ހިތްއެކީ ދެވިއްޖޭ (8)

އަޖުވަދުގެ ބާރު ހަޅޭކުގެ ސަބަބުން ސިހިފައި އަވަސް އަވަހަށް ނައިރާ ސިޓިންރޫމަށް އައެވެ. ރުޅިއައިސް ރަތްވެފައިހުރި އަޖުވަދުގެ ނަޒަރު ސީދާ ނައިރާގެ މޫނަށް އަމާޒުވުމާއެކު ބިރުގެންފައިހުރި ނައިރާއަށް ހިންދިރުވައިލެވުނެވެ. މިއީ މުޅިއުމުރުގައިވެސް އަޖުވަދު އަޑުއުފުލައި ނައިރާއާ މުހާތަބުކުރި ފުރަތަމަ ފަހަރުކަމުން އެހިތަށް ބަޔާންކުރަންދަތި ތަދެއް އިހުސާސުވެގެން ދިޔައެވެ. އަލިފާންކަނި ބުރަމުންދިޔަ އަޖުވަދުގެ ދެލޯފެނުމާއެކު ނައިރާގެ ހިތް ނެގިނެގިފައި ޖެހެންފެށިއެވެ.

“ހާމިދާ ނިކަން ބަލާބަލަ ނައިރާ ކޮށްގެންއުޅޭ ކަމެއް. ލަދުން ބޯހަލާކުވޭ.” ނިތްކުރިމަތީގައި އިނގިލިތައް ކާތައިލަމުން އަޖުވަދު ބުނެލިއެވެ.

“ނައިރާ ކީއްތަކުރީ އަޖުވަދު ތިހައިރުޅި އައިސްގެން ތިއުޅެނީ؟” ރޮވިފައިހުރި ނައިރާގެ މޫނަށް ބަލައިލަމުން ހާމިދާ އަހައިލިއެވެ.

“އަހާބަލަ އޭނަ ގާތު އޭނަ ކޮށްގެން އެއުޅޭކަމެއް.” ނައިރާއާ ދިމާއަށް ކަޅިއަޅައިލަމުން އަޖުވަދު ބުނެލިއެވެ.

“ބައްޕާ އަޅުގަނޑު.” ނައިރާގެ ވާހަކަމެދުކެނޑުނީ އަޖުވަދު އަތުން ވާހަކަދެއްކުން މަނާކުރީމައެވެ. “ހުއްޓާލާ. އެނުލަފާ ޝިވަންއާ ގުޅިގެން އުޅޭހައިދުވަހަކު އަހަރެންނަށް ބައްޕަކިޔައިގެން ނުވާނެ.” ޝަހާދަތް އިނގިލި ނައިރާއާ ދިމާއަށްދިއްކޮށްލަމުން ރުޅިއައިސްފައި އަޖުވަދު ބުނެލިއެވެ.

“ކީކޭ؟ ނައިރާ ޝިވަންއާ. އަޖުވަދު ކީކޭތަ ތިކިޔަނީ؟ ނިކަންވެގެންއުޅޭ ގޮތެއް ރީތިކޮށްބުނެބަލަ.” ހާސްވެފައިހުރި ހާމިދާ ބުނެލީ ތަންކޮޅެއްބާރަށެވެ.

