ހެއްލުމުގެ ތެރޭގައި ވެވުނީއެވެ…….

މިއީ ހަގީގީ ހާދިސާތަކެއްގެ މައްޗަށް ބިނާކޮށް ލިޔެފައިވާ ވާހަކައެކެވެ.

އެސްފިޔަ ޖަހާލަންވެސް ހަނދާންނެތިފައި އިނދެ އަހަންނަށް ބެލެމުންދިޔައީ އޮއްސެމުންދިޔަ އިރާއި އެ އިރުގެ ދޯދިދައް ދުނިޔެމައްޗަށް ގެންނަމުން ދިޔަ ކުލަތަކާ ކަނޑުގެ ލޮނުގަނޑަށް އަޅުވަމުން އެދާ ވިދުވަރުގެ ފުރިހަމަކަމަށެވެ. ދަތުރުކުރަމުންމިދާ ލޯންޗު އޭގެ އެންމެ ބާރު ދުވެލީގައި ކަނޑުގެ ވިދުންގަދަ ލޮނުގަނޑު ދެފަރާތައް ކަހަމުންދާއަޑު ނުހަނު ހިތްގައިމެވެ. މި ހިއްގައިމުކަމުގެ އިންތިހާގައިވެސް އަހަރެންގެ ސިކުނޑީގައި މަޑުމަޑުން ކޮށައިލީ އަހަރެންގެ މާޒީއެވެ. ކެތްތެރިކަމާ އިތުބާރުގައި ހިފަހައްޓަމުން އައި އަހަރެންގެ ދިރިއުޅުން ބަދަލުވެގެން އައި ގޮތެވެ.

އަހަންނަކީ ސްކޫލް ދައުރުގައި ކިޔެވުމަށް މޮޅު ކުއްޖެއްނޫނެވެ. ކުޅިވަރުގައިވެސް ސްކޫލުން މާ ފާހަގަކުރެވޭ ކުއްޖެއްނޫނެވެ. އެހެނަސް އިނގޭހެއްޔެވެ؟ އެއްކަމެއްގައި އަހަރެން މިއީ މުޅި ސްކޫލްގެ އެއްވަނަ އެވެ. އަދި މުޅި ރަށުގައިވެސް އަހަރެންގެ އުމުރުފުރައިން އެއްވަނައެވެ. ކިޔެވުމުގައި ވިދާލާފައި ނުވިއެއްކަމަކު މުޅި ސްކޫލުންނާއި މުޅިރަށުގައި އަހަންނަށް ތައުރީފުކުރާ މީހުން އެކަމުގެ ސަބަބުން ގިނަވެގެންދިޔައެވެ. ސްކޫލް އެސެމްބްލީގައި ޕްރިންސިޕަލް ހުރިހާ ކުދިންނަށް ނަސޭހަތްދެމުން ނަމޫނާއަކަށް ބަލާށޭބުނެ އަހަންނަށް އިޝާރާތްކޮށް އަހަރެންގެ ނަން އެ އެންމެންގެތެރޭގައި އެތައް ދުވަހަކު ހާމަކުރީ އަހަންނަކީ ހަމަ ހަގީގަތުގައިވެސް އެގޮތުގައި އެއްވަނަ ކަމުގައިވީތީކަން ޔަގީނެވެ. ކޮން ކަމަކުން ކަން އިނގޭ ހެއްޔެވެ؟ ދީންވެރިކަމުގައެވެ.

އިނގޭހެއްޔެވެ؟ އެގޮތުގައި ހުރުމަށް އަހަންނަށް ހާދަ ދަތިތަކެއް ކުރިމަތިވިއެވެ. ސްކޫލުންނެވެ. ރަށުތެރެއިންނެވެ. އަހަރެންގެ ގެއިންނެވެ. އަދި އަހަރެންގެ އުފަން މައިންބަފައިންގެ ފަރާތުންވެސް މެއެވެ. ވަރަށް ކެތްކުރީމެވެ. އިންތިހާއަށް ކެތްކުރީމެވެ.

