އެ ހުވަފެން (1 ވަނަ ބައި)

ޓިއުޝަން ނިމުމުން ގެއަށް އައުމަށް އަހަރެން ހިނގައިގަތީ ޓިއުޝަން ކިލާހު ކުއްޖަކާ އެކުއެވެ. އަހަރެމެންނަށް އާދެވުނީ ޖުމްހޫރީ މައިދާނާ ދިމާއިންނެވެ. ޖުމްހޫރީ މައިދާނާ ހަމަ ކައިރިވެވޭއިރަށް، އެތާ ތިބި ބަޔަކު އަހަރެމެންނާއި ދިމާއަށް، އެމީހުން ގެންގުޅުނު ބަޑި ދިއްކޮށްފިއެވެ. އިނގިރޭސިބަހުން ބުނާނަމަ، އަހަރެމެން “ސްޓެޗޫ” ނުވަތަ “ފްރީޒް” ވީ އެހިސާބުންނެވެ.

އެމީހުންނާއި ދިމާއަށް ބަލާލެވުނުއިރު އެމީހުންގެ ތެރޭގައި ލިލިތު ހުއްޓެވެ. ލިލިތު ހުރީ ނުބައި ފާޑަކަށް ހެވިފައެވެ. ލިލިތު ފެނިފައި އަހަރެންގެ ގާތަށް އައީ އަމަށަކު ރުޅިއެއް ނޫނެވެ. ނަމަވެސް ވަރަށް މަޑުމަޑުން އަހަރެން ހުރީމެވެ. ހީވާގޮތުން ނަމަ ލިލިތު ހުރީ އެމީހުންގެ އެހީތެރިއަކަށެވެ. ލިލިތުއަކީ އެކަހަލަ މީހެއް ކަމަކަށް ފަހަރެއްގައިވެސް އަހަރެން ހިއެއް ނުކުރަމެވެ. އޭނާއަކީ ތަންކޮޅެއް ކުރީގައި، އަހަރެންނާއި އެއްކިލާހެއްގައި އުޅުނު ކުއްޖެކެވެ. އޭރު އޭނާއަކީ ރީތިކޮށް މީހުންނާއި ވާހަކަދައްކާ ރަނގަޅު ކުއްޖެކެވެ. ނަމަވެސް، މީހާ ހުންނަގޮތުން ގޮތް އެނގޭނެ ހެއްޔެވެ؟ މިކަހަލަ ޚިޔާލުތަކެއް އަހަރެންގެ ސިކުނޑިއަށް ވެރިވަމުން ދިޔައެވެ.

ދެން، އަހަރެންނަށް ފެންނަމުން ދިޔައީ، އޮޅިގެން އެތަނަށް ދެވޭ މީހުންވެސް ގަދަކަމުން ހިފަހައްޓާ، ދިޔަނުދީ ގެންގުޅޭ މަންޒަރެވެ. އަހަންނަށް ބަލާލެވުނީ ބަންޑާރަ ކޮއްޓާ ދިމާއަށެވެ. ދެން، ޝަހީދު ހުސެން އާދަމް ބިލްޑިންގްއާ ދިމާއަށެވެ. އެއްވެސް ސިފައިންގެ މީހެއް ނޫނީ ފުލުހެއް ފެންނާކަށްވެސް ނެތެވެ. މިއީ އަޅެ ކިހައި ބޮޑު އަޖާއިބެއް ހެއްޔޭ އަހަރެންގެ ހިތަށް އެރިއެވެ. މި ނާޒުކު ދަނޑިވަޅުގައި މިމީހުން މިދިޔައީ ކޮންތާކަށް ބާވައެވެ؟

އަހަރެންނަށް އަނެއްކާވެސް ބަލާލެވުނީ ލިލިތުއާ ދިމައެވެ. އޭނާއަށްވެސް އަހަރެން އެނގުނީ ކަންނޭގެއެވެ. ތަންކޮޅެއް ބޮޑާ ފާޑަކަށް އަހަރެންނަށް ބަލައިލިއެވެ. ހަޤީޤަތުގައި ލިލިތުއަކީ ރާއްޖޭ މީހެއް ނޫނެވެ. އޭނާއަކީ، ސައުތްކޮރެއާ އަށް ނިސްބަތްވާ، އިސްކޮޅުން ދިގު، ދޮން އަންހެނެކެވެ. ފަހަރެއްގައި އޭނާގެ މަންމަ ރާއްޖެއަށް ނިސްބަތްވެދާނެ ކަންނޭނގެއެވެ. އަހަންނަށް، ލިލިތުއާއި ބެހޭ ގިނަ މައުލޫމާތެއް ނުވެސް އެނގެއެވެ.