“އަހަރެމެންގެ މިހިރަ ފެންނަ ދަރި އެއުޅޭ ޕާޓޭ ޝިވަންއާ ރަށްޓެހިވެގެން އުޅޭ ވާހަކަ މިބުނީ. މިއަދު އަހަރެންގެ އޮފީހުގައި އުޅޭމީހަކު އެހެންބުނީ އަހަރެންގާތު. މީގެ ކުރިންވެސް ދެތިންދުވަހު ކޮންމެވެސް އެހެން ދެމީހަކުވެސް ބުންޏޭ އަހަރެން ގާތު. އެކަމަކު އަހަރެން މިހުންނަނީ ގަބޫލު ނުކުރަން. ދެން މިއަދު އަހަރެން ގަބޫލު ނުކުރީމަ އޭނަ އަހަރެންނަށް ފޮޓެއެއްދެއްކީ މިދެމީހުން ފިހާރައެއްގަ ތިއްބަ. ކީކޭ ކިޔާނީ؟ ލަދުން ބޯހަލާކުވާވަރުވޭ. ނައިރާއަށްވެސް އެނޫންމީހަކު ނުލިބުނީތަ ރަށްޓެހިވަން؟” ކަޅިއަޅައިގެންހުރި އަޖުވަދު ހާމިދާއަށް ވީގޮތް ކިޔައިދިނުމަށްފަހު އަނެއްކާވެސް ނައިރާއާ ދިމާއަށް ހަޅޭލަވައިގަތެވެ.

“އަޖުވަދު. ތިވެދާނު އެމީހުނަށް ހީވި ގޮތަކަށްވެސް. އަހަރެންގެ ނައިރާ އެހައި ނުބައި މީހަކާ ގުޅުމެއްނުބާވާނެ.” އިސްޖެހިފައިހުރި ނައިރާ ފެނުމުން ހާމިދާގެ ހިތަށް ތަދުވިއެވެ.

“ހާމިދާ އަދިވެސް އަހަރެން މިދައްކާވާހަކަ ގަބޫލެއްނުކުރަންދޯ. އެހެންވީއިރު މިހިރަފެންނަ ކުއްޖާކުރެ އަހައިބަލަ. އެއީ ދޮގެއްތޯ ނޫނީ ތެދެއްތޯ.” ހަށަންބަނދެލަމުން އަޖުވަދު ބުނެލިއެވެ. އެއާއެކު އިސްޖެހިފައިހުރި ނައިރާގެ ގާތަށްގޮސް ހާމިދާ ހުއްޓުނެވެ. ބިރުންވިރިވިރި ހުރި ނައިރާ ފެނުމުން ހާމިދާގެ ދެލޯވެސް ފެންކަޅިވެގެން ދިޔައެވެ.

“ދަރިފުޅާ ބައްޕަ އެބުނީ ތެދެއްތަ؟” ނައިރާގެ ދަތްދޮޅީގައިހިފައި އުފުލައިލަމުން ހާމިދާ ލޯތްބާއެކު އަހައިލިއެވެ. ބިރުންހުރި ނަމަވެސް ނައިރާ މަޑުމަޑުން ބޯޖަހައިލީ އެކަމާ އެއްބަސްވުމުގެ ގޮތުންނެވެ. ގަބޫލުނުކުރެވިފައި ހާމިދާއަށް ނައިރާގެ މޫނަށް ބަލަން ހުރެވުނީއެވެ.

“ޕިސްޕިސް. ދަރިފުޅަށް އެޝިވަންއަށްވުރެ ރަނގަޅު މީހެއް ނުފެނުނީތަ؟ އޭނާގެ ގޮތް ދަރިފުޅަށްވެސް ނުލާހިކު ރަނގަޅަށް އެނގޭނެ. ދެންކީއްވެ ތިވަރުގެ ކަމެއް ވިސްނައިނުލާ ނައިރާ ކުރީ؟” ހިތްހަމަނުޖެހިފައި ހާމިދާ ބުނެލިއެވެ.

“މަންމާ ޝިވަން ބަދަލުވަން އެބަ މަސައްކަތްކުރެއޭ. ޕްލީޒް. އަޅުގަނޑު ޝިވަންދެކެ ވަރަށް ލޯބިވޭ. އޭނަ ބަދަލުވާނޭ.” ހާމިދާގެ އަތުގައި ހިފައިލަމުން ރޮވިފައި ނައިރާ ބުނެލިއެވެ.

