އިންތިޒާރު 16

މަންމަމެންނަށް ސިއްރުން ކައިވެނިކުރުމަށްފަހު ސަލްމާގާތުގައި އެވާހަކަ ބުނިދުވަހު ސަލްމާ ރޮއިރޮއިފައި އޭނަދެކެ ލޯބިވާވާހަކަ ބުންޏެވެ. ޔާސިރުއަށް ސަލްމާ އޭނަދެކެ އިންތިހާއަށް ލޯބިވާކަން އެނގުނީ އެދުވަހުއެވެ. ޔާސިރު ނީލާއާއި ކައިވެނި ކުރިކަމުގައިވިނަމަވެސް ސަލްމާ ދޫކޮށްލަން ގަސްތު ނުކުރާވާހަކަ ބުންޏެވެ. އޭޏައަށް ނީލާ ދޫކޮށްލެވޭކަށްވެސް ނެތެވެ. އަދިއަމުދުން މިހާރު އޭނަގެ އަނބިމީހާއަށް ވުމުންނެވެ. ނީލާ އުޅެބޮޑުވީ ހިލޭބައެއްގެ ކައިރީގައި އުޅެމުންނެވެ. ސަލްމާވެސް އެންމެފަހުން އެހަގީގަތް ޔާސިރުގެ މައިންބަފައިންނަށް ސިއްރުކުރުމަށް އެއްބަސްވިއެވެ. ނީލާ އުޅެމުންދިޔައީ ޔާސިރު ވަކިން ހިފާފައިހުރި އެޕާރޓްމެންޓެއްގައެވެ. ޔާސިރުއަށް ސަލްމާ ގަބޫލުކުރަން ފަސޭހަ ކަމަކަށް ނުވިކަމުގައިވި ނަމަވެސް އޭނަ ސަލްމާ ގަބޫލުކުރިއެވެ. އަންބެއްގެ ހުރިހާ ހައްގެއްދިނެވެ. އޭނަގެ ވާޖިބު އަދާކުރިއެވެ. ސަލްމާއަށްވެސް ޔާސިރުގެހިތުން އިތުރަށް ޖާގައެއްނުލިބޭނެކަން އެނގުމުން އިތުރު ޝަކުވާއެއްނެތި ހަމަޖެހިގެން އުޅެވޭތޯ ބެލިއެވެ.

ކައިވެންޏަށް އަހަރެއްވީތަނާ ނީލާ ބަލިވެއިނެވެ. ޔާސިރު ސަލަމާއަށް އެއްވެސް ކަމެއް ސިއްރުކުރަންބޭނުން ނުވާތީ އަމިްއްލައަށް އެވާހަކަ އޭޏގާތުގައި ބުންޏެވެ. ނީލާއަށް އިތުރު އަޅާލުން ބޭނުންވާނެތީވެގެން ޔާސިރުއަށް ނީލާއަށް ދެވޭ ސަމާލުކަން އިތުރުވީ އޭނަ ބަލިވެއިންފެށި ހިސާބުންނެވެ. ނީލާގެ ބަނޑަށް ތިންމަސް ފުރެން ކައިރިވެފައިވަނިކޮށް ޔާސިރުއަށް ސަލްމާވެސް ބަލިވެއިންކަން އެނގުނެވެ އޭރުއޭނަގެ ބަނޑަށް ދެމަސް ފުރިއްޖެއެވެ. އެހާދުވަސްވަންދެން އޭނަކައިރީ އެވާހަކަ ނުބުނެ ސިއްރުކުރީ ކީއްވެގެންތޯ ޔާސިރު ސުވާލުކުރީ ހިތްހަމަނުޖެހިފައި ހުރެގެނެވެ. ނީލާވެސް ބަލިވެ އިންދާ އޭނައަށްވެސް އެހީބޭނުންވާނެ ކަމަށާއި، ޔާސިރު ނޫން އެހެންމީހެއް އޭނައަށް އަޅާލަން ނެތްކަމަށް ސަލްމާ ބުންޏެވެ. އޭނައަށް އަޅާލަން އެގޭގައި އެހެންމީހުން އެބަތިބިކަމަށާއި ޔާސިރު ހިތްހަމަނުޖެހިދާނެތީ އެވާހަކަ ބުނަން ނުކެރުނީކަމަށް ސަލްމާ ބުނުމުން ޔާސިރު ދެރަވިއެވެ. ދުވަހަކުވެސް އެހެން ހީނުކުރުމަށް އޭނަ ސަލްމާގާތުން އެދުނީ ނުހަނު ދެރަވެފައި ހުރެއެވެ. އަދި ނީލާއަށް ވަގުތުދޭފަދައިން އޭނަ ސަލްމާއަށްވެސް ވަގުތުދޭނެކަމަށް ބުންޏެވެ.

