ކައިވެނިކުރުމަށް އެޅޭ ފުރަތަމަ ފިޔަވަޅު
‘މި ކައިވެނީގެ ސަބަބުން އަހަރެމެން ދޭތެރޭގައި އަސްލު ލޯބީގެ ގުޅުމެއް ބާއްވާކަށް ނުޖެހޭނެއްނު؟’ ޔުން ހިތަށް އަރުވަމުން ދިޔައެވެ. ‘އޭނާގެ ޖަޒުބާތުތައް ބަދަލު ނުވާނަމަ…’ ޔުން މީކާއިލުއާ ދިމާއަށް ބަލަމުން ފަހަތުން ހިނގައިގަތެވެ. ‘އަހަންނަށްވެސް ޖަޒުބާތައި ނުލާ މި ގުޅުން ބޭއްވޭނެއްނު؟’ ޔުން ހިތަށް އަރުވަމުން ދިޔައެވެ. ‘މިއީ އަހަރެން ބޭނުންވާ ކަހަލަ ކައިވެނި. އެއްވެސް ޖަޒުބާތެއް ނެތް. އަދި އެހާމެ ފަސޭހަ.’
މީކާއިލު ކާރުގެ ދޮރު ހުޅުވުމަށްފަހު ޔުންއާ ދިމާއަށް އެނބުރިފައި ބުންޏެވެ. “ކަލޭ އަދިވެސް އަހަރުންގެ އަތުގައި ހިފާއިރު ހަމައެއް ނުޖެހެވޭ!” ބުނި ބަހަށް ޔުންގެ ޚިޔާލީ ދުނިޔެއިން ނުކުމެވިގެން ދިޔައެވެ. “އަހަރުން ހީކުރީ ކަލޭ މިފަދަ ކަންތައްތަކަށް މޮޅުވާނެކަމަށް. ކަލެއެއްނު މި ފަދަ ކަންތައްތައް ސަތޭކަ އަށްފަހަރު ކުރީ.” މީކާއިލު ޔުންއާ ދިމާއަށް ބަލަމުން މަލާމާތުގެ ރާގަކަށް އަޅުވާލިއެވެ.
‘އަހަރުން މިކަމަކާ ދެން އެއްޗެކޭ ނުބުނާނަން ވައްސަލާން!’ ޔުން ސިކުނޑީގައި ޚިޔާލުތައް ރާވަމުން ދިޔައެވެ. ‘އަހަރުން އޭނާ އެދައްކާ ވާހަކައަކާ އެއްބަސްވުމުން އަހަންނަކަށް ގެއްލުމެއް ނުވާނެއްނޫންބާ؟’ ޔުން އިސް ދޮށަށްޖަހާލަމުން ބުންޏެވެ. “އާނ. އަހަންނަށް މަޢާފު ކުރޭ..” މީކާއިލު ދިޔައީ ސިހިގެންނެވެ. މިއީ އާންމު ގޮތެއްގައި އެފަދަ ސުވާލުތަކަށް ޖަވާބުދޭ ގޮތެއް ނޫނެވެ. އަބަދުވެސް ނިކަން ޒީލަގަދަ ވާނެއެވެ. އޭނާ ހީކުރި ޖަވާބު ނޫންކަމުން އޭނާއަށް އާގަމަ ވެފައި ހުރެވުނެވެ.
‘އަހަރެމެން ލޯބިވެރިން ގޮތުގައި ދެއްކުމަށް މަސައްކަތް ކުރަންވީ’ ޔުން ސިކުނޑީގެ ތެރޭގައި ހަޅޭއްލަވަމުން ދިޔައެވެ. “މިހެންތަ؟” ޔުން މީކާއިލުގެ ޝަހާދަތް އަދި މެދުވައި އިނގިލީގައި ހިފާލަމުން ބުންޏެވެ. “ނޫނީ މިހެން؟” މީކާއިލުގެ އިނގިލިތައް ދަށުން ޔުންގެ އިނގިލިތައް ލައްވާލިއެވެ. “ކޮން ގޮތެއް ކަމުދަނީ؟ ކިހިނެތް އާންމުކޮށް ލޯބިވެރިން އަތް ގުޅުވަނީ؟” ޔުން ސުވާލުކުރަމުން މީކާއިލުގެ މޫނަށް ބަލައިލިއެވެ.
