ސިއްރުން މިހިތާ ކުޅެނީހޭ (ފަހުބައި)

ޔުއާން ރޮވިފައިވާ އަޑަކުން ހަޅޭލަވައިގެންފައި މިކްޔަންގެ ބޮލުގައި ހިފާގަތެވެ.

********

“އާހް” މިކްޔަންގެ އަގައިން އާހްގެ އަޑު ނިކުތެވެ. ޔާނާ އަވަސް އަވަހަށް ޔުއާންގެ އަތް ނެއްޓުވިއެވެ. “ޔުއާން ހާދަ އަހަރެން ދެކެ ރުޅި އާދެޔޭ. ޔާނާ އަށް ވުރެ މިސޮރުގެ ރުހުން ހޯދަން އަހަރެންނަށް މާއުދަގޫ. ގަޔަށް ބޮލަށް ވިއްޔަ އަރަނީ. މީނައަށް ކަމަކު ނުދޭ އަހަރެން ޔާނާ ގައިގަ ބެހޭކަށް” މިކްޔަން ބޮލުގައި ފިރުމަމުން ބުނެލިއެވެ. ޔާނާ ހީލިއެވެ.

“އަހަރެންނަކަށްވެސް ނޭނގޭ ހަދާނެ ގޮތެއް. މިސޮރު ހަމަ ރުޅިއަންނައިރަށް ވިކާގަންނާނެ.”

“ދެން ފަހުން އޯކޭވާނެ.” މިކްޔަން ބުނެލިއެވެ. “ޔަން. ދެން؟” ޔާނާ އަހާލިއެވެ. “ވެއިޓް” މިކްޔަން ފޯނު ނަގަމުން ބުނެލިއެވެ. އެއަށްފަހު ޒާއިންއަށް ގުޅާލާފައި މިކްޔަން އަދި ޔާނާ އޯކޭވި ވާހަކަ ބުނެލިއެވެ. އަދި ޒާއިންމެން ރީތި ކުރަމުންގެންދިޔަ ބަގީޗާ ރީތި ނުކުރުމަށް ބުންޏެވެ. “ދާނަން މިތާ ހުރެލާފަ” މިކްޔަން މިހެން ބުނެ ފޯނު ބޭއްވިއެވެ. “އާދެބަލަ” މިކްޔަން ގަދަކަމުން ޔުއާން އުރާލާފައި ޔާނާގެ އަތުގައި ހިފައިގެން ގޮސް ބެންޗެއްގައި އިށީއިނެވެ. އޭރު ޔުއާން ރުޅިއައިސްގެން ހަޅޭލަވައި އަޑު އިވެއެވެ.

******

“ޔެސް ޔެސް” ފޯނު ބޭއްވި ޒާއިން ހީވަނީ އުފަލުން އުދުއްސާގަންނަން އުޅޭހެންނެވެ. “ކީއްވީ؟” ލާރާ އަހާލިއެވެ. “އެބަ އަންނަން” ޒާއިން ދުވެލާފަ ގޮސް އެތެރޭގައި ހުރި ނާސިހް މެންނަށް އެހަބަރު ދިނެވެ. އެއަށްފަހު އަނެއްކާވެސް ބޭރަށް ނިކުމެލިއެވެ. އޭރު ލާރާ ހިތް ކުރުހާލާ ނިންމާފައި ތެދުވެ އަތް ފޮޅާ ލުމަށްފަހު އައިސް ޒާއިން ކައިރި ހުއްޓުނެވެ. “ދެން ބުނެބަލަ”

“އައި ލަވް ޔޫ. މެރީ މީ” ޒާއިން ބުނެލިއެވެ. “ޒާއިން މޮޔަވީ؟” ލާރާ އަހާލިއެވެ. “ނޫން ނުވެ. އަހަރެންނަށް ދެން ލާރާއާ ނުލައި ނޫޅެވޭނެ” ޒާއިން ކުއްލިއަކަށް ލާރާގެ މޫނާ މޫނު ގާތްކޮށްލާފައި ކޮލަށް ދޮނެއް ދިނެވެ. ލާރާގެ ދެލޯ ބޮޑުވިއެވެ. ލާރާ އެއްޗެކޭ ބުނަން އަނގަ ހުޅުވާލިތަނާ ޒާއިން ލާރާގެ އަނެއްކޮޅަށް ދޮނެއް ދިނެވެ.

“ޒާއިން ކީއްތިކް” ލާރާގެ ބަސްހުއްޓުނީ ދެން މިކްޔަން ކޮށްލި ކަމަކުންނެވެ. ފުރަތަމަ ލާރާ ޒާއިން ގައިގައި ހިފާ ކޮށްޕާލަން މަސައްކަތް ކުރިއެވެ. ނަމަވެސް ޒާއިން އެކަމާ ހުށިޔާރު ވެގެން ހުރުމުން ލާރާއަށް ކާމިޔާބު ވާގޮތެއް ނުވިއެވެ. ދެތިން ފަހަރު ޒާއިން ކޮށްޕާލުމުންވެސް ކާމިޔާބުވާގޮތް ނުވުމުން އެއްމެފަހުން ޒާއިންގެ އިސްތަށިގަނޑުގައި ހިފާ ލާރާއަށްވެސް އެހަރަކާތުގައި ބައިވެރިވެވުނީއެވެ.

ޒާއިން ދުރުވިއިރު ލާރާ ހުރީ ނޭވާކޮޅަށްދާވަރު ވެފައެވެ. “ޒާއިން މޮޔަވީތަ. އަހަރެން ޒާއިން އާ ދުރަށްދާން އުޅޭވަރަކަށް ތިހެން ހެދީމަ ކިހިނެއްވާނީ؟” ލާރާ އަވަސް އަވަހަށް ނޭވާލަމުން ވާހަކަ ދެއްކިއެވެ. “އަހަރެމެން ނުޖެހޭނޭ ދުރުވާކަށް” ޒާއިން ދަތްތައް ފެންނަވަރަށް ހީލަމުން ބުނެލިއެވެ. “ވަޓް ތިބުނީ ދޮންތަ؟ އޯ މައި ގޯޑް” ލާރާ ދެއަތުން އަނގަ ފޮރުވާލަމުން ބުނެލިއެވެ.

