އުއްމީދު……..

މިހާރު އެހެރަ މެންދުރު ވިއެވެ. ހެނދުނު އޮފީހަށް އައިގޮތަށް އަދި މި އުޅެނީ ނޭވާލާނެ ވަގުތެއް ވެސް ނުލިބިގެން ނެވެ. މިހާރު ބަނޑުހައި ވެގެން މީހާ ތުރުތުރު އަޅަން ފަށައިފިއެވެ. ފޯނުވެސް މިއަދު ހީވަނީ މޮޔަވެގެން އުޅޭހެންނެވެ. އާނފަހެ ސިކުންތަކު އެއް ފަހަރު އެބަ ރޮއެގަނެއެވެ. އޮފީހުގެ ކޮންމެ މީހަކުވެސް ކަމަކު ބޭނުންވީމަ އެ ގުޅަނީ މަށަށެވެ. ހީވަނީ މަމީ ކުރާނެ ކަމެއްނެތިގެން އުޅޭ މީހެއްހެންނެވެ. ކޮއްކޮ ވެސް ހީވަނީ މޮޔަވެގެން އުޅޭހެންނެވެ. އަދި މިއޮތީ ނިންމަން އޮތްހާ މަސައްކަތެވެ. ބޭންކަށް ގޮސް ޗެކުތައްވެސް ހަވާލު ކުރަން އެބަޖެހެއެވެ! ބިޑަށް ވެސް ދާން އެބަ ޖެހެ އެވެ! ނުވިތާކަށް ކޮއްކޮ ސެލޫނަށްވެސް ގެންދަން ޖެހޭނެ އެވެ. އެހެންނޫނީ މިރޭ ކާން ލިބޭނެ ކަމެއްވެސް ނޭނގެއެވެ. ބޯ ހަލާކުން ހަލާކެވެ. މިއަދުގެ ޕުރެކްޓިހަށްވެސް ނުދެވޭނެ އެވެ.

އަނެއްކާވެސް ކޮއްކޮ އެ ގުޅަނީ އެވެ. އޮފީހަށް އައި ފަހުން ފަންސާހަކަށް ފަހަރު ގުޅާފިއެވެ. އޮފީސް މީހުން ވެސް އެވަރަށް އެބަ ގުޅައެވެ. ވަނީ ވެސް އެހެންތާ އެވެ! އަހަރެން މަސައްކަތް ކުރަނީ އަމިއްލަ ކުންފުންޏެއް ގައެވެ. އެވެސް ބޮޑުބޭބެ ގެ ދޮށީ ފިރިހެން ދަރީ ގެ އޮފީހުގައެވެ. އެވެސް ވަރެއްގެ މީހެކެވެ. އޮފީހުގައި މަސައްކަތްކުރަނީ ހުސް ތިމާގެ މީހުންނެވެ. އެ މީހުން ކުރަން ޖެހޭ މަސައްކަތްތައް ވެސް ހަވާލު ކުރަނީ އަހަންނަށް ށެވެ. އޮފީސް މަސައްކަތުގެ އިތުރުން އެމީހުން ގެ އަމިއްލަ ކަންތައްތައް ކުރެންވެސް އަހަންނާ ހަވާލު ކުރެއެވެ. އެ މީހުން ބުނުމުން ނުކޮށްދީ އެއްވެސް ނުވެއެވެ.

އަހަންނަކީ މަންމަ އާއި ބައްޕަ ގެ ތިން ދަރިން ގެ ތެރެއިން ހަމައެކަނި ހުރި ފިރިހެން ދަރިއެވެ.އެހެންކަމުން އެ މީހުން ގެ ކަންތައްތައް ވެސް ކޮށްދޭންޖެހެނީ އަހަންނާއެވެ. ބަލިވެގެން މާލެ އަޔަސް ހޮސްޕިޓަލަށް ގެންދަން ޖެހެނީ އަހަންނަށެވެ. ރަށަށް އެއްޗެއް ފޮނުވަންޖެހުނަސް ފޮނުވަންޖެހެނީ ވެސް މަށަށެވެ. އަހަރެން ކިޔަވަން އުޅުނު އިރު ވެސް އުޅުނީ މިހާލުގައި އެވެ.ރަށުން އޯލެވެލް ހެދުމަށް ފަހު މާލެ އާއި ސީ.އެޗް.އެސް.ސީ އިން އޭލެވެލް ހަދާށެވެ. ކިޔެވުމަށް ވުރެ ބޮޑަށް ޖެހުނީ މީހުން ގެ ކަންތައްތައް ކޮށްދޭ ށެވެ. އެހެންކަމުން އޯލެވެލްގައި ލިބުނު މޮޅު ނަތީޖާއެއް އޭލެވެލް ގަ އެއް ނުލިބުނެވެ.

އަހަރެން އޭލެވެލް ގައި ކިޔަވަމުން އައި އިރު ވެސް އެއްވަނަ ޑިވިޝަންގެ ކުލަބަކަށް އަހަރެން ކުޅުނީ މެވެ. ނަމަވެސް އުޅެން ޖެހުނުލެއް ބުރަ ކަމުން ރަށު ގައި ކުޅުނުހާ މޮޅަކަށް ނުކުޅެވުނެވެ. އެހެންވެ ގިނައިން ހުންނަންޖެހުނާ ބެންޗުގައެވެ.

އަހަރެން އޭލެވެލް ނިންމިތާ އަދި މިވީ އެންމެ އަހަރެކެވެ. ނަމަވެސް އޮފީހު ގައި އުޅެން ޖެހެނީ ތަޖުރިބާކާރެއް ހެންނެވެ. އަހަރެން މާލެ ގައި މި މަސައްކަތް ކުރަނީ ހަމަ އެންމެ ސަބަބަކަށްޓަކައި އެވެ. އެއީ އަހަރެން އެންމެ ކުޑަ އިރުން ސުރެ ދެކެމުން އައި ހުވަފެން ހަގީގަތަކަށް ހެދުމަށްޓަކައި އެވެ. ރާއްޖޭގެ ޤައުމީ ފުޓްބޯޅަ ޓީމަށް ކުޅުމުގެ ހުވަފެން ހަގީގަތަކަށް ހެދުމަށްޓަކައި އެވެ. ހުރިހާ ކަމަކަށް ކެތްކޮށްގެން ވެސް މި ހުންނަނީ އެހެންވެއެވެ.  އުއްމީދަކީ ކޮންމެ ވެސް އެއް ދުވަހަކުން އަހަރެން ގެ ހުވަފެން ހަގީގަތަކަށް ވުމެވެ.

(ނިމުނީ)