ހިތުގެ ސިއްރު

އޭރު އުޑުމަތި ވަނީ ހަވީރުގެ ރަންއަލިން ފުރާލާފައެވެ. އަތިރިމަތީގެ ހިމޭން މާހައުލުގައި، ރާޅުތައް ބޮސްދެމުންދިޔަ ހުދު ދޮންވެލިގަނޑުމަތީގައި ޒަޔާން އިނީ ވިސްނުމަކަށް ގެއްލިފައެވެ. އޭނާގެ އަތުގައި އޮތީ ކުޑަ ފޮތެކެވެ. އެ ފޮތުގެ ކޮންމެ ސަފުހާއެއްގައި ވަނީ އެންމެ ސޫރައެއްގެ ވާހަކައެވެ. އެއީ ރާޔާގެ ވާހަކައެވެ.

ރާޔާ އަކީ ޒަޔާންގެ ހިތުގެ ރާނީއެވެ. ނަމަވެސް، އެ ހަގީގަތް ރާޔާއަށް އެނގެނީއެއް ނޫނެވެ. ދެމީހުންނަކީ ކުޑައިރުއްސުރެ އެއް ފާޚާނާއަކުން ފެންވަރައި، އެއް މަގަކުން ހިނގާބިނގާވެ އުޅުނު ގާތް ދެ އެކުވެރިންނަށް ވުމުން، ހިތުގެ ޖަޒުބާތުތައް ހާމަކޮށްފިނަމަ އެ ރީތި އެކުވެރިކަން ގެއްލިދާނެތީ ޒަޔާން އަބަދުވެސް ހުންނަނީ ބިރުންނެވެ.

“މާ ބޮޑަކަށް ވިސްނަނީތަ؟” ކުއްލިއަކަށް އިވުނީ ރާޔާގެ ފޮނި އަޑެވެ.

ޒަޔާން ސިހިފައި ބަލައިލިއިރު، ރާޔާ އައިސް އޭނާގެ ގާތުގައި އިށީންނަނީއެވެ. އިރުގެ ރަން ދޯދިތައް ރާޔާގެ މޫނަށް އެޅިފައިވާއިރު، އޭނާ މާ ފުރިހަމައަށް ދައްކައެވެ.

“އޭނ.. ނޫން.. ހަމަ އިނީ،” ޒަޔާން އަވަސްއަވަހަށް އޭނާގެ އަތުގައި އޮތް ފޮތް ފޮރުވަން އުޅުނެވެ. ނަމަވެސް، ރާޔާގެ ތޫނު ދެލޮލަށް އެކަން ފާހަގަވިއެވެ.

“ތިއީ ކޮން ފޮތެއް؟ މަށަށް ދައްކަބަލަ!” ރާޔާ ހީލަމުން ޒަޔާންގެ އަތުން ފޮތް އަތުލަން އުޅުނެވެ.

ޖެހިލުންވެފައި ހުރެމެ، ޒަޔާން އެ ފޮތް ރާޔާގެ އަތަށް ދިނެވެ. މިއަދު ނޫނީ މާދަމާވެސް މި ސިއްރު ހާމަވާންޖެހޭނެއޭ އޭނާގެ ހިތް ބުންޏެވެ.

ރާޔާ ފޮތް ހުޅުވާލިއެވެ. އޭގައިވަނީ ޒަޔާންގެ އަމިއްލަ އަތުން ލިޔެފައިވާ ޅެންތަކާއި ކުރު ލިޔުންތަކެކެވެ. ކޮންމެ އިބާރާތަކުން ސިފަކޮށްދެނީ ރާޔާގެ ހިނިތުންވުމާއި، އޭނާގެ ދެލޮލުގެ ރީތިކަމެވެ. ފޮތުގެ ފަހު ސަފުހާގައި ބޮޑުކޮށް ލިޔެފައި އޮތެވެ: “މި ހިތުގެ ކޮންމެ ވިންދެއް ވަނީ ހަމައެކަނި ކޮލަށެވެ. ބުނަން ނުކެރުނަސް، އިންތިހާއަށް ލޯބިވަމެވެ.”

