ނިއްކުރިން ފައިބަމުން ދިޔަ ދާތައް އަތުގެ ނުފުށުން އިސްމާއިލް ފުހެލިއެވެ. އޭނާއަށް ވިސްނެމުން ދިޔައީ، ބައްސާމްގެ އާއިލާ އަައުމުން މަސައްކަތް އިތުރަށް ބުރަވާނެ ވަރާމެދުގައެވެ. މިހާރުވެސް ގޭގައި އެންމެ ހަ މީހުން ، އުޅޭއިރުވެސް ހަމަޖެހިލައިގެން ނޭވައި ލާނެ ވަގުތެއް ނުވެެއެވެ. ދެން އަދި އިތުރު ފަސް މީހުން އިތުރު ވުމުން ވާނީ ކިހިނެއްހެއްޔެވެ؟ މާލެ ނައިސް ރަށުގައި މަޑުކުރެވުނު ނަމައޭ ހިތައް އެރިއެވެ. ރަށުން އޭލެވެލްއަށް ކިޔެވެން އޮއްވާވެސް، މާލެ އައީ ފެންވަރު ރަނގަޅު ތަޢުލީމެއް ހޯދާށެވެ. ‘އަނަތްރާ’ ގޭގައި އޭނާއަށް ހުރެވޭނެ ގޮތް ހަމަޖެއްސީ ބައްޕަގެ އެކުވެރިއެކެވެ. މިޒަމާނުގައި މިފަދަ ގޮތަކަށް ކުދިންނާއި މެދު މުޢާމަލާތު ކުރާނެ ކަމަށް އޭނާގެ މައިންބަފައިން ހިތައް އަރާނީ ކިހިނަކުންހެއްޔެވެ. މާލެ އައިތާ ހަމަސް ފާއިތު ވިއިރުވެސް، އޭނާގެ ހާލަތު މައިންބަފައިނަށް އިސްމާއިލް ސިއްރު ކުރިއެވެ. މުސްކުޅިވެފައި ތިބި އެދެމީހުންގެެ ހިތް އުދާސްކުރަން ނޭދޭތީއެވެ. އެމީހުން ހީކުރަނީ ، ފޯނުން ގުޅަން އިސްމާއިލްއަށް ވަގުތު ނުލިބެނީ ، ސުކޫލުގައި ބިޒީކޮށް އުޅޭތީކަމަށެވެ.
ބަދިގެ ފަރާތުުން އަންނަމުން ދިޔަ މީރު ވަހުން އިސްމާއިލް ކުޅު ދިޔާވަމުން ދިޔައެވެ. ހޭލީއްސުރެ އޭނާ އެހުންނަނީ ހުސްބަނޑާއެވެ. ޖުވެއިދާ އޭނާ މަސައްކަތަށް ގެންދިޔައީ ސައިބުއި ތޯ ވެސް ބެލުމެއް ނެތިއެވެ. ބައްސާމްގެ ކުދިން އަންނަންވާއިރަށް، އެމީހުންނަށް ކަމުދާނެ ފަދަ ނާސްތާ ތައްޔާރު ކުރުމަށް ރޫމީ އަވަދިނެތި މަސައްކަތް ކުރަމުން ދިޔައެވެ. ފްރެންޗް ޓޯސްޓާއި, ވޮފޮލް،އަދި ޕޭންކޭކް ފަދަ ހުޅުގަނގެ މީހުން ނާސްތާ ކުރާ ބާވަތްތައް ހެދުމަށް ބަހިއްޔާ އޮތީ އަންގާފައެވެ. މުޅި އުމުރު ޔޫކޭގައި ދިރިއުޅުނު ކުދިންގެ ރަހަވެސް އެމީހުންނާ އެެއް ގޮތްވާނެ ނޫންހެއްޔެވެ.