“ކޮންބަދަލެއްވާނީ؟ އެކަހަލަ މީހުން ދުވަހަކުވެސް ބަދަލެއްނުވާނެ. އެއުޅެނީ ކޮންމެވެސް އެއްޗެކޭ ކިޔައިގެން ނައިރާގެ ބޯކާލަން. މިހާރު މިވަގުތުން ފެށިގެން އޭނައާ ދެމެދު އޮތް ގުޅުން ކަނޑާލާ. އަޑުއިވިއްޖެ.” ނައިރާ އެގުޅުމަށް އެއްބަސްވިތަންފެނި އަޖުވަދުގެ ލޭ ކެކިގަތެވެ.

“ބައްޕާ ހެޔޮނުވާނެ އެއްފަހަރުވެސް އަޅުގަނޑު.” އަޖުވަދާ ދިމާއަށް ހިނގައިގަތް ނައިރާގެ ފިޔަވަޅުތަކަށް ހުއްޓުމެއް އައީ އަޖުވަދު ފަހަތަށް ފިޔަވަޅެއް އަޅައިލިތަން ފެނިފައެވެ.

“ހުއްޓާލާ. އަހަރެންނަށް ބައްޕަކިޔަން ބޭނުންވަންޏާ ނައިރާއަށް ޖެހޭނީ ޝިވަން މަތިން ހަނދާންނައްތަައިލަން. އަޑުއިވިއްޖެ. އެހެންނޫނީ އަހަރެންނަށް ބައްޕަ ކިޔުން ހުއްޓައިލާ.” އަނެއްފަރާތަށް މޫނުއަނބުރައިލަމުން އަޖުވަދު ހަރުކަށި ގޮތަކަށްް ބުނެލިއެވެ.

ހުރިތަނަށް ގަނޑުވެފައިކަހަލަ ގޮތަކަށް ނައިރާއަށް ހުރެވުނީއެވެ. ދުވަހަކުވެސް އެފަދަ އެއްޗެއް އަޖުވަދު ބުނެފާނެކަމަކަށް ނައިރާ ހިއެއްނުކުރެއެވެ. ދެލޯބޮޑުކޮށްގެން އަޖުވަދާ ދިމާއަށް ބަލަންހުރި ނައިރާގެ ލޮލުން އެއްވެސް ހިފެހެއްޓުމެއްނެތި ކަރުނަ ފައިބަމުންދިޔައެވެ.

އަޖުވަދުގެ ޖުމްލަތަކާއެކު ބަސްހުއްޓިފައި ހާމިދާއަށްވެސް ހުރެވުނީއެވެ. ކިތަންމެ ރުޅިއައި ނަމަވެސް އެފަދަ އެއްޗެއް އަޖުވަދު ބުނެފާނެކަމަކަށް ހާމިދާާވެސް ހިއެއްނުކުރެއެވެ.

“މިމަހު ނައިރާގެ ހުރިހާ އެގްޒާމް ތަކެއްނިމުނީމަ ދޮންތަ ގާތަށް މެލޭޝިޔާއަށް ދާން ތައްޔާރުވޭ. އަހަރެން ދެން ބޭނުމެއްނޫން އެންމެ ހިނދުކޮޅަކުވެސް ނައިރާ އެޝިވަން ފެންނަ ހިސާބުގައި ހުންނާކަށް. އަދި އެއްވާހަކަ. މިއަދުންފެށިގެން ގެއިން ބޭރަށް ދިއުން ނައިރާއަށް މަނާ. އެކަނި އެއްވެސް ތާކަށް ނުދެވޭނެ. ނައިރާގެ އެކުވެރިންވެސް ބައްދަލުކުރަން ބޭނުންވާނަމަ އަންނަންޖެހޭނީ މިގެއަށް. މިއީ އަހަރެންގެ ނިންމުމަކީ. އެކަކުވެސް މިނިންމުމަށް ފާޑުކިޔާކަށް އަހަރެން ބޭނުމެއްނޫން. ދެން އިތުރަށް މިމައުލޫއަށް އެކަކުވެސް ވާހަކަދައްކައިގެން ނުވާނެ.” ބޭނުންވި ހުރިހައި ވާހަކައެއް ބުނުމަށްފަހު އަޖުވަދު ކޮޓަރިއާ ދިމާއަށް ހިނގައިގަތެވެ.

