ކަޝްފު (1)

*މިވާހަކަ އަކީ ހަޤީޤީ ހާދިސާއެއްގެ މައްޗަށް ބިނާކޮށް ލިޔެފައިވާ ޚިޔާލީ ވާހަކައެކެވެ*

ވެހެމުންދިޔަ ވާރޭތިކިތަކުން ބިންމަތި ތެންމަމުން ދިޔައިރު ފަޒާގައި އެކުލެވިފައިވަނީ ފިނި ކަމެވެ. ގަސްތަކުގެ ފަތްތައް ޖެހެމުންދާ ފިނވައިރޯޅި ތަކަށް ތަބާވެ އެއްކޮޅަކަށް ހެލެމުންދާއިރު އިވެމުންދަނީ ހިތްގައިމު އަޑެކެވެ. ދުރުދުރަށް ދާންދެން މަގުމަތީގައި ފެންހެދިފައި ވާއިރު އެތަނުން ފެންގަނޑެއް ކައިރިން މަޑުހިނގުމެއްގައި ރަތްކުޑައެއް އަޅައިގެން ސްކޫލް ޔުނީފޯމެއްގައި ހުރި ކުއްޖަކުއާދެއެވެ. ދެއަތުން ކުޑަހިފަހައްޓައިގެން ކަނާތުގައި ބޫޓު އެލުވާލައިގެން ހުރިއިރު އެއަތުގައި މަޑު ތުރުތުރު އެޅުމެއް ހުއްޓެވެ. މޫނުމައްޗަށް އެލިފައިވާ ދެތިން އިސްތަށި ކޮޅުން ފައިބަމުންދިޔަ ފެންތިކިތަކުން އެދޮންމޫން ތެއްމަމުން ދިޔައިރު ފަހަތަށް އައްސާލެވިފައިވާ ކަޅުކަންގަދަ އެބުޅި އިސްތަށިގަނޑުގައިވެސް ތެތްކަމެއްހުއްޓެވެ. މުށިކުލަގަދަ އެބޮޑުދެލޮލުން ނުތަނަވަސްކަން ފެންނަމުންދާއިރު މޭކަޕެއްނެތް ލޭކުލަ އަރާފައިވާ ތުންފަތުގެ ތިރީގައި ދަތްއަޅާލާފައިވެއެވެ. މަޑުހިނގުމެއްގައި ގޮސް އޭނާ ކުރިމަތީގައި ހުރި ގެއަށް ވަދެގެން ދިޔައެވެ.

ގެއަކީ ފުދޭވަރަކަށް ބޮޑުގެއެކެވެ. ގޭގެ ދޮރާށިއެތެރޭގައި ދެފަރާތަށް ހައްދާފައިވާ އެކިކުލަކުލައިގެ މާގަސްތަކުގައި ފެންތިކިތައް ހަރުލާފައިހުރިއިރު އެހިސާބުގަނޑުގައި ލުއިމީރުވަހެއް ހިފާފައިވެއެވެ. ކަނާތްފަރާތުން ތަންކޮޅެއް ދުރުގައި ހުރި ގުލްޗަމްޕާ ގަހެއްގައި ތިންއުދޯލި އެލުވާފައި ހުރިއިރު އެތާކައިރީގައި ކުޑަވަރެއްގެ މަސްފެންގަނޑެއްވެސް އޮތެވެ.