ޖުވެއިދާ އެއްފަރާތަކަށް ޖެހުނި ވަގުތު ބަލާފައި ޔާނީ ބަދިގެއަށް ވަނެވެ. ކުޑަތަށްޓަކަށް ޕޭންކޭކާއި، ވޮފޮލް ކޮޅެއް އެޅިއެވެ. އައިސްއަލަމާރިން އޮރެންޖު ޖޫސް ފުޅިއެއް ނަގައި ތަށްޓަކަަަށް އަޅާފައި ކުޑަ ތަބަކަކަށް ލިއެވެ.
އާދައިގެ މަތިން އިސްމާއިލް އުޅުނީ ގަސްތަކަށް ފެންދީއެވެ. ގޯތިތެރޭގެ ވަކި ހިސާބެއްގައި، އެކިވައްތަރުގެ މައު ގަސްތަކާއި، މިރުސް ގަސްފަދަ ގަސްތައް އިންދާފައި ހުއްޓެވެ. ބަގީޗާއެއް ފަދަ އެތަންކޮޅަށް އާދެވުމުން ، ރަށް މަތިން އޭނާ ވަރަށް ހަނދާންވެއެވެ. އޭނާގެ މައިންބަފައިންނަކީވެސް ގަސް ހައްދައި އުޅުނު ބަޔެކެވެ. ގަސްތަށް ބެލެހުއްޓަމަކީ މިހާރުވެސް އޭނާ ކުރާހިތުން ކުރާކަމެކެވެ. އެގޭގައި ކުރަންޖެހޭ މަސައްކަތްތަކުގެ ތެރެއިން އެންމެ ކުރާހިތުން ކުރާ މަސައްކަތެވެ. ހުރިހާ ގަސްތަކަށް ފެންދީ ނިންމުމަށްފަހު، ފެންދޭ ހޮޅި ބަންދުކޮށްފައި އެނބުރުނު ވަގުތު ޔާނީ ހަނައަޅާލިއެވެ. އިޚްތިޔާރެއް ނެތި އިސްމާއިލަށް ވަށައިގެން ނަޒަރެއް ދެވުނެވެ. ޔާނީ ހަނަ އަޅަނީ އޭނާއަށްތޯ ޔަގީން ކުރުމަށެވެ. ހޮޅި ބައްވާފައި އިސްމާއިލް ހިނގައިގަތީ ޔާނީ ގާތަށް ދާށެވެ. އޭނާ ހީކުރީ ޔާނީ އެ ގޮވަނީ މަސައްކަތެއް ޖައްސަން ކަމަށެވެ.
މަސައްކަތެއް ހަވާލު ކުރުމުގެ ބަދަލުގައި، ޔާނީ އޭނާއަށް ކާއެއްޗެއް ދިނުމާއެކު އިސްމާއިލް ފެންކަޅިވިއެވެ. ބަދިގެއިން ދިމާވެގެން އޭނާއަށް ނާސްތާ ހަދައިދިން ކަމުގައި ވިއަސް މި ގޮތަށް އޭނާއަށް ގޮވާފައި ، ކާއެއްޗެއް ޔާނީ ވެސް ދީފާނެކަމަކަށް އިސްމާއިލް ހިއެއް ނުކުރެއެވެ. ލޮލުން ކަރުނަ ފޭބުމުގެ ކުރިން ނިކަން އަވަހަށް އެސްފިޔަ ޖަހާލާފައި، ޔާނީއަށް ޝުކުރު އަދާކުރިއެވެ. ޖުވެއިދާއަށް ފެނުމުގެ ކުރިން ކައި ނިންމަން އަވަސް އަވަހަށް ކާންފެށިއެވެ. ޔާނީވެސް ބޭނުންވާނީ ، ޖުވެއިދާއަށް ފެނުމުގެ ކުރިން ދާންކަން އޭނާއަށް ވިސްނުނެވެ.