“މިހެން!” މީކާއިލު ޔުންގެ އިނގިލިތަކު ދޭތެރެއަށް އޭނާގެ އިނގިލިތައް ލައްވާލިއެވެ. އޭރު ޔުން ހުރީ ކުޑަކޮށް އާގަމަވެފައެވެ. ނަމަވެސް އެއްވެސް އިތުރު ޖަޒުބާތެއް މޫނުމަތިން ނުދައްކާ އޭނާ ވަނީ ކާރަށެވެ.
“އެހެންވީމާ، ކަލޭމެން ދެމީހުން ތިއުޅެނީ ކައިވެނި ކުރަން؟ އެކަމު ކައިވެނި ކައިވެންޏެއް ނޫން ދޯ؟” އީނާގެ ބައިން މެސެޖު އައިސްފައިވެއެވެ.
“ލައްބަ. އަހަރެމެން ދެމީހުންވެސް ބޭނުންވަނީ ކައިވެނި ކޮށްފައިވާކަމުގެ މަގާމު އެކަނި.” ޔުން އެ މެސެޖަށް އިޖާބަ ދިނެވެ.
“ކަލޭ ހަމަ އަސްލުވެސް މި ކައިވެނި ކުރުމަށް ޔަގީންތަ؟ ޖެހިގެން ތިއުޅުނު މައްސަލައަށް ހައްލެއް ލިބުނީތީ އަހަރެން އުފާކުރަން. އެކަމު ތި ކައިވެނީގެ ސަބަބުން އަދި އެހެނިހެން މައްސަލަތަކަށް ކުރިމަތިވާނެކަން އެއީ ޝައްކެއްވެސް ނެތް ކަމެއް!” އީނާ މެސެޖު ކުރިއެވެ.
ފޯނުގެ ސަތަހައަށް ބަލަން އިން ޔުން ސުވާލުވެރި މޫނެއް ހަދާލިއެވެ. “ތިޔަ ބުނީ ކޮން ކޮން ކަހަލަ މައްސަލަތަކެއް؟” ޔުން މެސެޖު ކުރިއެވެ.
“އަހަރުން މިބުނީ، މި ކައިވެނި މިއީ ހަމައެކަނި އެ މަގާމު ހޯދުމަށް ކުރާ ކަމެއް ދޯ؟ އެކަމު… އޭގެ މާނައަކީ ކަލޭ މަރުވަންދެންވެސް ތިޔަ ގޮތުގައި ތަމުސީލު ކުޅޭނަމޭ؟ މީކާއިލުއަކީ ވަރަށް ނަން މަޝްހޫރު ވިޔަފާރިވެރިއެއް. އޭނާ މިހާރު ޔަގީން ކޮންމެވެސް ކަމެއް ރާވާފައި އޮންނާނީ. ކަލޭ ރޭވުމެއް ރާވައިފިންތަ؟” އީނާ ސުވާލު ފައްޗެއް ފޮނުވާލިއެވެ. ޔުން ފޯނުގެ ސަތަހައަށް އަދާހަމަވަމުން ދިޔަ މެސެޖުތަކަށް ބަލަން ގަބުވެފައި އިނެވެ.
‘އަސްލު ހަގީގަތުގައި ބުނާނަމަ އަދި މި ކައިވެނި މިދާ މިސްރާބެއް އެއްވެސް ގޮތަކަށް ބުނެދޭކަށް ނޭނގެ.’ ޔުން މިހާރު ހިތަށް އަރަމުން ދިޔައެވެ. ‘ފަހަރުގައި އީނާ ބުނި ބަސް ތެދަށްވެސް ވެދާނެއްނު؟ އެންމެ ފަހުން މީކާއިލު ބުނާ ގޮތަށް ކަންނޭނގެ ކަންތައް ކުރަން ޖެހޭނީ.’ ޔުން ހިތާހިތުން ކިޔަމުން ދިޔައެވެ.
