ކޮލެޖުގެ ބޮޑު ގޯތިތެރޭގައި ހުރި ބެންޗެއްގައި އަފްލާޒް އާއި ޔަޝްމީ އިށީނދެލައިގެން ތިއްބެވެ. އެމީހުންގެ ވަށައިގެން ފިނިރޯޅިއެއް އެނބުރެމުންދިޔައިރު، ދެމީހުންގެ ދެމެދުގައި ވަނީ ބަރު ހަމަހިމޭންކަމެކެވެ. އަފްލާޒް އޭނާގެ ދެއަތް ދެއަތާ ޖައްސާލައިގެން އިނދެ، ހިތްވަރު އެއްކުރަމުން ދިޔައެވެ. މިއީ އޭނާގެ ހަޔާތުގައި ލިބުނު އެންމެ ފަހު ފުރުސަތު ކަމުގައި އޭނާގެ ހިތް ބުނަމުންދިޔައެވެ.
“ޔަޝްމީ…” އަފްލާޒް ޔަޝްމީގެ މޫނަށް ބަލައިލިއެވެ. “މިއަދު ހެނދުނު ޔައިޝް ދެއްކި ވާހަކަތަކުން ޔަޝްމީއަށް ވަރަށް އުނދަގޫވިކަން އަހަރެންނަށް އެނގޭ. އެކަމަކު… އަހަރެން މިތަނަށް މިއައީ ޔައިޝްގެ ދިފާއުގައި ވާހަކަދައްކާކަށް ނޫން.”
ޔަޝްމީ ކުޑަކޮށް ސިހިފައި އަފްލާޒްއަށް ބަލައިލިއެވެ. “އެހެންވީމާ ކޮން ވާހަކައެއް ދައްކަން؟”
“އަހަރެންގެ އަމިއްލަ ހިތުގެ ވާހަކަ،” އަފްލާޒް ފުން ނޭވާއެއްލިއެވެ. “ޔަޝްމީ އަހަރެން ފެނުމުން ދުރުވާ ކޮންމެ ފަހަރަކު އަހަރެންގެ ހިތަށް ކުރާ އަސަރު ބުނެދޭންވެސް ނޭނގޭ. އަހަރެން ޔަޝްމީ ދެކެ ލޯބިވާތާ ކިތަންމެ ދުވަހެއް. ޔައިޝް އެ ވާހަކަ ބުނި ވަގުތު އަހަރެންގެ ދުނިޔެ ހުއްޓުނު ފަދަ އެކަމަކު ޔަޝްމީ ދިން ޖަވާބުން އަހަރެންނަށް އުންމީދެއް ލިބުނީ. އަހަރެން ޔަޝްމީ ދެކެ ވަރަށް ލޯބިވޭ.”
ޔަޝްމީގެ ދެލޯ ބޮޑުވެގެންދިޔައެވެ. އޭނާގެ ހިތުގެ ތެޅުން އިންތިހާއަށް އަވަސްވިއެވެ. އޭނާ އުންމީދު ކުރި ފަދައިން، އަފްލާޒްގެ ހިތުގައިވެސް އޮތީ ހަމަ އެ އިހުސާސްތަކެވެ. “އަފްލާޒް… އަހަރެން ދުރުވަނީ ފޫހިވާތީއެއް ނޫން. އަފްލާޒް ކުރިމައްޗަށް އައުމުން ހާސްވާތީ،” ޔަޝްމީ އިސްދަށަށް ޖަހާލަމުން މަޑުމަޑުން ބުންޏެވެ. “އަހަރެންވެސް އަފްލާޒް ދެކެ ވަރަށް ލޯބިވޭ.”
އެ ދެޒުވާނުންގެ ހަތަރުކަޅި ހަމަވި ވަގުތު، ދުވަސްތަކެއްގެ އިންތިޒާރަށް ނިމުން އައިސް، އުފާވެރިކަމުގެ ކަރުނުން ދެލޯ ފުރުނެވެ.
ކޮލެޖުގެ ގޭޓުން ބޭރުގައި ހުރި ހިޔާގަނޑެއްގެ ދަށުގައި ޔައިޝް އެކަނިމާ އެކަނި އިނެވެ. އޭނާގެ ދެލޮލުން ފެންނަމުންދިޔައީ މާޔޫސްކަމާއި ނުތަނަވަސްކަމެވެ. އެއްކޮޅުން ޔަޝްމީގެ ފަރާތުން ލިބުނު ފުރަގަހެވެ. އަނެއްކޮޅުން އޭނާގެ ކުށެއްނެތް ލޯބިވެރިޔާ ލިޔުޝާގެ ހިތް ކުދިކުދި ކޮށްލެވުނު ކަމުގެ އިހުސާސެވެ.
