ހަތިޔާރު (އައު) [ފުރަތަމަ ބައި]

ޝެނިން
ސްކިޒޯފޮރޭނިޔާ. މިހާރު އަހަރެންނަށް ޖެހިފައި ހުންނަ ބައްޔައް ދޭނެ ނަމެއް ވެއްޖެއެވެ. ނަމަވެސް އަދިވެސް އަހަރެން ގަބޫލް ކުރާކަށް ބޭނުމެށް ނޫނެވެ. ސްކިޒޯފޮރޭނިޔާ އަކީ އާއްމު ބައްޔެއް ނޫނެވެ. ނަމަވެސް އަހަރެންނަށް މި އޮތީ އެ ބަލި ޖެހިފައެވެ. ހަމަ ގައިމުވެސް ޑޮކްޓަރުން ކިޔަނީ އެހެންނެވެ. އަހަރެން ވަކި މިވާހަކަ ގަބޫލް ކުރާނީ ކިހިނެއް ހެއްޔެވެ؟ އެއްޗެއްސެއް ފެނި އެ އަޑު ތަކެއް އިވެނީ އަހަރެންނަށެވެ.
އެއްބައި ފަހަރު މަންމަ އާއީ ބައްޕަ ވެސް ހަދަނީ ދޮގު ހެން ހީވެއެވެ. އަނެއްބައި ފަހަރު ހީވަނީ ކަމެއް ފޮރުވާ ހެނެވެ. ޖެހިފަ ހުރި ބަލީގެ “ސައިޑް އިފެކްޓް” ކަންނޭނގެއެވެ. އަޑުތައް އިވުމުގެ އިތުރުން ޝައްކުވެސް ކުރުން އެއީ ބަލީގެ ސަބަބުން ވާ ކަމެއް ކަންނޭނގެއެވެ. އެކަމުވެސް މިހާރަކަށް އައިސް އަބަދު ވެސް އަހަރެން ފެންނަ އިރެއްގައި ތިބެނީ ފާޑަކަށެވެ.
ކަންތަށް ކުރެވޭނީވެސް އެހެން ކަންނޭނގެއެވެ. ތިމާގެ ހުރި ހަމައެކަނި ދަރިއަށް ރަނގަޅުނުވާނޭ ބައްޔެއް ޖެހިފައޭ ބުނާ އަޑު އިވޭނީ ވެސް ކިހާ ވަރަކަށް ހެއްޔެވެ؟ އެއް ގޮތަކަށް ވެސް މިހާރު އަހަރެންނާ ހަމައެކަނި ކައިރީގައި ހުރި މީހުންނާ ދޭތެރޭ މައްސަލަ ޖައްސަނީ އެއް ނޫނެވެ. ނޫނީ ޝަކުވާ ވެސް ކުރަނީ އެއް ނޫނެވެ. އެކަމު އެކަނި ވާން ފެށީމަ އެހެން ވެސް ވާނެއެވެ.
ތަޤްދީރަކީ މަޖާ އެއްޗެކޭ ހިތަށް އަރައެވެ. މަޖާ ކުޅިވަރު ތިމާއާއި ކުޅެލާފައި ދާއިރު ވެސް ތިމާ ޖެހެނީ އެވީ ކީއްތޯ ވިސްނަ ވިސްނާ ހުންނާށެވެ. އެއްވަގުތަކު ތިމާ ހުރީ އެންމެ އުފަލުގައެވެ. ހުރިހާ ކަމެއް ވެސްް އޭރު ފުރިހަމައެވެ. ދެން ފެންނާނީ ޓަސްލާފަ އެ ހުރިހާ އުފަލެއް އަނދާ އަޅިއަށް ވާތަނެވެ. އޭރުވެސް ތިމާ ހުންނަން ޖެހެނީ ވާނުވާ ނޭނގިފައެވެ.