ސަލްމާ ބަލިވެއިނުމުންވެސް ޔާސިރުގޭގައި މާގިނަ ވަގުތުހޭދަނުކުރާތީ ބަލްގިސް އެކަމާ ވިސްނަމުން ދިޔައެވެ. އޮފީހުގައި ކަންހިނގާ ނުހިނގާގޮތް އަބްދުﷲގެ ފަރާތުން އޭނައަށް އެނގެއެވެ. އިތުރުވަގުތުގައި އޭޏަދަނީ ކޮންތަނަކާދޭތެރޭ ވިސްނަން މަޖުބޫރުވީ ދެނެވެ. އެހެން ހުއްޓާ އޭނަގެ އެކުވެރިއެއްގެ ފަރާތުން ލިބުނު ހަބަރަކުން އޭނަ ރުޅިއައީ އިންތިހާއަށެވެ. އޭނަގެ ފަހަތުގައި އޭނަގެ ދަރިފުޅު ކުޅޭ ކުޅިވަރުއެނގިފައި ދެރަވިއެވެ. އައިޖީއެމް އެޗް އިން ޔާސިރު ނީލާގޮވައިގެން ޑޮކްޓަރަށް ދައްކަން ގޮސް އުޅެނިކޮށް ބަލަގިސްގެ ރައްޓެއްސަކަށް ފެނިގެން އެވާހަކަ ދެއްކީއެވެ. މިހުރިހާދުވަސްވީއިރު ސަލްމާއަށްވެސް އެހަގީގަތް އެނގޭނެކަމަށް އޭޏަގެ ހިތްބުނަމުން ދިޔައެވެ. އެހުރިހާކަމަކާއި ދޭތެރޭވިސްނާ އޭނަގެ ބަލި އިތުރަށް ބޮޑުވިއެވެ.

އެންމެ ފުރަތަމަ އެކަމާއިބެހޭ ގޮތުން ބަލްގިސް ސުވާލުކުރީ ސަލްމާއާއިއެވެ. ނަމަވެސް ސަލްމާގެ ފަރާތުން އެއްވެސް ޖަވާބެއްނުލިބުނެވެ. އެކަމުންވެސް އޭނއަށް ހަގީގަތް އެނގޭކަން ބަލްގިސްއަށްއެނގުނެވެ. ނީލާވަރިކުރުމަށް ބަލްގިސް ޔާސިރުގާތުގައި ބުނޏެވެ. އެގެއަށް ޔާސިރުގެ އަންބެއްގެ ގޮތުގައި އެހެންއަންހެނަކަށް ނާދެވޭނެ ކަމުގައި ބުންޏެވެ. އޭނަ ނުރުހޭކަމެއް އަދިއެވެސް އޭންއަށް ސިއްރުން ކުރުމުން އެކަމަށް ދުވަހަކުވެސް މައާފް ނުކުރާނެކަމްށް ތަކުރާރުކޮށް ބުނަމުންދިޔައެވެ. ބައްޕައަށް އެންގުމުގެ ކުރިން އެކުޅިވަރު ހުއްޓުމަށް ބުންޏެވެ. ނަމަވެސް މިފަހަރު ޔާސިރުވެސް ހުރީ އެހާފަސޭހައިން ބަލިގަބޫލުކުރާގޮތަކަށް ނޫނެވެ. އެގެއަށް ދުވަހަކުވެސް ނީލާ ނުގެންނަކަމުގައި ޔާސިރުބުނެލިއެވެ. އަދި ކުރިއަށް އޮތް ދުވަސްތަކުގައިވެސް ނީލާއެއްވެސް އަދި އޭނައަށާއި ނީލާއަށް ލިބޭދަރިއެއްވެސް އެގެއަށް ނުވައްދާނެކަމުގައި ބުންޏެވެ. ވަރިކުރާށޭ ބުނިއިރު ނީލާއިނީ ކޮންހާލެއްގަިތޯވެސް މަންމަ ބަލާލަން ބޭނުން ނުވަނީތޯ ޔާސިރު ސުވާލުކުރިއެވެ. ނީލާ ވަރިކުރަނީކަމުގައި ވަނީނަމަ އެއާއިއެކު ސަލްމާވެސް ވަރިކުރާނެކަމުގައި ބުންޏެވެ. އެއީ އޭނަގެ އެންމެފަހުގެ ނިންމުންކަމުގައި ބުނުމަށްފަހު ބަލްގިސްބޭނުންވަނީ ކޮންގޮތެއްތޯ ސުވާލުކުރިއެވެ. ބަލްގިސްއަށްވެސް ދެން އިތުރަށް އޭނަގެ ދަރިފުޅަށް މަޖުބޫރުނުކުރެވޭނެކަން އެނގި އެވާހަކަ ހުއްޓާލިއެވެ. އަދި އެއިންއެއްވެސް ކަމެއް ޔާސިރުގެ ބައްޕައަށް އަދި އިތުރއެއްވެސް މީހަކަށް އެނގިގެން ނުވާނެކަމުގައި ބުންޏެވެ.