އަޖުވަދު ދިއުމާއެކު ރޮވިފައި ނައިރާ ހާމިދާގެ މޫނަށް ބަލައިލިއެވެ. “މަންމާ. ޕްލީޒް. ބައްޕައަށް ވިސްނައިދީބަލަ. އަޅުގަނޑު ވަރަށް ލޯބިވޭ ޝިވަންދެކެ. އޭނަ ބަދަލުވާނޭ މަންމާ. ކީއްވެތަ ގަބޫލުނުކުރަނީ؟ ހެޔޮނުވާނެ އަޅުގަނޑަށް ތިހެން ނުހަދާ. އަޅުގަނޑަކަށް ނޫޅެވޭނެ ޝިވަންއާ ނުލައެއް.” ގިސްލައި ރޮމުންދިޔަ ހާލު ނައިރާއައިސް ހާާމިދާގެ ކުރިމަތީގައި ދެއަތްޖޯޑުކޮށްގެން ހުރެ އާދޭސްކުރަމުން ދިޔައެވެ. ދޭނެ ވަކިޖަވާބެއް ނޭނގިފައި ހާމިދާ ހުއްޓެވެ. “މަންމާ.” ހާމިދާގެ އަތުގައި ހިފައި ތަޅުވައިލަމުން ނައިރާ ގޮވައިލިއެވެ.

“މަންމައަކަށް ނޭނގެ ބުނާނެވަކި އެއްޗެއް ދަރިފުޅާ. ބައްޕަ އެދިޔައީ ބައްޕަގެ އެންމެފަހު ނިންމުން އިއްވާފަ. ދެން އެންމެ ރަނގަޅުވާނީ ބައްޕަ ބުނާގޮތް ހެދިއްޔާ. އެއްވެސް މަޔަކާ ބަފަޔަކު އެމީހުންގެ ދަރިންނަށް ދެރަވާނެ ގޮތަކަށް ނިންމުމެއް ނުނިންމާނެ. އެހެންވީމަ އެކަން ދަރިފުޅުވެސް ވާނެ ގަބޫލުކުރަން. ޝިވަންއަށްވުރެ މާރަނގަޅު ކުދިން ދަފިފުޅަށް ވާާނެ. ދުނިޔޭގަ ފިރިހެނުން ހުސްވީކީ ނޫނެއްނު. އެެހެންވީމަ ޝިވަން މަތިން ހަނދާން ނައްތައިލާ. އެއީ މަންމަ ބުނަންއޮތްހައިވެސް އެއްޗަކީ. ދެން ދޭ ކޮޓަރިއަށް އަރާމުކޮށްލަން.” ލޯތްބާއެކު ނައިރާގެ ލޮލުން އޮހޮރެމުންދިޔަ ކަރުނަތައް ފުހެލަދެމުން ހާމިދާ ނައިރާއަށް ވިސްނައިދެވޭތޯ މަސަތްކަތްކުރިއެވެ. ނަމަވެސް ހާމިދާާގެ ވާހަކަތަކަށް ވަކި ޖަވާބެއްނުދީ ނައިރާ ކޮޓަރިއާ ދިމާއަށް ދުއްވައިގަތެވެ. ވެފައިހުރި ދެރައިން ވާހަކަދައްކަންވެސް އެވަގުތު ނައިރާއަށް ދަތިވަމުންދިޔައެވެ. މުޅި ހަޔާތުގައިވެސް މިހައި ހިތާމަކުރި ދުވަހެއް ނާދެއެވެ.

