ސިއްރުން މިހިތާ ކުޅެނީހޭ (ތިރީސްވަނަބައި)

ޔާނާ އާދައިގެ ގޮތަކަށް ތައްޔާރުވެލީ މިރޭ ހިތާނަކުރާ ގެއަށް ދިޔުމަށެވެ. “ދޮންތާ. ރެޑީއެއް ނުވޭތަ؟ ދޮންތަބެ އައިއްސި ބަލައި” ސިޓިންގްރޫމްގައި ހުރި ލާރާ މިހެން ބުނުމުން ޔާނާގެ ދެބުމަ ގޮށްޖެހި ފުންނޭވާއެއް ދޫކޮށްލެވުނެވެ. އަނެއްކާ ކަންތަކާ ލައިގަތީއެވެ.

******

ޔާނާ އަދި ލާރާ ނިކުން އިރު ޑްރައިވާ ސީޓްގައި މިކްޔަން އިންއިރު ފަހަތު ސީޓުގައި ޒާއިން އިނެވެ. މިކްޔަންއަށް ޔާނާ ފެނުމުން އަވަސް އަވަހަށް ކުރީ ސީޓްގެ ދޮރު ހުޅުވާލަ ދިނެވެ. ނަމަވެސް ޔާނާ ތުންއަނބުރާލާފައި ގޮސް ފަހަތު ސީޓް ދޮރުހުޅުވާލުމަށްފަހު ޒާއިންއަށް ހިނިތުންވެލަމުން އިށީއިނެވެ. ލާރާ ދެން އިތުރު ގޮތެއް ނެތުމުން ގޮސް މިކްޔަން ކައިރި ކުރީސީޓްގައި އިށީއިނެލިއެވެ.

ކާރުގައި ދިޔައިރު ހަތަރު މީހުންކުރެ އެކަކުވެސް ވާހަކައެއް ނުދައްކައެވެ. ހަމަހިމޭންކަމާއެކީ އެމީހުންގެ މަންޒިލަށް ދެވުމުން އެންމެ ފުރަތަމަ ފޭބީވެސް ޔާނާއެވެ.

“މިއޮއް އައީ؟” އެކުވެރިޔަކާ ވާހަކަ ދައްކަން ހުރި އާލިމާއަށް ޔާނާމެން ފެނުމުން މިހެން ބުނެ ގޮސް ޔާނާގެ އަތުގައި ހިފައިގެން ގެނައެވެ.

“މީ ޔާނާ. މިކްޔަންގެ އަންހެނުން” ޔާނާގެ ބުރަކަށީގައި ފިރުމާލަމުން އާލިމާ ބުނެލިއެވެ. ޔާނާ އިސްދަށަށް ޖަހާލިއެވެ. “މާ ޝާ ﷲ. ވަރަށް ފުރިހަމަ. އެކަމް އަޑުއެހިން މިކްޔަން ދެކެ ރުޅިއައިސްގެން އެއްއަހަރު އެހެންތާކު އުޅިފައޭ މި މަންޖެ އެއައީ. އެތެދެއްތަ އާލިމާ؟” އެ މީހާ އަހާލިއެވެ. އާލިމާ އިސްދަށަށް ޖަހާލީ ބުނާނެ އެއްޗެއް ނޭގުމުންނެވެ. ޔާނާއަށް އާލިމާއަށް އަވަސް ނަޒަރެއް ދެވުނީއެވެ.

“އޭ ކޮބާ. އެތެރެއަށް ނުވަންނަންތަ؟” ފަހަތުގައި ހުރި ޒާއިން އާލިމާގެ ކޮނޑަށް އަތްވައްޓާލަމުން ބުނެލިއެވެ. “ހިނގާ ހިނގާ” އާލިމާ އަވަސް އަވަހަށް އެހެން ބުނެ އެތެރެއަށް ވަނެވެ. ހަލަބޮލިވެފައިވާ އެމާހައުލުގައި އާލިމާ ޔާނާގެ އަތުގައި ހިފައިގެން ގޮސް ހުއްޓުނީ ހިތާނަކޮށްފައިވާ ކުއްޖާ ކައިރިއެވެ. ފަހަތުން ލާރާ އަދި ޒާއިންވެސް އައިސް ހުއްޓުނެވެ. އެކުއްޖާގެ ހާލު އޮޅުން ފިލުވާލުމަށްފަހު އާލިމާ މެން ސްޓޭޖްއާ ދިމާލަށް އެނބުރިލީ މިރޭ އޮންނަ ޝޯއެއް ފެށުމުންނެވެ. “ކޮބާ މިކްޔަން މިހާރު؟” އާލިމާއަށް މިކްޔަން ނެތްކަން ރޭކާލުމުން ޒާއިންމެންނަށް ނިސްބަތްކޮށް އަހާލިއެވެ.

