ކޮން އަޑެއް؟

އެއީ މީގެ ފަސް ވަރަކަށް މަސް ކުރިއެވެ. އަހަރެން އެ ރަށަށް ދިޔައީ ކޮލެޖު ދަރިވަރުންގެ އަހަރީ ދަތުރުގައެވެ. އަހަރުމެން ގޮސް ތިބީ ދެކުނުގެ ރަށެއްގަ އެވެ. އެ ރަށުގައި ބޮޑު ދޮންވެލި ތުނޑިއެއް އޮންނަ ފަންނެއް އޮވެއެވެ. އަހަރުމެންގެ ދަތުރުގައި ހިމެނޭ 35 ދަރިވަރުން ނިންމީ އެ ތަނުގައި އޯވަރ ނައިޓެއް ހަދާލުމަށެވެ.

ދަތުރަށް ބޭނުންވާނެ ހުރިހައި އެއްޗެއް ހަމަކޮށްގެން އަހަރުމެން އެތަނަށް ދިޔައީ ރަށު ޕިކަޕެއްގައެވެ. އިރު އަރަންދެން އެ ފަންނުގައި ތިބުމަށް ނިޔަތްގަނެ، އެކަމަށް ތައްޔާރުވެސް ވެގެންނެވެ. އަހަރުމެން ދަތުރަށް ފުރީ ބަޣްރިބު ނަމާދުން ފައިބިގެންނެވެ. ރަށުގެ މައި މަގަކުން ދިމާ ހުރި ގޮތަށް ދިޔައީ ރަށުގެ އެންމެ އުތުރަށެވެ. ގާތްގަނޑަކަށް 10 ވަރަކަށް މިނިޓު ދުއްވައިގެން އަހަރުމެންގެ މަންޒިލާއި ހަމައަށް ދެވިއްޖެ އެވެ. ވާނީ ވެސް އެހެންތާއެވެ. އަހަރެމެން ދިޔައީ މީހުން އުޅޭ ހިސާބާ ނުއަތަށެވެ. އެހެންކަމުން ދުއްވާ އެއްޗެއް އަދި ކިއެއް މީހެއްގެ ހިލަމެއް ނެތެވެ. ރަނގަޅު ދުވެއްޔެއްގައި ޕިކަޕު ދުއްވިއެވެ.

އެއީ ސަރާސަރު ދިގު، އެ ރަށުގެ ކޮޅުން ކޮޅަށް ދަމާލެވިފައި އޮތް ހުދު ދޫލައެއް ފަދަ، ހިމުން ދޮންވެލި ފަންނެކެވެ. ހަނދުވަރު ދީފައިވާ ރެއެއް ނަމަވެސް، އިތުރަށް އަލި ކުރުމަށް އަލިފާންގަނޑެއް ރޯކުރީމެވެ. ވަގުތަކީ ފިނި ވަގުތަކަށް ވާތީ ވެސް މެއެވެ. ދެން އަވަސްވެގަތީ ޓެންޓްތައް ޖަހައި ނިދާނެ ތަނެއްްގެ އިތުރުން، ކައްކާނެ ތަނެއް ތައްޔާރުކުރުމަށެވެ. ކެއްކުމަށްޓަކައި ގެންދިޔަ ކުޑަވަރެއްގެ ތެޔޮ އުނދުނަކާއި ކެއްކުމާއި ގުޅުންހުރި ހުރިހާ ސާމާނެއް، ކެއްކުމަށް ތައްޔާރުކުރެވުނު ސަރަޙައްދުގައި ބެހެއްޓީމެވެ.