ދުވަސްތައްމާޒީއާއި އެކުވަމުންދިޔައެވެ. އެންމެ ފަހުން ނީލާގެ ބަނޑަށް ދުވަސްފުރި ވިހަންކައިރިވެއްޖެއެވެ. ޔާސިރުގެ ފުރަތަމަ ދަރިފުޅުއުފަންވީ ފެބުރުއަރީ 4 ވީދުވަހު ފަތިސްގަޑީގައެވެ. ދުނިޔެއިން ލިބޭނެ އެންމެ އުފާވެރިވަގުތުކޮޅަކީ އެއީކަމުގައި ވުމަށް އޭނައެދުނުނަމަވެސް އެހެން އެކަންތައްނުވިއެވެ. ނީލާމަރުވީ ވިހެއުމުގެތެރޭގައި ލޭމަނާނުވެގެނެވެ. އޭނަގެ ދަރިފުޅުއެންމެފަހަރަކު އެދެލޮލުން ދެކިވެސް ނުލައެވެ. ޔާސިރުއަށް ގޮތްހުސްވިއެވެ. އޭނަގެ ދަރިފުޅަށް އޭނަގެ އަމިއްލަ މައިންބަފައިންގެ ހިޔާވަހިކަމުގެތެރޭގައި ޖާގައެއްނެވެ. އެދަރިފުޅަށް ހުރިހާވަގުތެއް ހުސްކުރެވޭކަށްވެސް އޭނައަކަށްނެތެވެ. އޭނަގެ ދަރިފުޅުބެލުމަށް އާޔާއަކު ހޯދައި ނީލާއުޅުނުގޭގައި ހިލޭމީހަކާއި އޭނަގެ ދަރިފުޅު ހަވާލުކުރަން މަޖުބޫރު ވިއެވެ. އެލޯބިލޯބި ކުޑަދަރިފުޅަށް އޭނަ ރާއިންގެ ނަމުން ނަންދިނެވެ. އެއީ ނީލާ ހިޔާރުކޮށްފައިވާ ނަމަކަށްވާތީއެވެ. ދުވާލުދެގަޑިގައި އޭނަގެ ދަރިފުޅުފެނިލުން ފިޔަވައި އިތުރ ކަމެއް އޭނައަކަށް ނުކުރެވުނެވެ. އެދަރިފުޅު ނިކަމެތިވިވަރު އިހުސާސް ކުރެވުނެވެ. ނަމަވެސް އޭނަގެ މަންމަ އެދަރިފުޅު ގަބޫލުނުކުރާނެކަން އޭނައަށް އެނގެއެވެ.

ސަލްމާގެ ބަނޑަށް އޭރު އަށްމަހެވެ. ނީލާ މަރުވިވާހަކަ ޔާސިރު ސަލްމާގާތުގައިވެސް ނުބުނެއެވެ. ނީލާ ވިހައިފިތޯ ސަލްމާއަށްވެސް ސުވާލުކުރާކަށް ނުކެރުނެވެ. އޭނަގެ ހިތާމައިގައި އެއްވެސް މީހަކު ބައިވެރިކުރަން އޭނަ ބޭނުން ނުވާކަހަލައެވެ. އެއްދުވަހު އޮފީހުގައި އިންދާ ސަލްމާ އެކްސިޑެންޓް ވެގެން ބަލްގިސް ފޯނުކުރިއެވެ. ޔާސިރުއަށް ހޮސްޕިޓަލާއިހަމައަށް ދެވުނުއިރު ސަލްމާ އޮތީ އެމެޖެންސީގައެވެ. އޮޕެރޭޝަނަށް ރެޑީކުރަނީއެވެ. ދަރިފުޅުގެ އެއްވެސް ހަރަކާތެއް އަދި ވިންދެއް ނެތްކަމުގައި ޑޮންޓަރުން ބުންޏެވެ. އަވަހަށް އޮޕެރޭޝަން ނުކޮށްފިނަމަ އިތުރަށް ފުރާނައަށް ގެއްލުން ވެދާނެކަމުގައި ބުންޏެވެ.  ސަލްމާގެވެސް އެއްވެސް ހެޔެއްނެތެވެ. ބޮލުންވެސް ހުރީ ބޮޑުތަންގަނޑެއް ފަޅައިގެންގޮސްފައެވެ. ސިކުޑިއަށް ލޭނޭޅޭކަމެއްވެސް ނޭގޭކަމުގައި ޑޮކްޓަރުންބުންޏެވެ. ސަލްމާގެ ބައްޕައަށް ހާރޓް އެޓޭކެއްޖެހުނީ އޭނަގެ ދަރިފުޅު އޮތްހާލުފެނިފައެވެ. އޭނަގެ ފުރާނަ ސަލާމަތްނުވެ މިވަގުތީ ދުނިޔެއިން އަލްވަދާއުކިޔީއެވެ.

