ވާތީ ހިތަކު ލޯބި މަންމަންވެފާ 37

“ދާއި؟ ކިހިނެތްވީ؟” ލަޝްކާ އެނދުން ތެދުވަމުން އެހިއެވެ. “ދާއީ؟؟ ކިހިނެތްތަވީ؟؟” ލަޝްކާ ދައްކަމުން ދިޔަ ވާހަކަ އިވޭ ވަރަށް ވުރެ ދާއިޔަލް ހުރީ މާ ބިރުންނެވެ.

(40 ވަނަ ބައި)

“ލަޝް… އަވަހަށް ހިނގާ މިގެއިން ނިކުންނަން. މިގޭގަ ހުރުން ރަނގަޅެއް ނުވާނެ. އަވަހަށް ދޭ. ފާހާނާއަށް ދޭ. ގޮސް ވުޟޫ ކޮށްގެން ނިކުމޭ. ދާއި އެއްޗެހި ޕެކް ކުރާނަން” މާނޭވާލަމުން ދާއިޔަލް ވާހަކަ ދެއްކިއެވެ. “އެކަމަކު ކިހިނެތްތަ ވީ؟ ދާއި ދަތްދޮޅިއަށް ކިހިނެތްތަވީ؟ ބުނެބަލަ. ވާހަކަ ދައްކަބަލަ. ވީގޮތެއް އެނގިގެނެއްނުން ކަމެއް ވާނީ؟” ލަޝްކާ ދާއިޔަލްގެ ކޯތާފަތުގައި ފިރުމާލަމުން ވާހަކަ ދެއްކިއެވެ. ލަޝްކާގެ އެ ކުޑަ ކުޑަ ބީހިލުމުންވެސް ދާއިޔަލްގެ ހިތަށް ހަމަ ޖެހުން ލިބުނެވެ. އެއްއަތުން މޫނުގައި ހުރި ދާތަށް ފުހެލަމުން ދާއިޔަލް ލަޝްކާގެ ހަށިގަނޑުގައި އޮޅުލައިގަތެވެ.

“ލަޝް… މިގޭ ކައިރި މިހިރި ގޭގަ އުޅޭނެ… އަންހެން ކުއްޖެއް… ލައިލީން ކިޔާ ކުއްޖެއް. އެމަންޖެ އެކަނި އުޅޭނީވެސް. މަންމައެއް ބައްޕައެއް ނެތް ކުއްޖެއް އެއީ. އަދި 19 އަހަރު ކަންނޭނގެ. މިރަށަށް އޭނަ ބަދަލުވީ ފަހުން އަދި ނޭނގެ މަހެއްވެސް ވީކަމެއް. އެ ކުއްޖާ… އެކުއްޖާ އޮތީ މަރުވެ، ކުނިވެފަ…” ދާއިޔަލްގެ ވާހަކަ އިވި ލަޝްކާއަށް އަނގަމަތީގައި އަތް އެޅުނު އިރު މުޅި ހަށިގަނޑުން ހީބިހިނަގައިގަތެވެ. “މުޅި މީހާ އޮތީ ކުނިވެފަ… ގައިގެ އެތަން މިތާ ކިލާފަނިތަކާ އެއްޗެހި ދުވޭ… ހީވަނީ މަރުވިތާވެސް ވަރަށް ގިނަ ދުވަސްތަކެއް ވެއްޖެހެން…” ދާއިޔަލްއަށް ހިންދިރުވާލެވުނެވެ.

“ދާއި. އަވަހަށް ހިނގާ ޕޮލިހަށް ގުޅަން” ފޯނު ނަގަމުން ލަޝްކާ ބުނެލިއެވެ. ދާއިޔަލްއަށް އެނދަށް ޖެހިގަނެވުނެވެ. ހަގީގަތުގައިވެސް މިރޭ އޭނާ ވަރަށް ބިރުގަނެއްޖެއެވެ. އެމަންޒަރު ފެނި ލަޝްކާގެ ހިތަށް ތަދުވެލިއެވެ. އެމަންޒަރު ފެނުނީ އޭނާއަށް ނަމަ، ލަޝްކާއަށްވެސް ވީހީ އެވަރެވެ. ބަދިގެއަށް ގޮސް ފެންތައްޓެއް ހިފައިގެން އައިސް ދާއިޔަލްއަށް ލަޝްކާ ފެންދިނެވެ. ދާއިޔަލްގެ ނޭވާ ހަމައަކަށް އެޅުމުން ލަޝްކާ ދުރަށް ޖެހިލާ، އެޒިކިއެލްގެ ނަންބަރަށް ގުޅާލިއެވެ.

