ފިޔަފަތް 20

* “ސާޔަލް..” ޒައިނާގެ ދުލުން ބޭރުވިއެވެ. “ސަވާނާ..” ސާޔަލްއަށްވެސް ބުނެވިއްޖެއެވެ. “ސަވާނާ އަކީ ސަލްވިޔާ އޭނަގެ އެންމެ ގާތް އެކުވެރިޔާ އާއި ދިމާލަށް ލޯބިން ކީ ނަމެއް.. ސަވާނާއަކީ ޒައިނާތަ..؟؟ ސަވާނާ އަކީ ޒައިގެ މަންމަތަ..؟؟” ޒައިލީން އަށް ޒައިނާއާއި ސާޔަލްއަށްވުރެ ބާރަށް އަހާލެވުނެވެ. *

“ސަވާނާ… އެއީ ހަމަ އަހަރެންގެ އެކުވެރި ސަވާނާ…” ސާޔަލް ފޯނުން ފެންނަން ހުރި ޒައިނާ އާއި ދިމާލަށް އިނގިލި ދިއްކޮށްލަމުން ބުނެލިއެވެ. ޒައިނާގެ މޫނަށް އަރާ ފައިބަމުން ދިޔަ ކުލަވަރުތަކުން ޒައިލީންއަށް އެއީ ތެދެއްކަން ގަބޫލު ކުރަން މަޖުބޫރުވިއެވެ. ދުވަހަކުވެސް ޒައިނާ އެހާ ސިހިފައި ހުރި ތަނެއް ޒައިލީންއަކަށް ނުފެނެއެވެ. ނިތްކުރި މައްޗަށް ރޫ އަރުވާލައިގެން ހުރި ޒައިނާ އާއި ދިމާލަށް ރަނގަޅަށް ބަލާލަން ރަވިކާން ކައިރިއަށް ޖެހިލިއެވެ. “އާދިޔަން..؟؟” އަނެއްކާވެސް ޒައިނާއަށް އިތުރު ހައިރާންކަމެއް ލިބިގެން ދިޔައެވެ. “މަންމާ.. މަންމަ ތިއީ…….” “ސަވާނާ.. އަހަރެން ސަވާނާއަށް ކިޔައިދޭން ޖެހޭ………” ސާޔަލް އާއި ޒައިލީންއަށް ބުނަން އުޅުނު ޖުމްލަ ފުރިހަމަ ކުރަން ފުރުސަތު ނުދީ ޒައިނާ ފޯނު ކަނޑާލައިފިއެވެ. ސާޔަލްއަށް ނިތްކުރި މަތީގައި އަތް އަޅާލެވުނެވެ. ޒައިނާ އެހެން ހެދުމުން މާޔޫސްވެފައި ހުރެ ސާޔަލް ކަރު އެލުވާލައިފިއެވެ.

“އެހެންވީމައި ޒައި ތި ބުނަނީ މަންމަ އާއި ކެޓްބްރޯގެ މަންމަ އަކީ ކުރިން ފްރެންޑްސް އޭތަ..؟؟؟” ޒައިދާންވެސް ހުރީ ޝޮކަކަށް ގޮސްފައެވެ. “ފްރެންޑްސްއެއް ނޫން.. ބެސްޓް ފްރެންޑްސް.. އެ އެކުވެރި ކަން ވޯލްޑް ރިކޯޑް ފޮތަށްވެސް އަރަން ޖެހޭނެ އަސްލު..” ޒައިލީންއަށް ވުރެ ކުރިން އަލްޔާ ބުނެލިއެވެ. ޒައިލީން އަނެއްކާވެސް ޒައިނާއަށް ގުޅޭތޯ ބެއްޔެވެ. ދެ ފަހަރަކު ގުޅުމުން ޒައިނާ ފޯނު ކަނޑާލިއެވެ. ތިންވަނަ ފަހަރު ގުޅުމުން ޒައިނާގެ ފޯނު ނިއްވާލައިފިކަން އެނގުނެވެ. “ޒައިދާންމެންގެ މަންމަ… ސަލްވިޔާ.. ބާރީ… ދެން ސާޔަލް… އެ އެންމެން ކުރީގައި މީޓްވެފައި ހުރީ…” ހެއިލަން ބުނެލިއެވެ. “އިންސިކުއްޖާގެ މަންމައަށް އެނގިއްޖެދޯ އަހަރެން މީ ކާކުކަން..؟” ހިމޭނުން ހުރެހުރެފައި ރަވިކާން އަހާލިއެވެ. “ގައިމުވެސް އެގަޑީ އާދިޔަން އޭ ބުނީ.. އެއީއެއްނު ރަވިކާންގެ ބައްޕައަކީ..؟” ޒައިދާން އެހެން ބުނެލިގޮތުން ޒައިދާން އެއުޅެނީ އަނެއްކާވެސް އާދިޔަންގެ ވާހަކަ ފަށަންކަން ޒައިލީންއަށް ވިސްނުނެވެ.

“ހިނގާބަލަ ދެތިން ޕޯސްޓަރ އެއް ހަދާލަން.. ސްޓްރީޓް ޝޯވް އަކަށް ވިޔަސް ދެން މީހުންނަށް އެނގޭނީ ވެސް ފެށުމުގެ ކުރިން ސްޓާޓް ވާރނިންގ އެއް ދިނީމައެއްނު..؟” އެންމެ އަވަހަށް ދުލަށް އައި ޖުމްލަ ޒައިލީންއަށް ބުނެވުނެވެ. ޒައިލީން އެހާ ދޫހަލުވިކޮށް އެހެން ބުނެލުމުން ރަވިކާން ވެސް ހެއިލަންވެސް ޒައިލީންގެ މޫނަށް ބަލާލީ ފާޑަކަށެވެ. “ގްރޭޓް…” ޒައިދާން އެހެން ބުނެލުމުން އަލްޔާ ޒައިލީންގެ ކޮނޑުގައި ކޮއްޓާލިއެވެ. “ޒައި.. އަމްމް ދެން ސާޔަލް އޯ..؟” އަލްޔާ އެހެން އަހާލީ ގަބުވެފައި އިން ސާޔަލް ދައްކާލަމުންނެވެ. “އާނ ދޯ ސާޔަލް..” ވިސްނަން ޖެހޭ އެތައްކަމެއް ސިކުނޑި ތޮއްޖައްސާލުމުން ޒައިލީންއަށް ހުރެވުނީ ހިނދުކޮޅަކަށް ސާޔަލްގެ މަތިން ހަނދާން ނެތިފައެވެ.