“ސޯ ދެން އިނގޭ ދޯ ވާނެގޮތް.” ލާރާއާ ދިމާލަށް ފިޔަވަޅުއަޅަމުން ޒާއިން ބުނެލިއެވެ. ޒާއިން އަޅާ ކޮންމެފިޔަވަޅަކާއެކީ ލާރާ ފަހަތަށް ފިޔަވަޅެއް އަޅާލަނީ ޒާއިން ބަލަން ހުރިގޮތުންނެވެ. “އަހަރެންގެ މީހެއް ތީ މިހާރު. މިހާރު އަހަރެން ބޭނުން ކަމެއް ކުރެވޭނެ. އައި ކޭން ޓަޗް ޔޫ. އައި ކޭން ކިސް ޔޫ” ޒާއިން ފިޔަވަޅެއް ކުރިއަށް އަޅަމުން ބުނެލިއެވެ. “ޒާއިން އަދި އަދި”

“ސްޓޮޕް” ލާރާ ވާހަކަ ދައްކަ ދައްކަ ހުއްޓަ ޒާއިން ލާރާއާ ދިމާލަށް އަތްދިއްކޮށްލަމުން ބާރަކަށް ބުނެލިއެވެ. ލާރާއަށް ލިބުނު ސިހުމުގައި ހުއްޓެވުނު ގޮތެއްވެސް ނޭނގުނެވެ. ” އަހަރެން ދުވަހަކު ހިޔެއްނުކުރަން އަހަރެންނަށް ލާރާދެކެ ލޯބިވެވިދާނެ ކަމަކަށް. އެހާވަރަށް އެކަކު އަނެއްކަކާ ޖެއްސުން ކުރެވޭ ވިއްޔަ. އެކަމް އަހަރެންނަށް ލޯބިވެވުން. އިނގޭތަ މިވީހާ ދުވަހު އަހަރެންނަށް އިންތިޒާރު ކުރެވުނުވަރެއް. އަހަރެންގެ މުޅި ހިތުގައި ރަސްކަން ކުރަނީ ލާރާ ކަން އިނގޭތަ؟ ހަމަ ތިހިތުގައި ލާރާ ރަސްކަން ތިކުރާފަައިން” ޒާއިން ބިންމައްޗަށް އިޝާރަތް ކުރަމުން ބުނެލިއެވެ. ލާރާ ތިރި ބަލާލިއެވެ. އޭނާއަށް ހުރެވުނީ ދެންމެ ލާރާ އަދި ޒާއިންވެގެން ފިނިފެންމަލުގެ ފިޔަތަކުން ކުރެހި ހިތުގެ ތެރޭގައެވެ.

*******

“ޔާނާ. އަހަރެން ވާހަކަ އެއް ބުނަންތަ؟ އެކަމް ރުޅިނާންނާތި” ޔުއާންއާ ސަކަރާތް ޖަހާލުމަށްފަހު މިކްޔަން ބުނެލިއެވެ. މިހޭދަވި ވަގުތު ކޮޅުގައި ޔުއާން މިކްޔަންއަށް ވަރަށް ގުޅިލާފިއެވެ. ނަމަވެސް ޔާނާގެ ގައިގައި އަތްލަންޏާ އަދިވެސް ޔުއާން ރުޅިއާދެއެވެ. “އަންނާނަން. އަހަރެން ރުޅި އަންނަ ކަހަލަ އެއްޗެއްކަން ޔަގީން ތިއުޅެނީ ބުނަން. އެކަމް ވެސް ބުނެބަލަ” ޔާނާ ބުނެލިއެވެ.

“ޔާނާ ދިޔަފަހުން ވަރަށް ކަންތައް ޗޭންޖް ވެއްޖެ. އަހަރެން ޔާނާ މަތިން ވަރަށް ހަނދާންވި. ޔާނާ އަސްލު ބުނަން މިއުޅެނީ އަހަރެން މިހާރު ސިނގިރޭޓް ބޮމޭ” ވާހަކަ ދުރުދުރުން ފަށަން ހުރިނަމަވެސް މިކްޔަން ސީދާ ޕޮއިންޓަށް ދިޔައެވެ.

“ވަޓް ދަ ހެލް މިކްޔަން” ޔާނާ ކުއްލިއަކަށް ކޮޅަށް ތެދުވިއެވެ. އަދި އެއަށްފަހު ޔުއާން މިކްޔަންއަތުން ނަގަން އުޅުނެވެ. ނަމަވެސް މިފަހަރު ޔުއާން އެނބުރުނީ އަނެއްފަރާތަށެވެ. މިކްޔަން ތުންފިއްތާލާފައި ހީލީ ޔާނާއަށް މަލާމަތް ކޮށްލުމަށެވެ. “ދަރިފުޅު ތީ މަންމަ ކުއްޖެކެއްނު. ބައްޕަ ސިނގިރޭޓްވެސް ބޮއި.. ޗީ ޗީ. ދަރިފުޅު އާދޭ.” ޔުއާންގެ އަތުގައި ހިފާލަމުން ޔާނާ ބުނެލިއެވެ. ނަމަވެސް ޔުއާން މިފަހަރުވެސް ޔާނާގެ އަތުން ރެކިގަތެވެ.

