ހަވާތިފް

(މިއީ، އަޅުގަނޑު ކުރިން އެސްފިޔައިގާ ޝާއިޢު ކުރި ދިގު ވާހަކަ، “ކަޅުފިނިފެންމާ” ގެ ދެވަނަ ސީޒަން އެވެ.)

ކުއްލިއަކަށް ވިދާލިއެވެ. މުޅި އުޑުމަތި އެކީ އެކައްޗަކަށް އަލިވެގެން ދިޔައެވެ. ހީވީ ވިލާތަކުގެ ތެރެއިން ރެދަން ކަނޑާލިހެންނެވެ. ހަމަ އެ ސިކުންތުގައި ޖަހާލި ބާރު ގުގުރީގެ ސަބަބުން ރޭގަނޑުގެ ހަމަހިމޭންކަން ކަނޑުވާލިއެވެ. ތުފާނީ ރެއެއްގެ ބިރުވެރިކަން، ރަށުގެ އެންމެންވެސް ދިޔައީ ތަހައްމަލު ކުރަމުންނެވެ. ކަޅު ހިލަގަނޑުތަކެއްފަދަ ވިލާތަކުން މުޅި އުޑުމަތިވަނީ ބައްދާލާފައެވެ.

ސަމީރު ބާރު ހިނގުމެއްގައި މިސްރާބު ޖަހާފައިވަނީ ގެއާ ދިމާއަށެވެ. ދެއަތުގައި މެދުވަރުގެ ދެ ރާގޮނޑި އޮތެވެ. ވިއްސާރަ އޮއްސާލުމުގެ ކުރިން ގެއަށް ވަދެވޭތޯ ބަލަން އެބަ ޖެހެއެވެ. ރަށުގެ ބޮޑުމަގުން ހިނގަމުންދިޔައިރު މަގުގެ ދެފަޅީގައި ޖަހާފައިވާ ހޮޅިބުރިތަކުގެ އަލި ނޫން އެހެން އައްޔެއް ފެންނާކަށްނެތެވެ.

ކުއްލިއަކަށް ސަމީރުގެ އަތުން އެއްމަސް ދޫވެގެން ވެއްޓިއްޖެއެވެ. ހިނގުން މަޑުޖައްސަލުމަށްފަހު ޗޮކެއް ކަނޑާލަމުން އޭނަ ތިރިވީ މަސް ނަގާށެވެ. ރޭގަނޑުގެ އަނދިރިކަމުގެ ސަބަބުން އޭނާގެ އަތުގައި މަސް ޖެހުނީ ދެތިން ހަތަރު ތާކު އަތް ކޭއްތިފަހުންނެވެ. މަސް އަތަށް ހެޔޮވަރުކޮށްލުމަށްފަހު އޭނާ ހިންދެމިލިއެވެ. އެވަގުތު އޭނާގެ ކުރިމަތިން ކަޅުކުލައިގެ ބުޅަލެއް ހުރަސްކޮއްލިއެވެ. ނުހަނު ބާރު ދުވެލީގައެވެ. ކަޅު އަނދިރިކަމުގެ ތެރެއަށް ފޭދިފައިވާ ފަނޑު ހޮޅިބުރީގެ އަލިންވެސް އެ ބުޅާ ސަމީރަށް ފެނުނީ ކަޅު ހިޔަންޏެއްގެ ސިފައިގައެވެ. ހަގީގަތުގައި އެއީ ބުޅަލެއް ކަމެއްވެސް ސަމީރަކަށް ޔަގީނެއް ނޫނެވެ. އެއީ އޭނާގެ ހީކުރުމެކެވެ. ދިވެހި ރާއްޖޭގެ ރަށެއްގެ މަގުމަތިން ހަމަގައިމުވެސް ހަތަރެސްފައިޖަހާފައިވާ މިނިކާވަގެއް ނުފެންނާނެއެވެ. ބުޅަލެއްކަމަށް އޭނާ ނިންމީ އޭތީގެ ބޮޑުމިނާއި ދިޔަލެއް ބާރުމިނަށް ބަލާފައެވެ. ސަމީރު އަނެއްކާވެސް ގެއާ ދިމައަށް މިސަރާބު ޖެހިއެވެ. އެވަގުތު އޭނާގެ ފުރަގަހުން ދިއްލުނު ރަތް ދެލޯ ސަމީރަކަށް ނުފެނުނެވެ.

