ލޮތްބެއް މަ ނޭދެން ޔާރު ނޫން – 02

ކައިލްގެ ނޭފަތު ކުރީގައި ހިފައިލަމުން މައިރީން ކިޔައިލިއެވެ. ކުއްލިއަކަށް ދެމަފިރިން ސިހިގެން ދިޔައި ފްލޭޝްލައިޓްއެއް ފަދަ އެއްޗެއް ދިއްލިފަ ނިވުމުންނެވެ. މައިރީން އަވަސް އަވަހަށް ދުރަށް ޖެހިލާފައި އަލި އައި ދިމާ ބަލައިލިއެވެ. އެއާއެކު އޭނަގެ މުޅި މޫނު ހުދުވެގެން ދިޔައެވެ. ކައިލް ވެސް ކުރިމަތީގައި ހުރި މީހާއަށް ބަލައިލީ ބިރެއް ފެނިގެން ބަލާފަދައަކުންނެވެ.

***ޕާޓް 2***

އޭރު ދެމަފިރިންނާއި ދިމާލަށް ފޯނު ދިއްކޮށްގެން ހުރި މާކިން ހުރީ ބަޑަށް އިވޭވަރަށް ހީހީ ވަރުބަލިވެފައެވެ. މާކިންއާއެކު ހުރި ޒީނާ ވެސް އަނގަމަތީގައި އަތް އަޅައިގެން ހުރި އިރު އޭނަގެ ދެލޮލުން ހުރީ އަޑު ނީއްވާ ހުނުމުގެ ސަބަބުން ފެން އައިސްފައެވެ. “އޯހް މައި ގޯޑް.. ޔޫ ގައީޒް ލުކް ސޯ ކިޔޫޓް..” ޒީނާ ބުނެލިއެވެ. ބިން ފަޅާފަ އޭނަ އަޑިއަށް ދާނެ ނަމައޭ ކައިލްގެ ހިތަށް އެރިއެވެ. އޭނަޔާއި މައިރީންގެ މޫނު، ރަތްކަމުން ހީވަނީ ޓޮމާޓޯއެއްހެންނެވެ. “ހަމަ މިހާރު ތި ޑިލީޓު ކުރޭ..” ކައިލް އަވަސް އަވަހަށް ބުނެލިއެވެ. “ހަހަ ނޯނޯ މިކަހަލަ އެއްޗެއް ކިހިނެތް ޑެލް ކުރާނީ؟ ވާނެ ކަމެއް ނޫން ތީކީ ދޮންތަބެ ބުންޏަސް..” މާކިން ހެމުން ބުންޏެވެ. މާކިންގެ ފޯނު އަތުލަން ކައިލް ދުއްވައިގަތެވެ. އެއާއެކު މާކިން ވެސް ކައިލްގެ އަތު ނުވާން ދުއްވައިގަތެވެ.

މައިރީން ލަދުން ހުރެ ބަލައިލީ ޒީނާއަށްށެވެ. އޭރު ޒީނާ ހުރީ ހީހީ ވަރުބަލިވެފައެވެ. މައިރީން ފުންނޭވާއެއްލަމުން ބޯހޫރުވައިލިއެވެ. “ހައު މަޗް ޑިޑް ޔޫ ސީ؟” މައިރީން އަނގަޔަށް ފާޑެއްގެ ގޮތެއް ހަދައިލަމުން އަހައިލިއެވެ. “ކައިލްބެ އާއި މައިއްތަ ޑާންސް ކުރި ހިސާބުން..” ޒީނާ ހިނިއައިސްފައި ބުންޏެވެ. “އަރްގްގް.. ދެ މީހުން ކޮންއިރަކު އައީ؟” މައިރީން ބޮލުގެ އިސްތަށިގަނޑާއި ކުޅެލަމުން އަހައިލިއެވެ. “ދަންވަރު ފްލައިޓުން މިއައީ އެންމެންނަށް ސަޕްރައިޒް ދޭން.. އަދި ދޮންތި އެންޑް މަމްއަކަށް ވެސް ނޭނގޭނެ.. ޑޯންޓް ޓެލް އިނގޭ ޕްލީޒް..” ޒީނާ އަވަސް އަވަހަށް ބުންޏެވެ. މައިރީން ފުން ނޭވާއެއްލަމުން ބޯޖަހައިލިއެވެ. “އައި މިސްޑް ޔޫ ސޯ މަޗް މައިއްތާ..” މައިރީންގެ ހަށިގަނޑުގައި ބައްދާލަމުން ކުޑަކުއްޖެއް ފަދައިން ޒީނާ ބުނެލިއެވެ.