ރާޔާ ކިޔައި ނިންމާލުމަށްފަހު، ފޮތް ލައްޕާލިއެވެ. މުޅި މާހައުލަށް ހިމޭންކަން ވެރިވިއެވެ. ޒަޔާން އިސްދަށަށް ޖަހާލައިގެން އިނީ، ރާޔާ ރުޅިއަތުވެދާނެތީ ބިރުންނެވެ.

“ޒަޔާން…” ރާޔާ މަޑުމަޑުން ގޮވާލިއެވެ.

ޒަޔާން އިސްއުފުލާ ބަލައިލިއިރު، ރާޔާގެ ދެލޮލުން ކަރުނަ ހިލިފައި ހުއްޓެވެ. ނަމަވެސް އެ މޫނުމަތީގައިވަނީ އުފާވެރި ހިނިތުންވުމެކެވެ.

“މި ސިއްރު ހިތުގައި ހިފަހައްޓައިގެން ކިތައް ދުވަހު ހުރިން؟” ރާޔާ އަހާލިއެވެ. “މަޑުން ހުންނާތީ މަށަށް ނޭނގެނީއެއް ނޫން. އަހަރެންވެސް އިންތިޒާރު ކުރަމުން މިދައީ ޒަޔާން ތި ބަސް ބުނާނެ ދުވަހަކަށް.”

ޒަޔާނަށް ގަބޫލުކުރަންވެސް ދަތިވިއެވެ. އޭނާގެ ހިތުގެ ބުރަކަން ފިލައި، އުފާވެރިކަމުން ހިތް ފުރުނެވެ. ރާޅުތަކުގެ މިއުޒިކީ އަޑުގެ ތެރެއިން، ދެމީހުންގެ ހަތަރުކަޅި ހަމަވިއިރު، އެއީ އާ ފެށުމެއްގެ ފެށުމެވެ.

އެ އުފާވެރި ހަވީރަށްފަހު ދުވަސްތައް ފާއިތުވަމުން ދިޔައީ އާދަޔާ ހިލާފު އޮމާންކަމާއެކުގައެވެ. ޒަޔާނާއި ރާޔާގެ ގުޅުން އިތުރަށް ބަދަހިވެ، އެކަކު އަނެކަކަށް ހިތުގެ ހުރިހާ ޝުއޫރެއް ހިއްސާކުރަން ފެށިއެވެ. ނަމަވެސް، ކޮންމެ ރީތި ވާހަކައެއްގައިވެސް ކޮޅިގަނޑެއް އަންނާނެއެވެ. ޒަޔާންގެ ދިރިއުޅުމަށް އެ ކޮޅިގަނޑު އައީ އޭނާގެ ބައްޕަ، ސާލިހުގެ ފަރާތުންނެވެ.

ސާލިހަކީ ރަށުގެ ނުފޫޒުގަދަ، އަދި އެހާމެ ބަސްހުންގާ ވިޔަފާރިވެރިއެކެވެ. އޭނާ ބޭނުންވީ ޒަޔާން ރަށުން ބޭރަށް ކިޔަވަން ފޮނުވާށެވެ. އަދި އެއަށްވުރެ ބޮޑަށް، ސާލިހު ހުރީ އޭނާގެ ރަހުމަތްތެރިއެއްގެ ދަރިއަކާއި ޒަޔާން ކާވެނިކުރުވަން ނިންމައިގެންނެވެ.

އެއްދުވަހެއްގެ ރޭގަނޑު، ސާލިހު ޒަޔާން ބޮޑުކޮޓަރިއަށް ބޭާވިއެވެ.

“ޒަޔާން، މިއަންނަ މަހު ތިމާގެ ކަންތައްތައް ހަމަޖެހިއްޖެ. މާލެ ގޮސް، އެކޮޅުން ބޭރަށް ފުރަން ތައްޔާރުވޭ. އަދި އަހަރެން މިހާރު ވާނީ އާސިމްގެ ދަރިފުޅު ނީނާއާ ތިމާގެ ކާވެނީގެ ވާހަކަވެސް ދައްކާފައި،” ސާލިހުގެ އަޑުގައި ހުރީ ސީދާ އަމުރުވެރިކަމެވެ.