“ދައްތާ އައިޕެޑް” ޔާނާ ހިތާނަކުރެވިފައިވާ ކުއްޖާއާ ދިމާލަށް އެނބުރުނީ ތަންކޮޅެއް ދުރުގައި ހުރި މޭޒެއްގައި އޮތް އައިޕެޑްއަށް އިޝާރަތް ކޮށް އެކުއްޖާ މިހެން ބުނުމުންނެވެ. ޔާނާ އެކުއްޖާއަށް ހިނިތުންވުމެއް ދިނުމަށްފަހު ގޮސް އައިޕެޑް ނަގައިގެން އައިސް އެދިއްކޮށްލިއެވެ.

އައިޕެޑް ދިނުމަށް ގުދުވެލި ޔާނާގެ ދެބުމަ ކައިރި ކޮށްލެވުނީ މީހުންގެ އަތްތިލަބަޑިއާއި ހަޅޭލެވުންތަކުގެ އަޑު ކުއްލިއަކަށް ބާރުވުމުންނެވެ. އެއަށްފަހު އިވުނު އަޑަކުން ޔާނާގެ ދެލޯބޮޑުވެ ކުއްލިއަކަށް ސްޓޭޖްއާ ދިމާލަށް ބަލާލެވުނެވެ. އެއީ ހަމަ މިކްޔަންއެވެ.

“ޔާނާ، ދިސް އިޒް ފޯ ޔޫ” މައިކް އަތަށް ނަގައިގެން ޔާނާއާ ދިމާލަށް އިޝާރަތް ކުރަމުން މިކްޔަން ބުނެލިއެވެ. އެއާއެކު މިކްޔަންގެ ފަހަތުގައި ހުރި ސްކްރީން އިން ޔާނާ ގެ ފޮޓޯ ބޮޑުކޮށް ފެންނަންފެށިއެވެ. ކޮންމެ ސިކުންތަކުން އެފޮޓޯ އެހެން ފޮޓޮއަކަށް ބަދަލު ވެގެން ދެއެވެ. ޔާނާ އެކަނި ހުންނަ ފޮޓޮއެވެ. ނޫނީ ޔާނާ އަދި މިކްޔަންއެވެ. ނޫނީ ޔާނާ އަދި ޔުއާންއެވެ.

ފެންނަންފެށި ޔާނާގެ ފޮޓޯއިން އެއްމެންގެ ނަޒަރު ހުއްޓުން އަރާފައި ހުރި ޔާނާއާ ދިމާލަށް ހުއްޓުނެވެ. އާލިމާ، ޒާއިން އަދި ލާރާއަށް ހިނިތުންވެވުނީއެވެ.

ދެން އިވުނު ރާގާއި އެކީ މިކްޔަން އޭނާގެ ހިތުގެ ހާލު ލަވައިގެ ބައިތު ތަކުގެ ސިފާގައި ބޭރުކުރަން ފެށިއެވެ.

*ވާ އިޝްގް ހިތުގާ، ތީ އާޝިގާއޭ މަގޭ*
*ދިރި ހުރުމޭ ތިއީ، ވިންދަކީތީ މަގޭ*
*މިތުރާގެ ހިތުގައި އުޅުމޭ އަބަދަށް މައެދެނީ*
*އެކުގާ ކަލާޔާ ނިމިދާށެ އެދެނީ*
*ވާ އިޝްގް ހިތުގާ، ތީ އާޝިގާއޭ މަގޭ*
*ދިރި ހުރުމޭ ތިއީ، ވިންދަކީތީ މަގޭ*

މިކްޔަން މިހާ ހިސާބަށް ކީތަނާ ޔާނާ އިސްދަށަށް ޖަހާލިއެވެ. މިކްޔަން ބޭނުންވަނީ ކޮންގޮތެއް ހެއްޔެވެ. މިކްޔަން އަނެއްބައިތު ކިޔަން ފެށިއެވެ. އޭނާގެ ހިތުގެ ހާލު ޔާނާއަށް އިވޭނެނަމައެވެ.