********************************************************

ޔާސިރުގެ ދަރިފުޅުގެ ފުރާނަނެތް މަސްގަނޑު އޭނަގެ  އަތުތެރޭގައި އޮތެވެ. ހީވަނީ ލޯބިކޮށް ނިދާލާފައި އޮތްހެނެވެ.  އޭނާއަށް ގޮތް ހުސްވަމުންދިޔައެވެ. އެއްކަމަކަށްފަހު އަނެއްކަމެކެވެ. ސަލްމާއަށް އިތުރުދަރިއަކު ނުލިބޭނެކަމުގައި ޑޮކްޓަރުން ބުނުމުން ހީވީ ރިހޭފައިމައްޗަށް ފޮއިވެއްޓުނުހެނެވެ. ސަލްމާގެ ބައްޕަމަރުވީއެވެ. ދަރިފުޅު މިދުނިޔެއަށް ނޭވާވެސް ނުލަނީސް މަރުވީއެވެ. އަދި އިތުރަށް ދަރިއަކު ނުލިބޭނެވާހަކަބުނުމުން އެފަކީރަށް ވާނެގޮތަކާއިދޭތެރޭ ވިސްނެނީއެވެ. އާއިލާގެ އެއްވެސް މީހަކަށް ސަލްމާގެ ދަރިފުޅުމަރިވިވާހަކަ ނުބުނުމަށް ބަލްގިސް ޔާސިރު އަދި އަބްދުﷲގެ ކިބައިން އެދުނެވެ. އަހައަހާވެސް އެކަމުގެ ސަބަބެއް އޭނަ އަބްދުﷲ ގާތުގައި ނުބުންޏެވެ. ކޮންމެފަހަރަކުވެސް ވަގުތުޖެހުނީމައި ބުނާނެކަމަށް އޭނަބުންޏެވެ. ޔާސިރު ހުރީއެވަގުތު އެއްޗެއްވިސްނޭވަރަށްވުރެ ހާލުބޮޑުކޮށެވެ.

އޮޕަރޭޝަން ކުރިތާ 12 ގަޑިއިރުވީއިރުވެސް ސަލްމާ ހެޔެއްނާރައެވެ. ޑޮކްޓަރުން އިރުޝާދުދިނީ ވީއެންމެ އަވަހަކަށް ރާއްޖެއިން ބޭރަށް ފުރުމަށެވެ. އަބްދުﷲ މާލޭގައި ހުރުމަށްފަހު ޔާސިރުއާއި ބަލްގިސް ސަލްމާގޮވައިގެން އިންޑިއާއަށް ފުރިއެވެ. އިތުރު އޮޕަރޭޝަނެއް ސަލްމާގެ ކުރެވުނެވެ. ނަމވެސް އަދިވެސް އޭނަ ހެޔެއްނާރައެވެ. ތިނަދުވަހެއްހާދުވަސްފަހުން އަބްދުﷲ މާލެއައުމުން ބަލްގިސް އޭނަ ބޭނުންވާގޮތް ހާމަކުރިއެވެ. ދުވަހަކުވެސް އޭނައަށް ނާންގަން ހުރި ސިއްރުހާމަކުރަން މަޖުބޫރުވީއެވެ. ޔާސިރު ދެއަންބަށް ކައިވެނިކުރިކަން އެނގުމުން އޭނަ ގާތަށް އައީ އަމަށަކު ރުޅިއެއްނޫނެވެ. ނަމަވެސް ބަލްގިސް ރުޅިއިސްނުކޮށް ސިކުނޑީގެ ބޭނުންކުރުމަށް އަބްދުﷲގާތު އެދުނެވެ. ކޮންމެ މީހަކު އުފަންކުރިކަމުގައިވިޔަސް އެއީ އެމީހުންގެ ފުރަތަމަ މާމަ ދަރިފުޅެވެ. އެމީހުންގެ ލެޔެވެ. ޔާސިރުގެ ދަރިއެކެވެ. ސަލްމާއަށް އެހުރިހާ ހިތާމައެއް އެއްފަހަރާ ދޭނީ ކިހިނެތްހެއްޔެވެ؟ އެދަރިފުޅު ސަލްމާގެ ދަރިއަކަށް ހަދައިގެން ނުގެނެސްފިނަމަ މުޅިއުމުރަށް އެމީހުން އުޅެންޖެހޭނީ ދަރިއަކު ނުލިބިއެވެ. އެކުޑަކުއްޖާފުޅަށްވެސް ރަނގަޅުވާނީ އެގޮތްކަމަށް އޭނަ ބުންޏެވެ. ޔާސިރުގާތުގައި އެކަމަށް އެއްބަސްކުރުވުމަށް ބަލްގިސް އަބްދުﷲ ގާތުގައި އެދުނެވެ.

