“ކޮންގްރެޖުލޭޝަންސް، ޔޫ އަރ ކެންސަރ ފްރީ” ޑޮކްޓަރ އަހަރެންނާ ސަލާމްކޮށްލުމަށްފަހު ތަހުނިޔާ ކިއެވެ. އަހަރެންނަށް އެވަގުތު ބަލާ ލެވުނީ ދާދިގާތުގައި އިން އަހަރެންގެ ފިރިމީހާ މާކިންގެ މޫނަށެވެ. އިއްތިފާގުން އެވަގުތު ވެގެންދިޔައީ މާކިންވެސް އަހަރެންގެ މޫނަށް ބަލާލި ވަގުތަށެވެ. ދެމީހުންގެ ނަޒަރު ސީދާވެގެން ދިޔަ ވަގުތު މާކިންގެ މޫނުމަތިން ފެނިގެންދިޔައީ އިންތިހާ ދަރަޖައިގެ އުފާވެރިކަމެވެ. އޭނާގެ އަތުގެ ތެރޭގައި އޮތް އަހަރެންގެ އަތަށް މަޑުމަޑުން ފިތާލިއެވެ. އަހަރެންވެސް އޭނާއަށް ހިނިތުންވުމެއް ދިނުމަށްފަހު ޑޮކްޓަރާ ދިމާއަށް އެނބުރިލީމެވެ.
ޑޮކްޓަރު އެޕޮއިންޓްމެންޓް ނިންމާ އަހަރެމެންނަށް ނިކުމެވުނު އިރު ގަޑިން 4 ޖަހަނީއެވެ. އަހަރެން ނުކުމެ މަޑުކޮށްލީ ހޮސްޕިޓަލްގެ އެމަރޖެންސީ ދޮރާށި ކައިރީގައި ހިޔާކޮށްފާ ހުރި ތަނުގައި ހުރި ބެންޗްތަކުން ބެންޗެއްގައެވެ. މާކިން ދިޔައީ ކާރުގައި އަންނާނެ ކަމަށް ބުނެފައެވެ. ކަން ދިމާކުރި ގޮތުން މިއަދު އަހަރުމެންނަށް ޕާކް ކުރަންޖެހުނީ ތަންކޮޅެއް ދުރު ހިސާބެއްގައެވެ. ހިނގާފައި އަހަރެން ކާރާ ހިސާބަށް ދިއުމަށް މާކިން އިންކާރު ކުރިއެވެ. އަހަރެން ވަރުބަލިވާނެ ކަމަށް ބުނެ އުޒުރު ދައްކާފައެވެ. އެއީ މާކިންގެ އާދައެވެ. އަހަރެން ހަނދާންހުންނަށް ފެށި އިރުން ފެށިގެން އޭނާގެ އާދައަކީ އެއެވެ. އަހަރެންގެ އެންމެ ކުދިކުދި ކަންކަމަށްވެސް އޭނާ ހާދަ ސަމާލުކަމެއް ދެއެވެ.
ދުވަސްވަރަކީ ނިއުޒިލޭންޑަށް ފިނި މޫސުންކަމުން 4 ޖަހާލާއިރު ހުންނަނީ އިރުއޮއްސުމާ ކައިރިވެފައެވެ. ބަނަ ދުވަހެއްކަމުން އަދި ވަކިން ބޮޑަށް އަނދިރިކަމުގެ އަސަރުތައް ފެނިގެން ދެއެވެ. ޖައްވުގައި ހިފާއިވަނީ އާދަޔާ ޚިލާފު ފިނިކަމެކެވެ. ލައިގެން ހުރި ޖެކެޓް އިތުރަށް ގަޔަށް ބާރުކޮށްލެވުނީ އެހެންވެގެންނެވެ.