ލިލިތުމެން މިއުޅެނީ ރާއްޖެ ހިފޭތޯ ކަންނޭނގެއެވެ. މިކަމެއް ހިނގަމުން ދާކަމެއް ނޭނގުނީ އަހަރެމެންނަށެވެ. ޓިއުޝަން ކިލާހުގައި ތިބިއިރު، އަހަރެމެންނަށް ނޭނގުމުގެ ސަބަބުން އެދިމާއިން އާދެވުނީއެވެ.

ދެން ފެންނަން ފެށީ މުޅިން އެހެން ތަނެކެވެ. ބޮޑު ހަވޭއްޔެކެވެ. އަހަރެމެންނަށް މި ތިބެވުނީ އެހަވޭލީގެ އެތެރޭގައެވެ. އަހަރެމެން ހިފަހައްޓައިގެން ތިބިމީހުން އެމީހުންނާއި އެންމެ ކައިރިއަށް ތިބި މީހުންތައް މަރަން ފެށިއެވެ. ފަހަތުގައި ތިބި މީހުން، ހަވޭލީގެ ދެ އަރިމަތިން ސަލާމަތްވުމަށް މަސައްކަތް ކުރެއެވެ. އަހަރެންވެސް، އަހަރެންގެ ސަލާމަތް ހޯދުމަށް އެމީހުންގެ ފަހަތުން ދިިޔައީމެވެ. އަހަރެމެން ސަލާމަތްވުމަށް ދިޔަނަމަވެސް، އެތާ އަހަރެމެން ގައިދު ކޮށްގެން ތިބިމީހުން އަޅައެެއް ނުލައެވެ. އަހަރެންވެސް އެހެން ސަލާމަތްވުމަށް ދަނިކޮށް އެތަނުގައި ލިލިތު ހުއްޓައި ފެނުނެވެ. އުޅުނުގޮތުން ހީވީ އޭނާވެސް ސަލާމަތްވާން އުޅުނު ހެންނެވެ. އަހަރެންވެސް އެކަމާ މާބޮޑަށް އަޅައެއް ނުލަމެވެ.

ހަވޭލީގެ ދޮރުހުޅުވާލާފައި ނުކުމެވުނުއިރު ހުރީ އޯކިޑްމާގޭގެ ބޭރަށް ނުކުމެވިފައެވެ. އޯކިޑްމާގެއަކީ އަހަރެން ނިސްބަތްވާ ރަށުގައި ހުންނަ ގެއެކެވެ. ބޭރު ބަލާލެވުނުއިރު އެތަށް ބައެއް އެތަނުގައި މަޑުކޮށްގެން ތިއްބެވެ. ހީވަނީ މަދަރުސާދޮށަށް ދަރިން ބަލައި އައިސް ތިބޭ ހެންނެވެ. އެމީހުންގެ ތެރެއިން އަހަރެންގެ މަންމަ ފެނުނެވެ. މަންމައަށް އަހަރެން ހަމަ ފެނުމާއެކު ކައިރިއަށް އައެވެ. މަންމަ ހުރީ އަހަރެން ބަލާ އައިހެވެ. އެތަނުގައި ތިބި އެހެން މީހުންވެސް ތިބީ އެމީހުންގެ ދަރިން ނުކުންނާނެ ވަގުތަކަށް އިންތިޒާރު ކޮށްލަކޮށްލައެވެ. މަންމަ އަވަސްއަވަހަށް އަހަރެން ގެއަށް ގެންގޮސްފިއެވެ. އޯކިޑްމާގެއާއި އަހަރެމެންގެއާ ވަރަށް ކައިރިވާނެއެވެ. ދެފިޔަވަޅު އަޅާއިރަށް ގެއަށް ދެވޭނެއޭ ބުންޏަސް ދޮގަކަށް ނުވާނެއެވެ. އެހައިވެސް ކައިރިއެވެ.