ވާލޯބި އެނގޭނަމަ… 16

ސަޖޫލް ދިން ފެންތަށިން ކޯވަރެއް ބޯލުމާއެކު ފުން ނޭވައެއް ޝަރީފާ ދޫކޮށްލިއެވެ. ސަޖޫލަށް ހިނިގަނޑު ކޮންޓްރޯލްނުކުރެވި ފަޅައިގެން ދިޔަ ވަގުތު ވެސް ޝަރީފާ ސިހިފައި ހަޅޭއްލަވާގަތެވެ.  “ސާބަސް މަންމަ އަށް. މިރަށު މީހުން އެއުޅެނީ މަންމަ ގަޔަށް ވަޅިނުހެރިގެންތަ. ތަނަކު މީހަކު ހުރިއްޔާ މަންމަ އަށް ކީއްތަ”  ސަޖޫލް  ސޯފާގޮނޑިއާއި ދިމާލަށް ދަމުން ބުންޏެވެ. ޝަރީފާ ތުން އަނބުރާލުމުން ސަޖޫލް ކައިރިއަށް ހިނިއައިސް އަނގަމަތީގައި އަތް އަޅާލިއެވެ.

 

 

މެންދުރުގެ އެންމެ ހޫނު ވަގުތެވެ. ބަނޑުގައި ރިއްސާތީ އޮފީހަށް ސަލާންބުނެގެން ގޭގައި މަޑުކުރި އަލްޔާ އެނދުގައި އޮވެ ފޫހިވެގެން ސިޓިންގްރޫމަށް ނިކުތެވެ. އޭރު ޝެނާ ޒޫނީ ގޮވައިގެން ސޯފާގައި އިނީ ކާންދޭށެވެ. ހީލާފާއި އަލްޔާ ޝެނާ ކައިރީގައި އިށީނުމުން ޝެނާ ހީލިއެވެ. ޝެނާ ޒޫނީ އާއި މެދު ކަންތައްކުރާގޮތް ލޯބިކަމުން އަލްޔާ އަށް އިނދެވުނީ ބަލަހައްޓައިގެންނެވެ. ޝެނާ ޒޫނީ އާއި ސަމާސާކޮށްލާ ގޮތް އަލްޔާ އަށް ވަރަށް ކަމުދިޔައެވެ. ކުއްލިއަކަށް ކުޑަކުއްޖަކު އަލްޔާ ވެސް ބޭނުންވިއެވެ.

“ދަރިންނަކީ މާތްﷲ ދެއްވާ ނަސީބެއް. އެއީ މިދުނިޔެއިން އަންހެނަކަށް ލިބޭނޭ އެންމެ މަތިވެރި އުފާ. އެއުފާ އެންމެ ބޮޑަށް އިހުސާސްވާނީ ދަރިފުޅު މިދުނިޔެއަށް އުފަންވާ ވަގުތު”  ޝެނާ އަލްޔާ އަށް ބުނެެދެމުން ދިޔައެވެ. އިރުކޮޅަކާއި އަލްޔާ ޒޫނީގެ ޗަބީ ކޮލުގައި ހިފާލައެވެ. ނޫނީ ފޯނުން ފޮޓޯއެއް ނަގާލައެވެ.

“ދޮންތަ އަށް ފެންނަނީ ލައި ވެސް މިކަމާއި އުޅެން” އަލްޔާ އަށް ބަލާލަމުން ޝެނާ ބުނެލިއެވެ. އަލްޔާ އަށް އެއަށް ދޭނެ ޖަވާބެއް ނޭނގެއެވެ. ކުޑަކުއްޖެއް ވެސް އަހަރެން ވެސް ބޭނުމެވެ. ނަމަވެސް ޝައިމްގެ ފަރާތުންނެެއް ނޫނެވެ. ލޫކް ގެ ފަރާތުންނެވެ. އަހަރެންގެ ލޯތްބަކީ ޝައިމް އެއް ނޫނެވެ. މިވާހަކަ ދޮންތަ ކައިރީގައި ބުނެވޭނެ ނަމައެވެ.

“އޭ… ކޯއްޗެއް ތިވިސްނަނީ. ދޮންތަ އަށް އެނގޭ މިހާރު ނުވާނެކަން. އެއީ ލައިގެ ތިދުވަސްކޮޅުގެ ގޮތުން. މިފަހަރު ފެންވަރައިގެން ޓްރައި ކޮށްބަލަ. ދޮންތަ ވަރަށް ބޭނުން ޝައިމް އާއި ލައިގެ ބޭބީއެއް މިދުނިޔެއަށް ނޭވާލާތަން ބަލަން. އެދުވަހަކުން ޝައިމް ވެސް ހާދައުފާވާނޭ” ބަހެއް ނުކިޔާ އިން އަލްޔާ އާއި ވާހަކަދައްކަމުން ޝެނާ ދިޔައެވެ. ހިތްނުވެފައި އިނަސް އަލްޔާ ހީލިއެވެ.

“އެބަ އަންނަން ދޮށްވާލައިގެން ނެޕީ ޗޭންކް ކޮށްލައިގެން. ލައި އިންނާނަން ދޯ”  ޒޫނީ އުރާލައިގެން ޝެނާ ސިޑިން މައްޗަށް އެރުމުން އަލްޔާ ސޯފާގައި ޖައްސާލީ ކުރިމަތީގައި ހުރި ޓީވީ ހުޅުވާލަމުންނެވެ. ފޫހިކަމާއެކު ފަހަރަކު ޗެނަލް އަކަށް ބަދަލުކުރަމުން ދަނިކޮށް ސިހުނީ ގޭ ދޮރުގެ ރަނގަބީލު އަޅާލި އަޑަށެވެ. ބޮލުގެ އިސްތަށިގަނޑު މައްޗަށް ނަގާ ހުޅިއެއް ޖަހާލަމުން ގޭ ދޮރު ހުޅުވާލިއިރު ކުރިމަތީގައި ތިބީ ކުޑަ ދެކުދިންނެވެ. ފިރިހެންކުއްޖާ އަލްޔާ އަށް ބަލާލަމުން ގޭތެރެ ވެސް ހޯދާލިއެވެ. އަލި ކަޅުކަމެއް ހުންނަ ފިރިހެންކުއްޖާ މޫނު ކޮންމެސް ތަނަކުން ފެނުނު ހަނދާނެއް ވިއެވެ.