** ** **

ނިދިފައި އޮތް ޝިވަން ސިހިފައި ފުންމައިގެން ތެދުވީ ފެނުނު ހުވަފެނެއްގެ ސަބަބުންނެވެ. ނައިރާއާާ ވަކިވެ ދުރަށްދާ މަންޒަރު ހުވަފެނުން ފެނުމާއެކު އެހިތް ނުތަނަވަސްވާން ފެށިއެވެ. ނައިރާއަށް ކޮންމެވެސް ބޮޑު ހިތާމައެއް ދިމާވެގެން އުޅޭކަމުގެ އިހުސާސު ކުރެވެމުންދިޔައެވެ.

ނައިރާގެ ހާލު ބަލައިލުމަށްއެދި އެހިތް ގޮވަމުންދިޔައެވެ. ނަމަވެސް އޭނާގެ އަތުގައި ފޯނެއް ނޯނާތީ އެކަންކުރެވޭކަށް ނެތެވެ.

މޫނުމަތީގައި ހިއްލައިފައިހުރި ދާތިކިތައް ފުހެލަމުން ޝިވަން އެނދުގައި ހަމަޖެހިލިއެވެ. އަމިއްލަ ހިތަށް ވިސްނައިދެން މަސައްކަތްކުރަމުންދިޔަ ޝިވަން ގަޑިއަށް ބަލައިލިއެވެ. ނައިރާ ސްކޫލަށް ދާގަޑި ކައިރިވަމުން ދިޔަތަންފެނި އަވަހަށް ފެންވަރަން ވަނީ މަގުމަތިން ނައިރާއާާ ބައްދަލުވާނެ ކަމުގެ އުއްމީދުގައެވެ.

އާންމުކޮށް ނައިރާ ސްކޫލަށްދާ މަގުގެ އެއްފަރާތުގައި މަޑުކޮށްލައިގެން ޝިވަން ހުއްޓެވެ. ނައިރާގެ އިންތިޒާރުގައި ހުރި ޝިވަންގެ މޫނުމަތިން މާޔޫސްކަންފެންނަންފެށީ އަޖުވަދާއެކު ސައިކަލުގައި އިން ނައިރާ ފެނުމުންނެވެ. އޭނާއާާ ރަށްޓެހި ވީއްސުރެ ހިނގައިފައި ސްކޫލަށްދާ ނައިރާ މިއަދު ކުއްލިއަކަށް ސައިކަލުގައި ދާތަންފެނި ޝިވަން ހައިރާންވިއެވެ. އޭނާގެ ހައިރާންކަން އިތުރުވީ އޭނާއާާ ދިމާއަށް ކަޅިއަޅައިލި އަޖުވަދު ފެނިފައެވެ. އަދި ހަމައެއާއެކު އޭނާހުރި ފަރާތްނޫން އަނެއްފަރާތަށް މޫނު އަނބުރައިލި ނައިރާ ފެނިފައެވެ. ވަގުތުން ވެގެންއުޅޭ ގޮތަށް ޝިވަންގެ ސިކުނޑިއަށް ވިސްނައިގަނެވުނެވެ. ހިތަށްވީ ތަދާއެކު ދެރަވެފައި އޭނާއަށް އިސްޖަހައިލެވުނެވެ. ރިހެބްއަށް ދާން އެންމެ ހަފުތާއަކަށްވެފައި ވަނިކޮށް މިވީ ކިހިނެއްހެއްޔެވެ؟

** ** **

ކޮޓަރީގައި ގަމީސް އިސްތިރިކުރަން ޔައިޝް ހުއްޓެވެ. ހަނދާންނެތި ދޮރު ތަޅުނުލައި ހުރިކަމެއް ޔައިޝްއަކަށް ނޭނގެއެވެ.