އެކަނި އިންނަށް ޖެހުމުން އަހަރެންގެ ސިނކުޑީއަށް ތަފާތު ޚިޔާލުތައް އައިސް ގޯސް ވާން ފެށިއެވެ. އަހަރެންގެ ބޮލުގައި އުފެދިފައިވި ޓިއުމަރ ނެގުމަށް އޮޕަރޭޝަން ކުރެވުނީ މީގެ އަށް މަސް ކުރިންނެވެ. ސަރޖަރީ ކާމިޔާބުވިއެވެ. ނަމަވެސް ސިނކުޑީގައި ހުރި ޓިއުމަރ ނެގުމަށް ކުރެވުނު މި އޮޕަރޭޝަންގެ ނަތީޖާއެއްގެ ގޮތުން އަހަރެންނަށްވަނީ “ރެޓްރޯގްރޭޑް އެމްނީސިއާ” ޖެހިފައެވެ. މާނައަކީ އޮޕަރޭޝަންގެ ކުރިން އަހަރެންގެ ދިރިއުޅުން އޮތްގޮތެއް އަހަރެންނަކީ ކާކުކަމެއް، މިހާރު އަހަރެން ހަނދާނެއް ނެތެވެ. ޑޮކްޓަރ ބުނާގޮތުން މިއީ މަދުންނަމަވެސް ސަރޖަރީގެ ސަބަބުން ދިމާވާ ހާލަތެކެވެ. ބައެއް ފަހަރު ދުވަސްތައް ހޭދަވަމުން ދާވަރަކަށް ހަނދާންތައް އިޔާދަވާއިރު ބައެއް ކަންތައްތައް އެއްގޮތަކަށްވެސް ހަނދާންނުވެ ހިނގައިދާނެއެވެ. ފުރަތަމަ އެ ޚަބަރު ލިބުނު ދުވަހު އަހަރެން ހާދަ ރުއިމެއް ރުއީމެވެ. ނަމަވެސް މާކިން އަހަރެންނަށް ވިސްނައިދިނީ އެކަމާ މެދު ހިތާމަ ނުކުރުމަށެވެ. މިއީ ދިރިއުޅުމުގައި އާ އުފާވެރި ހަނދާންތަކެއް ބިނާކުރުމަށް ލިބުނު ފުރުޞަތެއްކަމުގައި ބެލުމަށެވެ. ނަމަވެސް، ވޭތުވެދިޔަ އަށެއްކަ މަސް ދުވަހު އަހަރެން އެކަމާ ނުވިސްނަމެކޭ އެއް ނުބުނެވޭނެއެވެ.
ހެނދުނުގެ އިރު ފަޒާގެ ތެރެއަށް ފޭއްދާލިއިރު އަހަރުމެންގެ ގެއަށް ހީވަނީ ކުޑަވަރެއްގެ ޢީދެއް އައިސްގެން އުޅެނީ ހެންނެވެ. ގޭތެރެގައި ޚާދިމުން ހޭލަމޭލަ ވަމުން ދިޔައީ ރޯލު އަވަސް ވެފައިވާ ފިލްމެއް ފަދައިންނެވެ. މާލޭގައި ދިރިއުޅޭ މާކިންގެ މަންމައާއި ބައްޕަ އަންނާތީ މިއަދު އޭނާވެސް ހުރީ ޗުއްޓީ ނަގައިގެން ގޭގައެވެ.
މާކިންގެ މަންމައާއި ބައްޕައަށް ގެއަށް އާދެވުނީ އިރުއޮސުނު ފަހުންނެވެ. މަންމަމެން ބަލާ އެއަރޕޯޓަށް ދިޔައީ މާކިން އެކަންޏެވެ. އެއަރޕޯޓަށް ކާރުގައި ދެވެނީ 3 ގަޑިއިރު ކަމުން މާކިން ބުނެދިނީ އަހަރެން އަދި އެހާ ދިގު ދަތުރުތައް ކުރުން ރަނގަޅު ނޫން ކަމުގައެވެ. ވުމާއެކު، މަންމެންނަށް އަހަރެން މަރުހަބާ ކިޔަން ޖެހުނީ ގެއިންނެވެ. މާކިންގެ މަންމަ އީލާފްއަށް އަހަރެން ފެނުމާއެކު ގެނެސް ގަޔާ ބޮނޑިކޮށްލިއެވެ. “ޒިލް، މަންމަގެ ދަރިފުޅު، ވަރަށް ބޮޑަށް މަރުޙަބާ. މަންމަ ވަރަށް އުފާވެއްޖެ މާކިން ދަރިފުޅު މުޅިން ރަނގަޅުވެއްޖެ ކަމަށް ބުނުމުން. މަންމަ ހާދަ ދުޢާއެއް ކުރީމޭ މި ދުވަސް ދައްކަވާތޯ. އަލްޙަމްދުލިއްﷲ، މިއަދު އެ ނަސީބުވެސް މިންވަރު ކުރައްވައިފި.” މަންމަ އަހަރެން ގަޔާ ދުރުކޮށްލި އިރު އެ ލޮލުން ކަރުނައިގެ އަސަރު ފާޅުވާން ހުއްޓެވެ. މާކިންގެ ބައްޕަ މައިމޫންވެސް އަހަރެންގެ ބޮލުގައި ފިރުމާލަމުން މަރުޙަބާ ކިއެވެ.
