އަބަދުވޭ ހިތުގާ މަގޭ 2 (1)

(1 ވަނަ ބައި)

މެންދުރުގެ ހޫނު ގަދަ ވަގުތެވެ. އެހެނަސް ޖައްވުގައި ހޫނު ކަމުގެ އެއްވެސް ހިލަމެއް ނެތެވެ. މުޅި ޖައްވުގައި ވަނީ ތެތް ފިނި ކަމެކެވެ. ވެހެމުން ދިޔަ ބޯ ވާރޭ ވެސް ޔީޝާއާއި އެކު އެހިތާމައިގައި ބައިވެރިވާ ފަދައެވެ. ކަފުން ކޮއްފައި އޮތް ނިކާލާއި ދިމާލަށް ބަލަން ޔީޝާ އިނީ ގަބުވެފައެވެ. އަދިވެސް ނިކާލް ދިޔައީ ކަން އޭނާއަކަށް ގަބޫލެއް ނުކުރެވެޔެވެ.

“ނިކާލް ނިޔާވީ ފުއްޕާމޭގެ ކެންސަރުގެ ސަބަބުން…”

އަނެއްކާވެސް ޔީޝާގެ ކަންފަތުގައި ޑަކްޓަރުގެ އެބަސް އިވިލިއެވެ. ޔީޝާއަށް ދެލޯ މަރާ ބާރު ކޮއްލެވުނެވެ. ނިކާލް ޔީޝާ ގާތުގައި އެވާހަކަ ނުބުނީ ކީއްވެ ބާއެވެ؟ ނިކާލަށް ވެސް އެކަން ނޭނގުނީ ހެއްޔެވެ؟ ހުސް ޖަވާބެއް ނެތް ސުވާލެވެ.

ފުންނޭވާއެއް ލަމުން ޔީޝާ އެކޮޓަރިން ނިކުތެވެ. މީހުނާއި ތަންކޮޅެއް ދުރަށް ޖެހިލަމުން ޖީބުގައި އޮތް ފޯނު ނެގިއެވެ. އެއީ ނިކާލްގެ ފޯނެވެ. ފޯނު ހުޅުވާލާފައި ޔީޝާ ވަނީ “ފޯން” އެޕަށެވެ. ތަންކޮޅަކަށް ސްކްރޯލް ކޮއްލި އިރަށް “މަންމަ” ނަމުން ސޭވް ކޮއްފައި އިން ނަންބަރެއް ފެނުނެވެ. ނިކާލްގެ ފޯނުން ގުޅަން އުޅިފައި ވެސް ޔީޝާގެ ޙިޔާލު ބަދަލު ވިއެވެ. ޔީޝާ ގުޅީ ޔީޝާގެ ފޯނުންނެވެ.

“ހަލޯ؟” 4 ވަނަ ރިންގުގައި ޔަލީޝާ ފޯނު ނެގިއެވެ. “މަންމަ… މަންމަގެ ދަރިފުޅު ނިޔާ ވެއްޖެ… ދަރިފުޅު ދެކިލަން ނާންނާނަން ތަ؟” ޔީޝާ ކުރަކިވެފައި ވީ އަޑުން ސުވާލު ކޮއްލިއެވެ. “ކީކޭ؟ މަގޭ ނިޔާލަށް ކިހިނެތް ވީ؟” ޔަލީޝާ ރޯން ފެށި އަޑު އިވިފައި ޔީޝާގެ ހިތަށް ކޮއްލީ ވޭންދެނެވި އިހުސާސެކެވެ. “ނިޔާލެއް ނޫން… ނިކާލް…” ޔީޝާ ބުނެލިއެވެ.

“އެއީ މަގޭ ދަރިޔެއް ނޫން” ވަގުތުން ޔަލީޝާގެ ރުއިން ހުއްޓުނެވެ. “މަންމާ! ކީއްވެ ތަ ނިކްއަށް ތިހެން ތިހަދަނީ؟ ކޮބާ ތަ ނިކްގެ ކުށަކީ؟ ނިކް އަބަދުވެސް ބޭނުންވީ މަންމަގެ ލޯބި. އެހެން އެއްވެސް އެއްޗަކަށް ވުރެ ވެސް ބޮޑަށް. ކީއްވެ ތަ މަންމަ ނިކްދެކެ އެހާ ރުޅި އަންނަން ވީ؟ އެންމެ ކުޑަ މިނުން މިއަދު އަންނަންވީނުން ނިކް ދެކިލަން؟”