އިނގޭހެއްޔެވެ؟ އަހަންނަށް ރަށުމީހުންގެ މަލާމާތާއި ކުރިމަތިލާންޖެހުނެވެ. އެއްއުމުރުގެ ކުދިންނާއި ބައެއް ބޮޑެތިމީހުންގެ މަލާމާތުގެ ބަސްތައް އަޑުއަހަންޖެހުނެވެ. ގާތްތިމާގެ މީހުންގެ ނުރުހުމާވެސް ކުރިމަތިލީމެވެ. އެހެނަސް ކެތަތެރިވަމުންނެވެ.

ސްކޫލުގައި އުޅުނުކަމުގައިވިޔަސް ސްކޫލުގެ ގަވާއިދުތައް މުގުރާލާފައި ނަމަވެސް އަހަރެން އަހަރެންގެ ދީނުގެ ގަވާއިދުތަކުގައި ހިފަހައްޓަމެވެ. އެހެންކަމުން އަހަރެންގެ ތުނބުޅި މައްސަލައަކަށްވިއެވެ. ކިތަންމެ ދުވަހަކު ތުނބުޅިބޭލުމަށް އަންގައިފިއެވެ. އެހެނަސް ހަމަހިލާ އެކަން ނުކުރީމެވެ. ދެންދިމާވީ އަހަރެން ޔުނީފޯމު ފަޓުލޫނުގެ ފައިކުރީގެ މައްސަލައެވެ. އޮޅާފައި ހުންނާތީއެވެ. މިހެންގޮސް އެތައް މައްސަލަތަކެއް ފެންމަތިވެއްޖެއެވެ. އެމީހުންގެ ނަސޭހަތް ތަކުރާރުކުރަމުންދިޔައެވެ. އެހެނަސް އަހަރެން ހަމަ ބީރު ކަންފަތެއް ދީގެން ހުރީމެވެ.

އިނގޭހެއްޔެވެ؟ އަހަރެން ކުލާހުގައި އިނދެފައިވެސް ބަރާބަރު ވަގުތައް މިސްކިތަށް ދަމެވެ. އެކަމަށް ޓީޗަރުގެ ހުއްދައަށްވެސް އެދެމެވެ. ބައެއްދުވަހަކަށް ހުއްދަވެސް ލިބެއެވެ. އެހެނަސް އަނެއްބައިދުވަހަކަށް ހުއްދަ ނުލިބެއެވެ. ހުއްދަ ނުލިބޭ ދުވަސްދުވަހު އަހަރެން ކަންތައް ކުރާގޮތް އިނގޭހެއްޔެވެ؟ ޓީޗަރު ރުޅިއަޔަސް ބަންގި ގޮވުމާއެކު އެންމެ ސިކުންތެއްވެސް މަޑުނުކޮށް މިސްކިތައް ދަނީއެވެ. މިހެން ކަންތައްކުރަންފެށުމުން ބައެއް ޓީޗަރުން އެ މައްސަލަ ޕްރިންސިޕަލްއާއި ހަމައަށް ގެންދިޔައެވެ. އެހެނަސް އަހަރެންބިރެއް ނުގަންނަމެވެ. ޖެހިލުމެއްވެސް ނުވެއެވެ. އެޔަށްވުރެ އަހަރެންގެ ހިތުގައި އޮތް އީމާންތެރިކަން ވަރުގަދައެވެ.