“ދަރިފުޅާ ތީކޮންކަމެއް؟ ކޮބާ މިޒްރާ؟” ޔައިޝަށް ސައިބޯންގޮވަން އައި ސާޖިދާއަށް އިސްތިރިކުރަންހުރި ޔައިޝް ފެނިފައި އަހައިލިއެވެ. އެއަޑުގައި ހިތްހަމަނުޖެހުން އެކުލެވިގެން ވިއެވެ. އެފަދަ ކަންކަން ކޮށްދޭނެ އަންބަކު ހުއްޓައި ޔައިޝް އެކަން ކުރަންޖެހޭހެއްޔެވެ؟

އެއްޗެކޭ ބުނަން އަނގަހުޅުވައިލި ޔައިޝް ފާޚާނާއިން ނުކުތް މިޒްރާ ފެނިފައި މަޑުޖެހެލިއެވެ. “މިޒްރާ. ޔައިޝްގެ އެގަމީސް އިސްތިރިކޮށްދީބަލަ. އެއީ މިޒްރާ ކުރަންޖެހޭ ކަމެކޭ.” މިޒްރާގެ މޫނަށް ބަލައިލަމުން ހިތްހަމަނުޖެހިފައިހުރި ސާޖިދާ ބުނެލިއެވެ. ވަކި އެއްޗެކޭ ނުބުނެ މިޒްރާ ގޮސް ޔައިޝް އަތުން އިސްތިރިއަތުލިއެވެ. “ތިކަންތައް ނިންމާފަ އާދެ ދެމީހުން ސައިބޯން.” އެހެންބުނެލުފަށްފަހު ސާޖިދާ ދިއުމުން ޔައިޝްގެ މޫނަށް ބަލަންހުރި މިޒްރާ ކަޅިއަޅައިލިއެވެ.

“ގެނޭ އަހަރެން އަތަށް. މިޒްރާކުރާކަމެއްކުރަން މިޒްރާދޭ.” ސާޖިދާ ދިއުމާއެކު އަވަސް އަވަހަށް ދޮރުުތަޅުލަމުން ޔައިޝް ބުނެލިއެވެ. “ނޫނޭ. ކަލޭގެ މަންމަ އެދިޔައީ އަހަރެންނަށް އަމުރުކޮށްފަކާނު. މިއަދު އަހަރެން އިސްތިރިކުރާނީ. އާން އެހެންނާފެހެ. ދެންގޮސް މަންމަ ގާތުގައި ކުޓުވައިފާނެ ވިއްޔަ ދޯ.” ހިތްހަމަނުޖެހިފައިހުރި މިޒްރާ ބުނެލިއެވެ. ވަކި އެއްޗެކޭ ނުބުނެ ޔައިޝް ފާޚާނާއަށް ވަނެވެ.

“ހުރެބަލަ މިއަދު ނިކަން ރަނގަޅަށް އިސްތިރިކޮށްދޭނަމޭ.” ޔައިޝް ފާޚާނާއަށް ވަނުމާއެކު ދަތްކުނޑިވިކައިލަމުން މިޒްރާ ބުނެލިއެވެ.

ފެންވަރައިގެން ޔައިޝް ނުކުތްއިރު ކޮޓަރީގައި މިޒްރާއެއް ނެތެވެ. އިސްތަށިގަނޑު ހިއްކަމުންގޮސް އަޔަން ބޯޑް މަތީގައި އޮތް ގަމީސް ނަގައި ބަލައިލިއެވެ. އެއާާއެކު ޔައިޝްގެ ދެލޯބޮޑުވެގެން ދިޔައެވެ. ގަމީހުގެ އެއްފަޅިވަނީ ވިރުވައިލައިފައެވެ. ޔައިޝަށް ދެފަރާތަށް ބޯހޫރުވައިލެވުނެވެ. ކޮލެޖަށްދާ ވަގުތު ކުޑަތަންވެފައިވުމުން އަވަސް އަވަހަށް އެހެން ގަމީހެއްނަގައި އިސްތިރިކޮށްލުމަށްފަހު ތައްޔާރުވާން ފެށިއެވެ. ކޮޓަރިން ނުކުތް ޔައިޝް ފެނުމުން ކާމިޔާބީގެ ހިނިތުންވުމެއް މިޒްރާގެ ތުންފަތްމަތީގައި ދުވެލިއެވެ.