*ޖިސްމާ މޭގާ، ނޭވާގާވޭ*
*ތިޔަނަން ފެވިފާ، މުޅިހިތުގާވޭ*
*ޔާރާ ވިންދާ މޭގާވެސްވޭ*
*ލޯބިން ހިތްވެސް ދީވާނާވޭ*
*ވާލޯބި ކިހިނެއްހެއްޔޭ އަންގާލަދޭނީ*
*ޔާރާ ނުލާދެން އަހަރެން ކިހިނެއް އުޅޭނީ*
*ވާ ލޯބި ހިތުގާ ތީ ލޯބިވާއޭ މަގޭ*
*ވާ އިޝްގް ހިތުގާ ތީ އާށިގާއޭ މަގޭ*
*ދިރިހުރުމޭ ތިއީ، ވިންދަކީތީ މަގޭ*

މިކްޔަން ޔާނާގެ ލޮލަށް ބަލާލީ ގަބޫލުކުރާށޭ ބުނާފަދައިނެވެ. ދެމީހުންގެ ހަތަރު ކަޅި ބައްދަލުވެގެން ދިޔައިރު ޔާނާގެ ގައިން ހީބިހި ނަގައިގަތެވެ. ޔާނާ ބޭނުންވީ އެތަނުން ދާށެވެ. މިކްޔަން ފާޅުގައި އެގޮތަށް އުޅެންޏާ އޭނާގެ ހިތްބޭޒާރު ވެދާނެއެވެ. އޭނާ މިކްޔަންއަށް މާފް ކުރަން ބޭނުން ވިޔަސް ނުކުރެވޭނެއެވެ. ފެންކަޅިވެފައިވާ ހާލު ޔާނާ އަނެއްކާވެސް އިސްދަށަށް ޖަހާލިއެވެ.

ޔާނާ ސިހުނީ އައިނައިދިމާލެއް ނޭނގި ކުއްލިއަކަށް ޔާނާގެ ފަހަތުން މިކްޔަން ނިކުމެ ޔާނާގެ އުނަގަނޑުގައި ހިފާ ކައިރި ކޮށްލުމުންނެވެ. އެއަށްފަހު މިކްޔަން އޭނާގެ ލަވަ ކުރިއަށް ގެންދިޔައެވެ. ޔާނާ ގަދަހަދަން އުޅުނަސް ބާރުގަދަ ފިރިހެނެއް ކުރިމަތީ އޭނާއެއް ދެއްކޭނީ ކޮންބާރެއް ހެއްޔެވެ. އެހެންކަމުން ހިމޭންކަމާއެކީ އިސްދަށަށްޖަހާލިއެވެ.

*އާދޭ ލޯބިން ހިއްސާކޮށްލަން*
*ދީގެން ޖާނާ، ހިތްވެސް އުޅިލަން*
*ދާން ހިތް މިއެދޭ، ތީއޭ މަންޒިލް*
*ހުރެލާހިތް އަދު، ވާތީ ސާހިލް*

މިކްޔަން ޔާނާގެ ދައްދޮޅީގައި ހިފާ އުފުލާލަމުން ކިޔާލިއެވެ. އެއާއެކު ކަރުނަވީ ލޮލަކުން ޔާނާ މިކްޔަންގެ ލޮލަށް ބަލާލިއެވެ. މިކްޔަން ކުއްލިއަކަށް ޔާނާގެ އުނަގަނޑުން ދޫކޮށްލާފައި ފަހަތަށް ފިޔަވަޅު އަޅަންފެށިއެވެ.

*ނެތްނަމަ އެކީގާ ޔާރާ ވާނޭދެން ފަޅުކަން*
*ޖާނާއި ރޫހަށް ލިބެނީ މިއުނިކަން*
*ވާ ހިޔާލު ހިތުގާ ތީ ހިޔާލަކީއޭ މަގޭ*
*ވާ އިޝްގް ހިތުގާ ތީ ހިޔާލަކީއޭ މަގޭ*
*ދިރި ހުރުމް*

މިކްޔަން އަށް ކުއްލިއަކަށް ލަވަ މެދުކަނޑާލެވުނީ ޔާނާ އެތަނުން ދުއްވައިގެންފައި ނިކުތުމުންނެވެ. މިކްޔަން ވެސް އެއްމެ ސިކުންތެއް ބޭކާރު ނުކޮށް އަތުގައި އޮތް މައިކް ކައިރީގައި ހުރި މީހާގެ އަތަށް ދެމުން ޔާނާގެ ފަހަތުން ދުއްވާގަތެވެ.

