އަބަދަށް އެކީގައި ވާނަމޭ……… (ތިންވަނަ ބައި)

ހަފްތާއެއްގެ ފަހެވެ. އަލިފުޅާ ޒުބޭދާ ތިބީ އުނދޯލީގައެވެ. ވާހަކަ ދެކެވެމުން ދިޔައީ ވާފިރު ދެމަފިރިންނާ އެވަހަކަ ހިއްސާކުރާނެ ގޮތްތާކާމެދުގައެވެ. ކުއްލިއަކަށް ދެމަފިރިންގެ ވާހަކަ މެދު ކެނޑުނީ ބޭރު ދޮރުގައި ޓަކިޖަހާ އަޑަށްށެވެ. އުނދޯލިން ފައިބައިގެން ހެދުން ރަނގަޅުކޮށްލަމުން ގޮސް، ޒުބޭދާ ދޮރު ހުޅުވާލިއެވެ. އެއާއެކު ވަރަށް ބާރަށް އަލިފުޅަށް ގޮވާލިއެވެ. “އަލިފުޅާ!” ފަޔަތްލެވުނުހާ ބާރެއްލާފަ އަލިފުޅު އައިރު ދޮރުމަތި ނޫކުލައިގެ ޓީޝާޓަކާ ކަޅުކުލައިގެ ޖިންސެއްލައިގެން ވަރަށް ހެވިލާފަ  ހުރީ އާދިލްއެވެ. ފަހަތުގައި ވާފިރުއާއި ފާތުމަފުޅުވެސް ހެވިފަ ތިއްބެވެ. ބުނާނެ އެއްޗެއް ނޭންގިފަ އަލިފުޅާ އާއި ޒުބޭދާ އެކަކު އަނެކަކު މޫނަށް ބަލަހައްޓައިގެން ތިއްބެވެ. ” އެތެރެއަށް ވަންނާކަން ނުބުނާނަންތައް” އެންމެފަހުން އާދިލް ބުނެލިއެވެ. ދެމީހުން މޫނުމަތީ ހުރި ނުތަނަވަސްކަން ފިލުވަމުން އެތެރެއަށް ވަންނަން ދައުވަތުުދިނެވެ.

އެތެރެއަށް ވަނުމާއެކު އެންމެ ސޯފާގައި ހަމަޖެހިލިއެވެ. އާދިލް މުޅިތަނަށް ނަޒަރު ހިންގާލިއެވެ. މުޅި ސިޓިންރޫމު ފެހިކުލައިން ވަށާލެވިފަ ވާއިރު މުޅިތަން ފަޅުވާފިލުވާދީފައި ވަނީ އެކި ކަހަލަ މާތަކުންނެވެ. ނަމަވެސް އާދިލް ލޮލުގައި އަޅައިގަތީ ކުރިމަތީގައި ހުރި ޓީވީ ރެކު މަތީ އިން އާޝިޔާގެ ޕޮޓޯ ލޯގަނޑެވެ. މާނަވީ ގޮތްތަކަށް ފޮޓޯއާއި ދިމާލަށް ބަލަމުންދިޔައެވެ. އެވަގުތު ޒުބޭދާ އެންމެންނަށް ފިނި ބުއިމެއް އެރުވިއެެވެ. އަލިފުޅުވެސް އެމީހުންނާ ބައިވެރިވެލިއެެވެ. ބޮމުންދިޔަ ކޮންމެ ޖޯސް ކޯވަރަކާއެކު އަލިފުޅުގެ ހާސްކަން ދިޔައީ އިތުރުވަމުންނެވެ. ފެންގަނޑު ބޮލުން މައްޗަަށް އަރާ ހިސާބަށް ގޮސްފިކަން އިހްސާސްވިއެވެ. ތެދަކީ ބުނާވަގަތު އެއްވެސް މީހަކަށް އަހަން އެހާ ފަސޭހަ އެއްޗަކަށް ނުވިޔަސް ފަހުން އޭގެ ފައިދާ ކުރާ އެއްޗެކެވެ. އެހެންކަމުން އަލިފުޅު ނިންމީ އިތުރަށް ވަގުތުފާއިތު ނުކޮށް ހަގީގަތްހާމަކުރާށެވެ.

