ހިތަކުން ނުފިލާނެ 31

އޮފީސްތެރެއަށް ވަދެގެންދިޔަ އިންހާގެ މޫނުމަތީގައި ވަނީ ފުޅާ ހިނިތުންވުމެކެވެ. އިންހާ އޮފީސް ތެރެއަށް ވަދެގެންދިޔައިރު ބައެއް ސުޓާފުން އޭނައާއި ދިމާލަށް ބަލަންތިބީ ހައިރާންވެތިބެއެވެ. މީގެ ކުރިން ދުވަހަކުވެސް އެހާވަރަށް އިންހާ ހިނިތުންވެފައި ހުއްޓައި ނުފެނެއެވެ. ކެބިންއަށް ވަދެގެންއައި އިންހާ ފެނުމުން މުސައިފާވެސް އިންހާއަށް ބަލަހައްޓައިގެންއިނީއެވެ. މުސައިފާ ބަލަހައްޓައިގެން އިންކަން އިންހާއަށް އެނގުނީ އިރުކޮޅެއްވި ފަހުންނެވެ. މުސައިފާއަށް ބަލާލަމުން އިންހާ ނިތްއަރުވާލީ ކިހިނެއްވީހޭ އަހާލަކަހަލަ ގޮތަކަށެވެ.

” އިންހާއަކަށް ނޭގޭތަ ރޭ ބޮސްގެ ގައިގައި ވަޅިއަޅައިގެން އައި.ސީ.ޔޫގައި އޮތްކަމެއް…؟ ” މަޑުމަޑުން ލަވަކިޔާލަ ކިޔާލަ އިން އިންހާއަށް ބަލަން އިރުކޮޅެއްވަންދެން އިނދެފައި މުސައިފާ ބުނެލިއެވެ.

“އޭނ…!! ކޮންއިރަކު…؟ ” އިންހާއަށް އަހާލެވުނީ ތަންކޮޅެއް ބާރަށެވެ. އޭރު އިންހާއަށް ހުރެވުނީވެސް ތެދުވެ ކޮޅަށެވެ. ސިރާޖު އައިސް އެކެބިންގެ ދޮރު ހުޅުވާލީ އެވަގުތުއެވެ.

” މިއަދު މެންދުރުފަހު އޮފީސް ބަންދުވާނެ…! އެހެންވީމާ އެކެއްޖެހީމަ އެންމެ ރަނގަޅު އެންމެން ދިޔަޔަސް…! ” އެހެންބުނެލާފައި ސިރާޖު ދިޔައީއެވެ. އެވަގުތު އިންހާގެ ހިތުގައި  ބުނަންނޭގޭ ކަހަލަ ރިހުމެއް އުފެދިގެން ދިޔައެވެ.

މަޑުހިނގުމެއްގައި މައިޝާގޮސް އެމަޖެންސީ ރޫމްކައިރީގައި މަޑުކޮއްލިއިރު އާމިރު ގޮނޑީގައި ލެގިލައިގެން އައި.ސީ.ޔޫގެ ދޮރަށް ބަލަހައްޓައިގެންއިނެވެ.

” ބައްޕާ ގެއަށް ދާންވީނު..! ” އާމިރުކައިރީގައި މަޑުކޮއްލަމުން މައިޝާ ބުނެލިއެވެ.

” ދަރިފުޅު އެކަނި މަޑުކޮއްގެން ކަމަކު ނުދާނެ…! ކަމެއް ކުރަންޖެހުނަސް ކިހިނެއް ހަދާނީ…؟  ” އާމިރު މައިޝާއެކަނި ބަހައްޓާފައި ގެއަށް ދާކަށްބޭނުމެއް ނުވިއެވެ. ޑރ.ޖަމީލް އައިސް އާމިރުމެން ކައިރީގައި މަޑުކޮއްލީ އެވަގުތުއެވެ.