ރޭގަނޑު ފާއިތުވެ އާ ދުވަހަކަށް އިރު ފެނުން ތޮޅިލައިފިއެވެ. ހެނދުނުން ފެށިގެން ހަވީރު ވާންދެން ހުރިހާ ކުދިންވެސް އުޅުނީ ކޮލެޖުގައި ކިޔެވުމުގެ ހަރަކާތްތަކުގައެވެ. މީކާއިލު އުޅުނީ ކިޔަވައި ދިނުމާއި، ކިޔަވައިދިނުމަށް ތައްޔާރުވުމަށެވެ.
“އުނ” ޔުން މީކާއިލިގެ ކާރުގައި އިށީނދެފައި އޭނަގެ އަތަށް ފައިލެއް ދިނެވެ.
“މިއީ ކޯއްޗެއް؟” މީކާއިލު ފައިލު ހިފާ ހުޅުވަމުން ސުވާލު ކުރިއެވެ.
“މިއީ މުއާހަދާ ކުރުމެއް. މީގެން އެކަތި ނަގާ!” ޔުން ފައިލުގައިވާ ގަނޑަށް އިޝާރާތް ކުރަމުން ބުންޏެވެ. “ތިއީ ވިޔަފާރިވެރިއެއްނު؟ އެހެންވީމާ ކޮންމެ ވިޔަފާރިއެއްގައިވެސް ސިޓީއެއް ނޫނީ މުއާހަދާ ކުރުމެއް ބޭނުންވާނެ. މިޘާލަކަށް އަހަރުމެންގެ ކައިވެނި.”
~މުއާހަދާ ކަރުދާސް~
“ކައިވެނީގެ އެއްބަސްވުން. މުހައްމަދު މީކާއިލު އަދި އާއިޝަތު ޔުން ތިރީގައިވާ ނުކުތާތަކަށް އެއްބަސްވަމުއެވެ.
1. ޔުން ދަސްވެނިވެންދެން ކައިވެނީގެ ސިއްރު ހިފެހެއްޓެން ވާނެ!
2. ކޮލެޖުގައި އުޅޭ ވަގުތު ގުޅުން ބާއްވަން ވާނީ ދާރިސް އަދި ކިޔަވާ ކުއްޖެއްގެ ހައިސިއްޔަތުން.
3. އެ މީހެއްގެ ދިރިއުޅުން ކުރިއަށް ގެންދަވީ. އެކަމަކު، އެކަކު އަނެކަކުގެ ޒާތީ ކަންކަމާ ބެހެވިގެން ނުވާނެ.
4. ދެ މީހުން އުޅެން ޖެހޭނީ އާއިލާ ކުރިމަތީގައި ލޯބިވެރިން ގޮތުގައި އުޅެން. އެކަމު ކޮންމެހެން މަޖުބޫރެއް ނޫން.
5. ހަމައެކަނި އާއިލީ މީހުންގެ ކުރިމަތީ އެކަނި ލޯބިން އުޅޭކަން ދައްކަން ޖެހޭނީ. އެހެން ތާކު ލޯބިވެރިންހެން އުޅޭކަށް ނުޖެހޭނެ.
6. ޔުންގެ ކަފަ ނިޔާވުމުން މި ކައިވެނި ނިމުމަކަށް އަންނާނެ.
“މިއީ އަހަރެމެން ދެ މީހުންވެސް ގެއްލުންތަކުން ސަލާމަތް ކޮށްދޭނެ ލިޔުމެއް. ކިޔާފައި ހިނގާ މަޝްވަރާކުރަން؟” ޔުން އަޅާފައިވާ ކަޅު ކުލައިގެ ނިތްކުރީ ތޮފި ބޮލަށް ހަމަޖައްސާލިއެވެ.