އެންމެންގެ ސަމާލުކަން އަތުލުމައްޓަކާ އަލިފުޅު ވަރަށް ބާރަށް ކަރުކެހިލުމާއެކު ބޮމުންދިޔަ ޖޫސްތަށި މޭޒުމަތީ ބެހެއްޓިއެވެ. އެންމެން އަލިފުޅާ ދިމާލަށް ބަލާލިއެވެ. “އަހަރަން ތި ދެމަފިރިން ނާއި އާދިލް ކައިރީ ވަރަށް ބޮޑު ވާހަކަ އެއްބުނަން ބޭނުން… އެނގޭ މިއީ އެކަމަށް އެންމެ މުނާސިބު ވަގުތުނޫންކަންވެސް.. އާދިލް އެހާ ދުވަސްކޮށްފަ އައި ދުވަހުވެސް ބޭބެއަށް މިޖެހުނީ މިފަދަ ވާހަކައެއް ބުނަން…. އެކަމަކު މީހަރުވެސް މިވާހަކަ ބުނަން މާލަސްވެއްޖެ…” މިހެން ބުނުމާއެކު ވާފިރުގެ ދެމަފިރިން އެކަކު އަނެކަކުގެ މޫނަަށް ބާލާލިއެވެ. އެދެމަފިރިން އިންތިޒާރު ކުރަމުން އައި ވަގުތު ޖެހުނީކަން އެނގުނެވެ.

އެއްވެސް ވަރަކަށް އެމީހުންނާ ހަތަރު ކަޅި ހަމަ ނުކޮށް ދުރު ބަލަހައްޓައިގެން އިނދެ އަލިފުޅު ވާހަކަ ކުރިއަށް ގެންދިޔައެވެ. ” މާދުރު ދުރުން  މިވާހަަކަ ގެންދާކަށް ބޭނުމެއްނޫން… އާދިލަށް އާޝިޔާ ކިންތަންމެ ކަމުދިޔަސް އާޝިޔާ ބޭނުންމެ ނުވޭ މިކައިވެނި ކުރާކަށް…. އޭނާ ހިތްއެދޭ ކުއްޖަކު އެބަހުރި….. އޭނާގެ ނުރުހުމުގައި ބޭނުމެއްނޫން އެއްވެސް ކަމެއްކުރާކަށް…” މިހިސާބަށް ވާހަކަ ދިޔަ ތަނުން އަލިފުޅަށް ފެނިގެންދިޔައީ ލޮލަށް ގަބޫލުކުރަން ދަތި މަންޒަރެކެވެ. ވާފިރުގެ ދެމަފިރިންނާއި އާދިލް މޫނުމަތިން ފެންނަމުން ދިޔައީ ލުއި ހިނިތުންވުމެެކެވެ. އެފަދަ ބޮޑޫ ވާހަކައެއް އަޑުއަހަން ތިބިހެންވެސް ހީނުވެއެވެ. “ކީއްވެތިހެނީ…. މިއީ އަހަރެން ސަމާސާއަަށް ބުނާ އެއްޗެއްނޫން މިއީ ހަގީގަތް” ހައިރާން ކަމާއެކު އަލިފުޅަށް ބުނެލެވުނެވެ.