ޔާނާ ފުންނޭވާއެއް ލާފައި އެތަނުން ދާން އުޅުނެވެ. “އޭތް. އަހަރެން ދެން ނުބޯނަމޭ. އަހަރެން ކުރި ކަމެއް ވީމަ ބުނެލީ.” މިކްޔަން ޔާނާގެ އަތުގައި ހިފަހައްޓަމުން ބުނެލިއެވެ. “އެކަމް ޔަން. ކީއްވެ. އާރގް” ޔާނާ ކުޑަކޮށް ހަޅޭ ލަވައިލާފައި މިކްޔަން ކައިރި އިށީއިނެފައި މިކްޔަންގެ ބޮލަށް ދަމާލިއެވެ. “ހަނދާންކުރާތި މީގެ ފަހުން ބޮއިގެން ނުވާނެ”

“އާއު. މިހާރު އިނގިއްޖެ ޔުއާން ދަސްކޮށްގެން މިއުޅެނީ ކާކު ކައިރިންކަން” މިކްޔަން ލާނެތްކަމާއެކީ ބުނެލިއެވެ. ޔާނާ ހުތްވިވަރުން އަވަސް އަވަހަށް މިކްޔަންގެ ބޮލުން ދޫކޮށްލިއެވެ. “ހިނގާ ގެއަށް” ޔާނާ ބުނެލިއެވެ. “ކޮންގެއަށް” މިކްޔަން ކޮށްލީ ސުވާލެކެވެ. “ޑޭޑް ގެ”

“އަހަރެމެން ގެއަކަށް ޗޭންޖެއް ނުވާނަންތަ؟” މިކްޔަން ޔާނާއަށް ބަލާލަމުން ބުނެލިއެވެ. “ސާބަސް އެއްޗެހި ހިފައިގެންނެއްނު” ޔާނާ ހިނިގަނޑަކާއެކީ ބުނެލިއެވެ. މިކްޔަންވެސް އޯހްއޭ ކިޔާ އެހިނިގަނޑުގައި ބައިވެރިވެލިއެވެ. އެއަށް ފަހު އެމީހުން ހިނގައިގަތީ ގެއަށް ދެވޭތޯއެވެ.

*******

“މިކްޔަންމެން ހާދަ ލަހޭ” އާލިމާ ބުނެލީ އާބިދާއަށް ބަލާލަމުންނެވެ. އޭރު ނާސިހް އަދި ޒިޔާދު ހޭވައްޓާލާފައި ދިޔައީ ބޯޅަ މެޗެއް ބަލަމުންނެވެ. “އާން. ލާރާ މެންވެސް ކޮބާ. އަދިވެސް ނުނިމެނީ ކަންނޭނގެ. ހިނގާބަލަ ބަލާލަން” އާބިދާ މިހެން ބުނުމުން އާލިމާ ބޯޖަހާލާފައި ކައިރީގައި އޮތް ރިމޯޓް ނަގައި ޓީވީ ނިއްވާލިއެވެ. އެއާއެކު ޒިޔާދު އަދި ނާސިހްގެ ނަޒަރު ހުއްޓުނީ އާލިމާއަށެވެ. “އާލިމާ. އަޅެ ތީ ކޮންކަމެއް؟”

“ހިނގާ ބޭރު ބަލާލާފައި އަންނަން. މިގެއަށް އައިންސުރެ ޓީވީގަ ޖެހިފަ ތިހިރީ” އާލިމާ ކަޅިއަޅާލަމުން މިހެން ބުނެ އާބިދާގެ އަތުގައި ހިފާ ތެދުވިއެވެ. ނާސިހް ދެފަރާތަށް ބޯހޫރުވާލުމަށްފަހު ތެދުވިއެވެ. ފަހަތުން ޒިޔާދުވެސް ތެދުވިއެވެ.

******

ޒާއިން ފުންނޭވާއެއް ލިއެވެ. އެއަށްފަހު ހިތުގެ ތެރޭގައި ހުރި ލާރާގެ ކައިރިއަށްގޮސް އެއްފައި މައްޗަށް ތިރިވިއެވެ. “އައި ލަވް ޔޫ ސޯ މަޗް ލާރާ. ވިލް ޔޫ މެރީ މީ؟” ޒާއިން އޭނާގެ އަތް ލާރާއަށް ދިމާކޮށްލަމުން ބުނެލިއެވެ. ލާރާ ހިނިތުންވެލާފައި އެ އަތުގައި ހިފާލީ ޒާއިންގެ ލޯބި ބޭނުންވާ ވަރުންނެވެ. ޒާއިން ތެދުވެ ލުތްކެއްޖަހާ ޔާނާ އެއަތުގެ ތެރެއަށް ލިއެވެ.

މަންޒަރު ބަލަން ހުރި އާލިމާ އަދި އާބިދާ ދެލޯބޮޑުކޮށްލާފައި އެކަކުއަނެއްކަކުގެ އަތުގައި ހިފާލިއިރު ނަސިހް އަދި ޒިޔާދު އަށް އަނގަ ހުޅުވާލައިގެން ހުރެވުނީއެވެ. “ދަރިފުޅާ؟” އާލިމާއަށް ގޮވާލެވުނެވެ.

އިވުނު އަޑުން ލާރާ އަދި ޒާއިންއަށް އެކަކު އަނެއްކަކާ ދުރުވެވުނު ގޮތެއްވެސް ނޭނގުނެވެ. އެއްލި ކަޅިއަކުން ދޮރު ބުޑުގައި ހުރި މިކްޔަން އަދި ޔާނާ ލާރާއަށް ފެނުމުން ލާރާގެ މޫނަށް ޖަންބުކުލަ އަރައިގެން ދިޔައެވެ.

“އައި ނިއު އިޓް” ކުއްލިއަކަށް ޔާނާ ބުނެލިއެވެ. “އަހަރެންނަށްވެސް ހީވި” މިކްޔަންވެސް ޔާނާއާ އެއްބާވެލިއެވެ. ލާރާ ގަންލަދުން ދުއްވާ ގަންފައި އެތެރެއަށް ދާން އުޅުނެވެ. ޒާއިން ވެސް ނޫން ކަމަށް ހަދާފައި އެގެއިން ނިކުންނަން އުޅުނެވެ. މިކްޔަން ހުށިޔާރު ކަމާއެކީ ޒާއިން ހިފަހައްޓާލިއިރު އެކޮޅުން ޒިޔާދު ލާރާގެ އަތުގައި ހިފާ ހުއްޓުވިއެވެ. މިކްޔަން ޒާއިން ގޮވައިގެން ގޮސް ޒިޔާދުމެން ކައިރި ހުއްޓުނެވެ. ފަހަތުން ޔާނާ ޔުއާން ގޮވައިގެން ގޮސް ހުއްޓުނެވެ.