އިތުރަށް ހަނދާންކޮށްލުމަަށް އެހެންދިމާލަކަށް ސިކުނޑި އަނބުރާލަން އުޅެނިކޮށް އެކަމަށް ހުރަސް އެޅީ ދެން އެތާ ހުރި ކުޑަ އަންހެންކުއްޖާއެވެ. މަޑު ޕިންކް ކުލައިގެ ކުޑަ ޓީޝާޓްކޮޅަކާއި ކަޅު ކުލައިގެ ޓައިޓްކޮޅުގައި އެކުއްޖާ ވަރަށް ލޯތްބެވެ. ބޮލުގައި އަޅާފައިވާ ތޮފިން އެމޫނުކޮޅު އިތުރަށް ވަށް ކަމަށް ދައްކައެވެ. ދެކުދިންގެ ކޮނޑުގައި ވެސް ކުޑަ ދަބަހެއް އަޅުވާލާފައި އޮތެވެ.

“ކޮންބައެއްތަ އައީ ލައި”  ޒޫނީ ރީތިކޮށްގެން ތިރިއަށް ފޭބި ޝެނާ އަށް ދޮރުމަތީގައި ތިބި ދެކުދިން ފެނުމާއެކު އަތުގައި އިން ޒޫނީ ވެސް ދޫނުވީ ކިރިޔާއެވެ. މިކަހަލަ ދަނޑިވަޅެއްގައި އެކުދިން ފެނުން އެއީ ރަނގަޅު ނޫން ނިޝާނެއް ކަމުގައި ޝެނާ ދުށްޓެވެ.

“ޒާން އާއި ޒައިނީ…މިރަށުގަ….އޯވް ގޯޑް….. އަނެއްކާ ޝެމް ކޮއްކޮއަށް އެނގޭބާ”  ޝެނާ ކަންބޮޑުވިއެވެ.

“ބޮޑުމަންމީ”  ޒާން ދުވެލާފައި ގޮސް ސިޓިންގްރޫމް މެދުގައި ހުރި ޝެނާގެ ބަނޑާއި ހަމައިގާ ބައްދައިގަތެވެ. ޒާން ގެ ފަހަތުން ޒައިނީ ވެސް ދުއްވައިގަނެގެން ގޮސް ޝެނާ ގެ ފައިގާ ހިފައިގަތުމާއެކު ޝެނާ ޒައިނީ ނަގާ އުރާލިއެވެ. ޗަބީ ކޮލުގައި އުއްމަ ދޭން ފެށިއެވެ. ޒައިނީ ތިރީގައި ބެހެއްޓުމަށް ފަހު ޒާން އާއި އެއްހަމައަކަށް ތިރިވެލާ ޒާން ގެ ކޮލުގައި ވެސް ލޯބިކޮށްލިއެވެ. މި ހުރިހާ މަންޒަރުތަކެއް ބަލަން ދުރުގައި ހުރި އަލްޔާ އަށް އެއްޗެއް ހަނދާންވާންފެށިއެވެ.

“އޯވް… ޝެމް އާއި އެކު ފޮޓޯގަ…”  އަލްޔާ އަށް އެހިސާބަށް ބުނެވުމާއެކު ޝެނާ ތެޅިގަތެވެ.

“އާނ..އާނ..މީ ޒާން. މީ ޒައިނީ.ޒައިއްކޮ ނީންނާނެ ފޮޓޯގަ. މީ މިގޭ ކުދިން… އެނގެއެއްނު ޝައްޔަމް. ބަލާބާ ބޭބީސް… އެއީ ލައިދައްތަ އެނގޭ.. އަވަހަށް ސަލާންކޮށްލަބަލަ” ހިތްވަރުކޮށްފައި ވާހަކަދެއްކި ޝެނާ ޒާން އާއި ޒައިނީ އަށް އަލްޔާ ތަޢާރަފްކޮށްދިނެވެ.

ދެކުދިން ވެސް ލޯތްބާއެކު އަލްޔާ އާއި ސަލާންކޮށްލިއެވެ. ޒާން ގެ ކޮލުގައި ހިފާލިއެވެ. ޒައިނީ އުރާލަމުން އަލްޔާ ގެ ކޮލާއި ޒައިނީގެ ކޮލާ ޖައްސާ ފިއްތާލިއެވެ. އެމަންޒަރުގެ ފޮޓޯއެއް ޝެނާ ނަގާ ވަގުތުން ޝައިމް އަށް ވައިބަރ ކޮށްލިއެވެ. އަދި ވީ އެންމެ އަވަހަކަށް ގެއަށް އައުމަށް އެންގިއެވެ.

“ބޮޑުމަންމިގެ ބޭބީސް އެކަނިތަ؟ މަންމި ނާދޭތަ؟”  މި ހުރިހާ އިރު ޝެނާގެ ހިތަށް އުނދަގު ކުރަމުން ދިޔަ ސުވާލު ބޭރުކޮށްލިއެވެ. އަދި ކުޑަކޮށް އަރިވެލާފައި ގޭ ދޮރާއި ދިމާލަށް ބަލާލީ ހިތްނޭދޭ ސޫރައެއް ފެނިދާނެ ކަމަށެވެ.

