(ޗެޕްޓަރ 1) …ލޯބިވާތީ

“ދުވަސް އޭގެ ޒާތުގައި ބަދަލުވަމުންދިޔައެވެ. އިރު އޭގެ ޒިންމާ އެންމެ ފުރިހަމަ އަށް އަދާކުރަމުންދިޔައީތާއެވެ. އަހަރެއް ވޭތުވީއެވެ. ހުޅަގު މޫސުން އަތުވީއެވެ. މުޅި އަހަރުގެ މަސައްކަތުން އެއްކުރުވި ހިތް، ވިއްސާރައިގެ އެންމެ އަލާމާތަކާއި އެކު ފަނާކޮށްލީހެއްޔެވެ؟ މިސްރާބެއް ނެތް ހިތުގެ ބަދަލުގައި ބަދަލަވަމުންދާ ވަޔާ އޮއެވަރު ކުއްވެރިކުރަން ފަސޭހައީއެވެ.”

ފޮތުގައި ލިޔަންހުރި ޖުމްލަތައް ކުރުކޮށްލީ ދެން އެދެލިން ލިޔެވޭނީ ދުވަހަކު ދުލުން ބަޔާންކުރަން ބެނުންނުވާނެ ޖުމްލަތަކަކަށް ވެދާނެތީއެވެ. މަޑުމަޑުން ގަލަން ބާއްވާލީމެވެ. އަހަރެންނަކީ ލިޔުންތެރިޔަކީމެވެ. އަހަރެންގެ ނަޒަރުގައެވެ. ދުނިޔެ އަހަރެން ދަންނަނީ މަހަމްގެ ގޮތުގައެވެ. ނޫނެކެވެ. ދުނިޔެ އަހަރެން ދަންނަނީ ޑރ.ޒައީން ޚަލީލްގެ އަނބިމީހާގެ ގޮތުގައެވެ. ވަރަށްވެސް އަތްބެކެވެ. ކޮންމެއަކަސް، އަމިއްލަ ޝަޙުޝިޔަތެއް އޮތުމަކީ ކޮބައިކަން އަހަރެންނަށް ދަސްވީ ދިރިއުޅުމުގައި ވަރަށް ލަހުންނެވެ.

“މަހާމް، ކޯޗެއް ކާންހުރީ؟” ގޭގެ ދޮރު ލެއްޕުނު އަޑާއިއެކު ޒައީންގެ އަޑު ފަހަތުން އިވިގެންއައެވެ.

“ބަތް އެބަހުރި، ގާރލިކް ރައިސް އެންޑް ރޯސްޓެޑް ޗިކަން، ދެން ވެޖީސް” އަހަރެން އެއަޑުގެ މިސްރާބަށް ދަމުން ބުނެލީމެވެ. ޒައީން އޭނާ އަރައިގެންހުރި އިސްޓާކީނާއި ބޫޓު ބާލަނީއެވެ. އަހަރެން ދިން ޖަވާބުން މާ ހާއްސަ ޝައުގުވެރިކަމެއް އޭނާގެ މޫނަކުން ނުފެނުނެވެ.

“އެހެން އެއްޗެއް ހަދައިދޭންވީތަ؟” އަހަރެން އަނެއްކާވެސް ބުނެލީ ކޮންމެވެސް ކަހަލަ ހިންހަމަޖެހުމުގެ ކުލަވަރެއް އެމޫނުން ފެނޭތޯއެވެ. އެއްވެސް ސަބަބެއް އޮވެގެންނެއްނޫނެވެ. އަހަރެން ކައްކަނީ އޭނާ ހިއްރުސާދޭކަށް ނޫނެވެ. އަމިއްލަ ހިތައް ވިސްނައިދިނީމެވެ.

“ނޫން އޯކެ، ހުރި އެއްޗެއް ކާނަން. ޖަސްޓް ޓަފް ޑޭ އެޓް ވާރކް. މިއަދު ހުރީ އެމަރޖެންސީ ރޫމާއި ހަވާލުވެގެން. ވިއްސާރަވީމަ އެކްސިޑެންޓްތައްވެސް ހާދަ ގިނައެވެ. ދުއްވާއިރުވެސް ހަމަ ނުބަލަނީ މިއުޅޭ ކުދިން..” ޒައީން ކޮޓަރިއަށް ވަތްހެން އަޑު ފަނޑުވަމުން ދިޔައެވެ. އަހަރެން އިތުރަށް އެއްޗެކޭ ނުބުނަމެވެ. އޭނާއަށް ހަމަ ނޭނގެނީ ހެއްޔެވެ؟ ހިތުގެ ރިހުން އެއްފަރާތް ކޮށްލުމަށްފަހު ކާމޭޒު ތައްޔާރުކޮށްލީމެވެ. ޒައީން ތަންކޮޅެއް ލަސްވާހެންހީވުމުން އަހަރެން އަނެއްކާވެސް ކޮޓަރިއަށް ވެދެލީ އޭނާ ކޮބައިތޯ ބަލާލުމަށެވެ.