“އާދޭ ހުރިހާ ކުދިންވެސް ކާން ދާން..” ކުއްލިއަކަށް ސާޔަލްގެ އަޑު އިވުމުން ޒައިލީންއަށް ވެސް އެ ދިމާލަށް ބަލާލެވުނެވެ. “އަހަރެމެންނަކަށް ބޭރުންނެއް ނުކެވޭނެ.. ވީ ހޭވް ޓު ސޭވް މަނީ..” ހެއިލަން ދޮގު ނުހަދާ ބުނެލިއެވެ. “އަހަރެންގެ ފަރާތުންނޭ..” ސާޔަލް ހިތްހެޔޮ ހިނިތުންވުމަކާއި އެކީ ބުނެލިއެވެ. “އައިމް ސްޓާރވިންގ..” ޒައިލީން ދެކޮޅު ހަދަން އެއްޗެކޭ ބުނަން އުޅެނިކޮށް ޒައިދާން ބަނޑުގައި އަތް އުނގުޅާލާފައި ނުކުންނަން ދިޔަ ސާޔަލްގެ ފަހަތުން ހިނގައިގަތެވެ. “މި ޒައިދާން ދުވަހަކުވެސް ބަދަލު ވާނެހެންނެއް ހިޔެއް ނުވޭ..” އަލްޔާ ހީނގަނެފައި ނުކުނަން ދިޔައެވެ.

ސާޔަލް އެކުދިން ގޮވައިގެން ވަނީ އެ ގެއާއި މާ ދުރުނޫން ހިސާބެއްގައި ހުރި ބޭކަރީ އަކަށެވެ. އެ ތަނުގެ އެންމެން ކަހަލަ ގޮތަކަށް ސާޔަލްއަށް އިހުތިރާމް ކުރުމުގެ ގޮތުން ހީނލާ ނުވަތަ ގުދުވެލާފައި ސަލާމް ކޮށްލައެވެ. ސާޔަލް ހުރީ ކުރިންވެސް ހުރި މުސްކުޅި މީހާއަށް ވެގެންނެވެ. ސާޔަލް ގޮސްފައި މޭޒެއް ދޮށުގައި އިށީނެވެ. “ޑޯނަޓްސް ކޭކް އެންޑް ބޭކަރީ ޕިއްޒާ ޕްލީޒް.. ދެން ބޯން އޯރިއޯ ވެނީލާ މިލްކްޝޭކްސް… ސިކްސް..” ސާޔަލް އެހެން ބުނުމުން ގާތަށް އައި އަންހެން ކުއްޖާ އަދަބުވެރިކަމާއި އެކީގައި ބޯ ޖަހާލާފައި ދިޔައީ އޯޑަރ ގެންނާށެވެ.

“އެންމެން ކީއްވެގެންތަ އަހަރެމެންނާއި ދިމާލަށް އެ ބަލަނީ..؟” އެވަގުތު ބޭކަރީގައި ތިބިހާ ބަޔެއްގެ ނަޒަރު އެމީހުންނަށް ހުއްޓިފައިވާކަން އަލްޔާއަށް އެނގުމުން ފާޑަކަށް މޫނު ނިވާ ކޮށްލާފައި އަހާލިއެވެ. “ބޭކަރީގެ އޯނަރއާއިއެކީގައި އިށީނީމައި ދެން ވާނީވެސް އެހެންނު..؟” ހެއިލަން ހުރީ ހަމަޖެހިލާފައެވެ. “ވެއިޓް… ތިބުނީ އެހެރަ ގޮނޑީގައި އިށީނދެގެން ހުރި ސާޔަލް އަކީ މި ބޭކަރީގެ ވެރިމީހާއޭ ތަ..؟؟” އަލްޔާ ހައިރާންވެފައި ސާޔަލްގެ މޫނަށް ބަލާލިއިރު ސާޔަލް ހުރީ ހިނިއައިސްފައެވެ. “ތިއީ މި ޓައުން ކުއްޖެއް ދޯ..؟؟ ފުރަތަމަ ހީވިޔޭ ވަރަށް ދެކޭ ކުއްޖެއް ހެންވެސް.. ކޮންމެ ހުކުރު ދުވަހު ފެމެލީ އާއި އެކީގައި ހަވީރު މި ތަނަށް އަންނަން ދޯ..؟” ސާޔަލް އެ ސުވާލު ކުރުމުން ހެއިލަންގެ މޫނުމައްޗަށް ބަލާލާފައި ދެރަވި ކަން އަންގައިދިނެވެ. “ކިހިނެތްވީ..؟؟” ހެއިލަންއަށް ވީގޮތް ސާޔަލްއަކަށް ސިއްރެއް ނުވިއެވެ. “އައުލްކީން… ހެއިލްގެ އާއިލާ ގަތުލު ކޮށްލީނު..!” ޒައިދާން އެހެން ބުނެލިއިރު އަޑުގައިވަނީ ބަދަލު ހިފަން ބޭނުންވެފައި ހުރި މީހެއްގެ ރާގެވެ. “ތި އައުލްކީންއަކީ..؟؟؟” ކާއެއްޗެހި ގެނައުމުން ސާޔަލް އަހާލިއެވެ. “އެއީ ސާޔަލްއަށް އަންކަލް ކިޔާ ކުއްޖެއް…” އަލްޔާ އެހެން ބުނުމުން ސާޔަލް ކޮށިއެރިއެވެ. ސާޔަލްއަށް ވީގޮތުން ރަވިކާން ހޭންފެށިއެވެ. ޖެއްސުމަށެވެ. ޒައިލީންގެ ގާތަށްވެސް ހިނި އައެވެ. “ބާ… ބާރީ….. ގެ ދަރިއެ…. އެއްތަ..؟” ސާޔަލް ކެއްސަމުން އަހާލިއެވެ.

“އާނ.. ސާޔަލްއަށް އަދި ނޭނގޭތަ ނެއިލޮން ސަރ އަދި ހަލާކުގެ ވާހަކައެއް..؟” ޕިއްޒާ ފޮތި ކާލަމުން ޒައިދާން އަހާލިއެވެ. “ނޫން.. އަޑުއެހިން… އެކަމަކު އެ އަންހެން ކުއްޖާއަކީ ދައްތަގެ ދަރިއެއްކަމެއް ނޭނގޭ ކުރިން..” ސާޔަލް ބުނެލިއެވެ. އޭރު ކެއްސާ ކެއްސާ ސާޔަލްގެ ލޮލަށް ވަނީ ފެން އައިސްފައެވެ. “އައުލްކީންގަނޑާއި ހެދިއޭ އަހަރެމެން މިހެން މި އުޅެން ޖެހުނީ…” ޒައިދާން މަޖާ ރާގަކަށް އެހެން ބުނެލުމުން އަލްޔާއަށް ކަމަކުނުދިޔައެވެ. “އޭތް ޒައިދާން މިއީ ސީރިއަސް ކަމެކޭ… ތިހާ މަޖާވެގެން ވާހަކަ ދައްކަންޏާ ފަހުން އެންމެ ސީރިއަސް ވާންޖެހޭ އިރު މޮޔަ ކަންތައް ކުރެވޭނީ..” އަލްޔާ ބުނެލި ޖުމްލަ ޒައިދާންއަކަށް ނަގައިގަންނާކަށް ނޭނގުނެވެ. ނަމަވެސް އަލްޔާ ރުޅިއައިސްފާނެތީ ޒައިދާން ބޯ ޖަހާލާފައި ސީރިއަސްވެގެން ކާންފެށިއެވެ.

