ހިތަކުން ނުދާނޭ ފިލާ – 3

އެއީ ހަމަ އެ މޫނެވެ. އެ ހިނިތުންމެވެ. ކޮންމެ ރެއަކު އަހަރެންގެ ހުވަފެނުން ފެންނަ ކުއްޖާއަކީ ހަމަ މިއީއެވެ. ހަމަ އެކަނި ތަފާތަކީ ތަންކޮޅުން އިސްކޮޅުން ދެމިލާފައި ހުރުމެވެ. ނަމަވެސް މިހެން ވާންވީ ކީއްވެގެން ހެއްޔެވެ؟ އެ ކުއްޖާ މަންމާ އޭ ކިޔާ އަހަރެންނާ އެ މުޚާތަބު ކުރަނީ ކީއްވެގެން ހެއްޔެވެ؟ ތަޤުދީރު މި ކުޅެނީ ކޮންކަހަލަ ސަމާސާއެއް ބާއެވެ.

އަހަރެންނަށް ހަރަކާތެއް ކޮށްނުލެވިގެން އުޅެނިކޮށް އެ ކުއްޖާ އައިސް އަހަރެންގެ ފައިގައި އޮޅުލައިގަތެވެ. “މަންމި ތި އައީ ދޯ؟ ދެން ކޮއްކޮ އެކަނި ކޮށްފަ ނުދައްޗޭ. ކޮއްކޮ ވަރަށް ދެރަވި މަންމި ދިޔައީމަ.” އެ މައުސޫމު އަޑުން އެއްފަހަރާ އެތައް ޝަކުވާއެއް އޮއްސަމުން ދިޔައެވެ.

ކުއްލިއަކަށް އައި ނައި ތަނެއް ނޭގި މީހަކު އައިސް އެ ކުއްޖާގެ އަތުގައި ފިހާ އަހަރެންނާ ދުރަށް ދަމާލިއެވެ. “ރަޔާން”. ބާރު އަޑަކުން އެކުއްޖާއާ ދިމާއަށް އެހެން ބުނުމަށްފަހު އަހަރެންނާ ދިމާއަށް ނަފްރަތުގެ ނަޒަރަކުން އޭނާ ބަލާލިއެވެ. ކޮންމެވެސް ތަނަކުން ފެނިފައިވާ މީހެކޭ ހީވިއެވެ.

“ރަޔާން”، އަހަރެންނަށް މަޑުމަޑުން ތަކުރާތު ކޮށްލެވުނެވެ. އެވަގުތު އެތައް ދުވަހެއް ވަންދެން ވަޅުލެވިފައިވާ ހަނދާންތަކެއް ސިނކުޑީގައި ޓަކި ޖަހާލިހެން ހީވިއެވެ. ގެއާ ހަމައަށް ދެވުނީ ކިހިނެއް ކޮން އިރަކު ކަމެއް އަހަރެންނަކަށް ނޭނގެއެވެ. އަހަރެންގެ ބޮލުގައި އޭރު ވަރަށް ގަދައަށް ރިއްސައެވެ. ވަގުން ކޮޓަރިއަށް ވަދެ އެކަނި ވެލީ އެހެންވެގެންނެވެ. އަދި އަހަރެންގެ ހިތަށް ފިލްމުގެ މަންޒަރުތަކެއް ފަދައިން ފެންނަމުން ދިޔަ މަންޒަރުތަކަށް މާނައެއް ދެވޭތޯއެވެ؟

“މާކިން ކީއްވެ އަހަރެންނަށް އޮޅުވާލީ؟ ކީއްވެ އަހަރެންގެ ދަރިފުޅު އަހަރެންނަށް ގެއްލުވާލީ؟ ކީއްވެ އަހަރެންނަށް ދޮގު ހެދީ؟” ދަންވާން ކައިރިވެފައި ވަނިކޮށް ކޮޓަރިއަށް ވަތް މާކިންއާ ދިމާއަށް އަހަރެންނަށް ހަޅޭލަވައި ގަނެވުނީ ބޭއިޚްތިޔާރުގައެވެ. އޭރު އަހަރެން ހުރީ ހަމަ ރަނގަޅަށް ވެސް މޮޔަވާން ކައިރިވެފައެވެ. ފިހާރައިން އެ ފެނުނީ އަހަރެންގެ ދަރިފުޅުކަން ޔަޤީނެވެ. ދުނިޔޭގައިވާ ހުރިހާކަމެއް ހަނދާން ނެތުނަސް މަންމަޔަކު އޭނާގެ ދަރިފުޅު ހަނދާނެއް ނުނެތޭނެއެވެ. މައިވަންތަ ކަމުގެ ލޯތްބަކީ އެއަށްވުރެ ބާރުގަދަ އެއްޗެކެވެ.

