ޗައިނާ ދަތުރު

އާދަނާއި ތަކުރަކީ ދެ ވިޔަފާރިވެރިންނެވެ. ތަކުރު ވިޔަފާރި ދަތުތުރުތަކުގައި ޗައިނާއަށް ގޮސްއުޅުނެއްކަމަކު މިއީ އާދަނު ޗައިނާއަށް ކުރިފުރަތަމަ ދަތުރެވެ. އެއާރޕޯޓުން ހޮޓަލަށް ދެވުމާއެކު ދެމީހުން ތިބެންހަމަޖެހިފައިވާ ކޮޓަރީގެ ތަޅުދަނޑި ޙަވާލުކުރެވިއްޖެއެވެ. ޗައިނާގައި ކިރިޔާވެސް ނިދާލެވޭވަރުގެ ހޮޓަލެއްވިއްޔާ ނުހަނު އަގުބޮޑެވެ. އެހެންވެ އާދަނާއި ތަކުރު އަދިވެސް ގިނަ ދިވެހި ވިޔަފާރިވެރިން ގޮސްތިބެނީ ވަރަށް އާދައިގެ ހޮޓާތަކުގައެވެ. މިފެންވަރުގެ ހޮޓާތަކުގެ ފާޚާނާގައި މުސްލިމް ޝަވަރެއް ނުހުރެއެވެ. ޠާހިރުވާން ހަދާނެގޮތަކާމެދު އާދަނު ވަރަށް ވިސްނިއެވެ. އެކަމަކު ތަކުރު ކާރީގައި މިވާހަކަ އަހައިފިއްޔާ އާދަނަކީ ގަމާރު މީހަކަށް ވެދާނެތީ މިވާހަކަ އެއްގޮތަކަށްވެސް ނުދައްކައެވެ. ބާޒާރުގައި އުޅުމަށްފަހު ކުއްލި ކުއްލިއަށް އާދަނު ހޮޓަލަށް އަންނަންޖެހެއެވެ. ކޮންމެފަހަރަކުވެސް ފާޚާނާއަށް ވަނދެފައި އާދަނު ނިކުންނަނީ ފެންވަރާލައިގެންނެވެ. މިއީ ތަކުރަށް އާދަނުގެ ކިބައިން އަލަށްފެނުނު ކަމެކެވެ. ބެންކޮކާއި ދުބާއީ ދަތުރުތަކުގައި އާދަނު ފެންވަރަނީ ވަރަށްމަދުންނެވެ. އެއްދުވަހަކު އެއްކަލަ ކަންތަކާ ލައިގެންފިއެވެ. އަވަސްއަރުވާލައިގެން ހޮޓަލަށް އައިސް އާދަނު ފާޚާނާއަށް ވަނދެއްޖެއެވެ. ތަކުރު ކުއްލިއަކަށް އެއްޗެއް ހަނދާންވިއެވެ.

އާދަނު ފާޚާނާއިން ނިކުތީ އާދައިގެމަތިން ފެންވަރައިގެންނެވެ. ނިކުތުމާއެކު ތަކުރު އަހައިފިއެވެ.
ތަކުރު: އާދަނާ، މިރަށަށް އައިފަހުން ބޮޑުކަމު ޙާޖަތެއް ނުޖެހޭ ހެއްޔެވެ؟
އާދަނު: ނޫން. ހިސާބަކަށް ބަނޑުދިއާކޮށް އުޅޭތީ ވަރަށްގިނައިން ބޮޑުކަމު އެބަދެވެއެވެ.
ތަކުރު: ތިޔަ ފާޚާނާގައި މުސްލިމު ޝަވަރެއް ނެތްއިރު ޠާހިރުވަނީ ކިހިނެތް ހެއްޔެވެ؟

އާދަނު ވަރަށް ކަންބޮޑުވިއެވެ. އެހެނީ އޭނަހުރީ މިސުވާލު ކޮށްފާނެތީ ކުރިއްސުރެ ކަންބޮޑުވެފައެވެ. ބުންޏެވެ.
އާދަނު: ދެން ކޮންގޮތެއް ހަދާނީވެސް؟ ބޮޑުކަމުދާ ކޮންމެފަހަރަކު ފެންވަރާލަނީ……..

ތަކުރު ހަމައިންގޮތަށް ބަހެއްނުބުނެ އިނީއެވެ. އާދަނު ކުޑަކޮށް ނުތަނަވަސް ވެއްޖެއެވެ. އަދި އަހައިފިއެވެ.
އާދަނު: ތިޔަހެންޏާ ތަކުރު ހަދަނީ ކިހިނެއް ހެއްޔެވެ؟
ތަކުރު: އާދަނުގެ ކަންތަކާހެދި ބުނާނީވެސް ދެންކީކޭހެއްޔެވެ؟ ފާޚާނާގައި ބާލިދީއެއް ބަހައްޓައި އެއަށް ޖަގެއް ލާފައި އޮންނަތަނެއް އާދަނަކަށް ނުފެނޭހެއްޔެވެ؟
އާދަނު: ތިބާލިދީއާއި ޖަގުވެސް ދެކެމެވެ. އެކުންވާގޮތަކީ މާލޭގައި މުޅިންވެސް ބޭނުންކޮށް މިއުޅެނީ ވާގަނޑުވިއްޔާއެވެ. ހޯދާ ހޯދާ ވާގަނޑު ނުފެނުމުން ދެންހަދާނެ ހަމައެއްގޮތެއްވެސް ނޭނގި ފެންވަރާލަނީއެވެ. އެކަމަކު ބުނަންހެއްޔެވެ. ފެންވަރާ މާގަނޑުން އަންނަފެން މާބޮޑަށް ހޫނުވީމާ އަބަދުވެސް ފެންވަރާއުޅެނީ ބާލިދީއަށް ފެންއަޅައިގެން ޖަގުން ގަޔަށް ފެންއަޅައިގެންނެވެ. ދެންފެންވެރުމުގެ ތެރޭގައި ޠާހިރުވެލަނީއެވެ.
ތަކުރު: ގޯހެއްނޫނެވެ. ޖަގާއި ބާލިދީގެ ބޭނުންވެސް އެބަކުރަމުތާއެވެ. އެކަމަކު ކަލޭނޫނީ ބޮޑުކަމުދާ ކޮންމެފަހަރަކު ހިނެއިންވާޖިބުވާ މީހެއް މަށަކުވާ ނުދެކެމެވެ.

ނޯޓް: މިއީ ހަޤީގީ ވާހަކައެކެވެ. ނަންތައް އެވަނީ ބަދަލުކޮށްފައެވެ.