އެއީ ކޮންކަހަލަ ހުވަފެނެއް ހެއްޔެވެ؟ އެއީ ކޮން ކުއްޖެއް ހެއްޔެވެ؟ ހެވިފާ ހުރެ އަހަރެންނާ ދިމާއަށް އެ އައީ ކިއްވެގެން ހެއްޔެވެ؟ ހީވީ ނޭނގޭ ބާރަކުން އަހަރެންވެސް އެ ތުއްތު ކުއްޖާއާ ދިމާއަށް ދަމާ ހެންނެވެ. ހާދަ އެހެންކަހަލަ ހުވަފެނެކެވެ. އަހަރެންގެ ލޮލުން ނިދިވެސް ގެއްލުވާލައިފިއެވެ. އެ މައުސޫމު ސޫރަ އަހަރެންގެ ހިތުން ފިލުވައެއް ނުލެވުނެވެ. ލޯމަރާލާ ކޮންމެ ފަހަރަކު ކުރިންމަތިން އެ ލޯބި ލޯބި ހިނިތުންވުން ފެނިދެއެވެ.
ދުވަސްތައް މާޒީއާ އެކުވަމުން ގޮސް އަހަރެން ކެންސަރ ބަލިން މުޅިން ރަނގަޅުވިތާ ތިން އަހަރުވީ އަހަރެންނާ މާކިންގެ ކައިވެނީގެ ބަގީޗާގައި މަލެއްފޮޅެއް އުޅޭކަމުގެ އުފާވެރި ޚަބަރާއެކުގައެވެ. އަހަރުމެންގެ ފުރަތަމަ ދަރިފުޅަށް އަހަރެން ބަލިވެން ޚަބަރު ލިބުނު ވަގުތު އުފާވެރިކަމުގެ ކަރުނަ އަހަރެންގެ ލޮލުން ނީރާލީ އެއްވެސް އިހްތިޔާރެއް ނެތިއެވެ. މިއީ އަހަރެންނާ މާކިންވެސް ދުވަސްތަކެއް ވަންދެން އިންތިޒާރުކުރަމުން ދިޔަ ޚަބަރެކެވެ. ނަމަވެސް، އަދިވެސް އަހަރެންނަށް އެ ތުއްތު ފިރިހެން ކުއްޖާ ހުވަފެނުން ފެނެއެވެ. ބައެއް ފަހަރު “މަންމާ”އޭ ކިޔާ އަހަރެންނަށް ގޮވާލަން އުޅޭހެންވެސް ހީވެއެވެ. ބައެއްފަހަރު ހިތުގެ އެއްކަނުން އެއީ އަހަރެން ދަންނަ ކުއްޖެކޭ ބުނެއެވެ. ނަމަވެސް އެހެންވާންވީ ކީއްވެ ހެއްޔެވެ؟ ޔަޤީނުންވެސް އަހަރެންނާ މާކިންގެ ކުއްޖަކު ނުހުރެއެވެ. ވީއިރު، އެހެން މީހެއްގެ ކުއްޖަކު އަހަރެންނަށް މަންމަ ކިޔަންވީ ކީއްވެގެން ހެއްޔެވެ؟ އެހެނަސް، ހުވަފެނުގައި އެ ހިނިތުންވުން ފެންނަ ކޮންމެ ފަހަރަކު އަހަރެންގެ ހިތް ފުރިދަނީ ކީއްވެގެން ބާއެވެ؟ މަގެއްގެ މަތިން ކުޑަކުއްޖެއް ފެންނަ ކޮންމެ ފަހަރަކު ނަމެއް ނުވާ އެ ކުއްޖާގެ ހަނދާންތަށް އަހަރެންނަށް އުނދަގޫ ކުރެއެވެ. ކޮންމެ ތުއްތު ކުއްޖެއްގެ މޫނުންވެސް އެ މައުސޫމު ހިނިތުންވުން ހޯދެނީ އެއްވެސް އިޚްތިޔާރެއް ނެތިއެވެ. އެ ހަނދާންތައް އަހަރެންގެ ހިތުން ފިލުވާ ނުލެވިގެން މިއުޅެނީ ކީއްވެގެން ހެއްޔެވެ؟
މާކިންގެ ގާތުގައި އަހަރެންގެ ޢާއިލާގެ ފޮޓޮއެއް ދައްކާލުމަށް އެދުނީ ކޮންމެ ރެއަކު ހުވަފެނުން އެފެންނަ ތުއްތު މޫނު އެއިން ފޮޓޯއަކުންވެސް ފެނިދާނެ ކަމުގެ އުއްމީދުގައެވެ. އަދި އަހަރެންގެ ހިތުގައި އުފެދިފައި މިވާ ސުވާލުތަކަށް ޖަވާބު ލިބިދާނެ ކަމުގެ އުއްމީދުގައެވެ. ނަމަވެސް މާކިން ބުނި ގޮތުން އަހަރެން އެއްއިރެއްގައިވެސް ފޮޓޯ ނެގުމަށް ޝައުޤުވެރިކަމެއް ނުހުރެއެވެ. އަހަރެންނާ މާކިންގެ ކައިވެނީގެ ފޮޓޯއެއްވެސް ނެތީ އެހެންވެގެންނެވެ. އަހަރެންގެ ޙާޔާތުގައި އައި އެންމެ އުފާވެރި ދުވަހުގެ ފޮޓޯއެއް ނެގުމަށް އަހަރެން އިންކާރު ކުރިއިރު އެހެން ބަޔަކާއެކު އަހަރެން ފޮޓޯއެއް ނަގާނެ ކަމަށް ހީކުރުމަކީވެސް ކުރެވުނު މޮޔަ ޚިޔާލެކެވެ.