އިސްމާއިލް ކަމުން ދިޔަލެއް އަވަސް ކަމުން ޔާނީ ހިތަށް ތަދުވިއެވެ. އޭނާގެ އައިލާ މީހުން ހާދަ އަނިޔާވެރިއޭ ހިތަށް އެރިއެވެ. މީހަކަށް ފެނުމުގެ ކުރިން ތަށި ހިފައިގެން، ދާން ބޭނުންވެފައި ހުރި ވަރުން އިސްމާއިލް ގާތު ލަހުން ކާން ބުނާކަށް ، ޔާނީއަކަށް ނުކެރުނެވެ. ފަސް މިނެޓުވެސް ނުވަނީސް ތަށި ހުސްކޮށްފައި ޔާނީ އަތަށް އަނބުރައި ، އިސްމާއިލް ތަށި ދިނެވެ. ތަށި ލިބުމާއެކު ސިކުންތެއް ވެސް މަޑު ނުކޮށް ޔާނީ އެތަނުން ދިޔައެވެ.
ސައިބޮއެގެން ރަނގަޅަށް ހަމަނުޖެހެވިގެން އުޅެނިކޮށް، މާހިދު ގޮވިއެވެ. ބައްސާމްގެ އާއިލާ އައުމުން ފޮށިތައް ގެއަށް ވައްދަން އެހީވާން ބުންޏެވެ. އިސްމާއިލް ފުން ނޭވައެއް ދޫކޮށްފައި ދޮރޯށި ދޮަށަށް ނުކުތެވެ. އޭރު އެމީހުން ތިބި ކާރު އައިސް ގޭގެ ކުރިމަތީ މަޑުކުރަނީއެވެ. މާހިދު ގޮސް ކާރުގެ ދޮރުހުޅުވައިދިނުމާއެކު، މެދު އުމުރެއްގެ ފިރިހިނެއް ފޭބިއެވެ. އެމީހާގެ މޫނު މަތިން މާހިދުއާ ވައްތަރުވުމުން އެއީ ބައްސާމްކަން އިސްމާއިލަށް އެނގުނެވެ. ބައްސާމުގެ ފަހަތުން އޭނާގެ އަންހެނުން ސާރާ ފޭބިއެވެ. ވަޅު ފެހިކުލައިގެ ހަރުވާޅު ހެދުމެއްގައި ސާރާ ފެންނަނީ ވަރަށް ސާދާކޮށެވެ. ސާރާއާ އެކީގައި އެމީހުންގެ ހަގު ދަރިފުޅު އައިވަން ފޭބިއެވެ. ހައިރާންވެފައި ހުރެ އައިވަން ތަންތަން ބަލަމުން ދިޔައެވެ. ފަސް އަހަރުގެ އައިވަން ހުރީ އާތަނެއް ފެނުމުން އަޖައިބުވެފައެވެ.
ހަމަ އެވަގުތު އިތުރު ކާރެއް ވެެސް އައިސް މަޑުކޮށްލިއެވެ. ކަޅު ކުލައިގެ އެ ކާރުން ޒުވާން ފުރައިގެ އަންހެން ކުއްޖަކާ ފިރިހެން ކުއްޖެއް ފޭބިއެވެ. އަންހެން ކުއްޖާ ހުރީ، އެއްކޮށް ދިގުކޮށް ހުރި ގަދަ ނޫ ކުލައިގެ ހެދުމަކާއި އެކުލައިގެ ޝޯލެއް އަޅައިގެންނެވެ. ލޮލުގައި އަޅައިފައި އިން އަވިއައިނުން ދެ ލޯވަނީ ފޮރުވިފައެވެ. ކާރުން ފޭބި ގޮަތައް ފިރިހެން ކުއްޖާ ، ކާރުން ފޮށިތައް ބާލަން އަވަސްވެގަތެވެ. އެކުއްޖާއަށް ވުރެ ކުރިން އިސްމާއިލް ގޮސް ޑިކީ ހުޅުވައިދިނެވެ. އިސްމާއިލް ފޮށިތައް ނަގަން އުޅުމުން އެވަން ، އެކަން މަނާ ކުރިއެވެ. އިސްމާއިލްއާ ނުޖައްސާ އެވަން ފޮށިތައް ބޭލިއެވެ. ބޮޑު ދެފޮށި ދަމަމުން އެވަން ގެއަށް ވަނެވެ.
