އުމުރަށް ކަލާ – 1

ޔުސްރާ އޭނާގެ ޝިފްޓު ނިމުމުން ދަބަސް ހިފައިގެން ގެޔަށްދާން ހޮސްޕިޓަލުން ނިކުތްއިރު އުދަރެސްމަތިން ރަތްވިލާތައް ދަޅަޖަހަމުންދެޔެވެ. ކުޅުދުއްފުށީ ރީޖަނަލް ހޮސްޕިޓަލުގައި ތަރުޖަމާނެއްގެ ވަޒީފާ އަދާކުރަމުންދާއިރު ޔުސްރާ އުޅެނީ އޭނާގެ ބޮޑުބޭބެ، ޝަފީގުގެ ގޭގައެވެ. ޔުސްރާ ތުއްތުއިރު އޭނާގެ މައިންބަފައިން ނިޔާވުމުން، ޔުސްރާ ބެލުމުގެ ހުރިހާ ޒިންމާއަކާ ހަވާލުވީ ޝަފީގުއެވެ. އެއްވެސް ޝަކުވާއެއް ނެތި، ޔުސްރާ ބަލާ ބޮޑުކުރީ ވަރަށް ލޯބިންނެވެ. އަމިއްލަ ދަރިއެއް ފަދައިންނެވެ. ގެޔަށް ވަދެގެން ދިޔައިރު، ހިންދީ ލަވައެއްގެ އަޑުއިވެއެވެ. ޗަންދާ އޮތީ ރޭޑިޔޯއިން ލަވަޖަހައިގެން ސިޓިންގް ރޫމުގައި ފެންފޮތިލާންށެވެ. އާދައިގެމަތިން، ޔުސްރާ ޝިފްޓު ނިންމާފައި އައިސް ނަމާދުކޮށްލައިގެން ޤުރުއާންކިޔަވަންއިންދާ، ބަނޑުހައިވާން ފެށިއެވެ. ހަވީރު ސައި ނުބޮއި ހުރިކަން ހަނދާންވުމުން، ކައިރީގައި ހުރި މޭޒުމަތީގައި ހަތިމް ބޭއްވުމަށްފަހު، ތިރިއަށް ދިޔައެވެ. “ޗަންދާ. ކޮބާ ބޮޑުބެ؟” ޔުސްރާ ކޮފީ ތައްޓެއް ގިރާލަމުން ޗަންދާ ގާތުގައި އެހިއެވެ. “ބޮޑުބެ، މީޓިންގްގަވީ.. އަންނަނީ އަވަހަށް.” ޗަންދާ ބުންޏެވެ. ކްރަމްޕީ ޖަހައިގެން ދެތިން ޕާންފޮތި ކާލިތަނާ ޝަފީގު ގެޔަށް ވަދެގެން އައިތަން ޔުސްރާއަށް ފެނުނެވެ. ޝަފީގު ހުރީ ވަރުބަލިވެފައިކަން މޫނުމަތިން އެނގެއެވެ. “ބޮޑުބޭ.. އޮފީސް ނިމުނީތަ؟” ޔުސްރާ ފިނި ފެންތައްޓެއް ހިފައިގެން ގޮސް ޝަފީގު އަތަށް ދެމުން ބުނެލިއެވެ. ޝަފީގަކީ ރަށުގައި އެންމެ ނަންއަރާހުރި އެއް ވިޔަފާރިވެރިޔާއޭ ބުނުމުން ދޮގަކަށް ނުވާނެއެވެ. މާލޭގައިވެސް އޭނާގެ ބައެއް ފިހާރަތައް ހުރެއެވެ. “އާނ.. މިއަދަށް ނިމުނީމި..” ޝަފީގު ޔުސްރާގެ ސުވާލަށް ޖަވާބުދިނެވެ.