“ދަރިފުޅު މެން ހަމަ ސީރިއަސްތަ؟” ޒިޔާދުއަށް އަހާލެވުނެވެ. ނަމަވެސް ޒާއިން އަދި ލާރާކުރެން އެކަކުވެސް ޖަވާބެއް ނުދިނެވެ. “ސީރިއަސް ނަމަ އަވަހަށް ކައިވެނި ކޮށްދެން ކަމަށް. އެކަމް މިހާރު އިނގިއްޖެ ސީރިއަސްނޫން ކަން” ޒިޔާދު ލާނެތްކަމާއެކީ ބުނެލިއެވެ. “ނޫން އަޅުގަނޑު ސީރިއަސް” ލާރާ އަދި ޒާއިންއަށް އެއްފަހަރާ ބުނެލެވުނެވެ. އެއާއެކު އިވުނީ އެއްމެންގެ ހިނިގަނޑުގެ އަޑެވެ.

އެއްމެން ގޭތެރެއަށް ވަދެ ލާރާ އަދި ޒާއިންގެ ކައިވެނީގެ ވާހަކަ ދެއްކިއެވެ. އެއްމެ ފަހުން ކައިވެނި އަންނަމަހު 10 އަކަށް ފާސްކޮށްލިއެވެ. “ޔާނާ ދޭބަ ރެޑީ ވާން. ގެއަަށް ދާން” މިކްޔަން ޔާނާ ކުރެން އެދުނެވެ. ޔާނާ ބޯޖަހާލާފައި ތެދުވަން އުޅުނެވެ.

“ދޮންތަ މަޑުކޮށްލަންވީއެއްނު އަޅުގަނޑު ކައިވެނި ކުރަންދެން މިގޭގަ” ލާރާ ހިނިތުންވެލާފައި ނަމަވެސް އެމޫނުމަތީ ސީރިއަސްކަން ވިއެވެ. “ގެންދާނަން ދޮންބެދައްތަ” ޒާއިން ބުނެލިއެވެ. ލާރާ ކަޅި އަޅާލިއެވެ. “އަހަރެން ބޭނުން ދޮންތަ ހުންނަން. އެކަމް ދެން އޯކޭ ދޯ” ހިނިތުންވެލަމުން ލާރާ ބުނެލިއެވެ. ޔާނާ ލާރާއަށް ބަލާލާފައި ކޮޓަރިއަށް ދިޔައީ ފޮށި ތައްޔާރު ކުރުމަށެވެ. އަތުގައި އިން ޔުއާން އާލިމާއަތަށް ދެމުން މިކްޔަން ވެސް ޔާނާގެ ފަހަތުން ދިޔައެވެ.

“ސޯ ފައިނަލީ ޔޫ އާ ކަމިންގް ހޯމް” އެނދަށް ވެއްޓިގަންނަމުން މިކްޔަން ބުނެލިއެވެ. ޔާނާ ހިނިތުންވެލިއެވެ. “އައި ލަވް ޔޫ. އޭ ކޮބާ އެ ތުވާލި މިހާރު؟” ޔާނާ ލޯބިވާކަމަށް ބުނެފައި އަވަސް އަވަހަށް އަހާލިގޮތުން މިކްޔަން ގާތަށް ހިނިއައެވެ. “އައި ލަވް ޔޫ ޓޫ. ނޭނގެ އަހަރެންނަކަށް” މިކްޔަން މިހެން ބުނުމުން ޔާނާ ކަޅިއަޅާލިއެވެ. “ލާރާ ގަން އާ ތުވާއްޔެއް އޮންނާނެ ކަންނޭގެ. ވަގަށް ގެންދަންވީ” ޔާނާ މިހެން ބުނުމުން މިކްޔަން ދެފަރާތަށް ބޯހޫރުވާލިއެވެ.

ޔާނާ ގޮސް ލާރާގެ ފޮށި ހުޅުވާލީ އާ އެއްޗެހި ލާރާ ބަހައްޓަނީ އޭގައި ކަމަށް ވާތީއެވެ. ފޮށި ހުޅުވާލުމާއެކީ ޔާނާއަށް ފުރަތަމަވެސް ފެނުނީ ރީތި ޑިޒައިނަކަށް އިން ފޮތެކެވެ. އޭގައި ބޮޑުއަކުރުން ޒާއިން ލިޔެފައި އިނެވެ. ޔާނާ ގާތަށް އައީ ލާނެތް ހިންޏެކެވެ. ޔާނާ އެފޮތް ނަގައި މިކްޔަންއަށް ދައްކާލިއެވެ. މިކްޔަންގެ ގާތަށްވެސް އައީ ލާނެތް ހިންޏެކެވެ. ޔާނާ ފޮތް ހުޅުވާލާފައި ކިޔަންފެށިއެވެ.
ވަކި ހިސާބަކަށް ކިޔުންތަނާ ޔާނާގެ ދެލޯ ފެންކަޅިވެގެން ދިޔައެވެ.