ބައްސާމްމެން އައި ކާރުން ބޭލި ބޮޑު ތިން ފޮށީގެ ތެރެއިން ދެފޮށީގައި ހިފީ އިސްމާއިލެވެ. އެވަންެެއެކޭ އެއްފަދައިން ، ދެން އިންފޮށީގައި ހިފީ ބައްސާމެވެ. ބައްސާމް އަދި އެވަން ލައްވާ، ފޮަަށި އުފުލުމުން މާހިދު ހިތްހަމަނުޖެހުނެވެ. ގޭގެ ވެރިންނަށް އިހުތިރާމު ނުކޮށް ފޮށި އުފުލުވަނީ ކަމަށް ބުނެ ، އިސްމާއިލްއަށް އެއްޗިހި ކިޔެވެ. “މާހިދު، ދެން އެއީ އެވަރު ކަމެއް ނޫނެ…އަހަރެން ބުނިއްޔޭ ގެންނާނެ ކަމެއް ނެތޭ…” މާލެ އައި ފަހުން ، ފުރަތަމަ ފަހަރަށް މީހަކު އިސްމާއިލްގެ ދިފާޢުގައި ވާހަކަ ދެއްކިއެވެ. ހިތާހިތުން ބައްސާމަށް ޝުކުރު އަދާކުރެވުނެވެ. ބައްސާމްގެ އާއިލާއަކީ ، ޔާނީ ފަދައިން ހެޔޮ ބައައެއްކަން އިސްމާއިލަށް ފާހަގަ ކުރެވުނެވެ. ޔާނީގެ އޯގާތެރިކަމަކީ، ބޮޑުބޭބެ ބައްސާމްގެ ފަރާތުން ލިބިފައިހުރި ސިފައަކަށް ވެދާނެއެވެ. އެ އާއިލާއަކީ ޔޫކޭގައި ދިރިއުޅޭ ބައެއްކަަމެއް، ބޭރު ފުށުން ބަލާފައި ނޭންގެއެވެ. ޔޫރަޕު މީހުންގެ އެއްވެސް ސިފައެއް އެ މީހުންގެ ކިބައިން ނުފެނެއެވެ. ތިން ކުދިންނަށް ވެސް ފަރިތަކަމާއެކު ދިވެހި ބަހުން ވާހަކަ ދައްކަން އެނގެއެވެ. ބޮޑާ ކަމާއި ކިބުރުވެރި ކަމުގެ އެއްވެސް ސިފައެއް އެމީހުންގެ ކިބައިން ނުފެނެއެވެ.
މާމަ ފެނުމުން އެވަން އާއި އީވް ގޮސް ސަލާން ގޮވައި ބައްދާލިއެވެ. ލަދުން ހުރެވެސް އައިވަން ވެސް ސަލާން ގޮވިއެވެ. ހިތްހެޔޮ ކަމާއެކު ސާރާ ވެސް ބަހިއްޔާއާ ސަލާން ކުރިއެވެ. އެއަށްފަހު ، ޖުވެއިދާ އާއި ޔުމްނާއާ ވެސް ސަލާން ކޮށް މަރުހަބާ ކިއެވެ.
ނުހަނު އެކުވެރިކަމާއެކު އީވް އައިސް ޔާނީ ގައިގައި ބައްދާލިއެވެ. ހަމަލޮލަށް ޔާނީއާ ދިމާވުމުން އޭނާ ހުރީ ވަރަށް އުފަލުންކަން އެ މޫނު މަތިން ހެކިދެއެވެ. ޔާނީގެ ހިތުގައި ، އުފެދިފައިވި ނުތަނަވަސްކަން ވެސް ވަގުތުން ފިލައިގެން ދިޔައެވެ. އޭނާ ފަދައިން އީވްއަކީވެސް، މީހުންނާ ގުޅޭ މިޒާޖެއްގެ ކުއްޖެއްކަން އެނގުމުންނެވެ.
