އެވަރު ކަމެއް ހިނގާފާނެ

މިއަދަކީ ވަރަށް ޚާއްޞަ ދުވަހެކެެވެ. އެހެންކަމުން މިރޭ ވަރަށް ޚާއްޞަ ޖަލްސާއެއް ބޭއްވުމަށް ވަނީ ހަމަޖެހިފައެވެ. މި ޖަލްސާގައި ބައިވެރިވުމަށް އަޅުގަނޑަށް ވެސް ދަޢުވަތުދިނެވެ.  ޖަލްސާއަށް ދިއުމަށް ތައްޔާރުވުމުގެ ގޮތުން އަޅުގަނޑު ބާޒާރަށް ދިޔައީމެވެ. ބާޒާރަށް ގޮސް ގަމީހަކާ ފަޓުލޫނެއް ގަތުމަށް ފަހު އެއާ ގުޅޭ ޓައީއެއް ވެސް ގަތީމެވެ. ބާޒާރުކޮށް ނިންމުމަށް ފަހު އަޅުގަނޑު ދިޔައީ ގެއަށެވެ.

އަޅުގަނޑު ގެއަށް އައިއިރު މެންދުރުގެ ކެއުން ވަނީ ތައްޔާރު ކޮށްފައެވެ. އޭރު އަޅުގަނޑުގެ ބަނޑުން އަޑުކިޔާލަކިޔާލާ ހުއްޓެވެ. އެހެންވެ، ކެއުމަށްޓަކައި އަޅުގަނޑު އަވަސްވެގަތީމެވެ. ކާން އިންދާ ކޮއްކޮ އައިސް އަޅުގަނޑަށް މަލެއް ދިއްކޮށްލިއެވެ.
ކޮއްކޮ ދެރަވެދާނެތީވެ، އަޅުގަނޑު ކެއުމަށް ބޭނުން ކުރި އުލާއި ސަމުސާ ތަށީގެ އެއްކައިރީގައި ބޭއްވުމަށް ފަހު، ކޮއްކޮ ދިން މަލުގައި ހިފީމެވެ. އެ މަލުގެ ވަސް ބެލުމަށް ކޮއްކޮ އެދުމުން، އެ މާ އަޅުގަނޑުގެ ނޭފަތާއި ގާތްކޮށްލީމެވެ.
ނަމަވެސް ރޯގާ ޖެހި ނޭފަތް ބެދިފައިވުމުން، އަޅުގަނޑަކަށް އެ މަލުގެ ވަހެއް ނޭނގުނެވެ. ކޮއްކޮ ދެރަވެދާނެތީވެ، އެ މަލުގައި ވަރަށް މީރުވަހެއް ދުވާ ވާހަކަ ކޮއްކޮ ގާތުގައި ބުނެ ކޮއްކޮ ހައްދާލާފައި ކެއުމައިގެން ކުރިޔަށްދިއައީމެވެ.

ކެއުމުން އަވަދިވުމުން، އަޅުގަނޑު ގަސްތުކޮށްލީ ނިދާލުމަށެވެ. ކޮޓަރިއަށް ވަދެ، ގަމީސް ބޭލުމަށް ފަހު ހަމަޖެހިލައިގެން އޮށޯވެ ހަށިގަނޑު ދަމާލީމެވެ. ހަމަ އޮށޯތުމާއެކު އެއޮއް އައި ގަދަ ނިންޖާއި ހެދި ހިތް އެދުނީ ހަމަ ގަދައަށް ނިދާލާށެވެ.

“ހުސޭނާ… ހުސޭނާ….. ހުސޭނާ…………” އަޅުގަނޑަށް ހޭލެވުނީ މާމަ އަޅުގަނޑަށް ގޮވާ އަޑުއިވުމުންނެވެ. އަވަހަށް މާމައަށް ޖަވާބު ދިނީމެވެ. “އޯތް މާމާ”. އާޅުގަނޑު ދެން ނަޒަރު ހިންގާލީ ފާރުގައި ހަރުކޮށްފައި ހުރި ގަޑިއަށެވެ. އަސްތާ ކަމަކުދާކަށް ނެތެވެ. އެ ގަޑިން ރޭގަނޑު އަށެއް ޖަހައި ބޮޑުވީއެވެ. 8:30 ގައި ޖަލްސާ ފެށޭނެއެވެ. ކަރަންޓުޖެހުނީމައި ވާގޮތަށް މުޅި މީހާއަށް ތެޅިގަނެވުނެވެ. އަޅުގަނޑު އަވަސްވެގަތީ ފެންވަރާށެވެ. ކުއްލިޔަކަށް ހަނދާންވީ އަޅުގަނޑުގެ ސެންޓުފުޅި ހުސްވެފައިވާކަމެވެ. އެހެނަސް ދެން ސެންޓުފުޅިއެއް ގަންނަން ދާކަށް ވަގުތެއް ނެތެވެ. އެެހެންވެ، މާމަ ގާތުގައި ސެންޓުފުޅިއެއް ގަތުމަށް އެދުނީމެވެ. ފައިސާ ދިނުމުން ފިހާރައަށް ދާން މާމަ ހިނގައިގަތެވެ.