“ޔާނާ މަޑުކޮށްބަލަ” މިކްޔަންއަށް ޔާނާ އަތުވީ އެގެއާ ޔާނާ ވަރަށް ދުރަށް ދިޔަފަހުންނެވެ. ޔާނާގެ އަތުގާ ހިފާ މިކްޔަން ޔާނާ މިކްޔަންގެ ކޮޅަށް އަނބުރާލިއެވެ. މިކްޔަން ހިފިހެން ހީނުވެ ޔާނާ އެއަތް ފޮޅުވާލިއެވެ.

“މިކްޔަން ކީއްވެގެންތަ ތިއުޅެނީ. ކިތަންމެ ވަރަކަށް ތިލަވަޔާ އެއްޗެހި ކިޔަސް އަހަރެންގެ މާފެއް ނުލިބޭނޭ. މިކްޔަންއަށް ކީއްވެ ނުވިސްނެނީ” ރޮވިފާވާ އަޑަކުން ޔާނާ ބުނެލިއެވެ.

“ޔާނާ ޕްލީޒް. އަހަރެން ހަމައަސްލުވެސް ވަރަށް ލޯބިވޭ. ގަބޫލްކޮށްބަ”

“މިކްޔަން ތިހެންބުންޏަސް އަހަރެން ބިރުގަނޭ. މިއަދު ތިހެން ބުނެފަ މާދެން ބުނެފާނެ މީހެއްގެ ލޯބި ހޯދުމަށް ޖެއްސި އެކްޓެކޭ އެއީ” ޔާނާ އޭނާގެ ހިތުގައިވާ ޝަކުވާ ބޭރުކޮށްލިއެވެ. “ޔާނާ، އޭރު އަހަންނަށް އިނގެޔޭ އަހަރެން އުޅުނީ ގޯސް ކަމެއް ކުރަންކަން. އެކަމް އަހަރެން އަހަރެން”

“ޕްލީޒް މިކްޔަން. އަހަރެން ބޭނުމެއް ނޫނޭ އަޑުއަހާކަށް”

“އިނގޭތަ ނަޝްވާ އުޅެނީ މީހަކާ އިނދެގެން ކަން” މިކްޔަން މިހެން ބުނުމުން ޔާނާ އެއްމިޔަކަނުން ހީލިއެވެ. “އަހަރެން މާލެ އައި ދުވަހު އަހަރެންނަށް އިނގިއްޖެ. އަދި އިނގުން އާބިދާއްތަގެ ދަރި ޒިޔާންއާކަން ވެސް ކައިވެނިކޮށްގެން އުޅެނީ. އަދި ނަޝްވާ ބަނޑުބޮޑުކަންވެސް އިނގޭ” ޔާނާ މިހެން ބުނުމުން މިކްޔަން ފުންނޭވާއެއްލިއެވެ.

“ދެން ކީއްވެ؟”

“އަހަރެންނަށް ހީވަނީ އަނެއްކާ މިކްޔަން އަހަރެންނަށް އޮޅުވާލާނޭ. މިކްޔަން، އަހަރެންނަކަށް ފަސޭހައެއް ނޫނޭ. މިކްޔަން ބުނެބަލަ. އަހަރެން މިކްޔަން އާއެކީ ލޯބިން އުޅެފަ އަހަރެން މިބުނަނީ އަހަރެންޖެއްސީ ޑްރާމާއެކޭ. މިކްޔަންއަށް ފަސޭހަވާނެތަ މާފްކުރަން؟ އިތުބާރު އަނެއްކާކުރެވޭނެތަ އިތުރު ފުރުސަތެއް އަހަރެންނަށް ދޭށޭ ބުނުމުން؟” ޔާނާ ހަޝަންބަދެލަމުން ބުނެލިއެވެ.

“ޔާނާ އަހަރެން އުޅުނިން ޔާނާއަށް އޮޅުވާލަން. އެކަމް އަހަރެން އޮޅުވައެއް ނުލަން. އަހަރެން ވަރަށް ލޯބިވި އޭރުވެސް ޔާނާދެކެ. މިހާރުވެސް ވަރަށް ލޯބިވޭ” މިކްޔަން މިހެން ބުނުމުން ޔާނާ މޫނުއަނބުރާލިއެވެ.