ފަސް އަހަރުފަހުން ޒީނާ އެ އައީ މެލޭޝިޔާއަށް ގޮސް މެޑިސިން ސްކޫލު ނިންމާ ޑޮކްޓަރީ ކޯހެއް ފުރިހަމަކޮށްލައިގެންނެވެ. “މިސްޑް ޔޫ މޯރ ކިޑޯ..” މައިރީން ވެސް ޒީނާގެ ގައިގަ ބައްދާލަމުން ބުނެލިއެވެ. ޒީނާއަކީ ބަލައިލަން ރީތި ކުއްޖެކެވެ. ދިގު އެސްފިޔަތަކަކާއި ކުޑަ ނޭފަތެކެވެ. ވަށް ތުންފަތެކެވެ. އެކާވީސް އަހަރު ނަމަވެސް ކުއްޖާ ހުންނަލެއް ހިމަތޮޅިކަމުން އިސްކޫލުގަ އުޅޭ ކުއްޖަކާ މާ ބޮޑު ތަފާތެއް ނުހުރެއެވެ. ކުޑަކުދިންދެކެ އަބަދު ވެސް ލޯބިވާތީ ޒީނާ ހިޔާރު ކުރީ ކުޑަކުދިންގެ ޑޮކްޓަރަކަށްވުމަށްށެވެ. ކުޑައިރުއްސުރެ ބަލަމުން ދިޔަ ހުވަފެން ޒީނާ އެހުރީ ކާމިޔާބުކޮށްގެންނެވެ.

މާނޭވާ ލިވިފައި ހުރެ ކައިލް މާކިންގެ ފޯނު ހިފައިގެން އައެވެ. “މާދަން އެއުޅޭ ޝާއިލް ލައްވާ މި ފޯނުން ވީޑިއޯ ޑިލީޓު ކުރންވާނެ.. މީނަ އަހަރުން ބްލެކްމެއިލް ކުރަން މި ބޭނުންކުރާނެކަން މަށަށް ޔަގީނޭ…” ދަތްކުނޑިވިކައިލައިގެން ހުރެ ކުދި ކިޔާހެން ކައިލް ބުންޏެވެ. އޭރު ވެސް މާކިން ހުރީ ފާޑަކަށް ހެވިފައެވެ. “ހޭއީ ދޮންތީ.. މިސްޑް ޔޫ..” މައިރީން ފެނުމުން ކުޑަކުއްޖެއް ފަދައިން މައިރީންގެ ހަށިގަނޑުގައި ބައްދައިލައި، ފިއްތާލަމުން މާކިން ބުނެލިއެވެ. މާކިންގެ ޅަ ގޮތްގަނޑު ބޮޑުވުމުން ވެސް ނުކެނޑޭކަން އެނގުމުން މައިރީންގެ ގާތަށް ހިނިއެވެ. އެއީ ކުޑައިރުއްސުރެ މާކިން އުޅެމުން އައި ގޮތެވެ. ޒީނާއާއިއެކު އެންމެ ސޯޅަ އަހަރުގައި އިސްކޫލު ނިމުމުން މެލޭޝިޔާއަށް ޝިޔާމާމެން މާކިން ފޮނުވީ ސައިކޮލޮޖީއިން ކުރިއަށްދާން ބޭނުންވާ ކަމަށް މާކިން ބުނުމުނެނެވެ.