***

ސަމީރަށް ގޭގެ ވަށާފާރުން އެތެރެއަށް ވަދެވުނީ ހަމަ ކިރިޔާއެވެ. ބޯކޮށް ވާރޭ އޮއްސާލައިފިއެވެ. ޖައްވުގައި ވި ތެތް ފިނިކަން ދެގުނައަށް އިތުރުވެގެން ދިޔައެވެ. ވާރޭ ވެހޭލެއް ބޯކަމުން އިސާހިތަކު މުޅި މަގުމަތީ ފެން ބޮޑު ވެއްޖެއެވެ.

މަސްތައް ބާލިދީއަކަށް ލުމަށްފަހު ސަމީރު ގޮސް ހުއްޓިލީ ފަނުން ހަދާފައިވާ ގޭގެ ދޮރުކައިރީގައެވެ. ލާފައިހުރި މުންޑު އަރުވާޖަހާލުމަށްފަހު ދޮރުގައި ހިފާލިއެވެ. ހުރީ ތަންޑު އަޅާފައެވެ.

“ވަފިއްޔާ!! ވަފިއްޔާ ނިދީތަ؟ ދޮރުހުޅުވާލަ ބަލަ!!” ސަމީރު ދެތިން ފަހަރަކު ގޮވާލިއެވެ. އޭނާގެ އަންހެނުން، ވަފިއްޔާގެ ޚަބަރެއް ނުވިއެވެ. މި ވީ މާ ނުބައި ގޮތެކެވެ. އެއްކޮޅުން ސަމީރު ހުރީ ތެމި ފޯވެފައެވެ. އަނެއްކޮޅުން އޭނާ ހުރީ އިންތިހާއަށް ނިދާލަންވެސް ބޭނުންވެފައެވެ. ނަމަވެސް އެތާ އިރުކޮޅަކުން ހުރުމަށްފަހު އޭނާ ހިނގައިގަތީ ގެއާ ތަންކޮޅެއް ދުރުގައި ހަދާފައިހުރި ކުޑަ ބަދިގެ ގަނޑާ ދިމާއަށެވެ.

ބަދިގެއިން މަސްގޮނޑިއަކާއި ވަޅިއެއް ހިފައިގެން ނުކުމެ ސަމީރު ގެނައި ދެ މަސް ކަނޑަން އޭނާ އުޅުނެވެ. އެއިރުވެސް ބޯކޮށް ވެހެމުންދިޔަ ވާރޭއަށް ކުޑަވެސް ބަދަލެއް ނާދެއެވެ.

ބާލިދީއިން ފުރަތަމަ މަސް ނެގުމަށްފަހު މަސްގޮނޑީގައި ބާއްވާލިއެވެ. އަދި ވަޅި އޭގެ ކަރާ ދިމާއަށް ކޮއްޕާލުމަށްފަހު ތިރިއަށްގެނެސް މަހުގެ ބޯ، ބަނޑައިދުލާއެކު ވަކިކޮށްލައިފިއެވެ.

“މިޔާއު!!” ކުއްލިއަކަށް ސަމީރަށް ސިހިފައި ބަލައިލެވުނީ ވަރަށް ކައިރިން ބުޅަލެއް ގޮވާލި އަޑު އިވިގެންނެވެ. ގޭގެ ގޯތިތެރޭ ބޯކޮށް ހެދިފައިވާ ހުއި ގަސްތަކުގެ ތެރެއިން ދިއްލިފައި އިން ރަތް ދެލޯ ސަމީރުގެ ލޮލުގައި އަޅައިގަތީ ދެތިން ހަތަރު ދިމާ ބެލިފަހުންނެވެ. ސަމީރު ނިކަން ފަރުވާތެރިކަމާއެކު އެ ދެ އަލިކޮޅަށް ބަލައިލިއެވެ. އެވަގުތު އެ އަލިކޮޅަށް ބަދަލު އަތުވެއްޖެއެވެ. މަޑުމަޑުން އެ ދެ އަލިކޮޅު ސަމީރާ ދިމާއަށް އަންނަން ފެށިއެވެ.

ގޭގެ އަސްކަނި ދޮށުގައި އަޅުވާފައި ހުރި ފުޅި ބައްތީގެ ރަން އަލި އެ އެތީގެ ގަޔަށް އެޅުމާއެކު އޭގެ ސޫރަ ސަމީރަށް ފެނުނެވެ. އެއީ ކަޅު ކުލައިގެ ދިގު ކެހެރިތަކެއް ފަޅާފައިވާ ބުޅަލެކެވެ. ނަމަވެސް އާދައިގެ ދިވެހި ބުޅަލަށް ވުރެ އޭތި ބޮޑުހެން ހީވެއެވެ. ދެލޯ ވެސް ހުރީ ރަތް ކުލައަކުން ދިއްލިފައެވެ.