ރޭގަނޑުގެ ކެއުމަށްފަހު، ޔުސްރާ އޭނާގެ ކޮޓަރިއަށް އައިސް ނިދަން ތައްޔާރުވެލިއެވެ. ދޮރުގައި މީހަކު ޓަކިޖަހާ އަޑަށް، ދޮރު ހުޅުވާލިއިރު ހުރީ ޝަފީގެވެ. “ބޮޑުބެ. މިވަގުތު؟ ކީއްވީ؟” “ޔުސްރާ..” ޝަފީގު ކޮޓަރީގައި ހުރި ސޯފާގައި އިށީންނަމުން ބުނެލިއެވެ. “ކީއްވީ ބޮޑުބޭ؟” ޔުސްރާ ޝަފީގު ކައިރީ އިށީންނަމުން ބުނެލިއެވެ. “ދަރިފުޅު މިހާރު ދެން ވިހި އަހަރުވީއެންނުދޯ؟ އެހެންވެ ބޮޑުބެ މި ވިސްނަނީ ދަރިފުޅުގެ ކައިވެންޏާ މެދު.. އެބައުޅޭ މިރަށަށް އައިސްގެން ކުއްޖެއް. މާލޭގަ ގެ ހުރި ޑޮކްޓަރެއް.. ޔުސްރާއަށް ވުރެ ދެތިން އަހަރު ބޮޑުވާނީވެސް..” ޔުސްރާ ހުރީ ޝަފީގުގެ ވާހަކައާމެދު ބުނާނެ އެއްޗެއްވެސް ނޭނގިފައެވެ. “ބޮޑުބެ ބޭނުން ޔުސްރާ އޭނައާ ކައިވެނިކުރަން.. އޭނަ ހުރީ ހަމަ ތައްޔާރަށް.. މިކަހަލަ ކުއްޖެއް މިރަށުން ފެންނާނެހެން ހިޔެއްނުވޭ.. ހާދަ ރަނގަޅޭ އޭނަ.. އަދި ނުލާހިކު ދީންވެރި.. ބޮޑުބެއާ ދިމާވީ ރަށު ސްކޫލުގައި އޮތް ހެލްތް ކޭމްޕުން. ޔުސްރާ އޯކޭ ތަ؟” ޝަފީގުގެ ވާހަކަ ނިންމާލަމުން ޔުސްރާ ގާތުގައި އެހިއެވެ. ޔުސްރާ ކުޑައިރުއްސުރެ ބަލާބޮޑުކުރީ ޝަފީގުކަމުން، ޝަފީގުގެ އެދުމަށް ނޫނެކޭ ބުނާކަށް ޔުސްރާއަކަށް ނުކެރުނެވެ. ޅައުމުރުގައި ކައިވެނި ކުރަން ބޭނުންނުވިނަމަވެސް، ކައިވެންޏަށް އާނއެކޭ ބުނީ ދެ ޙިޔާލެއްގައިހުރެއެވެ.

ހެނދުނު ހޭލައިގެން، ސައިބޯން ތިރިއަށްދާން އުޅެނިކޮށް ބަޔަކު ސިޓިންގ ރޫމުގައި ތިބެގެން ވާހަކަ ދައްކާ އަޑުއިވުނެވެ. ފިރިހެނެއްގެ އަޑު ވާހަކަތަކުގެ ތެރެއިން އިވޭތީ، އަލަމާރީގަ އަޅުވާފައި ހުރި ދޫ ޖިލްބާބާއެކު ކަޅު ބުރުގަލެއް އަޅައިގެން ސިޑިން ފައިބައިގެން ދިޔައިރު، ސޯފާގައި ޒުވާން ފިރިހެން ކުއްޖަކު އިންތަން ފެނުނެވެ. ބަލާލަން ނުހަނު ރީއްޗެވެ. އިސްތަށިގަނޑު ފަންވެފައި، ދިގެވެ. މަޑު މުށިކުލައިގެ ދެލޯ ރަން މުތްތަކަކާ އެއްފަދައެވެ. އޭނާވެސް ހުރީ ޔުސްރާއަށް ބަލަންށެވެ. “ޔުސްރާ.. އައިސްބަލަ.” ޝަފީގު ގޮވާލިއެވެ. “މިއީ އަޔާޒް. ބޮޑުބެ ރޭގަ ބުނީމެންނު ކުއްޖެއްގެ ވާހަކަ. މިއީ އޭނަ.” ޔުސްރާ އިސްޖަހައިލައިގެންހުރެ ސޯފާގައި އިށީންދެލުމުން ޝަފީގު ބުނެލިއެވެ. “ދެކުދިން ދާންވީނު ޓެރަސްއަށް ވާހަކަދައްކާލަން..” ޝަފީގު ބުންޏެވެ. ޔުސްރާ ތެދުވުމާއެކު އަޔާޒްވެސް ތެދުވެގެން ޔުސްރާގެ ފަހަތުން އައެވެ. ޓެރަސްގައި ހުރި ބޮޑު އުނދޯލީގައި ޔުސްރާ އިށީންދެލުމުން އަޔާޒް އައިސް