ސަލްމާއަށް ދަރިއަކު ނުލިބޭވާހަކަ ބުނެގެން އޭނަގެ މުޅިދިރިއުޅުން ހަލާކުކޮށްލާކަށް ބަލްގިސް ބޭނުމެއްނޫނެވެ. މިހާރުވެސް ވާހައި ހިތާމަ އޭނގެ ދަރިފުޅު އޭނައަށް ދީފިއެވެ. ޔާސިރުއާއި ނީލާއަށް ލިބުނުދަރިއަކީ އެކަމުގެ އަގުކަމުގައިވަނީނަމަ އެކަންވެސް އޭނައެހުރީކުރާށެވެ. ޔާސިރުގާތުގައި އެވާހަކަ ދެއްކުމުން އޭނަ ހުރީ ގަބޫލުވެސް ކުރަންދަތިވެފައެވެ. ނީލާދެކެ އެއްއިރެއްގައި އެހާ ރުޅިއައިމީހަކު، ނީލާގެ ދަރިއަކު އެގެއަށް ގެނައުމަށް ބުނުމުން ގަބޫލުކުރެވޭނީ ކިހިނެތްހެއްޔެވެ. އޭނަގެ މަންމަ ބޭނުންވަނީ އެދަރިފުޅުގެ މަންމައަށް ވުމުގެ ހައްގުވެސް ނީލާއަށް ނުދޭންހެއްޔެވެ. މިހުރިހާ ކަމެއްގައި ގުރުބާން ވާންވީ އެކުޑަ ކުއްޖާހެއްޔެވެ. އެންމެ ފަހުން އަބްދުﷲ އެއީ އޭނަ އެދޭކަމެއް ނޫންކަމުގައި، ނަމަވެސް އަމުރެއް ކަމުގައި ބުނެލިއެވެ. އަދި އޭނަ ކުރިކަންތައްތަކަށް މައާފު ބޭނުން ވާކަމުގައިވަނީނަމަ އެކަން އެގޮތަށް ކުރާނެކަމުގައި ބުންޏެވެ. ބަލްގިސް ޔާސިރުއަށް މަޑުމައިތިރިކަމާއިއެކު ވިސްނަދިނެވެ. އެކުޑަކުއްޖާއަށް މަންމައެއްގެ ލޯބިބޭނުންވާނެ ކަމުގައި ބުންޏެވެ. އަދި އެކަމުން އެއްވެސް ގެއްލުމެއް ނެތެވެ. އޭރުން އޭނަގެ ދަރިފުޅު އަބަދުވެސް ހުންނާނީ އޭނަގެ ކައިރީގައި ކަމަށް ބުންޏެވެ.