“ތޭންކްސް…” ބޭކަރީ އިން ނުކުންނަމުން ޒައިލީން ޝުކުރު އަދާކުރިއެވެ. “ޝުކުރު އަދާކުރާނެކަމެއް ނެތް.. ތީ އަހަރެންގެ ދައްތައެއްހެން އުޅުނު އަންހެން ކުއްޖާގެ ދަރިފުޅު.. ދެން އެހުރީ އަހަރެންގެ ދައްތަގެ ކޮއްކޮ…” ސާޔަލް އެހެން ބުނެލަމުން މަޑުން މަޑުން ޒައިލީންގެ މޫނުމައްޗަށް ވެއްޓިފައިވާ އިސްތަށިކޮޅުތައް އެއްފަރާތް ކޮށްލާފައި ޒައިލީންގެ މޫނަށް ބަލާލިއެވެ. ”ހަމަ ކުޑަކުޑަ ސަވާނާއެއް…” ސާޔަލް ހިތިގޮތަކަށް ހީނލާފައި ބުނެލިއެވެ. “މަންމައަށް ގުޅޭތޯ އަދިވެސް ބަލާނަން..” ސާޔަލްއަށް އެއްބާރުލުން ދިނުމުގެ ގޮތުން ޒައިލީން ބުނެލިއެވެ. “މިތަނަށް ހަމަ ކާން އަންނަންވީ… ބޭނުންއިރަކު އަޔަސް ކޮއްކޮމެންނަށް މިތަނުން ފްރީކޮށް ކާއެއްޗެހި ލިބޭނެ…” ސާޔަލް އެހެން ބުނެލުމުން ޒައިދާން އަތްތިލަބަޑި ޖަހައިގަނެފައި މައްޗަށް ފުންމައިގަތެވެ. ސާޔަލްގެ ހިތްހެޔޮކަމަށް އަދިވެސް އެއްފަހަރު ޝުކުރު އަދާކޮށްފައި ޒައިލީންމެން ގެއާއި ދިމާލަށް ހިނގައިގަތެވެ.

ގެއަށް ވަދެފައި އަނެއްކާވެސް ޒައިލީން ޒައިނާއަށް ގުޅޭތޯ ބަލާލިއެވެ. ފޯނު ނިއްވާލާފައި އޮތްކަމަށް އެންގުމުން ޒައިލީން ދިޔައީ ކޮޓަރިއަށެވެ. ފާޚާނާއަށް ދާންޖެހިގެންނެވެ. އޭރު އަލްޔާއާއި ހެއިލަންގެ އިތުރުން ރަވިކާން ހުރީ ފިރިހެން ކުދިންގެ ކޮޓަރީގައެވެ. ޒައިދާން ވީ ތަނެއް ނޭނގެއެވެ. ޒައިލީން ފާޚާނާކޮށް ނިންމާލައިގެން ނުކުމެ ދަބަސް ހޯދަން ފެށީ ޗާޖަރު ނެގުމަށެވެ. ފޯނުން ޗާޖު ދާތީއެވެ. ދަބަހުން ޗާޖަރު ނަގައިގެން ޒައިލީން ސްވިޗް ބޯޑާއި ގާތްވެލިއެވެ.

“އޭތް ދޮންބެގަނޑާ..!” އަލްޔާގެ އެނދު ކައިރީ ހުރި ކުޑަ މޭޒުދޮށުގައި ފިލައި އޮތް ޒައިދާން ފެނުމުން ޒައިލީން ދިޔައީ ސިއްސައިގެންނެވެ. “ޝްޝްޝް.. މި ދަނީއޭ..!” ޒައިލީންގެ އަނގަމަތީ އަތްއަޅަމުން ޒައިދާން އެހެން ބުނެލީ ދެލޯ ބޮޑު ކޮށްލާފައެވެ. އެބެލުމުން ހީވީ ދެން އެންމެ ލަފްޒެއްވެސް ދުލުން ބޭރުކުރިޔަސް ދޫ ބުރިކޮށްލަފާނަމޭ ބުނިހެންނެވެ. ޒައިލީން އަވަހަށް ބޯޖަހާލުމުން ޒައިދާން ވަގުގޮތަކަށް ލައިގެން ހުރި ޖެކެޓްގެ ތެރެއަށް އެއްޗެއް ކޮއްޕާލިއެވެ. ހަރަކާތް އަވަސްކަމުން ޒައިދާން ޖެކެޓްތެރެއަށް ލާ އެ ފޮރުވީ ކޯޗެއް ކަމެއް ޒައިލީންއަކަށް ނޭނގުނެވެ. އަވަސް ފިޔަވަޅު ތަކެއްގައި ޒައިދާން ކޮޓަރިން ނުކުތުމުން ޒައިލީން ދެކޮނޑު އަރުވާލާފައި ޖެހިގެން ހުރި ކޮޓަރިއަށް ވަނެވެ.

“ދޮންބެ ކޮބާ..؟” ވާހަކައިގައި ޖެހިފައި އިނީ އަލްޔާ، ހެއިލަން އަދި ރަވިކާންކަމަށް ވާތީ ޒައިލީންއަށް އަހާލެވުނެވެ. ޒައިލީންއަށްވުރެ ކުރިން ނުކުމެގެން ދިޔަ ޒައިދާން އެވަނީ ކޮންތާކަށް ހެއްޔެވެ.؟ “އޯހް ޒައިދާން ވީ ފާޚާނާގައި… ކިހިނެތްވީ..؟ ދޮންބެގެ މަތިން މިސްވީތަ..؟؟” ރަވިކާން އާއި ޖެހުނުފަހުން އެ މަޑުމައިތިރި އަލްޔާވެސް މިހާރު ލާނެތް ވެއްޖެޔޭ ޒައިލީންގެ ހިތަށް އެރިއެވެ. ”ނޫން ދޮންބެ ޒައި އަށްވުރެ ކުރިން ނުކުމެގެން ދިޔައީމައި ކޮބައިތޯ ބަލާލީ.. އެހެންނޫނަސް ކޮން ވާހަކައެއް ތިދައްކަނީ..؟” އެމީހުންގެ އޮލަ ވާހަކައިގައި ބައިވެރިވާ ހިތުން ޒައިލީންވެސް ގޮސް އަލްޔާ އާއި ރަވިކާންގެ މެދުގައި އިށީންނަމުން އަހާލިއެވެ.

“އަލް ހާދަ މޮޅޭ ކުރަހަން…” ޒައިދާން ހުރީ އަލްޔާގެ ނޯޓްފޮތް ހިފައިގެންނެވެ. އެ ވަގުތު ޒައިދާންއަށް އަލްޔާގެ ނޯޓްފޮތުން ކިޔުނީ އެންމެ ދެ ސަފްހާއަށް ވުމުން ޒައިދާން އިތުރަށް ކިޔާހިތްވީއެވެ. “ޝޫޓް އައިމް އިންވޭޑިންގ ހާރ ޕްރައިވެސީ…” ނޯޓްފޮތް ބަލަމުން ގެންދިޔަވަރަކަށް ޒައިދާންއަށް ކިޔެމުން ދިޔައެވެ. އެކަމަކުވެސް ކިޔާހިތްވެފައިވާލެއް ބޮޑުކަމުން ޒައިދާން ކުރިއަށް ގެންދިޔައެވެ.