“މާކް ދެން އެ ޑެލްކޮށްބަ..” މާކިންގެ ކޮނޑުގައި މަޑުމަޑުން ޖަހައިލަމުން މައިރީން ބުންޏެވެ. “ދެންން އެ ނުލާހިކު ކިޔުޓޭ ދޯ ޒީ..” މާކިން ހިނިއައިސްފައި ހުރެ ޒީނާއަށް ދޯ އެއްލިއެވެ. ޒީނާ ހެވިފައި ހުރެ އެކަމަށް އެއްބަސްވެލިއެވެ. “ތިހެންވިއްޔާ މި ފޯނެއް ނުލިބޭނެ..” ކައިލް ބުނެލިއެވެ. “ހެޔޮ ނުލިބުނަސް.. މަގޭ ލެޕްގެ ގޫގުލް ފޮޓޯސްއަށް ދާނެ ތި.. ހަމަ ބޭކާރު ކަމެއް ކުރެވޭނީ..” ދޫ ނެރިލަމުން މާކިން ބުންޏެވެ. ކައިލް ކަޅި އަނބުރައިލުމަށްފަހު، މާކިން އެ ބުނީ ދޮގެއް ނޫންކަން ވިސްނުމުން ފޯނު ދިނެވެ. “އައިމް ވާރނިން ޔޫ.. ތި އެހެންމީހަކަށް ދައްކައިގެން ނުވާނެ..!” މާކިންގެ އަތަށް ފޯނު ދެމުން އިންޒާރުގެ ރާގަށް ކައިލް ބުންޏެވެ. “ނޯ ޕްރޮމިސެސް ބްރޯ އިން ލޯ..” މާކިން ހިނިއައިސްފައި ހުރެ ބުނެލިއެވެ.

ކައިލް ބޯހޫރުވައިލަމުން މައިރީންއަށް ބަލައިލިއެވެ. އޭރު މައިރީން ހުރީ ނިތުގައި އަތް އަޅައިގެންނެވެ. “މާދަން ހެނދުނު މަމްމެން ކައިރީ އާ ވާހަކަ ބުނާނީ.. ޒީ، ޒީ ދޮންތަ ރޫމަށް ސްނީކްކޮށްގެން ވަދެ ނިދާނީ… ބަޓް އަހަރެން ކޮންތާކު އޮންނާނީ؟ މަގޭ ދޮންތަ އާ ދޮންބެ ވެސް މެރީކޮށްގެން ވިއްޔާ އުޅެނީ..” ދަތްދޮޅީގައި އަތްކާތްތައިލަމުން މާކިން ބުނެލިއެވެ. “އެހުރީނުން ބޭރު؟ ބޭރުގަ ޓެންޓް ޖަހާގެން މާކިން ނިދާނީ ސިމްޕަލް..” ކޮނޑުއަރުވައިލަމުން ހަމަޖެހިލާފަ ކައިލް ބުންޏެވެ. އެއާއެކު މާކިން ކައިލްއާއި ދިމާލަށް ކަޅިއަޅައިގަތެވެ. “އައި ޑޯންޓް ލައިކް ދިޒް ބްރޯ އިން ލޯ ދޮންތީ.. ވައި ވުޑް ޔޫ މެރީ ސަމްވަން ލައިކް ދިޒް ހިޓްލާރ..” މާކިން ދެބުމަ ގޮށްޖަހައިލަމުން ބުންޏެވެ. މައިރީން ގާތަށް މާކިންގެ ސުވާލުން ހިނިއައެވެ. “މަ ނިދާނީ ތި ދެމިހުންގެ މެދުގަ..” މާކިންގެ އިއްވައިލުމާއެކު ކައިލްގެ ދެލޯ މުދުނަށް އަރައިގެން ދިޔައެވެ. “ހެލް ޔޫ އާރ ނޮޓް.. މަޔާންމެން އެޕާރޓްމެންޓްގަ ހުންނާނެ ގެސްޓުރޫމްސް އެތަނަށް ދާން އުޅޭ..” ކައިލް ބުންޏެވެ.