ފެންވެރުމަށް ފަހު އަވަސްއަރުވާލައިގެން ތައްޔާރުވެ ނިމެން ގާތްވިތަނާހެން، މާމަ އައިސް ގެއަށްވަދެ އަޅުގަނޑާއި ވާހަކަ ދެއްކިއެވެ. “ދަރިފުޅުގެ ސެނޓުފުޅި މާމަގެ ކޮޓަރީގައި ހުރި މޭޒުމަތީގައި ބާއްވާފައި އޮންނާނެ…” އަޅުގަނޑު ތައްޔާރުވުމަށް ފަހު މާމަގެ ކޮޓަރިއަށް ވަނީމެވެ. އެތާގައި ހުރި ސުވިޗަކުން ބޮކި ދިއްލީމެވެ. ދިއްލުނީ ނިދާބޮތްކެވެ. އެކަމަކު އަވަސް ކުރަންވެގެން ހުދުބޮކި ނުދިއްލާ ސެންޓުފުޅި ނެގުމަށް އަވަސްވެގަތީމެވެ. ކޮޓަރީގެ އަލި ފަނޑުކަމުން މާ ބޮޑަކަށް އެތާގައި ހުރި ތަކެއްޗެއް ނުފެނުނެވެ. ނަމަވެސް ވަރަށް ފަސޭހައިން މޭޒުމަތިން ފުޅިއެއްގައި އަތްޖެހުނެވެ. “އަނނ.. މި ވާނީ ސެންޓުފުޅިއަށް.. މިތަން އަނދިރިކަމުން ވެސް މީތި ހޯދަން އެހާ އިރު ނަގާ ވިއްޔަ….” ގަޑިޖެހެން ގާތްވެފައި ވާތީވެ، ގަޔަށް ސެންޓުޖެހުމަށް ފަހު ނުކުމެ ސައިކަލަށް އަރާ ޖަލްސާއަށް ދިއުމަށް ނައްޓައިލީމެވެ.

އަޅުގަނޑު ޖަލްސާއަށް ހާޒިރުވުމުން އަޅުގަނޑުގެ ކައިރީގައި ތިބި މީހުން އަޅުގަނޑާއި ދިމާއަށް ބަލަންފެށިއެވެ. އެ މީހުން އެ ގޮތަށް ބަލާތީވެ، ހިތާހިތުން އަޅުގަނޑަށް ބުނެވުނެވެ. “ކީއްވެބާ އެންމެން އެ ބަލަނީ… ގައިމު ގަޑިއެއް ވެސް ނުޖެހޭ އަދި…” އެ މީހުން އަޅުގަނޑާ ދިމާއަށް ބަލާތީވެ، އަޅުގަނޑު ވަރަށް ލަދުގަތެވެ. އަދި އިތުރަށް ލަދުގަތީ، އަންހެން ކުދިންތައް ވެސް ބަލަބަލާފައި ހޭތީއެވެ. އެ ތަނުން ފިލާނީއޭ ވެސް ހިތަށްއެރިއެވެ. އެކަމަކު އެ ކަން މާ ބޮޑު ކަމަކަށް ނުހަދާ އެތާގައި ރީއްޗަށް އިނީމެވެ.

ޖަލްސާ ނިމުމުން ގެއަށް އައިސް މާމަގެ ކޮޓަރީގެ މޭޒުމަތީގައި އޮތް ސެންޓުފުޅި ނެގުމަށް، އެ ކޮޓަރިއަށް ވަދެވުނު އިރު މާމަ އޮތީ ނިދާފައެވެ. އެހެންވެ ހުދު ބޮކި ދިއްލާކަށް ނުކެރުނެވެ. މޭޒު މަތިން އެއްކަލަ ސެެންޓުފުޅި އަތުޖެހުނީ ވަރަށް ހާލުންނެވެ. ސެނޓުފުޅި ނެގުމަށް ފަހު އަޅުގަނޑުގެ ކޮޓަރިއަށް ވަދެ ބޮކި ދިއްލާލީމެވެ. “އަސްތާ…. މީ ކޯއްޗެއް…” އަޅުގަނޑުގެ އަތުގައި އޮތީ “ސެލްޓެކްސް” ފުޅިއެކެވެ.

ޖެހިގެން އައި ދުވަހުގެ ހެނދުނު މާމަގެ ކޮޓަރިއަށް ވަދެ ރަނގަޅަށް ބަލާލި އިރު، އެތާ ތަންކޮޅެއް ބިތްދޮށުގައި ކޮތަޅަކަށް ލާފައި ސެންޓުފުޅިއެއް އޮތެވެ. ހިތަށް އެރިއެވެ. އެވަރު ކަމެއް ހިނގާފާނެއެވެ.

(ނިމުނީ)