ބޮޑާ ހިނގުމެއްގައި ކަޅު ބުޅާ އައިސް މަޑުކޮށްލީ ސަމީރާއި 3 ވަރަކަށް ފޫޓު ދުރުގައެވެ. އެއިރުވެސް އޭތީގެ ނަޒަރު ހުއްޓިފައި ވަނީ ސަމީރުގެ މޫނަށެވެ. ސަމީރު އިނީ ގުޑާލަން ވެސް ނުކެރިފައެވެ. ވެހެމުން ދިޔަ ވިއްސާރައިގެ ސަބަބުން އޭނާގެ ހަށިގަނޑު ތުރުތުރު ލަމުންދިޔައެވެ. ނަމަވެސް އެ ބުޅަލުގެ ކެހެރީގައި އެންމެ ފެން ތިއްކެއްވެސް ޖެހިފައި ވާހެންނެއް ހިޔެއް ނުވެއެވެ.

ސަމީރުގެ މޫނަށް އިރުކޮޅަކުން ބަލަން އޮތުމަށްފަހު ބުޅާ މަޑުމަޑުން އަނގަ ހުޅުވާލިއެވެ. އޭގެ ތޫނު ދަތްތައް ފެނުމާއެކު ސަމީރުގެ މުޅި ގައިން ހީބިހި ހިލުވާލިއެވެ. ނަމަވެސް ސަމީރު އިތުރަށް ހަރަކާތް ކުރާކަށް އެންމެ ސިކުންތެއްވެސް އެ ބުޅާ ނުދިނެވެ. ހުށިޔާރު ވެލުމަށްފަހު ހޭރިގަންނަމުން ސަމީރުގެ ގަޔާ ދިމާއަށް އޭތި ފުންމައިގަތެވެ. ހަމަ އެއާއެކު ޖައްވުގެ ތެރޭގައި ގުގުމައިގެން ދިޔައީ ސަމީރުގެ ވޭނީ ހަޅޭކުގެ އަޑެވެ….

***

ވެހެމުންދިޔަ ވަރޭ މަޑުމަޑުން ތުނިކުރަން ފެށިއެވެ. އުޑުމަތި ބައްދާލާފައިވާ ކަޅު ބޯ ވިލާތައް މަޑުމަޑުން ކެހެމުންދިޔައެވެ. ޖަވާހިރުތަކެއްފަދަ ތަރިތަކުގެ ވިދުން ދުނިޔެއާ ހަމައަށް ފޯރުކޮށްދެމުންނެވެ. މަގުތަކުގައި ހެދިފައިވާ ފެންކޯރުތަކުން، ތަރިތަކުގެ ‘ރިފްލެކްޝަން’ ފެންނަމުންދިޔައީ އަޖައިބު ވާހާ ރީތިކޮންނެވެ. ދޭތެރެ ދޭތެރެއިން ކޯރަށް ވެއްޓޭ ދެތިން ފެންތިކީގެ ސަބަބުން ކުދި ކުދި ރާޅު ބާނިތައް އުފެދެމުންދިޔައެވެ.

ހަމަ ހިމޭންކަން ވެރިވެފައިވާ މަގުގެ އެއްކޮޅުން މަޑު ހިނގުމެއްގައި ހިނގާލާފާ އައި ބުޅާ އައިސް ވަނީ ދޮން އަހުމަދުގެ ގެއަށެވެ. ސިމެންތި ނުޖަހާ ހުރި ތެޅިގަލުގެ ފާރާ ހަމައަށް ދެވުނުއިރު އެ ބުޅާ ދިޔައީ މަޑުމަޑުން ދުން ކޮޅަކަށް ބަދަލުވަމުންނެވެ. އިސާހިތަކު ނުހަނު ފަސޭހަ ކަމާއެކު އެ ބުޅާ، އެ ފާރުގެ ތެރެއަށް ފުރޭނިގެން އެތެރެއަށް ވަދެއްޖެއެވެ.

***

މޭޒުމަތީ ހުރި ދުފާ ތަބަކުން ފޯއް ކިބައެއް ނެގުމަށްފަހު ދޮންއަހުމަދު ފޯއްވަޅިއަކުން އެ ފޯއްކިބަ ކޮށަން ފެށިއެވެ. އެއިރުވެސް އޭނާގެ އަނގަ ވަނީ ދުފުން ގަނޑަކުން ފުރިފައެވެ. އަނގައިގެ ދެ މިޔަކަނުން ރަތް ކުޅުގެ އަސަރު ފެންނަން ހުއްޓެވެ. ކުޑަ ދެލޮލުން ފެންނަމުން ދިޔައީ ޝައިޠާނީ ވިދުވަރެކެވެ.