ޔުސްރާ ކައިރީގައި އިށީންދެލިއެވެ. ކައިރީގައި ހުރި މާގަސްތަކަށް ބަލަން ދެމީހުންވެސް ތިބީ، ލަދުން ވާހަކަދައްކަން ނުކެރިފައެވެ. “ހާއި… އައިމް އަޔާޒް..” ޔުސްރާއަށް ބަލާލަމުން އަޔާޒް ބުންޏެވެ. “އައިމް ޔުސްރާ.. ރައްޓެހިން ކިޔާނީ ޔައްޔަ.” “އެހެންތަ.. ޖޮބެއްގަތަ އުޅެނީ؟” އަޔާޒް އެހިއެވެ. “އާން. ހޮސްޕިޓަލްގަ.” އަޔާޒްއާ ކަޅި ހަމަކޮށްލަމުން ޔުސްރާ ބުނެލިއެވެ. “މެރީކޮށްފަ ނުދާނަން ދޯ؟ އައި މީން ޖޮބަށް..” “އަޔާޒް ބޭނުންގޮތެއްހަމަ” ޔުސްރާގެ ޖަވާބާއިއެކު އަޔާޒް ހިނިތުންވެލިއެވެ. “ގޭގައި އުޅޭނެ ބައިވަރު މީހުންވެސް.. ޔުސްރާ އެކަންޏެއް ނުވާނެ. އަޔާޒް ދޭނަމޭ ޔުސްރާ ބޭނުން އެއްޗެއް.” އަޔާޒް ހީލައިގެން އިނދެ ބުނެލިއެވެ. ދެމީހުންނަކީވެސް އެއް މިޒާޖެއްގެ ދެމީހުންކަމަށްވުމުން، ޔުސްރާއަށް އަޔާޒް ގާތުގައި ވާހަކަދެއްކުނީ ވަރަށް ފަސޭހަކަމާއެކުއެވެ. އެއްވެސްކަހަލަ އުނދަގުލެއްނުވެއެވެ. ބައިވެރިއެއްގެ ކިބައިގައި ހުރުމަށް އެދޭ ހުރިހާ ސިފައެއް އަޔާޒުގެ ކިބައިން ޔުސްރާއަށް ފެނުނެވެ. ދެމީހުން ބޮޑު ވާހަކައިގައި ތިބިއިރު ވަގުތު ދިޔަ ގޮތެއް ނުވެސް އެނގެއެވެ.

އަޔާޒް ކުޅުދުއްފުއްޓަށް އައީ ހެލްތް ކޭމްޕަކަށްކަމަށްވުމުން، އަޔާޒް ބޭނުންވީ ވީހާވެސް އަވަހަށް ކައިވެނިކޮށްގެން މާލެ ބަދަލުވާށެވެ. ޔުސްރާ ވަޒީފާއިން ކެނޑެންވެގެން ސިޓީލުމަށްފަހު ހޮސްޕިޓަލް އޮފީހުން ނިކުތްއިރަށް މީހަކު އޭނައަށް ގޮވާ އަޑުއިވުނެވެ. ފަހަތަށް ބަލާލިއިރު ހުރީ ސުޒާންއާއި އަމާނީއެވެ. ޔުސްރާގެ އެންމެ ގާތް އެކުވެރީންނެވެ. ސްކޫލު ދައުރު އެކީ ނިންމާލުމަށްފަހު، ހޮސްޕިޓަލަށް ވަޒީފާއަށް ނުކުތީވެސް ހަމަ އެކީގައެވެ. “އެއީ ތެދެއްތަ؟ މިމީހުން މިކިޔަނީ… ބުނޭ ދޮގެކޭ އެއީ..” ފެންކަޅިވެފައިހުރެގެން ސުޒާން ބުންޏެވެ. “އެއީ ތެދެއް ސޫޒީ.. ގުޅާވެސް ނުލެވުނީ ފޯނުގަ ކްރެޑިޓް ނެތީމަ..” “ދެން މާލެ ބަދަލުވަނީތަ؟” އަމާނީ ވެސް ހުރީ ރޮވެން ކައިރިވެފައެވެ. “ސާބަސް ޔޫ ޓޫ.. ވީ ކޭން ވައިބަރ އެންނު.. އަންނާނަމޭ ކުޅުދުއްފުއްޓަށްވެސް.. ދެން ނުރޮއެބަލަ.” ޔުސްރާ ހެމުންހެމުން ބުނެލިއެވެ. ކައިރީގައި ހުރި ބެންޗުގައި އިށީންދެލައިގެން އިނދެ، ސުޒާންއާއި އަމާނީ ގާތުގައި ކައިވެނީގެ ވާހަކަދައްކަން އިންއިރު، ޔުސްރާ ހުރީ ވަރަށް އުފަލުންނެވެ. އަޔާޒު ކަހަލަ ބައިވެރިޔަކު ލިބުނީ ޔުސްރާގެ ނަސީބު ރަނގަޅުވީމަ ކަމަށް އޭނާ ޤަބޫލުކުރިއެވެ.

