އިންތިޒާރު 47

އިންތިޒާރު 47

(ނޯޓް: ކުރިން އަޕްލޯޑް ކުރެވިފައިވާ ޕާރޓްގަ ބައެއް މަދުކޮށް އަޕްކުރެވިފައިުމުން 47 ވަނަ ޕާރޓް މިވަނީ އަލުން އަޕްލޯޑް ކުރެވިފަ)

ޖެހިގެން އައި ދުވަހުގެ ހެދުނެވެ. ގޭގެ އެންމެން ތިބީ ސައިބޯށެވެ. ދެކެވެމުން ދިޔައީ ރޭގެ ޕާޓީގެ ވާހަކައެވެ.
“ސޯ ހަނީމޫންއަށް ދާނެ ތަނެއް ފައިނަލް ވެއްޖެތަ؟” އެންމެންގެ ސަމާލުކަން ޝާންގެ ސުވާލަށް ހުއްޓުނެވެ.
“ތަންކޮޅެއް ފަހުން ދޯދާނީ” ރާއިން ޒާޔާއަށް ދޯދެމުން ބުނެލިއެވެ. ރާއިންގެ ޖަވާބު އިވިފައި ޒާޔާ ހައިރާންވިއެވެ. އޭނަ ހީކުރީ އެންމެންނަށް އެދެމީހުންގެ ތެރޭގައި މައްސަލައެއް ނެތްކަން އަންގަންވެސް ރާއިން އަވަހަށް ދާނެ ކަމަށެވެ. ނަމަވެސް އެންމެންގެ ކުރިމަތީގައި ޒާޔާއަކަށް ރާއިންއާ ދެކޮޅަށް އެއްޗެކޭ ބުނާކަށެއް ނުކެރުނެވެ.
ރާއިން ތިއުޅެނީ މަންމަމެން ކުރިމަތީ އަހަރެން ގޯސް ކުރާނެ ގޮތެއް ނޭގިގެންތަ، ތިގޮތަށް ކަންތައް ކުރީމަ އެމީހުން ހީކުރާނީ އަދިވެސް އަހަރެން ރާއިންއަށް މާފް ނުކުރަނީއޭ، އެއީ ދޯބޭނުންވާ ގޮތަކީ، އެންމެން ކުރިމަތީގައި އަހަރެން ގޯސްކުރަން، އަހަންނަށް އެނގެއޭއެކަން” ރުޅިއައިސްފައި ހުރެ ޒާޔާއަށް ވާހަކަ ދެއްކުނީވެސް ބާރަށެވެ.
“އަހަރެން ހީކުރީ ޒާ ދާންބޭނުން ނުވާނެ ކަމަށް، އެހެންވެއެގޮތަށް ބުނީ..”
“ރަނގަޅޭ، ބޭނުމެއް ނޫނޭ ދާކަށް، އެކަމް އެކަން އެހެން މީހުންނަށް އަންގަނީ ކީއްކުރަންތަ، އަހަރެން ބޭނުމެއް ނޫން އެންމެންގެ ކުރިމަތީ ގޯސްވާކަށް، ސޯ އަހަރެން ބޭނުން ދާން، ދެން ރާއިންއަށް އެނގޭނީ” ރާއިންގެ ވާހަކަ ނުނިމެނިސް ޒާޔާ އޭނަ ބޭނުންވާގޮތް ހާމަ ކުރިއެވެ.
ޒާޔާއާ ދެކޮޅަށް އިތުރު އެއްޗެއް ނުބުނެ ރާއިން އެތަނުން ނުކުމެގެންދިޔައީ އޭނައާ ޖަދަލު ކުރަން ބޭނުންނުވީމައެވެ. ރާއިން ކޮންމެފަހަރަކު މިގޮތަށް ކަންތައް ކުރާތީ ޒާޔާ ހައިރާންވިއެވެ. ނަމަވެސް ލިބިގެން ދިޔައީ އިތުރު ހިތްވަރެކެވެ.