“ހޫމމ، މިއީ ކައިވެނި އެއްބަސްވުމެއް ދޯ؟” މީކާއިލު ގަނޑުގައިވާ ލިޔުންތަކަށް ބަލައިލުމަށްފަހު ބުންޏެވެ. “ފުރަތަމަ ނުކުތާގައި ލިޔެފައި އޮތް، ‘ކައިވެނީގެ ސިއްރު ހިފެހެއްޓުމަށް’ވުރެ ކައިވެނީގެ ގުޅުން ސިއްރުކުރުން ޖެހިއްޔާ މާ ސާފުވާނެ.” އެހެން ބުނިހެން ޔުން އެބައި ރަނގަޅުކުރިއެވެ. “އަހަރުންގެ މައްްސަލައެއް ނެތް ފުރަތަމަ ނުކުތާއަކަށް. އެކަމު، ކަލޭ ރައްޓެއްސެއް ގާތު ބުނާނަމަ އަހަރުންވެސް އެންމެ ގާތް މިރުސާލު ކައިރީ ބުނާނަން.” މީޚާއިލު ޔުންއާ ދިމާއަށް އެނބުރެމުން ބުންޏެވެ.
‘އެހެންވީމާ، މީކާއިލު ރައްޓެހިންވެސް ހުރޭދޯ؟’ އަމިއްލަ ހިތާހިތުން މީކާއިލު ސުވާލުކޮށްލިއެވެ.
“ދެން އޮތް ނުކުތާވެސް. ގަބޫލުކޮށްފިން. އެއީ އަހަންނަށްވެސް ސުލޫކީގޮތުން ރަނގަޅަށް އުޅެވޭނެ.” މީކާއިލު ޔުންއަށް ބަލައިލަމުން ބުންޏެވެ. “މި ނުކުތާ އޮވެފައި އިއްޔެ…” އެ ހިސާބަށް އަޑު އިވުނުހެން ޔުން މީކާއިލުގެ ތުންފަތްމަތީގައި އަތް އެޅިއެވެ.
“ހޫނ. ހޫނ. ހޫނ. މަށަށް އިނގެއޭ! އިއްޔެ އަހަރުން އުޅުނީތީ މާފުކުރޭ!” ޔުން މީކާއިލުގެ ތުންފަތުން އަތް ނައްޓާލަމުން ބުންޏެވެ.
“އާނ، ތިންވަނަ ނުކުތާ… އެ މީހެއްގެ އަމިއްލަ ދިރިއުޅުން…” މީކާއިލު ބުންޏެވެ.
“އެ ނުކުތާ ހިމެނީ، އާންމުކޮށް ކައިވެނިކޮށްފިނަމަ ދެ މީހުންގެ އުޅުންވެސް އެކުވާނެތީވެ. އެކަމު އަހަރެމެން ދެ މީހުން އަސްލު މި ކުރެވެނީ ކައިވެންޏެއް ނޫނެއްނު؟ އެހެންވީމާ އަހަރުންގެ ހަޔާތާމެދު ކަލޭ ވިސްނާކަށް ނުޖެހޭނެއްނު؟” ޔުން ތިންވަނަ ނުކުތާގައިވާ އެއްޗެއް ތަފުސީލުކޮށްދެމުން ދިޔައެވެ.
“އާނ. އޭރަށް ދޯ ސަޔާނުއާއެކު ރައްޓެހިވެގެން އުޅެވޭނީ؟!” މީކާއިލު އިސްދަށަށް ޖަހަމުން މަލާމާތުގެ ރާގަކަށް ބުންޏެވެ.
“އޫނ. ދެން ކަލޭ ނިންމާ ގޮތެއް…” ޔުން ހިތްހަމަނުޖެހި ލޯ މަރާލަމުން ބުންޏެވެ.