މި މައްސަލަތަކާހުރެ އަހަރެންގެ މައިންބަފައިން ސްކޫލަށް ހާޒިރުކުރުން ގިނަވެއްޖެއެވެ. ކަންމިހެން ވާން ފެށުމާއެކު ދެންދިމާވީ ހަގީގަތުގައިވެސް އަހަރެންގެ ހިތައް ވަރަށް އަސަރުކުރުވި ކަންތައްތަކެކެވެ. އަހަރެންގެ މަންމައާއި ބައްޕަ މިކަންތަކުގައި އަހަރެންދެކެ ހިތްހަމަނުޖެހުނީއެވެ. މަންމައާއި ބައްޕަގެ ބަސްތަކުން އަހަރެންގެ ހިތް ރޮއްވާލައެވެ. ސަބަބު އިނގޭހެއްޔެވެ؟ އަހަރެންގެ ދީނުގައި ސާބިތުވެހުރުމަށް އަހަންނަށް ހިތްވަރުދީ ނަސޭހަތްދޭން ތިބި މީހުންގެ ފަރާތުން އަހަންނަށް އެފަދަ ނުރުހުންތެރިކަމެއްދެއްކީތީއެވެ. މަންމަ އަކީ ދަރިންގެ ސުވަރުގެ ނޫންހެއްޔެވެ؟ ވީއިރު އަހަރެންގެ މަންމަ މިހެދީ ކިހިނެއްޔެވެ؟ އަހަންނަށް ފެނުނީ ހަމައެކަނި އެމީހުންގެ ނުރުހުމެއްނޫނެވެ. ކިޔާލާށެވެ.

އެގޮތައް މަންމައާއި ބައްޕަ ސްކޫލަށް ހާޒިރުކުރި ދުވަހެއްގައި މަންމަގެ އަނިޔާ ވަރަށް ރަނގަޅަށް އަހަންނަށް އިހުސާސްކުރަންޖެހުނެވެ. އަނިޔާ ކޮށްގެން ނުފުދުމުން އަހަރެންގެ ފޭރާން ބާލުވާފައި މަގުމައްޗަށް ނެރުނެވެ. އިނގޭހެއްޔެވެ؟ އެދުވަހު އަހަރެންގެ ލޯބިވާ ބައްޕަ އަހަރެން ގައިގައި ދަގަނޑުބުރިއަކުން ޖެހި ހަނދާން މިއަދުވެސް ލޯމަތީގައި އެއްވެސް ބަދަލުވުމެއްނެތި ފެންނަމުންދެއެވެ. އަހަރެންގެ ގައިގައި އެދުވަހު އެޅިވޭނުގެ އަސަރު މިހާރުވެސް ހުރެއެވެ. މިހާރުވެސް އެއަނިޔާތަކުގެ އިހުސާސް އަހަރެންގެ ހަށިގަނޑުގެ އެތައް މިތަނުން ކުރެއެވެ. މަންމަގެ އަތުން ދިން އަނިޔާތައް ދުވަހަކުވެސް ނުފިލާނެއެވެ. ކާންނުދީ ބަނޑަށް ބެހެއްޓި ދުވަސްތައް މިހިތުންފިލައިގެން ދުވަހަކުވެސް ނުދާނެއެވެ. ބައްޕަގެ ފަރާތުން ފެނުނު ހަރުކަށިކަމާ ވޭންގަދަ އަނިޔާތައް އަދި އަމުދުން ހިތުން ނުފިލާނެއެވެ.

އިނގޭހެއްޔެވެ؟ އަހަންނަށް އެހުރިހާ އަނިޔާތައް ލިބުނީ ހަމަ އެންމެ ކަމެއްގެ ސަބަބުންނެވެ. ހަމައެންމެ ކަމެއްގައި ހިފަހައްޓައިގެން ސާބިތުވެ ހުރުމުގެ ސަބަބުންނެވެ. އަހަރެންގެ ލޯބިވާ އިސްލާމްދީނެވެ. އެހެނަސް ކެތްކުރެވޭނެ އެންމެ މަތީ ދަރަޖައަށް އަހަރެން ކެތްކުރީމެވެ. އެހުރިހާ އަނިޔާ ދިން އިރުވެސް ދިފާއުގައި ކުޑަ ބަހެއްވެސް މި ދުލުން ބޭރުކޮށްފައެއްނުވާނެއެވެ. ކީއްވެކަން އިނގޭހެއްޔެވެ؟ އަހަރެންގެ ދީނުގެ ހައްގުގައެވެ. ހުރިހާ އަނިޔާތަކެއް ބަލައިގަންނަމުން ދިޔައިރުވެސް ދުވަހަކުވެސް މިގޮތް ދޫކޮށްލަން އަހަރެންގެ ހިތައްވެސް ނާރައެވެ.

