ވަކިވެދިޔަޔަސް…..

ހަވީރުގެ ވަގުތެވެ. އޮއްސެމުން ދިޔަ އިރަށް ބަލަހައްޓައިގެން އިން 21 އަހަރުގެ އަންހެން ކުއްޖާގެ މޫނުމަތިން ފެންނަނީ ހިތާމައިގެ އަސަރެވެ. ނޫކުލައިގެ ޓީޝާޓަކާއި ކަޅުކުލައިގެ ޖިންސްއެއްގައި އިންއިރު ކަޅުކުލަ ގަދަ އެއިސްތަށިގަނޑު ވަޔާ ވިހުރެމުން ދިޔައެވެ. އެދޮން ކޯތާފަތުގައި ފިރުކެމުންދާ ކުދި ކަރުނަ ތިކިތައް އަތުގެ ނުފުށުން ފޮހެމުން ދިޔައިރު ފެންނަ ކޮންމެ މީހަކު އެކުއްޖާއާއި ދިމާލަށް ބަލައިލަނީ ހަމްދަރްދީގެ ނަޒަރުންނެވެ. ނަމަވެސް އެކުއްޖާ އިނީ މާޒީގެ ހިޔާލުތަކަށް ގެއްލިފައެވެ.
އުމުރުން އެންމެ 11 އަހަރުގައި ހިނގި ކާރު އެކްސިޑެންޓެއްގައި އޭނާގެ މައިންބަފައިން ނިޔާވުމުން އައިލީން ވަނީ އެކަނިވެރިވެފައެވެ. ބޮޑުދައިތައާއި އެކީ އުޅުނު ނަމަވެސް އައިލީންގެ ހިތަށް އުފާވެރިކަމެއް ނައެވެ. މައިންބަފައިން ވަކިވުމުގެ ހިތާމަ ވަނީ އައިލީންގެ ހުރިހާ އުފާވެރިކަމެއް ފޭރިގެންފައެވެ.
ދުވަސްތައް މާޒީއަށް ވަމުން ގޮސް އައިލީންއަށް 18 އަހަރު ފުރިއްޖެއެވެ. މަދުމަދުން އައިލީން ހީލާތަން ފެންނަން ފަށައިފިއެވެ. އޭރު އައިލީންއަކީ ޒުވާން ރީތި ކުއްޖެކެވެ. މުޅި ރަށުގައި ހުރި އެންމެ ރީތި ކުއްޖާއޭ ބުންޏަސް ދޮގަކަށް ނުވާނެއެވެ. ކިތަންމެ ފިރިހެން ކުދިންނެއްގެ ހިތުގެ ރާނީކަމުގައި އައިލީން ވެނިމިއްޖެއެވެ. ކިތަންމެ ފިރިހެން ކުއްޖަކު އައިލީންއަށް ލޯބި ހުށަހަޅައިފިއެވެ. ނަމަވެސް އައިލީންއަށް އަދިވެސް ރަނގަޅު ކުއްޖެއް ނުފެނެއެވެ. ނޫނީ ހޯދަން ވެސް ބޭނުން ނުވަނީއެވެ.
މިއަދަކީ ވެސް އުޑުމަތި ރީތި ދުވަހެކެވެ. ހެނދުނު 7 ޖެހިއިރު އައިލީން އިނީ އަތިރިމަތީގެ ހިތްގައިމު ދޮންވެލިގަނޑުގެ މަތީގައެވެ. އާދައިގެ މަތިން އޭނާ ވިސްނަމުން ދިޔައީ އޭނާގެ ދިރިއުޅުމާއި ދޭތެރޭގައެވެ. ބައެއް ފަހަރު ލޮލުން ކަރުނަ ނީރާލައެވެ.
ކުއްލިއަކަށް އައިލީން ސިއްސައިގެން ދިޔައީ މީހަކު އޭނާގެ ކޮނޑުގައި އަތްތިލަ ބޭއްވުމުންނެވެ. ލޮލުން ފައިބަން ތައްޔާރުވެފައިވާ ކަރުނަތައް ފޮހެލުމަށްފަހު ފަހަތަށް އެނބުރި ބަލައިލިއިރު ފަހަތުގައި ހުރީ އައިލީން ދުވަހަކުވެސް ނުދެކޭހާ ރީތި ކުއްޖެކެވެ. ކަޅުކުލައިގެ އަތްދިގު ހޫޑީއަކާއި ކަޅު ޖިންސެއްގައި ހުރިއިރު އިސްތަށިގަނޑު ވަނީ ރީތި ގޮތަކަށް ސްޓައިލް ކޮއްލާފައެވެ. އޭނާގެ ތުންފަތް މަތީގައި ވި ހިނިތުންވުން އައިލީންއަށް ވަރަށް ކަމުދިޔައެވެ.
“ހާއި…..އައިމް ޔަޒްދާން…..” އެ ފިރިހެން ކުއްޖާ އިށީނދެފައި އަމިއްލައަށް ތަޢާރަފް ވެލިއެވެ.