“ހަތަރުވަނަ ނުކުތާއަށް އަހަރެން ދެބަސްވަން. އެއީ އަހަރެމެން އާއިލާގެ އިތުބާރު ހޯދަނީ ކިހިނެތް؟” މީކާއިލު ޔުންއަށް ލޯ އަޅާލަމުން ބުންޏެވެ.
“އެކަމު، އަބަދަކު އެހެންނެއް ނޫޅެވޭނެއްނު؟ ހަމަ ކުއްލިއަކަށް އައިސް އަހަރެންގެ ގައިގައި ބައްދައިނުގަންނާތި ކުރިން ދުވަހު ހެދިފަދައިން. އެކަހަލަ ހަރަކާތެއް ގެންނަނަމަ ކުރިން ބުނަންވާނެ!” ޔުން މީކާއިލުއާ ދިމާއަށް އެނބުރި އިނދެ ބުންޏެވެ. ދެމީހުންގެ ވާހަކައިން މުޅި ކާރުތެރެވެސް ހީވަނީ ހޫނުވާހެންނެވެ.
“ބައެއްފަހަރު ކުއްލިއަކަށްވެސް ޖެހިދާނެ ނުބުނެވެސް ހަރަކާތެއް ގެންނަން.” މީކާއިލު ބުންޏެވެ.
ޔުން މީކާއިލު އަތުގައިވާ ގަނޑު އަތުލުމަށްފަހު، ބުންޏެވެ. “އެކަމު އަހަރެމެން ދެމީހުންގެ އާއިލާއާ އަބަދަކު ބައްދަލެއް ނުވާނެއެއްނު؟ އެހެންވީމާ ކުރިއަށް ރޭވޭނެއްނު؟” ޔުން ޚިޔާލު ދިނެވެ.
“އާނ. އަދި އަހަންނަށް ނުބުނެވޭ ކަންނޭނގެ…” މީކާއިލު ޔުންގެ މުށިކުލައިގެ ދެލޮލަށް ބަލަމުން ބުންޏެވެ. “އަހަރެމެން ކައިވެނި ކުރެވޭ ފަހުން އަހަރެންގެ މަންމަ ބޭނުންވަނީ އަހަރެމެން ދެ މީހުންވެސް އެއްގެއެއްގައި އުޅުމަށް. އެއީ ޔުން ޔުނިވަރުސިޓީ ނިމެންދެން. އެއީ ކައިވެނި ކުރާނަމަ މަންމަގެ ޝަރުތެކޯ!” މީކާއިލު އަދިވެސް ޔުންގެ މޫނާ ދިމާއަށް ބަލަން އިނެވެ.
“ކީއްވެ މިހާރު ތިހެން ތި ބުނީ!! ތަންކޮޅެއް ކުރިން ބުނިނަމަ؟” ޔުންއަށް ހީވީ މޫނުމައްޗަށް ފިނިފެން އެއްޗެއް އަޅާލިހެންނެވެ.
“އަހަރެން ބުނިން ދޯ ކުރިން… އެހެންވެ ނުކުތާ ހަތަރެއް އަދި ފަހެއް ބާތިލު ކުރަން ޖެހެނީ.” މީކާއިލު ގަނޑަށް ނަޒަރު ހިންގަމުން ބުންޏެވެ.
“އެހެން ވިއްޔާ….. އަހަރެން….” ޔުންއަށް ގަބޫލު ނުކުރެވިގެން އުޅުނެވެ.
“ނުކުތާ ހައެއް… ހޫނ. ކާފަ ނިޔާވުން ދޯ… އޭގެފަހުން މި ކައިވެނިން ކަލެއަށް ފައިދާއެއް ނުކުރާތީވެ އެހެން އެއޮތީ…” މީކާއިލު އަމިއްލައަށް ކިޔަމުން ދޭހަކުރަމުން ދިޔައެވެ.
“އޭނ؟ އެކީއްވެ ނުކުތާ ފަހެއް ބާތިލުކުރަންވީ؟” ޔުން ސުވާލުވެރި މޫނަކާއެކު އިސް ހިއްލާލިއެވެ.