އަހަރެންގެ ބަނޑަށްވެސް މިހާރު ފަސްމަސް ވެއްޖެއެވެ. މާކިންމެ ދެބެންގެ ދެދަރި ކުއްޖެއްކަމަށްވާ ކިނާންގެ ކައިވެނީގެ ދަޢުވަތު އައީ އެ ދުވަސްވަރުގައެވެ. ކައިވެނީގެ ޙަފްލާގައި އަހަރުމެންގެ ޢާއިލާ ކޮންމެހެންވެސް ބައިވެރިވާން ވާނެކަމަށް ކިނާން ބުނީ ވަރަށް ފޮނި އުއްމީދުގައެވެ. ކައިވެނީގެ ޙަފްލާ އޮތީ ރާއްޖޭގައި ކަމަށް ވުމާއެކު، އަހަރެންވެސް ކޮންމެހެން ދާން ބޭނުމެވެ. ދިވެއްސެއްކަމަކު ރާއްޖޭގެ އެއްވެސް މަންޒަރެއް އަހަރެންގެ ހަނދާނަކު ނެތެވެ. ފޮޓޯތަކުން އެފެންނަ ދޮންވެލި ގޮނޑުދޮށާ ބިއްލޫރިކޮޅެއް ފަދަ މޫދު ހާދަ ޗާލެވެ. އަހަރެންވެސް އެ ދިރިއުޅުން އެއް ފަހަރު ނަމަވެސް ތަޖުރިބާ ކޮށްލަން ބޭނުމެވެ. މިހެން އަބަދު ގޭގައި ބަންދުވެފައި ނީދެ އެ މިނިވަން ފަޒާގައި ހިނގާލަން ބޭނުމެވެ. ހަނދުވަރުދޭ ރެއެއްގައި މާކިންއާ އެއްކޮށް ގޮނޑުދޮށުގައި ހިނގާލަން ކިހާ ހިތްގައިމު ވާނެއެވެ.
އަހަރެން ހުއްޓުމެއް ނެތި ކުރި އާދޭހާ މަންމަގެވެސް ބާރު އެޅުމާއެކު، ކިނާންގެ ކައިވެންޏަށް މާލެ ދިއުމަށް މާކިން އެއްބަސް ވިއެވެ. އަހަރުމެން ފުރަން ހަމަޖެހުނީ ޖެހިގެން އައި ހަފްތާގެ ހުކުރު ދުވަހުގައެވެ.
ރާއްޖެދާ ދުވަސް ކައިރިވަމުން އައި ވަރަކަށް އަހަރެންގެ ހިތަށް ބުނެދޭން ނޭގޭ ފަދަ އިހުސާސްތަކެއް ކުރެވެން ފެށިއެވެ. ކޮންމެވެސް ބޮޑު ކަމެއް ވާން އުޅޭ ކަމުގެ އިހުސާސް ކުރެވެން ފެށިއެވެ. އެއާއެކު، ހުވަފެނުން އެ ނުދަންނަ ކުއްޖާ ފެންނަ ފެނުންވެސް ގިނަވާން ފެށިއެވެ. ބައެއް ފަހަރު އަހަރެންގެ އަތުގައި ހިފައިގެން ހަވީރު ފިނީގައި ހިނގާތަން ފެނެއެވެ. އަނެއް ފަހަރު ގޮނޑުދޮށުގައި ދުވެ ކުޅި ހަދަނިކޮށްވެސް ފެނިދާނެއެވެ. އެ ހުވަފެންތަކާ މެދު ވިސްނަ ވިސްނާވެސް އެއިން ނަގާނެ މާނައެއް އަހަރެންގެ ސިނކުޑިއަކަށް ނައެވެ. ނުވީތާކަށް އެކަމާ ވިސްނި ވަރަކަށް އަހަރެންގެ ހިތުގައި ފުނިޖެހޭ ސުވާލުތައް ދިޔައީ ގިނަވަމުންނެވެ.
