ހިތުގެ މަގުތައް-1

ވިލާތަކުން އުޑުމަތި ބައްދާލާފައި އޮތް ހަވީރެކެވެ. ކޮލެޖުގެ ބޮޑު ގޯތިތެރޭގައި ދަރިވަރުންގެ ހަލަބޮލިކަން ވަނީ ބޮޑުވެފައެވެ. ކްލާސްތައް ނިމިގެން ބައެއް ކުދިން ގެއަށް ދާން ހިނގައިގަތްއިރު، އަނެއް ބަޔަކު ގަސްތަކުގެ ހިޔަލުގައި ތިބެ ސަކަރާތް ޖަހަމުންދިޔައެވެ. މިއީ މާލޭގެ އެންމެ ބޮޑު އެއް ކޮލެޖުގައި އާދައިގެ މަތިން ފެންނަ މަންޒަރެކެވެ. ނަމަވެސް އެ މާހައުލުގެ ތެރޭގައި ތިބި ހަ ޒުވާނެއްގެ ހަޔާތް ވަނީ އެކަކު އަނެކަކާ ނޭނގޭ ގޮތްގޮތަށް ގުޅިލާމެހިފައެވެ.

ގޯތިތެރޭގައި ހުރި ބޮޑު މާގަހެއްގެ ދަށުގައި ހުރި ބެންޗެއްގައި އަފްލާޒް އިނީ ފޮތެއް ހުޅުވައިގެންނެވެ. އޭނާއަކީ އަބަދުވެސް މަޑުމައިތިރި، ކިޔެވުމަށް މޮޅު އަދި މީހުންނާ މާ ގިނައިން ވާހަކަނުދައްކާ ޒުވާނެކެވެ. ފޮތަށް ބަލަން އިން ނަމަވެސް، އޭނާގެ ހަގީގީ ސަމާލުކަން ހުރީ އެހެން ދިމާއަކަށެވެ. ކޮލެޖުގެ މައި ދޮރުން އެތެރެއަށް ވަދެގެން އައި ޔަޝްމީ އަށެވެ. ޔަޝްމީއަކީ ފެންނަ ކޮންމެ މީހެއްގެ ހިތް އަތުލާ ފަދަ ހިނިތުންވުމެއް ލިބިފައިވާ، ހިތްހެޔޮ އަންހެން ކުއްޖެކެވެ.

ޔަޝްމީ އޭނާގެ އެކުވެރިންނާ ވާހަކަދައްކަމުން ދިޔައިރު، އަފްލާޒްގެ ނަޒަރު އޭނާއަށް ހުއްޓިފައި ހުއްޓާ ކުއްލިއަކަށް ޔަޝްމީ އެދިމާއަށް ބަލައިލިއެވެ. ދެމީހުންގެ ހަތަރުކަޅި ހަމަވި ވަގުތު، އަފްލާޒްގެ ހިތުގެ ހިނގުން އަވަސްވެގެންދިޔައެވެ. އޭނާ މަޑުމަޑުން ހިނިތުންވެލިއެވެ. ނަމަވެސް ޔަޝްމީގެ މޫނުމަތިން ފެނުނީ ހާސްކަމެވެ. އޭނާ އަވަސްއަވަހަށް އިސްދަށަށް ޖަހާލުމަށްފަހު، ހިނގުން އަވަސްކޮށްލާފައި ކްލާސްތަކާ ދިމާއަށް މިސްރާބުޖެހިއެވެ. އަފްލާޒް ފުން ނޭވާއެއްލަމުން އޭނާ ދިޔަ ދިމާއަށް ބަލަން އިނެވެ. އޭނާގެ ހިތުގައި ރިހުމެއް އުފެދުނެވެ. “ޔަޝްމީ އަހަރެން ފެންނައިރަށް އެދަނީ ކީއްވެބާ؟ އަހަރެންގެ ފަރާތުން ކަމުނުދާ ކަމެއް ފެނުނީ ބާ؟ ނޫނީ އޭނާގެ ހިތުގައިވެސް އަހަރެންނާ މެދު ސިއްރު އިހުސާސްތަކެއް ވަނީބާ؟
” އަފްލާޒްގެ ހިތުގައި ސުވާލުތަކުގެ ތޫފާނެއް އުފެދުނެވެ. އެ ދެމީހުންގެ މެދުގައި ފާޅުނުކުރެވިފައިވާ ކޮންމެސް ސިއްރެއް ވާކަން ދެމީހުންނަށްވެސް އެނގެއެވެ.