” އަލިފުޅާ! މާއްފުކުރޭ! އެއްވެސް ވަރަކަށް މަލާމަތްކުރާކަށް ނޫން މިހެނީ.. އަސްލު އަހަރުމެން ދެމަފިރިންނަށް ތިކަން ވަރަށް ކުރިން އެނގިއްޖެ އަދި ހަމަ އެގުނުތަނުން އާދިލް ކައިރީ ވަހަކަ ދެއްކިން. އެކަމަކު އާދިލް ގަބޫލެއް ނުކުރި… އާދިލް ބޭނުންވީ އަލިފުޅު އަނގައިން ތިހެން ބުނާއަޑުނ އަހަން……. އަހަރުމެންވެސް މިއީ އެހާ ނާތަހުޒީބު ބައެއްނޫން…. ވިސްނޭ ކޮންމެ ބަޔަކަށް ވެސް މުހިއްމުވާނީ ދަރިންގެ އުފާތައް…. އަލިފުޅާ ހާސްނުވޭ” ވާފިރު ވަރަށް ހަމަ ޖެހިލަމުން ބުނެލިއެެވެ. ” ކހިނެތް ވާފިރަށް އެކަން އެނގުނީ…” ހިނި ގަނޑެއް ޖަހާލަމުން ވާހަކަ އަޑު އިވުނުގޮތް ވާފިރު ކިޔާލަ ދިނެވެ. މިވާހަކަތައް އަޑުއިވިފަ އަލިފުޅުގެ ދެމަފިރިން ހަމަ ޖެހުމުގެ ނޭވަެއް ފަޒާގެ ތެރެއަށް ދޫކޮށްލިއެވެ. އެއާއެކު އެންމެން އެކިއެކި ވާހަކައިގަ މަސްއޫލުވިއެވެ.