“ޒިލް ކީކޭ ތިކިޔަނީ؟ ތަންކޮޅެއް ހަމަޖެހިލައިގެން ވެގެން އުޅޭގޮތެއް ބުނެލަދީބަލަ؟” ހުއްޓުން އަރާފައި އިރުކޮޅަކު ހުރުމަށްފަހު މާކިން ބުންޏެވެ. “މާކިން ތީ އަނިޔާވެރިއެއް. އެއްވެސް ކުލުނެއް ނެތް މީހެއް. ކިރިޔާވެސް އިންސާނިޔުތަކެއް ހުރިނަމަ ތިހެން ނެހެދީސް. އަހަރެންގެ ރަޔާން އަހަންނާ ދުރެއް ނުކުރުވީސް. ރަޔާން. ރަޔާން” އަހަންނަށް ގިސްލަ ގިސްލައިފާ ރޯން ފެށުނެވެ. ބާރު ބާރަށް ރަޔާން އަށް ގޮވެން ފެށުނެވެ.

“ޔާޤީން ކުރޭ ޒިލް. އަހަންނަކީ ތިހާ އަނިޔާވެރި މީހެއް ނޫން. އަހަރެންނަށް އިނގޭ ޒިލް ހަޤީޤަތް އިނގެން ބޭނުންވާނެކަން.” މާކިން އެހެން ބުނިއިރު އޭނާގެ އަޑު ކޮންމެވެސް ވަރަކަށް ކުރެހިގެން ދިޔައެވެ. އެހެން ބުނެފުމަށްފަހު މާކިން ދަބަސްތައް ހާވަލުމަށްފަހު ފޮތެއް ނެގައިގެން އައިސް އަހަރެންނަށް ދިއްކޮށްލިއެވެ. “އަހަރެން އުއްމީދުކުރަން ޒިލް ތި ބޭނުންވާ ސުވާލުތަކުގެ ޖަވާބު މިއިން ލިބޭނެކަމަށް. މިއީ ޒިލްގެ އަމާނާތެއް”. ފޮތް އަހަރެންނަށް ދިއްކޮށްލުމަށްފަހު މަޑުޖެހުމެއް ނެތި މާކިން ކޮޓަރިން ނުކުންނަން ހިނގައިގަތެވެ. ދޮރު ހުޅުވާލާ ނިކުތުމުގެ ކުރިން އޭނާ ފަސްއެނބުރި އަހަރެންނާ ދިމާއަށް ބަލާލިއެވެ. ހީވީ އެންމެ ފަހުފަހަރަށް ބަލާލަނީ ހެންނެވެ. ނަމަވެސް، ހިތުގައި އުފެދިފައިވާ ހައިޖާނުގެ ސަބަބުން އޭނާއާ ހަތަރުކަޅި ހަމަކޮށް ބަލާލަން އަހަރެން ބޭނުމެއް ނުވިއެވެ.

އެއީ އަހަރެން ލިޔެފައިވާ އަހަރެންގެ ހަޔާތުގެ ޑައިރީއެވެ. އަހަރެންގެ ހަޔާތުގެ ވާހަކަ ފެށިފައިވަނީ މީގެ ދިހަވަރަކަށް އަހަރުކުރިންނެވެ.

އޭރު އަހަރެންގެ އުމުރުން އެންމެ 18 އަހަރެވެ. ޒަވާޖީ ޙަޔާތަކަށް އަހަރެން އެންމެ ފުރަތަމަ ފައިތިލަ ބީއްސާލީ އަހަރެންގެ އެ ޒުވާން އުމުރުގައެވެ. އަހަރެންނާ ރީހާން އެންމެ ފުރަތަމަ ދިމާވީ ސްކޫލު ދަތުރެއްގައި އޭނާ އަހަރެންގެ ރަށަށް އައި އައުމުގެ ތެރެއިންނެވެ. އެކުވެރިކަމުން ފެނުނު އެގުޅުން ލޯތްބައް ބަދަލު ފައްކާވީ މަދު ދުވަސްކޮޅެއްގެ ތެރޭގައެވެ. ސްކޫލު ދައުރު ނިމުމާއެކު، ކައިވެންޏަށް އެދި ރީހާން ހުށައެޅި ހުށައެޅުން އުފަލުން ޤަބޫލު ކުރެވުނީ އެހެންވެގެންނެވެ. އަދި، އަހަރެންނަކީ މައެއް ބަފައެއް ނެތް ޔަތީމަކަށް ވުމާއެކު، އެންމެ ރަނގަޅުގޮތެއް ކަމުގައި ފެނުނީވެސް އަވަހަށް ކައިވެނިކޮށް އަމިއްލަ ދިރިއުޅުމެއް ފެށުމެވެ. ވަރަށް ކުޑައިރު ކަނޑުމަތީގެ ނުރައްކާތެރި ހާދިސާއެއްގައި އަހަރެންގެ މައިންބަފައިން ނިޔާވިފަހުން އަހަރެން ބަލަމުން އައީ ބޮޑުބޭބެއެވެ. ނަމަވެސް، އޭނާ އެކަން ކުރަމުންދަނީ ކޮންމެހެން ބޭނުންވެގެން ނޫންކަން އަހަރެންނަށް އިނގެއެވެ. ދުނިޔޭގެ ލަދަށެވެ. މިކަމުގެ ފުރިހަމަ ހަދިޔާއަކީ އާ ކައިވެނީގެ ދުވަހު، ދެން ދުވަހަކުވެސް އެނބުރި ނައުމަށް ބުނެ އަހަރެންގެ އަންނައުނުނަށް ގެއިންނެރެ އުކާލާ ދިން ހަދިޔާއެވެ.