ފުރަތަމަ ސަފްހާގައި ވަނީ ‘ޔޫ.އެސް ޑްރީމްސް’ އޭ ޖަހާލާފައެވެ. އޭގެފަހުން ބައެއް ދުވަސްދުވަހު ވީ ކަންކަންވެސް ލިޔެފައި ހުއްޓެވެ. އެންމެ ފަހުން މާމަ މަރުވި ވާހަކަ ޖަހާފައި އޮތެވެ. އަލްޔާގެ މާމަ މަރުވެފައި ވަނީ އަހަރެއް ދެ އަހަރެއް ކުރިން ކަމެއްކަން އެނގެނީ އެ ލިޔުންކޮޅުގެ ތިރީގައި ޖަހާފައިވާ ތާރީޚުންނެވެ. ދެން ފަސްވަރަކަށް ސަފްހާ ދޫކޮށްލާފައި އަނެއްކާ އަލްޔާ އާ ރޫމްމޭޓެއް ލިބުނު ވާހަކަ ބުނެފައި ވެއެވެ. އެ ލިޔުމުގެ ތިރީގައި ވާ ތާރީޚުން އެއީ ޒައިދާންމެން ފުރަތަމަ ހެތެނީސް އެލްފޯމޭނިޔާ ހައި ސްކޫލަށް ދިޔަ ދުވަސްކަން ޒައިދާންއަށް އެނގުނެވެ. “މީގަ މިއޮތީ ހުސް މަށަށް އެނގޭ ކަންކަން ލިޔެފައި…” އަލްޔާ ދެން ލިޔެފައި ވަނީ ޒައިދާން އާއި އަލްޔާމެންގެ ދިމާވުމުގެ ފަހުން ވީ ކަންކަމެވެ. ޒައިދާން އަށްވަރަކަށް ސަފްހާ ނުކިޔާ ދޫކޮށްލިއެވެ. ޒައިދާންއަށް އެއިން އެއްސަފްހާގައި އަލްޔާގެ ބޮޑު ސިއްރެއް ލިޔެވިފައި އޮތްކަން އެނގުނުނަމަ އެކަމެއް ނުކުރީހެވެ.

“ފާޚާނާ ތެރޭ މާ ގިނައިރު ވަންޏާ އަލްގަނޑު ހީކޮށްފާނެ މަށަށް ޑައިރިޔާ ޖެހުނީއޭވެސް..” މޫނަށް ގޮތެއް ހަދާލަމުން ޒައިދާން ފާޚާނާއިން ނުކުތީ ނޯޓްފޮތް ޖެކެޓް ތެރެއަށް ލާ ފޮރުވާފައެވެ. “އޭ އެބަ އަންނަން އިނގޭ ފެންފޮދެއް ބޯލައިގެން…” ފާޚާނާއިން ނުކުމެފައި ޒައިދާން ވަގުތުން ބޭރަށް ނުކުތެވެ. “މި ޒައިދާން ވަރަށް ފާޑަކަށް އުޅޭ ދުވަހެއް.. އަލް ވެސް އެބަ އަންނަން ފެންފޮދެއް ބޯލައިގެން..” އަލްޔާއަށް ނުކުމެވުނީ ހެއިލަން ޒައިލީން އަދި ރަވިކާން އެކަނި ކޮށްލާފައެވެ.

“މި ޝީޓްގެ ފަހަތުގައި ވާނީ އަލްގެ އެންމެ ބޮޑު ސީކްރެޓް…” އަލްޔާ ވަނީ ނޯޓް ފޮތުގެ އެންމެ ފަހަތުގައިވާ ގަނޑާއި ބަނޑޭރިގަނޑާއި ތަތް ކޮށްލާފައެވެ. ޒައިދާން ވަރަށް ފަރުވާތެރިކަމާއި އެކީ އެ ގަނޑު ނައްޓާލެވޭތޯ ބެލީ އަލްޔާގެ އެންމެ ބޮޑު ސިއްރު ދެނެގަންނަން ބޭނުންވެފައި ހުރިލެއް ބޮޑު ކަމުންނެވެ. އަލްޔާއަށް ޒައިދާންގެ އަތުގައި ނޯޓްފޮތް އޮތްތަން ފެނުނީ ސިޑިން ތިރިއަށް ފައިބަނިކޮށެވެ. “އޯހް ޒައިދާން ގަނޑާ…!” ޒައިލީންމެން ތިރިއަށް އައިސްފާނެތީ އަލްޔާއަށް ޖެހުނީ ވައިއަޑުން ހަޅޭއް ލަވައިގަންނާށެވެ.

“ސޯ ހެއިލް… ޝޯވް މާދަމާ ރެއަށް ޑިލޭ ކޮށްލަމާ..؟ އެގޮތް ކަންނޭނގޭ އެންމެ ރަނގަޅު ވާނީ… އޭރުން އެހެން ލަވަތައް ޕްރެކްޓިސްކުރަން މާ ގިނައިރުވެސް ލިބޭނެއްނު..؟؟” ޒައިލީން ހެއިލަންއާއި ދިމާލަށް ބަލާލަމުން ބުނެލިއެވެ. ހެއިލަންގެ ޚިޔާލު ހޯދަން ބޭނުންވެގެންނެވެ. “ހްމްމް ތިއީ ރަނގަޅު ގޮތެއް… މާދަމާ ހެނދުނު ލަވައެއް ނޫނީ ދެ ލަވައެއް ޕްރެކްޓިސް ކޮށްލެވިދާނެ.. ދެން މެންދުރުފަހުން ސްޓާޓް ކުރެވޭނެ ބެކްގްރައުންޑް ރީތި ކުރަން.. ދެން އެކަން ކޮށް ނިންމާލައިގެން ފަހު ރިހާރސަލް ބޭއްވޭނެ.. ދެން ރޭގަނޑު ގަޑީގައި ހަމަޖެހިލައިގެން ރެޑީވެފައި މިކަމަށް ޝޮޓެއް ދޭނީ…” ހެއިލަން މާދަމާގެ ތާވަލު ލިސްޓުކޮށްދިނެވެ.

“އަހަރެންގެ މައްސަލައެއް ނެތް.. އިންސިކުއްޖާޔޯ..؟؟” ރަވިކާން ހެއިލަން އާއި ދެބަސްނުވެ ޒައިލީންގެ ގާތު އަހާލިއެވެ. “ޒައިވެސް އޯކޭޔޭ… ދެން އަލް އާއި ދޮންބެ ގާތު އަހާލީމައި ނިމުނީ… މީނިންގ ދެޓް… ކޮބާ ދޮންބެ އާއި އަލް..؟” ޒައިދާން އާއި އަލްޔާ ނެތް ކަންވެސް ޒައިލީންއަށް ފާހަގަވީ ދެނެވެ.