ކުއްލިއަކަށް ފާރުގައި ހުރި ކުޑަ ލޯވަޅަކުން އޮލަ ދުންކޮޅަށް ވަންނަން ފެށިއެވެ. ދުންކޮޅު މަޑުމަޑުން އިންސާނެއްގެ ބައްޓަމަށް ސިފަ ޖެހެމުން ދިޔައެވެ. ދެތިން ސިކުންތުފަހުން ދޮންއަހުމަދުގެ ކުރިމަތީ ހުއްޓިލައިގެން ހުރީ 6 ފޫޓުގެ ދިގު އިސްކޮޅެއް ލިބިފައިވާ ފިރިހެނެކެވެ. ހަމުގެ ކުލަ އެންދެރިހާ ކަޅެވެ. ދެލޮލުގެ ކަޅި ފިޔަވާ ދެން އޮތް ބައި ހުރީ ގަދަ ރަތް ކުލައިގައެވެ.

ދޮން އަހުމަދު އެމީހާގެ މޫނަށް ބަލައިލި ބޮޑާ ކަމާއެކުގައެވެ. އެއްމިޔަކަނުން ހީލަމުން ދޮން އަހުމަދު ގޮނޑީގައި ރަނގަޅަށް ހަމަޖެހިލިއެވެ.

“ކޮބާ؟ އެކަން ނިންމާލީތަ؟”

ޖަވާބު ދިނުމުގެ ބަދަލުގައި އެ މިހާ އެނބުރުނީ އަނެއް ފަރާތަށެވެ. ދެ ލޮލުން ފެނިގެން ދިޔައީ ހިތާމަޔާއި ގޮތް ހުސްވުމުގެ އަސަރު ތަކެވެ.

“އަހަރެން މިނިވަން ކޮށްދީ!!” އަޑުގައި ވަނީ މަޑުމޮޅި ކަމެވެ.

“ހަހަ….” ދޮންއަހުމަދު ބާރު ހިނިގަނޑެއް ޖަހާލިއެވެ. “އަބްރާސް ކަލޭތަ ހަމަ ތިހެން ތި ބުނީ؟؟”

“އަހަރެން ދެން ބޭނުމެއް ނޫން ކަލޭގެ އަޅުވެތިކަމުގެ ދަށުގަ އުޅޭކަށް!” އަބްރާސް ދޮން އަހުމަދާ ދިމާއަށް އެނބުރިލިއެވެ. އެއިރު އޭނާގެ ދެލޮލުން ރުޅިވެރިކަމުގެ އަސަރު ފެންނަމުން ދިޔައެވެ. “އަހަރެން މިނިވަން ކޮށްދީ!! އެހެން ނޫނީ….”

“އެހެން ނޫނީ؟ އޭނ!! އެހެން ނޫނީ ކީއްކުރެވޭނީ…؟” ދޮން އަހުމަދު ބޮޑާ ކަމާއެކު އޭނާގެ އަތުގައި އޮތް ތަވީދެއް ފަދަ އެއްޗެއް ދައްކާލިއެވެ. “ދެކޮޅުހަދަން އުޅެންޏާ މާ ރީއްޗެއް ނުވާނެ! މަގޭ އަންހެނުންވެސް އެހެރީ ކަލޭ ހަދާނެ އެއްޗެއް ހަދަން ދީފަ!!”

ދޮން އަހުމަދު މަޑުމަޑުން އެ ތަވީދު މުށުތެރެއަށް ލާ ބާރުކޮށްލިއެވެ. އެއާއެކު އަބްރާސްގެ ދެލޯ ތަންމިނަށް ހުޅުވިގެން ދިޔައެވެ. މުޅި ހަށިގަނޑުން ދިލަ ނަގައިގަތެވެ. ހަށިގަނޑުން މަޑުމަޑުން ދުން އަރަންފެށިއެވެ. ނަގަމުން ދިޔަ ދިލައަށް ކެތް ނުކުރެވުމުގެ ސަބަބުން އަބްރާސްއަށް ދެ ކަކޫ މައްޗަށް ތިރިވެވުނެވެ.