“މަންމި އަންނާނަމޯ ފަހުން. މިއައީ ތިއްތަ އާއި އެކު”  އެވަގުތު ދޮރު މައްޗަށް އެރި ޒީޝާންގެ އެއްބަނޑުއެއްބަފާ ކޮއްކޮ ސުހާނާ އަށް އިނގިލި ދިއްކޮށްލަމުން ޒާން ބުންޏެވެ. ސުހާނާ ފެނުމުން ޝެނާގެ ތުންފަތަށް ގަދަކަމުންް ހިނިތުންވުމެއް ގެނުވިއެވެ. ސުހާނާ އާއި ޒީޝާނަކީ އަކީ ޝެނާގެ ބޮޑުދައިތަ އަދި ޝެނާގެ މަންމަ އާއި އެއްބަނޑު އެއްބަފާ ދައްތަގެ ދެދަރިންނެވެ. ޝެނާގެ ކުރީގެ ފިރިމީހާ އަކީ ވެސް ދެބެންގެދެދަރި ކުއްޖެއްކަމުން އޭރުގައި ޖެހުނު މައްސަލައިގެ ފަހުން އެއާއިލާގެ އެއްވެސް މެންބަރަކާއި ޝެނާ ގުޅުން ބަދަހިކޮށްފައެއް ނުވޭއެވެ.

“ޝެނާދައްތަ ކިހިނެއްތަ”  އެތެރެއަށް ވަދެގެން އައިސް ސުހާނާ ޝެނާ އާއި ކޮނޑާއި ކޮނޑުޖައްސާ ބައްދާލަމުން އަހާލިއެވެ. ޝެނާ އަނގައިން ނުބުނުމުން ސުހާނާ ރަކިވިއެވެ. އަލްޔާ ހުރީ އެދެމީހުންނަސް ބަލާށެވެ. ޒާން އާއި ޒައިނީ ޝެނާގެ އުރުގައި އިން ޒޫނީ އާއި ސަމާސަ ކުރަމުން ދިޔައެވެ.

“ޝެނާދައްތާ. އޭރުގައި ވީ ކަމެއް ވީ. އެނގޭ ކަންތައްތައް ވީ ރަނގަޅުގޮތުގައި ނޫން ކަން. އެކަމަކު އެކަމުގައި އަހަރެންގެ ކޮން ކުށެއް އޮތީ. ޒަމާނުއްސުރެ އާއިލާ ތެރޭގައި އޮންނަ އާއިލާ މީހުންނާއި ކައިވެނިކުރުވާ އުސޫލާ މެދު އަހަރެން ވާހަކަދައްކައެއް ނޫޅެން. އެއީ އަހަރެން ވަރަށް ފޫހިވާ ކަމެއް. ޒީދޮންތަ އާއި ޝެމްބެގެ ކައި…..”  ކުއްލިއަކަށް ޝެނާ ހީވީ ބިރެއް ފެނުނުހެންނެވެ.

“ޝެނާދައްތަ ސުހާނާ ދެކެ ރުޅިއައިއްސައެއް ނެތިން. އެކަމަކު މިކުދިން މިރަށަށް ފޮނުވީ ކީއްކުރަންބާ”  ސުހާނާގެ އަނގަ ބަންދުކުރުވަން ޝެނާ އަށް މިނޫން ގޮތެއް ނެތީއެވެ.

ސޯފާގައި ޖައްސާލަމުން ސުހާނާ ކުރެން ޝެނާ އަހާލިއެވެ. އޭރު އަލްޔާ އައިސްމައިލޯ ގިރައިގެން އައިސް ޒާން އާއި ޒައިނީ އަށް ދެނީއެވެ. މިހާ ކުޑަވަގުތުކޮޅެއްގައި ވެސް ދެކުދިން ވަނީ އަލްޔާގެ ހިތް މިލްކު ކޮށްފައެވެ.

“އީދު ޗުއްޓީއަށް. ދޮންދައްތަ ބުނީ މިރަށުގައި ވަރަށް ކުޅިވަރު އޮވެޔޭ. ދެން ޒާން އާއި ޒައިނީ އަބަދު ކޮންމެސް ތަނަކަށް ދާން ކިޔާތީވެ ދާހިތްވަނީ ކޮންތަނަކަށްހޭ އަހާލީމަ ބުނީ ޑެޑީ ކައިރިއަށޭ. މިއައީ ބައްޕަ ހަމަޖައްސައިދިން ލޯންޗެއްގައި. ޒީދޮންތަ އާއި ދޮންދައްތަ އަންނާނެ ދެދުވަސް ތެރޭގައި”  ސުހާނާ ގެ ވާހަކަތަކުން ޝެނާގެ ހިތް އިތުރަށް ހާސްވުން ނޫންކަމެއް ނުވިއެވެ. ކޮންމެސް ކަމެއް ވާން އުޅެނީއޭ އެހިތް ބުނަނީއެވެ. އަލްޔާ އާއި މެދު ހަމްދަރުދީ ވެވެނީއެވެ. ޝައިމް އަށް ވެދާނެ ގޮތަކާއި މެދު ކަންބޮޑުވަނީއެވެ. ޝައިމް އާއި ޝެނާ އަލްޔާ ކުރިމަތީގައި ބަދުނާމްވާން އޮތީ ކުޑަ ވަގުތުކޮޅެކޭ ހިތަށް އަރަނީއެވެ.