” އަޅުގަނޑަށް އާޝިޔާ އާއި ބައްދަލު ކޮށްލެވިދާނެތަ؟” ފޫހިވެގެން އިނދެ އާދިލް ބުނެލިއެވެ. ޒުބެދާ، ފާތުމަ ބުނި އެއްޗަކަށް ހެމުން އާޝިޔާގެ ކޮޓަރި ދައްކާލިއެވެ. ތެދުވެ ގަމީސް ރީއްތި ކޮށްލަމުން އާދިލް ކޮޓަރިއާ ދިމާލަށް ހިނގައިގަތެވެ. އޭރު އާޝިޔާ އޮތީ އަރޫންނާ ވާހަކަ ދައްކާށެވެ. އާދިލް މަޑު މަޑުން ދޮރުގައި ޖަހަލީއެވެ. އާޝީޔާ ބޯހިއްލާލުމަށްފަހު ބަލާލިއެެވެ. ނަމަވެސް ދޮރުހުޅުވަންދާ މަސައްކަތަށް އަޅާނުލާ އޮތެވެ. އެއަށްވުރެއް ބާރަށް އަރޫން ދޮރުގައި ޖަހާލިއެވެ. އެއަޑު ފޯނުގައި ހުރި އަރޫންނަށްވެސް މިފަހަރު އިވުނެވެ. އެހެންކަމުން ދޮރުހުޅުވަންދާ އަރޫން ބުންޏެވެ. އަރޫން ކައިރީ މަޑުކޮށްލުމަތް ބުނުމަށްފަހު، ފޫހި ގޮތްތަކަށްގޮސް ދޮރުހުޅުވާލުމާއެކު، ކުރިމަތިން އާދިލް ފެނުމުން ބުނާނެއެއްޗެއް ނޭންގިފަ ބަލަހައްޓައިގެން ހުރެވުނެވެ. އާދިލަށްވެސް ވީ ހަމަ އެވަރެވެ. ފޮޓޯއަށްވުރެ ހަމަ ލޮލަށް އާޝިޔާ މާ ފުރިހަމައެވެ. ހާއްސަކޮން އެޖާދުވީ ދެލޮލެވެ. ފުރަތަމަ ފެނިލުމުންވެސް އެޖާދޫގައި ޖެހިގެންދިޔައެވެ. އެއްވެސް އެއްޗެއް ނުބުނެ އިރުކޮޅަކު ހުރުމަތްފަހު، ” ހޭ!… އަހަރެން މި އާދިލް” މިހެން ބުނުމަށްފަހު ސަލާމްކޮށްލަން އަތްދިއްކޮށްލިއެވެ. އާޝީޔާގެ ދެލޯ ބޮޑުވުމާއެކު ފަހަތައް ޖެހެލެވުނެވެ. މިކަން އާދިލަށް ވަރަށް ރަނގަޅަށް ފާހަގަ ވިއެެވެ. އެހެންކަމުން  އާޝިޔާގެ ނުތަނަވަސްކަން ފިލުވާލަދިނުމަށްޓަކާ އަނެތްކާވެސް އާދިލް އިސްވެ ވާހަކަ ދެއްކިއެވެ. ” ކަންތައ ބޮޑުނުވޭ އަހަރެންނަށް ހުރިހާ ކަމެއް އެނގޭ.. އަންނަންވީނު ބޭރަށް ވާހަކަ ދައްކާލަން….” ” މިދަނީ… ބޭރު ޖޯލީގަ މަޑުކޮށްލާ….” ތުންފަތްމައްޗަށް ހިނިތުންވުމެއް ވެރިކޮށްލަމުން އާޝިޔާ ބުނެލިއެވެ. އިތުރަށް އެއްޗެއްނުބުނެ އާދިލް ހިނގައިގަތެވެ. އެއާއެކު އާޝިޔާ ކޮޓަރި ދޮރުލައްޕާ ތަޅުލިއެވެ. އަދި އަވަސް އަވަހަށް އެނދުމަތީ އޮތްފޯނު ނަގާ ހަލޯ ބުނެލިއެެވެ. އެކޮޅުން އެއްވެސް ޖަވާބެއް ނައެވެ. ރަނގަޅަށް ބަލާލިއިރު ފޯނު އޮތީ ކެނޑި އަމިއްލައަށް ލޮކްވެފައެެވެ. އަލުން ގުޅަން އަވަސް އަވަހަށް ލޮކްހުޅުވާލިއެވެ. އެވަގުތު ފެނުނީ އަރޫންގެ ފޮނުވާފައިވާ މެސެޖެކެވެ. އެހެންކަމުން މެސެޖެ ހުޅުވާފަ ކިޔާލިއެވެ. ” ގޮޓް ބިޒީ…. ވިލް ކޯލް ޔޫ ލޭޓާރ… ލަވްޔޫ……” މެސެޖު ކިޔާލުމަތްފަހު ކުޑަކޮށް ރީތި ވެލައިގެން ބޭރަށް ނިކުތެވެ. އޭރު އާދިލް ފިޔަވާ އެހެން އެންމެން އޮލަ ވާހަކަގައި ތިއްބެވެ.