*އާއެކެވެ. އަހަރެން ލޯބިވެއެވެ. ޒާއިންދެކެ ވަރަށް ލޯބި ވެއެވެ. އެލޯތްބަށްޓަކައި ކޮންމެފަދަ ކަމެއް ވެސް ކޮށްފާނަމެވެ. ނަމަވެސް އެއަކީ އަހަރެންގެ ލޯބިވާ ދޮންތައެވެ. އަހަރެންގެ ދެވަނަ މަންމައެވެ. އެ ދޮންތަ ދެރަވާނޭ ފަދަ ކަމެއް އަހަރެންނަށް ކުރަން ކެރޭނޭ ހެއްޔެވެ. އަހަރެން ޒާއިން އަށް ނޫނެކޭ ބުނީ ދޮންތައަށް ޓަކައެވެ. ދޮންތައަށް ދޮންތަބެ މަތިން ހަނދާންވާނެ އެއްވެސް ކަމެއް އަހަރެން ކުރާކަށް ބޭނުމެއް ނޫނެވެ*

ޔާނާއަށް ރޮވެން ފެށުނެވެ. ލާރާ އޭނާއަށް ޓަކައި އެވީ ހާދަ ބޮޑު ގުރުބާނީއެކެވެ. އޭނާގެ ލޯބި ދޫކޮށްލީ އެ ހަމަ އަހަރެންނަށްޓަކައެވެ. އަހަރެންގެ ކޮއްކޮ އަހަރެން ދެކެ ކިހާ ލޯބިވޭ ހެއްޔެވެ.

މިކްޔަންއަށް ޔާނާ ރޯތަން ފެނުމުން ފުންމައިގެން ތެދުވެ އެތަނަށް ދިޔައެވެ. ޔާނާ ރޮވިފައި ހުރެ ފޮތް މިކްޔަންއަށް ދިއްކޮށްލިއެވެ. މިކްޔަން ދެބުމަ ގޮށްޖަހައިގެން ހުރެ އެ ކިޔަން ފެށިއެވެ. މިކްޔަންގެ ދެލޯބޮޑުވިއެވެ.

އެމީހުން ކުރިންވެސް އެކަކު އަނެއްކަކު ދެކެ ލޯބިވޭ ހެއްޔެވެ. އަހަރެމެނާ ހެދިން އެހެން ބައެއްގެ ވެސް ދިރިއުޅުން ހަލާކުވި ހެއްޔެވެ.

******

ބޭރުގައި ތިބި މީހުނަށް ހައިރާންކަން ލިބުނީ ޔާނާ ހުސްއަތާ ނިކުތުމުންނެވެ. “ހުސްއަތާ ތަ ދަނީ؟” އާބިދާ އަހާލިއެވެ. “އަހަރެން ދާނީ ލާރާ ކައިވެނި ކުރީމަ” ޔާނާ ބުނެލިއެވެ.

“އޭ ދޮންތަ. އެ އަހަރެން އެހެން ބުނި އެއްޗެއް ނޫނޭ” ލާރާ އަވަސް އަވަހަށް ބުނެލިއެވެ. “އެކަމް ވެސް. ކޮއްކޮ ބޭނުންވަނީ އެގޮތް ވީމަ އަހަރެން ހުންނާނަން.” ޔާނާ ބުނެލިއެވެ. ލާރާ އަށްޓަކައި އަހަރެންނަށް އެވަރުގެ ކަމެއް ނުކުރެވެންވީ ކީއްވެހެއްޔެވެ. މިކްޔަން އެއް އަހަރާ ހަމަސް އަހަރެންގެ އިންތިޒާރުގައި ހުރިއެއެވެ. އަދި އިތުރު މަހަކަށް ވެސް އިންތިޒާރު ކުރެވޭނެ ނޫންހެއްޔެވެ. ޔާނާ މިކްޔަން އަށް ބަލާލިއެވެ. މިކްޔަން ލޯމަރާލާފައި ބޯޖަހާލިއެވެ.

“ތެދެއް އެބުނީ.” މިކްޔަން ބުނެލިއެވެ. މިކްޔަން މިހެން ބުނުމުން ލާރާ ފުންމައިގެން ތެދުވިއެވެ. “ޔޭ” ލާރާ ޔާނާގެ ގައިގައި ބައްދާލިއެވެ. އެދުވަހު މިކްޔަން ދިޔައީ ޔާނާ ކައިރި ކޮންމެ ދުވަހަކު އަންނާނަން ކަމަށް ބުނަމުންނެވެ.

******

ދުވަސްތައް ފާއިތުވެގެން ދިޔައީ ހީވެސް ނުކުރާހާ އަވަހަށެވެ. ކޮންމެ ދުވަހަކު ޔާނާ މެން ގެއަށް މިކްޔަން އައިސް ޔުއާން އަދި ޔާނާއާއި އެކު ވަގުތު ހޭދަކުރެއެވެ. އެކަމުގެ ސަބަބުން މިކްޔަން އަދި ޔުއާންގެ ގުޅުން ވަނީ ހީވެސް ނުކުރާހާ ބޮޑަށް ބަދަހި ވެފައެވެ.

“ގެނޭ ޔުއާން މިރޭ އަހަރެމެންނަށް” ޔާނާގެ އެނދުގައި ޔުއާން ބަނޑުމައްޗަށް ލައިގެން އޮތް މިކްޔަން ބުނެލީ އިސްތިރި ކުރަން ހުރި ޔާނާ އަށެވެ. “ގެންދޭ ހޫމް. އަހަރެންނަށް މާފަސޭހަ އެއްނު” ޔާނާ ބުނެލިއެވެ. “ޔެސް މިރޭ ބައްޕި އާއެކީ ރެޑީ ވާނީ ދޯ” ޔުއާންގެ ކޮލުގައި ކޮއްޓާލަމުން މިކްޔަން ބުނެލިއެވެ. ޔުއާން އަޑެއް ލައްވާލާފައި ހީލިއެވެ. “މީނަ ހިނގަން އުޅޭދޯ މިހާރު”

“ހޫމް. ކުޑަތަންކޮޅަށް ހިނގާލާނެ” ޔާނާ ބުނެލިއެވެ. “ހޫމް ލެޓްސް ގޯ” މިކްޔަން ތެދުވެ ޔުއާން ކޮނޑަށް ލަމުން ބުނެލިއެވެ. އެއާއެކު ޔުއާން ގެ ހިނިގަނޑު އިވިގެން ދިޔައެވެ. “މީނަ އަށް އެއްޗެއް ދޭން ޖެހޭނެ ޕާޓީއަށް ދިޔުމުގެ ކުރިން” ޔާނާ އަވަސް އަވަހަށް އެހެން ބުނެ ގޮސް ބުއްފުޅިއެއް ގިރާލިއެވެ. އެއަށްފަހު އެ މިކްޔަންއަށް ދިނެވެ.