“އައިމް އައިލީން…..ޔަޒްދާން ތީ މިރަށު ކުއްޖެއް ނޫން ދޯ….” އައިލީން ވެސް ތަޢާރަފް ވެލިއެވެ.
“ނޫން…..މީ ހަމަ މިރަށު ކުއްޖެއް…..މާލޭގަ ކިޔަވަން އުޅެފަ މިއަދު މިއައީ ރަށަށް…..” ޔަޒްދާން އޮޅުންފިލުވައިދިނެވެ. އައިލީން ހައިރާންވިއެވެ. ޔަޒްދާންއަކީ އޭނާއާއި އެއްރަށު ކުއްޖެކެވެ. ނަމަވެސް އޭނާއަށް ޔަޒްދާން އެފެނުނީ އަދިކިރިޔާއެވެ.
އައިލީންއާއި ޔަޒްދާން އެކަކު އަނެކަކާއި ވާހަކަ ދައްކަން ތިބެފައި އެއްގަމަށް އަރަން ހިނގައިގަތީ 9 ޖެހުމުންނެވެ. މިއަދު ވަގުތު ހިނގިލެއް އަވަސް ކަމުން އައިލީން ހުރީ ހައިރާންވެފައެވެ. ނޫނީ އެއީ އައިލީންއަށް ހީވި ގޮތެކެވެ. މައިންބަފައިން ވަކިވުމަށްފަހު އޭނާ ފިރިހެން ކުއްޖަކާއި ވާހަކަ ދެއްކި މިއީ ފުރަތަމަ ފަހަރެވެ.
އޭގެ ފަހުން ތިންމަސް ވަންދެން ކޮންމެ ދުވަހަކުވެސް ދެމީހުން އަތިރިމަތިން ބައްދަލުކުރަނީ ހަމަ އެގަޑީގައެވެ. މަޑުމަޑުން އައިލީންގެ ހިތް ޔަޒްދާންގެ މައްޗަށް ލެނބެން ފަށައިފިއެވެ. ޔަޒްދާންއަށް ވެސް އައިލީން ދެކެ ލޯބިވެވިއްޖެއެވެ. އޭނާ ބޭނުންވީ އަވަހަށް އެކަން އައިލީންއަށް އަންގާށެވެ. ނަމަވެސް އައިލީންގެ ހިތުގައި އޮތް އެއްޗެއް ނޭނގޭތީ އޭނާ ހުރީ ވަރަށް ކަންބޮޑުވެފައެވެ.
އިތުރު އެއްމަސް ފާއިތުވެގެން ދިޔައީ ހީވެސް ނުކުރާހާ އަވަހަށެވެ. ޔަޒްދާންގެ ކެތްތެރިކަން ކޮޅުންލީ ހިސާބުން އޭނާ އައިލީންއަށް ލޯބި ހުށަހަޅައިފިއެވެ. އައިލީން އެ ލޯބި އުފަލާއެކީ ބަލައިގަތީ އޭނާވެސް ޔަޒްދާން ދެކެ އިންތިހާއަށް ލޯބިވާތީއެވެ. ޔަޒްދާންއާއި ނުލާ އުޅެން ވެއްޖެއްޔާ އޭނާ މޮޔަވެދާނެއެވެ.
އޭގެ ފަހުން ދެމީހުން ވެސް އުޅެމުން ދިޔައީ ދެފަރާތު އާއިލާގެ ރުހުމާއި އެކީގައެވެ. އައިލީންގެ ބޮޑުދައިތަ ވެސް އެކަމާއި އުފާވެފައި ހުރީ އައިލީންގެ މޫނުމަތިން ހިނިތުންވުން ފެންނާތީއެވެ. ޔަޒްދާންގެ އާއިލާއަކީ ފުދޭވަރަކަށް ބޮޑު އާއިލާއެކެވެ. މައިންބަފައިންގެ އިތުރުން ފިރިހެން 2 ބޭބެއާއި އަންހެން ކޮއްކޮއެކެވެ. އަދި މުސްކުޅިވެ ގައިބާރު ދެރަވެފައިވާ މާމައަކާއި ކާފައެކެވެ.
ޔަޒްދާންއަށާއި އައިލީންއަށް އެކަކު އަނެކަކު ދެކެ ވަކިނުވެވޭ ވަރަށް ލޯބި ވެވިއްޖެއެވެ. މިކަމާ ގިނަ ފިރިހެން ކުދިންގެ ހިތުގައި ހަސަދަވެރިކަން އުފެދުނުއިރު އަނެއްބައި ކުދިން އައިލީންއަށް ޓަކައި އުފާވެފައި ދިރިއުޅުމުގައި ކުރިއަށް ދާން ފެށިއެވެ.
