ގެއްލިދިޔަ ހަޔާތް…..7

ރޭޝަމް ދާން އުޅޭ ތަން ޒާހިދަށް އެނގޭކަށް ރޭޝަމް އެއްވެސް ހާލެއްގަ ބޭނުމެއްނުވެއެވެ. އެގޮތަށް ވެއްޖެއްޔާ އެއީ ރޭޝަމްއަށް އަދި މިންހާއަށްވެސް ބޮޑު މުސީބާތަކާ ކުރިމަތިލާން ޖެހިދާނެ ކަމަކަށް ވާތީއެވެ.

5 މިނިޓް ފާއިތުވެގެން ހިނގައްޖެއެވެ. އިރުއިރުކޮޅާ ރޭޝަމްއަށް ފޯނުގެ ގަޑިއަށް ބެލެމުންދިޔައެވެ. ޒާހިދު އަދިވެސް އިނީ ފިހާރައިގެ ބޭރުގައެވެ. ރޭޝަމްގެ އަތް ފައި ފިނިވަމުންދިޔައެވެ. ކުއްލިއަކަށް ފޯނު ރިންގުވާންފެށިއެވެ. ސިހިފައި ރޭޝަމް ފޯނަށް ބަލާލިއެވެ. ފޯނަށް ގުޅަމުންދިޔައީ މިންހާއެވެ. އަވަސް ނަޒަރަކުން ރޭޝަމް ބޭރަށް ބަލާލިއެވެ. މިފަހަރު ޒާހިދެއް ފެންނާކަށް ނެތެވެ. ފުން ނޭވާއެއް ބޭރުކޮށްލަމުން ރޭޝަމް ކުރިއަށް ފިޔަވަޅެއް އެޅިއެވެ. ކުރިމަތިވެދާނެ ނުރައްކަލަކަށް ތައްޔާރުވެހުރެއެވެ. ފިހާރައިގެ ދޮރާ ތަންކޮޅެއް ގާތް ވެލަމުން ރޭޝަމް ބޭރަށް ނަޒަރު ހިންގާލިއެވެ. އެއާއެކު ޒާހިދު ފެނުމުން ރޭޝަމްއަށް ސިހިފައި ފަހަތަށް ޖެހެވުނެވެ. ޒާހިދު އިނީ ކޮންމެވެސް މީހަކާ ވާހަކަދައްކާށެވެ. ނަސީބު ދިމާކުރިގޮތުން ޒާހިދު އިނީ ފިހާރައިގެ ދޮރާ ދިމާލަށް ފުރަގަސްދީގެންނެވެ. ފުރުސަތުގެ ބޭނުންހިފާ، ރޭޝަމް އަވަސް އަވަހަށް ފިހާރައިން ނިކުތެވެ. އަދި ޖެހިގެން އޮތް ގޯޅިގަނޑުތެރެއަށް ދުއްވައިގަތެވެ .

އައ.ޖީ.އެމް.އެޗާ ހަމައަށް ދެވުނުއިރު ރޭޝަމްއަށް މާނޭވާ ލެވެމުންދިޔައެވެ. އެވަގުތު އަނެއްކާވެސް ފޯނު ރިންގުވާންފެށިއެވެ. “ހަލޯ.. މިންހާ ކޮންތާކު؟ އެތާނގަ އަހަރެން މިހިރީ“ ގަނެފައިވާ ބިރެއްގެ ސަބަބުން ރޭޝަމްއަށް ވާހަކަދެއްކުނީ ވަރަށް ވެސް އުނދަގުލުންނެވެ. “އާދެބަ އެތެރެއަށް ވަދެގެން މުސްކުޅި، ބަލި މީހުން ބާއްވާ ވޯޑަށް“ މިންހާގެ އަޑުގައި މަޔޫސްކަމެއް އެކުލެވިފައިވިއެވެ.