ސޯފާގާއި އިން އެޒިކިއެލް ވިސްނަމުން ދިޔައީ އެލާރާއާއި މެދުއެވެ. އެލާރާގެ އުޅުމަށް އެއައި ބަދަލަކީ ޒަވުލްތާއެވެ. އެކަން ހުއްޓުވަން އޭނާ ބޭނުންވިއެވެ. އެކަހަލަ މީހަކަށް އެލާރާ ހައްގުވެދާނެ ކަމަށް އެޒިކިއެލްގެ ހިތުގެ އެންމެ ތަންފުކެއްވެސް އެއްބަހެއް ނުވިއެވެ.

އެ ޙިޔާލުތަކުން އޭނާއަށް ނިކުމެވުނީ ފޯނު ރިންގުވާން ފެށި އަޑަށެވެ. ގުޅަމުން ދިޔައީ ލަޝްކާއެވެ. “އަނެއްކާ ކިހިނެތްވީބާ؟…” ހިތާ ހިތުން އެޒިކިއެލްއަށް ބުނެވުނެވެ. “ހަލޯ؟” ކަންފަތުގައި ފޯނު ޖަހަމުން އެޒިކިއެލް ސޯފާގައި ހަމަ ޖެހިލިއެވެ.

“ސާރ. ވަރަށް ބޮޑު ވާޙަކައެއް ބުނަން މިގުޅީ…” ލަޝްކާ ހަމަ ޖެހިލަން މަސައްކަތް ކުރަމުން ވާހަކަ ދެއްކިއެވެ. “ލައްބަ. ކުރިއަށް ދޭ” އެޒިކިއެލް ވާހަކަ ދެއްކިއެވެ. އިވެން އުޅޭ ބޮޑު ޙަބަރުގެ ހިލަމެއް ނުވާ ހާލުގައެވެ. “ދާއިމެން ގޭ ކައިރީ އެކަނި އުޅޭ ކުއްޖެއް… ‘ތަރި’ ގޭގައި އުޅޭ ލައިލީން… މަރުވެ ކުނިވެފައި އޮއްވާ ދެންމެގަ ދާއިޔަލްއަށް ފެނުނީ…” ލަޝްކާ ބުނެލި ޖުމްލައާއި އެކު އެޒިކިއެލްއަށް ކޮޅަށް ތެދުވެވުނެވެ.

“ވަޓް؟؟ ކީކޭ؟؟ ކޮން އިރަކު؟؟” އެޒިކިއެލް އެއްފަހަރާ ސުވާލުތައް ކުރަން ފެށިއެވެ. ދާއިޔަލްއަށް ފެނުން މަންޒަރު ލަޝްކާ ކުރުކޮށް ކިޔައިދިނެވެ. “އޯކޭ. ޓީމެއް ގޮވައިގެން މިދަނީ އެކޮޅަށް” ފޯނު ބާއްވަމުން އެޒިކިއެލް ބުނެލިއެވެ. އަދި ގޮސް އެލާރާގެ ކޮޓަރި ދޮރު ހުޅުވާލިއެވެ.

“އެލާ. މަރުވެ ކުނިވެފައި އޮތް އަންހެން ކުއްޖެއްގެ ހަށިގަނޑު ފެނިގެން މިއުޅެނީ. އަވަހަށް ރެޑީވޭ ސީންއަށް ދާން” އެހެން ބުނެ އެޒިކިއެލް ނިކުތެވެ. އެލާރާވެސް ދިޔައީ އެލިގެންނެވެ. ފޯނު ކަންފަތުގައި ޖަހަމުން އެލާރާ ޒަވުލް ގާތުގައި އެހެން ބުނެލިއެވެ. “ހޫމް. ތިއީ ކަލެއަށް ވާނެ ވަރަކީ. ރައްޓެހިވީ އިރު ހީވި ހަނދާ ތަރިވެސް ދޭނޭ. ހޫން ދާން އުޅޭ. ރައްކާވޭ!” އެހެން ބުނެ ޒަވުލް ފޯނު ބޭއްވީ އެލާރާގެ ހިތަށް ހަންޖަރެއް ހަރާފައެވެ. ނަމަވެސް އެވަގުތު އޭނާ ރޯކަށް ބޭނުމެއް ނުވިއެވެ. އެ މަރުގެ ހަގީގަތް ހޯދަން އެލާރާ ދާން އެބަ ޖެހެއެވެ.

ހެޔޮވަރު ދުވެއްޔެއްގައި ސައިކަލު ދުއްވާފައި ގޮސް ދާއިޔަލް މަޑުކޮށްލީ ދިޔާން ދިރިއުޅެމުން ދިޔަ ގޭ ކައިރީގައެވެ. ލަޝްކާގެ އަތުގައި ހިފާލަމުން ދާއިޔަލް އެތެރެއަށް ވައިން އިރު ޔޫޒާއާއި ދިޔާން ސޯފާގައި ތިއްބެވެ. “ލަޝް…” ނިޔަފަތިތައް ހަފަން އިން ޔޫޒާއަށް ލަޝްކާ ފެނި ދުވެފައި ގޮސް އޭނާގެ ގައިގައި ބައްދާލެވުނެވެ. “ލަޝް އޯކޭތަ؟” ލަޝްކާގެ ބޮލުގައި ފިރުމާލަމުން ޔޫޒާ އަހައިލިއެވެ.