ދޮން އަހުމަދު މަޑުމަޑުން މުށް ދޫ ކޮށްލިއެވެ. އަބްރާސް އަށް ހަމަ ނޭވައި ލެވުނީ ދެނެވެ. ހަމަ އެއާއެކު ލުއި ދުން ކޮޅަކަށް ބަދަލުވެގެން ފާރުގައި ހުރި ލޯވަޅުން ނުކުމެގެން ގޮސް ގެއްލުނެވެ.

***

މުޅި ހިސާބުގަނޑަށް ފެތުރިފައިވަނީ، ވެލިގަނޑުމައްޗަށް ބީއްސަމުންދިޔަ ރާޅުގެ ހަމަ ހިމޭން އަޑެވެ. މި ފަދަ އަނދިރި ރެއެއްގެ ދަންވަރުގެ ވަގުތުގައި ރަށުގެ ތުނޑިމަތީ ހަމަގައިމުވެސް އިންސާނަކު ނުހުންނަނެއެވެ. ނަމަވެސް ކޮންމެވެސް ‘މީހަކު’ ތުނޑީގައި ހަރަކާތްތެރިވަމުން ދިޔަ މަންޒަރު ފެންނަމުންދިޔައެވެ. އެމީހަކު މަޑުމަޑުން ރާޅު ބީއްސަމުން ދިޔަ ސަރަހައްދާ ދިމާއަށް ހިނގައިގަތެވެ. ލަސް މަޑުމޮޅި ހިނގުމެއްގައެވެ.

***

އަބްރާސް މަޑުމަޑުން ވެލިގަނޑުމަތީ އިށީނެވެ. އަނދިރިކަމުން އޭނާގެ މޫނު ނުފެނުނުކަމުގައި ވިއަސް އެ މޫނުމަތީ ވަނީ ހިތާމައިގެ އަސަރެވެ.

އޭނާ އަކީ ކޮންފަދަ މަޖުބޫރީ މީހެއް ހެއްޔެވެ؟ ދޮން އަހުމަދު ވަނީ އޭނާއަށް އޮޅުވާލާފައެވެ. ދޮން އަހުމަދުގެ އެދުންތައް ފުއްދައިދިނުމަށް އެގްރިމެންޓް ހެދީ އޭނާއަށްވެސް މިނިވަންކަން އޮންނާނެ ގޮތުގެ މަތިންނެވެ. ނަމަވެސް ދޮން އަހުމަދުގެ ބާރުގެ ދަށަށް ހަމަ ދިއުމާއެކު އޭނާ އަބްރާސް ގެ ހުރިހާ ބާރެއް ވަނީ އަތުލައިގަނެފައެވެ. ދޮން އަހުމަދުގެ އަތުގައިވާ ތަވީދަކީ އަބްރާސް ގެ ހުރިހާ ބާރެއް ރައްކާކޮށްފައިވާ އެއްޗެވެ. އެއަށް ގޮތެއް ވެއްޖެނަމަ އަބްރާސްގެ ދުވަސް ދިޔައީއެވެ.

ލޮލުން އައި ކަރުނަތިކި ފުހެލަމުން އަބްރާސް ކޮޅަށް ތެދުވިއެވެ. މަޑުމަޑުން އުޑުމަތީ ވިދަމުންދިޔަ ތަރިތަކަށް ނަޒަރު ހިންގާލިއެވެ. އެވަގުތު އޭނާގެ ސިކުނޑިއަށް ވެރިވަމުންދިޔައީ އޭނާގެ ލޯބިވާ ދަރިފުޅެވެ. ދޮން އަހުމަދު ވަނީ އޭނާގެ ދަރިފުޅު، މާބަނޑު އަންހެނެއްގެ ބަނޑު ތެރެއަށް ވައްދާ، މަރާލާފައެވެ. އެއީ ކޮންފަދަ ހިތާމަވެރި ދުވަހެއް ހެއްޔެވެ؟ ދޮންއަހުމަދު އޭނާގެ އެއްވެސް އާދޭހަކަށް އިޖާބައެއް ނުދިނެވެ. ދޮންއަހުމަދު ވިސްނީ އޭނާގެ ފައިދާއަށެވެ. އަބްރާސްގެ ދަރިފުޅު ޤުރުބާން ކޮށްގެންވެސް ލާރިކޮޅެއް ހޯދޭތޯ އޭނާ ބެލިއެވެ. ބޯވާއެއްގެ ސިފައިގާ ޝައިމާގެ ބަނޑަށް އަބްރާސް ގެ ދަރިފުޅު ވެއްދީ އޭނާގެ ވެސް ނުރުހުމުގައެވެ.