އަަހަރެންގެ ވެސް ހަމަ ހަޔާތް ފުރިހަމަ އާއި ކާރިއެވެ. ނަމަވެސް އެ ހަޔާތަކަށް ދެވޭކަށް ދެނެއް ނެތެވެ. ކިތަންމެ ބޭނުން ވިޔަސް ހެވެވެ. މާދަން މިރަށް ވެސް ދޫކޮށްފައި ދާންވީއެވެ. އެކަމު އަހަރެން ގެންދާނެ ރަނގަޅު ހަނދާނެއް ވެސް ނެތެވެ. އަހަރެން މަގުމަތީގައި ހިނގާފައި ދިޔަޔަސް ފަހަތުން އިވެނީ މިހާރު މީހުން އެކަކު އަނެކަކު ކައިރީގައި އަހަރެންގެ ވާހަކަ ދައްކާ އަޑެވެ. ފަހަތަށް އެނބުރި އެއްޗެކޭ ބުނަން ކެރޭ ވަރަށް ވުރެ ފިނޑިއެވެ. އެއް ބަޔަކު މޮޔައޭ ކިޔައެވެ. އަނެއް ބަޔަކު ރީތި ކޮށްލަން އިނގިރޭސިން ބުނެލައެވެ. އެކަކު “ސައިކޯ” އޭ ބުނެފީއާއި ދެން ތިބޭ ދިހަ މީހުން “ފްރީކް” އޭ ކިޔާ ގޮވާނެއެވެ. ނަމަވެސް އަހަރެން އެއްޗެކޭ ނުބުނަމެވެ. ބުނާނީ ވެސް ވަކި ކީކޭ ހެއްޔެވެ؟ ގޯ ޓު ހެލް؟ ހަ. ނޫނެކެވެ. އެހެން ވެސް ބުނެވެން އޮންނާނީ ދައްކާ ވާހަަކަ އަކީ ދޮގަށް ވެގެންނެއް ނޫން ހެއްޔެވެ؟
އަހަރެންގެ ބަލީގެ ހަގީގަތް އެނގުމުން ލިއަމް ވެސް އަހަރެން ދޫ ކޮށްލީއެވެ. ނުކިޔާކަށް ރަހުމު ކުޑަ ބަހެއް ނެތެވެ. އެތަށް ހާސް މީހުންގެ މަލާމާތަށް ވުރެ އޭނަ ދެއްކި ވާހަކައިން އަސަރު ކުރިއެވެ. ތަދުވިއެވެ. ނަމަވެސް އެއްމެ ތަދުވީ ނަޒްލާގެ އަމަލުންނެވެ. އޭނަ އެފަދަ ބަހެއް ނުބުނެ އެވެ. މައްސަލަ އަކީ އެއެވެ. އެކައްޗެއް ވެސް އޭނާ އެއަށް ފަހަކު ނުބުނެއެވެ. ދުރުން ދުރުން ގޮސް އަހަރެން ކާރިން އަބަދުވެސް ރެކޭނެއެވެ. އަހަރެން އިތުރަކަށް އޭނަ ކާރިއަކު ނުވެސް އަހަމެވެ. އަހަރެން ނަށް ސަބަބު ސާފު ކޮށް އެނގެއެވެ. އަޑު އަހަން ބޭނުން ނުވީ އޭނަގެ ދުލުންނެވެ. އެއްމެ ގާތް ކަމަށް ދައުވާ ކުރި އެކުވެރިޔާ ވެސް އެހެންް އެންމެނެކޭ އެއްގޮތަށް ކަންތަށް ކުރީމަ ދެން ތިމާ ކުރާނީ ކީއް ހެއްޔެވެ؟
“ދަރިފުޅާ ނިމިއްޖެތަ؟” ސިއްސައިގެން ދިޔައީ މަންމަ މާ ކައިރިން ގޮވާލުމުންނެވެ. ދޮގެކެވެ. މިހާރު ސިއްސަގެން ދާކަށް މާގިނަ ސަބަބު ތަކެއް ބޭނުމެއް ނުވެއެވެ. ކިރިޔާ އަޑެއް އިވޭ އިރަށް ހުންނަނީ ސިއްސަގެން ގޮހެވެ.