“ހަމަ ޖެހިބަލަ ދޮންބެ ދައްތާ. ލަޝް އޯކޭ އޭ” ހަމަ ޖެހިލަން މަސައްކަތް ކުރަމުން ލަޝްކާ ބުނެލިއެވެ. “ދާއި ދަތްދޮޅި ކިހިނެތްތަ؟” ދިޔާންވެސް ހާސްވެފައި އެހިއެވެ. “ދެން… މިހާރު ދެން އޯކޭ. ލަޝް ބޭސް އަޅާދިންފަހުން” އިސްޖަހާލަމުން ދާއިޔަލް ބުނެލިއެވެ. އޭރުވެސް އޭނާއަށް ސިފަވަމުން ދިޔައީ ލައިލީންގެ ގަބުރެވެ.

ހޮސްޕިޓަލުގައި އެޒިކިއެލް، އެލާރާ، އަދި ޔައުލާން ތިއްބެވެ. އެންމެންވެސް އިންތިޒާރު ކުރަމުން ދިޔައީ ޑަކްޓަރު ނިކުމެ ދޭނެ ޙަބަރަކަށެވެ. އެހެން ވިޔަސް، އެލާރާގެ ޙިޔާލުގައިވީ ޒަވުލްއެވެ. ހީނަރުވަމުން ދިޔަ އެ ގުޅުމުގެ ސަބަބުން އެ ހިތްވަނީ ފިސްފިސްވެފައެވެ. ކައިރީގައި އިން ޔައުލާންވެސް އިނީ އެކަހަލަ ހާލެއްގައެވެ. އެލާރާއަށް ވީ ނުވީއެއް ނޭނގި މިއަންނަ ބަދަލުން ޔައުލާންއަށްވެސް ދިޔައީ އަސަރު ކުރަމުންނެވެ. ވީ ކީއްތޯ އަހާ އަހާވެސް އޭނާގެ ފަރާތުން އެދެވޭ ޖަވާބެއް ލިބިފައެއް ނެތެވެ.

ކުޑަ ހިނދުކޮޅެއް ތެރޭގައި ޑަކްޓަރު ނިކުތެވެ. ވަކި ވަކިން ތިން ފުލުހުންގެ މޫނަށް ބަލައިލިއެވެ. “އަޅުގަނޑު ބޭނުންވަނީ ދެ ފިރިހެން ފުލުހުންނަށް މި ވާހަކަ ދައްކާލަން…” އެލާރާއަށް ވެދާނެ ގޮތަކާއި މެދު ވިސްނާލާފައި ޑަކްޓަރު މާހިން ބުނެލިއެވެ. ޔައުލާންއާއި އެޒިކިއެލް އެކަކު އަނެކަކަށް ބަލައިލިއެވެ. ލިބެން އުޅޭ ހަބަރަކަށް ތައްޔާރުވެލީ ކަންނޭނގެއެވެ.

ދެމީހުން ގޮވައިގެން މާހިން ދުރަށް ޖެހިލިއެވެ. ހަރަމް ބަނދެލަމުން އޭނާ ފުން ނޭވާއެއް ދޫކޮށްލިއެވެ. “ލައިލީންގެ މަރަކީ އާދައިގެ މަރެއް ނޫން. އެކަމުގައި މީހެއްގެ އަތެއް އެބަވޭ…” އެހިސާބުން މާހިން ހުއްޓާލީ ދެން ބުނަން އޮތް ޖުމްލަ ބުނަންވީ ގޮތެއް ނޭނގިގެންނެވެ. “ލައިލީންގެ… ހަށިގަނޑުގައި އޭނަގެ ހިތެއް ނެތް… މޭ ފަޅާލާފަ ފަހަންވެސް ފަހާފަ އޮތީ…” މަޑުމަޑުން މާހިން ބުނެލި ޖުމްލަ ޔައުލާންއަށާއި އެޒިކިއެލްއަށް އިވުނީ ހޮނު ގުގުރިއެއް ފަދައިންނެވެ.

(ނުނިމޭ)

ސާޅީސްއެއްވަނަބައިގެ ތެރެއިން:

“ދެން… ކިހިނެތް ހަދަނީ؟…” ނޭވާ ހަމައަކަށް އަޅުވާލަމުން އެލާރާ އަހައިލިއެވެ. “އޮޓޮޕްސީއަކަށް ފޮނުވާލާނީ.” ފުންނޭވާއެއް ދޫކޮށްލަމުން އެޒިކިއެލް ބުނެލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.