“ފެންބޯން ދެމީހުންވެސް ދިޔައީ… އަނެއްކާ ރަވިކާންގެ ‘ފެންބޯބެ’ ޓައިޓަލް ދަމައިގަންނަން ކަންނޭނގޭ އަލްމެން އެއުޅެނީ… ޒައި އާދެބަލަ ތިރިއަށް ދާން..” ހެއިލަން ޒައިލީންގެ އަތުގައި ހިފަމުން ކޮޅަށް ތެދުވިއެވެ. ޒައިލީންވެސް ހިނިއައިސްފައި ހެއިލަން އާއިއެކީގައި ޒައިދާން އާއި އަލްޔާ ކުރާ ކަމެއް ބަލާލަން ދާން ވަގުވަގަށް ދިޔައެވެ. ރަވިކާން އިނީ ފާޑަކަށެވެ.

”އިންސިކުއްޖާ އުޅޭނެ މީހެއް އެނގޭނީ އިންސިކުއްޖާއަށެއްނު..؟؟ އަހަންނަށް މި ވަނީ ކިހިނެތްތަ..؟ ހިތަށްއަރާ ބައެއްފަހަރު އިންސިކުއްޖާ ހަމައެކަނި އަހަރެންގެ ގާތުގައި ބަހައްޓަންވެސް..” ރަވިކާންއަށް ހިތާހިތުން ކުދިކިޔާލެވުނީ ހެއިލަން އާއިއެކީގައި ޒައިލީން ދިޔުމުންނެވެ. “މިހާރު މި ކިކޭތަ ކިޔެނީ..؟ އިންސިކުއްޖާ އަކީ މަށަށް އެއްވެސް މީހެއްނޫން..” ރަވިކާން ދެވަނަ ސިކުންތުކޮޅުގައި ބުނެލިއެވެ. މޫޑު ސަކަރާތް ވުމުން އެހެން ބުނެވުނީވެސް ފުދޭވަރަކަށް ބާރަށެވެ. ރަވިކާން ތުންފަތުގައި ހަފާލަމުން ދެކޮޅު ބަލާލިއެވެ. އަޑުއަހާނެ މީހަކު ނެތްކަން ވެސް އެއީ ނަސީބެވެ.

ފަރުވާތެރިކަމާއި އެކީގައި ޒައިދާންއަށް ގަނޑު ނެއްޓެން ކައިރިވިއެވެ. އަލްޔާވެސް ސިއްރުސިއްރުން ބަލަން ހުރީ ޒައިދާން އެ އެއްކޮށް ނައްޓާލުމުން ނޯޓް ފޮތް ޖަހައިގަންނަން ތައްޔާރު ވެގެންނެވެ. “ޔޭ ނެއްޓިއްޖެ..” ނެއްޓެން ކުޑަ ތަންކޮޅަކަށް ވުމާއިއެކީގައި ޒައިދާންއަށް އުފަލުން ގޮސް ގަނޑަށް ދަމައި ގަނެވުނެވެ. “އޯ ގޯޑް..” ގަނޑު ޒައިދާންގެ އަތުގައި އޮތްއިރު ގަނޑުގެ ބައެއް ބައިތައް އޮތީ ފޮތުގެ ބަނޑޭރިގަނޑުގައި ތަތްލަވާފައެވެ. ޒައިދާން ގަނޑުން ދޫކޮށްލުމަށްފަހު އޭގައި ލިޔެފައިވާ އެއްޗަކަށް ސަމާލުކަން ދިނެވެ. އޭގައި ބޮޑު އަކުރުން އަޅާލާފައިވަނީ ނަމެކެވެ. “އިޑެން..؟” ފެންނަން ހުރި ނަން ޒައިދާންއަށް ކިޔާލެވުނެވެ. “ނޫނީ އިޑާން..؟ އެއީ ދެން ނަމެއްތަ..؟” ނިޔަފަތި ބޭނުންކޮށްގެން ޒައިދާން ކަރުދާސްކޮޅުތައް ނެއްޓޭތޯ ބަލަން ފެށިއެވެ. މަތީގައި ތަތްވެފައި ހުރި ކުޑަ ކަރުދާސް ކޮޅެއް ނައްޓާލެވުމުން ޒައިދާންއަށް އަލްޔާ ލިޔެފައި ހުރި ލިޔުންކޮޅެއް ފެނުނެވެ. “މި ލިޔުންކޮޅު ކިޔަންޏާ މާނައަކީ ތީ ބޮޑުބޮޑު އިޑިއަޓް އެކޭ..” އެކުރު ލިޔުންކޮޅު ކިޔާލާފައި ޒައިދާންއަށް ރުންކުރު އަޑަކުން ސީރިއަސްލީ އޭ ބުނެލެވުނެވެ. ފިލާހުރި އަލްޔާގެ ހިނިގަނޑު ފަޅައިގެން ދިޔައެވެ.

“ސީރިއަސްލީ..؟ އަދި މަ މިއުޅެނީ އަލްގަނޑުގެ އެންމެ ބޮޑު ސީކްރެޓް އެނގޭނެކަމަށް ހިތާ ވަރަށް ވެފަ..” ޒައިދާން ދެކޯ ފުއްޕާލާފައި އަލްޔާގެ އަތަށް އެ ނޯޓްފޮތް ދިނެވެ. އަލްޔާ ވަގުތުން ނޯޓްފޮތް ހާވާލާފައި ގަނޑެއް ވަކިކޮށްލިއެވެ. އަދި ފާޚާނާއަށް ގޮސް އެގަނޑު ބޮނޑިކޮށްލާފައި ފްލެޝްކޮށްލިއެވެ. އެއަށްވުރެ ރަނގަޅުގޮތެއް އަލްޔާއަށް ނުފެނުނީއެވެ.

“އޯކޭ… ހިނގާބަލަ ބޭރަށް ޖައްސާލަން އިހަކަށް.. ގޭތެރޭ ފޫހި..” އަލްޔާ ތިރިއަށް ފޭބިއިރު ޒައިދާން ފޫހިވެގެން ޒައިލީންގެ ގާތު ކުސްތަޅަނީއެވެ. މަންޒަރު ދެކޭ މީހަކަށް ހީވާނީ ޒައިދާންއަށްވުރެ ޒައިލީން ބޮޑު ހެންނެވެ. “އޯކޭ.. ހަވީރު ދާނީ… އޯކޭއެއްނު..؟؟” ޒައިދާން ބޮޑާ ހާކާވަރުން ޒައިލީން އެންމެ ފަހުން ބުނެލިއެވެ.

ވަގުތުތައް ފާއިތު ވެގެން ދިޔައީ ހަލުވިކަމާއި އެކީގައެވެ. ޒައިލީން ޒައިނާގެ ފޯނަށް ގުޅޭތޯ އެތައް ފަހަރަކު ބަލައިފިއެވެ. ނަމަވެސް އެގަޑީ ފޯނު ނިވާލިގޮތަށް ޒައިނާ އެހުރީ ފޯނު އަލުން ނުހުޅުވަން ނިންމައިގެން ހެން ޒައިލީންއަށް ހީވެއެވެ. އެނދުގައި އޮށޯވެގެން އޮވެ ޒައިލީން ދިޔައީ ލައުރާ އާއި ޗެޓް ކުރަމުންނެވެ. އަދި ހަވީރު ބޭރަށް ގޮސްފައި ލައުރާމެންނަށް ވީޑިޔޯ ކޯލް ކުރަން ޒައިލީންއަށް އެއްބަސްވާން ޖެހުނީ ރޫބީ ވެސް ކިޔަން ފެށުމުންނެވެ.