“މިރޭ މީ ހަމައެކަނި ޒާއިންމެންގެ ނައިޓެއް ނޫން އިނގޭ. އަހަރެމެންގެވެސް” މިކްޔަން ދޮރާ ހިސާބަށް ގޮސް އެއްލޯމަރާލަމުން ބުނެލިއެވެ. އެއާއެކު ޔާނާގެ މޫނަށް ޖަންބުކުލަ އަރައިގެން ދިޔައެވެ. މިކްޔަން މަންޒަރު ބަލަން ހުރެފައި ނިކުމެގެން ދިޔައީ ހިނިތުންވެ ހުރެއެވެ. ޔާނާ ދެފަރާތަށް ބޯހޫރުވާލުމަށްފަހު ފާހާނައަށް ވަނީ އަދި ލާރާވެސް ރީތި ކުރުވަން ޖެހޭތީއާ އެއްކޮށެވެ.

******

“ދެން ދޮންތަ ބުނަންވީ. ދޮންތަ އަށް ހަމަ އަހަންނަށް މި ވާވަރު ވިތަ؟ ވަރަށް ހާސްވިތަ؟” މޭކަޕް ކުރުވަން ހުރި ޔާނާއާ ދިމާލަށް ލާރާ ބުނެލިއެވެ. “ހޫމް ވަރަށް ހާސްވި. ތެދުވެބަލަ” ޔާނާ، ލާރާ ކޮޅަށް ނެގިއެވެ. “މާ ޝާ ﷲ” ލާރާ ފުރިހަމަ ކަމުން ޔާނާއަށް ބުނެލެވުނެވެ. ލާފައި ހުރި ހުދު ބޮޑު ވެޑިން ޑްރެސް ލާރާއަށް ވަރަށް ގުޅެއެވެ. މޭމައްޗާއި ފަސްބައިގައި މާތަކެއް ހުރުމުން އެ ހެދުން އިތުރަށް ރީތި ކަމަށް ދައްކައެވެ.

“ދޮންތައަށް ކޮއްކޮ ވަރަށް ހިތުގައި ޖެއްސުންދޯ؟” ޔާނާ މިހެން ބުނުމުން ލާރާ ބަލާލީ ސުވާލުގެ ނަޒަރަކުންނެވެ. “ކޮއްކޮ އެއްފަހަރުވެސް ޒާއިން ދެކެ ލޯބިވާކަން ބުނިނަމަ. ދޮންތަ ވަރަށް ލަދުގަނެއްޖެ ދޮންތައާ ހެދިން ކޮއްކޮމެން ދުރުވީމަ”

“ދޮންތަ ކީކޭ ތިކިޔަނީ. ދޮންތައާ ހެދިން އެއްވެސް ކަމެއް ނުވޭ” ލާރާ ފަހަތަށް އެނބުރި އަވަސް އަވަހަށް ބުނެލިއެވެ. “އަދި ވެސް ކޮއްކޮއަށް ދޮގު ހަދާކަށް ނޭނގޭ ދޯ. ދޮންތަ ކީމޭ ކޮއްކޮގެ ޑައިރީ. ހޫމް ދެން އެވާހަކަ ބާއްވާ. ވީކަމެއް ނުވާކަމަކަށް ނެހެދޭނެ. ދޮންތަ ވަރަށް އުފާވޭ ކޮއްކޮ ދެން އަބަދު ދޮންތައަށް ފެންނަތާ ހުންނާނެތީ” ޔާނާ ބުނެލިއެވެ. “މީ ޓޫ” ލާރާ ޔާނާގެ ގައިގައި ބައްދާލިއެވެ.

“ޑޭޑް” ފަހަތުގައި ހުރި ޒިޔާދު ފެނުމުން ލާރާ ގޮސް ޒިޔާދު ކައިރި ހުއްޓުނެވެ. “މައި ޕްރިންސެސް. ވަރަށް ލޯބި.” ލާރާގެ ކޮނޑުގައި ހިފާލަމުން ޒިޔާދު ބުނެލިއެވެ. “ޕްރިންސެސްއޯ” ފަހަތުގައި ހުރި ޔާނާ ގޮވާލިއެވެ. ލާރާ ކަޅިއަޅާލިއެވެ.

ޒިޔާދު ދެން ނެގީ ކެވެލިކޮޅެކެވެ. “މި ދަރިފުޅުގެ މާމަގެ އެއްޗެއް. ދަރިފުޅުގެ މަންމަ މިގެއަށް އައި ފުރަތަމަ ދުވަހު މާމަ މިދިނީ މަންމައަށް. މަންމަ ނިޔާވުމުން މާމަ ޑޭޑް އަށް މިދީފައި ބުނީ ލާރާ އަށް ލާރާ ކައިވެނި ކުރާ ދުވަހުން ދޭށޯ. މަންމައާއި ލާރާ ވަރަށް ވައްތަރޯ” ލާރާގެ ދެލޯ ފެންކަޅިވިއެވެ.

“މިހާރު އިނގިއްޖެއްނު މާމަ އެއްމެ ލޯބިވަނީ ކާކު ދެކެކަން” ފަހަތުން ޔާނާ އައިސް ލާރާގެ އަތުގައި ހިފާލިއެވެ. ލާރާ ރޮމުން ބޯޖަހާލިއެވެ. އެއަށްފަހު އެ ކެވެލި ކޮޅު ނަގައި އަތުގައި އަޅާލިއެވެ. “ތިއޮއް ހަޑިވީ” ލާރާގެ ލޯހަޑިވުމުން ޔާނާ އަވަހަށް ލާރާ ގެ ލޯރީތިކުރުމަށް އުޅުނެވެ.