** ** **

ކްލާހުގައި އިން އަލްކާގެ މޫނަށް ދޭތެރެ ދޭތެރެއިން ޔައިޝްގެ ނަޒަރުގޮސް ހުއްޓެއެވެ. އެތަންފެނި އިރުއިރުކޮޅާ ޝަޔާނީ އަލްކާއާ ދިމާކޮށްލައެވެ. ލަދުގަނެފައި އިސްޖަހައިގެން އަލްކާ އިނީއެވެ.

އެހެންދުވަސްތަކެކޭ އެއްފަދައިން މިއަދުވެސް ކްލާސްތައް ނިންމައިލުމަށްފަހު އަލްކާއާ ޝަޔާނީ ގޮވައިގެން އައިސްކްރީމް ބޯން ޔައިޝް ދިޔައެވެ. އެމީހުންނާ އެއްކޮށް ޝަޔާނީ ގެންދިޔަ ނަމަވެސް އަަބަދުވެސް އޭނާ އުޅެނީ އެދެމީހުންނާ ތަންކޮޅެއް ދުރުންނެވެ. ދެމީހުންނަށް އެކަނި ހޭދަކޮށްލެވޭ ހަމައެކަނި ވަގުތުކޮޅަކީ އެއީ ކަމަށްވެފައި އޭނާގެ ސަބަބުން އެވަގުކޮޅު ގެއްލިދާކަށް ޝަޔާނީ ނޭދެއެވެ.

** ** **

ކޮޓަރީގައި ދެފަރާތަށް ހިނގައިލަ ހިނގައިލާ މިޒްރާ އިނީ ހާސްވެފައެވެ. ދިމާވެގެން އުޅޭ މައްސަލައިގެ ބޮޑުކަމުން ހަދާނެގޮތެއް ނޭނގި އިރުއިރުކޮޅާ ނިތްކުރިމަތީގައި އަތުން ޖަހައިލައެވެ.

އެންމެފަހުން ހިނގައި ހިނގައި ފަޔަށް ވާޅުވާން ފެށުމުން އެނދުމަތީގައި މިޒްރާ އިނށީދެލިއެވެ. އަދި ހަމަޖެހިލެވޭތޯ މަސަތްކަތްކުރަމުން ދިޔައެވެ. ކޮންމެވެސް ގޮތެއް އޮންނާނެއެވެ. ކޮންމެ މައްސަލައަކަށްވެސް ހައްލެއް އޮންނަން ޖެހޭނެއެވެ.

ސިކުނޑިއަށް ބާރުލައިފައި ވިސްނަމުން ދިޔަ މިޒްރާއަށް ރަނގަޅު ގޮތެއް ވިސްނުނީ ކަންނޭނގެއެވެ. ނުލަފާ ފާޑަކަށް ހިނިތުންވެލުމަށްފަހު ގަޑިއަށް ނަޒަރު ހިންގައިލިއެވެ.

އޭނާގެ ޕްލޭނާ އެއްގޮތަށް އަމަލު ކުރަން ފެށޭނީ ޔައިޝް ގެއަށް އައި އިރަކުންނެވެ. ހިނިތުންވެލަމުން ފޯން ނަގައި ޒާންގެ ނަމްބަރަށް ގުޅާލިއެވެ. އަދި އޭނާ ހޯދަންބޭނުންވާ އެއްޗެއްގެ ނަންބުނެ މިރޭވުމުގެ ކުރިން އެއެތި ގަނެގެން ގެނެސްދިނުމަށް އެދުނެވެ. ހެވިފައި ޒާންވެސް އެކަމަށް އެއްބަސްވިއެވެ. ރޭގަނޑަށް އިންތިޒާރު ކުރާ ހާލު މިޒްރާ ފެންވަރަން ދިޔައެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.