“އާން މަންމާ. މިނިމުނީ.” ފޮށީގެ ޒިބު އަޅުވާލަމުން އަހަރެން ބުުނީމެވެ. “ކޯއްޗެއްތަ ތި ހެދީ ކާން؟ ހާދަ މީރު ވަސް ދުވައޭ.” އަހަރެންނަށް ހަދާފަ ހުރި އެއްޗެއް ރަނގަޅަށް އެނގެއެވެ. ހަމަ މާހައުލް ގެތެރޭގަ ކުޑަ ކޮޮށް އެކުވެރިކަން ފަތުރާލާށެވެ. ފަސޭހަ އެއް ނޫނެވެ. އެކަމުވެސް ކިތަންމެ ހާވެސް އެހެން ހެދޭތޯބަލަމެވެ. “ހިނގާ، ބައްޕަ އެބައިން މިހާރުވެސް ތަށިތަށް ކައިރި ކޮށްގެން.” މިކަހަލަ ގޮތަކަށް ސަކަރާތް ޖަހާލެވުނު ދުވަހެއް ހަނދާތް ވެސް ނެތެވެ. އަހަރެމެންގެ އާއިލާގެ އެންމެން ވެސް އޭރު ވަރަށް ކާރިއެވެ. ނަމަވެސް މިހާރު މިކަހަލަ ދުވަހެއް މިއަންނަނީ 14 ވިލޭރޭގެ ހަނދު ފަދައިންނެވެ.
ފަަހަރުގައި މަންމަ މެންގެ “ހަލާކު” ވެފައިވާ ދަރި ރަނގަޅު ވާނެ ކަމުގެ އުއްމީދު އަދިވެސް އޮތީ ކަންނޭނގެއެވެ. އެކަމު އެއަކީ ދެން ވާނެ ކަމެއް ނޫނެވެ. ކުރިން އެނގުނު ނަމަވެސް ހަމަ ވާނީ އެއް ގޮތެކެވެ.. ނޫނެކެވެ. މިހާރު މިހުރި ވަރަށް ވުރެ ކުޑަ ވަރެއްގައި ބަހައްޓާލެވޭނެއެވެ. އެކަމު މަންމަ މެން ކައިރީ ވަކި އަހަރެން ބުނާނީ ކީކޭ ހެއްޔެވެ؟ އޭ މަންމާ ބައްޕާ، ދެމީހުންގެ ދަރިއަށް އެކި ކަހަލަ އަޑު އަޑު އިވެއެވެ. ނޫނެކެވެ. ނުބުނެވޭނެއެެވެ. އެކަކު ނަމަވެސް ނުބުނާނެއެވެ.
“ހިނގާ. ދޭ، މިދަނީ މި ފޮށި ބަހައްޓާލާފަ.” “އަވަސް ކުރާތި.” އެހެން ބުނެފައިި މަންމަ ނުކުމެއްޖެއެވެ. އަހަރެން ވެސް ފޮށި ބަހައްޓާފައި އުޅުނީ ދާށެވެ. އަލަމާރި ކައިރީ ފޮށި ލައްކޮށްލުމަށް ފަހު އެނބުރުން އިރު އެހުރީއެވެ. މިހާރު ސިއްސަގެން ދާވަރަށް ވުރެ ބޮޑަށް ހުރީ ހޭނިފައެވެ. ނަމަވެސް މިފަހަރު ހަމަ ދިޔައީ ސިއްސައިގެންނެވެ. ކުޑަ ދޮރު ކައިރީ އެހުރި ކުއްޖަ ހަމަގައިމުވެސް އަހަރެންނަކަށް ވުރެ ބޮޑެއް ނުވާނެއެވެ. އެހުރީ ހަމަ އަހަރެން ނާއި ދިމާލަށް ބަލަންށެވެ. އެއީ ހީވާ ގޮތެވެ. އަހަރެން އަމިއްލަ ނަފްސަށް ވިސްނައިދެމުން ދިޔައީމެވެ.
ހަޤީގަތަކީ އެތާކު މީހަކު ނެތެވެ. ނަމަވެސް އަހަރެންނަށް ހަމަ ސާފުކޮށް ކުރިމަތީ އެހުރި އަންހެން ކުއްޖަ ފެނެއެވެ. އެކަކުވެސް ޤަބޫލެއް ނުކުރާނެއެވެ. ކުރަންވީ ކީއްވެހެއްޔެވެ؟ ފެންނަނީ ހަމައެކަނި އަހަންނަށެވެ. އެންމެ ރަނގަޅު ގޮތަކީ ނުފެންނަ ކަމަށް ހަދާ ދިޔުމެވެ. އަހަރެން ހެދީވެސް އެހެނނެނެވެ.