ރޭޝަމް ލަސްކުރުމެއްނެތި އަވަހަށް އެތެރެއަށް ވަދެގެން ދިޔައެވެ. އެތާގެ މަސައްކަތު މީހުން ކައިރީ އަހައިގެން ވަރަށް ވަރުން ރޭޝަމް މިންހާ ބުނި ވޯޑަށް ގޮސް ވަނެވެ. އެއާއެކު ރޭޝަމްގެ ހިތަށް އުނދަގުވާންފެށިއެވެ. މުސްކުޅި އުމުރުފުރައިގެ ބަލި މީހުންތައް ފެނުމުން ރޭޝަމް މަންމަ މަތިން ހަނދާންވިއެވެ. މަންމަ މުސްކުޅިވީ ދުވަހު އެކަނިކޮށްލާފަ މާލެ އައިސް އުޅެން ޖެހުމުން ރޭޝަމްގެ ހިތަށް ތަދުވިއެވެ. ވަށައިގެން މާޔޫސްކަމާއެކު ރޭޝަމްއަށް ބަލާލެވުނެވެ.

ކުއްލިއަކަށް މީހަކު ރޭޝަމްގެ އަތުގައި ހިފާ ދަމައިގަތެވެ. އަދި އެވޯޑުގެ ދެވަނަ އެނދު ކައިރިއަށް ރޭޝަމް ގެންގޮސް ވަށައިގެން ފޮތިގަނޑު ދަމާލިއެވެ. “ސިއްސައިގެންނޭ ދިޔައީ…މިންހާ ކީއްވެ މިތަނަށް ތިގެނައީ؟“ ރޭޝަމް މިންހާގެ މޫނަށް ބަލާލިއެވެ. އެދެލޮލުން ފާޅުވަމުން ދިޔައީ ވޭނާއި ހިތްދަތިކަމެވެ. އެ މައުސޫމު ހިތް އެތައް އަނިޔާތަކެއް ތަހައްމަލު ކުރަމުންދާ ކަހަލައެވެ. “އަހަރެންނަށް ބައްދަލުކުރަން އެހެން ތަނަކަށް ދެވެން ނެތީމަ މިތަނަށް ރޭޝަމް މިގެނައީ… ރޭޝަމް ކުރަން ބޭނުން ސުވާލެއް އޮތިއްޔާ އަވަހަށް ކުރޭ..“ މިންހާ މަޑުމަޑުން ވާހަކަދެއްކިއެވެ. “އަހަރެން ކޮށްލަން ބޭނުންވަނީ ހަމަ އެންމެ ސުވާލެއް … މިންހާ އެކޮޓަރިއަށް ވަންނަން ޖެހުނު ސަބަބެއް ބުނެދީފާނަންތަ؟“ ރޭޝަމް ހުރީ މިންހާގެ ޖަވާބަކަށް ކެތްމަދުވެފައެވެ.

މިންހާ މޮޅިވެރިކަމާއެކު ރޭޝަމްއަށް ބަލާލިއެވެ.އަދި އެނދުގައި އޮތް މުސްކުޅި ފިރިހެންމީހާގެ އަތުގައި ހިފާލިއެވެ. އެމީހާ އޮތީ ނިދިފައެވެ. “އަހަރެންނަށް މަޖުބޫރުވީ އެކޮޓަރިއަށް ވަންނަން..“ މިންހާގެ އަޑު ބެދުނެވެ. އެދެލޮލުން ހޯސްލާފައި ކަރުނަ އޮހެރެންފެށިއެވެ. ރޭޝަމް މިންހާގެ ކޮނޑުމަތީގައި އަތް ބާއްވާލިއެވެ. މިންހާ ގިސްލަމުން ކަރުނަތައް ފޮހެލިއެވެ.