ސަލްމާ ހޭއެރީ އޮޕަރޭޝަން ކުރިތާ މަހެއްހާއިދުވަސް ފަހުންނެވެ. ރަނގަޅަށް ހޭއަރައި ވާހަކަ ދެއްކޭވަރުވުމުން އެންމެ ފުރަތަމަވެސް ސުވާލުކުރީ ދަރިފުޅާއި ބެހޭގޮތުންނެވެ. ޔާސިރު އޭނައަށް ކުޑަކުޑަ ރާއިން ދައްކާލިއެވެ. ސަލްމާގެ ހިތް އުފަލުން ފުރުނެވެ. އޭނަގެ ދިރިއުޅުމަށް އުފާވެރިކަން އައިކަން އިހުސާސްކުރެވުނެވެ. އެދަރިފުޅަށް ކިޔީ ރާއިންކަމުގައި ބުނުމުން ވަރަށް ލޯބިނަމެއްކަމުގައި ސަލްމާ ބުނެލިއެވެ. ސަލްމާ އެދަރިފުޅަށް މަންމައެއްގެ ލޯބި އެންމެ ފުރިހަމަގޮތުގައި ދޭނެކަން ޔާސިރުއަށް ޔަގީންވިއެވެ. އަދި ކަންތައް މިކުރެވެނީ ރަނގަޅަށް ކަމުގައި ހިތާއިހިތުން ބުނެލިއެވެ. ރާއިންގެ ނަން ބަދަލުކުރަން ބަލްގިސް އެދުނުކަމުގައިވިނަމަވެސް ޔާސިރުއެކަމަށް ގަބޫލެއް ނުވިއެވެ. ބާރތް ސެޓިފިކެޓް ގައާއި އެހެން ހުރިހާ އެއްޗެއްގައި ރާއިން  އެއީ ސަލްމާގެ ދަރިއެއްކަން ޖެހުމުން އެވަރުވެސް މަދީކަމުގައި ޔާސިރުއަށް އެހުނީ ހިތްހަމަނުޖެހިފައިހުރެއެވެ. އިތުރަށް އެކަމުގައި ބަލްގިސް ބަހުސްކުރަން ބޭންމެއް ނުވިއެވެ. އެއްވެސް މީހަކު ރާއިންއަކީ ނީލާގެ ދަރިއެއްކަމުގައި ބަލައެއް ނުގަނެއެވެ. ސަލްމާގެ ބައްޕަ މަރުވެފައިވާކަން އަދި އިތުރުކުއްޖެއް ނުލިބޭނެވާހަކަ އޭނގާތުގައި ޔާސިރު ބުނީ މާލެއައިސްފައެވެ. ސަލްމާ ކިތަންމެ ދެރަވިކަމުގައިވިނަމަވެސް މިންވަރަށް ޝުކުރު ކުރާނެކަމުގައި ބުނީ ހިތްވަރާއި އެކުގައެވެ. މާލެބަދަލުވިފަހުން ޔާސިރުގެ ހުރިހާ ވަގުތެއް އެދެމައިންނަށް ހުސްކޮށްލިއެވެ. އޮފީހަށްނުގޮސް ސަލްމާގާތުގައި މަޑުކުރީ ސަލްމާއަށް އެހިތާމަތަކުން އަރައިގަންނަން އެހެންމީހެއްގެ އެހީ ބޭނުންވާނެކަން އެނގޭތީއެވެ. ސަލްމާއަށްވެސް ޔާސިރުގެ ހުރިހާވަގުތެއް އޭނައަށް ހުސްކުރެވިފައިވާކަން އެނގެއެވެ. ނީލާއަށާއި އޭނަގެ ދަރިފުޅަށްވެސް ވަގުތު ދޭންވާނެކަމުގައި ޔާސިރުގާތު ބުންޏެވެ. ނަމަވެސް ނީލާގެ ދަރިފުޅު ވިހޭއިރު މަރުވެފައިއޮތް ވާހަކަ ބުނުމުން އިތުރަށް އެވާޙަކަ ދައްކާކަށެއް ނުކެރުނެވެ. ނީލާ ކޮބައިތޯވެސް ސުވާލެއްނުކުރެވުނެވެ.