“އަހަންނަށް ހީވަނީ އެއީ ބޭކާރު ނުކުތާއެއްހެން.” މީކާއިލު އެހެން ބުނަމުން ޔުންއާ ގާތްވަމުން ދިޔައެވެ. “ކަލެއަށް ކީތްކޮށްފާނެތީވެތަ އެހާ ބިރުން ތި އުޅެނީ؟” މީކާއިލުގެ ނޭވާ ޔުންގެ މޫނުގައި އެޅޭވަރުވާވަރުގައި ހުއްޓިގެން ހުއްޓެވެ. ކާރެއްކަމުން ޔުންއަށް އިތުރަށް ހާސްކަން ވެރިވިއެވެ. “ކަލޭ އަނެއްކާ ބިރުން ތިއުޅެނީ ކަލޭގެ އިހުސާސްތައް ބަންޑުންވެދާނެތީތަ؟” މީކާއިލު މައްލަވަކުރާ ރާގަކަށް ސުވާލުކޮށްލިއެވެ. “އެކަމު އެއީ ކައިވެނިކުރާ މީހުންނަށް އާދައިގެ ކަމެއް ނޫންތަ؟” މީކާއިލު ކުރަމުން ދިޔަ ސުވާލުތަކުން ޔުންގެ ހިތް ނުބައިވާން ފެށިއެވެ. އޭނާއަށް ސިފަވާންފެށީ އެހެން މަންޒަރެކެވެ. “މިހާރު ކޯއްޗެއް ތިޔަ ވިސްނަނީ ޔުން؟ މީކާއިލު އަދިވެސް މައްލަވަ ކުރަމުން ގެންދިޔައެވެ.
“އެއްވެސް އެއްޗެއް ނޫން.” ޔުންއަށް ދެންމެ ސިފަވި މަންޒަރުގެ ނުބައިކަމުން އަޑުގައި ތުރުތުރެއްވެއެވެ. “ހެޔޮ ކޮންމެ އެއްޗެކޭ ކިޔަސް ފަސްވަނަ ނުކުތާ ނުކަނޑާނަން. ހަތަރުވަނަ ނުކުތާ ބަދަލުކޮށްލާނީ…” ޔުން ގަލަމުން ކަނޑާލިއެވެ. އަދި ހަތަރުވަނަ ނުކުތާ އިސްލާހު ކުރިއެވެ. އެއަށްފަހު ޔުން މީކާއިލުއަށް ދެއްކިއެވެ.
“އެއް އެނދުގައި ނުނިދުން؟” މީކާއިލު ކިޔާލިއެވެ.
“ލައްބަ! ކުރިން މި ކައިވެނި އަހަރުމެން ބަލައިގަތީ ވިޔަފާރިއެއްގެ ގޮތުގައި. އެއްވެސް ޖަޒުބާތެއްނެތި ހަމައެކަނި މަގާމަށްޓަކައި. ދެން މިތަނުގައި ސޮއި ކުރޭ!” ޔުން ދެ ގަނޑުގައިވެސް މީކާއިލު ސޮއި ކުރަންޖެހޭ ތަން ދެއްކިއެވެ. މީކާއިލު އެއްވެސް އިތުރު ހާސަރުތަކެއް ނުދަމާ ސޮއިކޮށްލިއެވެ. “ސޮއިކޮށް ނިމުމުން، ކަލޭގެ ދެ ލޯ މަރާލާ.” ޔުން މަޑުން އިނދެފައި ކުއްލިއަކަށް ބުންޏެވެ.