”އަހަރެންނާ އަހަރެންގެ ބައްޕަ އުޅެމުން އައީ ވަރަށް އާދައިގެ، ދަތި ދިރިއުޅުމެއް.. އެކަމަކު ލާރި އޮހޭ ގެތަކަށްވުރެ މާ ލޯބި، މާ ގިނަ އުފާތައް އަހަރުމެންގެ ގޭތެރޭގައިވި… އެއީ އަހަރެންގެ ބައްޕަ އަހަރެންނަށްޓަކާ ވަމުންދިޔަ ޤުރުބާނީ.. މަންމަ ނިޔާވުމަށްފަހު ބައްޕަ އަހަރެންގެ ހުރިހާ ކަމެއް ކޮށްދިނީ.. އެހެނަސް އަހަރުމެންގެ އެއުފާވެރި،ކުޑަ ކުޑަ ދުނިޔެއަށް ކަޅުފޮއި ރެއެއްގެ ހިޔަނި އެޅުނީ ނުވެސް އެނގި ތިއްބާ… އެއީ ވަރަށް ވިއްސާރަ ރެއެއް… ބައްޕަ މަސައްކަތް ނިންމާފަ ގެއަށް އައި މަގުމަތީގަ ހިނގި އެކްސިޑެންޓެއްގައި ބައްޕަގެ އެއްފައި ބުރިވީ… އަދި ބައްޕަގެ ސިކުނޑިއަށް ބޮޑެތި ގެއްލުންތަކެއް ލިބުނީ… ޑޮކްޓަރު ބުނީ ބައްޕަގެ އޮޕަރޭޝަނަށް ލައްކައެއްހާ ރުފިޔާ ބޭނުންވެޔޭ… އެދުވަހު އަހަރެންނަށް އިންތިހާއަށް އަހަރެންގެ ނިކަމެތިކަމާ ބަދުނަސީބުކަން އިހުސާސްވި… އަހަރެންނަށްޓަކާ ޖާނާއި މާލުން ގުރުބާންވަމުން އައި ބައްޕަގެ ފުރާނަ ސަލާމަތް ކުރުމަށް އަހަރެން ނުކުޅެދިގެންވި… ލޮލުން ކަރުނަ އޮހެރޭ ހާލު އަހަރެން ލާރި ހޯދަން މަސައްކަތްކުރިން… އަހަރެން ސަރުކާރުންވެސް އެހީއަށް އެދުނިން… އެކަމަކު އަހަންނަކަށް ނުލިބުނު އެއްބާރުލުމެއް… އެކަމަކުވެސް އުއްމީދަކަށް ބަދަލެއް ނައި… އަހަރެން އެމީހެއް ކައިރިއަށް ސަލާންޖަހަން ނުދާ އެއްވެސް މުއްސަންޖަކު މުޅި މި މާލޭގައި ނުހުންނާނޭ ބުންޏަސް ދޮގަކަށް ނުވާނެ… އަހަރެން ވަރަށް އާދޭސް ވެސް ކުރިން… އެކަމަކު އެހީގެ އަތެއް ދިއްކޮށްލާނެ ހަމަ އެކަކުވެސް ނުވި… އެދުވަހު އަހަރެންނާ ދިމާވި ރައްޓެއްސަކު ބުނީ އެންމެ އަވަހަށް އެހާ ގިނަ ލާރި ލިބޭނެ ހަމަ އެކަނި ގޮތަކީ ދެތިން ރެއަކު ފިރިހެނެއްގެ އެނދުމަތި ފަޅުފިލުވައިދިނުމޭ… ވަގުތުން އަހަރެން އިންކާރުކުރިން… އެކަމަކު އަހަރެންގެ މަޖުބޫރީ ހާލަތު އަހަރެން އެމަގުން ހިނގުމަށް ގަދަކަމުން ކޮއްޕާ ފޮނުވާލީ… މިބުނި ރައްޓެހި ކުއްޖާ ދިން ނަންބަރަކަށް އަހަރެން ގުޅީމަ އަންހެން ކުއްޖަކު އަހަރެން ގޮވައިގެން ތިގެއަށް އެއްރެއެއްގެ ދަންވަރު ދިޔައީ..“ މިންހާއަށް ގިސްލެވެންފެށުނެވެ.