ދުވަސްތައް އެގޮތުގައި ހޭދަވަމުންދިޔައެވެ. އެސިއްރު ސިއްރެއްގޮތުގައި އޮވެގެން ރާއިންވެސް ބޮޑުވަމުން އައެވެ. ޒާޔާ އެގެއަށް އައިފަހުން ސަލްމާއަށް ހީވީ އޭނައަށް އަންހެންކުއްޖަކު ލިބުނުހެނެވެ. ޒާޔާދެކެ މައެއްވާ ފަދައިން އޭނަ ލޯބިވިއެވެ. ނަމަވެސް އެމީހުންނަށް ހަމަޖެހިލައިގެން އުޅެވުނީ އެހާހަމައަށެވެ. ޔާސިރު އޭނަގެ ދަރިފުޅަށް ހަގީގަތް ކިޔާދޭން ބޭނުންވާކަމުގައި ބަލްގިސްކައިރީގައި ދެއްކިއެވެ. އެކުއްޖާއަށްވެސް އޭނަގެ އަސްލު މައިންބަފައިން އެނގުމުގެ ހައްގު ވާކަން ޔާސިރުބުނެލިއެވެ. ނަމަވެސް އެވާހަކަތަށް އެކޮޓަރިއަށް ވަންނަންއައި ސަލްމާގެ ކަންފަތަށް އަޑުއިވުނީ އެހަގީގަތް ފާޅުވާން ކަންނޭގެއެވެ. ދެންވެސް ބަލްގިސް ހަގީގަތް ހާމަކުރާކަށް ބޭނުމެއް ނުވިއެވެ. އެދައްކަނީ ކާކުގެ ވާހަކައެއްތޯ ތަކުރާރުކޮށް ސަލްމާ ޔާސިރުގާތުގައި އެހިއެވެ. ޔާސިރުބޭނުންވީ ހަގީގަތް ހާމަ ކުރުމަށެވެ. ނަމަވެސް ސަލްމާ އެތަނުން ގެންދަމުން ހުރިހާ ހަގީގަތެއް ކިޔާދޭނެކަމުގައި ބަލްގިސް ބުނެލިއެވެ. ފަހުން ޔާސިރުއަށް އޭނަގެ މަންމަ ހަގީގަތް ހާމަނުކޮށް ދޮގުހެދިކަން އެނގުނީ ސަލްމާ ދެއްކިވާހަކަތަކުންނެވެ. ޔާސިރުގެ ދަރިފުޅު އެހެން މީހެއްގެ ދަރިއަކަށް ހަދައިގެން ނުގެނެސް، އެންމެ ފަހަރަކުވެސް ރީތިކޮށް ބަލާދޭށޭ ބުނިކަމުގައިވިނަމަވެސް ބަލާދޭނެ ކަމުގައި ސަލްމާ ބުނުމުން ވިސްނާލެވުނެވެ. ބަލްގިސް އާއި ޔާސިރުވާހަކަދެއްކުމުން ރާއިން އަކީ ނީލާގެ ދަރިއަކަށް ދުވަހަކުވެސް ނުވާނެކަމުގައި ބުނެލިއެވެ. ޔާސިރުއާއި ނީލާގެ ދަރިއަކީ ޒާޔާ ކަމުގައި ބުނިވާހަކަ ބުނުމުން ޔާސިރު ދެރަވިއެވެ.  ދުވަހަކުވެސް ސަލްމާއަށް ހަގީގަތް އެނގިގެން ނުވާނެ ކަމުގައި ބަލްގިސް ބުންޏެވެ.

ސަލްމާ ޒާޔާއާއި ދޭތެރޭ ކަންތައް ކުރަމުން އައި ގާތްކަން ބަދަލުވީ އެހިސާބުންނެވެ. އެކަން ޔާސިރުއަށްވެސް އެނގެއެވެ. ނަމަވެސް ސަލްމާ އެއްވެސް ޝަކުވާއެއްނެތި ޒާޔާ ބަލަމުން ގެންދާތަން ފެނިފައި އެއްޗެކޭ ނުބުނެ ހުރީއެވެ. އެކަމުގެ ހަގީގަތް އިތުރަށް ބަލަން އޭނަ ނޫޅުނީވެސް ނީލާ މިހާރު ދުނީޔޭގައި ނެތުމުންނެވެ. އަދި ޒާޔާ އެގޭގައި ހުރިކަމުގައިވިނަމަވެސް އޭނގެ ދިރިއުޅުމަށް އެއިން އެއްވެސް ބުރުލެއް ނާރާނެކަމުގައި އޭނަގެ ހިތް ބުންޏެވެ. ދުނިޔެއަށް ޒާޔާއަކީ އެހެންމީހެއްގެ ދަރިއެކެވެ. ބަދަލުގައި އޭނަ އެދުނީ އެންމެ ކަމެކެވެ. ރާއިންއަށް އަދި ޒާޔާއަށް ދުވަހަކުވެސް ހަގީގަތް ނޭންގުމަށެވެ.

ޔާސިރު ހުރިހާވާހަކައެއް ރާއިންއަށް ކިޔާދިނުމުން އޭނައިނީ ހަދާނެގޮތް ނޭގިފައެވެ. ހިތުގައި އެތަށް ޝަކުވާއެއް އެއްފަހަރާ ޖަމާވިއެވެ. ބައްޕަކުރިން އެވާހަކަ ބުނިނަމަނޫންހެއްޔެވެ. މާމަ ދޮގުހެދީ ކީއްވެގެންތޯ ރާއިން އަށް ސުވާލުކުރެވުނީ އެއްވެސް އިހުތިޔާރަކާއި ނުލައެވެ. އޭނަ އެއައީ ޒާޔާގާތުގައި އޭނައަށް އިންތިޒާރުކުރުމަށް ބުނެފައިކަން ޔާސިރުގާތުގައި ބުނާކަށް ނުކެރުނެވެ. އަނެއްކާވެސް ގުރުބާންވާން މިޖެހުނީ އޭނައަށެވެ.