“އެއީ ކީއްކުރަން؟” މީކާއިލު ސޮއެކޮށްފައިވާ ގަނޑު ހިފައިގެން ޔުންއާ ދިމާއަށް ބަލަމުން ބުންޏެވެ. މީކާއިލު ސިހިގެން ދިޔައީ ޔުން އައިސް ކުއްލިއަކަށް އޭނާގެ މޫނާ ގާތްވިކަމުންނެވެ. ނަމަވެސް ‘ތޮއް’ އަޑު ކިޔައިގެން ޔުން ލޯ ހުޅުވާ ބަލައިލިއެވެ. މީކާއިލު ‘އާހ’ އޭ ކިޔައި ހަޅޭއްލަވައިގަތެވެ. ދެން އޭނާއަށް އިނގުނީ އެއީ އޭނާ އަޅާފައިވާ ތޮފި މީކާއިލުގެ ދެބުމަ ދޭތެރޭގައި ޖެހުނުކަމެވެ.
“ކީއްވީ؟” ޔުން ސުވާލު ކުރިއެވެ. “އަނ އަހަރުން ހަނދަން ނެތުނީ… ތޮފި މަތިން… ތަދުވިތަ ވަރަށް ބޮޑަށް؟ ރަނގަޅު ދޯ؟” ޔުން އަވަސް އަވަހަށް ކިޔަމުން ދިޔައެވެ. “އަހަރުން ތައްޔާރުވާން މިއުޅުނީ ބޮސްދޭން ފަރިތަކުރުމަށް.” ޔުން ނިކަން މައުސޫމުކަމާއެކު ބުންޏެވެ. އޭރުވެސް މީކާއިލުގެ ދެބުމަ ދޭތެރެ ރަތްވެފައި ހުއްޓެވެ. ނަމަވެސް ޔުންގެ ތޮފި މަޑުމަޑުން ނެގުމަށްފަހު، މީކާއިލު ޔުންއާ ގާތްވަމުން ދިޔައެވެ. ޔުންގެ ދެ ލޮލަށް ބަލަމުން މީކާއިލު ގާތްވެ އޭނާގެ ތުންފަތް ޔުންގެ ތުންފަތަ ބައްދަލު ކުރުވިއެވެ. ދެ މީހުންވެސް ނޭވާ ހިފަހައްޓައިގެން ތިއްބެވެ. އެ ވަގުތުކޮޅުގައި ޔުންއަށް ވަގުތު ހުއްޓުނެ ފަދައެވެ.
“އާންމުކޮށް ބޮސްދޭނީ ފިރިމީހާއެއްނު؟” ޔުންގެ މޫނާ ދުރުވަމުން މީކާއިލު ބުންޏެވެ.
‘ކައިވެނި ދުވަސްވެސް ގާތްވަނީއޭ… އަދި އެއަށް ތައްޔާރުވުމަކީ ބޮޑު ވޭނަކީ.’ ޔުން ވިސްނަމުން ދިޔައެވެ. ފަރުމާއާއި ތަން ތައްޔާރުކުރުމަށް ބަޔަކު މީހުން އައްޔަން ކުރުމާއި، ކައިވެނި ކުރާ ދުވަހަށް ހާއްސަ ހެދުމާއި، ފޮޓޯ ނަގާނޭ މީހަކު ހޯދުމަކީ ލުއިން ކަންތައްތަކެއް ނޫނެވެ. ކޮލެޖުގެ ބޮޑެތި ފިލާވަޅުތައް ހަދަމުންވެސް ގަދަކަމުން ވަގުތު ހޯދައިގެން ޔުން އެ ކަންތައްތައް ކުރެވޭތޯ ބަލައެވެ. އަދި އޭނާގެ ބޮޑުދައިތަމެންނާއި، ކައިވެނީގެ ކަންތަކާ ބެހޭގޮތުން ސުވާލުކޮށް ހަދައެވެ. ހަމަ އެގަޑީގައި ކޮޓަރިއަށް ގަންނަން އުޅުނު ސޯފާގެ މަތިން ހަނދާންވެ އެކަން ކުރުމަށް އަވަސްވެގަތެވެ. ‘ކީއްވެތަ ކައިވެނިކުރުން އެހާ އުނދަގުލީ؟’
އެކި ފިހާރަތަކަށް ދިޔައިރު ޔުންއާއެކު އުޅުނީ ޔުސްރާއެވެ. ޔުސްރާގެވެސް ބޮޑު އެހީތެރިކަމާއެކު އެނދާއި، ތަށިފަދަ ތަކެތި ގަތެވެ. އަދި ކައިވެނި ކުރާ ދުވަހުގެ ހެދުން ލުމަށްވެސް ދިޔައެވެ.