“ޑެޑީ….ޑެޑީ….”  ޒާން އާއި ޒައިނީގެ އަޑުން ގޭތެރެ ގުގުމާލީ ވަދެގެން އައި ޝައިމް ފެނުމުންނެވެ. ދެކުދިން ބޮއެލި މައިލޯ ހުސް ކުރި ތަށީގައި ހިފަހައްޓައިގެން އަލްޔާ ހުރީ ގަނޑުވެފައެވެ. އެދެކުދިން ޝައިމް އަށް ޑެޑީ އެކިޔަނީ ކީއްވެ ހެއްޔެވެ؟ ޝައިމް އާއި ޝައްޔަމް ވައްތަރުކަމުން ދެކުދިންނަށް އޮޅުނީބާއެވެ؟ ދެލޯބޮޑުވެފައި ހުރި ޝައިމް ގެ ނަޒަރު ހުރީ ދުރުގައި ހުރި އަލްޔާ އަށް ހުއްޓިފައެވެ. ޝައިމްގެ ހިތަށް ހަމަޖެހުމެއް ލިބުނީ އަލްޔާ ހިނިތުންވެލީމައެވެ.

އެއްފަހަރު އަލްޔާ އަށް އަނެއްފަހަރު ޝައިމް އަށް ބަލާލި ޝެނާ ގޮސް ހުއްޓުނީ އަލްޔާ އާއި ދާދި ކައިރީގައެވެ.

“ދެބެން ވެސް ވަރަށް ލޯބިވާނެ ޝެމް ދެކެ. ޑެޑީ ނޫން ގޮތަކަށް މުހާތަބް ނުކުރާނެ. ޝައިމް ވެސް ދެކެނީ އެއީ އަމިއްލަ ދަރިން ގޮތުގައި. އަބަދު ޝައްޔަމް ކޮއްކޮ ފޮޓޯ ފެންނާތީ އެމީހުން ހީކުރަނީ ޝައިމް އެއީ ޝައްޔަމް ކަމަށް. ޒައިނީ އުފަންވި ފަހުން ޝައްޔަމް އެއްކޮށް ގެއްލުނީ. ވީތަނެއް ވެސް ނޭނގޭ. އެކުދިންނަށް އެކުދިންގެ ބައްޕައަކީ ޝައިމް ނޫންކަން އެނގުނީމަ ހާދަ ދެރަވާނޭ ދޯ”  އަޑަށް މޮޅިވެރިކަން ގެންނަމުން ވާހަކަދެއްކި ޝެނާގެ ބޭނުން ކިތަންމެހާ ވެސް ރީއްޗަށް ކާމިޔާބުވިއެވެ. އަލްޔާގެ ސިކުނޑިއަށް ޝެނާ ވިސްނާދިން ގޮތް އެހިތް ގަބޫލުކުރިއެވެ.

އަލްޔާ ހީލިއެވެ. ޝައިމް ޝެނާ އަށް ބަލާލުމާއެކު ލޮލުގެ އިޝާރާތުން ވާހަކަތަކެއް ދެއްކިއެވެ. އެކަން ނޭނގުނީ އަލްޔާ އަށެވެ. ޝައިމް ދެކުދިން ގައިގާ ބައްދާފައި އުއްމަ ދީ ހެދިއިރު ވެސް އަލްޔާ ހުރީ ބަލަހައްޓައިގެނެވެ. ކުޑަކުދިން ދެކެ ޝައިމް ލޯބިމިވަނީ ހާދަ ބޮޑަށެވެ. ދުވަހަކު ވެސް އަލްޔާގެ ބަނޑުން ޝައިމް ގެ ދަރިއަކު މި ދުނިޔެއަށް އުފަން ވެދާނެބާއެވެ. ހިތަށް އެރި އެއްޗަކުން އަލްޔާ އަށް އުނދަގުވިއެވެ. ދެކުދިން އެއްފަހަރާ އުރާލައިގެން ޝައިމް ސިޑިއާއި ދިމާލަށް ހިނގައިގަނެ ސުހާނާ އާއި އަރާ ހަމަވިތަނާ ޝެމްބެ އޭ ކިޔާ ގޮވާލުމުން ސުހާނާ އަށް ހިނިތުންވުމެއްދީފައި މައްޗަށް އަރައިގެން ދިޔައީއެވެ.

އަލްޔާ ބަދިގެއަށް ވަނުމުން ޝެނާ ހަމަޖެހުމުގެ ނޭވައެއްލުމަށްފަހު ސުހާނާ ކައިރީގައި އިށީނެވެ.

“ކާކު އެއީ؟ މިބުނީ ޒާން އާއި ޒައިއްކޮއަށް މައިލޯ ދިނީ”  ސުހާނާ ސުވާލުކޮށްލިއެވެ.

“އެއީ ޝައިމްކޮއްކޮގެ އަންހެނުން އަލްޔާ. ސުހާނާ ޕްލީޒް މިގޭތެރޭގައި ނުދައްކައްޗެ ޝައިމްކޮއްކޮ ކުރީގައި ކައިވެންޏެއް ކުރި ވާހަކަ. އެވާހަކަ އިވުނީމަ ލައި ދެރަވާނެއްނު ދޯ. ލައި އަށް ވެސް އެކަން އެނގޭ. އެކަމު އެވާހަކަ ފަށަފަށައިގެން ނުދައްކަން އެދިފައި އިނީ. އެއީ ވަރަށް ރަނގަޅު ކުއްޖެއް”  ޝެނާ ސުހާނާ އަތުގައި ހިފާލައިގެން އިނދެ ވާހަކަދެއްކިއެވެ.  ދެމީހުން ވެސް އެއްކޮށް މައްޗަށް އަރައިގެން ދިޔައިރު ޝައިމްގެ ކޮޓަރިން ޒާން އާއި ޒައިނީގެ ސަކަރާތުގެ އަޑު ގުގުމާލާފައި ހުއްޓެވެ.