ފެންވަރައިގެން ޒައިލީން ލީ އައިސްބްލޫ ހައިވެއިސްޓަކާއި އައިސްބްލޫ ޑެނިމް ޝަރޓްއެކެވެ. އެ ޝަރޓް ރަތްކުލައިގެ ކުދިކުދި މާތަކެއް ހުއްޓެވެ. ޒައިލީން ފުނާ އަޅަން އިނދެފައި ފާޚާނާއިން ނުކުތް އަލްޔާ އާއި ދިމާލަށް ބަލާލިއެވެ. “އޭ ޒައިވެސް ތި ލީ ޑެނިމްތަ..؟” އަލްޔާ ނުކުތީ ކަކުލުން ތިރިއަށް އަރާވަރުގެ ނޫ ޖިންސަކާއި ވަރަށް މަޑު ނޫކުލައިގެ ޓީޝާޓެއް ލައިގެންނެވެ. އެއާއެކީ ލާނެ ޑެނިމް ޖެކެޓް އޮތީ ކޮނޑުގައި އަޅުވާލާފައެވެ. “ކޮޕީ ކެޓް އަލް ކެޓް…” ޒައިލީން ހީނގަތެވެ. “ތި ދެން ކުޑަ ކުއްޖެއްތަ ތިހެން ކިޔަން..” އަލްޔާވެސް ހީނގަނެފައި އަހާލިއެވެ.

ދެމީހުން ތައްޔާރުވެގެން ނުކުތްއިރު ރަވިކާން އާއި ހެއިލަން އާއި ޒައިދާންވެސް ހުރީ ވަރަށް އެއްގޮތް ކޮށް ހެދުން އަޅައިގެންނެވެ. ރަވިކާންވެސް ހުރީ މުޅިން އައިސްބްލޫ ވެގެންނެވެ. އައިސްބްލޫ ގަމީހަކާއި އައިސް ބްލޫ ޖިންސެއް ލައިގެން ރަވިކާން ހުރިއިރު ޖަހަނީ ފިރިހެން މޮޑެލްއެއް ވައްތަރެވެ. ޝޯވްއަކަށް އަރައިފިއްޔާ ރަވިކާންއަށް ވަނައެއް ލިބުނީ ޝައްކެއް އޮތް ކަމެއް ނޫނެވެ. ދެ ކަންފަތް ފޮރުވަންވެގެން ރަވިކާން ހުރީ ހުދުކުލައިގެ ތޮތްޕެއްވެސް އަޅައިގެންނެވެ. ތޮފި އަޅާފައިވަނީ ފަހަތަށް ކަމުން ނުލާހިކު ރީތި ވައްތަރު ޖަހައެވެ. ރަވިކާންގެ އިސްތަށިގަނޑު ވެސް ދިގުވެފައި ހުރިކަން ޒައިލީންއަށް ފާހަގަ ކުރެވުނީ ތޮފި އެޅުމުންނެވެ. ކަޅުކުލައިގެ އެ ބޯ، ވަރުގަދަ އިސްތަށިގަނޑު ފަންވެފައި ދިގުވުމުން ނުހަނު ރީއްޗެވެ. ހެއިލަން ހުރީ ޑެނިމް ގަމީހުގެ އަތްކުރި އޮޅާލައިގެންނެވެ. ޖިންސެއްލާފައި ބްލޮންޑް އިސްތަށިގަނޑު އޮމާންކޮށްލާފައި ހުރުމުން ހެއިލަން ފެންނަ ކޮންމެ މީހެއްގެ ހިތް އަތުން ދޫވެދާނެހެން ވެސް ހީވެއެވެ. ޒައިދާން ޑެނިމް ގަމީހަކާއި ރިޕްޑް ޖިންސެއް ލައިގެން ހުރީ ލޮލުގައި އަވި އައިނުވެސް އަޅާލައިގެންނެވެ.

ފަސް އެކުވެރިން އެކީގައި ދިޔައީ އެލްކެޓްރާ ޓައުންގައި ހުންނަ ކުޑަ ޕާކަކަށެވެ. ކުޑަ ޕާކަކަށްވުމުން އެތަނުގައި ގިނައީ ކުޑަކުދިންނެވެ. އަލްޔާ އާއި ޒައިދާން ދުވިއެވެ. ކުޅުނެވެ. އެތަނުގައި އުޅުނު ކުޑަ ކުދިންނަށްވެސް އެ ދެމީހުން ދޫ ނުކުރާނެކަން ޔަގީނެވެ. އެންމެފަހުން ޒައިދާން އާއި އަލްޔާ އެ ކުޑަ ކުދިންތައް އެއްކޮށްގެން ފެށީ ޑޮޖްބޯލް ކުޅޭށެވެ. ހެއިލަން އެތަނުގައި ހުރި ބެންޗެއްގައި އިށީނދެގެން ހުރީ ކުރީގެ ފޮޓޯތަކަށް ބަލާށެވެ. އަލްޔާ އާއި ޒައިދާން ކުޅޭތަން ބަލަން ހުރި މީހަކު “ދޭ ނޯ ހައު ޓު ސްޕެންޑް ދެއަރ ޔޫތް” އޭ ބުނެލިއަޑު ޒައިލީންއަށް އިވުނެވެ. “ޒައީ… ކާން..” އަލްޔާ ބުނެލިއެވެ. “އެންމެރަނގަޅު ކޯޗެއް ގަނެދޭންވީ..؟” ޒައިލީން ހިނިއައިސްފައި ހުރީ އަލްޔާ ހަމަ ރަނގަޅަށްވެސް ކުޑަކުއްޖަކަށް ބަދަލު ވީތާއޭ ހިތަށް އެރުމުންނެވެ.

“އައިސްކްރީމް ގެނަޔަސް އޯކޭ.. ކޮޓަން ކޭންޑީވެސް އޯކޭ… ބޮޑަށް ރަނގަޅީ އައިސްކްރީމް.. ހޫނުވެއްޖެ އަލްއަށް.. މިއަދު ވާރޭވެސް ވެހޭކަށް ނޫޅޭވިއްޔާ.. އަވަހަށް ވާރޭ ވެހޭނަމަ..” އަލްޔާ ކުދި ކިޔާލިއެވެ. “ރަވިކާން އާދެބަލަ ދާން..” ޒައިލީން ބުނެލިއެވެ. “އިންސިކުއްޖާ ތިހާ ލޯބިން ގޮވާލީމައި ދެން ގޮސް ފާނަން..” ރަވިކާން ލާނެތް ހިނިތުންވުމަކާއި އެކީގައި ހިނގައިގަތެވެ. “އެކަމް ޔޫޓިއުބް ބަލަން ދިއްލޭ އެތި ދޭ މަތިން..” ރަވިކާން ދިޔައީވެސް ޝަރުތެއް ހަމަޖައްސާފައެވެ.