އޭނާ ތަކުރާރުކޮށް ލިޔުޝާގެ ފޯނަށް ގުޅަމުންދިޔަ ނަމަވެސް، ލިޔުޝާ ހުރީ ފޯނު ނިއްވާލައިގެންނެވެ. ޔައިޝްއަށް އަމިއްލަ ނަފްސުދެކެ ފޫހިވެވުނެވެ. ވަގުތީ އޮޔަކާ ބެހިގެންގޮސް، އޭނާގެ ހަގީގީ އުފާވެރިކަން އަމިއްލަ އަތުން ދޫކޮށްލެވުނީތީއެވެ.
ލިޔުޝާގެ ގެއަށް ގޮސް އޭނާގެ ކޮޓަރީގައި ޝައިހާ އިނީ ލިޔުޝާއަށް ވިސްނައިދޭށެވެ. ލިޔުޝާ އިނީ ރޮއެރޮއެ ދެލޯ ދުޅަވެފައެވެ.
“ލިޔޫ… ހިތްވަރުކޮށްބަލަ. އަހަރެން އެނގޭ ވަރަށް ދެރަވާނެކަން. އެކަމަކު ކަރުނަ އޮއްސުމަކުން މައްސަލައެއް ހައްލެއް ނުވާނެ،” ޝައިހާ ލިޔުޝާގެ ކޮނޑުގައި ބައްދާލަމުން ބުންޏެވެ.
އެވަގުތު ކޮޓަރީގެ ދޮރު ހުޅުވާލާފައި ޒައިން އެތެރެއަށް ވަނެވެ. ޒައިންގެ މޫނުމަތިން ފެންނަނީ ސީރިއަސްކަމެވެ. “ލިޔޫ، އަހަރެން މިހާރު ޔައިޝްއާ ވާހަކަދައްކައިފިން. އޭނާ ވަރަށް ދެރަވެފައި ހުރީ. އޭނާއަށް ކުރެވުނު ކުށް ވިސްނިއްޖެ. އަދި ޔަޝްމީވެސް ޔައިޝްގެ ހުށަހެޅުން ގަބޫލެއް ނުކުރޭ،” ޒައިން ބުންޏެވެ.
“އަހަރެންނަށް ވަރިހަމަ ޔަޝްމީ ގަބޫލުކުރިޔަސް ނުކުރިޔަސް!” ލިޔުޝާ ރުޅިއާއި ދެރަވުން އެއްކޮށްލަމުން ބުންޏެވެ. “ޔައިޝްގެ ހިތުގައި އެހެން ކުއްޖަކަށް ޖާގަދިނުމުން، އަހަރެމެންގެ މެދުގައި އޮތް އިތުބާރު އެއޮތީ ގެއްލިފައި. އަހަރެން ދެން ދުވަހަކުވެސް އޭނާއަށް އިތުބާރެއް ނުކުރާނަން.”
ޒައިން އާއި ޝައިހާ އެކަކު އަނެކަކަށް ބަލައިލިއެވެ. އެމީހުންގެ އެކުވެރިންގެ މި ގުޅުން ސަލާމަތްކުރަން އެމީހުން ވަރަށް ބޮޑަށް ބޭނުންވެއެވެ. “މާދަމާ ކޮލެޖުން އަހަރެމެން އެންމެން އެކުގައި ބައްދަލުކުރަންވާނެ. ޔައިޝްއަށް އޭނާގެ ބަސް ބުނަން ފުރުސަތެއް ދޭންޖެހޭނެ،” ޒައިން ނިންމިއެވެ.
ޖެހިގެން އައި ދުވަހުގެ ހެނދުނެވެ. ކޮލެޖުގެ މައި ހޯލުގެ ކަނެއްގައި ޒައިން، ޝައިހާ، އަދި ލިޔުޝާ ތިއްބެވެ. ޒައިން ބުނެގެން ޔައިޝްވެސް އެތަނަށް އައެވެ. ޔައިޝް ފެނުމާއެކު ލިޔުޝާ މޫނު އަނބުރާލިއެވެ.
ނަމަވެސް އެވަގުތު އެ ދިމާއަށް އައި އަފްލާޒް އާއި ޔަޝްމީ ފެނުމުން، އެތަނަށް ވެރިވީ އާދަޔާ ޚިލާފު ހަމަހިމޭންކަމެކެވެ. އަފްލާޒް އާއި ޔަޝްމީ ތިބީ އަތާއި އަތް ގުޅާލައިގެންނެވެ. އެ މަންޒަރު ފެނުމުން ޔައިޝްގެ ދެލޯ ބޮޑުވެގެންދިޔައެވެ.