ކުޑައިރުކޮޅެއްފަހުން އަނެއްކާ ރާއިން ކޮޓަރިއަށް އައިސް އޮފީހަށްދާން ރެޑީވާންފެށިއެވެ. އެހުރިހާއިރުވެސް ޒާޔާ އިނީ ރުޅިމޫނުހަދައިގެނެވެ. އެންމެފަހަރަކު ރާއިންއަށް ބަލާވެސް ނުލައެވެ. ނަމަވެސް ރާއިން ނުކުމެގެން ދިއުމުން ފަޅުކަމެއް އިހުސާސްވިއެވެ.
ރާއިންއޮފީހަށް ދިއުމުން ޒާޔާ ކޮޓަރިން ނުކުމެގެން ތިރިއަށް ފޭބިއެވެ. އޭރު ބަދިގޭގައި ސަނާމެން މެންދުރުކެއްކުމަށް ތައްޔާރީވާން އުޅެއެވެ. ކުރިއަށްވުރެވެސް މިހާރު ޒާޔާ މީހުންގެ ތެރޭގައި އުޅޭއިރު މަޑުމައިތިރިކަން ސަލްމާއަށް ފާހަގަވެއެވެ. އަބދުވެސް ހުންނަނީ ނެގިމަޑުވެފައެވެ. އޭނަ އުންމީދުކޮށްގެން އެހުންނަނީ ކައިވެންޏަށްފަހު އެއުޅުމަށް އެދެވޭ ބަދަލެއް އަންނާނެ ކަމަށެވެ. ބަދިގެ ތެރޭގައި އުޅުނުއިރުވެސް ޒާޔާ މާގިނައެއްކޮށެއް ވާހަކައެއް ނުދައްކައެވެ.
“ޒާ ހެޕީތަ” މީހުން މަދުވިގަޑި ބަލާފައި މޭޒުކައިރީ ތަރުކާރީއެއް ކޮށަން ހުރި ޔާނާ ޒާޔާކުރެން ސުވާލުކުރިއެވެ. ހިނިތުންވެލާފައި ބޯޖަހާލަމުން ޒާޔާ އެއަށް ޖަވާބުދިނެވެ. އޭނަ އެމައުޞޫއަށް އިތުރަށް ވާހަކަ ދައްކަން ބޭނުން ނުވާކަން އަންގަދިނުމަށާއެއްކޮށެވެ. ޔާނާ އެސުވާލު ކުރީ ޒަޔާންގެ އެދުމުގެމަތިންނެވެ. ޒާޔާ އުފަލުގަ ހުރުން އެއީ ޒަޔާންއަށް އެންމެ މުހިންމު އެއްކަންތައްކަން ޔާނާއަށްވެސް އެނގެއެވެ. ނަމަވެސް ޒާޔާ ކަންތައްކުރިގޮތުން އތުރަށް އެވާހަކަ ނުދައްކަ މަޑުކުރީއެވެ.
ހެނދުނު އޮފީހަށް ދިޔަ ރާއިން ގެއަށް އައިއިރު އިރުއޮއްސެނީއެވެ. އޭރު ޒާޔާވެސް އުޅުނީ ކޮޓަރިތެރޭގައެވެ. ޓައީ ދޫކުރަމުން ކޮޓަރިއަށް ވަތް ރާއިން ފެނިފައި މިފަހަރުވެސް ޒާޔާގެ ހިތްތެޅިލިއެވެ. އެދެއަތުގެ ބީހިލުމަށް އެވަގުތުވެސް އެދެވުނެވެ. ރާއިންއަށް ކަމެއްފާހަގަ ކުރެވުމުގެ ކުރިން އަވަހަށް ކުރަން ހުރި މަސއްކަތަށްއޭނަ އެނބުރުނެވެ.