“ތިލޯތްބެއް ވަންޏާ އަހަރެންނާ ދުރުގަ އުޅޭ” ޔާނާ ފޫހިކޮށް ބުނެލިއެވެ. “ދުރުގައެއް ނޫޅެވޭނެ. އެއަށްވުރެ ލޯބިވޭ. އެހެންނޫނަސް ޔޫއާ މައި ވައިފް” މިކްޔަން އެއްމިޔަކަނުން ހީލަމުން ބުނެލިއެވެ. “އަހަރެން މާދެން ވަރިވާން ފޯމް ލާނަން” ސީދާ މިކްޔަންގެ ލޮލަށް ބަލަން ހުރެ ޔާނާ މިހެން ބުނެ ފަސް އެނބުރި ހިނގައިގަތެވެ.

މިކްޔަންއަށް ގަބުވެފައި ހުރެވުނީއެވެ. ދުވަހަކުވެސް ޔާނާ ވަރިއާ ހިސާބަށް ދާނެކަމަކަށް އޭނަ ހިޔެއް ނުކުރެއެވެ.

*******

“ހަލޯ. މަންމާ އަހަރެންނަށް މާފް ކުރޭ. ނުވެސް ބުނެ މިއާދެވުނީ” އާލިމާ ފޯނު ނަގައިލުމުން ޔާނާ ބުނެލިއެވެ. އާލިމާ އެ ރަނގަޅުވާނެ ކަމަށްބުނެ ފޯނު ބޭއްވިއެވެ. އާލިމާ ވެސް ދެން އެތާ ހުންނަން ނަހަދާ ލާރާ އަދި ޒާއިންއާއެކީ ގެއަށް ދިޔުމަށްޓަކައި ދިޔައެވެ.

******

ކޮޓަރިއަށް ވަންގޮތަށް ޔާނާ ދޮރުގައި ލެނގިލިއެވެ. އަހަރެންނަށް މިކްޔަން ކައިރިން ވަރިވެވިދާނެހެއްޔެވެ. އަދި ވެސް އަހަރެންގެ ހިތުގައި ދެގޮތެއް ނުވެ ވަނީ މިކްޔަންގެ ލޯތްބެވެ. ބައެއްފަހަރު މިގޮތްދޫކޮށްލާފައި މިކްޔަންއާއި އެކު އުޅެން އޭނާ ހިތަށް އެރިއެވެ. ނަމަވެސް ދެވަނަ ފަހަރަށް އެހިތް ފުނޑުފުނޑުކޮށްލެވޭނެހާ ހިތްވަރެއް އެހިތުގައި ނެތެވެ. ކުރިން ލޯބިވާކަމުގެ އެކްޓް ޖެއްސިމީހެއް މިހާރުވެސް އެ ފޭކް ޑްރާމާ ކުޅިފާނެއްްނޫންހެއްޔެވެ.

ޔާނާ އިސްއިފުލާލުމަށްފަހު ގޮސް ޔުއާން ކައިރި ނިދިފައި އޮތް އާބިދާއަށް ގޮވާލިއެވެ. “ދައްތާ. އަޅުގަނޑު މިއައީ” ޔާނާ ފުރަތަމަ ގޮވާލުމާއެކީ އާބިދާ ލޯހުޅުވާލިއެވެ. ޔާނާ އުޅުނީ އާބިދާއަށް ނުގޮވާށެވެ. ނަމަވެސް މީ އާބިދާ ދައްތަ އަދި ޑޭޑްގެ ކައިވެނީގެ ފުރަތަމަ ރޭކަމުން ޔާނާ އިތުރުވިސްނުމަކަށް ނުގޮސް އާބިދާއަށް ގޮވީއެވެ.

“ދަރިފުޅު ހާދައަވަހަށް؟”

“އެތަން ފޫހިވީމަ” ޔާނާ ދޮގެއް ހަދާލިއެވެ. އާބިދާ ހިނިތުންވެލުމަށްފަހު އެކޮޓަރިން ނިކުމެގެން ދިޔައެވެ.

