ލޮތްބެއް މަ ނޭދެން ޔާރު ނޫން – 07

ޑޮކްޓަރު ފުންނޭވާއެއް ދޫކޮށްލައި ޓެސްޓްކިޓްގެ ބްރޭންޑާއި ނަން އަހައިލިއެވެ. ދުންޔާ ޖަވާބު ދިނުމުން ޑޮކްޓަރ އިސްޖަހައިލިއެވެ. “ތި ބުނި ބްރޭންޑުން މިފަހަރު ރާއްޖެއަށް ލިބިފައި ހުރި ބެޗްގަ ވަރަށް މައްސަލަ ގިނަ.. އައިމް ސޮރީ..” ދުންޔާގެ ދެލޮލަށް ޖަމާވެފައިވި ކަރުނަތަށް ފައިބައިގަތެވެ. ހިތުގައި ކޫރު އެޅިފައިވި ނަމަވެސް އަނބިމީހާ ރޯން ފެށުމުން ޔާދިންއަކަށް މަޑަކުންނެއް ނުހުރެވުނެވެ. ދުންޔާ އޭނަގެ މެޔާއިލާ ބޮނޑިކޮށްލިއިރު ޔާދިންގެ ދެލޮލުގައި އުފެދިފައިވި ކަރުނަތައް ލޯމަރައި ބާރުކޮށްލަމުން ހިންދައިލިއެވެ. ދެމަފިރިންނަށް ވަގުތު ދިނުމުގެ ގޮތުން ޑޮކްޓާރ އެ ކޮޓަރިން ނިކުތެވެ.

***ޕާޓް 7***

އެދުވަހުގެ ހަވީރުގެ ވަގުތެއްގައި ފޮރިންސިކް ޓީމުން އެއީ އިންސާނުންގެ މަސްކަން ކަށަވަރުކުރެވުނެވެ. އެއާއެކު އިމާދުއަށް އެތަން ބަންދު ކުރުމަށް ކޯޓު އަމުރު ލިބުނެވެ. އެކަން ކުރީ ކާކުކަން އެނގި، އެމީހަކު ފުލުހުންގެ ބެލުމުގެ ދަށަށް ގެނެވުނީމަ ނޫނީ ދެން އެތަން ނުހުޅުވޭނެ ކަމަށް ފުލުހުން ބުނުމުން އިމާދުގެ ހިތަށް އައިހާ ނުބައި އެއްޗެއް އެމީހުންނާއި ދިމާލަށް ގޮވިއެވެ. ރުކައިން މޭޒުމަތީގައި އޮތް ރިޕޯޓަށް ބަލަން އިން އިރު އޭނައަށް އަދި ވެސް އެ ތަށިތެރޭގައި އޮތް އިނގިލިބުރި ފެންނަ ފަދަ އިހްސާސެއް ކުރެވުނެވެ. ކައިލް ކެބިންއަށް ވަނުމުން ރުކައިން ގޮޑީގައި ލެނގިލިއެވެ. “ހުވާ މިބުނީ މަގޭ މޭ ނުބައި ކުރޭ އެބަ މިޔަށް ބަލަބަލަ ވެސް.. ހިތަށް އަރާ ކޮންކަހަލަ ޖަނަވާރެއް ކުރާނެ ކަމެއްބާއޭ މިއީ.. އެހާ ބޮޑަށް ހަންގަނޑާއި ކަށިކޮޅު އަނދާފައި ހުރީމަ ޑީއެންއޭއެއް އެއްޗެއް ވެސް ނުބެލުން..” އިސްތަށިގަނޑަށް އަތް މަހައިލަމުން ފުންނޭވާއެއް ދޫކޮށްލާފައި ރުކައިން ބުންޏެވެ.