އަފްލާޒް އާއި ޔަޝްމީ އަތާއި އަތް ގުޅާލައިގެން ހޯލަށް ވަދެގެން އައި މަންޒަރު ފެނުމުން، ޔައިޝްގެ ދެލޯ ބޮޑުވެ، މުޅި މީހާ ގަނޑުވި ފަދަ އިހުސާސެއް ކުރެވުނެވެ. އޭނާގެ އެންމެ ގާތް އެކުވެރިޔާ، އޭނާ ހިތްކީ ކުއްޖާގެ އަތުގައި ހިފައިގެން ހުރިއިރު، އެ ދެމީހުންގެ މޫނުމަތިން ފެންނަމުންދިޔައީ އެކަކު އަނެކަކަށްޓަކައިވާ ފުން ލޯތްބެވެ.
“އަފްލާޒް… މިއީ… މިއީ ކޮންކަމެއް؟” ޔައިޝްއަށް އަހައިލެވުނެވެ. އޭނާގެ އަޑުގައިވަނީ ހައިރާންކަމާއި ކުޑަ ހިތްހަމަނުޖެހުމެކެވެ.
އަފްލާޒް ޔަޝްމީގެ އަތަށް ބާރުކޮށްލަމުން ޔައިޝްގެ ކުރިމައްޗަށް ހުއްޓުނެވެ. “ޔައިޝް، އަހަރެން މިއަދު މި ހަގީގަތް ހާމަކުރަން މިޖެހުނީ އަހަރެންގެ އެކުވެރިކަމަށްވުރެ އްހަރެންގެ ލޯބި ވަރުގަދަވީމަ. އަހަރެން ޔަޝްމީ ދެކެ ލޯބިވާތާ ކިތަންމެ ދުވަހެއް. ނަމަވެސް އެކުވެރިކަން ގެއްލިދާނެތީ ކުރިން ނުބުނީ. ޔަޝްމީގެ ހިތްވެސް އޮތީ އަހަރެންނަށް. އަހަރެން އުންމީދުކުރަން އެކުވެރިއެއްގެ ގޮތުން ޔައިޝް އަހަރެމެންނަށް މަރުހަބާ ކިޔާނެކަމަށް.”
ޔައިޝް އިސްދަށަށް ޖެހިއެވެ. އޭނާގެ ހިތުގައި ހަސަދަވެރިކަމެއް އުފެދުނު ނަމަވެސް، އޭނާއަށް ވިސްނުނީ އަމިއްލަ ކުށެވެ. އޭނާ ލިޔުޝާއަށް ބަލައިލިއެވެ. ލިޔުޝާ ހުރީ އެ މަންޒަރު ބަލަން މަލާމާތުގެ ހިނިތުންވުމަކާއެކުގައެވެ. “މިހާރު އެނގިއްޖެ ދޯ ކަލޭ ކުރި މޮޔަކަން؟” ލިޔުޝާ ހިތާހިތުން ބުންޏެވެ.
ޒައިން އާއި ޝައިހާ މި ހުރިހާ މަންޒަރެއް ބަލަން ތިބީ ނޭވާ ހިފަހައްޓާލައިގެންނެވެ. މާހައުލުގެ ނުތަނަވަސްކަން ކަނޑުވާލުމަށް ޒައިން ވާހަކަދެއްކިއެވެ. “ޔައިޝް، އަށް މިހާރު ވިސްނޭނެ ކަންތައް ވީގޮތް. ޔައިޝްގެ ހިތް އެނބުރުނީ ކުށްހީއަކަށް. ޔައިޝްގެ ހަގީގީ ލޯބި ހުރީ ޔައިޝްގެ ކުރިމަތީގައި.”
ޔައިޝް މަޑުމަޑުން ލިޔުޝާގެ ކައިރިއަށް ޖެހިލިއެވެ. “ލިޔޫ… އަހަރެންނަށް މާފުކުރޭ. އަހަރެންނަށް ކުރެވުނީ ކިހާ ބޮޑު ކުށެއްކަން މިހާރު ވިސްނިއްޖެ. އަހަރެން ބޭނުމީ އަނބުރާ ލިޔޫގެ ލޯބި. އަހަރެމެންނަށް އަލުން ފެށިދާނެތަ؟” ޔައިޝްގެ ދެލޮލުން ކަރުނަ ފާޅުވަމުންދިޔައެވެ.
ލިޔުޝާ ފުން ނޭވާއެއްލިއެވެ. އޭނާގެ ހިތުގައި ޔައިޝްއަށްޓަކައި އަދިވެސް ލޯބިވީ ނަމަވެސް، ލިބުނު ހާނިއްކަ މާ ބޮޑެވެ. “ޔައިޝް، މާފުކުރުމަކީ ފަސޭހަކަމެއް. އެކަމަކު އަލުން އިތުބާރު ކުރުމަކީ އުނދަގޫ ކަމެއް. އަހަރެން ޔައިޝްއަށް މާފުކޮށްފިން. އެކަމަކު އަހަރެމެންގެ ލޯބީގެ ގުޅުން ދެން ކުރިއަކަށް ނުގެންދެވޭނެ. އަހަރެން ބޭނުމީ ވަގުތު. އަހަރެމެން މިހާރު ހަމައެކަނި ކޮލެޖުގެ ކްލާސްމޭޓުންނަށް ވަމާ،” ލިޔުޝާ ހަރުދަނާކަމާއެކު ބުންޏެވެ. އޭނާގެ އެ ނިންމުމުން ޔައިޝްގެ ހިތް އެއްކޮށް ކުދިކުދިވެގެންދިޔައެވެ.