އާޝިޔާ ބޭރު ޖޯލިފައްޗަށް ނިކުންއިރު އާދިލް ކެތްމަދުވެފަ އޮތެވެ. އާޝިޔާ ފެނުމާއެކު ތެދުވެ ހަމަ ޖެހިލިއެވެ. އާޝިޔާ ފަރި ހިނިތުންވުމަކާއެކު އައިސް އެއްޖޯލި ދޫކޮށްފަ އިށީންނެވެ. ނަމަވެސް ދައްކާނެ ވާހަކަ އެއް ނޭންގުނެވެ. މުޅިތަނަށް ވެރިވެގެން ދިޔައީ ހިމޭންކަމެވެ. އެކަކު އަނެކަކު މޫނަށް ބާލަލަ ބަލާލަ އިރުކޮޅަކު ތިއްބެވެ. އާޝިޔާގެ ކޮންމެ ބަލާލުމަކީ އާދިލްގެ ހިތްތަށް ލިބިގެންދާ ފިނިކމެކެވެ. މޫނުމަތިން އެކަން ނުދެއްކިޔަސް، ދުލުން ހާމަނުކުރިޔަސް އަދި ހެވިިފަ އާޝިޔާގެ ނިންމުމަތް އެއްބަސްވި ނަމަވެސް އާދިލްގެ ހިތްތަކުން އެކަމަށް އެއްބަހެއް ނުވެވުނެވެ. އާދިލް ކިތަތްމެހާވެސް އާޝިޔާ ބޭނުމެވެ. ނަމަވެސް އާޝިޔާގެ ހިތްތުގައި ވަނީ އެހެންމީހަކަށް ހިބަ ކުރެވިފައެވެ. އާދިލަށްޓަކާ ކުޑަވެސް ޖާގައެއް އެ ހިތަކުނުވެއެވެ. މީގެ އިތުރުން އާޝީޔާގެ އިންކާރު ކުރުން އާދިލަށް ވީ މުޅިން ގަބޫލުކުރަން ދަތި ކަމަކަށްށެވެ. މިހާތަނަށް އާޝިޔާ ފިޔަވާ އެހެން އަންހެން ކުއްޖަކު އާދިލްގެ ހަޔާތަށް އަންނަށް އިންކާރު ކޮށްފައެއްނެތެވެ. އާދިލަށްޓަކާ ގުރުބާންވާނެ ކިތައްމެ ކުދިންނެއް އެބަތިއްބެވެ. ވީއިރު އާޝީޔާއަށް އެވަރުގެ ހިތްވަރެއް ލިބުންވެސްވީ އާދިލުގެ ހިތް އާޝިޔާއަށްޓަކާ ލަންބުވާލި ސަބަބަކަށްށެވެ.

“އާޝިޔާ ކިވާ ނިމުނީތަ! އެންމެފަހުން އާދިލް އެހަމަ ހިމޭންކަން ފުނޑުފުޑުކޮށްލިއެވެ. އާޝިޔާ ބޯޖަހާލިއެވެ. އަނެތްކާވެސް ވެރިވީ ހަމަ ހިމޭންކަމެވެ. ވަަރަށް ވިސްނާލުމަށްފަހު، އާދިލް އަރޫންގެ ވާހަކަ އަހާލިއެވެ. އެއާއެކު އާޝިޔާގެ މޫނުމައްޗަށް ވެރިވެގެން ދިޔައީ ލަދުވެތިކަމެވެ. އެއްވެސް އެއްޗެއް ނުބުނެ އިސްޖަހާލިއެވެ. ނަމަވެސް އާދިލް ކުރުނުކޮށް އަހަންފެށިއެވެ. އެންމެފަހުން އަރޫންނާއި އާޝިޔާގެ ގުޅުމުގެ ވާހަަކަ ވަރަށް ތަފުސީލްކޮށް އާޝިޔާ ކިޔާދިނެވެ. ހަމަ އެހެންމެ އެވަގުތު އާޝިޔާ އަނގައިން ބޭރުވި ކޮންމެ ލަފުޒެއްވެސް އާދިލް އަށް ސިފަވީ ރީތި މިޔުޒިކެއްގެ ގޮތްތުގައެވެ. ކަޅި ޖަހާ ނުލާ އާޝިޔާގެ ތުންފަތަށް ގެނުވާ ކޮންމެ ހަރަކާތެއް ބަލަމުންދިޔައެވެ. ވާހަކައިގެ ފޯރީގައި އިން އާޝީޔާއަށް މިކަން ފާހަގަ ކުރެވޭ ވަރެއް ނުވިއެވެ.