ކައިލް ރިޕޯޓު ނަގައި ބަލައިލިއެވެ. އޭނަގެ މޫނުމަތީގައި ވަނީ ވަރުބަލިކަމެވެ. އެ ރެސްޓޯރަންޓަށް ދިޔައީ މިފަދަ ކަމަކަށް ތައްޔާރުވެގެނެއް ވެސް ނޫނެވެ. “އެ ރެސްޓޯރަންޓް އެފުއްމިފުށަށްޖަހާ ބަލާ ފާސްކޮށްފިން.. ހިޑެން ޑޯރއެއް ނެތް.. އެމީހުންގެ ފްރިޖް ވެސް ޗެކް ކުރެވިއްޖެ ހަމަ ނޯމަލް.. ޝެފްއާ ވާހަކަ ދެއްކީމަ ވެސް އެނގުނު އެއްޗެއް ނެތް.. ސަސްޕެކްޓް ކުރަނީ ޝެފްއަށް ކޯޒް އޭނައެއްނުން ކައްކާނީ.. އެކަމަކު ކަމެއް އެނގޭ ކަމަކަށް ނެހެދި..” ކަނާތް ފަރާތުގައި ހުރި ގޮޑިއަށް ވެއްޓިގަންނަމުން ކައިލް ބުންޏެވެ. ރުކައިން ވެސް ކައިލްގެ ވާހަކައަށް ބޯޖަހައިލިއެވެ.

މަޑުމަޑުން އެނބުރެމުންދިޔަ ފަންކާގެ ފިޔަތަކަށް ބަލަން އޮތް ދުންޔާގެ މޫނުމަތީގައި ވަނީ ހިތާމައިގެ ކުލަވަރެވެ. އޭނަ ހާދަ އުންމީދެއް ކުރިއެވެ. އެހެންނަމަވެސް… ދުންޔާ އެންމެ ދެރަވީ ޔާދިން ހިތަށް ތަދުވާނެވަރު އަންދާޒާކޮށްލާފައެވެ. ޔާދިން ދަރިއެއް ބޭނުންވެގެން އުޅޭތާ ހާދަ ދުވަހެއްވެއްޖެއެވެ. އެ ޓެސްޓްކިޓް ފެނުމުން ޔާދިންގެ މޫނު އަލިވި ގޮތް ދުންޔާއަށް ސިފަވާ ފަދައެވެ. ދުންޔާއަށް ބެލްކަނި ބަލައިލެވުނީ ޔާދިން މިހާރު އެތާ ހުންނަތާ އިރުގަނޑެއްވުމުންނެވެ. އޭނަގެ ހިތް ނުބައި ގޮތަކަށް ތެޅިލީ ހިތަށް ވަތް ހިޔާލެއްގެ ސަބަބުންނެވެ. އަވަސް އަވަހަށް ދެފަރާތަށް ބޯހޫރައިލީ ޔާދިން އެހާ ފިނޑި ނުވާނެ ކަމަށް އަމިއްލަ ހިތަށް ވިސްނައިދެމުންނެވެ. މަޑުމަޑުން ތެދުވެ ބެލްކަންޏާއި ދިމާލަށް ދުންޔާ ހިނގައިގަތެވެ. އޭނައަށް މޫނު މައްޗަށް އަނދިރިވާ ފަދަ އިހްސާސެއް ކުރެވެމުން ދިޔައެވެ.