“ދަރިފުޅާ ޝަޒިން، ކޮބާ ޕޭޕަރު ކިހިނެތް؟” ސިޓިންރޫމުގައި ހުރި ސޯފައިގައި ދެފައިދަމާލައިގެން ދުފާތަބައް ހިފައިގެން އަނގަ ރަތްކޮށްލައިގެން ދުފަން އިން ޒާހިދާ ގޭތެރެއަށްވަން ޝަޒިން ފެނުމުން އަހާލިއެވެ. ޝަޒިން އޭނާގެ އަތުގައި އޮތް ބޫޓު ކައިރީގައި ހުރި ހަރުގަނޑަށް ލުމަށްފަހު ތެދުވެ ހިންދެމިލިއެވެ. “އޯކޭ ދެން. އިކޮނޮމިކްސް ވީމަ ދެން ކުޑަކޮށް އުދަނގޫ ބަޓް ފާސްވާނެ ކަމަށް މިބަލަނީ” ޝަޒިން އިސްޖަހައިގެންހުރެ ބުނެލިއެވެ.  ޒާހިދާ ދުފާތަބަށް ކުރިމަތީގައިހުރި ކުޑަ ބިއްލޫރި މޭޒެއްމަތީގައި ބެހެއްޓުމަށްފަހު ޢިށީދެ ސޯފާއިންތިރިއަށް ދެފައިއެލުވާލިއެވެ. “އަދި މިއީ މިއަހަރުގެ ފުރަތަމަ އިމްތިހާނެއްނު. އަދި ރަނގަޅުވާނެ. އެހެންވީމަ ދެން އަންނަ ޓާރމަށް ޓިއުޝަން ޓީޗަރެއް ހޯދަން ދޮންބެ ކައިރިބުނޭ އިގޭ.” އޯގާތެރި ރާގެއްގައި ޒާހިދާ މިހެން ބުނެލުމަށްފަހު ޝަޒިން އާއި ދިމާލަށް ނަޒަރު ހުއްޓާލިއެވެ. އޭނާގެ ހުރި ހަމައެކަނި އަންހެންދަރިފުޅެ ބޮޑުވީއެވެ.  އިސްކޮޅުން ދެމިލާފައިހުރި އިރު އެބުޅި އިސްތަށިގަނޑުގެ ކަޅުކަން ގަދަވެ ރީތިވެއްޖެއެވެ. ޝަޒިން ކުޑައިރު އިސްތަށިގަނޑު ބުޅިވީމާ ދެރަވެ އެކަމާ ރޮއެހަދައެވެ. ނަމަވެސް މިހާރު އެ އިސްތަށިގަނޑަކީ އޭނާ އެންމެ ލޯބިވާއެއްޗެވެ. މިއަހަރު ގުރޭޑު އަށަކަށް ދިޔަ ޝަޒިން އަކީ ކިޔަވަން މޮޅު ކުއްޖެކެވެ. ޒާހިދާގެ އުއްމީދަކީ ޝަޒިން ކިޔަވައިގެން މޮޅުވެ އޭނާ ފަހުރުވެރިވާނެ ފަދަ ކުއްޖަކަށް ވުމެވެ. ޝަޒިން އޭނާގެ މަންމަ ބުނި އެއްޗަކަށް އާއެކޭ ބުނުމުގެ ގޮތުން ބޯ ޖަހާލާފައި އެތެރެއަށް ދާން ހިނގައިގަތެވެ.

ކާގެ ހުރަސްކޮށް ކުރިމަތީގައި ހުރި ކޮޓަރި އާއި ދިމާއަށް ޝަޒިން މިސްރާބު ޖެހިއެވެ. ވިއްސާރަވުމުން ގޭތެރެއަށް ވެރިވެފައިވަނީ ފަނޑު އަނދިރިކަމެކެވެ. ކޮޓަރީގެ ދޮރާއި ހަމައަށް އެރިތަނާ ކުއްލިއަކަށް ފަހަތުން ބާރުގަދަ ދެއަތުން އޭނާގެ އުނަގަނޑުގައި ހިފާ މައްޗަށް އުފުލާލިއެވެ. މި ކުއްލި ހަމަލާއިން ޝަޒިން ސިއްސައިގެންގޮސް ރޯމަހެއް ތެޅޭހެން ތެޅިގަނެ އެއަތުގެ ތެރެއިން ސަލާމަތް ވުމަށް ދެއަތުން ލެވުނުހައި ބާރެއްލާފައި އޭނާގެ އުނަގަނޑުގައި ހިފަހައްޓައިގެންހުރި ދެއަތުގައި ތަޅަން ފެށިއެވެ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.