“ބައްޕަ ދަރިފުޅަށް މިހަގީގަތް ކިޔާދިނީ ދަރިފުޅު ދެރަކުރާކަށް ނޫން، ނަމަވެސް ދަރިފުޅަށް އެނގުން ހައްގުކަމަކަށް ވާތީ، ބައްޕަ ބޭނުންވަނީ މިހަގީގަތް މިގޮތުގައި ސިއްރެއްގޮތުގައި އަބަދުބޭއްވުން، މަންމަ ގާތުގައި ނުބުނުން، އެއީ މާތް އަންހެނެއް، މިހަގީގަތް އެނގުމުން ދަރިފުޅު މަންމައާއި ދޭތެރޭ ދެކޭގޮތް ބަދަލުވާކަށް ބައްޕަ ބޭނުމެއް ނޫން، ބައްޕައަށް މައާފް ކޮށްދީ ރާއިން” ޔާސިރު ރާއިންގާތުގައި ބުނެލިއެވެ. އޭނައަށް ނޭގުނީ އެއެދެވެނީ އޭނަގެ ދަރިފުޅުގެ ހުރިހާ އުފަލެއްކަމުގައިކަމެވެ. ރާއިންއަށް ބުނާނެ އިތުރުއެއްޗެއް ނޭގުނެވެ.

*******************************************************

“ޔާނާ އަހަރެން ކިހިނެއްތަ ޒާޔާއަކީ އަހަރެންގެ ކޮއްކޮއެއްކަމުގައި މުޅިއުމުރަށް ދެކޭނީ، އެއީކީ އަހަރެންގެ ކޮއްކޮއެއް ނޫނޭ، ކީއްވެގެންތަ ކޮންމެ ފަހަރަކު އަހަރެން މިގުރުބާން ވާންޖެހެނީ، އަހަރެން މަންމަ ދެކެ ވަރަށް ލޯބިވޭ، ހަމަ އެވަރަށް އަހަރެން ޒާޔާދެކެވެސް ލޯބިވެޔޭ، އޭނަގެ އެއްވެސް ކުށެއްނެތި އަހަރެން އޭނައަށް މިހާ ހާރޓް މިކުރަނީ، އައި ޖަސް ވޯންޓް ގޯބެކް، ކޮންމެ ދުވަހަކު އެސޫރަ ފެނިފައި، ދުވަހަކުވެސް އެއީ އަހަރެންގެ މީހަކަށް ނުވާނެއޭ އަހަރެންގެ ހިތްބުނޭ، އަހަންނަކަށް މިތާ އިތުރަށް ކެތެއްނުވާނެ، އެކަމް އަނެއްކާ އޭރުން މަމް ސުވާލު ކުރާނެ” ރާއިން ފާރުގައި ލެނގިލައިގެން ހުރެ ވާހަކަ ދެއްކިއެވެ.

“ރެން ޕްލީޒް އަމިއްލަ ނަފްސައްތިހާ އަނިޔާވެރި ނުވެދާނަންތަ، ސަމްޑޭ އެވްރީތިންގ ވިލް ބީ އޯލްރައިޓް، މިގޮތަށް މިކަންވާނެކަން އެނގިހުރެއެންނު މިކަންކުރަން ނިންމީވެސް، ރެންތިއީ އާންޓްގެ ދަރިއަކަށް ނުވުން އެއީ ރެންގެ މައްސަލައެއް ނޫނެއްނު، އަދި ރެންގެ ބައްޕަ ކުށެއްނޫނެއްނު ކުރީ ރެންގެ މަންމައާއި ކައިވެނިކޮށްގެން ރެން ލިބުމަކީ، އާންޓް އަށް ހާރޓް ވާނެވަރުވިސްނާފަނުން މާމަވެސް އެގޮތަށް ނިންމީ، އިޓްއިޒް ޖަސް ޑެސްޓިނީ، ޕްލީޒް ސްޓޮޕް އިޓް” ޔާނާ ރާއިންގެ އަތުގައި ހިފަހައްޓާލައިގެން ހުރެ ވާހަކަދެއްކިއެވެ.

 އެމީހުންނަށް ނޭނގުނީ އެވާހަކަތަށް އިތުރުމީހަކަށް އިވުނުކަމެވެ. ރާއިން ކުރި ހުރިހާ ޝަކުވާއެއް އެހެން މީހަކަށް އަޑުއިވުނުކަމެވެ. އެގޭތެރޭގައި ފޮރުވިފައިވާ ސިއްރު އެހެންމީހަކަށް ބޭޒާރުވެއްޖެކަމެވެ.

“ނުނިމޭ”

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.