އެނދުމަތީގައި ލެޕްޓޮޕް ދަވަސް ބަހައްޓާފައި ރާއިން އޭގެން ދެޓިކެޓް ނެގިއެވެ. ޓިކެޓަށް ބަލާލުމަށްފަހު ވާހަކަ ދައްކަން ފެށިއެވެ. ” ތިންދުވަސް ތެރޭ ފުރަން ރެޑީވޭ، ދާތަނާ ބެހޭގޮތުން އެއްވެސް މައުލޫމާތެއް ބޭނުންނަމަ ރީޑް ދިސް، މިއޮތީ ޓިކެޓް، ރިޓާން ޓިކެޓް ކޮންފަރމް ނުކުރަން، ޒާ ބޭނުންވާ މުއްދަތެއް ބުނީމަ ހަމަޖައްސަދޭނަން” އެނދުމަތީގައި ޓިކެޓް ބާއްވަމުން ރާއިން ބުނެލިއެވެ. އަދި ޒާޔާގެ ޖަވާބަކަށް އިންތިޒާރުކުރުމެއް ނެތި ކޮޓަރިން ބޭރަށް ނުކުތެވެ. ރާއިން ދިޔަދިމާއަށް ބަލަހައްޓައިގެން އިރުކޮޅެއްވަންދެން ޒާޔާ ހުރީ ވިސްނުމެއްގެ ތެރޭގައެވެ. އެހާއަވަހަށް ހުރިހާ ކަމެއް ހަމަޖައްސަފާނެ ކަމަށް އޭނަ ކުޑަކޮށްވެސް އުންމީދެއް ނުކުރެއެވެ. އޭނަ ހިތްހަމަޖައްސަދޭން ރާއިން އެހުރީ އަތުކުރި އޮޅާލާފައޭ ހިތާހިތުން ކިޔާލިއެވެ.
***************
އާއިލާއަށް އަނެއްކާވެސް އުފާވެރި ޙަބަރެއް ލިބިގެން ދިޔައީ ޖެހިގެން އައިދުވަހުގެ މެންދުރު ކެއުމުގެ ތެރެއިންނެވެ. ނާޔާއާއި ސަނާ ބަލިވެއިނީއެވެ. ނާޔާގެ ބަނޑަށް މަހެއް ވާން ކައިރިވިއިރު ސަނާގެ ބަނޑަށް ތިންމަސްވެއްޖެއެވެ. ކައިނިމިގެން ދެން ދިމާކުރެވެން ފެށުނީ ނޫރާއާއި ޒާޔާއާއެވެ. އެންމެން ދިމާކުރަންފެށުމުން ޒާޔާ ލަދުން އެތަނުން ނުކުމެއްޖެއެވެ.
އެރޭގެ ވަގުތެއްގައި ޔަޝްރާގެ އާއިލާފުރުމުން ގޭތެރެއަށް ކުޑަ ހިމޭންކަމެއް އައެވެ. ބޭރުންއައިސް ކޮޓަރިއަށްވަތް ރާއިންއަށް މިރޭވެސް އެންމެފުރަތަމަ ބަލާލެވުނީ ސޯފާއާއި ދިމާއަށެވެ. ގައިގައި ރަޖާއަޅައިގެން އަދި ބުރުގާވެސް އަޅައިގެން ޒާޔާ ނިދަން އޮތްތަންފެނިފައި މިރޭވެސް އެހިތުގައި ރިއްސާލިއެވެ. ހަމަޖެހިލައިގެން ނިދަންވެސް ޒާޔާބޭނުން ނުވަނީހެއްޔެވެ؟ ޒާޔާ އޭނައަށް ހަމައެހާނަފްރަތު ކުރަނީހެއްޔެވެ؟ ކޮޓަރި ތަޅުލުމަށްފަހު އެނދުގައި އެތައްއިރަކު ވިސްނުމަށް އޭނައިނެވެ. އެންމެފަހުން ނީދެވިގެން ތެދުވެއްޖެއެވެ. މަޑުމަޑުން ހިނގަމުން ގޮސް ޒާޔާއޮތް ސޯފާކައިރީގައި އިށިއިނެވެ. އެމޫނަށް ފުންކޮށްބަލާލުމަށްފަހު ނިތިގައި ލުއިކޮށް ބޮސްދިނެވެ. ޒާޔާއަށް އޮތީ ރަނގަޅަށްވެސް ނިދިފައިކަން ޔަގީންވުމުން ހަމަޖެހުމުގެ ނޭވައެއްލަމުން ތެދުވިއެވެ. އަދި މަޑުމަޑުން ޒާޔާ އޭނަގެ އަތްދަނޑިމައްޗަށް ނަގާފައި އެނދުގައި ބޭއްވިއެވެ. މަޑުމަޑުން ބުރުގާނަގާފައި ގައިގައި ރަޖާއަޅާލަދިނެވެ. އަދި ބާލީހެއް ހިފައިގެން ގޮސް އޭނަ ސޯފާގައި އޮށުއޮތެވެ.
