ވޭނީ އާޙް!

ލޮއެއްބައްޓަކައި އަހަރެންގެ ދަތުރުގެ އޮޑި ހުއްޓަން މިޖެހުނީ ކަނޑުގެ މެދަށެވެ. އެހެން ގޮތަކަށް ބުނާނަމަ ދުއްވަ ދުއްވާ ހުއްޓާ އޮޑި އަޑިޔަށް ދިޔައީ އެވެ. އާއެކެވެ. ލޮއެއްބައްޓަކައި އަހަރެން މިކުރާ އިންތިޒާރުގައި ނިމުމެއް ނެތެވެ. އެހެންނަމަވެސް އެކަން އެނގި ހުރެވެސް އިންތިޒާރު ކުރެވެނީ އެވެ. މިގޮތުގައި 5 އަހަރުވެ އުމުރު ހުސްވިއަސް ހެވެއެވެ.

ކަލާއެވެ. އަޑުއަހާށެވެ. އަހަރެންގެ ހިތުގެ އަޑު އަހާލަބަލާށެވެ. މީ ކަލާގެ މީހެކޭ ބުނި ގޮތައް މި ހިތުގެ އަޑު އެއްފަހަރު އަހާލަދޭށެވެ. ހެޔޮނުވާނެއެވެ. އަހަރެން މިހިތާމައިގާ ފަނާވުން އެއީ ކަލާ އެދޭ ގޮތް ހެއްޔެވެ؟ ކަލާގެ ލޮއެއްބައް އެދި އަހަރެން ސަލާން ޖަހަމެވެ. އަހަންނާ އެކު ނުވިއަސް މިވާ ލޯބި ޤަބޫލް ކުރާށެވެ. އެވެސް މިހިތައް ލިބޭ ޝިފާ އެކެވެ.
ލޯބިވާއެވެ. އެނގޭ ހެއްޔެވެ؟ ބަލާލި ކޮންމެ ދިމާއަކުން ތި މޫނު އަހަންނަށް ސިފަވެއެވެ. ތިހަނދާން އާކޮށްދެއެވެ. އެންމެ ފުރަތަމަ ބައްދަލުވުން އިއްޔެވީ ކަމެއްހެން އަދިވެސް އަހަރެން ސިކުޑިއާއި ހިތަށް ސިފައެވެ. އޭރު އަހަންނަށްޓަކައި ކަލާވީ ޤުރުބާނީ ކޮބާ ހެއްޔެވެ؟ އެ ވަޢުދުތަކާ އަޙްދުތައް ފަނާކޮށް ނުލާށެވެ. އާދޭސްކުރަމެވެ.

އަހަރެންނަކީ ފިރިހެނަކީމެވެ. އެހެނަސް ފިރިހެނަކަށް ވެސް ނުވެވުނެވެ. ކީއްވެކަން ކަލާ އިޙްސާސް ކޮށްލަބާށެވެ. މިހިތުގައި ހާދަ ވޭނެއް އަޅައެވެ. ހާދަ އަސަރެއް ކުރެއެވެ. މިލޯނޭދި އެދޭފަދަ ތި ލޯބިވާއަށްޓަކައި މި ލޮލުން ހާދަހާ ކަރުނައެއް އޮހޮއެވެ. ލޯބިވާއެވެ. ދުރަށް ނުދާށެވެ. ހާދަހާ ދެރަވެއެވެ. މި ދޮލުން އެންމެ ރެއަކުވެސް ހަމައަށް ލޮލުފިޔައެއް ނުޖެހެއެވެ. ތިޔަ ފިރުމުން ތަކަށް ހިތް އެދޭވަރުންނެވެ. ތި ނިޔަނެތި މޫނު ހިތަށް ސިފަވާތީ އެވެ. މިއުޒިކެއްފަދަ ތިޔަ ލޮބުވެތި ޖާދުވީ އަޑު އަހާހިތުން ބޭޤަރާރު ވެވޭތީއެވެ. ހެޔޮ ނުވާނެއެވެ. އަހަރެންގެ މި އެކަނިވެރިކަން ކަލާ ފިލުވަދޭށޭވެ. ދިރިމިހުންނަނީ އެކަނި ފުރާނަ ހުރީތީ އެވެ. އުފަލާއި ހިތްހަމަޖެހުމާއި ލޯބި މިއަދު އަހަރެންގެ ދިރިއުޅުމަށް “އެލާރޖިކް” އެއް ފަދައެވެ. އެހެނަސް އެހުރިހާ ކަމެއްގެ ހަމައެކަނި ހައްލަކީ ތީ އެވެ. ކަލާތީ މިހިތުގެ ދިރުމެވެ. މިހިތުގެ ލޮއެއްބެވެ. މިފުރާނައިގެ ދިރުމަކީވެސް ކަލާ ފަދައެވެ. މަގޭ ފުރާނައާ އެވެ. މިހިތުގައި ކަލާއަށްޓަކައި މިވާ ލޯބި ވަރަށްވެސް ސާފެވެ. ބިއްލޫރި ކޮޅެއްފަދައެވެ. އެހެނަސް މިއަޑު އަހާނީ ފަހެ ކާކު ހެއްޔެވެ؟