އެވަގުތު ކޮލެޖުގެ ކެންޓީނުގެ އެންމެ އެތެރޭގައި ހުރި މޭޒެއްގެ ކައިރީގައި ޔައިޝް އާއި ލިޔުޝާ ތިއްބެވެ. އެމީހުންނަކީ ކޮލެޖަށް ވަންނަން އުޅުނު ދުވަސްވަރުއްސުރެ ރައްޓެހިވެގެން އުޅޭ ދެލޯބިވެރިންނެވެ. ލިޔުޝާ އިނީ ވަރަށް ފަރުވާތެރިކަމާއެކު ލެޕްޓޮޕުން އެމީހުންގެ ގްރޫޕް އެސައިންމަންޓް އިސްލާހުކުރާށެވެ. އޭނާ ވާހަކަދައްކަމުން ދިޔައިރު، ޔައިޝް އިނީ އޭނާގެ ފޯނަށް ބަލަހައްޓައިގެންނެވެ. އޭނާގެ މޫނުމަތިން ފެންނަމުންދިޔައީ ކޮންމެވެސް ބޮޑު ކަމަކާ ހާސްވެފައިވާ ކަމުގެ ނިޝާންތަކެވެ.

“ޔައިޝް! އަހަރެން މި ބުނި ބައި ރަނގަޅުތަ؟” ލިޔުޝާ އަހައިލިއެވެ. ނަމަވެސް ޔައިޝްގެ އެއްވެސް ޖަވާބެއް ނުލިބުނެވެ. ލިޔުޝާ އިސްއުފުލާ ބަލައިލިއިރު ޔައިޝް އިނީ ފޯނުގެ ސްކްރީނަށް ގެއްލިފައެވެ. “ޔައިޝް!” ލިޔުޝާ މިފަހަރު ކުޑަކޮށް އަޑުބާރުކޮށްލިއެވެ.

ޔައިޝް ސިހިފައި ފޯނު އަވަސްއަވަހަށް މޭޒުމަތީގައި ބާއްވާލިއެވެ. “އާނ… އާނ ލިޔޫ. ކީކޭ؟ އަޑުއަހަމޭއެބަ” ޔައިޝް ހާސްކަން ފޮރުވަން މަސައްކަތް ކުރިއެވެ.

ލިޔުޝާ ލެޕްޓޮޕް ލައްޕާލިއެވެ. އޭނާގެ ދެލޮލުން ދެރަވުމާއި ކަންބޮޑުވުން ފާޅުވަމުންދިޔައެވެ. “ޔައިޝް، މިހާރު ވަރަށް ބަދަލުވެއްޖެ. އަހަރެން ކައިރީގައި އިނަސް ހީވަނީ ތި އިންނަނީ އެހެން ދުނިޔެއެއްގައެއްހެން. ފޯނުވެސް އަބަދު ފޮރުވަނީ. ކޮންކަމެއް ސިއްރުކުރަނީ؟” ލިޔުޝާގެ ސުވާލުން ޔައިޝް އިސްދަށަށް ޖެހިއެވެ. ހަގީގަތަކީ ޔައިޝްގެ ހިތް މިހާރު ލިޔުޝާއަކަށް ސާފެއް ނޫނެވެ. އޭނާގެ ހިތުގައި އެހެން ސޫރައެއް ކުރެހެން ފަށައިފިއެވެ. ނަމަވެސް ލިޔުޝާގެ ކުށެއްނެތް ސާފު ލޯތްބަށް ހިޔަނި އަޅުވާލާނެ ހިތްވަރެއް އޭނާގެ ނެތެވެ. “ހަމަ ހީވާގޮތް ލިޔޫ… އެއްވެސް ކަމެއް ސިއްރެއް ނުކުރަން ސޮރީ،” ޔައިޝް އަނެއްކާވެސް ދޮގުހެދިއެވެ.

ކޮލެޖުގެ ބޮޑު ލައިބްރަރީން ނުކުމެގެން އައި ޒައިން އާއި ޝައިހާ ތިބީ ހެމުން ހެމުން ވާހަކަދައްކާށެވެ. ޒައިންއަކީ ކޮލެޖުގެ އެންމެ މަޖާ، އަދި އެންމެންނާވެސް ރައްޓެހި ޒުވާނެކެވެ. ޝައިހާއަކީ އޭނާގެ ހަޔާތުގެ ހުރިހާވެސް އުންމީދެކެވެ. އެ ދެމީހުންގެ ލޯތްބަކީ މުޅި ކޮލެޖަށްވެސް ނަމޫނާއެކެވެ.

