ފިނި ބުރު

އުޑު މަތި ސާފު ރީތި ދުވަހެކެވެ. ހަލަބޮލި މާލޭގެ މަގުމަތިން “ޕީއް…ޕީއްް..” އަޑު ކެނޑިގެން ނުދެއެވެ.

އާދައިގެ މަތިން މިއަދުވެސްް އަހަރެން ތައްޔާރު ވެލީ ހަވީރު ފިންޏަށް ބުރެއް ޖަހާލުމަށް ދާށެވެ. ފެންވަރައި ރީތިވެލީމެވެ. އަހަރެން ހުރީ، ނޫކުލައިގެ އަތްދިހު ގަމީހަކާއި ފިއްތި ޖިންސް (ސްކިނީ) އެއް ލައިގެންނެވެ. އަތުގައި އަޅާފައި އޮތް ސްމާޓް ވޮޓްޗް ފޯނާ ކަނެެކްޓްކޮށްލީމެވެ. ބެލްޓް ރަނގަޅަށް ބާރު ކުރުމަށްފަހު ހިނގައި ގަތީމެވެ. އަދި ހަރުގަނޑުގައި އިން ފެހި ކުލައިގެ ބޫޓަށް އަރާލީ ވަރަށް ހިތްހަމަޖެހިގެންނެވެ.

ޖީބުގައި ގޭގެ ތަޅުދަނޑި އޮތްތޯ ޔަޤީން ކުރުމަށްފަހު، ނިކުމެ ދޮރުތަޅުލައި މިސްރާބު ޖެހީ އާރޓިފިޝަލް ބީޗާ ދިމާލަށެވެ. ހިނގަމުން ދަނިކޮށް އިވުނު އަޑަކާއި އެކު ސިއްސައިގެން ގޮސް ބަލާލެވުނީ އަޑު އައި ދިމާލަށްށެވެ. ސުބުހާނަ ﷲ އެވެ. އެއޮތީ ދެ ސައިކު މުޑިއަރާފައެވެ. ހިތަށް އެރިއެވެ. ހުންނާނީ ރަނގަޅަށް ރޯދަ ކުރުވެފައެވެ. ތަންކޮޅެއް މަޑުން ބަލަލައި ލައިގެން އުޅޭނަމަ ތިކަހަލަ ހާދިސާތަށް މަދުވާނެއެވެ. ދުއްވަން ވަނީވެސް ރޮދީގަ ވިއްޔާއެ. މުޑިނޭރީއާ ދެރަތާއެވެ.

އަނެއްކާވެސް ހިނގަމުން ދިޔައީމެވެ. ލޮނުޒިޔާރަތް މަގު ނިމޭ ހިސާބުން މީހަކު ކިނބިއްސެއް އަޅާލި އަޑު އިވުނެވެ. އަދި އެވަޤުތު އެމީހާ ބުނެލިއެވެ. “ޝުކުރިއްޔާ ރައީސް ޔާމީން” މަ ގާތަށް ފުރަތަމަ އައީ ރުޅިއެވެ. ހެއްދެވި ފަރާތަށް ހަމްދު ނުކޮށް އެހެން މިހަކަށް ޝުކުރު އަދާކުރީއެވެ. ކުޑަކޮށް ހިނިވެސްއައެވެ. ދެރަވެސް ވިއެވެ.

ހިނގުން ކުރިއަށް ގެންދިޔައީމެވެ. ނިއު ޕޯޓް ބްރިޑްޖް ވިއުއާއި އަރާހަމަވުމުން، ކުޑަ އިރުކޮޅަކު ބްރިޖް ބަލާލަން މަޑުކޮށް ލީމެވެ. ދެން ދިޔައީ ސީދާ އާރޓިފިޝަލް ބީޗަށެވެ. އެތަނުން ފެނުނު މަންޒަރުން ހިތަށް އެރިއެވެ މި އަންހެންވެރިން ފަހަތު ޖީބަށް ފޯނު މި ޖަހަނީ “ކޮން ރަލެއް ބޮއެގެން” ބާއެވެ؟ އެހެން ތިއްބާ ފަހަތުން އައިސް މީހަކު ފޯނު ޖަހައިގަތީމަ ދެން ފަށާނީ ރޯންށެވެ.

މި ހިޔާލުގަަައި އިންދާ، އުރީދޫއިން މެސެޖެއް އައިއްސިއެވެ. މެސެޖް ކިޔާފައި ވަރަށް ހިނިއައެވެ. “އުރިދޫއިން މިއަދު ކެއްކީ ހަވާދުލީބިސް” އަޖައިބެކެވެ. މިފަހަރު ހަވާދުލީބިސް ވެސް ކެއްކީއެވެ. ހިތަށް އެރިއެވެ. ކުކުޅު ބިހުގައި ހަވާދުލާފައި ފެނު ކެއްކީ ތޯއްޗެކެވެ. ވަރަށް ހިނި އައެވެ.

މިހެން ހިޔާލުގައި ހުއްޓާ އިރު އޮއްސުނެވެ. އަވަހަށް އެންމެ ކައިރީގައި ހުރި މިސްކިތަށް ގޮސް މިސްކިތުން ރޯދަ ވީއްލާ، ނަމާދުކޮށްލައިގެން އަހަރެން ދިޔައ ނިއު ޕޯޓް ބްރިޑްޖް ވިއު ކައިރި “ޗެޓްޓަައިމް” އަށް ކޮފީއެއް ބޯށެވެ. ކޮފީ ނިންމާލާފައި ގެޔަށް ދާން މިސްރާބު ޖެހީމެވެ.

ބުރުޒު މަގާ އަރާ ހަމަވެއްޖެއެވެ. އަހަރެންގެ ކަންފަތުގައި ހީވަނީ ހޮނު ގުގުރި ޖަހާހެނެވެ. މަގުގައި ޓްރެފިކްގައި ޖެހިފައި އެތަށް ވެހިކަލްއެއް އޮތެެއް ކަމަކު މިދެން ބޮޑުވަރެވެ. ކިތަންމެ ވަރަށް ބަރުގޮނު އެޅިޔަސް ކުރިމަތީ އޮންނަ އެއްޗެއް އުދުއްސައި ގަންނާނީކީ ނޫނިއްޔާއެވެ.

އަރާފަ ހުރި ރުޅީގައި ބާރު ސްޕީޑްގައި ގަލޮޅު މަދަރުސާ ކުރިމަތިން ގޮސް ލޮނު ޒިޔާރަތް މަގަށް އަރާ، ފިހާރަ އަކުން ރާސްޓަސްއެއް ކުރީ ޑާޓާ ޕެކޭޖެެއް ނަގާށެވެ. ގޭގައި ވައިފައި ކެނޑިފަައި ހުރީމައެވެ. ކިތަންމެ ކުޑަވަޤުތު ކޮޅަކަށްވެސް ނެޓް ނެތިއްޔާ މަގޭ ލައިފް ބަރުބާދުވީއެވެ.

ގެއަށް ގޮސް މިއަދު ހިނގާދިޔަ ކަންކަން “ފިނި ބުރު”ގެ ނަމުގައި ވާހަކައެއް ސިފައިގައި ލިޔެ އެސްފިޔަ.ކޮމްއަށް ޕަބްލިޝްކޮށްލީމެވެ. ދެން އަވަހަށް ކޮމެންޓް ކުރާށެވެ. ނެގެޓިވް ކޮމެންޓް ކުރާ މީހުންދެކެ ވަރަށް ލޯބިވެއެވެ. (ނިމުނީ)