އެދުވަހު އާދިލްގެ އާއިލާ ވަކިވެގެން ދިޔައީ ރޭނގަޑުގެ ކެއުން ނިއްމާލުމަށްފަހުއެވެ. އޭރު އާދިލް އާއި އާޝިޔާ ވަނީ ދެރަހުމަތްތެރިންނަށް ވެފައެެވެ. އާދިލްގެ ދިރިއުޅުމުގެވެސް އެތައް ވާހަކައެއް އޭނާވެސް ވަނީ ހިއްސާކޮށްފައެވެ. އާޝިޔާ އާދިލް ބަލައި ގަތީ ވަރަށް ހިތްހެޔޮ އަދި ވަރަށް ވިސްނޭ ރަހުމަތްތެރި އެއްގެ ގޮތުގައެވެ. ނަމަވެސް އާދިލް މިރަހުމަތްތެރިކަން ބަލައިގަތީ އާޝިޔާގެ ހިތްފަތަހަ ކުރުމަށް ބޭނުންކުރާ ހަރުފަތެއްގެ ގޮތުގައެވެ. އަރޫންގެ ނަން އެހިތުން އަބަދުގެ އަބަދަށްފޮހެލާ އާދިލްގެ ނަން ފަވާލުމުގެ ބޭނުމުގައެވެ.

އަނެތްދުވަހުގެ އިރު އެރިއިރު އާޝިޔާގެ މުޅި ކޮޓަރިތެރޭވަނީ ފިނިފެންމަލުގެ މީރުވަހެވެ. ނޭފަތް ދަމާލަމުން ލޯހުޅުވާލިއިރު މުޅި ކޮޓަރިވަނީ ފިފެން މަލުން ފުރާލާފައެވެ. ބުނާނެ އެއްޗެއް ނޭންގިފަ އެނދުމަތީ އިންދާ ޒުބޭދާ އައިސް ކޮޓަރިއަށްވަނެވެ. އޭރު ޒުބޭދާ އަތުގަވެސް ފިފެންމަލުގެ ބޮޑޫ ބުކޭއެއް އޮތެވެ. އާޝިޔާ ނިތްއަރުވާލިއެވެ. “މިއީ އާދލްގެ ހަދިޔާ…. މީގަ އެބަޮތް ނޯޓްކޮޅެއްވެސް ބަލާލަބަ…” މިހެން ބުނުމަށްފަހު ބުކޭ މޭޒުމަތީގައި ބަހައްޓާފަ ޒުބޭދާ ބޭރަށް ނިކުތެވެ. އާޝިޔާ އެނދުން ފައިބައިގެން އައިސް ނޯޓްކޮޅު ކިޔާލިއެވެ. ” ހަަމަ އެކނި ރަހުމަތްތެރި އާޝިޔާއަށް….. މީ އަހަރުމެންގެ ރަހުމަތްތެރިކަންފެށުން ފާހަގަ ކުރުމުގެ ގޮތުން ދިން ކުޑަ ކުޑަ ހަދިޔާއެއް….” އާޝިޔާ ވަގުތުން އާދިލްއަށް ގުޅާލިއެވެ.

” އާދިލް ފޮނުވި ހަދިޔާ ލި ބިއްޖެ…. ވަރަށް ރީތި…” އާޝިޔާގެ މިހެން ބުުނުމާެކު ފަހުރުވެރިކާމާެކު އާދިލް މޭފުއްޕާލިއެވެ. ” އާދިލް! އެކަމަކު އަދި އެއްވާހަކަ ބުނެލަން ބޭނުން… ރުޅި ނާންނާތި… ދެން ފަހަރަކުން މިކަހަލަ ކަމެއް ނުކުރާތި އަހަރެން އެހާ ހިތްހަމަ ޖެހޭކަމެއް ނޫން… އަރޫންނަށް އެނގުނަސް ހިތްހަމައެއް ނުޖެހޭނެ….” މިހެން ބުނި އަޑު އިވުމާއެކު އާދިލް އަށް ހީވީ މީހަކު މޫނުމަތި ޖެހި ހެންނެވެ. މުޅިމިހާ ރުޅި އައިސް ތުރު ތުރުލާން ފެށިއެވެ. އެހާ ބޮޑު ހޭދައެއްކޮށްގެން އެހާ ބުރަ މަސައްކަތުން ކުރި ކަންތަކަށް އާޝީޔާ ބަލައި ނުގަަތުމުންނެވެ. އެވެސް އަދި އެހެން މީހަކާ ހެދިކަމަށްވީތީއެވެ. އިތުރަށް އެއްވެސް އެއްޗެއް ނުބުނެ އާދިލް ފޯނު ކަނޑާލިއެވެ. އެއަށްފަހު އަތުގެ ކޮޅަށް ފޯނު ހުރާލިއެވެ. އެއާއެކު ފާރުގަ ވަރަށް ބާރަށްޖެހި ފޯނު ފުޑު ގުޑުވެގެން ދިޔައެވެ. މިކަމަށް އެއްވެސް ފަރުވާލެއްނެތި އާދިލް  އެނދުމައްޗަށް ވެއްޓިގަތެވެ. އޭރު އެއްވެސް އިހްތިޔާރަކާ ނުލާ ލޮލުން ކަރުނަފައިބަމުންދިޔައެވެ.