އިނގޭހެއްޔެވެ؟ އޭރު އަހަރެން މުޅިންވެސް ވަގުތު ހޭދަކުރަމުން ދިޔައީ މިސްކިތުގައެވެ. ނަމާދުކުރުމުގައެވެ. ޤުރުއާންކިޔެވުމުގައެވެ. ސްކޫލުގައިނަމަ ހުސްގަޑިތަކުގައި ލައިބްރަރީގައި ދީނީ ފޮތްތައް ކިޔުމުގައެވެ. އަހަރެންގެ ދުވަސް ފެށެނީ ފަތިސްނަމާދުންއޭގެވަގުތުގައެވެ. ވަގުތަށް ރައްކާތެރިވުމުގައިވެސް އޭގެ އިންތިހާގައި ހިފެހެއްޓީމެވެ. އަހަރެންގެ ދުވަސްތައް ތަކުރާރުވަމުންދިޔައީ އެއްގޮތަކަށެވެ. ސްކޫލަށް ނޫނީ މިސްކިތައްދާން ނޫންގޮތަކަށް އަހަރެން ގެއިން ނުކުންނަލެއް ވަރަށް މަދުވާނެއެވެ. ބައެއްދުވަސްދުވަހު ފުޓުބޯޅަކުޅެން ދަމެވެ.

އަހަންނަކީ ގޯލްކީޕަރެކެވެ. އެހެނަސް ކިތަންމެ މުހިންމު މުބާރާތަކަސް ކިތަންމެ މުހިންމު މެޗަކަށްވިޔަސް އަހަރެން އަންނަނީ ނަމާދުކޮށްގެނެވެ. ގިނަ ދުވަސްދުވަހު އަހަންނަށް ދަނޑަށް ހާޒިރުވެވޭއިރު ގައުމީ ސަލާމްވެސް އޮންނާނީ ނިމިފައެވެ. އެހެނަސް އެކަމާ އެއްޗެއް ހިތަކަށް ނާރައެވެ. އަހަރެން އޮންނާނީ ޓީމާއި ކޯޗުކައިރީގައިވެސް ނަމާދުގަޑިޔަށް އަހަރެން ބަދަލުކޮށްދިނުމަށް އެދިފައެވެ. ފެންވަރައިގެން ވަގުތައް މިސްކިތަށް ދެވޭހާ ވަގުތުއޮއްވައި ބަދަލުނުކުރިޔަސް އަހަރެން ދަނޑުން ފައިބައިގެންވެސް ދަމެވެ.

އިނގޭހެއްޔެވެ؟ ކޮންމެ ހޯމަ ބުރާސްފަތިދުވަހަކާއި ކޮންމެ ހަނދުމަހެއްގެ ތިން ދުވަހު އަހަރެން ރޯދަ ހިފަމެވެ. ހާއްސަކޮށް ރޯދަމަހުގައި އަޅުކަންތަކަށް އިތުރަށް ސަމާލުކަންދެމުން ދިޔައީމެވެ. މެންދުރު ނަމާދާއި އަސުނަމާދާއި ދެމެދު އެއްކޮށް މިސްކިތުގައި ހޭދަކުރަނީ ޤުރުއާންކިޔެވުމުގައެވެ. މިނޫނަސް ކޮންމެ ނަމާދެއްގެ ފަހުގައި ޤުރުއާން ކިޔެވުމަކީ އަހަރެންގެ އާދައެވެ. ޤުރުއާނަކީ އަހަރެންގެ އެންމެގާތް އެކުވެރިޔާއެވެ. މަގުދައްކައިދީ މަގުގައި ސާބިތުކޮށްދިން އެހީތެރިޔާއެވެ. އަހަރެން ޤުރުއާނަށް ލޯބިޖެހިފައިވީ ވަރަށްވެސް ބޮޑަށެވެ.