ހަޤީޤަތުގައި އޭނާ މިހާރު އެއްވެސް މީހަކަށް ގެއްލުމެއް ދޭކަށް ބޭނުމެއް ނޫނެވެ. އޭނާ ބޭނުންވަނީ މިނިވަންކަމާއެކު އަމާން ދިރިއުޅުމެކެވެ. ނަމަވެސް އެއީ ދުވަހަކުވެސް ވާނެ ކަމެއް ހެންނެއް ހިޔެއް ނުވެއެވެ. އޭނާ ދެން މިނިވަންވާނީ ދޮން އަހުމަދު މަރުވި ދުވަހަކުންނެވެ. މިރޭވެސް، ސަމީރު އޭނާގެ ޝިކާރައަކަށް ވެގެން އެދިޔައީ އޭނާއަށް ކުރިމަތި ވެފައިވާ މަޖުބޫރީގެ ސަބަބުންނެވެ. ސަމީރުގެ މަރުގެ ސަބަބުން މާދަމާ ބަޔަކު ހިތާމަކުރާނެއެވެ. ނަމަވެސް އެ މަރުގެ ސަބަބުން އުފާކުރާނެ ބަޔަކުވެސް ތިބޭނެކަމީ ޝައްކެއް އޮތް ކަމެއް ނުނެވެ.

***

އިރު އަރައި ދުނިޔެ މައްޗަށް އަލިވެގެން ދިއުމާއެކު ސަމީރުގެ މަރުގެ ޚަބަރު މުޅި ރަށަށް ފެތުރިގެން ދިޔައެވެ. އޭނާ މަރުވެފައި އޮއްވާ ފެނުނީ ގޯތި ތެރޭ ހެދިފައިހުރި ހުއި ގަސްތަކުގެ ތެރެއިންނެވެ. ހަށިގަނޑަށް އެކިވަރުގެ އަނިޔާތައް ވަނީ ލިބިފައެވެ. މޫނުމަތީގައިވެސް ފުން ކޮށް ވަކި ދަމާލާފައިވާ ނިޝާން ފެންނަން ހުއްޓެވެ.

ސަމީރުގެ މަރުވެފައިވާ މަސްގަނޑު ވަޅުލުމަށްޓަކައި ގިނަ ބަޔަކު ސަހަރާއަށް އެއްވިއެވެ. އެންމެ ގެ މޫނުމަތިންވެސް ފެންނަނީ ސުވާލު މާކެކެވެ. މި ފަދަ ރަޙުމް ކުޑަ އަމަލެއް ހިންގީ ކާކު ބާއެވެ؟ އެއީ އިންސާނަކު ހިންގާފައިވާ އަމަލަށް ނުވާނަމަ………

“ކޮބާތަ ސަމީރުގެ އަންހެނުން ވަފިއްޔާ؟؟” ސަހަރާއަށް އެއްވެފައި ތިބި މީހުންނާ ތަންކޮޅެއްް ދުރުގައި ހުރި އަންހެނަކު ސުވާލު ކުރިއެވެ. “ނެތް އެތަނަކުން ފެންނާކަށް!!”

“އޭނާ އެބައޮތޯ ގޭގަ. ވަރަށް ހާލު ބޮޑު ކަމަށްވަނީ. އެހެންވެ ކަންނޭނގެ ނައީ.” އެތާ ހުރި އެހެން އަންހެނަކު ޖަވާބު ދިނެވެ. “އަހަރެންވެސް މިރަށުގައި މި ހިނގާ ހަދިސާތަކުން މިހުންނަނީ ނުލާހިކު ބިރުގަނެފަ. ކުރިން ދުވަހު އެ ޔައީޝްގެ އަންހެނުން ޖަޒްލާ ވެސް މަރުވީ، ބުނާ އަޑުއެހިން ޖަޒްލާވެސް މަރުވީ ހަމަ އެހާ ބިރުވެރި ގޮތަކަށޭ! އެ ގޮއްޔެގެ މޫނު ބަލާލާކަށްވެސް ދާކަށް ނުކެރުނު!”

***

“ދެން ހައްސާން!” ވަފިއްޔާ ހިނިގަނޑެއް ޖަހާލިއެވެ. އެއިރު ހައްސާނު އޮތީ ވަފިއްޔާގެ އުނގުގައި ބޯއަޅާލައިގެންނެވެ. “ތިހެން ނުހަދަ ބަލަ، ހީލި ކަރުވައޭ!!!”