“އެއޮއް އައީ ކާރު” ކޮޓަރިއަށް ވަން އާބިދާ ބުނެލިއެވެ. އެއްމެން ދެން އަވަސްވެ ގަތީ ދަރުބާރުގެއަށް ދެވޭތޯއެވެ.

*****

“ހާދަ ލަހޭ އެމީހުން” ދަރުބާރުގޭގެ ދޮރުމަތީ ހުރެ އާލިމާ ބުބުނެލިއެވެ. “ލާރާ އަބަދު ލޭޓްވާނެ.” ކައިރީގައި ހުރި ޒާއިން ބުނެލިއެވެ. އެއްމެން ހީލިއެވެ. އިރުކޮޅެއް ފަހުން އައި ލާރާމެން ފެނި ޒާއިންގެ މޫނު އުޖާލާވެގެން ދިޔައެވެ.

ކާރުން ފޭބި ލާރާ ފެނި ޒާއިންއަށް ބަލަހައްޓައިގެން ހުރެވުނީ ލާރާ ފުރިހަމަ ކަމުންނެވެ. ލާރާ އަށްވެސް ވީ އެވަރެވެ. ލާފައި ހުރި ފެހި ކުލައިގެ ގަމީހަކާއި އެކު ބްރައުން ކުލައިގެ ކޯޓްގައި ޒާއިން ފެންނަލެއް ވަރަށް ފުރިހަމައެވެ.

ޔާނާ ފޭބުމާއެކީ ޔުއާން އުރައިގެން ހުރި މިކްޔަން އެރީ ޔާނާގެ ކުރިމައްޗަށެވެ. މިކްޔަން ލާފައި ހުރީ ފެހި ކުލަ ގަމީހެކެވެ. ޔުއާން އޭގެ އިތުރުން ޒާއިން ފަދައިން ކޯޓެއް ލާފައި ހުއްޓެވެ. “މައި ބޯއިސް. ރީތިކަން” ޔާނާ ޔުއާން އުރާލަމުން ބުނެލިއެވެ. “މަންމިވެސް ދޯ” ފެހިކުލައިގެ ދިގުހެދުމަކާއެކީ ބްރައުން ކުލައިގެ ޝޯލްއެއް އަޅާފައި ހުރި ޔާނާއާ ދިމާލަށް މިކްޔަން ބުނެލިއެވެ.

“ތިހެން މާފޮޅުވަން ނުހުރެ ހިނގާ” ޔާނާ އައިސް ލާރާގެ އަތުގައި ހިފާލަމުން ބުނެލިއެވެ. ލާރާއަށް ހަމަހޭވެރިކަން ވުމުން ޔާނާއާ އެކީ އަވަހަށް އެތެރެއަށް ވަންނަން ދިޔައެވެ.

ކައިވެނި ކުރެވި ޕާޓީވެސް ނިމިގެންދިޔައީ އެއްމެން ވެސް މަޖާ ކުރުމުގައެވެ. ނަޝްވާ އަދި ޒިޔާން ވެސް އެޕާޓީގައި ބައިވެރިވީ އުފަލާއެކީއެވެ. ޕާޓީ ތެރޭގައި މިކްޔަންއަށް ނަޒީހް ފެނުނެވެ. ނަޒީހް ކުރެވުނު ކުށަށް މާފަށް އެދުނެވެ. މިކްޔަން ހެޔޮ ހިތުން މާފު ކުރީ މިހާރު އޭނާއަށް ހުރިހާ އުފަލެއް ލިބިފައި ވާތީއެވެ.

*******

ކޮޓަރިއަށް ވަން ލާރާ ފުންނޭވާއެއް ދޫކޮށްލިއެވެ. “ވަރުބަލިވެގެން ހަލާކުވެއްޖެ” ފަހަތަށް އެނބުރި ޒާއިންއާ ކުރިމަތި ލުމަށްފަހު ދެއުކުޅުގައި އަތް ވިއްދާލަމުން ލާރާ ބުނެލިއެވެ.

“ވަރުބަލި ވިޔަސް އަހަރެން ބޭނުންކަމެއް ކުރީމަ ނިދޭނީ” ލާރާ އަށް ޒާއިން އެއުޅެނީ އޭނާގެ ގައިގައި ބައްދާލަންކަން އިނގުނެވެ. އެހެންވެ ފަޔަށް ބާރުލަމުން ދުއްވާގަންނަން އުޅުނެވެ. ޒާއިން ވެއްޓެމުން ދިޔަ ލާރާގެ އަތުގައި ހިފާ ލުއްކެއްޖަހާ ކައިރި ކޮށްލިއެވެ. “އަނހަ. އަހަރެން ހުއްޓަ ލާރާ ދެން ވެއްޓުނަކަ ނުދޭނަން. ފުރިހަމަ ހިމާޔަތް ކަން ދޭނަން” ޒާއިން މިހެން ބުނުމުން ލާރާ އަށް އެލޮލަށް ބަލަން ހުރެވުނީއެވެ. ލާރާއަށް ހަމަހޭވެރިކަން ވީ ޒާއިން އެތުންފަތުގައި ބޮސްދޭން ފެށުމުންނެވެ. ލާރާވެސް އެ ހަރަކާތުގައި ފުރިހަމައަށް ބައިވެރިވެ އެ ރޭ ހާއްސަކޮށްލިއެވެ.

******

ނިދިފައި އޮތް ޔުއާން ކޮނޑަށް ލައިގެން ކޮޓަރިއަށް ވަން ޔާނާއަށް ކޮޓަރިއަށް ބަލަން ހުރެވުނީއެވެ. ޔުއާންއަށްޓަކައި ކުޑައެނދެއް ތައްޔާރުކޮށްފައި ހުރުމުންނެވެ. “އަހަރެން އަމިއްލަޔަށް ހެދީ. ކަމުނުދަނީތަ؟” ފަހަތުން އައި މިކްޔަން ބުނެލިއެވެ. “ނޫން ވަރަށް ކަމުދޭ” ޔާނާ ގޮސް ޔުއާން އެ އެނދުގައި ބާއްވާލިއެވެ.