ފެންވަރާ ތައްޔާރުވެލައިގެން ރޭގަނޑުގެ ކެއުމަށް އިންސާފުކުރަން ފެށުނުއިރު ގަޑިން ގާތްގަނޑަކަށް އެގާރަ ޖަހަނީއެވެ. ކާ މޭޒުދޮށުގައި ތިބީ އެންމެ ހަތަރުމީހުނެއް ކަމަކު މުޅި ކާކޮޓަރި ތެރެ ގުގުމާލާފައިވަނީ ހުނުމާ ސަމާސާތަކުގެ އަޑުންނެވެ. ކާން ތިބި އިރުވެސް މާކިންގެ މަންމަ އަހަރެންނަށް ޚާއްޞަ ސަމާލުކަމެއް ދިނެވެ. ކެންސަރ ފަރުވާނިމުނަސް އަބަދުވެސް ބަލައިގެން ހަށިގަނޑަށް ފައިދާވާނެހާ ކާންވާނެކަމަށް ބުނެދިނީ ތަފާތު ވައްތަރުގެ ތަރުކާރީތައް އަހަރެންގެ ތައްޓަށް އަޅާދެމުންނެވެ. މާކިންގެ މަންމަ އަހަރެންނަށް ކިހާ ރަނގަޅު ހެއްޔެވެ؟ ކިހާ ލޯބިވޭ ހެއްޔެވެ؟ އަހަރެން ހަނދާން ހުންނަށް ފެށީއްސުރެ އަހަރެންނާ އަބަދުވެސް މުޚާތަބުކޮށް ހަދަނީ އެހާ ލޯބިން އޯގާތެރިކަމާ އެކުގައެވެ. ބައެއް ފަހަރު ހީވެއެވެ. އެމަންމަގެ ދަރިއަކީ އަހަރެންނެވެ. ނަމަވެސް، މި ހުރިހާ ކަމަކާއެކުވެސް އަހަރެންގެ ޙަޔާތުގައި ހުސްކަމެއް ވާކަމުގެ އިހުސާސް ކުރެވެނީ ކީއްވެ ބާއެވެ؟ އަހަރެން ހަނދާނުން ބައެއް ފޮހެވިފައިވާތީ ހެއްޔެވެ؟ ނޫނީ، އަހަރެންގެ މައިންބަފައިން ނެތީތީ ހެއްޔެވެ؟ ދުނިޔޭގައި މައެއް ބަފައެއްނެތް ހާދަ ބަޔަކު އުޅޭނެއެވެ. އެ އެންމެނަށްވެސް އިހުސާސްވަނީ ހަމަ މިހެންބާއެވެ؟ މާކިން ބުނާގޮތުން އަހަރެންގެ މަންމައާއި ބައްޕައާ އޭނާވެސް ދިމާވެފައެއް ނުވެއެވެ. އަދި އެމީހުންގެ ވާހަކަ މާ ތަފްޞީލުކޮށް އަހަރެން އެއް އިރެއްގައިވެސް އޭނާއަށް ކިޔާދީފައެއް ނުވެއެވެ. އިނގޭހާވެސް އެއްޗަކީ އަހަރެން ވަރަށް ކުޑައިރު އެމީހުން ނިޔާވެފައިވާ ކަމެވެ. އަހަރެންގެ ޢާއިލާއާ ބެހޭ އިތުރު ތަފްޞީލެއް މާކިންއަކަށް ނޭނގެއެވެ.
ވެފައިހުރި ވަރުބައްޔާއެކު އެނދުގައި އޮށޯވެލުމާއެކު، ފުން ނިއްޖެއްގެ ތެރެއަށް ގެބިގެންދާން ނެގީ މަދު ވަގުތުކޮޅެކެވެ. ނަމަވެސް ނެގީ ކުޑަ ވަގުތު ކޮޅެކެވެ. ސިއްސައިގެން ގޮސް އަހަރެންނަށް ހޭލެވުނެވެ. އޭރު އަހަރެން ހިތް ބާރަށް ތެޅެމުން ދިޔައެވެ. ހީވަނީ މޭ ފަޅާލައިފައި ނުކުންނަށް އުޅެނީ ހެންނެވެ.
އެއީ ކޮންކަހަލަ ހުވަފެނެއް ހެއްޔެވެ؟ އެއީ ކޮން ކުއްޖެއް ހެއްޔެވެ؟ ހެވިފާ ހުރެ އަހަރެންނާ ދިމާއަށް އެ އައީ ކިއްވެގެން ހެއްޔެވެ؟ ހީވީ ނޭނގޭ ބާރަކުން އަހަރެންވެސް އެ ތުއްތު ކުއްޖާއާ ދިމާއަށް ދަމާ ހެންނެވެ. ހާދަ އެހެންކަހަލަ ހުވަފެނެކެވެ. އަހަރެންގެ ލޮލުން ނިދިވެސް ގެއްލުވާލައިފިއެވެ. އެ މައުސޫމު ސޫރަ އަހަރެންގެ ހިތުން ފިލުވައެއް ނުލެވުނެވެ. ލޯމަރާލާ ކޮންމެ ފަހަރަކު ކުރިންމަތިން އެ ލޯބި ލޯބި ހިނިތުންވުން ފެނިދެއެވެ…
ނުނިމޭ ….
މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.