ޒަޔާންގެ ފައިދަށުން ބިންގަނޑު ދެކެފަދައެވެ. “ބައްޕާ… އަހަރެން ބޭނުމެއް ނޫން ނީނާއާ ކާވެނިކުރާކަށް. އަހަރެން އެހެން ކުއްޖަކުދެކެ ލޯބިވޭ،” ޒަޔާން ހިތްވަރުކޮށްފައި ބުންޏެވެ.

“ކޮން ކުއްޖެއް؟ އެ ރާޔާތަ؟” ސާލިހުގެ މޫނު ކަޅުވެގެން ދިޔައެވެ. “އެއީ އަހަރެމެންގެ ފެންވަރުގެ ކުއްޖެއް ނޫން. އަހަރެންގެ ނިންމުން ބަދަލެއް ނުވާނެ. މިއަންނަ ހަފުތާގައި ތިމާ ރަށުން ފުރަންވާނެ!”

މި ޚަބަރު ވެގެންދިޔައީ ރާޔާގެ ހިތް ކުދިކުދިކޮށްލި ކަމަކަށެވެ. އެރޭ އަތިރިމަތިން ދެމީހުން ބައްދަލުވިއިރު، ރާޔާއަށް ކަރުނައެއް ނުހިފޭއްޓުނެވެ.

“ޒަޔާން… އަހަރެން ދޫކޮށްލާފައި ނުދޭ. ބައްޕަގެ ބަހަށް ހެއްލިގެން އަހަރެން މަތިން ހަނދާން ނައްތާނުލައްޗޭ،” ރާޔާ ރޮމުން ޒަޔާންގެ އަތުގައި ހިފެހެއްޓިއެވެ.

ޒަޔާން ރާޔާގެ ކަރުނަތައް ފުހެލަދިނެވެ. “ރާޔާ، އަހަރެންގެ ހިތް ބަދަލެއް ނުވާނެ. ބައްޕަ ބޭނުންވިޔަސް އަހަރެންގެ ހަށިގަނޑު ގެންދެވިދާނެ، އެކަމަކު ހިތް އޮތީ ރާޔާއާއެކު. އަހަރެން އެނބުރި އަންނާނަން. އިންތިޒާރު ކުރާނަން ދޯ؟”

ރާޔާ ބޯޖަހާލިއެވެ. އެއީ ދެ ހިތުގެ ދެމެދުގައި ވެވުނު ވަރުގަދަ އަހުދެކެވެ.

ޖެހިގެން އައި ހަފުތާގައި ޒަޔާން ރަށުން ފުރިއެވެ. ފުރާ ދޯނި ނިކުމެގެން ދިޔައިރު، ފާލަންމަތީގައި ރޮއިރޮއި ހުރި ރާޔާ، ޒަޔާންގެ ލޮލުން އޮބާލަންދެން ބަލަން ހުއްޓެވެ.

ދުވަސްތައް ހަފުތާތަކަށް، އަދި ހަފުތާތައް މަސްތަކަށް ބަދަލުވަމުން ދިޔައެވެ. ޒަޔާން ހުރީ ރާއްޖޭއިން ބޭރުގައެވެ. ފެށުމުގައި ދެމީހުން ފޯނުންނާއި މެސެޖުން ވާހަކަދެއްކިއެވެ. ނަމަވެސް، މަސްތަކެއް ފަހުން ސާލިހަށް މިކަން އެނގިގެން ޒަޔާންގެ ފޯނާއި ހުރިހާ މުވާސަލާތީ ވަސީލަތްތަކެއް ކަނޑާލިއެވެ. ޒަޔާން ބަންދުވީއެވެ. އަމިއްލަ ބައްޕަގެ ހަރުކަށި ފާރަވެރިކަމުގެ ދަށުގައެވެ.