ރޭޝަމްގެ ލޮލުންވެސް ހުއްޓުމެއްނެތި ކަރުން އޮހެރެންފެށިއެވެ. “ދެން އެތަނުން ނުނިކުމެވުނީ ކީއްވެ؟ އެމީހުން މިންހާ އެތާގަ ހައްޔަރުކުރީ ކީއްވެ؟“ ރޭޝަމް ހުރީ އިތުރަށް އޮޅުންފިލުވަން ބޭނުންވެފައެވެ. “އެރެއަކީ އަހަރެންގެ ހަޔާތުގެ ހުޅުކޮޅު ނިވުނު ރޭ… ބިރުންހުރެ ނަމަވެސް އަހަރެން އެކޮޓަރިއަށް ވަނީ ހަމައެކަނި އަހަރެންގެ ބައްޕަގެ ފުރާނައަށްޓަކާ… ރަނގަޅުގޮތުގަ މީހުންގެ އެހީ ހޯދަން އުޅުމުން އެކަން ނުވުމުން އަހަރެން ގޯސް މީހުންގެ އެހީ ހޯދަން ޖެހުނީ.. އެކަމަކު އެމަގުން އަހަރެންނަށް ސަލާމަތް ނުވެވޭނެކަން އަހަރެންނަކަށް އޭރަކު ނޭނގޭ.. އެރޭ އަހަރެންގެ އިއްފަތްތެރިކަން އަހަރެން ނުވެސް ދަންނަ، މީހަކު ފޭރިގަންނަން އަހަރެން ދިނިން…. އެކަމަކު އެއަނިޔާވެރި ޖަލުގެ ކެހިވެރިންތައް ބޭނުމެއްނުވި އަހަރެންގެ ގައިގެ އެންމެ މަސްކޮޅެއްވެސް ނޮޅާނުލާ ދޫކޮށްލާކަށް… އޭގެތެރެއިން އެކަކު ބުނި..“ އެމަންޖެ ވަރަށް ރީތި… ވަރަށް އިންކަމް ޖައްސާލެވޭނެ އެމަންޖެ މިތާނގަ ބެހެއްޓިއްޔާ..“ އެމީހުން އެންމެން އެކަމަށް އެއްބަސްވި ނަމަވެސް އަހަރެންގެ ޒަމީރު އެކަމަކަށް އެއްބަހެއް ނުވި.. އަހަރެން ކަނޑައެޅިގެން އެކަމަށް އިންކާރުކުރިން… އަހަރެންގެ ހާލަތު ކިޔައިދީ އާދޭސްވެސް ކުރިން.. އެހެނަސް އެމީހުން ބޭނުމެއްނުވި އަހަރެން އިންކާރުކުރުމުން އަހަރެން އެތަނުން ފޮނުވާލާކަށް.. އެމީހުންނަށް ބިރު އޮތް އަހަރެން ސަލާމަތްވެއްޖެއްޔާ އެމީހުން ބެދޭނެ ކަމަށް..“ މިންހާގެ އަޑު ބެދުނެވެ. ރޭޝަމް މަޑުމަޑުން މިންހާގެ ބޮލުގައި ފިރުމާލިއެވެ. “ދެން އެކަމުގެ ތެރެއަށް ނުވަންނާތި.. އަހަރެން މިންހާއަށް އެހީވެދޭނަން.. އަހަރެންނަކީ މިންހާގެ ދައްތައެއް ކަމަށް ދެކޭ..“ ރޭޝަމް ހިނިތުންވެލިއެވެ. މިންހާ އުއްމީދުން ފުރިގެންވާ ނަޒަރަކުން ރޭޝަމްއަށް ބަލާލިއެވެ.