ބެލްކަނީގައި ޔާދިން ހުރީ ޗެންޗޭނުގައި އަތް އަޅުވައިލައިގެން ދުރުދުރުން ފެންނަމުން ދިޔަ އިމާރާތްތަކަށް ބަލާށެވެ. އޭނަގެ މޭތެރޭގަޔާއި ސިކުނޑީގައި ހިނގަމުން ދިޔަ ތޫފާނުގެ ސަބަބުން ޔާދިން ހުރީ ބޮޑު ވިސްނުމަކަށް ގެއްލިފައެވެ. ދަރިން ނުލިބުމުގައި ދުންޔާގެ މައްސަލައެއް ނެތެވެ. މައްސަލަ ހުރީ ޔާދިންގެއެވެ. މިހާރު ވޭތުވެ ދިޔަ އަހަރުތަކުގައި ސިނގިރޭޓާއި ކައިރި ނުވެވުނު ނަމައޭ އޭނަގެ ހިތަށް އެރިއެވެ. އެހެނަސް ވެފަ އޮތް ކަމެއް ނަމައަކުން ބަދަލެއް ނުކުރެވޭނެކަން އޭނައަށް އެނގެއެވެ. އޭނަގެ ހިތަށް ތަދުވަމުން ދިޔައީ އެހާ ބޮޑަށް ކުރަމުން ދިޔަ އުންމީދު ހިނދުކޮޅެއް ތެރޭގައި ވިއްސިވިހާލިވެގެން ދިޔުމުންނެވެ. ދެލޮލުގެ ކަނުން ވެއްޓެމުން ދިޔަ ކަރުނަ ތިކި އަތުގެ ނުފުށުން ޔާދިން ފޮހެލިއެވެ. ހިޔާލުގެ ކަނޑަށް ގެނބެމުން ދިޔަ ޔާދިންގެ ހިޔާލުތަކުން ބޭރުވެވުނީ ކައިރިން އެއްޗެއް ވެއްޓުނު ފަދަ އަޑެއް އިވުމުންނެވެ.

ސިހިފައި ފަހަތް ބަލައިލިއިރު ދުންޔާ އޮތީ ބެލްކަނީގެ ދޮރުބުޑަށް ވެއްޓިފައެވެ. ޔާދިން އަވަސް އަވަހަށް ދުންޔާގެ ހަށިގަނޑު އޭނަގެ ވަރުގަދަ އަތްދަނޑި މައްޗަށް އުފުލައިލުމަށްފަހު ކޮޓަރިއަށްވަނެވެ. ދުންޔާގެ ހަށިގަނޑުގައި ހުރި މަޑު ހޫނު ކަމުގެ ސަބަބުން އޭނަ އޮތީ ހުންއައިސްފައިކަން ޔާދިންއަށް ޔަގީންވިއެވެ. ދުންޔާގެ ހާލެއް ބަލައިނުލެވުމުން ޔާދިން އަމިއްލަ ނަފްސަށް އަޑުލައިގަތެވެ. “އައިމް ސޯ ސޮރީ ދޫނީ.. އައި ޝުޑް ހެވް ބީން ދެއާރ ފޯރ ޔޫ..” ދުންޔާގެ ނިތުގައި ތުންފަތް ޖައްސައިލަމުން ޔާދިން ބުންޏެވެ. އެއަށްފަހު ފާހަނައަށް ގޮސް ކުޑަ ބޯތަށްޓަށް ފެން އަޅައިގެން ދުންޔާގެ ބޮލުގަޔާއި ކަރުދޮށުގައި ފެންފޮތިލުމުގެ މަސައްކަތުގައި މުޅި ރޭ ހޭދަކުރިއެވެ.