ރާއްޖޭގައި ހުރި ރާޔާއަށް ޒަޔާންގެ އެއްވެސް ޚަބަރެއް ނުލިބި ތިން އަހަރު ފާއިތުވެގެން ދިޔައެވެ. ރަށުތެރޭގައި އެކި ކަހަލަ ވާހަކަތައް ދެކެވެން ފެށިއެވެ. ޒަޔާން ބޭރުން ކުއްޖަކާ އިނދެގެން އުޅޭ ކަމަށާއި، އޭނާ ރާޔާ މަތިން ހަނދާން ނައްތާލި ކަމުގެ އަޑުތައް ގަދަވިއެވެ.

ރާޔާގެ މައިންބަފައިންވެސް އޭނާއަށް ބާރުއަޅަން ފެށިއެވެ. “ދަރިފުޅާ، ޒަޔާންގެ އިންތިޒާރުގައި ތިހެން ހުލިވަނީ ކީއްކުރަން؟ އޭނާގެ ބައްޕަ އެއީ ކޮންފަދަ ބޮޑު މީހެއް. ތި ދިރިއުޅުމައިގެން ކުރިއަށްދާން އުޅޭ،” ރާޔާގެ މަންމަ ހަމްދާ ދެރަވެފައި ބުނެއެވެ.

ނަމަވެސް، ރާޔާގެ ހިތް ބުންޏެވެ؛ ޒަޔާން ބަދަލެއް ނުވާނެއެވެ. އޭނާ އެނބުރި އަންނާނެއެވެ.

އެނބުރި އައުން

ހަތަރު އަހަރު ފަހެވެ. ރަށުގެ ފާލަމަށް ލެފި ބޮޑު ލޯންޗަކުން ފޭބި ޒަޔާން ފެނިފައި މުޅި ރަށަށް ސިހުންލިބުނެވެ. އޭނާގެ މޫނުމަތިން ކުރީގެ އެ ހިނިތުންވުމެއް ނެތެވެ. ހުރީ ހިތްވަރުގަދަ، ފިރިހެންވަންތަ ސިފައެއް ޖަހާފައެވެ. ކިޔެވުން ނިންމާލުމަށްފަހު، އޭނާ އެނބުރި އައީ އަމިއްލަ ފައިމައްޗަށް ތެދުވެގެންނެވެ. ބައްޕަގެ ވިޔަފާރިއަށް ބަރޯސާވުން އޭނާ ވަނީ ހުއްޓާލާފައެވެ.

ޒަޔާން ރަށަށް އައިސް އެންމެ ފުރަތަމަވެސް ހިނގައިގަތީ ރާޔާގެ ގެއާ ދިމާއަށެވެ. ހިތް ނުތަނަވަސްވެފައި ހުރެ، އޭނާ ރާޔާގެ ގޭގެ ދޮރުމައްޗަށް ހުއްޓުނެވެ. ދޮރު ހުޅުވާލީ ރާޔާގެ މަންމައެވެ.

“ޒަޔާން؟” ހަމްދާގެ ދެލޯ ބޮޑުވިއެވެ.

“މަންމާ… ރާޔާ ކޮބާ؟” ޒަޔާން އަވަސްއަވަހަށް އަހާލިއެވެ.

ހަމްދާގެ މޫނުމަތިން ފެނުނީ ހިތާމަވެރިކަމެވެ. “ޒަޔާން… ރާޔާގެ ކާވެނި މިއަދު ހަވީރު ކުރަން ވަނީ ނިންމާފަ. ރަށު ކަތީބުގެ ދަރިފުޅާ. އަހަރެމެންނަށް މާ ބޮޑަށް މަޖުބޫރުވީމާ…”

ޒަޔާންގެ ދުނިޔެ އެފުށް މިފުށަށް ޖެހުނު ފަދައެވެ. “ނޫން… އެހެންނެއް ނުވާނެ!” ޒަޔާން ދުވެފައި ދިޔައީ އެމީހުން ކުރިން ބައްދަލުކުރި އަތިރިމަތީގެ އެ ހިމޭން ދޮންވެލިގަނޑާ ދިމާއަށެވެ. އޭނާއަށް އެނގެއެވެ، ރާޔާ ހިތްދަތިވާ ވަގުތުތަކުގައި ދާނީ އެތަނަށެވެ.