އެއަށްފަހު އެނބުރި އައިސް މިކްޔަންގެ ކަނދުރާގައި ދެއަތުން ވަށާލިއެވެ. “ދެން އަހަރެންނާ ދުރަށް ނުދައްޗޭ” ލުއިކޮށް ޔާނާގެ ތުންފަތަށް ބޮސްދެމުން މިކްޔަން ބުނެލިއެވެ. “ޔެސް” ޔާނާ ބުނެލިއެވެ. “ޑޯލް ގަނޑު” ޔާނާ އަތްދަނޑި މައްޗަށް ނަގަމުން މިކްޔަން ބުނެލިއެވެ. ޔާނާ ހިނިތުންވުމަކުން ފުއްދާލިއެވެ. މިކްޔަން ޔާނާ އެދުމަތީ ބޭއްވުމަށްފަހު ބޮކީގެ އަލި މަޑުކޮށްލިއެވެ.

-ފަސް އަހަރު ފަސް-

“މަންމީ. ކޮއްކޮމެން އަދިވެސް ނުހޭލާ. އެއޮށް މާމަ މެންވެސް އައީ” 6 އަހަރަށް އެޅިފައި ހުރި ޔުއާން އައިސް ބަދިގޭގައި ހުރި ޔާނާ ކައިރި ބުނެލިއެވެ. އެމީހުން އެއުޅެނީ މިއަދު ޕިކްނިކް ދާށެވެ.

އާބިދާ، ޒިޔާދު، އަދި އާލިމާ، ނާސިހްގެ ކައިރި ސޯފާގައި އިން މިކްޔަން ތެދުވިއެވެ. “ހިނގާ ބައްޕަ އާއެކީ ގޮވަން” މިކްޔަން އައިސް ޔުއާންގެ އަތުގައި ހިފާލިއެވެ. “ލެޓްޒް ގޯ” ޔުއާން މިހެން ބުނެ ކޮޓަރިއާ ދިމާލަށް ހިނގައިގަތެވެ.

“ލާނާ، ޒާރާ” މިކްޔަން އާއި ޔުއާން އެއްފަހަރާ މިހެން ބުނެ އެމީހުން އަޅާފައި އޮތް ރަޖާ ގަނޑު ޖަހާގަތެވެ. ތިން އަހަރުގެ ލާނާ އަދި ޒާރާ އަކީ އެއްމާބަނޑު ދެކުދިންނެވެ. “ބައްޕީ” ނިދި އަޑަކުން ލާނާ އަދި ޒާރާ މިހެން ގޮވާލާފައި އެކަކު އަނެއްކަކު ގައގައި ބައްދާލާފަ އަނެއްކާ ހަމަޖެހިލިއެވެ.

“ހޫމް. ހިނގާ ދޮންބެ އާ މަންމި އާ ބައްޕި އާ ޕިކްނިކް ދާން. އެއޮއް އެއްމެން ދަނީ” ކޮޓަރިއަށް ވަން ޔާނާ މިހެން ބުނުމާއެކީ އެދެކުދިން ފުންމައިގެން ތެދުވިއެވެ. އެއާއެކު ޔާނާ އަދި މިކްޔަންގެ އިތުރުން ޔުއާންވެސް ހީގަތެވެ.

*****

“އަޅެ ލާރާ. އެމީހުނަށް ލަސްވާނޭ” ބުރުގާއަޅަން ހުރި ލާރާ އަށް އިޝާރަތް ކުރަމުން ޒާއިން ބުނެލިއެވެ. “ދޭބަލަ ޔަލްވީ ގޮވައިގެން. އަހަރެން މި ނިކުންނަނީއޭ” ކޮޓަރީގައި ދުވަން އުޅުނު އެއްއަހަރުގެ ޔަލްވީއަށް ބަލާލަމުން ލާރާ ބުނެލިއެވެ. ޒާއިން ދެފަރާތަށް ބޯހޫރުވާލީ ދުވަހަކު ލާރާ ބަދަލު ނުވާނޭ ހިތަށް އަރާފައެވެ. ޒާއިން ޔަލްވީ އުރާލައިގެން ނިކުތެވެ.

“ލޭޓް މީހާ ކޮބާ” ޒާއިން ނިކުންތަން ފެނި ޔާނާ އަހާލިއެވެ. “މިހިރީ” ދަބަސް އަޅުވަމުން ނިކުން ލާރާ ބުނެލިއެވެ. “ލާރާގެ ހަރަދުގަ ކެއުން ދޭން ޖެހޭނެ ލަސްވީމަ” މިކްޔަން ބުނެލިއެވެ. “އޯކޭ ހަމަ ޑަން” ލާރާ ބުނެލިއެވެ.

” ފޮޓޮއެއް ނަގައިގެން ދާނީ” ލާރާ ބުނެލިއެވެ. އެހެން ބުނުމާއެކީ ލާރާގެ ފަަހަތުގައި އެއްމެން ހުއްޓުނެވެ. ލާރާ ހީލާފައި އެއްމެން އަރާގޮތަށް ސެލްފީއެއް ނަގާލިއެވެ.

އެއަކީ މިހާރު އެއްމެ އުފާވެރި އާއިލާއޭ ބުންޏަސް ދޮގަކަށް ނުވާނެއެވެ. އެހާވެސް އެއްމެން ގުޅެއެވެ. ކުރިމަތިވާ ހުރިހާ ދަތިތަކަކުން ސަލާމަތްވަނީ ގުޅިގެން ވިސްނުންތެރިކަމާއެކީ މަސައްކަތް ކޮށްގެންނެވެ.

=ނިމުނީ=