ޕޭވްމެންޓް މަތިން ހިނގާފައި ދިޔައިރު ޒައިލީން ހުރީ ރޫބީ، ނައިކެން، ލައުރާ އަދި އައިދިން އާއި ވާހަކަ ދައްކާށެވެ. ޒައިލީންގެ ސަމާލުކަން ހުރީ ފޯނަށް ކަމުން އެއްފަހަރު ޒައިލީން ގޮސް ހޮޅިދަނޑި އެއްގައި ޖެހުނެވެ. ނިތްކުރީގައި ފިރުމަމުން ވާހަކަ ދައްކަމުން ޒައިލީން ކުރިއަށް ދިޔައިރު އެކިއެކި މީހުންގެ ގައިގައި ޖެހެއެވެ. ރަވިކާންއަށް އެމަންޒަރު ބަލަން ނުހުރެވިގެން ހިތާހިތުން ޒައިލީންގެ މޮޔަކަމަށް މަލާމާތް ކުރިއެވެ.

އެންމެ ފަހުން ޒައިލީން ގޮސް ޖެހުނީ ބިޔަ ފިރިހެނެއްގެ ގައިގައެވެ. “ހޭ މޭން.. ވޮޗް ވެއަރ ޔޫ އާރ ގޮއިންގ..!” ރުޅިއައިސްފައި ޒައިލީން އާއި ދިމާލަށް އެ ފިރިހެނާ ލޯ އަޅާލީވެސް ”މޭން” ގެ ނަމުން މުޚާތަބު ކުރަމުންނެވެ. “އަ.. އައިމް ސޮރީ..” ޒައިލީން އަވަހަށް ބުނެލިއެވެ. ”އައި ޑޯންޓް އެކްސެޕްޓް އެނީ ސޮރީ…” އެމީހާ އަދިވެސް ހުރީ ރުޅިގަދަވެފައެވެ. “ކަޓް އިޓް އައުޓް މޭން.. ލެޓް އިޓް ގޯ..” ކުރިން ރޭ ޒައިދާންގެ ފޯނުން ބެލި ފިލްމަކުން އިވުނު ތަންކޮޅެއް ރަވިކާން ކިޔާލީ އެމީހާއާއި ދިމާލަށް ލޯ އަޅާލަމުންނެވެ. ރަވިކާންގެ ދެލޮލުން ރުޅިވެރިކަން ފެނުމުން އެ މީހާ ”ދިސް އެއިންޓް އޯވަރ” އޭ ކިޔާފައި ހިނގައްޖެއެވެ.

އޭރު ކަނެކްޝަނަށް ބުރޫ އަރައިގެން ކޯލްވެސް ވަނީ ކެނޑިފައެވެ. ޒައިލީން ބޭކަރީއަށް ގޮސް އަލުން ގުޅާނަމޭ ބުނެ ދެން ފެށީ ސެލްފީ ނަގާށެވެ. “ތިހެން ދަމުން ގޮސް ޕްރެޒިޑެންޓްގެ ގައިގައި ލައިގަތަސް އިންސިކުއްޖާއަކަށް ނޭނގޭނެ…” ރަވިކާން ދިމާ ކޮށްލިއެވެ. “އިންޓަނެޓް ކުއްޖެއް ދޯ މިއީ މިހާރު…؟” ޒައިލީން ހީނލާފައި އަހާލިއެވެ. “ހޫން.. ދެން އިންސިކުއްޖާ ތީ ސްނެޕް އަދި އިންސްޓާ ކުއްޖެއްނު..” ރަވިކާން ރައްދު ދިނެވެ. މީހުންގެ ގައިގައި ޒައިލީން ޖެހޭވަރުން ރަވިކާން އެންމެ ފަހުން ޒައިލީންގެ ކޮނޑަށް އަތް ވައްޓާލިއެވެ. އަދި ޒައިލީން ގަޔާލާ ބޮނޑިކޮށްލައިގެން ކަހަލަގޮތަކަށް ކުރިއަށް ހިނގަން ފެށިއެވެ. ރަވިކާން ކުރިއަށް ހިނގަމުން ދިޔައިރު މީހެއް ޒައިލީންގެ ގައިގައި ޖެހެން އުޅެންޏާ ވަގުތުން އެއްފަރާތް ވެލައެވެ. ސެލްފީ ނެގުމައިގެން ބިޒީވެފައި ހުރި ޒައިލީންއަށް އެއިން ކަމެއް ރޭކާ ވެސް ނުލައެވެ. ރަވިކާން އާއި ކިހާ ގާތެއްގައި ހުރެވުނުކަން އިހުސާސް ކުރެވޭނަމަ މިހާރު ޒައިލީން ލަދުން ދާނެކަން ޔަގީނެވެ. ނަމަވެސް ކަމެއް ރޭކާލާނީވެސް ސެލްފީ ނެގުން ހުއްޓާލިއްޔާތާއެވެ.

“އާދެބަލަ ބޭކަރީއަށް ދާން.. އެތަނުން އައިސްކްރީމް ދޭނެ.. އެހެންނޫނީ އަލްމެންނަށް ކޭކްކޮޅެއް ހިފައިގެން ދެވޭނެއްނު..؟؟” ޒައިލީން ސާޔަލްގެ ބޭކަރީ ދައްކާލަމުން ބުނެލިއެވެ. “ބޭކަރީ ނުކިޔަބަލަ..” ރުންކުރުވެފައި ރަވިކާން ބުނެލިއެވެ. “އެއީ ކީއްވެގެން..؟؟” ޒައިލީންއަށް އެހުނެވެ. “ބޭކަރީ.. ބާރީ.. ނަން އެއްގޮތް ވީމައި…” ރަވިކާން ބުނެލި ޖުމްލައިން ޒައިލީންއަށް ވަގުތުން ހެވިއްޖެއެވެ. އެވަރު ކުޑަކަމަކާއި ރަވިކާން ރުންކުރު ވާން ޖެހޭހެއްޔެވެ.؟ ޒައިލީން ބޭކަރީ ތެރެއަށް ވަދެ އަލުން ލައުރާއަށް ގުޅިއެވެ. އޭރު ލައުރާ ކާރަކުން ފައިބަނީއެވެ. “ކޮންތާކު..؟” ޒައިލީން އަހާލިއެވެ. “އެލްކެޓްރާ ޓައުން ތެރޭގައި… ޒައިމެން ތިހުރި ޕާރކްގައި..” ލައުރާ ހެވިފައި ބުނެލިއެވެ.