“މަހާމް ލިޔަންވެސް ފެށީތަ؟” އަހަރެން އިސާހިތެއް ކުރިން ލިޔަން ހުރި ފޮތުގެ ޞަފްޙާތައް އެއްލަމުން ޒައީން އަހާލިއެވެ. މުޅި ދެކޯތާފަޗަށް ހޫނުވެގެންދިޔައީ އިހުނަކު ނޫނެކެވެ. އަވަސް ހަރަކާތްތަކާއެކު އަހަރެން އޭނާ އަތުން އެފޮތް ޖަހައިގަތީމެވެ. އޭނާ ކީ އޭގެ ކިހާ މިންވަރެއްބާއެވެ؟ ބިރުވެރިކަމެއް ހިތުގެ ތެރޭގައި ފެތުރިންގެން ދިޔަ ކަހަލައެވެ.

“ރިލްކްސް. ނުކިޔަމޭ ހަމަ ބަލާލީ.. މިހާރު އެކަމު ކިޔަން ބޭނުންވެއްޖެ” ސަކަ ހިނިތުންވުމަކާއެކު ޒައީން ބުނެލިއެވެ. އޭރުވެސް އަހަރެންގެ ހިތް ތެޅެމުން ދިޔައީ އަމަށަކުނޫނެވެ. އަހަރެންނަކީ، އެމީހަކު ލިޔާ އެއްޗެއް އެއްވެސް މީހަކު ކިޔަން ބޭނުންނުވާނެ ހަމައެކަނި ލިޔުންތެރިޔާއެވެ. އަހަރެން އެފޮތުގައި ލިޔަނީ އަހަރެންގެ އިޙްސާސްތަކެވެ. އެއީ އަހަރެންގެ ނަޒަރަށް ޤައިދު ކުރެވިފައިވާ ފޮތެކެވެ. މީހަކު އެކިޔާކަށް އަހަރެންގެ ހިތެއް ނޭދެއެވެ. އަމުދުން ޒައީންއެވެ.

“މިތާނގަތަ؟ ހާދަ ބިރެކޭ..؟ އަނެއްކާ އަހަރެންގެ މާރޑަރ ޕްލޭން ކުރަނީތަ؟” ހިޔާލުތަކަށް ގެއްލިފައި ހުރި މީހެއްގެ މޫނުގެ ކުރިމަތީ އަތް ހޫރާ ފަދައިން، ހަރަކާތްކުރަމުން ޒައީން ބުނެލިއެވެ. އަހަރެން ބޯހުރުވާލީމެވެ. ނޫނެކޭ ބުނުމަށެވެ. ޒައީން އޭގެ ބަދަލުގައި އަހަރެންނަށް ބަލާލާ ބޯހޫރުވާލީއެވެ. ސާބަހޭ ބުނާ ޒާތަކަށެވެ. އެނާ ހުރީ އޭރުވެސް ތުވާލި އަނދެގެންނެވެ. ފެންވަރައިން ނުކުތްގޮތަކަން ޔަޤީނެވެ.

“ކާންހަދާފަ އެހުރީ، އަހަރެން މިހުރީ ބަދިގޭގަ މަޑުކޮށްލައިގެން” އެހެން ބުނެ އަހަރެން އަނެއްކާވެސް ބަދިގެއަށް ދިޔައީއެވެ. ކާމޭޒު ދޮށު ގޮޑިއެއްގައި އެނެއްކާވެސް އިށިންދެލީމެވެ. ގޭތެރޭގައި އަބަދު ހުންނަންޖެހޭތި އަމިއްލަ ޙިޔާލުތަކުގެ ޝިކާރައަކަށް ވެއްޖެއެވެ. ކައިވެންޏަށް އަހަރެއްވީއެވެ. މިއަދުއެވެ. ޒައީން ހަނދާންނެތީކަހަލައެވެ. އަނެއްކޮޅުން، އަހަރެން… ހަނދާކުރާކަށް ބޭނުންމެއްވެސްނޫނެވެ. ބޭރުފުށުން ފެންނަ ފުރިހަމަ އުފާވެރި ދެމަފިރިންގެ މަންޒަރަކީ އަހަރެމެންގެ ހަޔާތުގެ ހަޤިޤަތާއި އެތަށް މޭލުން ދުރޭވެ. ޒައީންއަކަށް މަހަމްއެއް މާކަމަކު ނުދެއެވެ. މަހަމް އަށް ޒައީން ދެކެ ކުރެވެނީ ނަފްރަތެވެ. ހިތި ހަޤީޤަތަކީ މިއީއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.