” މައިޝާ އެކަންޏެއް ނުވާނެއެއްނު…! އަހަރުމެންވެސް މިތިބީނު…! ތިހެން ނުނިދާ ހުންނަން ވެއްޖިއްޔާ ސަކަރާތްވާނެ..! ” ޖަމީލުވެސް މައިޝާއާއި އެއްބަސްވީ އެގޮތަށް ނުނިދާ ހުރުމުން ރަނގަޅުނުވާނެތީއެވެ. ޖަމީލު ވަރަށް އާދޭސްކޮއްގެން އާމިރުގެއަށް ދިޔައީ މެންދުރު އަންނާނެ ވާހަކަ މައިޝާގާތުގައި ބުނެފައެވެ. މައިޝާގެ އެހިތާމަވެރި މޫނުފެނުމުން ބޭއިހްތިޔާރުގައި އާމިރަށް މައިޝާގެނެސް އޭނަގެ ގައިގާ ލައްކޮއްލެވުނެވެ. އަދި ވަރަށް ލޯބިން މައިޝާގެ ބޮލުގައި ފިރުމާލަމުން ގެއަށް ދިއުމަށްޓަކައި އާމިރު ހިނގައިގަތީ އައި.ސީ.ޔޫގެ ދޮރާދިމާލަށް ބަލައިލަމުންނެވެ. ހެއްދެވިފަރާތަށް ދުއާކުރާހާލުގައެވެ. މެންދުރުފަހު ފާޒިން ބޭރަށް ގެންދިއުމަށް ހުއްދަދޭނެ ވާހަކަ ޑޮކްޓަރުންވަނީ ބުނެފައެވެ. އާމިރު ގެއަށް ވަދެގެން ދިޔައިރު އެއްވެސް މީހެއް ފެންނާކަށްނެތެވެ. އެހެންވެ ގޮސް ކޮޓަރިއަށްވަދެ އެނދުގައި ޖައްސާލުމާއެކު އާމިރުވެސް އިސާހިތަކު ފުންނިންޖެއްގެ ތެރެއަށް ގެނބިގެން ހިނގައްޖެއެވެ.

އައި.ސީ.ޔޫގެ ބޭރުގައި ހުރި ގޮނޑިއެއްގައި މައިޝާ އިށީންދެލައިގެންއިންއިރު އެމޫނުމަތީގައި އެއްވެސް ތާޒާކަމެއްނެތެވެ. އެދެލޯވެސް ވަނީ ގަދަޔަށް ރުއިމުގެ ސަބަބުން ވަރަށް ބޮޑަށް ދުޅަވެ ރަތްވެފައެވެ. މިދިމާވި ހިތާމަވެރި ހާދިސާގެ ސަބަބުން މައިޝާގެ ހިތުގައި އުފެދިފައިވާ ފާރުގަނޑުގައި ހީވަނީ މީހަކު ލޮނުމިރުސް އަޅާފައި ހުރިހެންނެވެ. ލޮލަށް ޖަމާވެފައި ހުރި ކަރުނަތައްވެސް ހީވަނީ ހަމަ ދެންމެ ދެންމެ ފައިބައިގަނެދާނެ ހެންނެވެ.

” މުހައްމަދު ފާޒިންގެ އެހީތެރިޔަކީ ތިއީތޯ…؟ ” ނަރުސް ކުއްޖަކު އައިސް މައިޝާގެ ކައިރީގައި ހުއްޓެމުން ބުނެލިއެވެ. މައިޝާ އަވަސް އަވަހަށް ބޯޖަހާލަމުން ކޮޅަށް ތެދުވެވުނީ ހިތް އަވަސްވިވަރުންނެވެ. އޭރު އެހިތުގެ ތެޅުންވެސް ވަނީ އިންތިހާއަށް ބާރުވެފައެވެ.

” މުހައްމަދު ފާޒިން ހޭއަރައިފި…! ” ނަރުސް ކުއްޖާ ބުނެލިއެވެ. މައިޝާގެ ލޮލަށް ޖަވާވެފައި ހުރި ކަރުނަތަށް ކޯތާފަތްމައްޗައް ފައިބައިގަތީ ލިބުނު އުފަލެއްގެ ބޮނޑުކަމުންނެވެ. މައިޝާ އޭނަގެ ފޯނުނަގާ ވަދީފާއަށް ގުޅާލިއިރު އަތުގައިވެސް ވަނީ މަޑުމަޑު ތުރުތުރެއް އުފެދިފައެވެ.