ގިނަ ލާރިތަކެއް ހަރަދުކޮށްގެން، ބޮޑު ޕާޓީއެއް ބާއްވާން ޔުސްރާ ބޭނުންނުވުމުން، ކޯޓުގައި ކައިވެނިކުރިއެވެ. އެދުވަހު ހަވީރު ގޭގައި ކައިވެނީގެ ވަލީމާ ބޭއްވީ ކުޑަގޮތަކަށެވެ. އެންމެ ގާތް އެކުވެރިންނާ، ޢާއިލާ މީހުންނާ އެކުއެވެ. ކައިވެނީގެ ވަލީމާއަށްފަހު، ޔުސްރާ ކޮޓަރިއަށް ވަދެގެން އައިއިރު، އަޔާޒް އިނީ ޔުސްރާގެ އިންތިޒާރުގައި އެނދުމަތީ އިށީންދެލައިގެންނެވެ. އަލަތުކައިވެނީގެ ފޮނިމީރުކަން ހާސިލުކުރަމުންދިޔައިރު، ޔުސްރާގެ ހިތުގައި އަޔާޒަށްޓަކައި ލޯބީގެ ހުޅުކޮޅެއް ދިއްލުނެވެ. އަޔާޒުގެ ކޮންމެ ބީހުމަކާއެކު ޔުސްރާގެ ހިތަށް ލިބެމުންދިޔައީ އުފާވެރިކަމެވެ. އަޔާޒުގެ ހިތުގައިވެސް ޔުސްރާއަށް ޚާއްސަ މަޤާމެއް އެރޭ ދެވުނީ ބޭއިހްތިޔާރުގައެވެ.

މާލެއަށް ފުރަންގޮސް ބަނދަރުމަތީގައި ހުއްޓިލައިގެން ހުރިއިރު، ޔުސްރާ ހުއްޓުމެއްނެތި ރޮމުންދިޔައެވެ. އަޔާޒު ހުރީ ޔުސްރާގެ އަތުގައި ހިފައިގެންނެވެ. އުފަންރަށް ދޫކޮށްފަދިޔުމަކީ ފަސޭހަކަމެއް ނޫންކަން އަޔާޒަށްވެސް އެނގެއެވެ. ޔުސްރާގެ ލޮލުން ވެއްޓޭ ކޮންމެ ކަރުނައަކާއެކު އަޔާޒްގެ ހިތް ކުދިކުދިވާ ކަހަލައެވެ. ސުޒާންއާއި އަމާނީ ޔުސްރާ ފުރުވަން ގޮސް ހުރިއިރު، ޝަފީގު ދޯނިތައް ކައިރީ ހުރީ ފެންކަޅިވެފައެވެ. ދަބަސްތައް ދޯންޏައް އެރުވުމަށްފަހު، އަޔާޒް ޔުސްރާއާއެކު ދޯނިތެރޭގައި ހަމަޖެހިލިއެވެ. ރޮއެރޮއެ ޔުސްރާގެ ދެލޯ ރަތްވެފައި ހުރިއިރުވެސް އަޔާޒްހުރީ ޔުސްރާގެ ރީތިކަމާމެދު އަޖައިބުވެފައެވެ. އަޔާޒްގެ ކޮނޑުމަތީގައި ބޯއަޅާލައިގެން އޮތްއިރު، ޔުސްރާ އޮތީ ތުންދަމާލައިގެންނެވެ. “ބޭބީގަނޑާ.. އިޓްސް ގޮނަ ބީ އޯކޭ..” އަޔާޒް ޔުސްރާ ގައިގައި ބައްދާލަމުން ބުންޏެވެ. ނޭފަތް ޓިޝޫއަކުން ފޮޅާލުމަށްފަހު އަޔާޒްއާ ދިމާލަށް ޔުސްރާ ބަލައިލިއެވެ. ހަޔާތުގެ އާ ސަފްހާއަކަށް ޔުސްރާ މަރުހަބާކީ އުފަލުންހުރެއެވެ. އަޔާޒުކަހަލަ ބައިވެރިޔަކު ލިބުމުން ﷲއަށް ޝުކުރުކުރަމުންނެވެ.