ޓެކްސީއެއް ނަގައިގެން ގެއާ ހަމައަށް ދެވުނުއިރު 3 ޖަހާ ބޮޑުވެއްޖެއެވެ. ތެޅިތެޅި އޮތް ހިތަކާއެކު ރޭޝަމް ތަޅުދަނޑި ނަގާ ދޮރު ހުޅުވާލިއެވެ. މުޅި ގޭތެރޭގައި ވަނީ ފަނޑު އަލިކަމެކެވެ. އަވަސް އަވަހަށް އެތެރެއަށް ވަދެ ދޮރު ތަޅުލުމަށްފަހު ރޭޝަމް ކޮޓަރިއާ ދިމާލަށް ހިނގައިގަތެވެ. އެވަގުތު ކޮންމެވެސް މީހަކު ރޭޝަމްގެ އަތުގައި ބާރަށް ހިފާލިއެވެ. ހަޅޭއްލަވައިގަންނަން ރޭޝަމް އަނގަހުޅުވާލިތަނާ އެމީހަކު ރޭޝަމްގެ އަނގަމަތީގައި އަތް އެޅިއެވެ. އަދި ފާރުގައި ރޭޝަމް ލަތްކޮށްލިއެވެ. ރޭޝަމްގެ ހިތް ބާރަށް ތެޅެމުންދިޔައެވެ. އެމީހަކު ރޭޝަމްއާ ގާތްވެލިއެވެ .އޭނަގެ ހޫނު ނޭވާ ރޭޝަމްއަށް އިހުސާސްވަމުންދިޔައެވެ. “ކަލެއޭ ހުރިހާ ނުބައެއް ތިހަދަނީ…“ ރުޅިވެރި ރާގެއްގައި އޭނަ ވާހަކަދެއްކިއެވެ.އެއާއެކު ބިރުންގޮސް ރޭޝަމްގެ ހިތް ނުހުއްޓުނީ ކިރިޔާއެވެ. އެއީ ޒާހިދުގެ އަޑުކަން ރޭޝަމްއަށް ދަނެގަންނާކަށް އުނދަގުލެއް ނުވިއެވެ. “އަހަރެންނޭ.؟؟؟ އަހަރެން ކީއްތަ ކު…ރީ؟“ ރޭޝަމްގެ އަޑު ތުރުތުރުއަޅައިގަތެވެ. “ބަލަ ކަލޭ ވަނީމެއްނު އެކޮޓަރިއަށް..“ ޒާހިދުގެ އަޑު ގަދަވެގެންދިޔައެވެ. ރޭޝަމްގެ ދެލޯ ފެންކަޅިވިއެވެ. ބިރުންގޮސް ގިސްލެވެންފެށުނެވެ. ޒާހިދު ފުން ނަޒަރަކުން ރޭޝަމްގެ ދެލޮލަށް ބަލާލިއެވެ.“ މީ އެންމެ ފަހުގެ އިންޒާރު.. ދެން ކަލޭ އެކޮޓަރިއާ ދިމާލަށް ބަލާލިޔަސް ތިދެލޯ ކޮނެލާނަން!!!“ ޒާހިދު ބާރު ހިނގުމެއްގައި ގޮސް ކޮޓަރިއަށް ވަނެވެ.

އެތައް އިރެއްވަންދެން ރޭޝަމްއަށް އެހުރެވުނު ފިޔަވަޅު މަތީގައި ހުއްޓި ހުރެވުނެވެ. ޒާހިދުގެ ވާހަކަތަކާ މެދު ވިސްނަން އޮވެ ނިދުނުއިރު 5 ޖަހާ ބޮޑު ވެއްޖެއެވެ.

ހެނދުނު ހޭލެވުމާއެކު ރޭޝަމް އަވަހަށް ކުލާހަށް ދިޔުމަށް ތައްޔާރުވިއެވެ. ކުލާހާ ހަމައަށް ދެވުނުއިރު ހުރިހާ ކުދިން ކުލާހުން ނިކުންނަނީއެވެ. “ކުލާސް ކެންސަލް“ ޔާނާ ރޭޝަމްއާ ދިމާލަށް ބަލާލަމުން ކުރިއަށް ހިނގައިގަތެވެ.

ކުލާސް ކެންސަލް ވުމުން ރޭޝަމް ހުރީ ހިތްހަމްޖެހިފައެވެ. ޓެކްސީއެއް ނެގުމަށްފަހު ރޭޝަމް އަވަސް އަވަހަށް ހޮސްޕިޓަލަށް ދިޔައެވެ. ރޭޝަމް ފެނުމުން މިންހާގެ މޫނުން އުޖާލާކަން ފެނިގެންދިޔައެވެ. އެތައް އިރެއްވަންދެން މިންހާއާ ވާހަކަ ދައްކަން އިނދެފައި ރޭޝަމް ބޭރަށް ނިކުތެވެ.