 

ޒާން އާއި ޒައިނީ އަށް ހާއްސަކޮށްފައި ހުރި ކޮޓަރި އަލްޔާ އަށް މިފެނުނީ އަދި ކިރިޔާއެވެ. އެދެކުދިންދެކެ ޝައިމް ވާ ލޯބި މިކޮޓަރިއަށް ބަލާލިޔަސް އެނގިގެންދާނެއެވެ. ދެކުދިންނަށް އަލްޔާގެ އަތުންލަވާ ކާންދީ ފެންވަރުވާ ހަދާފައި ކޮޓަރިއަށް ވަދެ ނިންދަވާލިއެވެ. ޒާން އަވަހަށް ނިދިޔަސް މަންމަގެ ބަނޑުދަށުގައި ނިދަން އާދަވެފައިވާ ޒައިނީ ނިންދަވަން އަލްޔާ ޖެހުނީ ވަރަށް ބޮޑަށް މަސައްކަތްކުރާށެވެ. އަބަދުވެސް ނިދާއިރު ކުޑަކުދިންގެ ވާހަކައާއި ކާރޓޫންތަކުގެ ވާހަކަތައް އަޑުއަހަން އާދަވެފައިވާ ޒައިނީ އަލްޔާ ކައިރިން ވާހަކަކިޔާ ދިނުމަށް އެދުމުން އަލްޔާ ކިޔާދިނީ ރަސޫލުބޭކަމުންގެ ވާހަކަތަކެވެ. މުޅިން އަލަށް އިވުނު ވާހަކަތަކެއް ކަމުން ކުޑަކުޑަ ޒައިނީގެ ދެލޮލުން ނިދިފިލައި މާބޮޑަސް ޝައުގުވެރިވެވުނީއެވެ. ނަތީޖާއަކަށް ވެގެން ދިޔައީ އަލްޔާގެ އަތްދަނޑިމަތީގައި އޮވެ ޒައިނީ އަށް ނިދުނު ވަގުތު އަލްޔާ އަށް ވެސް ދެލޯ މެރުނީއެވެ.

ކޮޓަރީގައި އަލްޔާ އަށް އިންތިޒާރުކުރަމުން ދިޔަ ޝައިމް ބޭރަށް ނިކުމެ ދެކޮޅު ހޯދާލިއެވެ. އަލްޔާ ގެ އެއްވެސް ހަބަރެއް ނުވުމުން ކުދިންގެ ކޮޓަރިއަށް ވަދެ ލައިޓްތައް އޮންކޮށްލި ވަގުތު ފެނުނު މަންޒަރަކުން އެހިތް އުފަލުން ނަށާލިއެވެ. ޒައިނީގެ ގައިގާ ކުޑަކޮށް ބައްދާލައިގެން ނިދިފައި އޮތް އަލްޔާ ފެނުމުން އެދިމާލަށް ބަލަހައްޓައިގެން ހުރެވުނީއެވެ. އެއުފާވެރިކަން ކުޑަވަގުތު ކޮޅަކަށް ދެމިގެންދިޔައެވެ.

ދެވަނަ ސިކުންތުގައި ހިތް ރޯލީ ވާނެ ގޮތެއް ނޭނގޭތީއެވެ. އަލްޔާ އަށް ހަގީގަތް އެނގުމުން ނިކުންނާނެ ނަތީޖާ ޝައިމް އަށް ކަނޑައެޅިގެން އެނގޭއެވެ. އެނދު ކައިރިއަށް ހުއްޓުމަށްފަހު ޒާންގެ ފަން އިސްތަށިކޮޅުގައި ލޯބިން ފިރުމާލާ މޫނުގައި ބޮސްދިނެވެ. އަދި ތަންކޮޅެއް ދުރަށްޖެހިލާ ތިން މީހުން ވެސް އަރާނޭ ގޮތަށް ފޯނުން ފޮޓޯއެއް ނަގާލިއެވެ. އަލްޔާ ކައިރިއަށް ޖެހިލާ ޒައިނީގެ ކޮލުގައި ދޮނެއް ދިނުމަށްފަހު އަލްޔާ ގެ ވެސް ކޮލުގައި ބޮސްދިނެވެ. ތިން މީހުންގެ ގައިމަތީގައި ކުއިލްޓް އެޅުމަށްފަހު ކޮޓަރިން ނިކުމެ ދޮރުލައްޕާލިއިރު ތުންފަތްމަތީގައި ވަނީ ފަނޑު ހިނިތުންވުމެކެވެ.

އަނެއް ދުވަހެހެވެ. ފަތިސްނަމާދުކޮށްގެން ބޭރަށް ނިކުތް އަލްޔާ ބަދިގެފަރާތަށް ދިޔައީ ހެނދުނުގެ ނާސްތާ ތައްޔާރުކުރުމަށެވެ. އިސްތަށިގަނޑުގައި ހުޅިއެއް ޖެހުމަށްފަހު ލައިގެން ހުރި އަތްދިގު ޓީޝާޓްގެ އަތުކުރި މައްޗަށް ޖައްސާލުމަށްފަހު ފެންހޫނުކުރާ ޖަގަށް ފެންއަޅާ ޖައްސާލާފައި އެނބުރިލި ވަގުތު ސުހާނާ ބަދިގެއަށް ވަދެގެން އަންނަނީއެވެ. ސުހާނާ އަށް އަލްޔާ ހިނިތުންވުމެއް ދިނުމަށްފަހު އެހެން މަސައްކަތާއިގެން އުޅެންފެށިއެވެ. ސުހާނާ ކޮފީއެއް ހަދައިގެން އެތާހުރި މޭޒުކައިރީގައި އިށީނދެ އަލްޔާ އަށް ބަލަންފެށިއެވެ.