ނިދިފައި އޮތް ވަދީފާއަށް ސިހިފައި ހޭލެވުނީ ކައިރީގައި އޮތް ފޯން ރިންގުވާން ފެށުމުންނެވެ. ފޯނުގެ ސްކުރީނަށް އަރައިފައި އިން މައިޝާގެ ނަން ފެނުމުން ނިދިވެސް އެއްކޮއް ފިލައިގެން ހިނގައްޖެއެވެ. ފޯނުނަގާ ކަންފަތުގައި ޖައްސާލިއިރު ވަދީފާގެ ހިތްވެސް ދިޔައީ އޮބި ނޯންނަވަރަށް ތެޅެމުންނެވެ. ފޯނުނަގާ ކަންފަތުގައި ޖައްސާލުމަށްފަހު ހަލޯއޭ ބުނަން އުޅެ އުޅެ އަޑުވެސް ބޭރެއްނުވިއެވެ.

” މަންމާ…! ފާޒިން ހޭއަރައިފި…! ”  މައިޝާގެ އަޑުގައި ވަނީ އުފާވެރިކަމެވެ. ވަދީފާއަށްވެސް ހެއްދިފަރާތަށް ޝުކުރުކޮއްލެވުނީ ހިތަށް ލިބުނު އުފަލެއްގެ ބޮޑުކަމުންނެވެ. އަދި ނިދާފައި އޮތް އާމިރު ގައިގައި ކޮއްޓާލިހާއިރުން އާމިރު ތެދުވީ ފުންމާފައެވެ. އޭރު އާމިރުގެ ދެލޯވެސް ވަނީ ބޮޑުވެފައެވެ. ވަދީފާ އެވާހަކަ ބުނުމުން އާމިރު އަވަސް އަވަހަށް ތެދުވެގެން ގޮސް ފާހާނައަށްވަނީ ހޮސްޕިޓަލަށް ދިއުމަށްޓަކައި ތައްޔާރުވެލާށެވެ. އާމިރުގެ މޫނުމަތީގައި އޭރުވަނީ ފުޅާ ހިނިތުންވުމެވެ.

އާމިރު ހޮސްޕިޓަލަށް އައިސް ޕާޒިން ރޫމަށް ބަދަލުކުރުމުގެ ހުރިހާކަމެއް ހަމަޖެއްސިއެވެ. އައި.ސީ.ޔޫ އިން ނެރުނު ފާޒިން ފެނުމުން މައިޝާ އެވަރަށް ހިފަހައްޓައިގެން ހުރި ކަރުނަތައް އޭގެ މަގާމް ދޫކޮއްފައި ފައިބައިގަތެވެ. އަތުގެ ނުފުށުން ކަރުނަތަށް ފޮހެލަމުން ދެވަނަ ފަހަރަށްވެސް ފާޒިންއަށް ބަލާލިއެވެ. ފާޒިންވެސް އޮތީ މައިޝާއާއި ދިމަލަށް ބަލައިގެންކަމުން ދެމީހުންގެ ހަތަރުކަޅި ހަމަވެގެންދިޔައެވެ. އެވަގުތު މައިޝާގެ ދުޅަވެ ރަތްވެފައިވާ ދެލޮލާއި މިލާފައިވާ މޫނުފެނުމުން ގައިގައި ހުރި ޒަހަމް ތަކުގައި އަޅާވޭނަށްވުރެ ހިތުގައި އަޅަމުންދިޔަ ވޭން މާގަދައެވެ.

” ދަރިފުޅާ…! ވަރަށް ތަދުވޭތަ…؟ ” ފާޒިން ރޫމަށް ބަދަލްކޮށް ހުރިހާ ނަރުސްކުދިން ނިކުމެގެން ދިއުމުން ވަދީފާ އައިސް ފާޒިންގެ ބޮލުގައި ފިރުމާލަމުންބުނެލިއެވެ. ފާޒިން އެއްވެސް ޖަވާބެއްނުދީ ބަލައިލީ އެނދު ކޮޅުގައި ފާޒިންއަށް ބަލަހައްޓައިގެން ހުރި މައިޝާއަށެވެ.