ހަވޭލީ – އަށާރަވަނަ ބައި

މި މީހަކު އެެއްވެސް ވަރަކަށް ލަދުވެސް ނުގަންނަނީ ހެއްޔެވެ؟ ޔުމްނާ ހައްޔަރުކޮށްގެން ޔުމްނާއަށް ގެއްލުމެއް ދޭން މިއުޅެނީ ކީކޭ ހިތަށް އަރައިގެން ހެއްޔެވެ؟ ”ހޭނެ ކަމެއް ނެތް! އަހަރެންގެ ސުވާލަށް ޖަވާބު ދީ!” ޔުމްނާ އަޑަށް ބާރުލަމުން ބުންޏެވެ. އެ މީހާ މަޑުމަޑުން ހީލިއެވެ. އަދި މޫނުމަތި ނިވާކޮށްފައި އޮތް ފޮތިގަނޑު ނަގަން ފެށިއެވެ.

*** 18 ވަނަ ބައި ***

ޔުމްނާ ދެލޯ ބޮޑުވެފައި އިން ހާލު އެ މީހާގެ މޫނު ނިވާކޮށްފައި އޮތް ފޮތިގަނޑު ނަގަން ފެށި މަންޒަރު ބަލަން އިނެވެ. އެ މީހާ މަޑުމަޑުން އެ ފޮތިގަނޑު އެއްކޮށް ނެގިއެވެ.

ޔުމްނާ ގަތީ އަމަށަކު ބިރެއް ނޫނެވެ.

އެ މީހަކީ ފިރިހެނެކެވެ. ކަޅުކަން ގަދަ ބޯ އިސްތަށިގަނޑެއް ލިބިފައި ވީއިރު އޭނާގެ ކަޅުކުލައިގެ ރޭގަނޑެއް ފަދަ ތޫނު ދެލޯ ހީވަނީ ޔުމްނާގެ ހިތު ތެރޭގައި ވާ ހުރިހާ ސިއްރެއް ދެނެގަންނަން އުޅޭހެންނެވެ. ބަލާލަން ނުހަނު ރީއްޗެވެ. ނަމަވެސް ޔުމްނާ ބިރުގަތީ އޭނާ ޔުމްނާއަށް ބަލަން ހުރި ގޮތުންނެވެ. އެ ދެ ލޮލުގައި ވީ ނަފްރަތެވެ. ރުޅިވެރިކަމެވެ.

ޔުމްނާ ބިރުންހުރެ ފަހަތަށް ފިރުކެން ފެށިއެވެ. މި މަންޒަރު ފެނި އެ މީހާ ބަރު ހިނިގަނޑެއް ޖަހާލިއެވެ. ”ކޮންތާކަށް ދާން ކަމަށްތަ؟” އޭނާ ބުންޏެވެ. ”ތިއީ ކާކުހޭ؟!” ޔުމްނާ އެންމެ ފަހުން ހަޅޭލަވައިގަތެވެ. އޭގެ ރައްދުގައި އެ މީހާ ހުއްޓުނެވެ. ”އަހަރެންގެ ނަމަކީ ޒަބީލު.” ޒަބީލު ތައާރަފުވެލިއެވެ. ”އަހަރެންނަށް ކީއްކުރެވޭތޯތަ ތިއުޅޭނީ؟” ޔުމްނާ އެހިއެވެ. ”ހަމަޖެހިބަލަ. އަހަރެން އަދި ނުކުރަމެއްނު ކަމެއް.” ޒަބީލު ހަމަޖެހިލާފައި ބުންޏެވެ.

ޔުމްނާ ކޮޅަށް ތެދުވެފައި ގައިގައި ހުރި ވެލިތައް ފޮޅާލިއެވެ. ”ހަަމަޖެހޭށޭ؟ ހަމަޖެހެވޭތަ ވަލު މެދަށް އަހަރެން ގޭގަ ހުއްޓާ ގެނެސް ލީމަ؟؟!” ޔުމްނާގެ އަޑު ފަޅަފަޅާއިގެން ދިޔައެވެ. ”ހަމަޖެހެން ޖެހޭނީ ހަމަ. އަދިކިރިޔާ މި އިނގުނީ ޔުމްނާގެ ވެސް ގަދަފަދަ ރުޅިއެއް އޮންނަކަން. ވާރުތަވާ ކަމެއް ދޯ؟” މަލާމާތް ކުރާ ބީދައަކުން ޒަބީލު ބުންޏެވެ. ނަމަވެސް އޭގެ ރައްދުގައި ޔުމްނާ އެއްޗެއް ބުނަންވާއިރަށް ދުރުދުރުން ކާޅުތައް ހޭރެމުން އުދުހޭ ތަން ޔުމްނާ އަށް ފެނުނެވެ.