‘މިއީ އަސްލު ކައިވެންޏެއްކަމުގައި ނުވިޔަސް، މި ހުރިހާ ކަމަކުންވެސް އަހަންނަށް ދޭހަވަނީ، ކައިވެންޏަކީ ދެ މީހުންނަށްވެސް ލިބޭ ފައިދާއެއްކަމެވެ. އެކަމުވެސް… މިއީ އަސްލު ކައިވެންޏެއް ނޫން…’ ޔުން އަމިއްލައަށް ވިސްނުމަށް ދިޔައެވެ.
އަހަރުގެ މޭ މަހު ޖިއޯޖޭ ރަށުގައި…
‘މި ކައިވެނި މިއީ އަސްލެއްކަމުގައި ވާނަމަ، އަހަރެންގެ ކިބައިގައި އެއްވެސް އުފާވެރިކަމެއް ނެތީ ކީއްވެބާ؟ އެހާ ހުސްހެން ހީވަނީ ކީއްވެ؟’ އަދިވެސް ނަފުސަށް ކުދި ކިޔަމުން ގެންދިޔަ، ޔުން އަމިއްލަ ހިތަށް އެ ސުވާލު އެރުވިއެވެ. އޭނާ ހުރީ ބޮޑު ފޮށިގަނޑެއް ހިފައިގެން ތަން ތައްޔާރު ކުރުމަށެވެ. އޭނާގެ ވަށައިގެން އެހެން މީހުން އެކި މަސައްކަތުގައި މަޝްޣޫލުވެ އުޅުނެވެ.
“ޔުން؟ ކީއް ތިޔަ ކުރަނީ؟” ޔުންގެ ބޮޑުދައިތަ ސީމާ ސުވާލު ކުރިއެވެ.
“ކުޑަކޮށް އެހީވަނީ ތައްޔާރު ކުރުމަށް.” ޔުން ޖަވާބުގައި ބުންޏެވެ.
“ނޫނޭ ނޫނޭ، މާދަން ޔުން ތިއުޅެނީ ކައިވެނި ކުރާކަށްނު؟ އެހެންވީމާ ބުރަ މަސައްކަތް ނުކުރޭ!” ސީމާ ބުނަމުން ދިޔައެވެ. “އެއެއް ނޫން. ކޮބާ މީކާއިލު؟ ބޮޑުދައިތަ ހީކުރީ ދެދަރިން އެކުގައިކަމަށް އަންނާނީ. އަދިވެސް އެކުއްޖާފުޅާ ބައްދަލު ނުވޭ. ވަރަށް ދެރަވޭ އަދި ބައްދަލު ނުވާތީވެ.” ސީމާ އޭނާގެ ޚިޔާލު ފާޅުކުރަމުން ދިޔައެވެ. “އަޅެ، އިއްޔެ މި ރަށަށް އައިނަމަ؟”
ފަހަތުން ޔުންއަށް އިވުނީ އޭނާ ދަންނަ އަޑެކެވެ. ފަހަތަށް ނަޒަރު ހިންގާލިއެވެ. މީކާއިލު ހުރިތަން ފެނުނެވެ. މީކާއިލުގެ މޫނަށްވަނީ އުފާވެރި ހިނިތުންވުމެއް ވެރިވެފައެވެ. އޭނާ ހުރީ ދާގީ ފޮށްޓެއްވެސް އަތުއަޅުވައިގެންނެވެ.
(ނުނިމޭ)
Other Articles
ފަނާ (1 ވަނަ ބައި)