އެންމެ އިރުކޮޅެއްވެސް ލަސްނުކޮށް، ބަހިއްޔާ އެންމެން ގޮވައިގެން ސައިބޯން ކާގެއަށް ދިޔައެވެ. “މާމަ ކީއްވެތޯ ދިވެހި ނާސްތާއެއް ތައްޔާރު ނުކުރެއްވީ؟ އަޅުގަނޑު ހީކުރީ މިއަދު ފަތްމަސްހުނި ކާން ލިބޭނެ ކަމަށް! ބައްޕަ އަންގަވަނީ މަންމަ ހަދާ މަސްހުންނަށް ވުރެއްވެސް، މާމަގެ މަސްހުނިގަނޑު މީރުކަމަށް!” މަސްހުނި ނުފެނުމުން އީވް ކުޑަކޮށް މާޔޫސްވިއެވެ. އޭނާ ހީކޮށްގެން ހުރީ ރާއްޖެ އައުމުން، ތާޒާ ދިވެހި ކާނާ ލިބޭނެކަމަށެވެ. ރާއްޖޭގައި ނޫޅުނު ކަމުގައި ވިއަސް އެކުދިންނަށް އެންމެ ކަމުދަނީ ދިވެހި ރަހަތަކެވެ. ޔޫކޭއިން ލިބޭ ބާވަތްތަށް ބޭނުންކޮށްގެން ، ސާރާ ވަނީ އެކުދިންނަށް ދިވެހި ރަހަތައް ތަޖުރިބާކުރަން ދީފައެވެ.
އީވް މަސްހުނީގެ ނަން ގަތުމުން ޖުވެއިދާއަށް ޗޮކެއް ކަނޑާލެވުނެވެ. ބޭރު ގައުމެއްގައި އުޅެ ބޮޑުވި ކުއްޖަކަށް މަސްހުންޏަަކީ ކޯޗެއްކަން އެނގުމުން ވެސް އޭނާ ހައިރާންވިއެވެ. “މާމަ ހީކުރީ ދަރިފުޅުމެންނަށް ކަމުދާނީ މި ކަހަލަ އެއްޗިހި ކަމެއް..ހެހެހ ނޭންގޭނެއްނު ދޯ..” ޖުވެއިދާއަށް ލޯ އަޅާލުމަށްފަހު، ނުވާކަމަކަށް ހެދެމުން ، ބަހިއްޔާ ބުންޏެވެ.
މެންދުރު ނަމާދު ކޮށްލައިގެން ގޭގެ މަސައްކަތް ކުރިއަށް ދާ ގޮތް ބެލުމަށް ބައްސާމް ނުކުތެވެ. އޭނާއާއެކު އެވިން ވެސް އައެވެ. ޖުވެއިދާއާ ޚިލާފަށް މަސައްކަތު މީހުންނާ، ބައްސާމު މުޢާމަލާތު ކުރީ ހިތްހެޔޮކަމާއެކީގައެވެ. އެމީހުންނަށް ވެސް ، އެކަން ފާހަގަވެ އެ މީހުންގެ ތެރޭގައި އެ ވާހަކަ ދެއްކިއެވެ.