ސްކޫލް ދައުރު ނިމުމުން އަހަރެން ބޭނުންވީ ކިޔެވުމަށް މާލެ ދާށެވެ. އަހަރެން ކިޔަވަން ބޭނުންވީ ޤުރުއާން ޓީޗިން ނޫނީ ޤާރީ ކޯސް ފަދަ ކޯހެކެވެ. ނަސީބަކުން އަހަރެންގެ މައިންބަފައިން އަހަރެން މާލެ ފޮނުވިއެވެ. އަހަރެންގެ ސަބަބުން ރަށުމީހުންގެ ފަރާތުން އެމީހުންނަށް ރައްދުވާ ބަސްތަކުގެ ސަބަބުންކަމެއް ނޫނީ އެހެން ސަބަބަކާހުރެކަމެއް ބުނެދޭކަށް ނޭނގެއެވެ.

މާލެއަށް ބަދަލުވީމެވެ. އަހަރެންގެ އުޅުމަށް އެއްވެސް ބަދަލެއްނާދެއެވެ. ބަދަލެއްގެންނަން ހިތައްވެސް ނާރައެވެ. އެގޮތުގައި ސާބިތުވެ ހުރެ ކިޔަވަމުންދިޔައީމެވެ. އިނގޭހެއްޔެވެ؟ މާލޭގައި އުޅެންޖެހުނީ ވަރަށްވެސް ދަތިކޮންނެވެ. ހުންނަ ގެއިން ކާންލިބެނީ ހާލަކުން ފަހަރެއްގައެވެ. މަންމަމެންގެ ހާލަތު ހުންނަގޮތުން އެހާ ރުފިޔާ ފޮނުވޭ ގޮތެއް ނުވެއެވެ. އެހެނަސް ބުނެދެންހެއްޔެވެ؟ އަހަރެންގެ އަތްމަތި ދުވަހަކުވެސް ހުސްނުވެއެވެ. ދުވަހަކުވެސް ބަނޑަށް ހުންނަން ނުޖެހެއެވެ. އަހަރެންގެ އަތުގައި ބަނޑުފުރާ ކައިލެވޭވަރަށް ރުފިޔާނުހުންނަ އެންމެ އިރެއްވެސް ނުދާނެއެވެ. ހުދު އަހަރެންވެސް އެކަމާ އަޖާއިބުވެއެވެ. ހީވެސް ނުކުރާ ގޮތްގޮތުން ރިޒުޤު ލިބެމުންދިޔައެވެ. ޝުކުރުކުރުންމަތީ އަހަރެން އުފަލާއެކު ދެމިހުރީމެވެ.

އަހަރެންގެ ހަޔާތައް ތޫފާންއައީ އެގޮތުގައި ދުވަސްތައް ގުނަމުން ދަނިކޮށެވެ. އަހަރެންގެ ރަށުގެ އެކުވެރިޔަކު މާލެ އައީއެވެ. އެޔަށްފަހު އޭނައާއެކީގައި ވަގުތުތައް ހޭދަކުރަން އޭނަ ބާރު އަޅަމުންދިޔައެވެ. އަހަރެންވެސް އެއީ ރަނގަޅު އެކުވެރިޔެއްކަމުގައި ދެކިގެން އުޅެންފެށީމެވެ.