“އަނެއްކާ މިރޭ ކަމެއް އޮތީތަ؟؟ ނޯވެ ނުދާނެއެއްނުން މިރޭ މިތާ ބޭއްވި ޝޯއާ ހުރެ ވެސް ދޯ ޒީ..” ހިނިއައިސްފައި ހުރެ މާކިން ދިމާކޮށްލިއެވެ. “ހޫންހޫން ދެ މީހުން ދާން އުޅޭ ނިދަން.. މިހާރު އެއޮތް ގަޑިން ދަންވަރު ތިނެއް ޖަހަނީ..” މާކިންގެ ދިގުކޮށްފައި ހުރި އިސްތަށިގަނޑަށް ދަމައިލަމުން މައިރީން ބުންޏެވެ. މާކިން އާއި ޒީނާ ހެމުން އެތަނުން ދިޔައެވެ. ކައިލް އޭނަގެ އިސްތަށިގަނޑަށް އަތް މަހައިލަމުން މައިރީންއާއި ދިމާލަށް ބަލައިލިއެވެ. “މިއީ ހުސް ވެސް ކައިލްގެ ކަންތައް..” ތުން ދަމައިލަމުން މައިރީން ބުނެލިއެވެ. “މަގޭ އޭ؟؟؟ މަށެއް ނޫން ދަންވަރު ގަޑީގަ އަމިއްލައަށް ލަވަ ކިޔަމުން މިތާ ނެށީކީ.. ޓައިނީ އަހަންނާ ބައިވެރިވީ.. އަދި މަގޭ ބޮލަށް ކަނޑައިލަން އުޅެފިއެއްނުން.. ހުރެބަލަ އެންމެ ރަމެން ކޮޅެއް ވެސް ނުބަހައްޓާނަން..” ކައިލް އެހެން ބުނެ ތެލި ހިފައިގެން ދުއްވައިގަތެވެ. މައިރީން ވެސް ހެމުން ހަޅޭއްލަވަމުން ކައިލް ފަހަތުން ދުއްވައިގަތެވެ.

ޒީނާ އައިނާމެން ބަޔަށްލުމަށްފަހު މާކިން ދިޔައީ މަޔާންމެންގެ ބަޔަށްށެވެ. ރިޔާޒް މާލެއަށް ބަދަލުވެ ގަތް އެ އިމާރާތުގައި ދިހަ ފުލޯ ހުރެއެވެ. އެއިން ކޮންމެ ފްލޯއެއްގައި އެއް އެޕާރޓްމެންޓާއި ތިން ކޮޓަރި ހުރެއެވެ. ހަތަރު ފްލޯރ އާއިލާ މީހުންނަށް ބަހާލާފައިވީއިރު ދެން ހުރި ފްލޯތަށް ހުންނަނީ ކުއްޔަށް ދީފައެވެ. ކުރިން މާލެ އަޔަސް މާކިން ގިނައިން ހުންނަނީ މަޔާންމެންގެ ބައިގެ ގެސްޓުރޫމްގައެވެ. ސަބަބަކީ އެތާ އެއް ކޮޓަރީގައި މާޔަލް އުޅެފައި ދެން ހުރި ކޮޓަރީގައި މަޔާންމެން ދެމަފިރިން އުޅޭތީއެވެ. ތަޅުދަނޑިން ތަޅު ހުޅުވައިލުމަށްފަހު ވަގެއްހެން ދެފަރާތް ބަލައިލަމުން އެތެރެއަށް ވަނެވެ. އެތަން މަޑު ނޫ ކުލައަކުން އަލިވެފައިވަނީ ސިޓިންރޫމްގެ ސީލިންގުގައި ތަތްކޮށްފައިވާ އަނދިރީގައި އަލިވާ ފަދަ ތަރިތަކުގެ ސަބަބުންނެވެ. ގެސްޓްރޫމް ފާހަގަކޮށް އެ ކޮޓަރިއާއި ދިމާލަށް މާކިން ހިނގައިގަތެވެ.