“ޝެމްބެ ވަރަށް ރަނގަޅު ދޯ”  ސުހާނާ ބޭނުންވީ އަލްޔާ އާއި ރަހްމަތްތެރިކަމުގެ ގުޅުމެއްއުފައްދާށެވެ. އަލްޔާ ހޫމް އެއް ލައްވާލާފައި ހީލިއެވެ.

“މިފެމެލީގެ އެއްވެސް މީހެއް އަދި ނުފެނޭ ދޮންތަ ނޫން. ވަރަށް ދެކިލާހިތުން މިތިބީ ހުރިހާ މީހުން ވެސް. ޝެމް ބުނި މަންމަ އާއި ބައްޕަ މާލޭގައި ތިބި ވާހަކަ. ކޮންމެސް މައްސަލައެއް އުޅޭހެން ހީވަނީ. ނުދެކެން ފޯނަކުން ވެސް އެމީހުންނާއި ވާހަކަދައްކާތަނެއް” ސުހާނާ އަކީ ރަނގަޅު ކުއްޖެއް ގޮތުގައި އަލްޔާ އަށް ފާހަގަކުރެވުމުން ވާހަކަދައްކަން ވަރަށް ފަސޭހަވިއެވެ.

“އާއިލާ އެއް ވިއްޔާ މައްސަލަތައް ވެސް އުޅޭނެ. ވާހަކަދައްކައިގެން ހައްލު ކުރެވިދާނެ. ދޮންދައްތަ އަބަދުވެސް ލޯބިވާނެ ޝެނާދައްތަ އާއި ޝެމްބެ ދެކެ. އަދި ދޮންދައްތަބެ ވެސް އަބަދު ދައްކާނީ އެދެމީހުންގެ ވާހަކަ. އަސްލު މައްސަލަ ޖެހުނީ ޝެނާދައްތަގެ ކައިވެނި ގަދަކަމުން ކުރި ހިސާބުން ފެށިގެން. އެކަމަކު މަންމަ އާއި ބައްޕަ ވިއްޔާ. މާގިނަ ދުވަހަކު ރުޅިން ނުތިބެވޭނެއްނު”  މަޑުމަޑުން ކޮފީ ބޮމުން ދިޔަ ސުހާނާ ވާހަކަދެއްކިއެވެ. ސުހާނާގެ ވާހަކަތަކުން އަލްޔާ ހައިރާންވިއެވެ. ޝެނާގެ ކައިވެނި ކުރެވުނީ ވެސް މަޖުބޫރުން ކަން އަލްޔާ އަށް އަދި މިއެނގުނީއެވެ.

ހަލުވިކަމާއެކު ރޮށިފިހެ ނިންމާލާ ބަރަބޯ މައްސުނިލުމަށް ތައްޔާރުކުރަމުން އަލްޔާ ދިޔައެވެ. ސުހާނާ އެހީވުމުގެ ގޮތުން ހުނިގާނާން ފެށި ވަގުތު ޒޫނީ އުރާލައިގެން ޝެނާ ބަދިގެއަށް ވަނެވެ. އަދި ބަދިގެ އާއި ސިޓިންގްރޫމް ފެންނާނެ ގޮތަށް ބަހައްޓާފައި ހުރި ބޮޑު ސޯފާގައި ޒޫނީ ބާއްވާލަމުން ބުށްފުޅި ހަދަން ފެށިއެވެ.

“ޝެނާދައްތަ އަށް ލިބިފައި މިހުރީ ވަރަށް ހީވާގި ފަހަރިއެއް. އަތްމަތި ހާދަ އަވަހޭ”  ސުހާނާ ސަމާސާ ކޮށްލިއެވެ. އަލްޔާ ހީލިއެވެ. ޝެނާ ވެސް ހީލަމުން ޒޫނީގެ ބުށްފުޅި ތައްޔާރުކުރުމުގައި އުޅުނެވެ.

 

ސަޖޫލް ދިން ދައުވަތަކަށް އަލްޔާ އެގެއަށް ދިޔުމުން ގޭގައި ތިބީ ޝެނާ އާއި ޝައިމް ގެ އިތުރުން ސުހާނާ އެވެ. ޒާން އާއި ޒައިނީ ރީތިކޮށްގެން ކޮޓަރިއަށް ނިންދަވަން ސުހާނާ ވަނުމުން ޝެނާ ވެސް ކޮޓަރިއަށް ވަނީ ޒޫނީ ނިންދަވާށެވެ. ކޮޓަރީގައި ލެޕްޓޮޕުން މަސައްކަތެއް ކުރަން އިން ޝައިމް ބަދިގެއަށް ގޮސް އަމިއްލައަށް ކޮފީތައްޓެއް ހަދައިގެން އައިސް ސިޓިންގްރޫމް ސޯފާގައި ޖައްސާލިއެވެ. ރިމޯޓް ނަގާ ޓީވީ ހުޅުވާލުމަށްފަހު ޗެނަލްތައް ބަދަލުކުރަމުން ގޮސް މަޑުޖައްސާލީ ފުޓްބޯޅަ މެޗަކަށެވެ. އަތުކުރީގައި އޮތް ގަޑިއަށް ބަލާލީ އަލްޔާ ބަލާ އަންނަން ވަކި ގަޑިއެއް ބުނެފައި އޮތީމައެވެ. ޒޫނީ ނިންދަވާފައި ޝެނާ ތިރިއަށް ފޭބި ވަގުތު ސޯފާ ގޮނޑީގައި އޮތް ޝައިމް ފެނުމުން ކައިރިވެލިއެވެ. ޒާން އާއި ޒައިނީ އައިފަހުން ޝައިމް އާއި ވާހަކަދައްކާލަނެ ވަގުތެއް ޝެނާ އަށް ވަނީ ނުލިބިފައެވެ.