ކައިލްއަށް ގެއަށް ދެވޭވަރުވީ މެންދަމު އެކެއް ޖަހާ ދިޔަފަހުންނެވެ. ބޫޓު ހަރުގަނޑުގައި ބެހެއްޓުމަށްފަހު ސިއްރު ފިޔަވަޅުތަކެއްގައި ގެއަށް ވަނީ މައިރީން މިހާރު އޮންނާނީ ނިދާފައިކަން އެނގޭތީއެވެ. ކޮޓަރިއަށް ވަތް އިރު އެނދުގައި މައިރީން ނެތުމުން ކައިލްގެ ހިތް ކުޑަ އިރުކޮޅަކަށް ހުއްޓުން ފަދަ އިހްސާސެއް ކުރެވުނެވެ. ޔުނީފޯރމް ބަދަލުކުރުމެއް ނެތި މައިރީންއަށް ގޮވަމުން މުޅިގޭތެރޭގައި ހިނގަން ފެށިއެވެ. ބަދިގެއަށް ވަތް ހިނދު މޭޒުމަތީގައި ހުރި ކޭކު އޭނައަށް ފެނުނެވެ. އެ ކޭކުގައި އިން ލިޔުންކޮޅު ކިޔާފައި ކައިލްއަށް އަނގަޔަށް ގޮތެއް ހަދައިލެވުނެވެ. ‘ހެޕީ ބާރތްޑޭ ގްރޭމްޕްސް” އޭ ޖަހާއިފައި އިން އެ ކޭކު ވަނީ ކައިލްއަށް އެންމެ ރީތި ކުލަ ކަމަށްވާ ނޫކުލައިން ޒީނަތްތެރި ކުރެވިފައެވެ. އޭގެ މެދުގައި ޖަހާފައި އިން އުއްބައްތީގެ ހުޅުކޮޅު އަނދިރީގެ ތެރޭގައި ނަށަމުން ދިޔައެވެ. ކައިލް ސިއްސައިގެން ދިޔައީ މޭޒު ދަށުން މައިރީން ނިކުމެ އުފަންދުވަހުގެ ލަވަ ކިޔަން ފެށުމުންނެވެ. މައިރީން ލަވަ ކިޔާ ނިމުމުން ކައިލްއަށް ބަލައިލިއިރު، ކައިލްގެ ކަތި ނަޒަރު އޭނައަށް ހުއްޓިފައިވި ތަން ފެނި މައިރީންގެ ކޯތާފަތަށް ރަތްކަމެއް ވެރިވިއެވެ.

މައިރީން ހުރީ ދަނބުކުލައިގެ ނިދަންލާ ކުރު ހެދުންކޮޅެއްލައިގެންނެވެ. ސެޓިން ފޮތީގެ އެ ނިދާ ހެދުންކޮޅު ހުރީ މައިރީންގެ ކަކުލުން މައްޗަށްށެވެ. އެ ހެދުމުގެ އަތް ވަނީ ލޭސް ފޮތިން ފޮރުވައިލެވިފައެވެ. އެހެނަސް މައިރީންގެ ދޮން އަތް އެ ހެދުމުން ފާޅުވެއެވެ. ކައިލްއަށް އޭނަގެ ހިއްސުތައް ކޮންޓްރޯލް ކުރުންވީ އުނދަގޫ ކަމަކަށްށެވެ. މައިރިންގެ އުނަގަނޑުގައި އަތް އަޅުވައިލުމަށްފަހު އެ ހަށިގަނޑު އޭނަގެ މޭގައި ޖައްސާލިއެވެ. އެއަށްފަހު މައިރީންގެ ކަނދުރާގައި އޭނަގެ މޫނު ޖައްސައިލިއެވެ. ކައިލްގެ އަމަލުން މައިރީންގެ ހަށިގަނޑުން ހީބިހި ނަގައިގެން ދިޔައެވެ.

“ކައިލްލްލް.. ކޭކު ފަޅަން ހިނގާބާ… މައިއަށް ކޭކު ކާހިތުން ހުރެވެނީއެއްނޫން.. އިނގޭތަ މިއަދު ޖޮބުން އަިސްފަ ޔޫޓިޔުބް ބަލައިގެން މައި އަމިއްލައަށް އަޅާފަ ހުރި ކޭކެއްމީ.. ވަރަށް މީރުވާނެ…” ކައިލްއާ ދުރުވާން މަސައްކަތް ކުރަމުން އަމިއްލަ ނަފްސާއި ފަހުރެވެރިވެފައިވެ ހުރެ މައިރީން ބުންޏެވެ. މައިރީންގެ ވާހަކައިން ކައިލްގެ ހިތް ވިރިގެން ދިޔަ އިހްސާސެއް ކުރެވުނެވެ. “ޔަގިންތަ އަނެއްކާ ކޭކުގަ އައިސިން ޖަހާފަ މިހުރީ ކޭކު އަންދާފަ ނޫންކަން؟ ހުސް ހަކުރު ކަންނޭނގެ މިއަށް އަޅާފަ މިހުރީ.. އެހެންނޫނަސް އަހަރެން ކާފައަކަށް ވީ ކަމެއް ނުދެނެ ހުރިން..” މައިރީން އޭނައާ ދުރުވުމަށް ފުރުސަތު ދިނުމެއް ނެތި ކައިލް ލާނެތް ގޮތަކަށް ބުންޏެވެ. “ކޭކް މީރުވާނެ އަޅެ ރަހަ ބަލާބަލަ.. އިޓްސް އަ ޖޯކްއޭ.. އެހެންނޫނަސް މިހާރު ޓްވެންޓީ ނައިންވީ ތާރޓީ ވީމަ މުސްކުޅިވީނުން..” ލާނެތް ގޮތަކަށް މައިރީން ބުންޏެވެ.