އެ ކޮޓަރީގެ ތަޅުދަނޑި އޭނަގެ އަތުގައި އޮތުމުން ތަޅު ހުޅުވައިލުމަށްފަހު އެތެރެއަށް ދެމިގަތެވެ. ކޮޓަރީގެ ބޮކި ދިއްލުމަށްފަހު އޭނަގެ ގެނައި ދަބަސް ބަހައްޓައި މާކިން، ލައިގެން ހުރި ގަމީސް ބާލަން ފެށީ ހޫނުވެފައި ހުރުމުން ފެންވަރައިލަން ދިޔުމުގެ ނިޔަތުގައެވެ. ގަމީސް ބޭލުމަށްފަހު ލައިގެން ހުރި ޖިންސު ބޭލިއެވެ. މާކިން ސިއްސައިގެން ދިޔައީ އަންހެންކުއްޖެއްގެ ތޫލި ހަޅޭކުގެ އަޑު އޭނަގެ ކަންފަތުގައި ޖެހުމުންނެވެ. އެ އަޑުއައީ އެނދާއި ކައިރިން ކަމުން އޭނައަށް އެނދާއި ދިމާލަށް ބަލައިލެވުނެވެ. މާކިންގެ ދެލޯ ބޮޑުވީ އެނދުގައި އިށީނދެގެން މުޅި ހަށިގަނޑުގައި ރަޖާގަނޑު އޮޅާލައިގެން ދެލޯ ބޮޑުކޮށްލައިގެން އިން އަންހެންކުއްޖާ ފެނިފައެވެ.

“މީހެކޭ.. މީހެކޭ.. ހެލްޕް ސަމްވަން…” ލަޔާޝާ ގޮވަމުން ދިޔައެވެ. ލަޔާޝާގެ އަޑަށް ސިހިފައި ހުރެ މުށިތައް މަތީގައި އޮތް ޖިންސު ނަގައި އަވަސް އަވަހަށް އުނަގަނޑަށް މަހައިލިއެވެ. “އަހަރެން ނޫޅެން ކަމެއް ކުރާކަށް.. އަޑުމަޑުކޮށްބަލަ.. ތީ ކާކުތަ؟ މަގޭ ކޮޓަރީގަ ކީއްތިކުރަނީ؟؟؟” މާކިން ވާނުވާގައި ހުރެ އަހައިލިއެވެ. “ތީ ކާކު؟ މިއީ އަހަރެންގެ ކޮޓަރި! ނުކުމޭ ހަމަ މިހާރު!!” ރޮވޭ ނުރޮވޭ ހާލުގައި ހުރެ ލަޔާޝާ އަމުރުކޮށްލިއެވެ. “ޕިސް މަގޭ ކޮޓަރިން މަ ނިކުންނާނެ އެއްވެސް ގޮތެއް ނުހުންނާނެ.. ކަލޭ ދާން ޖެހޭނީ!!” ލަޔާޝާގެ ވާހަކަ ދެއްކުމުގެ ރާގުން މާކިން ގާތަށް ރުޅިއައެވެ. ލަޔާޝާ “ޔާންބޭ” އޭ ކިޔާ ހަޅޭއްލަވަން ފެށުމުން މަޔާން އާއި ލާރާ އެ ކޮޓަރިއަށް ވަނެވެ.

ލާރާ ހުރީ ނިދިން ހޭލެވުމުން ރުޅި ގަދަވެފައެވެ. “މިއީ ކިހާ ބޮޑު ކަމެއްތަ ދެން.. މަގޭ ދަރިއެއް އޮންނަ އިރު މީނަ ހަޅޭއްލަވައި ބޭލީމަ އެ މަންޖެ ދޯ ހޭލާނީ..” ދަތްކުނޑިވިކައިލަމުން ލާރާ އެއްޗެހި ކިޔައިގަތެވެ. މަޔާންގެ ލޮލުގައި މާކިން އަޅައިގަތީމަ ދެލޯ ބޮޑުވިއެވެ. އޭނަ ދިޔައީ ފާޑަކަށް ސިހިގެންނެވެ. “މާކް؟” މަޔާން މާކިންއަށް ގޮވައިލިއިރު މާކިންއަށް ހުރެވުނީ ފާޑަކަށް ލާރާއަށް ބަލާށެވެ. ލާރާ އެއީ ކުރިން އެފަދައިން އެކަކާ ވެސް ވާހަކަ ދައްކާ މީހެއްނޫނެވެ. “ކީއްވެ އަހަރެންގެ ރޫމްގަ އަންހެންކުއްޖެއް؟؟” މާކިން ތަންކޮޅެއް ހަމަޖެހިލަމުން އަހައިލިއެވެ. “މިއީ ލަޔާޝާ.. ދޮންބެގެ މެޝަންއަކުން ރެސްކިޔު ކުރި ކުއްޖެއް.. މީނަ ފެމިލީ ފެންނަން ދެން ހުންނާނީ މިތާ.. މާކް ދޭބަ މިރޭ ޔާލު ރޫމްއަށް ނިދާލަން.. ނުވެސް ބުނެ އައީމަ މިހެނެއްނުން ވާނީ.. ލަޔާޝާ، މިއީ އަހަރެންގެ ކޮއްކޮ މާކިން..” މާކިންގެ ސުވާލަށް ޖަވާބު ދިނުމަށްފަހު މަޔާން ދެ މީހުންނަށް ދެ މީހުން ތަޢާރަފުކޮށްދިނެވެ.