” ހަލޯ…މަންމާ ކިހިނެއް؟“ ރޭޝަމް ލޯތްބާއެކު ވާހަކަދެއްކިއެވެ.“ދަރިފުޅު މިހާރު ކީއްވެ އެހާ މަދުން ގުޅަނީ؟ އަނެއްކާ ކިޔެވުމުގަ މާ ބުރައީތަ؟“ ނަރީމާ ސުވާލުކުރިއެވެ. “އާނ.. މާ ބުރައީ މިދުވަސްކޮޅު… މަންމަ ކައިރީ ކަމަކު ކިޔަންވެފަ އެބަ އޮތް“ ރޭޝަމް ވިސްނާލިއެވެ. “އަވަހަށް ބުނޭ… ލާރި ބޭނުންވީތަ؟“ ނަރީމާއަށް ހީވާގޮތް ހާމަކުރިއެވެ. “އާނ.. އެކަމަކު އަހަރެންނަކަށް ނޫން… ރައްޓިއްސަކަށް… އޭނަގެ ބައްޕަ ބަލިވެގެން ލާރި ބޭނުންވެގެން.. މަންމަ އަޅެ މޫސަބޭ ކައިރީ ބުނެގެން ސަރުކާރުން އެހީ ލިބޭތޯ ބަލާލަދީބަ… މޫސަބެ މެންނަށް ވަރަށް ފަސޭހައިން ވާނެއެއްނު އެކަންތައް“ ރޭޝަމް ވަރަށް އުއްމީދާއެކު ބުންޏެވެ. “ތީ ވަރަށް ބޮޑު ކަމެއް ދަރިފުޅާ… އެކަމަކު މަންމަ ބުނާނަން މޫސަބެ ކައިރީ.. އިރާދަކުރެއްވިއްޔާ އެކުއްޖާގެ ބައްޕައަށް އަވަސް ޝިފާއެއް ލިބޭނެ“ ނަރީމާ ރޭޝަމްގެ ހިތްހަމަޖައްސައިދެވޭތޯ ބެލިއެވެ.

ކައިގެން ފިލާވަޅުތައް ދަސްކުރަން ރޭޝަމް ސިޓިންގ ރޫމަށް ދިޔައެވެ. އެވަގުތު ޓީވީއިން އަވަސް ޚަބަރެއް ގެނެސްދެމުންދިޔައެވެ. “އަނެއްކާވެސް އަންހެން ކުއްޖަކު ވީނުވީއެއް ނޭނގި ގެއްލިއްޖެ.. މިހާތަނަށް 26 ކުދިންވަނީ ގެއްލިފަ“ އެޚަބަރު އަޑުއިވުމާއެކު ރޭޝަމްގެ ހިތް ބާރަށް ތެޅިގަތެވެ. “17 ޑެޑް، 9 ރިމެއިނިންގ“ ތިންވަނަ ކޮޓަރީގެ ތެރެއިން ފެނުނު ފައިލްތެރޭގައި ލިޔެފައި އޮތް އިބާރާތް ރޭޝަމްއަށް ހިތާ ހިތުން ކިޔާލެވުނެވެ. “މުޅި ޖުމްލަ 26.…އަނެއްކާ ޒާހިދުމެން؟؟؟؟“ ރޭޝަމްގެ ދެލޯ ބޮޑުވެގެންދިޔައެވެ.

“ނޫން.. ނޫން… އެހާ ނުބައި މީހުންވެސް އުޅޭތަ؟؟؟“ ރޭޝަމްއަށް ބޭއިޚްތިޔާރުގައި ބުނެލެވުނެވެ. ރޭޝަމްގެ އަޑަށް ޓީވީ ބަލަން އިން ލީޒާ ދިޔައީ ސިއްސައިގެންނެވެ. ހައިރާންކަމާއެކު ލީޒާ ރޭޝަމްއަށް ބަލަމުންދިޔައެވެ. އޭރުވެސް ރޭޝަމް ހުރީ ގުޑާލަން ވެސް ނޭނގިފައެވެ. އެވަގުތު ގޭތެރެއަށް ވަދެގެން ޒާހިދު އައެވެ. ޓީވީއިން ގެނެސްދެމުންދިޔަ ޚަބަރުގެ އަޑު ކަންފަތުގައި ޖެހުމާއެކު ސިހިފައި ޒާހިދަށް ޓީވީއަށް ބަލާލެވުނެވެ. ޒާހިދުގެ މޫނުމަތިން ކޮންމެވެސް ވަރަކަށް ނުތަނަވަސްވެރިކަން ފާޅުވަމުންދިޔައެވެ.