ދަތުރުގެ ވަރުބަލިކަން ، އީވްއަށް އިހުސާސްވީ ފެންވަރައިގެން އައިސް އެނދުގައި އޮށޯތުމުންނެވެ. ދިހަ ގަޑިއިރަށް ވުރެ ގިނަ އިރު މަތިންދާ ބޯޓުގައި އިށީންދެގެން އިނުމުން ގަޔަށް ވެސް ވަނީ ތަދެއް އަރާފައެވެ. އޭނާ އަންނަން ވާއިރަށް ޔާނީ އޮތީ އެނދު ތަންމަތި ތައްޔާރުކޮށްދީފައެވެ. ޔާނީގެ ކޮޓަރިއަކީ ފުދޭވަރަކަށް ބޮޑު ކޮޓަރިއެކެވެ. ކޮޓަރީގެ މެދަށް ވާ ގޮތަށް ހުދު ކުލައިގެ ދެ އެނދު ބަހައްޓާފައި ހުރި އިރު، ހެދުން އަލަމާރި އާއި ކިޔަވާ މެޒު ހުރީ ކަނަކަށް ވާ ގޮތަށެވެ. ކިޔަވާ މޭޒާއި އިން ވެގެން ފޮތްހަރެއް ބަހައްޓާފައި ހުއްޓެވެ. ޔާނީ އޮތް އެނދުގެ ކަނާއަތް ފަޅިއަށް ވާ ގޮތައް ، ޗެސްޓް ޑްރޯވާއަކާއި ލޯގަނޑެއް ހުއްޓެވެ. ފާރުގައި ހުރީ ،ހުދު ކުލަޔާއި މަޑު ފިޔާތޮށި ކުލަ އެއްލާފައެވެ. ބިންމަތީގައި އޮތީ ފިޔާތޮށި ކުލައިގެ ކެހެރި ކާޕެޓެއް އަޅާފައެވެ. ދެ އެނދު ދެމެދުގެއި ކުޑަ ސައިޑް މޭޒެއް ވެސް ހުއްޓެވެ. އޭގެ މަތީގައި ފެންޖަގަކާއި ، ޕްލާސްޓިކް ކުޑަ ފެންބޯ ދެ ތަށި ހުއްޓެވެ. ޔާނީ އެނދުގައި ވަށައިގެން ވެޔޮ ގަނޑެއް ދަމާފައި އޮތެވެ. އީވް އެނދުގައި އޮށޯވެގެން އޮތް އިރު ، ކުރިމަތީގައި ހުރި ކުޑަ ދޮރުން ރީތިކޮށް ބަގީޗާ ފެންނަމުން ދިޔައެވެ. އެކި ކުލައިގެ މައުތައް ފެންނާތީވެ ވަރަށް ހިތްގައިމެވެ. އޭނާއަށް ނިދުނީވެސް މައު ގަސްތަކަށް ބަލަން އޮއްވައެވެ.
އީވްއަށް ހޭލެވުނީ ފޯނު ރިންގުވާ އަޑަށެވެ. ގަދަކަމުން ލޯ ހުޅުވާލަމުން އޭނާ ބަލާލީ ގަޑިންވީ ވަރަށެވެ. ގަޑިން ފަސްގަޑި ބައިވެ ހައެއް ޖަހަނީއެވެ. ފުންމައިގެން އެނދުން ތެދުވެ އޭނާ އަވަސްވެ ގަތީ މަޣްރިބަށް ގޮވުމުގެ ކުރިން އަސުރު ނަމާދު ކުރާށެވެ. ރިންގުވަމުން ދިޔަ ފޯނު ކަނޑާލާފައި ، ވުޟޫ ކުރަން ފާޚާނައަށް ވަނެވެ.
ނަމާދަށް ސަލާންދިން ތަނުން އަނެއްކާވެސް އޭނާގެ ފޯނު ރިންގުވިއެވެ. ކޯލު އަންނަނީ ވަޓްސް އެޕުން ކަމަށްވުމާއެކު ، ގުޅަނީ ކާކުކަން އީވްއަށް އެނގެއެވެ. އަވަސް އަވަހަށް ޛިކުރުތައް ކިޔައި ނިންމާފައި ، ފޯނަށް ޖަވާބު ދިނެވެ.