***

ހުސްނާ ކޮޓަރިއަށް ވަދެ ފުން ނޭވާއެއް ދޫކޮށްލިއެވެ. 12 ޖަހަން އަދި ލައްކަ އިރު އެބަ އޮތެވެ. ނަމަވެސް ވަގުތު ގިނަވުމަކީވެސް ނުރައްކާތެރި ކަމެކެވެ. ހުސްނާ ދެކޮޅު ދެކޮޅަށް ކޮޓަރި ތެރޭގައި ހިނގާލަ ހިނގާލާ ހުއްޓެވެ. ހިނގާ ހިނގާ ވަރުބަލިވެގެން ހުސްނާ އެނދުގައި ޖައްސާލިއެވެ. ހަމައެވަގުތު ކޮޓަރީގެ ބޮކި ނިވުނެވެ.

ހުސްނާ ހުރީ މިފަދަ ކަމެއް ވެދާނެކަމަށް ތައްޔާރުވެގެންނެވެ. ނަމަވެސް އޭރުވެސް އިންތިހާއަށް ބާރަށް ހުސްނާގެ ހިތް ތެޅެމުން ދިޔައެވެ. މަޑުމަޑުން އެނދުން ތެދުވުމަށްފަހު ހުސްނާގެ ބައްތި ފޯނު އަތު ޖެހޭތޯ މަސައްކަތް ކުރަން ފެށިއެވެ. ހުސްނާގެ ކޮޓަރީގައި ހުންނަ ކުޑަ ދޮރު ހަދާފައި ހުންނަނީ ލަކުޑިންނެވެ. އެހެންކަމުން ހަނދުވަރުގެ އަލި ކޮޓަރިއަށް ލިބޭ ގޮތެއް ނުވެއެވެ.

ހުސްނާ ތަންތަނުގައި އަތް ކާތަމުން ގޮސް ރީތިވާ މޭޒުމަތީގައި އޮތް ފޯނުގައި އަތް ޖެހުނެވެ. އަވަސްއަވަހަށް ފޯނު ނަގާ އޭގެ ފުލޭޝް ދިއްލާލުމަށްފަހު ކޮޓަރީގެ ފާރަށް އަލިކޮށްލިއެވެ. ނަމަވެސް އެ ވަގުތު ފެނުނު މަންޒަރުން ހުސްނާގެ ހިތް ފަޅާފައި ނުކުތް ފަދައެވެ.

ކުރިމަތީގައި ހުރީ ކަޅުކުލައިގެ ދުން ގަނޑެކެވެ. އާއެކެވެ. އިރުއޮއްސުނު ގަޑީގައި ފެނުނު އެއްޗެވެ. ހުސްނާ ހުރި ތަނަށް ގަނޑުވެފައި ހުއްޓެވެ. ދެން އިވެން ފެށީ ތުއްތު ކުދިން ރޯ އަޑެވެ. އެ އަޑު މުޅި ކޮޓަރި ތެރޭގައި ގުގުމަން ފެށުމުން ހުސްނާ ކަންފަތުގައި އަތް އެޅިއެވެ. ކިތަންމެ ހަނދާންކުރަން ބޭނުން ނުވިޔަސް މިއީ ހުސްނާއަށް ކުރިންވެސް އިވިފައި ހުރި އަޑުތަކެކެވެ.

ހުސްނާގެ ދެލޯ ކުރިމަތީގައި މާޒީ ފިލުމެއްހެން ކުޅެވެމުން ދިޔައެވެ. މިއީ އެ މަޚްލޫޤު ކުރާ ކަމެއްކަން ހުސްނާއަށް ރަނގަޅަށް އެނގެއެވެ. ނަމަވެސް އެއިން ސަލާމަތް ވެވޭނެ ގޮތެއް މި ވަގުތަކު ހުސްނާއަކަށް ނެތެވެ. ހުސްނާއަށް މާޒީ ސިފަވަމުން ދިޔައެވެ.

***

ހަނދުވަރުގެ އަލި މުޅި ތަނަށް ވެރިވެފައި އޮތެވެ. މާހައުލު ކިތަންމެހާ ވެސް އަމާން ކަމަށް ދައްކައެވެ. ނަމަވެސް ހުސްނާގެ އަތުގައި އޮތީ ހުސް ލެޔެވެ. ކުރިމަތީގައި އެ އޮތީ ތުއްތު 2 ކުދިންގެ ހަށިގަނޑެވެ. ހުސްނާގެ ހިތް ބަންބަންލާފައި ޖެހެމުން ދިޔައިރު ކުރިމަތީގައި އިން މަޚްލޫޤު ހެވި ދިލިފައި އިނެވެ.