“އަނެއްކާ 3 މަސް ވަންދެން މަޑުކުރަންވީ؟” ކެތްރެރިކަން ކުޑަވެފައިވާ ރާގެއްގައި ހައްސާނު ބުނެލިއެވެ. “އަހަރެން ދޮން އަހުމަދަށް ހާދަ ބޮޑު އަގެއް އަދާ ކުރަން ޖެހުނޭ!”

“އަހަރެންވެސް ބޭނުމޭ ހަމަ މިއަދުން މިއަދަށް ހައްސާނާ ކައިވެނި ކުރަން! އެކަމަކު އިއްދަ ހަމަ ކުރަން ޖެހޭނެ އެއްނު! އަނެއް ކޮޅުން މިރަށު މީހުން ދެކޭ ގޮތުގައި އަހަރެން އޮންނާނީ ވަރަށް ދެރަވެފަ! ހުހް! ސަމީރު މަރުވެގެން އަހަރެން ކުރާނީ އުފަލެއްނު!” އަނެއްކާވެސް ވަފިއްޔާ ހިނިގަނޑެއް ޖަހާލިއެވެ.

މިއީ އަދުގެ ހާލަތަވެ. ފަނޑިތަ ސިހުރު ހާހޫރަ ހަދައިގެން އަމިއްލަ ފިރިމީހާ މަރާލައިގެންވެސް މުއްސަނދިކަން ހޯދަން އުޅޭ އަންހެނުން މަދެއް ނޫނެވެ. ވަފިއްޔާ އަކީ އެކަމުގެ މިސާލެކެވެ. އޭނާގެ ފިރިމީހާއަކީ މަސްވެރިއެކެވެ. ލިބޭ އާމްދަނީއިން ދެކޮޅު ޖެހެނީ ގަދަކަމުން ދަމާ ގެނެސް ޖެއްސީމައެވެ. ވަފިއްޔާއަކީ ކުޑައިރުއްސުރެ މުއްސަނދި ދިރިއުޅުމެއް އުޅެން ބޭނުންވި ކުއްޖެކެވެ. ނަމަވެސް މައިންބަފައިންގެ އެދުމަށް، ސަމީރާއި ކައިވެނި ކުރަން ޖެހުނު ހިސާބުން ފެށިގެން އޭނާ ސަމީރަށް ނަފްރަތު ކުރިއެވެ.

ހައްސާނަކީ ރަށުގައި ހުރި ބޮޑު ވިޔަފާރި ވެރިއެކެވެ. އޭނާގެ ދަހިވެތި ލޯ ގޮސް ހުއްޓުނީ ވަފިއްޔާގެ ލޫޅާފަތި ހަށިގަނޑަށެވެ. ވަފިއްޔާގެ ރުހުން ހައްސާނު ކާމިޔާބުކުރީ، ސަމީރު މަހައްދާ ދުވަސް ދުވަހު ވަފިއްޔާގެ ހިތްހަމަ ޖައްސައިދީގެންނެވެ. ފައިސާއަކީ ހައްސާނަށް ފެން ފަދަ އެއްޗެކެވެ. ވަފިއްޔާ ދަހިވެތިވީ ހައްސާނުގެ ފައިސާ އަށެވެ. ހައްސާނު ދަހިވެތިވީ ވަފިއްޔާގެ ހަށިގަނޑަށެވެ. ދެމީހުންގެ ގުޅުން ފެށިގެން ދިޔައީ އެހިސާބުންނެވެ.

***

ބާރު ދުވެލީގައި އައިސް ރަށުގެ ފަޅަށް ވަން ލޯންޗު ޖެޓީއާއި ގާތް ކޮށްލުމާއެކު، ޝާލިނީ އަވަސް އަވަހަށް ލޯންޗުން ފޭބިއެވެ. ފުރޮޅުލީ ފޮށީގެ އަތްގަނޑުގައި ހިފައިގެން ހުރެ އޭނާ ހިނގައިގަތީ ގެއާދިމާއަށެވެ. ވެފައިހުރި ވަރުބައްޔެއްގެ ސަބަބުން އޭނާ ބޭނުންވަނީ އަވަަހަށް ނިދާލާށެވެ. ނަމަވެސް ގެއަށް ވަނުމާއެކު ދެން ވާނެ ގޮތް ހިތަށް އައުމުން އޭނާގެ ގާތަށް ހިނިއަތުވެއްޖެއެވެ. އޭނާ ރަށަށް މިއައީ 4 އަހަރު ފަހުންނެވެ. ލޯބިވާ މަންމައާއި ކޮއްކޮ ނުދެކޭތާ ދުވަސްތަކެއް ފަހުން ރަށަށް އެ އައީ، އެމީހުން ކައިރީ ނުވެސް ބުނެއެވެ. އޭނާ ބޭނުންވީ އެމީހުންނަށް ރަނގަޅު ސަޕްރައިޒެއް ދޭށެވެ.