އައިލީންއާއި ޔަޒްދާންގެ ކައިވެނީގެ ކަންތައް ދެއާއިލާއިން ނިންމާލައިފިއެވެ. ދެދުވަސް ތެރޭގައި ކައިވެނި ކުރެވޭނެތީ އައިލީންގެ އިތުރުން ޔަޒްދާން ވެސް ހުރީ ވަރަށް އުފާވެފައެވެ. ނަމަވެސް ތަޤުދީރުގައި ލިޔެވިފައިވާ އެއްޗެއް ބަދަލުކުރެވޭނީ ވަކި ކާކަށް ހެއްޔެވެ؟
ކައިވެނީގެ ވަގުތު އައިސް ޖެހިއްޖެއެވެ. އައިލީން އޭނާގެ ކޮޓަރީގައި ރީތިވެގެން އިނީ ޔަޒްދާންގެ އާއިލާ އަންނަންދެނެވެ. އޭރު ކައިރީގައި އޭނާގެ އެންމެ ގާތް އެކުވެރިޔާ ފިރުޝާ އިނެވެ. އައިލީން ސިއްސައިގެން ދިޔައީ ފޯނު ރިންގުވާން ފެށުމުންނެވެ. ވަގުތުން ފޯނުނަގާ ކަންފަތުގައި ޖަހާލިއެވެ. އަދި ވާހަކަ ދައްކަން ފެށިއެވެ. އެކޮޅުން ވާހަކަ ދެއްކީ ޔަޒްދާންގެ މަންމައެވެ. ކުއްލިއަކަށް އައިލީންގެ އަތުން ފޯނު ދޫވެއްޖެއެވެ. އޭނާއަށް ހީވީ މުޅި ދުނިޔޭގެ އެނބުރުން ލަސްވިހެންނެވެ. އެއާއެކު ލާލައި އިން ނޭވާ ކަރު ތެރޭގައި ތާށިވެއްޖެއެވެ.
ލޮލުން ހޯސްލާފައި ކަރުނަ ފައިބަން ފެށީ އެއްވެސް އިޚުތިޔާރެއް ނެތިއެވެ. ކައިރީގައި އިން ފިރުޝާ ވަގުތުން އައިލީންގެ އަތުގައި ހިފާލިއެވެ. އަދި އަވަސް އަވަހަށް ވީ ކީއްތޯ އަހާލިއެވެ.
“ފިރޫ…..ޔަޒްދާން އެކްސިޑެންޓް ވީ…..” އައިލީންއަށް ލަސްލަހުން ބުނެވުނެވެ. ފިރުޝާ ވެސް އެކުވެރިޔާގެ ހާލާއިމެދު ހަމްދަރްދީ ވިއެވެ. އޭނާ ވެސް ދެރަވިއެވެ. އައިލީން ބޭނުންވީ ވަގުތުން ހޮސްޕިޓަލަށް ދާށެވެ.
ފިރުޝާ އައިލީންއާއެކީ ހޮސްޕިޓަލަށް ދިޔައިރު ލިބުނު ހަބަރަކުން ދެމީހުންނަށް އެއްފަހަރާ ނޫނެކޭ ބުނެވުނެވެ. އާނއެކެވެ. ޔަޒްދާންގެ ސިކުނޑިއަށް ލޭ އެޅުމުގެ ސަބަބުން އޭނާ ނިޔާވީއެވެ.
އައިލީންއަށް އަޑުން އަޑު ނަގާ ރޮއެގަނެވުނެވެ. ޔަޒްދާންގެ އާއިލާ މީހުންވެސް ތިބީ އައިލީންއާއި މެދު ހަމްދަރްދީ ވެފައެވެ. ކައިވެނީގެ ރޭ އެފަދަ ކަމެއް ވުމަކީ ޔަގީނުންވެސް ދެރަވާނެ ކަމެކެވެ.
އައިލީންއަށް މާޒީގެ ޞަފުހާތައް ލައްޕާލަން މަޖުބޫރުވީ އޭނާގެ ފިރިމީހާއާއި ދަރިފުޅުގެ އަޑު އިވުމުންނެވެ. ޔަޒްދާންގެ ހަނދާންތައް އޭނާއާއި އެކު ވަޅުލުމަށްފަހު އެހެން މީހަކާއި އޭނާ ކައިވެނި ކުރީ ބޮޑުދައިތަގެ އެދުމާއި އެކީގައި ވެސް މެއެވެ.
މިއަދު އޭނާއަކީ މީހެއްގެ އަންބެކެވެ. 1 އަހަރުގެ ތުއްތު ކުއްޖެއްގެ މަންމައެކެވެ. ވީއިރު މިއަދު އޭނާއަށް އަމިއްލަ ތަޤުދީރާ މެދު  ޝަކުވާ ކުރެވޭނެ ފުރުސަތެއް ނެތެވެ. އައިލީން އޭނާގެ ފިރިމީހާއާއި ދަރިފުޅާއި އެކީ ގެއަށް ދާން ހިނގައިގަތެވެ. ދިޔަ ދިޔުމުގެ އޭނާގެ ހިތަށް އެރިއެވެ. “ވަކިވެ ދިޔަޔަސް ތިބާގެ ހަނދާންތައް ވަނީ މިހިތުގައި ބިންވަޅު ނެގިފައެވެ.”

(ނިމުނީ)