އެނދުމަތީ އޮތްއިރު އާދިލް ސިކުނޑިވަށާލެވިފަ ވަނީ ދެންކަންތައް ކުރާނެ ގޮތްތަކާމެދުގައެވެ. އަރޫން އައުމުގެ ކުރިން އާޝިޔާގެ ހިތް ފަތަހަ ކުރަން އާދިލް ބޭނުންވެއެވެ. ނަމަވެސް އެކަމަށް އެއްވެސްކޮޅުފަހެއް ނުފެނެއެވެ. ފުރަތަަމަ ކުރި ކަންތައްވެސް ވީހަމަ ފޫނެތްފަޔަށް ފެންފުރުން ފަދަ ކަމަކަށްށެވެ. އެކަމުން އެއްވެސް ރާހަތެއްނުކުރިއެވެ.

އެހެންއޮތްވާ އެއްޗެއް ހަދާންވެގެން ތެދުވިއެވެ. އަަވަސް ހިނގުމެއްގައި ގޮސް މޭޒުމަތީ އިން ލެޕްޓޮޕް ނަގައިގެން އައިސް އެނދުގަ ޖައްސާލިއެވެ. އެއަށްފަހު ގޫގަލް ހުޅުވާލާލިއެވެ. ދެފަހަރަކު އެއްޗެއް ލިޔެލާފަ ފުހެލިއެވެ. އަނެއްކާވެސް ވިސްނާލުމަތްފަހު ” ވޭސްޓް ވިން ދަ ހާރޓް” ޖަހާލުމަތްފަހު އެންޓާރ ކޮށްލިއެވެ. އެއާއެކު ސްކްރީން ފުރިގެން ދިޔައީ އެކަމާ ބެހޭ ލިޔުން ތަކުންނެވެ. ރަނގަޅު ލިޔުމެއްފެނޭތޯ ސްކްރޯލް ކޮށްލަ ކޮށްލަ އިނެވެ. އެވަގުތު ލޮލުގައި ވަރަށް ޝައުގުވެރިވާ ލިޔުމެއް އަޅައިގަތެވެ. އަވަސް އަވަހަށް ހުޅުވާލަފައި ކިޔަންފެށީއެވެ. ކިޔަމުން ދިޔަވަރަކަށް މޫނުމައްޗަށް އެތަކެއް ކުލަވަރުތަކެއް އަރާ ފައިބަމުންދިޔައެވެ. ކުޑަ އިރުކޮޅެއްތެރޭ އެއްކޮށް ކިޔާ ނިއްމާލުމަށްފަހު ލެޕްލައްޕާލިއެވެ. އޭރު މޫނުމަތިން ފާޅުވަމުން ދިޔައީ ވިހަ ހިނިތުންވުމެކެވެ.

ނުނިމޭ…………….