ސިއްރު 1

އިރުއިރުކޮޅާ މީހެއްގެ ރުއިމުގެ އަޑު އިވެއެވެ. އެއަށްފަހު ކޮންމެވެސް ބަލި މީހަކު ގެންދާތަން ފެނެއެވެ. ބައެއްފަހަރަށް އެންބިއުލާންސް އެލާމް އަޅާ އަޑުވެސް އިވެއެވެ. ޑޮކްޓަރުންނާއި ނަރުހުން އެކި ކަންކަމުގައި ޙަރަކާތްތެރިވަމުން ދިޔައެވެ. ބައެއް ޑޮކްޓަރުން ހާސްކަމާއިއެކުއެވެ. އަދި އަނެއްބައި ޑޮކްޓަރުން މަޑުމަޑުން ނިކަން ހަމަޖެހިލައިގެންވެސް އުޅޭތަންވެސް ފެނެއެވެ. އެހެންނަމަވެސް ދޭތެރެއަކުން ނަރުހަކު ނިކަން ބާރަށް ދުވެލައިފައިވެސް ގޮސްފާނެއެވެ. އަދި އިސާހިތަކު ނިކަން އަޑުގަދަވާ ފަހުރުވެސް އާދެއެވެ. މުޅިންވެސް ތަފާތު މީހުންނެވެ. ކުޑަކުދިންނާއި ބޮޑެތި މީހުންނެވެ. ޒުވާނުންނާއި ކުޑަކުދިންނެވެ. އަހަރެންވެސް މިއިނީ އަހަރެންގެ އެންމެ ގާތް މިތުރު އާހިލް އާއި އެކުއެވެ. އިމަޖެންސީ ރޫމް ކައިރީގައެވެ. ބައެއް މީހުން ހިތަށް އަރައިފާނެއެވެ. ސްކޫލް ގަޑީގައި އޭޑީކޭ ހޮސްޕިޓަލުގައި ކީއްކުރާ ކުދިންނެއް ބާއެވެ؟

އާނއެކެވެ. އަހަރެމެން ސްކޫލް ޔުނީފޯމުގައި މިތަނަށް އަންނަން މިޖެހުނީ އަހަރެމެންގެ އެކުވެރިޔާގެ ޙާލަތަށް އެހީވުމުގެ ގޮތުންނެވެ. ސްކޫލް މީހުންނަށް ނޭނގޭނެ ހެންނެވެ. ފިލައިގެންނެވެ. ސްކޫލުވެސް މުހިންމެވެ. އަހަރެންގެ މަތީ ސާނަވީ ކިޔެވުމުގެ އެންމެ ފަހު އަހަރުކަމުން އެންމެ ކްލާހެއްވެސް ދޫކޮށްލާކަށް ބޭނުމެއް ނޫނެވެ. ނަމަވެސް ކުރާނީ ކީއްހެއްޔެވެ؟ އެއީ ފުރަތަމަ ދުވަހުއްސުރެ އެކުއްޖެއް ފެނުމުން އާދަޔާ ޚިލާފު އިޙުސާސެއް އަހަންނަށް ކުރުވާ އަހަރެންގެ ގާތް އެކުވެރިޔާ އާޔާއެވެ. އޭނާގެ ޙާލު ފެނިފައި އަހަންނަށާއި އާހިލް އަށް މިތަނަށް ނައިސް ނުތިބެވުނީއެވެ.

ހޮސްޕިޓަލުގެ ގޮނޑިއެއްގައި އިށީނދެލައިގެން މަޑުމަޑުން އަހަރެން އިނީމެވެ. ނަމެވެސް އަހަރެންގެ ހިތަށް ކުޑަވެސް ހަމަޖެހުމެއް ނުލިބެއެވެ. ސިކުނޑިއަކަށް ކުޑަވެސް ލުއްޔެއް ނުލިބެއެވެ. ވިސްނެނީއެވެ. އާޔާ އާއި މެދުއެވެ. މިގޮތުން ވިސްނަމުން ގޮސް މީގެ ގަޑިއެއް ހާއިރު ކުރިން ހިނގާދިޔަ ހާދިސާއަށް އަހަންނަށް ފީނެން ފެށުނެވެ.