ލާރާ އޭރުވެސް ހުރީ މޫނު ކުނިކޮށްލައިގެންނެވެ. “ޕިސް މި ލަޔާޝާއެއްގެ މައިންބަފައިން ފެނުނީކީއެއްނުން.. މިހާރު ތިން މަސްވެގެން މިދަނީ… ރަނގަޅަށްވިއްޔާ މަރުވީ ކަމަށްވާނީ.. މީނަ މީ އަހަރުންގެ ބެލުމުގެ ދަށުގަ ހުންނަން ޖެހޭނެ މީހެއްނޫން ދޯ.. މީނަ ބޭރުކޮށްފަ ހަމަ މާކިންއަށް މި ކޮޓަރި ދެވޭނެއެއްނުން..” ލާރާ ހިތްހަމަނުޖެހިފައިހުރެ ބުނެލިއެވެ. “ލާލާ ޕްލީޒް.. އެއީ ކުޑަކުއްޖެކޭ..” މަޔާން ލާރާއަށް ވިސްނައި ދިނުމުގެ ގޮތުން ބުންޏެވެ. “ދެން ތިހެންވިއްޔާ ޖެންޑާރ އާ ހަވާލު ކުރީމަ ނިމުނީއެއްނުން..” ލާރާ ކަޅި އަނބުރައިލިއެވެ. “އިޓްސް އޯކޭ ދޮންބެދައްތާ.. އަހަރެން ޔާލު ކައިރީގަ އޮންނާނީ.. ދެން ދޭ ނިދަން އެންމެން.. ސޮރީ ވަރަށް ބޮޑަށް ލަޔާޝާ..” މާކިން އިތުރު ހަމަނުޖެހުމެއް ހިގައިދާނެނެތީ ބުނެލިއެވެ. ލާރާ ގުންފައިޖަހާފައި ގޮސް ކޮޓަރިއަށް ވަނެވެ. މަޔާން ލަޔާޝާއަށް ބަލައިލަމުން މާފަށް އެދިފައި ނިކުތެވެ.

ހެނދުނު އަރައިގެން އައި އިރާއެކު ދުންޔާ ހުރީ ފާމަސީގައެވެ. އޭނަގެ ހިތް އޭރު ދިޔައީ ޑަންޑަން ލާފާއި ޖެހެމުންނެވެ. ފާމަސީއަށް ގޮސް އެއްޗެއް ގަނެގެން ގެޔަށް އައި އިރު އޭނަގެ އަތުގައި ވެސް މަޑު ތުރުތުރެއް ހުއްޓެވެ. ދުންޔާ އައިސް ކޮޓަރިއަށް ވަތްއިރު އެނދުގައި ދެފައި ވަށްކޮށްލައިގެން އިށީނދެ އިން ޔާދިން ފެނި ސިހުނެވެ. “ދޫނި މި ގަޑީ ކީތްކުރަން ބޭރަށް ދިޔައީ؟ މިއީ އޮފް ޑޭއެއްނުން؟ ނިދާލި ނަމަ..” ނިދި ބަރު އަޑަކުން ޔާދިން ސުވާލުކޮށްލިއެވެ. އޭރު އޭނަގެ ދެލޯ ހުރީ މެރޭ ނުމެރޭ ހާލުގައެވެ. ދުންޔާ ތުންފަތުގައި ދަތްއަޅައިލަމުން ޔާދިންއަށް ބަލައިލިއެވެ.

