ތަދުވާ ހިތެއްގެ ވޭނުން އުމުރަށް އުޅެން މަވީހޭ.. (2)

‎އިރު އަރައިގެން އައި ވަގުތެވެ. އިރުގެ ދޯދިތައް ކަނޑުގެ ސަތަހައިގައި ފެތުރިފައިވިއެވެ. ކާޅާއި ކޮވެލީގެ އަޑު މުޅި ފަޒާ ތެރޭގައި ހެނދުނުގެ މިއުޒިކެއް ފަދައިން އިވި އިވި ހުއްޓެވެ. ގޮނޑުދޮށަށް ބީއްސަމުން ދިޔަ މަޑު ރާޅުތައް އެ މިއުޒިކަށް އިތުރު ފުރިހަމަ ކަމެއް ގެނުވާ ހާލުގައެވެ. އެމަންޒަރުތައް ބަލަން ރަށުގެ ފުއްޓަރު ފަރާތުގައި ލީޒާ ހުރީ އާޝޯޚު ވެފައެވެ. އެއްވެސް ހުރަހެއް ނެތި އިރުގެ ރަންރީނދޫ ދޯދިތައް އޭނާގެ މޫނަށް އެޅިފައި ވެއެވެ. މަޑު ވައިރޯޅިތައް އެއްވެސް އިޒުނައަކާއި ނުލާ ގޮސް އެމޫނުގައި ބީހެމުން ދިޔައިރު ލީޒާ ހުރީ ލުއި ހިނިތުން ވުމެއްގައި ދެލޯ މެރިފއިވާ ހާލުގައެވެ.
‎ އުމުރުން 18 އަހަރުގެ ލީޒާ އަކީ އިރުއަރާ މަންޒަރާއި އިރުއޮއްސޭ މަންޒަރު އަދި ރޭގަނޑު ވެއްޖެނަމަ ތަރިތަކާއި ހަނދުގެ ޖާދުވީ ކުލަތައް ބަލަން ވަރަށް ޝައުޤުވެރިކަން ހުންނަ ކުއްޖެކެވެ. މިޒަމާނުގެ ކުދިން އެބުނާ ކަހަލަ “ނޭޗަރ ލަވަރ” އެކެވެ. އެހާމެ “އިމޯޝަނަލް” ކުއްޖެއް ވެސް މެއެވެ. ވާރޭ ކޮޅެއް ވެހިލައިފިނަމަ ތެމިނުލާ ހުންނަން ވެސް ލީޒާ އަށް އުނދަގޫ ވެއެވެ. ތެމިނުލެވޭނަމަ އަސްކަނިން ފައިބާ ފެނާ ކުޅެލަން ވެސް ލީޒާ ބޭނުން ވާނެއެވެ. އެކުގައި އުޅޭ ރައްޓެހިން މިފަދަ ސިފަތަކާ ހުރެ ލީޒާއަށް “ހީރޯއިން” އޭ ކިޔާ ހަދައެވެ.

“ހޭ ހީރޯއިން” ފެންނަމުން ދިޔަ ގުދުރަތީ ރީތި މަންޒަރުގެ މަސްތުގަ ޖެހިފައި ހުރި ލީޒާ ސިއްސައިގެން ދިޔައީ ފަހަތުން މީހަކު ގޮވާލި އަޑު އިވުމުންނެވެ. “އަންނާކަށް ނުވޭ އަދި” ފަހަތަށް ބަލާލަމުން ޖަވާބުގައި އޭނާ ވާހަކަ ދެއްކީ މޫނު މައްޗަށް ފޫހިކަމުގެ އަސަރުތައް ގެންނަމުނެވެ. އަދި ދެ ބުމަ ގޮށް ޖަހާލާފައި ތުން އަނބުރާލަމުން ބުންޏެވެ. “ތޫ އަންނަންދެން އިރު ނާރައެއް ނުހުންނާނެ ދޯ. މާ ނިދިގަދަ ވީމަ އެއްވެސް ކަމެއް ނުވާނެ” ލީޒާ ވާހަކަ ދެއްކީ އޭނާގެ އެންމެ ގާތް ރަހުމަތްތެރިޔާ އާ އެވެ. ތޫބާ އާއެވެ.

‎ތޫބާ އާއި ލީޒާގެ އުޅުން އުޑާއި ބިން ހައި ތަފާތެވެ. ލީޒާ އާއި ޚިލާފަށް ތޫބާއަކީ ކަންކަމުގައި ޖަޒްބާތަށް ވުރެ ބުއްދި އާއި ވިސްނުން އިސްކުރާ ވަރަށް “ޕްރެކްޓިކަލް މައިންޑް” އެއްގެ ވެރިއެކެވެ. ދެކުދިން ވެސް އުޅެ ބޮޑުވަމުން އައީ އެކުއެކީގައެވެ. މިޒާޖާއި އުޅުން ކިތަންމެ ތަފާތު ވިޔަސް އެދެމެދުގައި ވަނީ ވަރަށް ގާތް ރަހުމަތްތެރި ކަމެކެވެ. އެކަކު އަނެކެއްގެ އެހީއާ ނުލާ އެއްވެސް ކަމެއް ނުވާ ކަހަލަ އެވެ.

“ލިޒް ޕްލީޒް ޑޯންޓް ގެޓް ސްޓާރޓެޑް. ސަންރައިޒް ބަލަން އަންނަން ވެގެން މިއަދު ވަރަށް އަވަހަށް ހޭލައިގެން މި އައީ” ލީޒާގެ އަނގައިން އެހެން އެއްޗެކޭ ނުބުނެވެނިސް ތޫބާ އޭނާގެ ވާހަކަ ފެށިއެވެ. “މިގަޑީގަ ދެން ލެކްޗަރ ދޭން ނޫޅި. އަހަރެން އެބެއް ވަރަށް ބޮޑު ވާހަކަ އެއް ބުނަން ވެފަ” ތޫބާ ފެށީ މުޅިން އެހެން ވާހަކަ އެކެވެ. “ކިޔާބަ ކިޔާބަ” ގޮނޑުދޮށުގައި ހުރި ގަލެެއްގެ މަތީގައި ހަމަޖެހިލަމުން ލީޒާ ބުންޏެވެ.