ހަދިޔާ

މާޔާ ކޮޓަރީގެ އެނދުމަތީގައި އިށީދެލައިގެން އިން އިރު ކައިވެނި ކުރުމަށް ހަމަޖެހިފައިވާ ވަގުތު ކުޑަތަންވަމުން ދިޔަ ވަރަކަށް އަމިއްލަ ނަފްސް ކޮންޓްރޯލް ކުރަން އުނދަގޫވަމުން ދިޔައެވެ. ހިތަށް އަރާ ފައިބަމުން ދިޔަ އިހުސާސްތަކުން ދެލޯފުރިގެން އައިނަމަވެސް ކެތް ކުރަމުން ދިޔައެވެ. މިއީ ދުވަހަކުވެސް އޭނާގެ ހަޔާތުގައި ކުރިމަތިލާންޖެހިދާނެ ދުވަހެއް ކަމަކަށް މާޔާ ހިޔެއް ނުކުރެއެވެ. އެހެންނަމަވެސް ތަގުދީރުގެ ރޭވުމާ ދެކޮޅު ހެދޭނީ ކާކަށް ހެއްޔެވެ؟ ހަށިގަނޑުގައި އުފެދިފައިވާ މަޑުތުރުތުރާއެކު އަނގައިން މަޑު އާހެއްގެ އަޑު ބޭރުވެގެން ދިޔައެވެ. މާޔާ އޭނާގެ ދެއަތް ދެއަތާ މޮޑެލީ އަމިއްލަ ނަފްސު ހަމައަކަށް އަޅުވާލަންހެން ހީވިއެވެ.

 މާޔާ އިރުކޮޅަކު އެހެން އިނުމަށްފަހު މަޑުމަޑުން ތެދުވެގެން ގޮސް އެރެއަށް ހާއްސަކުރެވިފައިވާ ހެދުން ނަގާ އެއަށް ރަނގަޅަށް ބަލާލިއެވެ. ދެލޯމަރާ ބާރުކޮށްލުމަށްފަހު ހިންދިރުވާލާފައި މާޔާ ހެދުން ބަދަލުކޮށްލާ ތައްޔާރު ވާން ފެށިއެވެ. ކޮންމެ ގޮތެއް ވިޔަސް މިރޭ އޭނާ އެކަމާ ކުރިމަތިލާންޖެހޭނެއެވެ. ހިތުގައި ކިތައްމެ ވޭން އެޅިކަމުގައިވިޔަސް މާޔާ ދިޔައީ އޭނާއަށް ކެތް ކުރެވޭނޭ އެންމެ މައްޗަކަށް ކެތް ކުރަމުންނެވެ.