އެކުވެރިޔާއާއެކުގައި ދުވަސްތައް ހޭދަކުރަންފެށުމުން ހަވާ ނަފްސު އަހަންނަށް ގޮވަންފެށިއެވެ. އެވަގުތުގެ ޝައިތޯނާ އަހަރެންގެ އެކުވެރިޔާ އަހަންނަށް ބާރު އަޅަމުން ދިޔައީ ބިޓެއް ނެގުމަށެވެ. ކުއްޖަކާ ގުޅުމަށެވެ. އެހެނަސް އަހަރެންމިއީ ދުވަހަކުވެސް އެކަހަލަކަމެއް ނުކުރާ އެކަހަލަ ކަންތައް ނުވެސް ދަންނަ މީހެއްކަމުން އެކަމާ ވަރަށް ދެކޮޅު ހެދީމެވެ. އެހެނަސް ނޭނގުމުގައި ހުއްޓާ އަހަރެންގެ އެކުވެރިޔާ އަހަރެންގެ މަގު އޮޅުވާލައިފިއެވެ. އެތައްދުވަހެއްގެ އެތައް މަސައްކަތަކުންނެވެ.

ވަގުތީގޮތުން މަޖަލަކަށް ކުއްޖަކާ ގުޅުނީމެވެ. އެކުވެރިޔާ ހޯދައިދިން ކުއްޖެކެވެ. ގިނަފަހަރަށް އަހަރެން ގުޅަން ނުކެރިފައި އިންނަ އިރު އެކުވެރިޔާ އަހަރެންގެ ފޯނު އަތުލައިގެން ގުޅާފައި އަހަރެންގެ ކަންފަތުގައި ފޯނު ޖެއްސުމަށްފަހު ވާހަކަ ދައްކަން ވީ ގޮތާ ދައްކަންވީ ވާހަކަ ކިޔައިދޭނެއެވެ. މިގޮތުގައި ދުވަސްތައް ދަމުން އެކުއްޖާއާ ބައްދަލުކުރަންދިޔައީމެވެ. އަންހެންކުއްޖާއަށް އަހަރުމެން ނުފެންނަނިސް އަހަރެމެންނަށް އެކުއްޖާ ފެނުނެވެ. މަގުމަތީގައި ކަމަށްވުމުން އަދި އެކުއްޖާއަށް އަހަރެމެން ނުފެނިގެން އުޅެނީއެވެ. އަހަރެން ވަގުތުން ގޯޅިގަނޑަކަށްވަދެ ފިލައިފީމެވެ. އަހަރެންގެ އެކުވެރިޔާ އައިސް ފިނޑިމީހެކޭ ކިޔާ ދިމާކޮށްގަނެގެން އަހަރެން ގެންގޮސް އެކުއްޖާއާއި ބައްދަލުކުރުވައިފިއެވެ.

އޭގެފަހުން ވަރަށް ގިނައިން ދިމާވެއެވެ. ބައްދަލުކުރަންދަނީ އެ އަންހެންކުއްޖާގެ މަންމައަށް އޮޅުވާލައިގެން ދަރުސްތައް އޮންނަރޭރޭގައި ދަރުހަށް ކަމަށް ބުނެފައެވެ. އޭރުވެސް އަހަރެން ބަރާބަރަށް ނަމާދުކުރަމެވެ. އެހެނަސް އެހެން ކަންތައް ދިޔައީ މަޑުމަޑުން ދުރުވަމުންނެވެ. އަހަންނަށް އިހުސާސްނުވާފަދައެވެ.

