ހިތި ހަނދާން

އަހަރެން ހަނދާން ހުންނަން ފެށީއްސުރެންވެސް އަހަރެންނަކީ އުފާވެރި ދިރިއުޅުމެއް ވޭތުކުރަމުން އައި މީހަކީމެވެ. އާއިލާގައި ތިބި ހުރިހާ ކުދިންގެ ތެރެއިން އެންމެ ހަގު ކުއްޖާއަށް ވުމުން އަހަރެން ބޮޑުވަމުން އައީ މަންމަ އާއި ބައްޕަގެ އިތުރުން ދައްތަ މެންނާއި ބޭބެމެންގެ ވެސް ފުރިހަމަ ލޯތްބާއި ހިމާޔަތް ލިބިގެންނެވެ. މިހެންކަމުން އަހަރެންގެ ސްކޫލް ދައުރު ފެށިގެން ދިޔައީވެސް ކާމިޔާބުކަމާއި އެކުގައެވެ. ކޮންމެ އަހަރެއްވެސް ނިންމާލަނީ ކުލާހުން އެއްވަނަ ހޯދައިގެންނެވެ. ކިޔެވުމުގެ އިތުރުން އެހެން ކަންކަމުގައިވެސް އަހަރެން ދިޔައީ މަންމަމެން ފަޚުރުވެރި ވާފަދަ ވަނަތައް ހާޞިލްކުރަމުންނެވެ. ހިތާމައާއި އަނިޔާއާއި ވޭން އެއީ އޭރު އަހަރެން ދަންނަ އިހުސާސް ތަކެއްނޫނެވެ. އެހެނަސް ތަޤްދީރު ބަދަލުވެގެން ދިޔައީ އެއާ މުޅިން ޚިލާފަށެވެ.

މި މުޖްތަމައުގައި ޅައުމުރުގައި ޖިންސީ އަނިޔާ ތަހައްމަލް ކުރަންޖެހިފައިވަނީ ކިތައްކުދިންނަށް ހެއްޔެވެ؟ އެފަދަ ބަދުނަސީބު ކުއްޖަކަށް އަހަރެން ވެދާނެ ކަމަކަށް އަހަރެން ދުވަހަކުވެސް ހިޔާލަށްވެސް ނުގެންނަމެވެ..

 އޭރު އަހަރެން އުޅުނީ ގްރޭޑް ހަތެއްގައެވެ. އާދައިގެ މަތިން އެރޭވެސް އަހަރެން ނިދަން އޮށޯތީ ފަތިހާ އަވަހަށް ހޭލުމުގެ ނިޔަތުގައެވެ. މަންމަ މެންނާއި ދައްތަމެން ވެސް ނިދަންވަންނާނީ ދަންކޮއްލާފައެވެ. އަހަރެންނަށް ހޭލެވުނީ އަހަރެންގެ ހަށިގަނޑުގައި މީހަކު ބީހޭކަމުގެ އިހުސާސް ކުރެވިގެންނެވެ. ބިރުން ހަޅެއްލަވައިގަންނަންވެސް ނޭނގުނެވެ. އަހަރެންގެ ހިއްސުތައް ގަނޑުވި ކަހަލައެވެ .އެރޭ އަހަރެންގެ ހަޔާތުގައި ހުޅު ރޯކުރީ ދުރުހިލޭ މީހެއްނޫނެވެ. ޚުދު އަހަރެން އެމީހަކަށް އެންމެ އިތުބާރު ކުރި އަހަރެންގެ އެއްބަނޑު އެއްބަފާ ބޭބެއެވެ. އެ ޖަނަވާރުގެ އެދުން ފުދުމުން ނިކުމެގެން ދިޔައީ އަހަރެންގެ ހަޔާތް އެފުށް މިފުށަށް ޖަހަމުންނެވެ. އަހަރެން ކަރުނަ އަޅާ ރުއީމެވެ. އެހެނަސް އަޑު އަހާނެ އެއްވެސް މީހެއް ނެތެވެ. އަހަރެންނަށް ކުރެވުނުހާވެސް ކަމަކީ އެކަންތައް ހިތުތެރޭގައި ފޮރުވުމެވެ. އެހެނަސް އޭގެ ފަހުން ބޭބެގެ ގޯނާތައް ދިޔައީ އިތުރުވަމުންނެވެ. އސްތިރި ކުރަން ހުއްޓާ ކައިރިވުމުން އިސްތިރި ޖައްސަންވެސް ހިތަށް އެރިއްއެވެ. އެހެނަސް އެ ހިތްވަރެއް ނުލިބުނެވެ. އަހަރެންނަށް ގަބޫލުކުރެވުނީ އަހަރެންގެ ވާހަކަތައް އެއްވެސް މީހަކު ގަބޫލު ނުކުރާނެކަމުގައެވެ. އަހަރެންގެ ހާލަތު މަންމަމެންނަށް އިހްސާސް ނުކުރެވުނީތީ ޝަކުވާ ކުރެވުނީ އަމިއްލަ ނަފްސާއެވެ. އަހަރެން އެކަނި ނިދަން ބޭއްވީ ކީއްވެ ހެއްޔެވެ.. ބޭބެގެ މަކަރުވެރިކަން މަންމަ މެންނަށް ނުފެނުނީ ކީއްވެ ހެއްޔެވެ.. ؟ އަމުދުން ބޭބެ އަހަރެންނާމެދު އެފަދަ ނަޒަރަކުން ދެކުނީ ކީއްވެ ހެއްޔެވެ؟ އޭނަގެ ހިތުގައި އެއްބަނޑު އެއްބަފާކަމުގެ ކުލުނެއް ނެތީކީއްވެ ހެއްޔެވެ..؟

އެ ހިއްދަތި ދުވަސްތަކަށް ނިމުމެއް އައީ ބޭބެ މާލެބަދަލުވުމުންނެވެ. އެހެނަސް އެ އިންސާނާ ފުރައިގެން ދިޔައީ އަހަރެން ދެކެމުން އައި ހުވަފެންތަކުގައި ކޮޅުފައިން ޖަހަމުންނެވެ. މާޒީގައި ކޮންމެ ގޮތަކަށް ކަން ހިނގިނަމަވެސް އަހަރެން ސްކޫލް ދައުރުނިންމާލީ ރަންވަނަތަކާއެކުގައެވެ. މިހާރު އޭގެފަހުން ނުވަ އަހަރު ވީއެވެ. އެހެނަސް އެ ހަނދާންތައް އިއްޔެ ވީކަމެއްހެން އަހަރެންގެ ހިތުގައި އަދިވެސް ހަރުލާފައި އެބަހުއްޓެވެ. އަހަރެން ބޭބެ އަށް ނަފްރަތު ކުރަމެވެ. އަހަރެން ފަދައިން މިފަދަ އަނިޔާތައް ތަހައްމަލް ކޮށްފައިވަނީ ކިތައް ކުދިން ކަމެއްނޭނގެއެވެ. އެނގޭހާވެސް އެއްޗަކީ އެ މައްސަލަ ޖައްސައިގެން އިންސާފު ލިބޭނެ ގޮތެއް މި ރާއްޖޭގައި ނެތްކަމެވެ. ކަށްވަޅަށް ދާންދެންވެސް މި ސިއްރު އާއިލާއަށް ވަންހަނާކުރުން ނޫންގޮތެއް އަހަރެންނަކަށް ނެތެވެ..