ޝައިމް އާއި ކައިރިވެލާ ކުޑަމޭޒުމަތީގައި އޮތް ރިމޯޓްނަގާ އަޑު ތަންކޮޅެއް މަޑުކޮށްލިއެވެ. ޝައިމް ޝެނާ އަށް ބަލާލުމަށްފަހު ގޮނޑީގައި ހަމަޖެހިލިއެވެ.

“މާދާމާ ހެނދުނު މަންމަ އާއި ޝުމާ އަންނާނެ. ވާނެ ގޮތެއް ވެސް އެނގެނީއެއް ނޫން. ކޮއްކޮ ވަރަށް ވިސްނައިގެން އުޅެއްޗެ. ލައި އަށް ވެސް މިހާރު އެނގޭ މަންމާ އާއީ އަހަރެމެން ދެމީހުން މައްސަލަތަކެއް އުޅޭކަން. މިހާރު ލައި އެއުޅެނީ ހަގީގަތާއި ވަރަށް ގާތުގައި”  ކުޝަން ނަގާ އުނގުގައި ބާއްވާލަމުން ޝެނާ ވާހަކަދެއްކިއެވެ.

“ހިތަށް އަރާ ކޯއްޗެއް ހޯދަންބާއޭ މިތަނަށް އެއަންނަނީ. މީކީ މަންމަ އާއި ވާ ގެއެއް ނޫން. ދެން އެ ޒީޝާން ގެންނަނީ ކީއްކުރަން. އަހަރެންގެ ދިރިއުޅުން ހަލާކުކުރަންތަ”  ޝެނާ ވާހަކަދައްކަން ފެށި މައުލޫއެއްގެ ސަބަބުން ޝައިމް ގެ ލޭކެކިގަތެވެ.

“ކޮއްކޯ ދޮންތަ ބުނަންތަ ވާހަކައެއް. މާދަމާ މިގޭތެރޭގައި އެއްވެސް ހަމަނުޖެހުމެއް ހިންގާކަށް ބޭނުމެއް ނޫން. ބޭރުން މީހަކަށް އެނގިއްޖިއްޔާ ކިހިނެއްވާނީ. އަނެއްކާ ޒާން އާއި ޒައިއްކޮ އަށް އަޑު އިވުނިއްޔާ އެކުދިންނަށް ކޮންކަހަލަ ނޭދެވޭ އަސަރެއް ކުރާނެ. ޒުވާބުކުރަމުން ގޮސް ލައި އަށް ހުރިހާ ކަމެއް އެނގުނިއްޔާ ވާނެ ގޮތަކާއި މެދު ވެސް ވިސްނަންވާނެ”  ޝެނާ ޝައިމް އަށް ވިސްނާދެމުން ދިޔައެވެ.

“ޔޫ އަރ ރައިޓް ދޮންތާ. އަޅުގަނޑު ލައި ބޭނުން ކޮންމެހާލެއްގައި ވެސް. އަދި ބޭބީސް ވެސް. އެމީހުން އެއަންނަނީ މިތާ އަބަދަކު އުޅޭކަށް ނޫނެއްނު. ކެތްކުރާނަން އަޅުގަނޑުގެ ދެކުދިންނަށްޓަކައި ވެސް”  ދެއަތް ދެއަތާއި ޖޯޑުކޮށްލަމުން ޝައިމް ބުންޏެވެ.

 

އަނެއް ދުވަހަށް އަރައިގެން އައި އިރާއެކު އަލްޔާ ބަދިގޭގައި ވަރަށް އަވަދިނެތި އުޅެމުން ދިޔައީ ފިރިމީހާގެ މަންމަ އަށް ރަނގަޅު ނާސްތާއެއް ތައްޔާރުކުރުމަށެވެ. ސުހާނާ ބުނެފައިވާ ގޮތުން ވިއްޔާ ނުވައެއް ޖަހަންވާއިރަށް އެމީހުން ގެއަށް އަންނާނެއެވެ. ޝެނާ ގެ މޫނުމަތިން މާ އުފާވެރިކަމެއް ނުފެނުނު ނަމަވެސް އޭނާ ވެސް ބަދިގޭގައި މަސައްކަތް ކުރުމުގައި އުޅޭއެވެ. ހެނދުނަށް ރޮށިފިހެ ބިސްރިހަ ކައްކާފައި ފަތުމައްސުނި އަދި ޕާނާއި ބަޓަރ ޖޭމް މޭޒުމައްޗަށް އެރުވުމަށް ފަހު އެވަގުތު ހޭލައިގެން އައި ޒާން އާއި ޒައިނީ އަށް ބުށްތަށި ވެސް ދިނީ އަލްޔާ އެވެ.

“ޝެނާ ދައްތާ އަހަރެން ކޮޓަރި ތައްޔާރުކޮށްފިން. ދޮންތަ އާއި އަހަރެން އެއްރޫމުގައި ނިދޭނެ. ދެން ދޮންދައްތަ އަށް ވަކިން ހުންނާނެެއްނު ކޮޓަރިއެއް. ބެޑްޝީޓް ވެސް ބަދަލުކޮށްފިން. ލައި ހުރީ މޮޕް އަޅާ މުޅި ރޫމް އޮފް އަރުވާލާފައި”  ސުހާނާ ހުރިހާ ވާހަކައެއް ދެއްކުމުން ވެސް ޝެނާ ހަމައެކަނި ހޫމް އެއް އަޅުވާލިކަމެވެ.