ހެނދުނު ހޭލެވުނު ޒާޔާއަށް އެންމެފުރަތަމަވެސް ވިސްނާލެވުނީ އޮށުއޮވެގެން އޮތަތަނާ މެދުގައެވެ. ބުރުގާ އެނދުމަތީގައި އޮތޮތަން ފެނިފައި އަވަހަށް އެއެޅިއެވެ. އޭރު ސޯފާގައި އުނދަގޫގޮތަކަށް ރާއިން ނިދާފައި އޮތެވެ. ހިތްހަމަނުޖެހިގެން ހެދުމާއި ތުވާލިހިފައިގެން ފާޙާނާއަށް ވަދެ ބާރާކަށް ދޮރުލެއްޕިއެވެ. ރާއިންއަށް ހޭލެވުނީ މިއަޑަށެވެ. ސޯފާއިން ތެދުވެފައި ބޮލުގައި ދެއަތުން ހިފަހައްޓައިލައިގެން އިނދެވުނީ ވިސްނަންވީއެއްޗެއްވެސް ނޭނގިފައެވެ. އިރުކޮޅަކުން އެހެން އިނދެފައި ތެދުވެ ސޯފާގައި އޮތް ރަޖާގަނޑު ފަތްޖަހާލިއެވެ. އަދި ބާލީސްވެސް ނަގާފައި އެނދުމަތީގައި ބެހެއްޓިއެވެ. ޒާޔާއަށް ނުކުމެވުނީ ރާއިން އެނދުތަންމަތި ރީތިކުރަން ހުއްޓައެވެ. ޒާޔާ ދެންވެސް ހިތްހަމަ ނުޖެހުނެވެ. ތުވާލި ޑްރެސިންގ ޓޭބަލް ކައިރީ ހުރިގޮނޑީގައި ބާއްވާފައި ރާއިން އެމަސައްކަތުން ދުރުކުރުވިއެވެ. ރާއިން ދެފަހަރަކު ޒާޔާއަށް ގޮވާލިނަމަވެސް އޭނަ އަނގައިން ނުބުންޏެވެ.
“އެއްފަހަރުވެސް އަހަންނާ ވާހާކަ ދައްކަފާނަންތަ”
“ކީއްކުރަންތަ ވާހަކަ ދައްކަނީ، ބެޑްގަ ނިދަން ބޭނުން ނުވާތީދޯ ސޯފާގަ ނިދާނީ، ކަމެއްވެގެންދޯ ބުރުގާވެސް އަޅައިގެން ނިދާނީ، ބަޓް ރާއިން ނުވިސްނާއޭގެން އެއްވެސް އެއްޗެއް، ދެން ރެއަކުން ނޭނގެ އަހަރެން ކައިރީނޫންކަމެއްވެސް ނިދާނީ، އަތްނުލާނަމޭ ބުންޏަސް އަހަންނަށް އެނގޭ ރާއިން ނުހުންނާނެކަން”
“ޒާޔާ ކިހިނެތްތަ ތިވިސްނަނީ، އަހަރެން ނޫޅެމޭ ޒާގައިގަ އަތްލާކަށް، ބެޑްގަ ފަސޭހަވާނެ ދޯ ނިދަން،” ފުންނޭވައެއް ދޫކޮށްލަމުން ރާއިން ބުނީ ވިސްނަދޭފަދަގޮތަކަށެވެ.