އެތާ ހުރި ކަޕްކޭކެއް ނަގައި ކައިލްގެ އަނގަޔާއި މައިރީން ކައިރިކޮށްލިއެވެ. ކައިލް ހީލަމުން ކޭކުކޮޅު ކާލިއެވެ. ހީކުރި ގޮތާ ހިލާފަށް ކޭކު ވަރަށް މީރެވެ. “އެހެންތަ؟ މިރޭ މި މުސްކުޅި ކާފަ ހަދާ ގޮތް ބަލައްޗެ..” ކުއްލިއަކަށް މައިރީން އޭނަގެ ކޮނޑު މައްޗަށްލަމުން ނުސިޔާނު ހިނިތުންވުމަކާއިއެކު ކައިލް ބުންޏެވެ. މައިރީން ހެމުން ތޫލި އަޑަކުން ހަޅޭއްލަވައިގަތެވެ. “ކައިލްލް އެއްވެސް އެއްޗެއް ނުކައެއްނުން ތިހުރީ.. ކައިގެން ދާން މަޑުކޮށްބާ..” މައިރީން އޭނަގެ އަތުން ކައިލްގެ ބުރަކަށީގައި ތަޅައިގަންނަމުން ކިޔަމުން ދިޔައެވެ.

“އަހަރެން މިރޭ މިހުރީ އެހެން އެއްޗަކަށް ބަޑުހައިވެފަ..” އެއްމިޔަކަނުން ހިނިއައިސްފައި ހުރެ ކައިލް ބުންޏެވެ. ލަދުގަތްވަރުން މައިރީންއަށް އޭނަގެ މޫނުގައި އަތް އެޅުނެވެ. އުއްބައްތީގެ ހުޅުކޮޅަށް ފުމެލައި އެ ނިއްވައިލުމަށްފަހު މައިރީން ކޮނޑުގައި ބާއްވައިގެން ކޮޓަރިއަށްވަނެވެ. މައިރީން އެނދުގައި ބޭއްވުމަށްފަހު ކައިލް އޭނަ ލައިގެން ހުރި ޔުނީފޯރމް ބާލަން ފެށިއެވެ. އޭނަގެ ކަސްރަތީ ހަށިގަނޑު ހާމައަށް ފެނުމުން މައިރީންގެ މޫނު އިތުރަށް ރަތްވިހެން ހީވެއެވެ. ކައިވެނިކޮށްގެން އުޅޭއިރު އަބަދު ފެނުނު ނަމަވެސް މައިރީން އަދިވެސް ލަދުގަނެއެވެ. “އަހަރެންގެ އުފަންދުވަހުގެ ހަދިޔާއަކީ މިނީ ދޯ..” ޔުނީފޯރމް ގޮޑިއެއްގައި އެޅުވުމަށްފަހު އެނދު ކައިރީ ކުޑަކަކޫ ޖަހައިގެން ކައިލް އިށީނެވެ. މައިރީން ތުންފަތް ހަފާލަ ހަފާލަ އިސްޖަހައިގެން އެނދުމަތީ އިށީނެވެ. ބޯ އެސްފިޔަތަށް ތިރިކޮށްލައިގެން އިން ގޮތުން މައުސޫމުކަމަށް ދައްކައެވެ.

