީރަށް ވިސްނައިދިނީ ހިތާ ދެކޮޅަށެވެ. ކޮންމެ ދުވަހަކު ރައިޝާއަށްޓަކައި އެތައް ކަރުނައެއް މާއިޝް އަޅައެވެ. ރައިޝާގެ މަތިން ހަނދާންކޮށް ނުރޯ އެންމެ ދުވަހެއްވެސް ނުދާނެއެވެ. އަދިވެސް މާއިޝް އޭނާގެ ޢާއިލާއަށް ހިތްވަރު ދެމުން ދިޔައީ ﷲގެ އިރާދަފުޅުން އަދި އޭނާއަށް ހިނގޭނެކަމަށް ބުނަމުންނެވެ. އެތަކެއް ހިތާމަތަކާއި އެކުވެސް މާއިޝް ކެތް ކުރިއެވެ. އަމިއްލަ ނަފްސަށްޓަކައެވެ. ލޯބިވާ ޢާއިލާގެ ޙައްޤުގައެވެ.

***

މާނާގެ ވާހަކަތައް ނިމުނު އިރު ރައިޝާގެ ގިސްލަގިސްލާފައި ރޯށެވެ. ބައްޕަ ފަދަ ދީންވެރި ރަނގަޅު މީހަކު އެފަދަ ކަމެއް ކޮށްފާނެބާވައޭ އެތައް ފަހަރު ހިތަށް އެރިއެވެ. މާއިޝް އުޅެން ޖެހުނު ދަތި ޙާލު އެނގުމުން ވަކިން ދެރަވިއެވެ. ހީވީ އެ ހިތުގައި މީހަކު ހިފައި، ބާރުކޮށްލި ހެންނެވެ. މާއިޝް އުޅޭނީ އޭނާއަށްވުރެ މާ ޙާލުގައޭ ހިތަށް އެރުމުން އިންތިހާއަށް ދެރަވިއެވެ. މާއިޝްގެ ހިތުގައި ވާނޭ ޝަކުވާތައް ހިތަށް އަރުވައިލެވުމުންވެސް ދެރަވިއެވެ. ހަމަ އެފަދައިން ރައިޝާގެ ހިތުގައިވެސް ވީ ޝަކުވާއެވެ. ނަމަވެސް، މާއިޝްއާއި ދޭތެރެއަކު ނޫނެވެ. އުފަން ބައްޕައާއި ދޭތެރޭގައެވެ. އެވަރުގެ ބޮޑު ކަމެއް ކޮށްފައި ފައިސާ ބޭނުންކޮށްގެން ރެކިގަތީމައެވެ. ޝަކުވާ އުފެދުނެވެ. ލޯބިވާ ޢާއިލާއާ ދޭތެރޭގައެވެ. ހުރިހާ ކަމެއް އެނގި ތިބެ، އޭނާއަށް އޮޅުވާލީމައެވެ. ނަމަވެސް، މިވަގުތު އެ ހުރިހާ ކަމަކަށްވުރެ ރައިޝާއަށް މުހިންމުވީ މާއިޝް ހޯދުމެވެ. އެ ސޫރަ ދެކިލުމެވެ.

“މާއިޝް ކޮބާ..؟” މާނާގެ ކިބައިން މާއިޝް ދެކިލުމަށް އެދުމުން މާނާ ރައިޝާ ގޮވައިގެން ގޮސް ހުއްޓުނީ މާއިޝްގެ ކޮޓަރި ދޮރުމަތީގައެވެ. ފުން ނޭވާއެއް ލާފައި ރައިޝާ އަމިއްލަ މީހާ ހަމައަކަށް އަޅުވާލިއެވެ. ތަޅުގައި ހިފައި އަނބުރާލި އިރު، އެ ހިތް ދިޔައީ ބާރުބާރަށް ތެޅެމުންނެވެ. ދޮރު ހުޅުވާލުމަށްފަހު އެތެރެއަށް ވަތް ވަގުތު ފެނުނު ހިތާމަވެރި މަންޒަރުން އޭނާގެ ހިތަށް ހީވީ ތޫނު ޚަންޖަރެއް ހަރާލި ހެންނެވެ. އަނގަމަތީގައި އަތް އަޅާލެވުނު އިރު އެސްފިޔަތައް ފޫދުއްވާލާފައި ކަރުނަތައް ފައިބައިގެންފިއެވެ.

ނުނިމޭ…

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.