“ހޫން ދެން އެއްޗެކޭ ބުނެފިއްޔާ އަހަރެން ވިސްނާގޮތް ގޯހީ، ދެން ކީއްކުރަންތަ ކޮންމެހެން އެއްޗެކޭ ނުބުނެގެން އުޅުނީ، އެއްޗެކޭ ބުންޏަސް ގޯސް ނުބުންޏަސް ގޯސް” ދެންވެސް ޒާޔާގެ ރުޅިމަޑުވާކަށް ނޫޅުނެވެ.
“ސޮރީ، އޯކޭ، ދެން ނުވާނެ އެހެނެއް” މިފަހަރުވެސް ދޫދޭންޖެހުނީ ރާއިންއަށެވެ.
މޫޑުގޯސްވެފަހުރިވަރުން ރާއިން އޮފީހަށްދިޔައީ ސައިވެސް ނުބޮއެވެ. ސަލްމާ ޒާޔާކުރެން މިވާހަކަ އެހުމުން ޒާޔާއަށްދޭނެ ޖަވާބެއް ނޭގުނެވެ. އޮފިހަށްދިޔައަކަސް ރާއިންއަށް ކުރެވުނު އެއްވެސް މަސައްކަތެއް ނެތެވެ. އަދި މިއުޅެނީ ކައިވެންޏަށް ދެދުވަސް ނުވެގެނެވެ. އެކަމަކު މިހާރު ވިސްނާވިސްނާ އޭނަގެ ބޯގޮވާވަރު ވެއްޖެއެވެ.
“ދަރިފުޅު ހާދަލަހުން ތިއައީ، މެންދުރު ކާންވެސް ނާދޭ، ހެނދުނުވެސް ސައިނުބޮއި ދިޔައީ” އިރުއޮއްސުނުފަހުން ގެއަށް ވަދެގެންއައި ރާއިންއަށް އެންމެފުރަތަމަވެސް ސަލްމާގެ ސުވާލުތަކާ ކުރިމަތި ލާންޖެހުނެވެ.
“މާދާމާ ފުރާތީ ކޮންމެހެން ނިންމަން ޖެހޭ ކަންތައްހުރީމަ އެހެންވެގެން ނާދެވުނީ، މަންމަ މާބޮޑަށޭ ތިހާސްވަނީ، ކޮބާ ޒާޔާ” ރާއިން ބޭނުންވީ އަވަހަށް ވާހަކައިގެ މައުޟޫބަދަލުކޮށްލާށެވެ. ޒާޔާވީ ކޮޓަރީގައޭ ބުނުމުން ޒާޔާކައިރިއަށޭ ކިޔާފަ އަވަހަށް ގޮސްފިއެވެ.
ރާއިން ކޮޓަރިއަށް ދިޔައިރު ޒާޔާހުރީ ފޮށި ޕެކްކުރާށެވެ. ރާއިންގެ ބައެއް އެއްޗެހި އޭރު ފަތްޖަހާފައި އެނދުމަތީގައި ހުއްޓެވެ. އަދިވެސް ބޭނުންވާނެ ބައެއް އެހެން އެއްޗެހި ނަގާފައި ހުއްޓެވެ. މަޑުހިނގުމެއްގައި އައިސް ރާއިން އެނދުކައިރީ ހުއްޓުނެވެ. އަދި އޭނަގެ ފޮށިގެނެސް ބެހެއްޓިއެވެ. އަދި ފަތްނުޖަހާހުރި ބައެއް އެއްޗެހިތަކުގެ ތެރެއިން އެއްޗެއް ނަގާ ފަތްޖަހަންފެށިއެވެ.
“އަހަރެން ޕެކްކޮށްދީފާނަމޭ” ރާއިންއަށް އިރުކޮޅަކު ބަލަންހުރެފައި ޒާޔާބުންޏެވެ.
“އެނގޭ” ރާއިންގެ ޖަވާބު ކުރެވެ.
“ދެން އެނގެންޏާ ބަހައްޓަންވީނުން” ދެންވެސް ރާއިން އެކަންތައް ހުއްޓާލަން ނޫޅުމުން ޒާޔާ ރުންކުރުވިއެވެ.