ޝާލިނީ އައިސް ގޭގެ ދޮރުގައި ހިފާލިއެވެ. ހުރީ ތަޅުލާފައެވެ. އޭނާ ދެތިން ފަހަރު ދޮރުގައި ޓަކިޖަހާލިއެވެ. އެއަށްފަހު ލާފައިހުރި ބާރު ޓީޝާޓަށް ދަމާލާ ރެޑީ ވެލިއެވެ. މަންމަމެންގެ މޫނަށް ވެރިވެގެން ދާ ކުލަވަރު ނުހަނު ގާތުން ބަލަން އޭނާ ބެނުމެވެ.

އިރުކޮޅެއް ފަހުން ދޮރުހުޅުވިގެން ދިޔައެވެ. އެއިރު ޝާލިނީގެ ކުރިމަތީ ހުރީ އޭނަގެ މަންމަ ޒުލްފާ އެވެ. ޝާލިނީ ފެނުމާއެކު ޒުލްފާގެ މޫނުގެ ކުލަވަރު ވަގުތުން ބަދަލުވެގެން ދިޔައެވެ. މޫނުމަތި އުޖާލާ ވިއެވެ.

“ދަރިފުޅާ!!” ޒުލްފާ އައިސް ޝާލިނީގެ މޫނުގައި ދެއަތުން ހިފަހައްޓާލިއެވެ. “ނުވެސް ބުނެ އެއްނު ތި އައީ!! އަވަހަށް ވަދޭ އެތެރެއަށް!” ޒުލްފާ ޝާލިނީގެ ފޮށި ހިފައިގެން އެތެރެއަށް ވަނެވެ. ޝާލިނީވެސް ޒުލްފާގެ ފަހަތުން ކަހަލަ ގޮތަކަށް އެތެރެއަށް ވަނެވެ.

ޝާލިނީއަށް މުޅި ގޭތެރެއަށް ނަޒަރު ހިންގާލެވުނެވެ. މާބޮޑު ތަފާތު ތަކެއް ނައިކަމުގައި ވިއަސް ގޭތެރެއަށް ކޮންމެވެސް ކަހަލަ ފަޅު ކަމެއް ވެރިވެފައި ވާހެން ހީވެއެވެ. ގޭގެ ބޮޑު ދޮރު ލައްޕާފައި ހުރުމުގެ އިތުރުން، ކުޑަދޮރުތަކުގެ ފޮތިތައްވެސް ހުރީ ކަހާލާފައެވެ. މުޅި ގޭތެރެއަށް ވެރިވެފައިވަނީ ފަނޑު އަނދިރިކަމެކެވެ.

“ކޮބާ ކޮއްކޮ؟؟” ޝާލިނީ ގޮސް ސޯފާއަށް ޖެހިގަތެވެ.

ފޮށިހިފައިގެން ކޮޓަރިއަށް ވަދެވަދެ ހުރި ޒުލްފާގެ ފިޔަވަޅުތަކަށް ހުއްޓުން އެރިއެވެ. ފެންކަޅިވެފައިވާ ދެލޮލުން ވެއްޓުނު ކަރުނަތިކި ޝާލިނީއަށް ނުފެނުނީ އޭނާ ފުރަގަސް ދީގެން ހުރުމުގެ ސަބަބުންނެވެ.

“ކޮބާތަ ކޮއްކޮ؟” ޝާލިނީ ސުވާލު ތަކުރާރު ކޮއްލިއެވެ.

ޒުލްފާ، އަތުން ޖެހިގެން ހުރި ކޮޓަރިއަށް އިޝާރާތް ކޮށްލިއެވެ. އެއަށްފަހު އޭނާ އަވަސް އަވަހަށް ފޮށިހިފައިގެން ޝާލިނީގެ ކޮޓަރިއަށް ވަދެއްޖެއެވެ.

ޝާލިނީ މަޑުމަޑުން ގޮސް އެ ކޮޓަރީގެ ދޮރު ހުޅުވާލިއެވެ. އެއާއެކު އޭނާގެ ދެލޯ ތަންމިނަށް ހުޅުވިގެން ދިޔައީ ފެނުނު މަންޒަރުގެ ސަބަބުންނެވެ……

ނުނިމޭ

ނޯޓް: “ހަވާތިފް” އަކީ ސިހުރުގެ ބާވަތަކަށް ކިޔާ ނަމެކެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.