އެއީވެސް އަހަރެން ފަދައިން ކޯސް ހަދާކުއްޖެކެވެ. ކިޔެވުމުގެ އިތުރަށް އަހަރެން އައީ ޕާޓްޓައިމް ޖޮބެއްވެސް އަދާކުރަމުންނެވެ. އެހެންނަމަވެސް ޖޮބަށް ފަރުވާކުޑަކުރަމުން އަހަންނަށް އާދެވުނީ އެ އަންހެންކުއްޖާއަށް ސަމާލުކަން ދެވެމުންނެވެ. ކުލާހަށް ގެންގޮސްދީ ގެޔަށްގެންގޮސް ހަދަނީ އަހަންނެވެ. ދުވަސްތައް މިގޮތައް ވޭތުވާންފެށުމުން އަހަންނަށް އެކުއްޖާދެކެ މިކިޔާ އިޝްގީ ލޯބި ވެވިއްޖެއެވެ. ދެން އަހަރެންގެ ރަހުމަތްތެރިޔާ ލަފާދެމުންދިޔައީ ނުބައި އަމަލުތަކަށް އަރައިގަތުމަށެވެ. އަދި އަހަރެންގެ ބައިވެރިޔާވެސް ދިޔައީ އެކަމަށް އަހަންނަށް ހިތްވަރުދީ ދައުވަތުދެމުންނެވެ. މަގުގެއްލެމުންގޮސް ކުޑަކޮށް އޭނާގެ އަތުގައި ހިފާލައިހަދަންފެށީމެވެ. ރަނގަޅު ނަސޭހަތެއްދޭނެ އެއްވެސް މީހަކުނެތި އަހަރެން މަޑުމަޑުން ހަލާކުވަމުން ދިޔައެވެ. އެހެނަސް އެންމެ ނުބައި އަމަލަކަށް އަރައިގަންނާކަށް ނުކެރުނެވެ.

ދުވަސްތައް މިގޮތައް ދަމުންގޮސް އެކުއްޖާގެ ގޮތް ރަނގަޅަށް ދަސްވާންފެށިއެވެ. ރުންކުރު ގޮދޫނުކުރާ ކުއްޖެކެވެ. ނުބައި ފިރިހެން ރައްޓެހިން ގެންގުޅޭކުއްޖެކެވެ. އަހަރެން ނަސޭހަތްދީ އެމީހުންނާ ގުޅުން ނުބާއްވަން ބުނުމުންވެސް ވީ ފައިދާއެއް ނެތެވެ. އަހަންނާވެސް ފަހުންފަހުންއައިސް ވާހަކަދައްކަނީ ވަރަށް ހަޑިކޮށެވެ. އަގެއްނެތްމީހަކަށް ހަދާފައެވެ. އަހަރެން މޮޔަވިއެވެ. އެކުއްޖާ އެއީ ފުރާނަކަމުގައި ހީކުރެވުނެވެ. އެކުއްޖާގެ ކައިރީގައި ރޮއި އާދޭސްކުރީމެވެ. ނުލިބިއްޖެނަމަ މަރުވާނަންކަމުގައި ކިޔާ އެތައް ވާހަކައެއް ދެއްކުނެވެ. އަހަރެންވީ މުޅިން ހަލާކުވެފައެވެ. މަޑުމަޑުން އަހަރެން ޤުރުބާންްވަމުންއައި އަހަރެންގެ ލޯބިވާ ދީނަށް ފަރުވާކުޑަކުރެވެން ފެށުނީ ނޭނގުމުގެ ތެރޭގައި ހުއްޓައެވެ.

ބައިވެރިޔާގެ އަމަލުތައް ހުންނަ ގޮތުން ކެތްނުވެގެން ރުޅިވާން ޖެހުނީއެވެ. ވަރަށް ރުއީމެވެ. ހިތާމަކުރީމެވެ. އެހެނަސް ދެންވެސް އަހަރެންގެ އަސްލު މަގަށް ރުޖޫއަވާކަށް އަހަރެންގެ އެކުވެރިޔާ ތަނެއް ނުދިނެވެ. އަހަރެންގެ އެ އެކުވެރިޔާގެ ބަހަށް ދެން އަހަރެން ނިންމީ އެއްވެސް އަންހެންކުއްޖަކާ ސީރިއަސްކޮށް ނުގުޅުމަށެވެ. ހަމަ މަޖަލަކަށް ކުދިން ގެންގުޅުމަށެވެ.