ކުއްލިއަކަށް ޓީވީއިން އިޝްތިހާރެއް އައެވެ. ރޭޝަމްއަށް ހޭވެރިކަންވީ ދެނެވެ. ލީޒާ އިނީ ޓީވީ ރިމޯޓުގައި ބާރަށްހިފަހައްޓާލައިގެން ފިލްމެއް ބަލަން އިންނަހެން ރޭޝަމްއަށް ބަލަހައްޓައިގެންނެވެ. ޒާހިދު ކޮޓަރިއާ ދިމާލަށްހިނގައިގަތެވެ. ރޭޝަމް ފަސްއެނބުރި ޒާހިދާ ދިމާލަށް ފުން ނަޒަރަކުން ބަލާލިއެވެ. އެވަގުތު ޒާހިދުވެސް ފަސްއެނބުރިރޭޝަމްއަށް ބަލާލިއެވެ. ދެމީހުންގެ ނަޒަރު ދިމާވިއެވެ. “ޖަލުގެ ގޮޅިތަކާ ހަމައަށް ޒާހިދުމެން ދާންޖެހޭ ދުވަސް ވަރަށްކައިރިވެއްޖެ“ ރޭޝަމްއަށް ހިތާ ހިތާ ކިޔާލެވުނެވެ. “ރޭޝަމްއެއް ކަމަކު ނުބައި މަގެއް އިޚްތިޔާރުކުރެވުމުން ނިމުން އަންނާނީވަރަށް ހިތިކޮށް“ ޒާހިދު އަމިއްލަ ނަފްސާ މުހާތަބުކުރަމުން ކޮޓަރިއަށް ވަދެ ބާރަށް ދޮރު ލެއްޕިއެވެ.

އެރޭ އެއްގޮތަކަށްވެސް ރޭޝަމްއަކަށް ފިލާވަޅުތަކަށް ސަމާލުކަމެއް ނުދެވުނެވެ. ރޭޝަމްގެ ސިކުނޑީގައި އެނބުރެމުން ދިޔައީ ހަމަ އެންމެ ސުވާލެކެވެ. “އެހުރިހާ އަންހެން ކުދިން ގެއްލުމުގެ ފަހަތުގައިވަނީ ޒާހިދުމެންބާ؟؟؟“ އެސުވާލުގެ ޖަވާބު ރޭޝަމް ނުހަނު ބޭނުމެވެ. އޭގެ ޖަވާބު ރޭޝަމް ހޯދާނެވެސް މެއެވެ.

” ހަލޯ… ބޭނުން ވަރަށް މުހިއްމު ވާހަކައެއް ދައްކާލަން“ ރޭޝަމް މިންހާއަށް ގުޅާލިއެވެ. “އާދޭ ހޮސްޕިޓަލަށް..“ މިންހާ ފޯނު ކަނޑާލުމާއެކު ރޭޝަމް ގެއިން ނިކުތީ ހޮސްޕިޓަލަށް ދާށެވެ. ރޭގަނޑުގެ ވަގުތުކަމުން މަގުމަތި ވަރަށް ބާރުބޮޑުވެފަ ޕާޓޭންވެސް ގިނައެވެ. ބާރު ހިނގުމެއްގައި ގޮސް ރޭޝަމް ހޮސްޕިޓަލަށް ވަދެގެން ދިޔައެވެ. މިންހާ ހުރި ވޯޑާ ހަމައަށް ދެވުމާއެކު ރޭޝަމްގެ ފިޔަވަޅަށް ހުއްޓުން އެރިއެވެ. އެވޯޑުގެ ބޭރުގައި، ފާރުގައި ލެނގިލައިގެން ހުރެ ރޮމުން އެދަނީ މިންހާ ނޫން ދެވަނަ މީހެއް ނޫނެވެ. ބޭއިޚްތިޔާރުގައި ރޭޝަމްއަށް އެދިމާލަށް ދުއްވައިގަނެވުނެވެ. “ކިހިނެއްވީ ތި ރޮނީ؟؟ ބުނެބަލަ… ކަމެއް ވީތަ؟؟ ބައްޕަ ކޮބާ؟؟؟“ (ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.