“ކޮބާ ކޯއްޗެއްތަ ހެދީ ވަރުގަދަ އަށް” ކާގެއަށް ވަންނަމުން އަހަރެން އެހީމެވެ. “އާން ޝިންނު އާދެ އަވަހަށް. މިއުޅެނީ މަންމަ ވަރުގަދަ ނޫޑުލްސް ގަނޑެއް ހަދައިގެން. ނޭނގެ ނާޅާ އެއްޗެއް ހުރި ހެނެއް.” ބައްޕަ ހިނިގަނޑެއް ޖަހާލަމުން ބުންޏެވެ. “ފްރައިޑް ނޫޑްލްސް ދޯ މަންމާ.” “އާން ބައްޕަ މާ ފޮނިވާ ރެއެއް މިއަކީ.” އެއާއި އެކީ އެއްމެން ހޭން ފެއްޓެވެ.
ނަމަވެސް ދޮރުގައި ޓަކި ޖެހި އަޑުން އެންމެން އެއް އަޑަކަށް މައިތިރި ވި ކަހަލައެވެ. މިހާރު އެންމެން އެ ތިބީ ދޮރާއި ދިމާލަށް ބަލައިގެންނެވެ. އަހަރެން ތެދުވީމެވެ. “ޝިންނު މި ބަލާލަނީ!” މަންމަމެން އެއްޗެކޭ ބުނުމުގެ ކުރިން އަހަރެން ކާމޭޒު ކައިރިން ދުރައް ގޮއްސީމެވެ. ތަޅުގައި ހިފަން އަތް އުފުއްލާލުމާއި އެކު ގައިން ހީބިހި ނަގައިގަތެވެ. ކަނދުރާގައި ހުރި އިސްތަށިތަށް ކޮޅަށް ނެގުން ކަހަލައެވެ. އެއަކީ އެ އެޙްސާސެވެ. ތިމާގެ ފަހަތުގައި ހުރެގެން މީހަކު ބަލާ އިޙްސާސެވެ.
ވަގުތުން އަހަރެން ފަހަތް ބަލާލީމެވެ. އެކަކުވެސްް ނެތެވެ. މި ބެލެނީ ކީއްވެބާއެވެ؟ މިހާރު އަހަރެން ނަށް ޖެހިފައި މިހުރީ ބައްޔެއް ކަން ވެސް އެނގެއެއްނޫން ހެއްޔެވެ؟ ފަހަރުގައި ސަތޭކައިން 0.1 އިންސައްތަ ނަމަވެސް މިކަން ދޮގަކަށް ވެދާނެކަމުގެ އުއްމީދުގައެވެ. އާއެކެވެ. އެއީއެވެ. ހުރިހާވެސް ސަބަބަކީ އެއީއެވެ. ހަމަ އެއް ދުވަހު ހޭލާ އިރަށް މިއީ އެއްކޮށް ހުވަފެނަކަށް ވެދާނެކަމުގެ އުއްމީދުގައެވެ.
ދޮރުހުޅުވާލުމާއި އެކު ގޭތެރެ ފުރާލީ ސާފު ފިނި، ފޮނި ވަޔާއި އެކުއެވެ. ދެން ފެުނުނީ އޭނައެވެ. ނޫނެކެވެ. އޭނަ ނޫން ކޮންމެ މީހަކު ކަމުގައި ވިޔަސް ހެވެވެ. އަހަރެން ދޮރު ޖެހީއެވެ. ކުރަމަކާލި ލާފައި ހުރި އެތައް ޒަޚަމް ތަކެއް އަލުން އާވެ، ލޭ އަންނަން ފެއްޓެވެ. އުފާ ވާންވި ގަޑި ނިމުނީއެވެ. އޭނަ ދެން ދައްކަން އޮތީ ކޮން ވާހަކައެއް ހެއްޔެވެ؟ ހަމަގައިމު ވެސް އަހަރެން އޭނާ އާއި ދައްކާނެ އެންމެ ވާހަކަ އެއްވެސް ނޯންނާނެއެވެ. ނުބުނެވި އޮތް ރަހުމުކުޑަ ނަމެއް އަދިވެސް އޮތީ ކަންްނޭނގެއެވެ. އަހަރެންނެއް އަޑުއަހާކަށް ނުހުންނާނަމެވެ.