ދިވެހި ބާވަތް ނެތިގެން އީވް ޝަކުވާ ކުރުމުން ރޭގަނޑަށް ރޫމީ ލައްވާ ،ބަހިއްޔާ ތައްޔާރު ކުރުވީ ދިވެހިކެއުމެވެ. ބަތާއި ، ގަރުދިޔައީގެ އިތުރަށް ރިހާކުރިދިޔަ އަދި ރޮށިފިހުނެވެ. ތެލުލިފަތާއި، މަސްމިރުހާއި ދަންކާށިވެސް ހުއްޓެވެ.
ކައިނިމިނުއިރު، އެވަން އާއި އީވްގެ ބަނޑު ހީވަނީ ފަަޅައިގެން ގޮސްދާނެހެންނެވެ. ރޮށި ކެވުނު އަދަދެއް ވެސް އެކުދިންނަކަށް ނޭންގުނެވެ. އީވްއަށް އެންމެ މީރުވީ ރޮށްޓާއި ރިހާކުރުދިޔައެވެ. ބަނޑުފުރިގެން ، ހިރިނުލެވޭ ވަރަށް ދެކުދިން ކެއުމުން ސާރާ އަޑުލިއެވެ.
އިސްމާއިލް ކާން ނުކުތީ އެންމެން ކައިގެން ދިއުމުން، ރޫމީ ގޮވީމައެވެ. އެހެން ރޭރެއާ ޚިލާފަށް ސިޓިންރޫމްތެރޭގެ އަޑުގަދައެވެ. އިސްމާއިލް ކާގެއަށް ދިޔައިރު، ރޫމީ އާއި ދެންވެސް ގޭގައި މަސައްކަތް ކުރާ ބޭރު ދެމީހަކު ކާން އަރައި ތިއްބެވެ. އެމީހުންނަށް ދިވެހި ކެއުން ކަމުނުދިޔަސް، އިތުރު އެއްޗެއް މިރެއަކު ކާކާށް ނެތެވެ. ގޭގެ މީހުން ކައިފައި ބާކީ ހުރި ، މަދު އެތިކޮޅު ހަތަރު މީހުންނަށް ބަހާލައިގެން، ހަތަރު ތަށްޓަށް އަޅާފައި ހުއްޓެވެ. އަނެއް ތިން މީހުންނާއި ޚިލާފަށް މިރޭގެ ކެއުން އިސްމާއިލްއަށް ވަރަށް ކަމު ދިޔައެވެ. ޖެހިޖެހިގެން ދެދުވަހު، ގަރުދިޔަ ކާން ލިބުމުން އޭނާ ހުރީ އުފަލުންނެވެ. އެގޭގައި އާންމު ގޮތެއްގައި، ތައްޔާރު ކުރަނީ ޕާސްތާ، ފްރައިޑް ރައިސް ފަދަ ބާވަތްތަކެވެ. ދިވެހި ކެއުމެއް ލިބޭނީ ، ވަރަށް މަދުންނެވެ. މީހަކު ތާޒާ މަސްކޮޅެއް ގެނެސްދީފިއްޔާ ނޫނީ ގަރުދިޔަ ފޮދެއް ވެސް ނުލިބެއެވެ. ބަނޑު ނުފުރުނު ކަމުގައި ވިއަސް ކަމުދާ ކާއެއްޗެއް ލިބުމުން ، އިސްމާއިލް ޝުކުރު ކޮށްލިއެވެ. އޭނާ ބަދިގެ ފަރާތަށް ދިޔައީ ތަށިތައް ދޮންނަންށެވެ. ގޭގެ މީހުން ރޭގަނޑު ކާ ތަށިތައް ވެސް ދޮންނަން ޖެހެނީ އޭނާއާ އެވެ. އޭނާ ވަރަށް ވަރުބަލި ވެފައި ހުންނަ ދުވަހެއްގައި ރޫމީ ދޮވެދެއެވެ.
ނުނިމޭ
މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.
Other Articles
އެއީ އެކަނިވެރިއެެކެވެ. 2