“ދަރިފުޅާ މާޔާ..” ބޭރުން އަޔާންގެ މަންމަ ނާޒިމާ ދޮރުގައި ދެތިން ފަހަރަކު ޖަހާލުމަށްފަހު ގޮވާލި އަޑުއިވުނެވެ. މާޔާ ގޮސް ދޮރު ހުޅުވިއިރު ނާޒިމާ ހުރީ ތައްޔާރުގެންނެވެ. ނާޒިމާގެ މޫނުމަތިންވެސް ފެންނަން ހުރީ ބަޔާންކުރަންދަތި އަސަރު ތަކެކެވެ. ނަޒިމާ ކޮޓަރީގެ ދޮރު ލައްޕާލާފައި މާޔާގެ ކޮނޑުގައި ހިފައިގެންގޮސް އެނދުމަތީގައި ބޭންދިއެވެ. މާޔާ އޭނާގެ އިހުސާސްތައް ފޮރުވަންވެގެން އިނީ އިސްޖަހާލައިގެންނެވެ. “މާޔާ ދަރިފުޅާ މަންމައަށް އެނގޭ މިއީ ދަރިފުޅަން ކުރިމަތިލާން ފަސޭހަ ކަމެއް ނޫންކަން… އެކަމަކު ދަރިފުޅު ވާނެ ހިތްވަރުކުރަން އިރާދަ ކުރެއްވިއްޔާ ދަރިފުޅަކަށް ދެރަ ގޮތެއް ނުވާނެ ކެތްކުރޭ ދަރިފުޅާ… މާތް ﷲ ވޮޑިގެންވަނީ ކެތްތެރިންނާއެކު..” ނާޒިމާ ވާހަކަ މެދުކަނޑާލި ކޮޓަރީގެ ދުރުހުޅުވުނު އަޑަށެވެ. އޭރު މާޔާގެ މަންމަ ޖަބީނާއާއި ބައްޕަ ހަޒާރު ކޮޓަރިއަށް ވަންނަނީއެވެ. “މަންމަ އެބަ އަންނަން ދަރިފުޅާ..” ނަޒިމާ ނުކުމެގެން ދިޔައި ޖަބީނާއަށާއި ހަޒާރުއަށް މާޔާއާއި ވާހަކަ ދައްކާލާނެ ފުރުސަތު ދޭންވެގެންނެވެ. ޖަބީނާއަށް މާޔާ ފެނުމުން ހިންދިރުވާލެވުނީ އެދަރިފުޅާ މެދު ހަމްދަރުދީވެގެންނެވެ. ހަޒާރު ޖަބީނާއަށް ވީގޮތް ފެނިފައި ކޮނޑުގައި ހިފަހައްޓާލީ އަނބިމީހާއަށް ހިތްވަރު ދިނުމުގެ ގޮތުންނެވެ. ޖަބީނާ ހަޒާރުއަށް ބޯޖަހާލާފައި މާޔާ ކައިރީގައި އިށީދެފައި އޭނާގެ އަތުގައި ހިފާލިއެވެ.

“ދަރިފުޅު ތައްޔާރުވޭ އަވަހަށް.. އިރުކޮޅަކުން ކައިވެނި ކޮށްދޭ މީހުން އަންނާނެ..” ޖަބީނާއާއި ހަޒާރު އެތަނުން ދިޔައީ މާޔާއަށް ހިތްވަރުދީފައެވެ. މާޔާ ޖަބީނާމެން ނުކުމެގެން ދިޔަތަން ބަލަންހުރެފައި ލޮލުން ނިރާލި ކަރުނަ ތިކި އަތުގެ ނުފުށުން ފޮހެލިއެވެ. ކިތައްމެ ހިތްވަރުކުުރަން މަސައްކަތް ކުރިޔަސް ބައެއް ފަހަރު ހިތަށް ވިސްނައިދޭން އުނދަގޫ ވަނީއެވެ.

މާޔާ ކޮޓަރިން ނުކުތީ ކައިވެނިކޮށްދޭ މީހުން އައުމުންނެވެ. ކައިވެނިކުރުމަށް ހަމަޖެހިފައިވާ މޭޒުދޮށުގައި އިށީދެގެން އިން އަޔާންގެ ނަޒަރު މާޔާއަށް ހުއްޓިފައި ހިތަށް ތަދުވިއެވެ. އެ ކުއްޖާގެ މޫނުމަތިން ފެންނަން ހުރި އަސަރަކުން ހިތް ބާރަށް ތެޅިގަތެވެ. އެހާ ނާޒުކު ވަގުތެއްގައިވެސް ހިތްވަރުކޮށްލައިގެން ހުރި ގޮތުން ތައުރީފް ހައްގެވެ.

ކައިވެނީގެ ކަންތައް ކުރިއަށްދިޔައިރު އެތަނުގައި ތިބި އެންމެންތިބީ ހިމޭންވެފައެވެ. އެއްފަރާތެއްގައި ބެހެއްޓިފައިވާ ގޮނޑިތަކުގައި އެންމެން އިށީދެލައިގެން ތިބި އިރު ކޮންމެ މީހެއްގެ ހިތުގައިވެސް ވަނީ މާޔާއަށްޓަކައި ހަމްދަރުދީ އުފެދިފައެވެ.

އިރުކޮޅަކާ ހިންދިރުވާލަ ދިރުވާލާ އިން މާޔާ ނޭވާ ހިފަހައްޓާލީ އަޔާން “އަނބި ގަބޫލުކޮށްފީމޭ” ބުނި އަޑަށެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.