ކޮލެޖު ނިމިގެން ޒައިން އާއި ޝައިހާ ދިޔައީ އެމީހުން އާދައިގެމަތިންދާ ކެފޭއަށެވެ. އެކުވެރިންގެ މެދުގައި ހިނގާދިޔަ ކަންތައްތަކުން ޝައިހާ އިނީ ވަރަށް ބޮޑަށް ބިރުގަނެފައެވެ.
“ޒައިން… އަހަރެން ވަރަށް ބިރުގަނޭ،” ޝައިހާ އޭނާގެ ކޮފީ ތަށީގައި ހިފަހައްޓާލަމުން ބުންޏެވެ. “ޔައިޝް އާއި ލިޔޫ އެހާ ލޯބިން އުޅެފައިވެސް އެހާ އަވަހަށް ވަކިވެދާނެއޭ އަހަރެން ހިޔެއް ނުކުރަން. ޒައިންވެސް ދުވަހަކުވެސް އަހަރެން ދޫކޮށްލާފައި އެހެން ކުއްޖެއްގެ ފަހަތުން ގޮއްސިއްޔާ އަހަރެން މަރުވެދާނެ.”
ޒައިން ޝައިހާގެ އަތުގައި ބާރަށް ހިފާލިއެވެ. “ޝައި، ތިއީ ކޮންކަހަލަ ވާހަކައެއް؟ އަހަރެންގެ ހިތުގައި ޝައި ފިޔވައި އެހެން އެއްވެސް ކުއްޖަކަށް ޖާގައެއް ނެތް. އަހަރެމެންގެ ލޯބި ތިޔަށްވުރެ މާ ވަރުގަދަވާނެ. ބޭކާރު ކަންކަމާ ހާސްނުވޭ.” ޒައިން ޝައިހާއަށް ޔަގީންކަން ދިނެވެ. ނަމަވެސް، ޒައިންގެ ހިތުގައިވެސް ނޭނގޭ ބިރުވެރިކަމެއް އުފެދުނެވެ. ހަޔާތަކީ ކޮންމެ ފަދަ ބަދަލެއްވެސް އަތުވެދާނެ އެއްޗެކެވެ.
އެރޭ އަފްލާޒް އާއި ޔަޝްމީ ތިބީ ފޯނުން ވާހަކަދައްކާށެވެ. އެމީހުންގެ ލޯބީގެ ފެށުން ވަރަށް އުފާވެރިއެވެ. “ޔަޝް، މާދަމާ ކޮލެޖަށް ދާއިރު އަހަރެން ޔަޝް ބަލާ ދާނަން،” އަފްލާޒް ބުންޏެވެ. ޔަޝްމީ ލަދުން އިނދެ “އާނ” އޭ ބުންޏެވެ.
އަފްލާޒް ފޯނު ބޭއްވިތާ ފަސް މިނެޓް ނުވަނީސް އޭނާގެ ފޯނަށް ނުދަންނަ ނަންބަރަކުން ކޯލެއް އައެވެ. އޭނާ ފޯނު ނަގާ ކަންފަތުގައި ޖައްސާލިއެވެ.
“ހެލޯ، އަފްލާޒްތާ؟” އެކޮޅުން އިވުނީ ބަރު ފިރިހެން އަޑެކެވެ.
“އާނ، މިއީ އަފްލާޒް. ތީ ކޮންބޭފުޅެއް؟”
“އަހަރެން މިއީ ޔަޝްމީގެ ބޭބެ. އަހަރެން ބޭނުންވަނީ މާދަމާ ހެނދުނު ކޮލެޖަށް ދިއުމުގެ ކުރިން އަފްލާޒްއާ ބައްދަލުކުރަން. ޔަޝްމީއަށް ނޭނގޭ ގޮތަށް. ވަރަށް މުހިންމު ވާހަކައެއް އެބައޮތް،” އެމީހާ ބުންޏެވެ. އެ އަޑުގައި ހުރި ސީރިއަސްކަމުން އަފްލާޒްގެ ހިތް ތެޅިގަތެވެ.
ނުނިމޭ!
މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.
Other Articles
މަލާމާތް ލޯބި – 9
މާތް ޤުރުބާން