“ޝައި، މިފަހަރުގެ ފައިނަލް އެގްޒޭމުން އަހަރެން އެންމެ މަތިން މާކްސް ހޯދައިފިއްޔާ ކޮން ސަޕްރައިޒެއް ދޭނީ؟” ޒައިން ލާނެތް ގޮތަކަށް އަހައިލިއެވެ.

ޝައިހާ އަތުގައި އޮތް ފޮތްބައި މޭގައި ޖައްސާލަމުން ހީލިއެވެ. “ޒައިން ފުރަތަމަ ފާސްވެބަލަ. އަބަދު ކުޅިވަރުގައި އުޅޭ މީހަކަށް އެގްޒޭމްގަ މަތިން މާކްސް ލިބޭނެތަ؟” ޝައިހާ ދިމާކޮށްލިއެވެ.

“މިފަހަރު ބަލަން ހުރޭ. ޝައިއަށްޓަކައި އަހަރެން ދުވާލަކު ވިހި ގަޑިއިރުވެސް ކިޔަވާފާނަން，” ޒައިން ޝައިހާގެ ދެލޮލަށް ބަލައިލީ ފުން ލޯތްބަކާއެކުގައެވެ. ޝައިހާގެ ކޮލަށް ރަތްކަން ވެރިވެގެންދިޔައެވެ. އެމީހުންގެ ދިރިއުޅުން މިވަގުތު ވަރަށް އުފާވެރިއެވެ. ނަމަވެސް އެމީހުންގެ ހަޔާތަށް އަންނަން އުޅޭ ބޮޑު ތޫފާނެއްގެ އެއްވެސް ރޭކާލުމެއް އެ ދެމީހުންނަކަށް ނެތެވެ.

އިރުއޮއްސި، ކޮލެޖުގެ ބޮޑު ބައްތިތައް ދިއްލެން ފެށިއެވެ. ކޮލެޖުގެ ގޭޓުން ބޭރަށް ނުކުންނަން ހިނގައިގަތް އަފްލާޒްގެ ފަހަތުން މީހަކު ދުވެފައި އައި އަޑު އިވުނެވެ. އޭނާ އެނބުރި ބަލައިލިއިރު، ކުރިމަތީގައި ހުރީ މާނޭވާލަމުންދިޔަ ޔައިޝްއެވެ. ޔައިޝްގެ މޫނުމަތިން ފެންނަމުންދިޔައީ އިންތިހާ ދަރަޖައިގެ ހާސްކަމެވެ.

“އަފްލާޒް… މަޑުކޮށްބަލަ. އަހަރެން ވަރަށް ބޮޑަށް ބިރުގަނޭއެބަ” ޔައިޝްގެ އަޑު ތުރުތުރުލަމުންދިޔައެވެ.

“ކިހިނެއްވީ ޔައިޝް؟” އަފްލާޒް ކަންބޮޑުވެފައި އަހައިލިއެވެ.

އަފްލާޒް… އަހަރެންނަށް ކުއްޖެއް ދެކެ ލޯބިވެވިއްޖެ. އެކަމަކު އެއީ ލިޔުޝާއެއް ނޫން. އަހަރެންގެ ހިތް މިހާރު ހުއްޓިފައިވަނީ… ޔަޝްމީއަށް!”

ޔައިޝްގެ އެ ބަސްތައް އިވުމާއެކު އަފްލާޒްގެ ގަބޫލުކުރަން ދަތިވެ، މުޅި ދުނިޔެ އެނބުރިގަތް ފަދަ އިހުސާސެއް ކުރެވުނެވެ. ޔަޝްމީއަކީ އަފްލާޒް ފުރާނައިން ލޯބިވާ، އަދި ހިތުގައި ސިއްރުކޮށްގެން އުޅޭ ކުއްޖާއެވެ. އަދި ޔައިޝްއަކީ އޭނާގެ އެންމެ ގާތް އެކުވެރިޔާއެވެ.

ނުނިމޭ!
މިއީ އަޅުގަނޑު ގެ ފުރަތަމަ ދިގު ވާހަކަ ކަމުން ކުށް ހުރުން އެކަށީގެންވޭ ކިޔާލާފަ ރަނގަޅު ކޮށްލަން ޖެހޭ ކަންކަން ފަހަގަ ކޮށްލުން އެދެން ހުރިހާ ކިޔުންތެރިން އަށް ކަމުދާނެ ކަމަށް އުންމީދު ކުރަން! 🥰

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.