“މިނީ އަހަންނާ ކައިވެނި ކުރީ ރުހުމުގަ ނޫންކަން އަހަރެންނަށް އެނގޭ.. އަހަރެންގެ ހިތަކު އޭރު މިނީއާ މެދު ލޯބި ނެތޭ ބުނެފިއްޔާ އެ ވާނީ ދޮގަކަށް ކަންނޭނގެ.. އޭރު އަހަރެންގެ ހިތަށް އަހަރެން ވިސްނައިދިނީ މިނީ ޕްރޮޓެކްްޓް ކުރަން ކުރިކަމެކޭ އެއީ.. އެކަމަކު އެއީ މުޅިއެކު ތެދެއްނޫން.. ކައިވެނިކޮށްގެން މިހާ ދުވަހު އުޅުން އިރު ވެސް އަހަރެން މިނީގެ ނުރުހުމުގަ މިނީގެ ހަށިގަނޑުގަ އަތްލާފައެއް ނޯންނާނެ.. މިހާރު އަހަރެންގެ އުމުރު ވެސް މައްޗަށް ދަނީމި.. މިނީއަށް އެޖަސްޓްވާން ވަރަށް ވަގުތު ދެވިއްޖެ.. މިހާރު އަހަރެން ބޭނުންވަނީ މިނީއާއެކު ކައިވެނީގެ ހަރުފަތްތައް ގިރާ ކުރަން.. އެކަން އަހަރެން ކުރާނީ މިނީގެ ރުހުމުގަ.. މިނީ އަހަރެންނަށް އެ ރުހުން ދޭނަންތަ؟” ކައިލް މައިރީންގެ ގަޑު ފެންފޮދެއް ފަދަ އަތުގައި ހިފައިލަމުން އަހައިލިއެވެ. މައިރީން އިސްޖަހައިލައިގެން ހުރެ ބޯޖަހައިލިއެވެ. ކައިލްގެ ވާހަކައިން ކައިލްއަށް ކުރަމުން ދިޔަ އިހްތިރާމު ދެގުނަވެގެން ދިޔައެވެ. މައިރީންގެ މޫނުގައި ދެއަތުން ހިފައިލުމަށްފަހު ކައިލް ކައިރިވެލިއެވެ. “ކެން އައި؟” ކައިލް އޭނަގެ ލޮލުން އިޝާރާތްކޮށްލަމުން ބުންޏެވެ. މައިރީން ބޯޖަހައިލަމުން ލޯ މަރައިލިއެވެ. އެރޭ ދެމަފިރިންގެ ދެމެދުގައި ހުރި ހުރިހާ ފަރުދާއެއް ކެހުނު ފަދަ އިހްސާސެއް ދެމީހުނަށް ކުރެވިގެން ދިޔައެވެ.