“އެނގުމާ އަހަރެން ޒާ ލައްވާ މިމަސައްކަތް ކުރުވަން ބޭނުންވުމާ ތަފާތެއްނު” ޒާޔާއާ ދިމާބަލާވެސް ނުލާ ރާއިން އިއްވާލިއެވެ.
“މިހާރު އަހަރެން ކީއްކުރީ،” ރާއިންއަތުގައި އޮތް ޓީޝާޓް އަތުލަމުން ޒާޔާ ސުވާލުކުރިއެވެ.
އަހަރެން އެންމެފަހަރަކުވެސް ބުނެފިންތަ ޒާ ކަމެއްކުރިއޭ، ޒާ ތިގޮތަށް ފައިޓް ނުކޮށްފާނަންތަ، އެނގޭ ހިތްހަމަނުޖެހިފަކަން، ބަޓް ތިގޮތަށް ވާހަކަ ނުދައްކަފާނަންތަ، އަހަރެން ޒާއާ އަނގައިންވެސް ނުބުނެއުޅެފާނަން ޒާ ހިތްހަމަނުޖެހެންޏާ” ބާރަށް ނުބުނިކަމުގައިވިނަމަވެސް ރާއިންއަށް އެހެންބުނެވުނީ ހިތްހަމަނުޖެހިފަ ހުރެއެވެ. އެކަން ޒާޔާއަށްވެސް އިހުސާސްވީކަންނޭނގެއެވެ. އެއްޗެކޭނުބުނެ މޫނު އަނބުރާލީ އެހެންވެކަންނޭގެއެވެ.
ރާއިން މޫނުގައި އަތްހާކާލަމުން ފުންނޭވައެއް ބޭރުކޮށްލިއެވެ. އަދި ޒާޔާއާދިމާ އެނބުރުމަށްފަހު މަޑުމަޑުން އެއަތުގައި ހިފަމުން ބުންޏެވެ.
“ޒާ އަހަރެންގެ އެއްވެސް ކަމެއްކުރާނީ ޒާ ހިތްހަމަޖެހިގެން މިކައިވެނި ބަލައިގަނެވުނު ދުވަހަކުން، އަހަންނަށް ހެޔޮހިތުން މަޢާފް ކުރެވުނުދުވަހަކުން، އެހެންނޫނީ އަހަންނަށް މާބޮޑަށް ގިލްޓީ ފީލް ވާނީ، ޒާ ބޭނުންވާގޮތަށް އަހަރެން މިއުޅެނީ، ޒާއަށް އުނދަގޫ ނުކޮށް، ޒާއަށް އެހާގިނައިން ނުފެނި، ޒާ ބޭނުންވިދުވަހަކުން ބެޑްގަވެސް ނިދާނީ، އަހަރެން ކުރިމަތީ ބުރުގާވެސް ނަގާނެކަމެއް ނެތް، ރޭގަވީކަހަލަ ކަމެއް ދެން ނުވާނެ ޕްރޮމިސް، ސޯ އަހަރެން އެދޭގޮތަށް މިކަންތައް ކޮށްދީ، ޒާ އަހަންނަށް މާފު ނުކޮށް އަހަރެން ބޭނުމެއްނޫން އަހަރެންގެ އެއްވެސް ކަމެއްކުރާކަށް، ދެން ބުނާނީކީނޫން ޒާ އަހަރެން ހިތްހަމަޖައްސަނުދޭތީ އަހަރެން ކުރާކަމެކޭ މިއީ، ޑޯންޓް ތިންކް ލައިކް ދެޓް ޕްލީޒް، އެކޮޅުން ހިފާފަ ހުންނާނީ ދެރޫމްގެ އެޕާރޓްމެންޓެއް، ސޯ ޔޫކޭން ހޭވް ޔުއަރ ޕްރައިވެސީ” ރާއިން އެހާމަޑުމައިތިރިކޮށް ބުނުމުން ޒާޔާއަށް އެއްވެސް އެއްޗެކޭ ބުނާކަށް ނުކުރެއެވެ. ޒާޔާގެ އަތުގައި އޮތް ޓީޝާޓް ނަގައި އެފަތްޖަހާލާފައި ދެންވެސް ހުރި އެއްޗެހިތައް ފޮއްޓަށް އަޅާ ޕެކްކޮށް ނިންމާލިއެވެ. އެހުރިހާއިރުވެސް ޒާޔާހުރީ ބަލަހައްޓައިގެނެވެ.