ދޮރުގައި ޓަކި ޖަހާ އަޑު އަހަރެންނަށް އިވެއެވެ. ނަމަވެސް ޖަވާބެއް ދޭކަށް ބޭނުމެއް ނޫނެވެ. ކޮތަރިއަށް ވަނީމެވެ. ފާޙާނައަށް ވަދެ ފާޙާނަށް އަށް ވަދެ އަހަރެން ދޮރު ތަޅުލީމެވެ. ސަބަބު: 1- މަންމަ ދޮރު ހުޅުވާނެއެވެ. 2- ލިއަމް އަކީ ގޮތް ދޫކުރާނެ މީހެއް ނޫނެވެ. އޭނަ ކުރަން އައި ކަމެއް ކޮށްފައި ނޫނީ ނުދާނެއެވެ.
މާގިނަ އިރު ތަކެއް ނުވެ އަހަހަރެންގެ ކޮޓަރީގެ ދޮރު ހުޅުވި އަޑު އިވުނެވެ. ދޮގެެއް ނޫން ހެއްޔެވެ؟ ދެން އިވޭނީ ދޮރުގައި ޓަކި ޖަހާ އަޑެވެ. 3….. 2…. ދެން ހަމަ އެއާާއި އެކު އިވުނީ ޓަކި ޖަހާ އަޑެވެ. ފާޙާނައިގައެވެ. ކިހާާ މޮޅު ހެއްޔެވެ؟ ލިއަމް ވަރަށް ބިއްލޫރިވާނެއެވެ.
“ޝިންނު ޕްލީޒް ދޮރު ހުޅުވަފާނަން ތަ؟” ފާޙާނައިގެ ދޮރުގައި ޓަކި ދެމުން ބުންޏެވެ. އަދި އެދެނީ ޓަތްކެވެ. ނަމަވެސް ޖަވާބެއް ނުލިބި މާ ގިނަ އިރު ވާން ވެއްޖެއްޔާ ސަރަހައްދުގައި ތިބި އެއްމެނަށް ދޮރުގައި “ޓަކި ދޭއަޑު” އިވޭނެއެވެ. އެކަމު އޭރުން ދޭނީ ޓަތްކެއް ނޫނެވެ. އެހެން ނަމަވެސް އަހަރެން ވެސް މިއީ ގޮތް ދޫކުރާ ކުއްޖެއް ނޫނެވެ.
“ބައްޕާ! މަންމާ! ކީއްކުރަން އޭނަ ވެއްދީ؟ ވެއްދި ބަޔަކު ނެރޭ އޭނަ.” އަހަރެން އަޑު ތުރުތުރު ނާޅާކަން ވެސް ނަސީބެވެ. އެއްވެސް ގޮތަކަށް އަހަރެން ބަލިވާކަމުގެ އިޝާރާތެއް ކުރާކަށް ބޭނުމެއް ނޫނެވެ. ” ޝެނިން ތިހެން ތި ހަދަނީ ކީއްވެތަ؟” ހަ. އަހަރެން ބޭނުމީ ހޭނށެވެ. ހާލަތާ ޖުމްލައިގެ ގޮތުންނެވެ. ވީ ގޮތެއް ވީ އަހަރެންނަށެވެ. ހެދި ގޮތެއް ހެދީ އޭނައެވެ. އަހަރެންނެއް ނޫނެވެ. ” ބައްޕާ! ބައްޕާ! އޭނަ ނެރޭ މިހާރު!” “ތިހެން ނުހަދަ ފާނަން ތަ؟” މިހާރު އަހަރެން ގާތަށް ރުޅި އަންނަ ވަރު ބުނަން ވެސް ނޭނގެއެވެ. “މަ ކޮން ކަމެއްތަ ކޮށްގެން އުޅެނީ؟” އަތުގައި ހުރި ހުރިހާ ވަރެއް ލުމަށްފަހު ދޮރު ހުޅުވަމުން ހަޅޭ ލަވައި ގަތީމެވެ. ދޮރުކައިރީ ހުރި ލިއަމް، އަހަރެންގެ މި ހަރަކާތުން ދިޔައީ ސިއްސަިގެންނެވެ. އެހެން ހާލަތެއް ނަމަ އަހަރެން ލިއަމް ރުޅި އަންނަންދެން ހެވުނީހެވެ. ނަމަވެސް މިވަގުތު އައިސް ހުރި ރުޅިގަނޑު މާ ބޮޑެވެ. ހުރިހާ އިޙްސާސް ތަކެއް ހުރީ އެއްވެފައެވެ.