އަލްޔާ ކޮޓަރިއަށް ދިޔައިރު ޝައިމް ގައި މަތީގައި ކުއިލްޓް އަޅާލައިގެން އޮތީ ނިދާކަމަށް ހެދިގެންނެވެ. ހަގީގަތުގައި އަންނަން އުޅޭ މީހުންނާއި ކުރިމަތިލާން ޝައިމް ބޭނުން ނުވަނީއެވެ. އަލްޔާ އަށް ޝައިމް އަށް ގޮވާކަށް ވެސް ނުކެރުނެވެ. ކުއްލިއަކަށް ކޮޓަރީ ދޮރުހުޅުވާލި އަޑަށް އަލަމާރި ކައިރީގައި ހުރި އަލްޔާ ދިޔައީ ސިހިގެންނެވެ. ޒާން އަށް  ޝައިމްގެ ކޮޓަރިން އަލްޔާ ފެނުމުން މޫނުމަތިން ހައިރާންކަމެއް ފެނުނެވެ.

“ޑެޑީ…ޑެޑީ…ހޭލަބާ… ހިނގާ މަންމި އަށް ވެލަކްމަ ކިޔަން ދާން ޒާން އާއި އެކު. ޒައިއްކޮ ވެސް އެބުހުރި”  ޝައިމް ގައިމަތީގައި އަރާ އިށީންނަމުން ޒާން ޝަކުވާ ކޮށްލިއެވެ. އަލްޔާ އުފާވިއެވެ. އެކުދިންގެ ސަބަބުން ވިޔަސް ޝައިމް ތިރިއަށް ދާން އެއްބަސް ވާނެކަން އެނގޭތީއެވެ. ޝައިމް ތެދުވެ ޒާން ގައިގާ ބައްދާލާ ލޯބިކޮށްލުމަށްފަހު އަލްޔާ އަށް ބަލާލިއެވެ.

“އެހެންތަ… ދަރިފުޅު ދޭ.. ޑެޑީ ދާނަން ބްރަޝް ކޮށްގެން”  ޝައިމްގެ ގައިމަތިން އެނދުން ތިރިއަށް ފުންމާލި ޒާން ދާން އުޅެފައި ވެސް އަލްޔާ އަށް ބަލާލިއެވެ. އެވަގުތު އެޅަހިތުގައި އުފެދުނު ސުވާލަކުންނެވެ.

“ޑެޑީ.. ލައި ދައްތަ ނިދަނީ ޑެޑީ ކައިރީގަތަ. ދެން މަންމި އައިމަ ބާއްވާނީ ކޮންތާކު” ޝައިމް ގެ މޫޑްއޮފްވިއެވެ. އަލްޔާ އަށް ބަލާލާކަށް ވެސް ނުކެރުނެވެ. ޝައިމް އަށް އެއްޗެއް ނުބުނެވި އުޅެނިކޮށް އަލްޔާ ވާހަކަދެއްކިއެވެ.

“ޒާންގެ މަންމި ނިދާނީ ޒާންގެ މަންމި ބުނި ތަނެއްގައި. އޭރުން ލައި ދައްތަ ނިދާނީ ލައިދައްތަގެ ޓޫ ކިއުޓީސް އާއި އެކު”  ޒާން ގެ އިސްތަށިގަނޑުގައި އަތް ހިންގާލަމުން އަލްޔާ ބުންޏެވެ. ޒާން ހީލަމުން ކޮޓަރިން ދުވެލާފައި ނިކުތެވެ. މި ހުރިހާ އިރު ހުއްޓިފައި އިން ޝައިމް އަލްޔާ އަށް ބަލާލިއެވެ. ޝައިމް އާއި ދާދި ކައިރީގައި އަލްޔާ ހެވިފައި އިންތަން ފެނުމުން ޝައިމްގެ ހިތަށް އުފާވެރިކަން ލިބިގެން ދިޔައެވެ.

އަލްޔާ ނުވިސްނާ އިންދާ ޝައިމްގެ ބޯ އަލްޔާ އުނގުގައި ބާއްވާލިއެވެ. އަދި މޫނު ކުޑަކޮށް އުފުލާލަމުން އަލްޔާ އަށް ބަލާލިއެވެ. އުނދަގުވަމުން ދިޔަ އަލްޔާ އަށް އެއްޗެއް ބުނާކަށް ނުކެރުނެވެ. މިދަނޑިވަޅުގައި ވެސް އަލްޔާ ގެ ހިޔާލަށް އަންނަނީ ލޫކެވެ. އަލްޔާގެ އުގުގައި އެގޮތަށް ބޯ އަޅާލަން ލޫކް އަންނާނީ ކޮންއިރަކުން ހެއްޔެވެ؟ މިވަގުތު ޝައިމް ގެ މޫނު ވެސް އަލްޔާ އަށް ލޫކް ގެ މޫނު ސިފައިގާ ފެންނަން ފެށުމުން އަލްޔާ ސިހިފައި ދެފަރާތަށް މޫނު ތަޅުވާލިއެވެ.

ކުއްލިއަކަށް އަލްޔާ ސިހުނީ ޝައިމްގެ ތުންފަތް އަލްޔާގެ އަތްތިލައިގާ ޖެހުމުންނެވެ. މަޑުމަޑުން ޝައިމްގެ އަތް ތެރެއިން އަލްޔާ އަތް ދަމައިގަތެވެ. އަދި ޝައިމް ގެ ހިތަށް އަރާނެ އެއްޗެއް ނޭނގޭތީ ޝައިމް އަށް ބަލާލަމުން ހީލިއެވެ. އެވަގުތު ޝައިމް ގެ ލޮލުގެ އަރިމަތިން ވެއްޓެން ތައްޔާރުވި ކަރުނަތިކި ފެނި އަލްޔާ ހުއްޓުން އެރިއެވެ.

 

 

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.