ތެދެކެވެ. މި ލޯބީގެ އަގު އެކަކަށް ނޭނގުނަސް މުޅި އުމުރަށް ވެސް އިންތިޒާރު ކުރެވޭނެ އެވެ. އެއީ އަހަރެންނަށް ހަމަ އެކަނި ލޯބި ވެވުނީ ކަލާދެކެ ކަމުގައި ވީތީ އެވެ. ދިރިއުޅުމަކަށް އެދެވުނީ އެކަނި ކަލާގެ ފުށުންނޭވެ. އެހެނަސް…. މިއަދު އަހަރެންގެ އަތުން ކަލާ ބީވެއްޖެއެވެ. ހުވަފެންތަކަކާއި އުއްމީދުތަކެއް ދީފައެވެ. އެއްވެސް ކުލައެއް ނެތެވެ. ކަޅު އަނދިރި ގަނޑެއްފަދަ ވިލާ ގަނޑެއްގެ ތެރެއަށް އަހަރެންގެ ދިރިއުޅުމުގެ އޮޑި ފައްތާލާފަ އެވެ. އެކަމަކުވެސް އަދިވެސް އަހަރެން ކަލާ ދެކެ އިންތިހާއަށް ލޯބި ވަމެވެ. ނޫނެކެވެ. ލޯބިވާން ބޭނުން ނޫނަސް ލޯބި ވެވެނީ އެވެ. އަހަރެންގެ ހިތުގެ “ރިމޯޓް” ކަލާ އަތުގައި ވާ ފަދައިންނެވެ.

ލޯބިވާއެވެ. ކަލާ އެހެން ދިރިއުޅުމެއް ހޯދާފީމު އެވެ. އުފަލުގައެވެ. ވަރަށް އުފަލުގައެވެ. އެތަން ފެނުމުން އަހަރެންގެ ލޮލަށް ފިނިކަން ގެނެސް ދެއެވެ. އެއީ ހަމައެކަނި ކަލާގެ އުފަލަށް ވީތީ އެވެ. އެހެނަސް އެނގޭ ހެއްޔެވެ؟ މަގޭ މިހިތް ފުނޑު ފުނޑު ވާކަން ކަލާ ދަންނަން ހެއްޔެވެ؟ މި ނިކަމެތި އަޅާގެ ކެކުޅުން ކަލާ އަށް ހަމަ އިޙްސާސް ވެސް ނުވަނީ ހެއްޔެވެ؟ އެކަމު ކީއްވެ ހެއްޔެވެ؟ އަހަރެން ވީ ލޯބީގެ އަގު މިހާ ދަށްވީ ހެއްޔެވެ؟ ހެޔޮނުވާނެ އެވެ. އަހަރެންވެސް މީ އިންސާނަކީމެވެ. ކަލާގެ އޮންނަ ފަދަ ހިތެއްވެސް ވެއެވެ. ވިންދު ހުރިހާ ހިދަނކު ތަދުވެސް ވެއެވެ. ވަރަށް ބޮޑަށެވެ.

މީ އަހަރެންގެ ހިތުގެ އަޑެވެ. ދުލުން ބަޔާން ކުރަން ނުކުޅެދިފައިވާ، ޒަޙަމްވެ ހަލާކުވެފައިވާ ހިތެއްގެ އަޑެވެ. އަހަރެންގެ އިޙްސާސެވެ. އެކަކަށްވެސް ނޭނގޭނެ އިޙްސާސެކެވެ. މި އަޑު އިވޭނީވެސް އެކަނި އަހަރެންގެ ހިތަށެވެ. އެއީވެސް ކަލާއަށްޓަކައެވެ. ކަލާގެ ދިރިއުޅުމަށް އިތުރަށް އުދަނގޫ ނުކުރުމަށް އަހަރެން ނިންމާފައިވާތީ އެވެ. ވީއިރު އަހަރެން ހިނިތުން ވެލައިގެން ހިތުގެ އުދާސްތައް އޮއްބައިލައިގެން ދިރިމިހުންނަނީ ހަމައެކަނި ކަލާގެ ޙައްޤުގައޭ ނުބުނެވޭނެ ހެއްޔެވެ؟ މީ ވޭނީ އާޙެކެވެ. (ނިމުނީ)