އައިނާ މަސައްކަތް ކުރާ އިމާރާތުގެ ކައިރީ ރުކައިން މުގޯލިއަޅަމުން ދިޔަައެވެ. ހެނދުނު ސްޓޭޝަނަށް އައި ގޮތަށް އައިސް އޭނަ އެންމެ ފުރަތަމަ ވެސް ޝިޔާންގެ ހުރިހާ މައުލޫމާތެއް ހޯދީއެވެ. އޭނަ ހޯދި ހޯދުމުން ވެސް އައިނާއާއި ޝިޔާނާއި އޮތް ގުޅުން މާ ބޮޑަކަށް އޮޅުމެއް ނުފިލިއެވެ. ޝިޔާން އާއި އައިނާއަކީ ދެބެންގެ ދެދަރި ކުދިންކަން އޭނައަށް އެނގުނު ނަމަވެސް، ޝިޔާން އައިނާއާއި މެދު އެފަދައިން ކަންތައް ކުރަންވީ ގޮތެއް އޭނައަކަށް ނޭނގުނެވެ. ރޭގައި އެކަމާ ވިސްނަ ވިސްނައި އޭނައަކަށް ރަނގަޅަށް ނުނިދުނެވެ. ޝިޔާން އޭނަ މަންމައާއި ބައްޕަގެ ވާހަކަ އެހެން ބުނުމުން އޭނަގެ މައިންބަފައިނަށް ޝިޔާން އެނގޭބާއޭ އޭނަގެ ހިތަށް އެރިއެވެ. އޭނަގެ މައިންބަފައިންގެ ސިއްރުވެރި ގޮތެއް ހުންނަ ކަމަކީ ރުކައިންއަށް އޮޅިފައިވި ކަމެއް ނޫނެވެ. ބްރޭކަށް ގެޔަށް ގޮސްފަ އޭނަގެ މައިންބަފައިންނާއި ސުވާލު ކުރަން ރުކައިން ނިންމިއެވެ. އެކި ހިޔާތުގައި އޭނަ ހުއްޓައި ޓެކްސީއެކުން ފޭބި އައިނާ ފެނުނެވެ. އިމާރާތާއި ކައިރިވެލި ތަނާ އައިނާއަށް ރުކައިން ފެނުމުން އިސްޖަހައިލިއެވެ. “ޝިޔާންއަކީ ކާކު؟” އައިނާގެ ކުރިމައްޗަށް އެރުމަށްފަހު ރުކައިން ސުވާލުކޮށްލިއެވެ.

ރުކައިންގެ ސުވާލުން އައިނާ ހައިރާންވިއެވެ. “އެއީ ރުކައިން ކީއްކުރަން ބަލާ އެއްޗެއް؟؟” އައިނާ ސުވާލުކޮށްލިއެވެ. “ފުރަތަމަ އަހަރެން ކުރި ސުވާލަށް ޖަވާބުދީ!” ހަށަން ބަނދެލަމުން ރުކައިން ބުންޏެވެ. އަވި އައިނަކުން ރުކައިންގެ ދެލޯ ވަނީ ފޮރުވައިލެވިފައެވެ. “ރުކައިން އޭނަގެ ފަހަތުން ނޫޅުނިއްޔާ ރަނގަޅުވާނީ.. އަހަރެން އޭނަގެ އެއްވެސް މައުލޫމާތެއް ރުކައިންއަކަށް ނުކިޔާދޭނަން..” އައިނާ ހަރުކަށި ރާގަކަށް ބުންޏެވެ. ރާކިންއަށްވީ ކަންތަކުގައި ޝިޔާންގެ އަތެއްވާކަން އޭނައަށް ޔަގީން ކުރެވެއެވެ. އެހެންކަމުން ރާކިންގެ ސިފަތައް ހުންނަ ފަރާތަކަށް ރުކައިންވީ ނަމަވެސް، ރުކައިންއަށް ދެރަގޮތެއްވާކަށް އައިނާއަށް ނޭދެވެއެވެ. އައިނާގެ ޖަވާބުން ރުކައިން ލޯ ހަނިކޮށްލިއެވެ. “އަހަރެން ޝިޔާން ގާތަށް ގޮސްފަ ސުވާލު ކުރަންވީތަ؟ ނޫނީ އައިނާ އަހަރެންނަށް ޝިޔާންއާ އައިނާއާ ދެމެދު އޮތް ގުޅުން ކިޔައި ދޭނީތަ؟” ރުކައިންގެ ސުވާލުން އައިނާއަށް އޭނަގެ މޭގަނޑު އަނގަޔަށް އައި ފަދަ އިހްސާސެއް ކުރެވުނެވެ. ރުކައިންއާއި ދިމާލަށް ދެލޯ ބޮޑުކޮށްލާފައި އައިނާއަށް ބަލައިލެވުން އިރު އައިނާގެ ހަށިގަނޑުގައި މަޑު ތުރުތުރެއް ހުއްޓެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.