******

ޒާއިން ކާރުގައި އާލިމާ ގެއަށް ލުމަށްފަހު މިސްރާބުޖެހީ ލާރާ ގެއަށް ލާން ދިޔުނަށެވެ. ކުރީ ސީޓްގައި ދެމީހުން އިންއިރު އެކަކުވެސް ވާހަކަ ނުދައްކައެވެ. ލާރާއަށް އެ ހަމަހިމޭންކަން ކަމުނުދިޔައީ ކަންނޭނގެއެވެ. “އަމް ވަރަށް ޒިންމާދާރު ޓައިޕް ޖަހާ މިހާރު. ކޮބާ ސިއްރަކީ؟” ލާރާ ޒާއިންއާ ދިމާލަށް ބަލާލަމުން ބުނެލިއެވެ. ޒާއިން ހިނިތުންވެލުމަކުން ފުއްދާލިއެވެ. “ކުރީގެ ނަންބަރުތަ ހަމަ ގެންގުޅެނީ؟” ޒާއިންވެސް ކޮށްލީ ސުވާލެކެވެ. ލާރާ ޒާއިންއަށް ބަލާލުމަށްފަހު ދެފަރާތަށް ބޯހޫރުވާލީ ނޫނެކޭ ބުނުމަށެވެ. ލާރާ ޒާއިންގެ އަތުގައި އޮތް ޒާއިންގެ ފޯނު ދަމައިގަތެވެ. ޒާއިންއަށް ލާރާއަށް އަވަސް ނަޒަރެއް ދެވުނެވެ.

“ނަންބަރ ޖަހަންވެގެން” ލާރާ މިހެން ބުނެ ފޯނު ހުޅުވާލިއެވެ. ނަމަވެސް ލާރާއަށް ދެބުމަ ކައިރި ކޮށްލެވުނީ އޭގަ ޖަހަންވެފައި އިން ކޯޑް ފެނުމުންނެވެ. “ކޯޑް” ލާރާ ފޯނު ދައްކާލަމުން ބުނެލިއެވެ. “މިހާރު ކާރު ދުއްވަނީ އެއްނު” ޒާއިން ބުނެލިއެވެ. “ކިޔާ ކޯޑް” ލާރާ މިހެން ބުނުމުން ޒާއިން ލާރާއާ ދިމާލަށް ބަލާލިއެވެ.

“ކީއްވީ؟ ބިޓެއްގެ ނަންބަރެއްތަ މީގަ އިންނާނީ. ނޫނީ މީހެއްގެ ނަމެއްތަ. ކޮންމެގޮތެއްވިޔަސް ބުނޭ” ލާރާ ކަޅިއަޅާލަމުން ބުނެލިއެވެ. “އާރާލް” ޒާއިން މިހެން ބުނުމުން ލާރާ ފާޑަކަށް ހުރެ ޒާއިންއަށް ބަލާލިއެވެ. “އޭ، އޭ، އާރް، އޭ، އޭ، އެލް. އާރާލް” ޒާއިން ސްޕެލިންގް އާއެއްކޮށް ކިޔާލިއެވެ. ލާރާ ޒާއިން އަށް ފާޑަކަށް ބަލާލާފައި ކޯޑްޖަހާލިއެވެ. އެއާއެކު ފޯނު ހުޅުވެގެން ދިޔައެވެ. ލާރާގެ ދެލޯބޮޑުވީ ވޯލްޕޭޕާރ ގައި އިން އޭނާގެ ފޮޓޯ ފެނިފައެވެ. ލާރާ ވިސްނާލިއެވެ. “ވެއިޓް. އާރާލް، ލާރާ ދޯ. އިދިކޮޅަށް ޖަހާފަ. އޭ އޭ އާރް އޭ އޭ އެލް އާރާލް އިދިކޮޅަށް ޖެހީމަ އެލް އޭ އޭ އާރް އޭ އޭ. ލާރާ” ލާރާ މިހެން ބުނުމުން ޒާއިން ހިނިގަނޑެއް ޖަހާލާފައި ބޯޖަހާލިއެވެ.

ލާރާވެސް ފަނޑުހިނިތުންވުމެއް ދިނެވެ. އެއަށްފަހު ފޯނުގައި އޭނާގެ ނަންބަރު ޖަހާ ޒާއިންގެ ފޯނު އިން ލާރާގެ ފޯނަށް މިސްކޯލްއެއް ޖެހިއެވެ.