“ހާދަ އަނދިރި ވެއްޖެޔޭ… އިޓްސް ގޮއިންގ ޓު ރެއިން..” ނައިކެން ބުނެލި އަޑު އިވުނެވެ. އޭރު ރަވިކާން އައިސްކްރީމް ގަންނަނީއެވެ. “ރަވިކާން އަވަސް ކޮށްބަލަ..” ބޭކަރީގެ ބިއްލޫރިގަނޑުން ބޭރު ބަލާފައި ބުނެލިއެވެ. ރަވިކާން ދެކޮނޑު އަރުވާލީ ރަވިކާންއަށް ދެވޭނީ އެ އަންހެން ކުއްޖާ ކޮތަޅަށް އައިސްކްރީމް ތަށިތައް އަޅާ ނިމުނީމައިކަން އެނގޭތީއެވެ. ”ބާއްވަނީ… އެބަ ދަން ތިކޮޅަށް..” ޒައިލީން ފޯނު ކަނޑާލިއިރު ރަވިކާން ދެ ކޮތަޅު ހިފައިގެން ހުއްޓެވެ. އެހެން އެންމެންނަށް ވާވަރަށް ފިނިބުއިމެއް ގަނެފައި ބާކީ އެ ކޮތަޅުގައި އޮތީ ހަތް ފެންފުޅިއެވެ. އަނެއް ކޮތަޅުގައި އައިސްކްރީމް ތަށިތައް އޮތެވެ. “އާދޭ ދާން.. މިހާރު ވެސް ކަނި ޖަހަން ފަށައިފި…” ޒައިލީން އައިސްކްރީމް ކޮތަޅުގައި ހިފަމުން ބޭރަށް ނުކުމެ ދުއްވައިގަތެވެ. އަރައިގެން ހުރީ ވެޖްއަކަށް ވުމުން ޒައިލީންއަށް ދުވަން އުނދަގޫވިއެވެ. ނަމަވެސް ވެޖް ބާލައިގެން ދުވާކަށްވެސް ޒައިލީންއަކަށް ނުކެރޭނެއެވެ.

“ޝޫޓް… އެ ވާރޭ ބޯ ކޮށްލީ..!!” ރަވިކާންގެ އަތުގައި ހިފާ ދަމަމުން ޒައިލީން ވަނީ ބޭކަރީގެ ކައިރީ ހުރި މޭޒުގައި ހުރި ކުޑަ ދަށަށެވެ. ކުއްލިއަކަށް ރޫބީ ގުޅަން ފެށިއެވެ. “ހަލޯ ވާރޭ ވެހެން ފެށީދޯ..؟؟” ރޫބީ ހުރީ އެ ޕާރކް ކައިރީ ހުރި ފިހާރައެއްގެ ތެރޭގައި ކަން ޒައިލީންއަށް އެނގުނީ ހަރުގަނޑުތައް ފެނުމުންނެވެ. “އާނ.. އޮއްސާލައިފި…” ޒައިލީން ބުނެލިއެވެ. “ކަޑައެއްނު.. ޑޭ އޮފް ފަން ރުއިންޑް.. ކޮންގްރެޖުލޭޝަންސް ބޭބީ އަލްޔީ… ޔުއަރ ވިޝް ކޭމް ޓްރޫ…” ފަހަތުގައި ހުރި ނައިކެން އަލްޔާގެ ކަންފަތުގައި ހިފާ އަނބުރާލަމުން ބުނެލި އަޑު އިވުނެވެވެ. “އާނ މިއަދު އަލް އުޅުނު ވާރޭ ނުވެހިގެން.. އެންމެފަހުން އެކަންވެސް ވީއެއްނު..؟” ޒައިލީން ސަމާސާ ހިނިތުންވުމަކާއި އެކީގައި ބުނެލިއެވެ.

ކުއްލިއަކަށް ރޫބީގެ ފަހަތުގައި ހުރި ހަރުގަނޑު އަރިއަޅާލިތަން ޒައިލީންއަށް ފެނުނެވެ. ހީނލައިގެން ހުރި ޒައިލީންއަށް ވީގޮތުން ރޫބީވެސް ހާސްވިއެވެ. “ޒައި ވަޓްސް ރޯންގް..؟” ރޫބީ އެއްސެވެ.

އެ ހަރުގަނޑު އަރިއަޅާލިއިރު އޭގެ އަމާޒުފަތްގަނޑަކަށް ވެފައިވަނީ ޒުވާބު ކުރަން ހުރި ނައިކެންއާއި އަލްޔާއެވެ. ”އަލް.. ނައިކް.. ވޮޗް އައުޓް..!!!” ފޯނު އަނގަޔާއި ކައިރި ކޮށްލާފައި ޒައިލީންއަށް ހަޅޭއްލަވައިގަނެވުނެވެ.

“އިންސި ކުއްޖާ..!!” ކުއްލިއަކަށް ރަވިކާން އައިގޮތަށް އައިސް ޒައިލީންގެ ގައިގައި އޮޅުލައިގަތެވެ. ދެމީހުން އެކީގައި ވެއްޓެން ދިޔައިރު ޒައިލީންއަށް ފޯނުން ހަރުގަނޑު ވެއްޓުނު އަޑާއި ހަރުގަނޑުގައި ހުރި ހުރިހާ އެއްޗެއް ވެރުނު އަޑު އިވުނެވެ. ރަވިކާންގެ ވޭނީ ހަޅޭކުގެ އަޑާއި ރޫބީ ބާރު ބާރަށް ހަޅޭއްލަވައިގަތް އަޑު ޒައިލީންއަށް އިވުނީ އެއްފަހަރާއެވެ. ރަވިކާންގެ ގައިދަށުވެ ޒައިލީން ފިތުނެވެ. ޕޭވްމެންޓް މަތީގައި ބޯ ޖެހުނުލެއް ބާރުކަމުން ޒައިލީންގެ ބޮލަށް އެނބުރުންއެރިއެވެ. ޒައިލީން ހިތްވަރު ކޮށްލާފައި ފޯނަށް ބަލާލިއެވެ. އޭރު ފެނުނީ ރޫބީގެ ފޯނަށް އަރާފައިވާ އައުލްކީންގެ މޫނެވެ. “ރަވިކާން..!” ޒައިލީންއަށް ހަޅޭއްލަވައިގަނެވުނެވެ. ރަވިކާން ފެނުމުން މީހުންގަނޑުވެސް އެދިމާލަށް އެއްވިއެވެ. ބައެއް މީހުން އެމްބިއުލާންސަށް ގުޅަން އުޅުނެވެ. “ނޯ.. ޑޯންޓް…” ރަވިކާން ހޮސްޕިޓަލަށް ގެންގޮސްފިއްޔާ ރަވިކާންގެ އަސްލު ޑޮކްޓަރުންނަށް އެނގިދާނެތީ ޒައިލީންއަށް ބުނެވުނީ އެހެންނެވެ. “ޝީ އިޒް އިންސޭން.. ކޯލް ދަ އެމްބިއުލާންސް..” އެތަނުން މީހަކު އެހެން ބުނެލުމުން ޖެހިގެން ހުރި މީހާ އެމްބިއުލާންސަށް ގުޅަން އަވަސްވެގަތެވެ.

”ކަލޭމެން ވެގެން އަހަރެންގެ……” އައުލްކީން އެއްޗެކޭ ބުނެލި އަޑު އިވުނެވެ. ނަމަވެސް ބޮލަށް އެނބުރުން އަރާފައި ހުރި ވަރުން ޒައިލީންއަށް އައުލްކީން ދެން ކީ އެކައްޗެއްވެސް އަޑެއް ނީވުނެވެ. ނަމަވެސް އައުލްކީން އެ ބުނެލީ ކިހާ މުހިންމު ޖުމްލައެއް ކަން ޒައިލީންއަށް އެނގުނު ނަމައެވެ.

= ނުނިމޭ =

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.