****

އާދައިގެ މަތިން އަހަންނާއި އާހިލް އިންޓަރވަލް ގަޑީގައި ކެންޓީނަށް ދިޔައީމެވެ. އެއިރު އަދި އާޔާ ނާންނާތީ، އަހަރެމެންވެސް އެއްވެސް އެއްޗެއް ނުގަނެ ސްކޫލުގައި ހުރި ބެންޗެއްގައި ތިބީއެވެ. އިރުކޮޅެއްނުވެ އާޔާ އަންނަތަން ފެނުނެވެ. ” ސޮރީ.. ދިވެހި ގަޑި މިއަދު ތަންކޮޅެއް ލަހުން ނިންމާލީމަ ލަސްވީ.. އާނ، އަދި ހަނދާން ނެތުނިއްޔޭ.. ބުނީމެއްނު ދޯ އަޔާން އާއި އާހިލްއަށް އާޔާގެ މަންމަމެންގެ ފޮޓޮއެއް ދައްކާނަމޭ.. މިއަދު ގެނައީމޭ އެ ފޮޓޯ.. މަޑުކޮށްލައްޗޭ، އަންނާނަން.. ” މިހެން ބުނެ އާޔާ އެނބުރި ދުވެލައިފައި އޭނާގެ ކްލާހާއި ދިމާލަށް މިސްރާބުޖެހިއެވެ. އާޔާ ކިޔައިދީފައިވާ ގޮތުން އޭނާގެ މަންމައާއި ބައްޕަ އޭނާ ތުއްތުއިރު ނިޔާވީއެވެ. އެހެންކަމުން އޭނާ އުޅުނީ ކުޑަކުދިންގެ ހިޔާގައެވެ. އާއިލާ މީހަކު އަޅާ ނުލީއެވެ. ދުވަސްކޮޅެއްފަހުން އެހެން ދެމަފިރިއަކު އޭނާ ގެންދިޔައީއެވެ. މިހާރުވެސް އޭނާ އުޅެނީ އެމީހުންގެ ގާތުގައެވެ. އޭނާ ބަލަނީ އެއީ އޭނާގެ މައިންބަފައިންގެ ގޮތުގައެވެ. ކޮންމެއަކަސް އާޔާގެ ދުލުން އެވާހަކަތައް ކިޔައިދިންއިރު އަހަރެމެން ތިބީ ފެންކަޅިވެފައެވެ.

ކުއްލިޔަކަށް އަހަރެން ސިހިގެން ދިޔައީ އަންހެން ކުއްޖެއްގެ ތޫލި ހަޅޭކުގެ އަޑު އަހަރެންގެ ކަންފަތާއި ހަމައަށް ފޯރުމުންނެވެ. ޔަގީނުންވެސް އެއީ އާޔާ ނޫން އިތުރު އެހެން ކުއްޖެއް ނޫނެވެ. އަހަންނަށާއި އާހިލް އަށް ލިބުނު ހައިރާންކަމާއި ސިހުމާއިއެކު އަޑު އައި ދިމާލެއް ނޭނގިގެން ތިބީއެވެ. ކުއްލިއަކަށް ފެނުނީ ގިނަ އަދަދެއްގެ ދަރިވަރުންނާއި ބައެއް ސްކޫލް މުވައްޒަފުންވެސް ސްކޫލުގެ ސިޑިއަކާއި ދިމާލަށް ދާތަނެވެ. އަހަންނާއި އާހިލްވެސް އެދިމާލަށް ދުއްވައިގަތީމެވެ. އަދިވެސް އަހަރެމެންގެ ޙައިރާންކަން ނުފިލައެވެ.

(ނުނިމޭ)

ނޯޓް: މިއީ މި ސައިޓަށް އަޅުގަނޑު ލިޔާ ފުރަތަމަ ވާހަކަ ކަމުން ކިޔުންތެރިން މި ވާހަކަ ކިޔުމަށްފަހު ކޮމެންޓްކުރަމުން ގެންދިޔުން އެދެމެވެ. ކިޔުންތެރިންގެ ޚިޔާލަކީ އަޅުގަނޑު ލިޔާ ވާހަކަތައް އިތުރު ހަރުފަތަކަށް ގެންދިޔުމަށް ވަރަށް މުހިއްމު އެއްޗެކެވެ. އަދި ވާހަކައިގައިވާ މައްސަލަތައްވެސް ފާހަގަވެ، ދެވަނަ ފަހަރަށް އެ ކުށްތައް ރަނގަޅުކުރަން އަޅުގަނޑަށް ލިބޭ ވަރަށް ބޮޑު ހިތްވަރެކެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.