އަހަރެންނަކީ ކޮލެޖުގެ ދަރިވަރުންގެ ޖަމްއިއްޔާގެ ރައީސް އެވެ. ކޮލެޖުގެ ދަރިވަރުންނާ ގުޅުންހުރި މިފަދަ ހުރިހާ ކަމެއް ރާވައި ހިންގުމުގެ އިސް މަސްއޫލިއްޔަތު އެޅިފައި އޮތީ އަހަރެންގެ ބޮލުގައެވެ. އަހަރެންނަކީ އުމުރުން 19 އަހަރުގެ ނޫކަށި ފުރައިގެ ޒުވާނެކެވެ. އެކުގައި އުޅޭ ރައްޓެހިންނާއިއެކު މަޖާކުރުމާއި ސަކަރާތް ޖެހުމުގައި ގިނަ ވަގުތު ހޭދަކުރަމުންދާ މީހަކީމެވެ. ހަތަރު މަތިފުށް ރ. އަތޮޅު ވާދޫ މީހަކަށް ވީ ނަމަވެސް، ސާނަވީ ތައުލީމަށްފަހު މާލެ ބަދަލުވެ “މާލޭ މީހަކަށް” ވެގެން މާލޭގެ މަގުތައް ކުޑަކުރަމުން ދިޔައީމެވެ. އަހަރެންގެ މިޒާޖުގެ ސަބަބުން އެކުގައި އުޅޭ އަންހެން ކުދިންނާއި ފިރިހެން ކުދިން ދުވަހެއް ދުވަހަކަށް ދިޔައީ އިތުރުވަމުންނެވެ. ކޮލެޖުގައި ވެސް އެހާ ހިންގުންތެރި މީހަކަށް ވެފައި ވަނީ މިބުނި ސަބަބާހުރެ ކަންނޭނގެއެވެ. ފަސްޖެހުމެއް ނެތި ކޮންމެ ކަމަކާ އަހަރެން ކުރިމަތިލަމެވެ.

އިސާހިތަކު، ހީސަކަރާތް ޖެހުމާއި، މަޖާކުރުމުގެ ކުޅިވަރުތައް ފެށިއްޖެއެވެ. މިދަތުރުގައި ހިމެނޭ ހުރިހާ އެންމެންނަކީ ވެސް އެކުގައި އުޅޭ ވަރަށް ގާތް ރައްޓެހިންތަކެއް ކަމަށް ވުމުން އެކަކު އަނެކަކާއި ގައިގޯޅިވެ މަސްހުނިވުމަކީ މިދަތުރުގެ ބައިވެރިން އެންމެ ފޯރިއާއިއެކު ކުރިއަށް ގެންދިޔަ އަދި މުޅި ދަތުރުގެވެސް މަޤްޞަދެވެ. އެހެންކަމުން އަހަރެންވެސް އެމީހުންނެކޭ އެއްފަދައިން ފޭރާމަކާނުލައި އެމީހުންނާއި ބައިވެރިވެ، އެމީހުން ޖަހަމުންދިޔަ ބެރަށް ފައިހަމަކޮށް ނަށަމުން ގެންދިޔައީމެވެ.

މި ހާލެއްގައި ގަޑިއިރެއް ފާއިތުވި ފަހުން، ބާބަކިއު ހަދުމަށްޓަކައި ކުޅިވަރު މެދުކަނޑާލިއެވެ. މިގޮތުން ދަތުރުގެ ނަގާ ކިޔާ އެކެއްކަމަށްވާ ޢަލީ މާލެއިން ގެނައި މަސްތައް ހިފައިގެން މަސްކަނޑަށް ގޮނޑުދޮށަށް ދިޔައެވެ. އަދި މުޝްރަފް އާއި ނާއިލް ވެސް އޭނާއާއެކު ދިޔައެވެ. ދަނޑިވަޅުގެ ބޭނުން ހިފައި ދެން ތިބި ބައިވެރިން ކޯޅި ކޯޅިވަރަށް މަޖާކުރަމުންދާތަން ފެނެއެވެ. ކުއްލިއަކަށް “މަ މަރައިފި”އޭ ގޮވަމުން ދުވަމުން ތެޅެމުން އެއްކަލަ މަސް ހިފައިގެންދިޔަ ކުދިންތައް އަތުވެއްޖެއެވެ. ކިހިނެއްތޯވީ އެހުމުން، މާނޭވާ ލަމުން ވާހަކަ ދެއްކީ މުޝްރަފް އެވެ. “މޫދުގައި ފުރޭތައެއްް” ވަރަަށް ބިރުންހުރެ އޭނަ ބުނެލިއެވެ. “ފުރަތަމަ އިވުނީ ފިތް ކަނޑައިގެންދާވަރުގެ އަޑު ފައްގަނޑެއް، ދެން ހަމަ ކުއްލިއަކަށް މޫދު އެބަ އޮތް ރެދަން ލައި ދިއްލިފަ” އޭނަ ކިޔައިދިނެވެ. “މަ ހުވާ، ހިނގާ އަވަށަށް ދާން.” އެއާ ވިއްދައިފައި ބިރުންހުރެ އޭނަ ބުނެލިއެވެ.