“ދައްކަ ތި ދައްކަން އޮތް ވާހަކައެއް.” އަހަރެން އޭނާއާއި ހަތަރު ކަޅި ހަމަ ކުރަމުން ބުނީމެވެ. ނަމަވެސް ގިނައިރު އޭނާގެ ކަޅު އަނދިރި ކަޅިއަށް ބަލައިންނެއް ނުހުރެވުނެވެ. ނޫނެކެވެ. ކުރާ އަސަރެއްގެ ބޮޑުކަމަކުން ނޫނެވެ. އެއްކަލަ އިޙްސާސް ކުރެވެން ފެށިގެންނެވެ. ގައިން ވަގުތުން ހީބިހި ނަގައިގަތީއެވެ. ސީދާ ލިއަމްގެ ފުރަގަހުގައި އެހުރީއެވެ. ހަމަ އެހެން ފަހަރު ތަކެކޭ އެއްގޮތެވެ. ދުވަހަކު ދުއް ވެސް މީހެއް ނޫނެވެ. މިކަހަލަ ބައްޔެއްގައި ވާ ކަމެއް ކަންނޭނގެއެވެ. އަހަރެންނެއް ނުބުނަމެވެ. އަހަރެންނަށް އަބަދުވެސް ފެންނަނީ ނުދަންނަ މީހުންނެވެ.
އަންްހެން މީހެކެވެ. ހަމަ ގައިމު ވެސް އަހަރެންގެ މަންމަ އަކަށް ވުރެ ބޮޑެއް ނުވާނެއެވެ. ނަމަވެސް އަހަރެން ބިރުގަތީ ދެން އެމީހަކު، ކޮންމެ އެއްޗެއް ވިޔަސް ހެދި އެއްޗަކުންންނެވެ. އަހަރެންނާއި ސީދާ ދިމާލަށް ބަލަން ހުރެފައި އަނގަ ހުޅުވިއެވެ. ވާހަކަ ދައްކަން އުޅެނީތަ؟ އަހަރެންނާއި ދިމާލައް އެހެންޏާވެސް އެމީހުން ބަލައެވެ. ނަމަވެސް އެއްޗެކޭ ބުނާކަށް ނޫޅެއެވެ. ދެވަނަ ފަހަރަށް ވެސް އަނގަ ހުޅުވިއެވެ. ދެ ތުންފަތް ތެޅޭތަން ފެނެއެވެ. ނަމަވެސް އަޑެއް ނީވެއެވެ. އަހަރެން މިހުރީ ގަނޑުވެފައެވެ. ނޭވާލާން ވެސް ނޭނގިފައެވެ. އެހަމަ ފެންނަ ގޮތެވެ. ޝެނިން. އެ ހަމަ ފެންނަ ގޮތް. އަހަރެން އަމިއްލަ ނަފްސަށް ތަސައްލީ ދެމުން ދިޔައީމެވެ.
އަނެއް ފަހަރުވެސް އަނގަ ހުޅުވިއެވެ. އަހަރެން ހަމަ މިހުރީއެވެ. ލޯބޮޑުވެފައެވެ. ހަމައެކަނި އަހަރެންނަށް ފެންނަ މަންޒަރު ބަލާށެވެ. މިފަހަރުވެސް އެހެންޏާ ވީގޮތަށް ވެދާނެ ކަމަށް ހީކޮށް ހިފަހައްޓައިގެން ހުރި ނޭވާ ދޫކޮއްލީމެވެ. ނަމަވެސް ނޭވާ އަޅައިގަތީ ކަރުބުޑުގައެވެ. އިވުނީ އެ ތޫނޫ ހަޅޭކުގެ އަޑެވެ. އަހަރެން ވެސް އެންމެ ފަހުން ފަޅައިން ދިޔައެވެ. ކަންފަތުގައި އަތް އަޅާ އަހަރެން ވެސް ލަވައިގަތީ ހަޅެއެވެ. ނަމަވެސް އެއްވެސް އަޑެއް ނައެވެ. އެއަށް ފަހު އަހަރެންގެ ގައިގައި އޮޅާލެވުނީ ވަރުގަަދަ ދެއަތެވެ. އެ ހޫނު މޭގެ ދަށުގައި އަހަރެން ހިމާޔަތް ކޮށްލިއެވެ. ލިއަމްއެވެ.
ރޯން ފެށުނީ ދެނެވެ. ލިއަމްގެ ހިމާޔަތުގައެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.