މުޅި ދުވަހު ދަތުރު ކުރުމަށްފަހު ވެލާނާ އިންޓަރނޭޝަނަލް އެއާރ ޕޯޓުގައި އަހަރުމެންގެ ފުލައިޓު ޖެއްސީ ހޮނިހިރު ދުވަހުގެ ހެނދުނުގެ ވަގުތެއްގައެވެ. ބޯޓުން ނުކުމެވުމާއެކު ގައިގާ ބީހިލި ވައިރޯޅި އަހަރެންގެ ހުރިހައި ހާސްކަމެއް ހިފައިގެން ދިޔަ ކަހަލައެވެ. ނިއުޒިލޭންޑްގެ ފިނި މާހައުލަށްވުރެ ރާއްޖޭގެ މި މާހައުލު ފުރަތަމަ ފިވަޅުންވެސް އަހަރެންނަށް މާ ކަމު ހިނގާއްޖެއެވެ.
މާލެ ގޮސް ފުރަތަމަ ދުވަހު އަހަރެންނަށް ނޭވާލާނެ ވަގުތުކޮޅެއްވެސް ނުލިބުނެވެ. މާކިންގެ ޢާއިލާ އަހަރެން ހީކުރި ވަރަށްވުރެ މާ ބޮޑެވެ. އާއިލާގެ އެންމެނާ ބައްދަލުވެ ސަލާމްކޮށް ނިމުނުއިރު ދުވަސްވެސް ނިމިއްޖެއެވެ. ޖެހިގެން އައި ދުވަހު އަހަރެންނާ މާކިންގެ މަންމަ ނުކުތީ ކައިވެނީގެ ހަފްލާގެ “ތީމް”އާ ގުޅޭގޮތުން ހެދުންފަހާނެ ރީތި ފޮތިކޮޅެއް ހޯދުމުގެ ބޭނުމުގައެވެ.
ސްކޫލު ބަންދުގެ ދުވަސްތައް ކަމުން މަގުތައް މަތީގައި މީހުންވެސް ނުހަނު ގިނައެވެ. ކަމުދާ ކަހަލަ ފޮތިކޮޅެއް ފެނުނީ ދެތިން ފިހާރައަށް ވަތް ފަހުންނެވެ. ފޮތި ކަނޑާނެ މިންވަރު ބުނެދީ އަގުދައްކަން މާކިންގެ މަންމަ ކައުންޓަރާ ކައިރިވި ވަގުތު އަހަރެން ފިހާރައިގެ އެތެރަށް ޖެހިލީ ތަންކޮޅެއް އެތެރޭގައި ހުރި ރޭނދާތަކެއް ލޮލުގައި އަޅައިގަނެގެންވެ.
އަހަރެން ސިއްސައިގެން ދިޔައީ ނުހަނު ގާތުން އިވުނު އަޑަކުންނެވެ. “މަންމީ”. ސިއްސައިގެން ގޮސް އެނބުރި ފަހަތައް ބަލާލިއިރު ފެނުނު މަންޒަރު ޤަބޫލުކުރުމަށް އަހަރެންގެ ޒަމީރު ދެކޮޅު ހެދިއެވެ.
އެއީ ހަމަ އެ މޫނެވެ. އެ ހިނިތުންމެވެ. ކޮންމެ ރެއަކު އަހަރެންގެ ހުވަފެނުން ފެންނަ ކުއްޖާއަކީ ހަމަ މިއީއެވެ. ހަމަ އެކަނި ތަފާތަކީ ތަންކޮޅުން އިސްކޮޅުން ދެމިލާފައި ހުރުމެވެ. ނަމަވެސް މިހެން ވާންވީ ކީއްވެގެން ހެއްޔެވެ؟ އެ ކުއްޖާ މަންމާ އޭ ކިޔާ އަހަރެންނާ އެ މުޚާތަބު ކުރަނީ ކީއްވެގެން ހެއްޔެވެ؟ ތަޤުދީރު މި ކުޅެނީ ކޮންކަހަލަ ސަމާސާއެއް ބާއެވެ….
ނުނިމޭ …