ޔީޝާއަށް ބުނެވުނީ ތަންކޮޅެއް ބާރަށެވެ. ނަމަވެސް ޔަލީޝާ އެއްވެސް އެއްޗެކޭ ނުބުނެ، ޔީޝާގެ ކަންފަތް މައްޗަށް ފޯނު ކަނޑާލިއެވެ. ފޯނު ކެނޑުންކަން އެނގިވެސް ޔީޝާ ހުރި ގޮތަށް ހުއްޓެވެ. ފަހަރަ ކަރުނަ ތިއްކެއް އޭގެ މަގާމު ދޫކޮށް ފައިބަމުން ދިޔައެވެ.

“ޔިޝީ…” ފަހަތުން އިވުނީ ޔޫޝާގެ އަޑެވެ. ޔީޝާ ފަހަތަށް އެނބުރުނެވެ. ޔޫޝާގެ އަތުގައި އޮތް ނިކާލާއި ޔީޝާގެ ލޯބީގެ ނިޝާން ފެނި އޭނާ އަށް ތުންފިއްތާލެވުނެވެ. މަޑު މަޑުން ޔީޝާ ދަރިފުޅު އުރާލިއެވެ. “މޫނު އަޅާ ވަގުތު ޖެހިއްޖެ…” ޔޫޝާ ބުނެލިއެވެ. ޔީޝާ ރުއިން ހުއްޓާލަން މަސައްކަތް ކުރަމުން ނިކާލް އޮތް ކޮޓަރިއަށް ވަނެވެ.

ދަރިފުޅު ގޮވައިގެން ގޮސް ނިކާލް ގާތުގައި ޔީޝާ ހުއްޓުނެވެ. ދެލޯ މެރިފައި އޮތް ނިކާލްގެ މޫނަށް ބަލަން ޔީޝާ ހުއްޓެވެ. ނިކާލްގެ ތުންފަތުގައި ވީ ލުއި ހިނިތުންވުމެކެވެ. “ނިކް…” ޔީޝާ ނިކާލްގެ ކޯތާފަތުގައި ފިރުމާލިއެވެ.

“ނިކް… އައި ލަވް ޔޫ… އައި ލަވް ޔޫ ސޯ މަޗް… އިންޝާ ﷲ މިދުނިޔެއިން އަހަރެމެންނަށް އުޅެން ނުލިބުނު ދިިރިއުޅުން ޖަންނަތުން ލިބޭނެ. އެދުވަހުން ނިކް ހުންނާނީ ހަގީގަތުގައި ވެސް އުފަލުގަ. އިންޝާ ﷲ އައި ވިލް މީޓް ޔޫ އިން ޖަންނަތް…” ޔީޝާގެ ލޮލުން ވެއްޓުނު ކަރުނަ ތިކި މޫނު ފޮތިކޮޅު ތެރެޔަށް ވަދެގެން ދިޔައެވެ.

ޔީޝާ ނޭފަތް ދަމާލާފައި ކުޑަ ދަރިފުޅުގެ އަތް ނިކާލްގެ ނިތްމަތީގައި ބާއްވާލިއެވެ. އަދި ޔީޝާގެ މޫނު ފޮތިކޮޅު ހިއްލާލިއެވެ. ދެލޯ މަރާލާފައި ޔީޝާ ނިކާލްގެ ތުންފަތަށް ބޮސް ދިނެވެ. ފަހު ފަހަރަށެވެ…

(17 އަހަރު ފަސް)

ފަތިހުގެ ހިތްގައިމު ވަގުތެވެ. މަގުތަކުގައި އެއްވެސް މީހަކު ނެތުމުން ފެންނަނީ ވަރަށް މަޑުމައިތިރި ކޮށެވެ. ހަމަހިމޭން ވެފައި އޮތް ފަޒާގެ ހަމަހިމޭންކަން ނަގާލީ ބަންގީގެ މޫރިތި ކަލިމަތަކުގެ އަޑުންނެވެ. އެވަގުތު ނިދިފައި އޮތް ނިޝްވާގެ ބާލިސް ކައިރީގައި އޮތް ފޯނު ސޯނާ ވާން ފެށިއެވެ. ކުކުރާލާފައި ނިޝްވާ ފޯނު ނިއްވާލިއެވެ. މޯޅިއަކަށް ދެމިލާފައި ތެދުވެ އިިށީނެވެ.