******

ލާރާ ގެއަށް ވަނެ ބަދިގެއަށް ވަނުމަށް ދިޔައީ ފެންބޯލުމުގެ ނިޔަތުގައެވެ. ނަމަވެސް ބަދިގެއަށް ނުވަދެވެނިސް ފޯނު ރިންގްވާން ފެށުމުން ލާރާ މަޑުކޮށްލާފައި ފޯނަށް ބަލާލިއެވެ. “ދޮންތަބެ؟” ލާރާ އަށް ބުނެލެވުނެވެ. ލާރާ އަވަހަކަށް ފޯނު ނެގިއެވެ. “ލާރާ، ޔޫ ހޭވް ޓް ޑޫ ސަމްތިންގް ފޯ މީ” ލާރާ ނެގުމާއެކީ އެކޮޅުން މިކްޔަން ބުނެލިއެވެ. “ޔެސް. ކޮންކަމެއް؟” ލާރާ އެނބުރިގޮސް ސޯފާގައި އިށީއިންނަމުން ވާހަކަ ދެއްކިއެވެ. މިކްޔަން ކަންތައް ކުރަންވީ ގޮތް ކިޔާދިނެވެ. އަޑުއަހަމުން ދިޔަ ލާރާ މަޢުނަވީ ގޮތަކަށް ހީލިއެވެ. “އޯކޭ ޑަން” ލާރާ ހިނިތުންވެލާފައި ބުނެލިއެވެ. ފޯނު ބޭއްވި ލާރާ ހުރީ ދަތްތައް ފެންނަވަރަށް ހީލައިގެންނެވެ.

*******

“ޒިޔާ. ޔާނާ މެން މާލޭގަ ދޯ؟ މިކްޔަންމެން ދެމީހުން މިހާރު އޯކޭ ވާނެބާ؟” ހެދުންތައް ފަށް ޖަހަން ހުރި ޒިޔާންއަށް ބަލާލަމުން އެނދުގައި އޮތް ނަޝްވާ އަހާލިއެވެ. “ނޭނގެދޯ. އެކޮޅަށް ދިޔާމަ އިނގިދާނެއްނު. މިހާރު އޯކޭ ނުވިޔަސް އަހަރެމެން ދިޔާމަ އޯކޭ ވާނެ.”

“ކީއްވެ ޒިޔާ ތިހާ ޔަގީން ކަމާއެކީ ތިހެން ތިބުނަނީ؟ ގައިމު އަހަރެން މިކްޔަން ލޯބިވީ ޔާނާދެކެ އޭ ބުންޏަސް ޔާނާ ގަބޫލެއް ނުކުރާނެއްނު” ނަޝްވާ އޮތްގޮތަށް އޮވެ ބުނެލިއެވެ. “ދެން އިނގިދާނެއްނު އެކޮޅަށް ދިޔާމަ. ދެން އަނެއްކާ އެކަމާ މާބޮޑަށް ވިސްނަން ހަދާނެކަމެއް ނެތް އިނގޭ.” ޒިޔާން ބުނެލީ ފޮށްޓަށް ހެދުންތައް އަޅަމުންނެވެ.

“ހޫމް. އެކަމް ޔާނާ”

“ދެން ނަޝް. އެވާހަކަ ނުދައްކަބަލަ. ހުރިހާ ކަމެއްވެސް އޯކޭ ވާނޭ” ޒިޔާން މިހެން ބުނުމުން ނަޝްވާއަށް އިތުރަށް އެއްޗެކޭ ބުނާކަށް ނުކެރުނެވެ. ނަމަވެސް އޭނާއަށް ވިސްނެނީއެވެ. ޔާނާ އަދި މިކްޔަން ގުޅޭނެބާއެވެ. ޔާނާ މިކްޔަންއަށް މާފް ކުރާނީ ކީއްކުރީމަހެއްޔެވެ. އެރޭ މިކްޔަން ދެއްކި ހުރިހާ ވާހަކައެއް ޔާނާ އަޑުއެހިނަމައެވެ. ނަމަވެސް ވާން އޮތްކަމެއް ވާނެއެވެ. އެކަމެއް ނުހުއްޓުވޭނެއެވެ.

“އެކަމާ ނުވިސްނާށޭ” ނަޝްވާ ސިހުނީ ޒިޔާން ގޮވާލުމުންނެވެ. ނަޝްވާ އަވަސް އަވަހަށް ނުވިސްނަމޭ ބުނެލިއެވެ.

=ނުނިމޭ=

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.