ކައިވެންޏަށްފަހު ރީހާންގެ ރަށަށް އަހަރެން ބަދަލުވީ އަހަރެންގެ ކުރީގެ ދިރިއުޅުމަށް މުޅިން ޢަލްވަދާޢު ކިޔާފައެވެ. އެންމެ ތުއްތު އިރުން ފެށީގެން އެކީގައި އުޅެބޮޑުވި ދެބެންގެދެދަރި ކުދިންނާ ވަކިވާންޖެހުމުން ކިތައްމެ ދެރައެއް ވިނަމަވެސް، ދެން ދުވަހަކުވެސް ބޮޑުބޭބެގެ ތައްޕާހުން އުޅެން ނާންނާނެކަމަށް ހިތާ ހިތާ ވަޢުދުވީމެވެ. ނަމަވެސް ……

ނަމަވެސް، އާ ކައިވެނީގެ ދުވަސްތަކަކީ އަހަރެން އުއްމީދުކުރިފަދަ ދުވަސްތަކަށް ނުވިއެވެ. އަހަންނަކީ ރިހާންގެ މައިންބަފައިން ހުރޭ ފަދަ ބައިވެރިއަކަށް ނުވުމުންނެވެ. އަހަރެމެންގެ ދިރިއުޅުމަށް އެމީހުން ހަތަރެސްފައިން ޓާޓާކީ އަހަރެންނަކީ ފައިސާ ނެތް ޔަތީމުކުއްޖަކަށް ވީތީއެވެ. އެއް ފުރާޅެއްގެ ދަށުގައި އުޅުނު ނަމަވެސް އެންމެ ކުޑަމިނުން ހިނިތުންވެ އަހަރެންނާ ވާހަކަދައްކާލަންވެސް އެމީހުން ދެކޮޅު ހެދިއެވެ. އެހެނަށް އަހަރެން ހިތްވަރު އެލުވަމެއް ނުލަމެވެ. ދިރިއުޅުމުގެ އެ އިމްތިހާނާވެސް ކުރިމަތިލީ ފިސާރި ކެރިގެންނެވެ. ކޮންމެ ދުވަހަކު މުލުހާލު ތުނބަށް ތެދުވެ ގޭތެރޭގެ ހުރިހާކަމެއް ކޮށް ނިންމަނީ ރީހާންގެ މައިންބަފައިންގެ ފަރާތުން ތަޢުރީފުގެ އެންމެ ބަހެއް ނަމަވެސް އިވޭނެ ކަމަށް ފެންބޮވައިގެން ހުރެއެވެ. ނަމަވެސް، ނަފްރަތުގެ ބަހެއް ނޫނީ އެމީހުން އަހަރެންނާ ދިމާއަށް ބުނެ ނުލައެވެ. އެހެނަސް އަހަރެން މި ވާހަކަތައް ރިސޯޓުގައި ވަޒީފާ އަދާކުރަން ހުންނަ ރީހާންއަށް ކިޔާދީ ޝަކުވާކޮށެއް ނަހަދަމެވެ. ރީހާންގެ ހިތުގައި އޭނާގެ މައިންބަފައިންނާ ދޭތެރޭ ނަފްރަތު އުފެދެން އަހަރެން ބޭނުން ނުވީއެވެ. އަދި ކޮންމެވެސް ދުވަހަކުން އެމީހުންގެ ހިތް ބަދަލުވާނެކަމަށް އަހަރެން ޔަޤީން ކުރީމެވެ.

ރީހާންއާއި އަހަރެންގެ ލޯބީގެ ޗަމަންގައި މަލެއް ފޮޅެއް އުޅޭކަމުގެ ޚަބަރު ލިބުނީ ކައިވެންޏަށް ދެ އަހަރުވީ ފަހުންނެވެ. ބަލިވެ އިންކަން އިނގުނު ދުވަހު އަހަރެންގެ ލޮލުން އުފާވެރިކަމުގެ  ކަރުނަ ފޭއްދާލިއެވެ. އެއީ އަހަރެން ހާދަ ދެކެން ބޭނުންވި ދުވަހެކެވެ. އަހަރެންގެ އުނގު ފަޅުފިލުވާލަދޭނެ ތުއްތު ފުރާނައެއް ދެއްވުންއެދި އަހަރެން ހާދަ ދުޢާއެއް ކުރީމެވެ.

ނުނިމޭ