މެދުމިނެއްގެ އެކޮޓަރީގެ ހުރިހާ ފަރުނީޗަރެއްް ހުރީ “ބާރްގެންޑީ” ކުލައެވެ. އެނދާއި އެކު އަލަމާރިއެއްގެ އިތުރުން ސްޓަޑީ ޓޭބަލެއް އިން އިރު ރީތިވާ މޭޒަކާއި އިސްތިރިކުރާ މޭޒެއް ވެސް އިނެވެ. ކޮޓަރި ތެރޭގައި ދިއްލާފައި ހުރި މަޑު ހުދު ކުލައިގެ “ލެޑް ލައިޓްސް” ނިވާލަމުން ނިޝްވާ ބޮކި ދިއްލާލިއެވެ. އެނދުމަތި ތައްޔާރު ކޮއްލާފައި ފާހާނާއަށް ވަނީ ފެންވަރާލުމަށެވެ.

ފަސް ވަރަކަށް މިނިޓް ތެރޭގައި ނިޝްވާ ފެންވަރާލައިގެން ނިކުތެވެ. ރީތިވާ މޭޒުމަތީގައި އިން ކާށި ތެޔޮ ފުޅިއާއި ލޯޝަން ފުޅި ހިފައިގެން އެނދުމަތީގައި އިށީނެވެ. “ދަރިފުޅާ ހޭލާ ތަ؟” ދޮރުގައި ޓަކި ޖަހައިލަމުން ޔީޝާ އަހައިލިއެވެ. “ލައްބަ މަންމާ. ހޭލާ މިއުޅެނީ” ނިޝްވާ ބުނެލިއެވެ.

ރީތި ވެލައިގެން ނިޝްވާ ނަމާދު ކުރުމަށް ތައްޔާރުވެލިއެވެ. ސުންނަތް ނަމާދާއި އެކު ފަތިސް ނަމާދުކޮށް ނިމި ސަލާމް ދީފައި ދުޢާއަށް އަތް ހިއްލާލިއެވެ. “ޔާ ﷲ މިއަޅާގެ ބައްޕަ ކައްވަޅުގެ އަޒާބުން ސަލާމަތް ކޮއްދެއްވާފާންދޭ. ޔާ ﷲ މިއަޅާގެ ބައްޕަގެ ކައްވަޅަކީ، އަލި ރަނގަޅު ގޮވެއްޗެއް ކަމުގައި ލައްވާފާންދޭ. ޔާ ﷲ މިއަޅާއަށް ސުވަރުގެއިން މަންމައާއި އެކު ބައްޕައަށް ބައްދަލު ވުމުގެ ފުރުސަތު ދެއްވާފާންދޭ. ޔާ ﷲ މިއަޅާގެ ބައްޕަގެ ފާފަތަށް ފުއްސަވާފާންދޭ. އާމީން ޔާ ރަބް…”

މޫނު މަތީގައި އަތްހާކާލި އިރު ނިޝްވާގެ ލުއި ގިސްލުމުގެ އަޑު ކޮޓަރި ތެރޭގައި ލުއި މިއުޒިކެއް ފަދައިން އިވެމުން ދިޔައެވެ. އެގިސްލުމުގެ އަޑުން ވެސް ނިޝްވާގެ ހިތަށް ތަދުވެފައިވާ ވަރު ދޭހަވެޔެވެ.

(ނުނިމޭ)

ދެވަނަބައިގެ ތެރެއިން:

“ދަރިފުޅު މިހާރު ތިއީ ކުޑަ ކުއްޖެއް ނޫނޭ. ބަރާބަރަށް ނަމާދު ކުރަން ޖެހޭނެ. މިހާރު ދަރިފުޅަށް ތިހުރީ 17 އަހަރު ވެފަ. ސުކޫލް ވެސް ނިމިފަ. އެއްޗެއް ކިޔަވާކަށް އުޅުނީއެއް ނޫން، ވަޒީފާއަކަށް ދާން އުޅުނީއެއް ނޫން. އެލް ދެން ތަންކޮޅެއް ޒިންމާދާރު ވާން ވެއްޖެއްނުން”

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.