އަހަރެންގެ އަތޮޅުން އެހެންކުއްޖަކާ ވާހަކަދައްކަމުންދިޔައީމެވެ. މަޖަލަކަށް ވަގުތު ދުއްވާލުމުގެ ބޭނުމުގައެވެ. ފޫހިފިލުވާލާށެވެ. އެގޮތައް ދެތިން ކުއްޖަކު ގެންގުޅުނީމެވެ. އެހެނަސް ވަގުތު އައިސް ޖެހުމުން ކައިވެނިކުރަންޖެހުނީ މަޖަލަށް ގުޅުނު ކުދިންތަކުގެ ތެރެއިން އެއްކަލަ އަހަރެންގެ އެކުވެރިޔާ އެންމެ ހިތްހަމަނުޖެހުނު ކުއްޖާއާއެވެ. އިބްރަތެއްކަން ޔަގީނެވެ.

އަހަންނަށް ހުރިހާއެއްޗެއް ވިސްނުނެވެ. ހާދަހާދެރައެވެ. ޖާނުން ޤުރުބާންވެގެން ފުރާނަ އަތްމައްޗަށްލައިގެންހުރެ އަހަރެން ދިފާއު ކުރަމުންއައި އަހަރެންގެ ލޯބިވާ ދީން ޝައިތޯނާ އަހަރެންގެ އަތުން ފޭރިގަތީއެވެ. ނުބައި އެކުވެރިޔާ އަހަރެންގެ މުޅި ދީން ހަނދާންނެއްތުވީއެވެ. ނުބައި ނަސޭހަތްތައް އަޑުއެހުނީއެވެ. ހަވާ ނަފްސަށް ތަބާ ވެވުނީއެވެ. ގެއްލުމާއި ހެއްލުމުގެ ތެރޭގައި ވެވުނީއެވެ. އިންސާނުންގެ ސިފައިގައިވެސް ޝައިތޯނުން އުޅޭކަން ހަނދާނުން ކައްސައިލީއެވެ.

އެހެނަސް އިންޝާﷲ މިއަދު މިވަނީ ތައުބާވެފައެވެ. ކުރެވުނު ހުރިހާކަމަކަށް ތައުބާވެ ރުއީމެވެ. މިއަދުވެސް ހިތާމަ ކުރަމެވެ. އެހެނަސް ކުރީގެ ސާބިތުކަމަށްއެދި ދުޢާ ކުރަމުން އެ އަޒުމުގައި ދިރިހުރީމެވެ. އިނގޭހެއްޔެވެ؟ އަހަރެންމިއީ މިހާރު އަހަރެންގެ މަންމައާއި ބައްޕަގެ އެންމެ ލޯބިވާ ދަރިފުޅެވެ. ހަގީގީ އުފާވެރިކަމަކީ މިއީއެވެ. ދެވަނަ ފަހަރަށް މަގުދެއްކެއްކެވީތީ ﷲ ސުބުޙާނަހޫ ވަތަޢާލާއަށް ޝުކުރުކުރުމުގައިދެމިހުރީމެވެ. އިންޝާﷲ ދެން މި އަޒުމު އެފަދަ އެއްވެސް ޝައިތޯނަކަށް ގުޑުވާނުލެވޭނެއެވެ.

ހިޔާލުތައް ވިއްސި ވިހާލިވެގެންދިޔައީ ކުއްލިޔަކަށް ލޯންޗް މަޑުކޮށްލުމުންނެވެ. ރަށަށްއާދެވުނީއެވެ. ޖެޓީމަތީގައި ހުރި އަހަރެންގެ އަންހެނުން ފެނުމާއެކު ހަނާ އަޅާލުމަށްފަހު އަހަރެން ލޯންޗުން ފައިބަންދިޔައިރު ހިތްހަމަޖެހުމުގެ ނޭވާއެއް ފަޒާގެ ތެރެއަށް ދޫކޮށްލެވުނީ ހެއްދެވި ފަރާތަށް ޝުކުރުކުރާ ހާލުގައެވެ.

-ނިމުނީ-