އަތިރިމައްޗަށް ދެވުނުއިރު، ރަން އަލީގެ ތެރޭގައި ރާޔާ އިނީ ކަރުނަ ފޮހެލަ ފޮހެލައެވެ. އޭނާގެ ގާތުގައި ކާވެނީގެ ހެދުން އޮތެވެ.

“ރާޔާ!” ޒަޔާން ބާރަކަށް ގޮވާލިއެވެ.

ރާޔާ ސިހިފައި ފަސްއެނބުރި ބަލައިލިއެވެ. ކުރިމަތީގައި ހުރި ޒަޔާން ފެނިފައި، އެއީ ހުވަފެނެއް ކަމަށް އޭނާއަށް ހީވިއެވެ. ރާޔާ ތެދުވެގެން ދުވެފައި ގޮސް ޒަޔާންގެ ސާބިތު މޭގައި ބޯއަޅާލިއެވެ.

“ޒަޔާން… ކީއްވެ ތިހާ ލަސްވީ؟ މަށަށް މަޖުބޫރުކުރަނީ…” ރާޔާ އާދޭހާއެކު ބުންޏެވެ.

“އަހަރެން މިއައީ ރާޔާ ބަލާ. ދެން ދުވަހަކުވެސް ވަތްކެއް ނުވާނަން. ބައްޕަގެ ނުފޫޒެއް ދެން އަހަރެމެންގެ މައްޗަކަށް ނުހިނގާނެ،” ޒަޔާން ރާޔާގެ އަތުގައި ހިފާލިއެވެ.

ޒަޔާން ސީދާ ދިޔައީ އޭނާގެ ބައްޕަ ސާލިހުގެ ކުރިމައްޗަށެވެ. ރާޔާގެ އަތުގައި ހިފައިގެން ހުރެ، ސާބިތުކަމާއެކު ބުންޏެވެ: “ބައްޕާ، އަހަރެން ބައްޕަ ބުނި ހުރިހާ ކިޔެވުމެއް ނިންމައިފިން. އެކަމަކު އަހަރެންގެ ދިރިއުޅުމުގެ ބައިވެރިޔާ އިޚްތިޔާރުކުރާނީ އަހަރެން އަމިއްލައަށް. އަހަރެން އިންނާނީ ރާޔާއާ. ބައްޕަ ގަބޫލަސް، ނުގަބޫލަސް.”

ސާލިހު ޒަޔާންގެ ދެލޮލަށް ބަލައިލިއެވެ. އެ ދެލޮލުން ފެނުނު ސާބިތުކަމާއި ކެރުމުގެ ކުރިމަތީގައި، ސާލިހުގެ ބާރުވެރިކަން ފުނޑުފުނޑުވެގެން ދިޔައެވެ. ދަރިފުޅުގެ ހަގީގީ ލޯބިިގެ ކުރިމަތީގައި ބައްޕަގެ ބޮޑާކަން ކުޑަކަކޫ ޖެހިއެވެ.

މާ ގިނަ ދުވަސްތަކެއް ނުވެ، އެ ރަށުގައި މިހާތަނަށް ބޭއްވުނު އެންމެ އުފާވެރި ކާވެނީގެ ހަފުލާ ބޭއްވުނެވެ. ޒަޔާނާއި ރާޔާގެ ހަތަރުކަޅި ހަމަވިއިރު، އެމީހުންގެ ހިތްތަކުގައި ވަނީ އެއް ބަހެކެވެ. އިޚްލާޞްތެރި އިންތިޒާރެއްގެ ނިމުން އަބަދުވެސް ފޮނިވާނެއެވެ.

(ނިމުނީ)….