ފުން ނޭވާއެއް ދޫކޮށްލަމުން ވާހަކަ ދައްކަން ފެށިއެވެ. “ދިން އަމްމް.. އަހަރެންނަށް އެކަންތައް ނުޖެހޭތާ މިހާރު ތްރީ މަންތްސްވެއްޖެ..” އަތުގައި އޮތް ކޮތަޅާ ކުޅެމުން ދުންޔާ ބުނެލިއެވެ. ދުންޔާގެ ވާހަކައާއެކު ޔާދިންގެ ނިދިއެއްކޮށް ފިލައިގެން ދިޔަ ފަދައެވެ. “ދޫނީ އާރ ޔޫ؟” އެނދުން ތެދުވަމުން ޔާދިން އައިސް ހުއްޓުނީ ދުންޔާގެ ކުރިމަތީގައެވެ. ކުރިން ހުރި ނިދި މޯޅިކަން މިހާރުވަނީ ފިލާފައެވެ. “ޔަގީން ކުރަން ޓެސްޓް ކިޓެއް ހިފައިގެން މިއައީ..” ތުންފަތް ހަފައިލަމުން ދުންޔާ ބުންޏެވެ. “ދެން ވަޓް އާރ ޔޫ ވެއިޓިން ފޯރ… ދޭ ޓެސްޓު ކުރަން.. އަވަސް..” ޔާދިން އަވަސް އަރުވައިލަމުން ބުންޏެވެ. ދުންޔާ ވެސް ބޯޖަހައިލުމަށްފަހު ފާހަނައަށް ވަނެވެ.

ފާހަނަ ކައިރީގައި ހުރި ޔާދިން ދިޔައީ ކޮޓަރީގެ ދެކޮޅަށް ހިނގަމުންނެވެ. ހީވަނީ އޭނަގެ ގަޔަށް ހިނިއަރައިގެން އުޅޭ ހެންނެވެ. އޭނަގެ ބޮލުގައި އެތައް ހިޔާލެއް އުތުރި އަރަމުން ދިޔައެވެ. އެކި ގޮތްގޮތަށް ވިސްނަމުން ޔާދިން ދިޔައީ ދުންޔާ ބަނޑުބޮޑުވޭތޯ ދުޢާ ކުރަމުންނެވެ. ބައްޕައަކަށް ޔާދިން ވާން ބޭނުންވާ ވަރު ދެނެވޮޑިގަންނަވާނީ ހެއްދެވި ފަރާތެވެ. ފާހަނައިގެ ދޮރު ހުޅުވުނުއިރު ޔާދިން ހުރީ ފާހަނައިގެ ދޮރުގެ ކުރިމަތީގައެވެ.

މޯޅިއަކަށް ދެމިލުމަށްފަހު މާކިން ދެލޯ ހުޅުވައިލިއެވެ. ރޭގައި މައިރީން އާއި ކައިލްއާ ދެމެދު ހިގައި ދިޔަ ހާދިސާ ހަނދާނަށް އައުމުން އޭނަގެ ގާތަށް އައީ ލާނެއް ހިންޏެކެވެ. ފޯނު ހުޅުވައިލުމަށްފަހު އެ ވީޑިއޯ ބަލައިލިއެވެ. ސިކުނޑިއަށް އައި ހިޔާލާއިއެކު މާކިންގެ ތުންފަތުގައި ކުޅެލީ ނުސިޔާނު ހިނިތުންވުމެކެވެ. ވައިބާގެ އާއިލާ ގްރޫޕަށް އެ ވީޑިޔޯލީ، ކައިލް އޭނަ ރޮލާ ކާނެކަން އެނގިހުރެއެވެ.

(ނުނިމޭ)

މި ބައި ގެނެސްދެވުން ލަސްވި ކަމަށްޓަކައި ހުރިހާ ކިޔުންތެރިންގެ ފަރާތުން މާފަށް އެދެމެވެ. މިދުވަސްކޮޅު އަޅުގަނޑުގެ ކިޔެވުމުގަޔާއި ވަޒީފާގައި ބުރަ ދުވަސްކޮޅަކަށްވުމުން މިފަދައިން ލަސްވެގެން ދިޔުމަކީ ވެދާނެ ގޮތެކެވެ. އެކަމަށް ކިޔުންތެރިންގެ ގާތުން ނިހާޔަތަށް މާފަށް އެދެމެވެ. 💜🦋

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.