***

މާޒީގެ އެ އަނދިރި ސަފުހާތަކުން ހުސްނާއަށް ނުކުމެވުނީ ކުއްލިއަކަށް ކޮޓަރި އަލިވުމުންނެވެ. ހުސްނާ ވަށައިގެން ދިމަ ދިމާ ބެލިއެވެ. އެ މަޚްލޫޤުގެ ހިލަމެއްވެސް ނެތެވެ.

***

ޔުމްނާ ބިރުން އިން ތަން ފެނި ޒަބީލުގެ ހިތަށް ކޮންމެވެސް ވަރެއްގެ ހަމްދަރުދީއެއް ވެރިވިއެވެ. ”ޔުމްނާ. އަހަރެން މިހާ ވަރަކުން މިރޭ މިތަނަށް މިގެނައީ ވަރަށް ބޮޑު ވާހަކައެއް ބުނަންވެގެން”. ޒަބީލު ބުންޏެވެ. މި އަޑު އިވިފައި ޔުމްނާ ޒަބީލާއި ދިމާއަށް ޝައްކުގެ ނަޒަރަކުން ބަލާލިއެވެ. ”އަހަރެންނަށް އިތުބާރު ނުކުރާނެކަން އަހަރެންނަަށް އެނގޭ. އަހަރެންނަށް ރަނގަޅީވެސް އިތުބާރު ނުކުރިއްޔާ. އެކަމަކު ޔުމްނާގެ ރަނގަޅަކަށް ބުނާ ވާހަކައެއް މީ. ނަމަ ނަމަ ހުސްނާއަށް އިތުބާރު ނުކުރާތި. ކަންތައްތައް މިހާުވެސް ވަރަށް ގޯސްވެއްޖެ. އަވަހަށް މާލެ ދޭ. އޭރުން ކިރިޔާވެސް ދެން ސަލާމަތްވެވޭނީ. އަހަރެން މިހެން މި ބުނަނީ ތަޖުރިބާ ލިބިހުރެ.” ޒަބީލު މިހެން ބުނުމުން ޔުމްނާ ހިތުގައި ސުވާލު މާކު ޖެހުނެވެ.

ނަމަވެސް ޔުމްނާ އިތުރު އެއްޗެއް ބުނަންވާއިރަށް ޒަބީލު ޔުމްނާގެ އަތުގައި ހިފައިގެން ހަވޭލީއާއި ދިމާއަށް ހިނގައިގަތެވެ. ހަވޭލީއާއި އަރާ ހަމަވުމުން ޒަބީލު ހުއްޓުނެވެ. ”އަވަހަށް ދޭ. ގޮސް ޤުރުއާން ކިޔަވާލަ ކިޔަވާލާ އިންދޭ. ޔުމްނާއަކަށް އޭނާ މިރޭ ގޯނާއެއް ނުކުރާނެ.” މިހެން ބުނެ ޒަބީލު އެނބުރި އައި ދިމާއަށް ހިނގައިގަތެވެ. ޔުމްނާގެ ހިތުގައި ސުވާލުތަށް ފުނިޖެހިފައި ހުއްޓެވެ. ޒަބީލަށް ޔުމްނާގެ ހާލަތު އެނގެނީ ވަކި ކިހިނެއް ހެއްޔެވެ؟ މިރޭ އަނެއްކާ ކޮން ކަމެއް ވަނީ ބާވައެވެ؟ އެންމެންވެސް ހުސްނާއާއި ދުރަށް ދިޔުމަށް ނަސޭހަތްތެރި މި ވަނީ ހުސްނާ ހަމަ އެހާވެސް ނުރައްކާތެރި ވެގެން ހެއްޔެވެ؟

ޔުމްނާ މި ހިޔާލުގައި ހުރެ ގެއަށް ވަދެ ކޮޓަރިއަށް ވަނެވެ. އަދި މަޑުމަޑުން ޒަބީލު ބުނި ފަދައިން ޤުރުއާން ކިޔަވާލަ ކިޔަވާލަ އިނެވެ.

***

ޒަބީލު ވަލުތެރޭގައި ހިނގާފައި ދިޔައިރު އޭނާގެ ސިކުނޑި ތެރޭގައި އެނބުރެމުން ދިޔައީ ޔުމްނާއެވެ. ޒަބީލު ޔުމްނާއަށް ހަޤީޤަތް ކިޔައިދޭން ކިތަންމެހާވެސް ބޭނުމެވެ. ނަމަވެސް މިރޭ އެކަން ކުރަން ހެޔޮވެސް ނުވާނެއެވެ. ޒަބީލު ހިނގާފައި ދަނިކޮށް ކުއްލިއަކަށް މީހަކު އޭނާގެ އަތުގައި ހިފިއެވެ. ޒަބީލު ހައިރާންކަމެއް ނެތި ފޫހިގޮތަކަށް ފަހަތް ބަލާލިއެވެ. ”ޒިންނީރާ.” ޒަބީލު ފޫހި ގޮތަކަށް ބުންޏެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.