**************
ދެހަފްތާ ހޭދަވެގެން ދިޔައީ ހީވެސް ނުކުރާއަވަހަށެވެ. މިވޭތުވެގެން ދިޔަދުވަސްތަކުގައިވެސް ޒާޔާއާއި ރާއިންގެ ގުޅުމަށް އެދެވޭ ބަދަލެއް ނާންނަކަން ސަލްމާއަށް އެނގުނެވެ. ރާއިންގެ ކަމަކީ ގެއަށް ނުވަދެ ވޭތޯބެލުމެވެ. ހެނދުނު އޮފީހަށް ދާގޮތަށް އަންނަނީ އިރުއޮއްސޭފަހުންނެވެ. ދެން އަނެއްކާ ބޭރަށް ދާގޮތަށް އަންނަނީ އެންމެން ނިދާހާކޮށްފައެވެ.
ހަނީމޫންއިން އައިގޮތަށް ޒާޔާވެސް ވަޒީފާއަށް ކުރިމަތިލިއެވެ. ދެހަފްތާއެއްހާދުވަސް ފަހުން ވަޒުފާހަމަޖެހުމުން އޭނަ ހުރީ ނުހަނު ހިތްހަމަޖެހިފައެވެ. ރާއިންގާތު އެވާހަކަ ނުވެސް ބުނެ ޒާޔާއެވާހަކަ އެންމެންގާތު ބުނީ ރޭގަނޑު ކާންތިބެފައެވެ. ހިތްހަމަނުޖެހުނު ނަމަވެސް ރާއިން އެކަމެއް ފާޅެއްނުކުރެއެވެ.
“އަހަރެން އެބެއް އެދުމެއް، ޒާ މިކަމަށް އެއްބަސް ވެއްޖިއްޔާ އަހަންނަށް ވަރަށް ރަނގަޅު” ކޮޓަރިއަށް ވަދެފައި ރާއިން ބުނެލިއެވެ.
“އަހަރެން ކުރިންވެސް ބުނިންދޯ އަހަރެން ވަޒީފާއަށްދާން ބޭނުމޭ، ރާއިން އޭރުބުނީ އޯކޭއޭ، ދެން މިހާރު ނުބުނާތި ނުދާށޭ” ޒާޔާގެ ވާހަކަ ހުންނާނީ އެގޮތަށްކަން މާކުރިންވެސް ރާއިންއަށް އެނގެއެވެ. އެހެންވެ އެއާވިއްދާފައި އެއްވެސް އެއްޗެއް ނުބުނަން ނިންމައި އޭނަ ބޭނުންވާގޮތް ހާމަ ކުރިއެވެ.
“ޒާ ސުކޫލަށް ގެންގޮސްދޭންށާ ބަލާ އަހަރެން ދާނަން، ނޫނީ މަންމަމެންނަށް ޝައްކުވާނެ، އަހަރުންގެ އުޅުން ބަލާލީމަ އެނގޭނެ އަދިވެސް އޯކޭނޫންކަން، ސޯ އިތުރު ކަމެއް ޝައްކުކުރަން ދޭކަށް އަހަރެން ބޭނުމެއްނޫން، އަހަންނަށް ގުޅާނެކަމެއްނެތް ވާހަކަ ދައްކާނެ ކަމެއްވެސް ނެތް، ޖަސް ޓެކްސްޓް މީ، އަހަންނަށް ޔަގީން ޒާވެސް ބޭނުންވާނެގޮތަކީ މިއީކަން” ޒާޔާއަށް ފުރަގަސްދީގެންހުރެ ރާއިން ވާހަކަދެއްކިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.