ޗޮކެއް ކަނޑާލަމުން އަހަރެން ބުނީމެވެ. “ތި ވާނީ ހީވި ގޮތަކަށެވެ”. “ނޫނެކޭ އަހަރެމެން ތިން މީހުނަށް ވެސް ފެނުނޭ. ހީވި ގޮތެއް ނޫން އެއީ.” ޢަލީ ވާހަކަ ފެށިއެވެ. ” ފެނުނީ ކަޅުކުލައިގެ ދުންގަނޑެއް، ޒާތެއްގެ ސޫރައަކަށް ހުރީ،” އޭނަ ބުންޏެވެ. ހިޔަންޏެއްގެ ސިފައިގައި ހުރި އެ ކަޅު ދުންގަނޑަށް ބަލަން ހުއްޓާ އެ ސޫރަ ދިގުވާން ފެށި ކަމަށް ވެސް އޭނަ ކިޔައިދިނެވެ. ފަލަވާން ވެސް ވި ކަމަށް ވެއެވެ. ޢަލީގެ ވާހަކަތަކުން މުޅީތަން ހަމަހިމޭންވިއެވެ. އެންމެންގެ މޫނުމަތިން ހާސްކަމާއި ބިރުގަނެފައިވާ ކަމުގެ ކުލަވަރު ދައްކާލިއެވެ.

އިރުކޮޅެއް ފަހެވެ. ގަނޑުވެފައި ތިބި އަހަރެމެން ފިތްކަނޑުވާލީ ޝައިހާ ބުނި އެއްޗަކުންނެވެ. “އެހެރީ ކޯއްޗެއް؟ ބަލާބަލަ!” އެވެ. އިނގިލީގެ އިޝާރާތުން އޭނާ ދެއްކީ މޫދާ ދިމާލުން އަރާހުރި ކަލުކުލައިގެ މަހުލޫގެކެވެ. ބޮޑު ދެލޯ އަނގުރު އަލިފާންފަދައެވެ. އިސާހިތަކު މުޅި ހިސާބުގައި ފަރުހިކި ވަހުން އެއްވަސް ކޮށްލިއެވެ. ހަމަ އެހިނދުކޮޅުގައިހެން ކަންފަތަށް އުނދަގޫ ބާރު އަޑެއް އިވިގަތެވެ. “ﷲ އަކްބަރު” އެންމެން އެކީހެން ކަންފަތުގައި އަތްއެޅިތަނާ އަހަރެންނަށް ހޭލެވިއްޖެއެވެ. އޭރު މުޅި މީހާ ވަނީ ދާހިއްލާ ފޯވެފައެވެ. ނަސީބެއްތާއެވެ. އެއީ ހުވަފެނެކެވެ. ބިރުން ހަލާކު ނުވީ ކިރިޔާއެވެ. ހޭލެވުނު އިރުވެސް ޑަންޑަން ލާފައި ހިތްތެޅެއެވެ. 5 މަސްކުރިން ފެނުނު މި ހުވަފެނަކީ ހަމަ އަސްލުވެސް ކޮލެޖު ދަތުރަކު ރަށަކަށް ދާން އޮތް ދުވަހުގެ ކުރީ ދުވަހުގެ ރޭ ފެނުނު ހުވަފެނެކެވެ. އެކަމަކު، އަސްލު ދަތުރުގައި އަހަރެމެން ދިޔައީ ރޭ ކުރާ ގޮތަކަށް ނޫނެވެ. އެހެން ނޫންނަމަ އެ ދަތުރު ދާކަށް މަށަކަށް ހަމަ ލާހިކެއް ނޫނެވެ. ފިނޑިއެކޭ ހީވެދާނެެވެ. އެކަމަކު “އައި ރިއަލީ ޑޯންޓް ކޭއާރ” އެވެ.